Deuteronòmi

13

Idolatrìa e ‘d profeta fàuss

¹S’an mes a ti a seurt un profeta opura ‘n reveur^[1] ch’at propon un segn o ‘n prodigi, ²se col segn o prodigi ch’a l'avìa dite, a rivèissa bin, ma che chiel at disa ‘dcò d’andé dapress e ‘d rende l’adorassion a d'àutri dio ch’it l'has mai conossùje, ³ti daje nen da ment a le paròle ‘d col profeta o reveur. A l’é ‘l Signor, vòst Dé, ch’a veul buteve a la preuva për savèj s’i-j veuje pròpi bin con tut vòst cheur e con tuta vòstra ànima. ⁴Vojàutri venta ch’i vade dapress mach al Signor, vòst Dé, ch’a-j pòrte rispèt, ch’i scote ij sò comandament, ch’i-j ubidisse, ch’i-j rende l’adorassion e ch’i-j reste fedej. ⁵Riguard a col profeta o reveur, peui, col-lì a l’avrà da esse condanà a mòrt, përchè a l’ha predicà d’arvireve^[2] contra ‘l Signor, tò Dé, col ch’a l’ha fave seurte dal pais d’Egit e ch’a l’ha riscatave da la tèra anté ch’i j’ere dë s-ciav. Col òm a vorìa mach ch’it chitèisse ‘d marcé an sël senté che ‘l Signor, tò Dé, a l’avìa mostrate^[3]. A l’é parèj ch’it avras da ranché vìa ‘l mal da ‘n mes a ti.

⁶Se tò frel, fieul ëd tò pare, o fieul ëd toa mare, opura tò fieul o toa fija, o toa cara fomna, o tò pì grand amis, at cissèissa an secret an disend. “Doma, rendoma l’adorassion a d’àutri dio^[4]”, dio che ni ti, nì ij to antich a conossìo, ⁷- ëd divinità dij pòpoj ch’at ëstan dantorn, ch’a sio davzin o lontan, opura dij pòpoj ch’a stan da na banda o da l’àutra dla tèra - ⁸ti, dije pa ‘d sì, daje nen da ment. Abie gnun-a pietà o compassion ëd chiel; a l’ha gnun-a giustificassion^[5]: ⁹it l’has da felo meuire. Ch’it sie ‘l prim a tireje adòss na pera për masselo e che peui a lo fasa ‘dcò tut ël pòpol. ¹⁰It l’has da masselo a prassà, përchè a l’ha sercà ‘d portete lontan dal Signor, tò Dé, col ch’a l’ha fate seurte dal pais d’Egit, da la tèra anté ch’i j’ere dë s-ciav. ¹¹Tut ël pòpol d’Israel, quand ch’a lo sentirà, a na sarà sbaruvà e, an mes a ti, gnun a tornerà a comëtte na cativéria coma cola-lì.

¹³S’as sent a dì, ant un-a dle sità che ‘l Signor, tò Dé, at don-a përchè it j’àbite, ¹³che ‘d gent përversa ‘d tò pòpol a sio sortì d’an mes a ti e ch’a l’abio tirasse darera ‘d gent ëd soa sità, disendije: “Andoma a rende l’adorassion a d’àutri dio che vojàutri e l’avìe mai conossù, ¹⁴ti, và prima a informete bin, anvéstiga e antérroga con diligensa. S’it treuve ch’a l’é pròpi parèj, ch’a sìa ‘n fàit sicur e che cost’ abominassion a l’è stàita përdabon comëttùa an mes a ti, ¹⁵buta a fil dë spa tuti j’abitant ëd cola sità con tut lòn ch’a peul essje, comprèis ël bestiam. ¹⁶Fàit sòn, ambaron-a lòn ch’a-i resta dle speuje an mes ëd la piassa, e peuj dà ‘l feu a tuta la sità con tut lòn ch’a-i resta, e ch’a sìa parèj n’oferta an onor dël Signor, tò Dé. Che cola sità’a resta sèmper an rovin-a, ch’a ven-a mai pì arcostruvìa. ¹⁷Tut a sarà da consideresse sota antërdèt, pijne mai gnente për ti. Tut lolì përch’ a sìa pasià l’ira afrosa dël Signor, ch’a l’abia misericòrdia e compassion ëd ti e ch’at fasa multipliché, coma ch’a l’avìa bin promëttù ‘d fé ai tò antich. ¹⁸A l’é parèj ch’it l’has da fé ubidiensa al Signor, tò Dé, an osservand tùit ij sò comandament ch’it dago ancheuj për fé lòn ch’a l’é giust dëdnans a chiel.

Nòte[modifiché]

1. O “un visionari”, “un ch’a fà ‘d seugn profètich”.

2. O “ch’a l’ha predicà l’apostasìa”.

3. O “comandate ‘d fé”.

4. O “dio strangé”.

5. O “fà nen finta ‘d gnente”, “stërmje pa”.