Cantich 8

8

Càntich d’anvìa

[Chila a chiel:] ¹Coma ch’i vorerìa che ti 't fusse mè frel pì cit, bailà da mia mare. Rëscontràndte për stra, i podrìa basete sensa esse criticà da gnun. ²Mi 't porterìa ant la cà ‘d mia mare, cola ch’a l’ha anlevame. It farìa tasté mè vin përfumà e 'l giuss ëd mè pomgranà^[1].

[Chila a chiel:] ³Soa man mancin-a a l'é sota mia testa, e con la drita a m'ambrassa.

[Chila a le fiëtte:] ⁴Fijëtte 'd Gerusalem, iv n'ëscongiuro: dësvijene pa da nòst amor, bustichelo nen anans ëd sò temp.

[Le fiëtte a propòsit ëd chiel:] ⁵Chi é-la cola fija ch'a riva dal desert ambrassà a sò amor?

[Chila a chiel:] I l'hai dësviate sota 'l pomé, ambelelì andova che toa mare a l'avìa consepite, andova toa genitriss a l’avìa butate al mond.

[Chila a chiel:] ⁶Butme parèj d'un cacèt dzora 'd tò cheur, tanme un cacèt ansima a tò brass. Përchè l'amor a l'é fòrt parèj dla mòrt, la passion as peul pa arziste coma l’anfern^[2]. A l'é na spluva anvisca parèj dla lòsna. ⁷L'eva dël mar gròss a basterìa pa a dëstissé l'amor. Gnanca tùit ij fium a podrìo inondelo. Se quaidun a provèissa a catelo con tute soe richësse, a l'avrìa an cambi mach dëspresi.

[Ij frej ‘d chila:] ⁸I l’oma na seur ch’a l’é ancora pcita, tròp giovna pr’ avèj d pope. Còs avrìo-ne nojàutri da fé për chila cora che a-j faran la ronda? ⁹S’a fussa na muraja ‘d na sità i-j drisserìo ansima 'd tor d'argent. Se a fussa na pòrta, l'arforserìo con tàule 'd pin.

[Chila:] ¹⁰I j’ero tanme na muraja, e mie pope a j’ero tanme le tor ëd na fortëssa. Quand ël mè amà am varda, chiel a resta ancantà da lòn ch’a vëd.

[Chila a chiel:] ¹¹Salomon a l'ha na bela vigna a Bal-Amon; chiel a l'ha dala an guerna a ‘d vignolant. Mincadun ëd lor a versa mila tòch d'argent për sò frut. ¹²Ti tente pura ij tò mila séchel d'argent, Salomon, dajne dosent ai tò vignolant. Përchè mia cita vigna a l'é ambelessì e a l'é tuta për mi.

Epìlogh

[Chiel a chila:] ¹³O ti ch'it ëstaghe ant ël giardin, ij mè amis a serco dë scoté con atension lòn ch'it dise. Fame sente 'dcò mi ^[3]toa vos!

[Chiel a chila:] ¹⁴Fà an pressa, o mè amor! Lest parèj ëd na gasela o na serbiata giovo an sle montagne dle spéssie përfumà.

Nòte

1. Ël TM a les tanme pronòm singolar con sufiss dla prima përson-a singular dël possessiv: רִמֹּנִי (rimmoni, “mè pomgranà”). Jë LXX a l'han genitiv plural: ῥοῶν μου (hroōn mou, “essensa, licor, nectar, giuss dij mè pomgranà”).

2. O “ël mond dij mòrt”.

3. L'imperativ הַשְׁמִיעִינִי (hashmiʿini) a foson-a parèj ëd n'arcesta. Chiel a-j ciama a soa amà ëd feje sentì soa bela vos.