Surtia 26

STANSIA. STÒFE E CUÈRT

Surtìa 26

26:1 Për lòn ch'a rësguarda la Stansia, it la faras con des pess ëd tèila 'd damasch artorzù, ëd porpra viòla, ëd porpra rossa e d'ëscarlat. It faras ëd mistà 'd cherubin, travaj dë scultor. 26:2 Longhëssa d'un teil: vinteut cùbit; largheur: quat cùbit për pess ëd tèila; midema dimension për tùit ij teil. 26:3 Sinch pess ëd tèila a saran giontà ansema e 'dcò j'àutri sinch a saran unì un a l'àutr. 26:4 It faras ëd cordon ëd porpra viòla an sla bordura dël prim teil an cò dl'arsamblura; acsì it faras l'órlo dël teil pì lontan ëd la sconda samblura. 26:5 Sinquanta cordon a saran fàit al prim pess ëd tèila e d'àutri sinquanta a la stremità dla sconda samblura: ij cordon a corispondran un con l'àutr. 26:6 It faras sinquanta bocle d'òr e it gionteras ij teil un a l'àutr për mojen ëd le bocle, parèj che ël tut a formerà n'Abitassion sola. 26:7 A saran fàit peui pess ëd tèila 'd pluch ëd crava për constituì 'l tabernàcol dëdzora dl'Abitassion. It në faras ùndes teil. 26:8 Longheur d'un pess ëd tèila: tranta cùbit; larghëssa: quat cùbit për teil. Midema dimension për tùit j'àutri ùndes. 26:9 It butras ansema sinch teil da na banda e sinch da l'àutra. It dobieras andaré 'l sest teil sversàndlo an sla part an facia dla tenda. 26:10 It faras 'dcò sinquanta cordon an sla bordura dël prim pess ëd tèila, che a l'é an cò dla samblura, e sinquanta cordon an sl'órlo dël tèil ëd la sconda samblura. 26:11 A saran faite sinquanta bócole d'aram, it butras andrinta ai cordon le bócole e t'assembleras tut ansema a la tenda; përparèj a formerà un tut ùnich. 26:12 La part an pì ch'a pend ant ij teil ëd la tenda, visadì la metà 'd na pëssa 'd tèila dzorpì, a pendrà an sla part darera dla Stansia. 26:13 Ël cùbit an dzorpì da na part, parèj com ël cùbit n'ecedensa da l'àutra, ant ël sens ëd la longhëssa dij teil ëd la tenda, artombran dzora dij doi fianch ëd la Stansia për quatela da na part a l'àutra. 26:14 Për la tenda peui, it faras na covertura 'd peil ëd moton tensùe 'd ross e dë dzora na covertura 'd peil ëd tasson.

LA BOSCAMENTA

26:15 Peui a saran fàit për la Stansia le plance an bòsch ëd gasìa, da butesse drite. 26:16 Des cùbit la longhëssa 'd minca na plancia e un cùbit e mes ëd largheur. 26:17 Minca na plancia a l'avrà doi morion, gionzù un a l'àutr da un rinfòrs. Përparèj it faras për tùit j'ass ëd la Stansia. 26:18 Donch a saran faite le plance për la Stansia: vint ass për la banda vers ël mesdì, a sud. 26:19 It faras 'dcò quaranta 'mpeduss d'argent sota le vint plance, doi pé sota minca n'ass, për ij sò doi ampeduss e doi basi sota l'àutra plancia për ij sò sostegn. 26:20 Për lë scond fianch ëd la Stansia, anvers tramontan-a, vint plance, 26:21 parèj 'dcò sò quaranta ampeduss d'argent, doi pé sota n'ass e doi sota l'àutr. 26:22 Për la part darera dla Stansia, anvers ponent, it faras ses plance. 26:23 A saran faite 'dcò doi ass për ij canton ëd la Stansia dla banda dëdzora. 26:24 Le plance a saran assemblà con doi tòch istess cobià e giontà 'd pianta da sota fin-a dzora, a l'autëssa dël prim anel. Parèj a saran për mincadun ass: as formeran doi canton. 26:25 A-i saran 'dcò eut plance con sò ampeduss d'argent: sëddes basi, doi sota n'ass e doi sota l'àutra. 26:26 Nen mach, ma 't faras ëd traverse 'd bòsch ëd gasìa: sinch për le plance 'd na banda dla Residensa 26:27 e sinch për j'ass dl'àutra part, nen mach, ma 'dcò sinch traverse për le plance dla part darera, anvers ponent.

26:28 La traversa 'd mes, a metà auteur dj'ass, a-j dëstraversrà da na banda a l'àutra. 26:29 Le plance it-j patineras ëd feuja d'òr, e 'dcò d'òr a saran ij sò anej, che a serviran për anfilé le traverse, e 'dcò cole a saran arvëstìe d'òr.

26:30 La Stansia a sarà constrùa dla manera ch'i l'hai mostrate an montagna.

Ël VEL

26:31 It faras un vel ëd porpra violëtta, porpra rossa, ëscarlata e damasch torzù. A-i saran brodà figure 'd cherubin, travaj dissegnà. 26:32 A sarà pendù a quat colòne 'd gasìa, laminà d'òr, con rampin d'òr e che as pògio ansima a quat ampedus d'argent.

26:33 Ël vel a sarà butà sota le bocle e ambelelà, andrinta e oltra 'l vel, it faras intré l'Erca dla Testimoniansa. Ël vel a l'avrà da esse për vojàutri la separassion an tra'l Sant e'l Sant dij sant.

26:34 La covertura dl'Erca dla Testimoniansa a sarà butà ansima, ant ël Sant dij sant.

26:35 La taula a sarà butà fòra dal vel e 'l candlé an facia a la taula an sla part a mesdì dla Stansia; nopà la taula it la butras a tramontan-a. 26:36 It faras peui un ridò për l'intrada dla tenda, ëd porpra viòla e rossa, ëd porpra ëscarlata e damasch torzù, travaj ëd brodeus. 26:37 Për ël ridò it faras sinch colòne 'd gasìa che a saran patinà d'òr. Sò rampin a saran d'òr e sinch anpeduss d'aram a saran fondù.

À à È è É é Ì ì Ò ò Ó ó Ù ù Ë ë