Salm 107

107

L'autor a ringrassia Dé për Soa bontà anvers ël pòpol d'Israel ch'a l'era stàit esilià.

107:1 Ringrassié Nosgnor, përch' a l'é brav, përché Sò amor fedel a dura për sèmper! 107:2 Ch' ij riscatà dal Signor, coj ch'a son stàit salvà da la potensa dij sò nemis ëd lor, ch'a lo faso savèj a tùit! 107:3 Përché Chiel a l'ha archeujì j'esilià da tùit ij pais, da l'alvant e dal ponent, dal nòrd e dal mesdì.

107:4 A-i ero 'd coj ch'a 'ndasìo 'd sa e dlà ant ël desert, spërdù e sensa ca. 107:5 A l'avìo fam e sèj; a l'ero lì lì për meuire. 107:6 Sagrinà coma ch' a l'ero, a l'han crijà: "Nosgnor! Giutane!" e Chiel a l'ha salvaje da l'aflission. 107:7 A l'ha portaje drit al sicur, ant na sità ch'a-i podèisso sté.

107:8 Ch'a làudo Nosgnor për Sò grand' amor e për le meravije ch'a l'ha fàit për lor! 107:9 Përché Chiel a pàsia la sèj e a gava la fam con n'abondansa 'd bon-e ròbe. 107:10 A-i ero 'd coj ch'a vivìo ant ël top e ant la scurità pì ancreusa ëd na përzon, fissà con ëd greve caten-e. 107:11 A l'avìo arvirasse contra la paròle 'd Dé e dispresià ij consèj ëd ël Pì-Àut. 107:12 A l'é për lòn ch'a l'avìa crasaje con ëd grev travaj; a l'ero drocà e gnun a podìa giuteje.

107:13 Sagrinà coma ch' a l'ero, a l'han crijà: "Nosgnor! Giutane!" e Chiel a l'ha salvaje da l'aflission.107:14 Chiel a l'ha faje seurte dal top e da la scurità pì ancreusa e a l'ha s-ciapà soe caten-e 'd lor. 107:15 Ch'a làudo Nosgnor për Sò grand' amor e për le meravije ch'a l'ha fàit për lor! 107:16 Përchè Chiel a l'ha fàit andé a tòch le pòrte 'd bronz ëd le përzon andoa ch'a stavo e a l'ha mandà 'n frise soe bare dle frà.

107:17 A-i ero 'd coj ch'as portavo coma 'd fòj; a l'ero arvirasse e a patìo për ij sò pecà. 107:18 A podìo nen soporté gnanca la vista 'd ròba da mangé e a picavo a l'ùss ëd la mòrt.

107:19 Sagrinà coma ch' a l'ero, a l'han crijà: "Signor, giutane!" e Chiel a l'ha salvaje da l'aflission. 17:20 A l'ha mandaje Soa Paròla e a l'ha varije, ambrancandje da l'ùss ëd la mòrt. 107:21 Ch'a làudo 'l Signor për Sò grand' amor e për le meravije ch'a l'ha fàit për lor! 107:22 Ch' a smon-o 'd sacrifissi 'd ringrassiament e ch' a canto con gòj a rësguard ëd ste assion gloriose!

107:23 A-i ero 'd coj ch'a l'avìo 'mbarcasse ant ëd bastiment, përcorend le grande rote dël comersi. 107:24 Ëdcò lor a l'avìo fàit l'esperiensa dla potensa 'd Nosgnor an assion, Soe euvre ch'a sburdisso ant ij mar pì ancreus. 107:25 Ant un Sò òrdin a l'era formasse n'oragan ch'a levava 'n àut dj'onde poderose. 107:26 Sò bastiment ëd lor a l'era sbatù fin-a al cel e peuj campà torna giù ant l'ancreus ëd l'eva. Ij marinar a na j'ero terificà. 107:27 A strambalavo e balauciavo tanme dij ciuch, e a savìo pì nen cò fé.

107:28 Sagrinà coma ch' a l'ero, a l'han crijà: "Signor, giutane!" e Chiel a l'ha salvaje da l'aflission. 107:29 Antlora a l'ha calmà l'oragan tant da esse mach un ciusion e a la chietà le onde. 107:30 Che benedission ch'a l'era un mar pasì e podèj tornessne a l'arpar d'un pòrt! 107:31 Ch'a làudo 'l Signor për Sò grand' amor e për le meravije ch'a l'ha fàit për lor! 107:32 Ch'a na faso le làude an pùblich dë 'dnans a la ciambreja e dë 'dnans le autorità dla nassion!

107:33 A l'é Nosgnor ch'a cambia ij fium ant un desert e le surgiss d'eva an tèra sëcca. 107:34 A l'é Chiel ch'a cambia 'n teren frutos ant un desert amèr e salà për motiv ëd la gramissia 'd coj ch'a vivo ansilà, 107:35 ma a l'é 'dcò Chiel ch'a cambia ij desert ant lagh d'eva dossa e la tèra sëcca ant ëd surgiss d'eva. 107:36 A l'é Chiel ch'a porta coj ch'a l'an fam a stabilisse 'mbelelà e a fabricheje 'd sità.

107:37 Lor a sëmno ij sò camp, a pianto le sue vigne e a na ciapo d'arcòlt bondos. 107:38 Quant ch'a-j benediss! Ansilà lor as fan ëd gran' famije e ij sò strop ëd bestiam a chërso 'd nùmer. 107:39 Quand ch'a calo 'd nùmer e amprovrisso për motiv d'opression, crasà da 'd sagrin e d'aflission, 107:40 Nosgnor a versa 'd dëspress ans ij sò prinsi 'd lor e a-j fà dësbergiairé ant ëd desert ch'a-j fà perdse, 107:41 ma a salva ij póver dai sò sagrin ëd lor e a-j fa chërse la famija tanme 'd strop ëd fèje. 107:42 Ij giust a vëdran tut lòn e a na saran pien ëd gòj, ma ij gram a l'avran mach da sté ciuto. 107:43 Coj ch'a son savi ch'a pijo tut sòn a cheur; a saran lor ch'a faran l'esperiensa dl'amor fedel ëd Nosgnor.