1 Cronache 16

16

David a guerna 'l cult

16:1 Përparej che dòp che a l' avìo portà l'Erca 'd Nosgnor drinta dël tabernàcol che David a l' avia drissàje, a l'han smonù dëdnans a Dé dj'olocàust e d'assion ëd grassie. 16:2 Ant ël moment che David a l'avia compì 'd fé monté d'olocàust e 'd sacrifissi'd pas, a l' ha benedì la gent ant ël nòm ëd Nosgnor. 16:3 E a l'ha fait ëd porsion për tùit j'Israelita, òm e fomne, na fogassa 'd pan con carn rostìa e na torta d'uva passola.

Ël servissi dij levita dëdnans a l'Erca

16:4 Antlora a l'ha stabilì David ëd levita përchè a ufissièisso dëdnans l'Erca'd Nosgnor, d'anvochelo, deje 'd grassie e laudelo. 16:5 Asaf, ël cap, e so sgond, Zecaria; Asiel, Semiramòt, Jechiel, Mattitia, Eliab, Benaia, Obed-Edom e Jeiel ch'a l'avia d'arpe e'd lire; e Asaf a tocava ij cìmbali. 16:6 E Benaia e Jacasiel, sacrificator, a sonavo sèmper le trombette dëdnans l'Erca dl'aliansa'd Nosgnor.

David a ringrassia Nosgnor

16:7 Antlora an col di, David a l'ha carià Asaf e ij sò frej, dl'ancàrich ëd canté për la prima vira cost salm për deje grassie a Nosgnor:

16:8 Laudé Nosgnor, anvoché so nòm! Fé conòsse an tra le gent lòn ch'a l'ha fait! 16:9 Cantelo, canteje' d salm, parlè 'd soe maravije! 16:10 Glòria' d sò nòm, ch'a l'é sant, lassè che'l cheur ëd coj che a serco Nosgnor a argioissa. 16:11 Serché Nosgnor e sò podej, serché sémper sò visagi! 16:12 Avisevne dle maravije che a l'ha fàit, so miràcoj e ij so giudìssi. 16:13 Vojàutri, smens d'Israel, i seve sò servent, fieuj 'd Giacòb, i seve ij sò sernù. 16:14 Chiel, Nosgnor, a l'é nòst Dé, ch'a compìss soe decision për tuta la tèra. 16:15 Avisevne sémper ëd soa aliansa, dla promëssa fàita për mila generassion. 16:16 L'aliansa tratà con Abraam, ël giurament fait con Isaach. 16:17 Che a l' ha conferma a Giacòb tanme decret a Israel an aleansa sensa fin: 16:18 An disend: "Iv darai 'l pais ëd Canan, për sòrt ëd vòstra ardità esclusiva. 16:19 Combin che vojàutri i seve pòca gent, pròpi' d pòch bon nùmer e forësté ant ël pais. 16:20 Parej che lor a sarìo andàit ramingh ëd nassion an nassion, e d' un regn anvers n' àutr gent. 16:21 Mach che a l' avrìa pa përmëttù che gnun a l' aveissa maltrataje e nen mach, ma fin-a a arpiè ij re për protegie. 16:22 "Toché pa ij me consacrà, fé nen ëd mal ai me profeta!". 16:23 Canté a Nosgnor, tuti voi ch'i steve ant la tèra, nunsié tuti ij di sua salvëssa 16:24 Conté soa glòria an tra le gent, e soe maravije an tra tùit ij pòpoj. 16:25 Përchè grand a l' è Nosgnor, e degn ëd tuta làuda, a l' è temìbil dzora a tuti ij dé; 16:26 an efet tuti ij de a son mach ëd mistà, ma mach chiel a l'ha fait ij cej. 16:27 Splendrior e maestà a stan dëdnans a sò visagi, fòrsa e argiojissansa andova che chiel a l'é. 16:28 Rendje a Nosgnor, famije dle gent, rendje a Nosgnor glòria e onor. 16:29 Rendje a Nosgnor ëd glòria për sò nòm! Porté n'oferta e vnije dëdnans; adorelo an santa magnificensa! 16:30 Trambleje dëdnans, voi tuta la tèra! Òi, 'l mond a l' è frem, bogia pa! 16:31 Ël cel ch' argiojissa, che la tèra a lo sélebra. Che as peussa dì an tra le gent: "Nosgnor a regna!". 16:32 Ch' arson-a ' l mar contut lòn che a-i è, ch'a giùbilo ij camp con tut lòn che a l'han; 16:33 antlora j' erbo dël bòsch a podran crijé'd gòj dëdnans a Nosgnor, përchè a ven a giudiché la tèra. 16:34 Laudé Nosgnor, përchè a lé brav! So grinor a përdura për sempe. 16:35 Parlé parej: Salva nojàutri, Dé'd nòstra salute, salvne, e và a cheuine tuti an tra le gent, al fin che noi i peusso selebré tò Nòm sant, e che nòstra glòria a sia ant ël laudete! 16:36 "Benedì a sia Nosgnor, Dé d' Israel, d'eternità an eternità. E tuta la gent a l'ha rëspondù: Amen! Laudé Nosgnor!".

David a nòmina ij cap dël cult

16:37E David a l'ha lassà ambelelà, dëdnans a l'Erca dl'aleansa'd Nosgnor, Asaf e ij sò frej, për fé semper ël servissi, conform a lòn che ventava fé minca di an facia a l'Erca. 16:38 Oved-Edom e soa gent a l'ero sessanteut: Oved-Edom fieul ëd Iediton e Cossà tanme portié. 16:39 David a l'ha lassà'l sacerdòt Sadòch e ij sò frej preivi dëdnans al tabernàcol ëd Nosgnor, ant ël leu àut ch'a-i j'era a Gabaon. 16:40 Përchè minca di a andèisso a eufre a Nosgnor l'olocàust dla matin e dël vespr dzora dl'autar, conform a la Lei che Nosgnor a l'ha comandà a Israel. 16:41 Con lor a-i j'era Eman, Iediton e d'àutri levita designà për nòm a laudé Nosgnor: Përchè sò amor a përdura për sémpe. 16:42 A l'avìo 'd trombe, cìmbaj cha sonavo e d'àutri strument ëd cant sacrà. E ij fieuj ëd Iediton a guernavo la porta. 16:43 E tuta la gent a l' è andasne, mincadun a ca soa, e David a l'é tornà për benedì soa ca

https://lumina.bible.org/bible/2+Chronicles+16

À à È è É é Ì ì Ò ò Ó ó Ù ù Ë ë