Ij Salm

37. Fate nen vnì ‘l sangh cativ

Ël Salmista a esorta ‘d nen invidié ij pecator, ma ‘d fidesse ‘d Nosgnor e d’ ubidije, përchè chiel, an soa giustissia, a-j rendrà lòn ch’a mérito e a guernerà ij giust. Quand che ‘l fum dël giudissi a sarà svanì, ij gram a-i saran pì nen e ij giust a resteran e arseivran l’ardità dle promësse. Cost Salm a l’é n’acròstico, minca vers a comensa con na litra dl’alfabet ebràich an órdin.

¹Ëd David.

Alef - Fate nen vnì ‘l sangh cativ përchè ij pecator a smija ch’a-j vada sèmpe bin; invidia pa coj ch’a fan ëd malfàite, ²përchè a son tanme l’erba, bin tòst a vniran fiap. Tanme ‘d fior ëd la prima, bin tòst a vniran sèch.

Bet - ³Confìde ‘nt ël Signor e fé ‘l bin; antlora i vivreve al sicur ant ël pais e fosonreve. ⁴Guardé Nosgnor com na delìssia e chiel a sodisferà j’anvìe ‘d vòst cheur.

Ghimel - ⁵Fida al Signor tut lòn ch’it fas. Abie fiusa an chiel e at giutrà. ⁶Chiel a farà splendrì toa nossensa tanme la primalba, e la giustissia ‘d toa càusa a bërlusrà coma ‘l sol a mesdì.

Dàlet - ⁷Arpòss-te an Nosgnor e spera ‘n chiel. Sagrinte nen ëd la gent grama ch’a smija sempe ‘d fé foson, cruss-te pa dij sò ambreuj. ⁸Fate nen vnì la flin-a! Anrabtje pì nen. Përd nen la passiensa, ch’it faries mach dël mal. ⁹Përchè a sò temp la gent grama a sarà campà fòra dal pais, ma coj ch’as fido an Nosgnor a na saran ij padron.

Vau - ¹⁰Ancora ‘n pò e la gent grama a dësparirà. It beicheras andoa ch’a stasìo, ma it jë troveras pì nen. ¹¹A saran j’umij ch’a ‘rseivran la tèra an ardità e a-i vivran an pas e prosperità.

Zain - ¹²La gent grama a briga contra ij giust, a ‘rgrigna ij dent contra ‘d lor, ¹³Ma Nosgnor as na rij ëd lor, përchè a ved che soa condan-a ‘d lor a l’é press a rivé.

Het - ¹⁴La gent grama a dësfodra la spa e a tend l’arch për tireje adòss ai pòver e j’umij, për sassiné coj ch’a marcio an sla bon-a stra; ¹⁵ma soa spa ‘d lor a sarà l’istessa ch’a-j intrerà fin-a al cheur e ij sò arch a saran s-ciapà.

Tet - ¹⁶A val mej la povertà d’un sol giust, che la richëssa ‘d tanta gent grama. ¹⁷Përchè ij bras fòrt dij gram a saran ës-ciapà, ma coj dij giust a saran sostnì

Iod - ¹⁸Dij bzogn dij nossent Nosgnor as na pija soen e lor a ‘rseivran n’ardità ch’a-j durerà për sèmper. ¹⁹A l’avran pa da vërgognesse an ëd temp gram; an ëd temp ëd famin-a a-i mancherà pa da mangé.

Caf - ²⁰La gent grama as n’andrà an perdission, e ij nemis ëd Nosgnor as dësmorteran, a vniran fiap tanme ‘d fior ant un camp - a svaniran tanme ‘d fum.

Làmed - ²¹L’ingiust a ‘mpërmuda ma a dà pì nen andaré; a l’opòst, ël giust a l’é generos e a don-a. ²²Coj che Nosgnor a benedis a saran padron ëd la tèra; coj ch’a-j malediss a na saran lassà fòra.

Mem - ²³Ij pass d’un òm a son rendù ferm da Nosgnor, quand chiel as compiass ëd coma ch’as pòrto. ²⁴Se mai as antrapa, a casca pa, përché Nosgnor a lo sostniss.

Nun - ²⁵Da giovo fin-a ‘ncheuj, che già i son vej, i l’hai ancora da vëdde ‘n giust ch’a sia stàit bandonà, ni che ij sò fieuj a ‘ndèisso a ciamé la limòsna. ²⁶Ël giust a prësta a pien-e man e ij sò fieuj a son considerà bonoros.

Samech - ²⁷Schivia ll mal e fà ‘l bin, e t’abiteras and na cà për sèmper, ²⁸përchè al Nosgnor a-j pias lòn ch’a l’é giust, Chiel a bandon-a mai ij sò fidej. Lor a son guernà për sèmper, ²⁹mentre che ij fieuj dla gent grama a sara a saran ëstrompà. Ij giust a ‘rseivran an ardità la tèra e a-i abiteran për sèmper.

Pe - ³⁰Ël giust a l’ha ‘d làver ëd saviëssa, soa boca a dis la vrità; ³¹a pòrta ‘nt ël cheur la lej ëd sò Dé, ij sò pass a strambalo pa.

Sade - ³²La gent grama a stà a l’avàit për ciapé ij giust e a serco na scusa për masseje, ³³ma Nosgnor a-j lassa pa an soe man ëd lor, o a përmet che ij giust a sio condanà quand ch’a lor a son portà an giudissi.

Cof - ³⁴Spera an Nosgnor, marcia an sij senté che chiel a dis, antlora chiel at leverà an àut e ti ‘t t’avras la tèra an ardità; it na vëdras lassà fòra la gent grama.

Resh - ³⁵I l’hai vdù ‘d gent grama e sensa tanti scrùpoj ch’a fosonavo tanme d’erbo an sò teren nativ, ³⁶ma, quand i l’hai vardà torna, a-i ero dësparì! I l’hai sercaje, ma i l’hai pa pì trovaje!

Shin - ³⁷Bèica con atension coj ch’a son onest e bon, përché a-i é n’avnì për coj ch’a ten ëd bon cont la pas. ³⁸J’arviros, contut, a saran dël tut dësblà, l’avnì dla gent grama a sarà dëscancelà.

Tau - ³⁹A l’é Nosgnor ch’a salva ij giust, a-j guerna ant ël dì dël perìcol. ⁴⁰Nosgnor a-j giuta e a-j libera; chiel a-j libera da la gent grama e a-j salva, përchè an chiel lor a trovo soa sosta.