Salm 14

Ij Salm

14. A son pròpi 'd fòj

Le scritor ambelessì a armarca che l'umanità a l'é tanme 'd pòm mars, coròt moralment. Ij malfator as na sbefio del pòpol ëd Nosgnor e a-j fan d'ògni sòrt ëd brut ëschers, ma lë scritor ëd cost Salm a l'ha fiusa che Nosgnor a-j guerna e a vnirà 'l dì che chiel a vendicrà Israel.

¹Për ël magìster dla musica, ëd David. A son pròpi 'd fòj coj ch'a diso drinta 'd lor^[1]: "Tant, Nosgnor a-j n'anfà gnente 'd lòn ch'i foma!^[2]". A son mars coma 'd bolé, a son ëd malfator; gnun ëd lor a fà lòn ch'a l'é giust^[3]. ²Nosgnor a bèica dal cel e a marca j'òm për vëdde s' a-i sia quajdun ch'a l'abia 'd bonsens e ch'a lo serca. ³Nò, tùit a l'han voltaje le spale, tùit a son përvertisse; a-i é gnun ch'a fasa 'l bin, gnanca un. ⁴Amprendran-ne mai coj-là? Mè pòpol as lo mangio ant un bocon tanme 'd pan; a-j passa gnanca 'nt la ment dë scoté Nosgnor. ⁵Contut ël dì a vnirà quand ch'a saran ciapà da lë sparm, përchè Nosgnor a l'é con coj ch'a lo scoto^[4]. ⁶Vojàutri i veule mach smerdé ij chërdent^[5] ma Nosgnor a l'é col ch'a-j giuta^[6]. ⁷A-i é fòrse quajdun an gir^[7] ch'a salvrà Israel? Èh, a-i é: a l'é Nosgnor. Quand che Chiel a ristablirà Sò pòpol, Giacòb a crijarà 'd gòj, e Israel a spricerà d'esultansa!

Nòte

1. O "An sò cheur".

   1. O "Dé a-i é nen", "Dé a ved nen".

2. Ij verb dë sto vers a fëscrivo la condòta tìpica 'd coj ch'a fan ël mal. La rassa uman-a antrega a l'é caraterisà da na condòta grama e pien-a 'd pëccà. Cost ateism pràtich - ëd gent ch'a viv coma s'a l'avèissa pa da rëspond ëd sò comportament a Nosgnor - a-j rend dë stupid përché la caraterìstica dij stupid a l'é 'd nen rendse cont o 'd neghé ch'a-j son sèmpe 'd conseguense negative, prima o peuj, ëd sò comportament ëd lor.

3. O "con la generassion dij giust".

4. O "coj ch'a son crasà".

5. O "sò arfugi".

6. O "dal mont Sion".