Levìtich

3

Ij sacrifissi ‘d comunion

¹Quand quaidun ëd vojàutri smon-a a Nosgnor un cap ëd cabial gròss com un sacrifissi ‘d comunion, a l’ha da smon-e un mas-cc o na fuméla sensa difét. ²L’ofertor a butrà soa man an sla testa dla vìtima e apress a la sgorsrà a l’intrada dla Tenda dël Rëscontr. Ij sacerdòt, dissendent d’Aron, a na spantieran ël sangh tut d’antorn dl’autar. ³Da cost sacrifissi ‘d comunion, a smonrà a Nosgnor, përchè ‘l feu a lo consuma, la grassa ch’a cheuvr ij buej e tut lòn ch’a-i é tacà, ⁴ij doi rognon e la grassa ch’a-j cheurv e ch’a quata ij fianch, e la risela dël fidich dëstacà ansema ai lómb. ⁵Ij sacerdòt dissendent d’Aron a lo brusran an sl’autar, dëdzora dl’olocàust butà an sël bòsch ch’a-i é ansima al feu: a l’é ‘l sacrifissi consumà dal feu, oferta d’odor agreàbil a Nosgnor.

⁶Se l’oferta smonà a Nosgnor com un sacrifissi ‘d comunion a l’é ‘n cap ëd bes-ce cite, feje o ‘d crave, a l’avrà da smon-e un mas-cc o na fumela sensa difèt. ⁷Se quaidun ëd vojàutri a smon-a ‘n bebero, a lo smon-rà dëdnans a Nosgnor, ⁸a-j butrà la man an sla testa e a lo sgorgërà dëdnans dla Tenda dël Rëscontr. Ij sacerdòt dissendent d’Aron a na spantieran ël sangh tut d’antorn dl’autar. ⁹Da cost sacrifissi ‘d comunion, a së smonrà a Nosgnor, për che ‘l feu a lo consuma, la grassa, la coa, ch’a la tirerà fòra antrega fin a doa ch’a l’é tacà al fil dla schin-a, la grassa ch’a quata ‘l vènter, ¹⁰ij doi rognon, con soa grassa d'antorn, cola ch'a cheurv ij fianch, e ij gròs lómb e la riséla dla fricassà, che as dëstacrà ansema. ¹¹Ël sacerdòt a lo brusrà tut an sl’autar, coma na provianda che ‘l feu a consumera an onor ëd Nosgnor.

¹²Se l’oferta a l’é da lë strop dle crave, a la smonrà dëdnans a Nosgnor, ¹³a butrà la man an sla testa e apress a la sgorserà. Ij sacerdòt dissendent d’Aron a na sbrinceran ëd sangh l’autar tut d’antorn. ¹⁴Da cost sacrifissi ‘d comunion, a smonrà a Nosgnor, për che ‘l feu a lo consuma, ¹⁵ij doi rognon, la grassa che a-i é ansima, la riséla dzora dël fìdich - ch'a sarà butà dëdzora dij doi rognon. ¹⁶Ël sacerdòt a lo brusrà tut an sl’autar, coma na provianda che ‘l feu a consuma an onor ëd Nosgnor. ¹⁷Costa-sì a l’é na lej përpètua che tute le generassion a l’han da osservé an tùit ij leugh andova ch’i sareve: i mangereve pa d’àutra grassa, nì tut lòn ch’a l’é ‘d sangh.