Ij nùmer

17

La vërga d’Aron a gica

¹Nosgnor a l’ha ‘ncora parlaje a Mosè^[1]. A l’ha dije: ²“Comanda a j’Israelita che ‘l cap ëd minca na tribù at pòrto ognidun na vërga, un-a për minca ‘n cap ëd tribù. dódes vërghe; it l’has da scrivje dzura a minca un-a ël nòm ëd chi a l’ha portala. ³An sla vërga ‘d Levi it ëscrivras ël nòm d'Aron, përchè a l’ha da essje na sola vërga për minca cap ëd tribù, ⁴It l’has da piasseje ant la Tenda dël Rëscontr dëdnans a l’Érca dl’Aleansa, ël leugh anté che mi im manifesto a vojàutri. ⁵La vërga dl’òm ch’i l’hai sernù a gicherà. Parèj i fareve chité le mormorassion dj’Israelita contra ‘d vojàutri.

⁶Antlora Mosè a l'ha parlà a j'Israelita, e tùit ij cap ëd tribù a l'han armëttuje na vërga cada un, l’é a dì dódes vërghe an tut, i comprèisa cola d’Aron. ⁷Parèj Mosè a l'ha butaje dëdnans a Nosgnor ant la Tenda dl’Aleansa ‘d Nosgnor. ⁸Ël di apress, quand che Mosè a l'é tornà ant la Tenda dla Testimoniansa, la vërga d'Aron dla tribà ‘d Levi a l'avìa gicà e fiorì: possà 'd boton, s-ciodù 'd fior e fin-a con amàndole mure. ⁹Antlora Mosè a l'ha gavà coste vërghe da dnans Nosgnor e a l'ha faje vëdde a tuti j’Israelita; costi-sì a l'han constatà 'l miràcol e mincadun a l'é pijàsse torna soa vërga.

La memòria

¹⁰Peui Nosgnor a l’ha dije a Mosè: “Pòrta la vërga d’Aron an facia dla Testimoniansa e ch’a sia guernà tamne na marca për costi arviros. Parèj it faras chité le mormorassion contra ‘d mi e a l’avran nen a meuire. ¹¹Mosè a l’ha fàit përparèj, a l’ha fàit tut lòn che Nosgnor a l’avìa comandaje.

¹²J’Israelita a l’han dije a Mosè: “A l’é sicur ch’i meuireroma! I soma përdù, tuti i soma përdù. ¹³Tuti coj^[2] ch’as ancalo a avzinesse al Tabernacol ëd Nosgnor, a l’han da meuire. L' avrom-ne antlora da s-ciopé fin-a a l'ùltim?”.

Nòte

1. Nùmer 17:1 an ësta Bibia a corispond al 17:16 dël test ebràich (BHS). Ch’as vëdda la nòta a 16:36.

2. Nùmer 17:13 an ësta Bibia a l'é 17:28 ant ël test ebràich (BHS). Ch'as varda la nòta an 16:36.