1 Cronache 17

XVII

Professia'd Natan

17:1 Ant ël moment che David a l'é andait a sté an sò palas, chiel a l'é andait a dije al profeta Natan: Mi i stago drinta a 'n palas ëd séder, antramentre che l' aleansa'd Nosgnor a l'é sota ij tapis ëd na tenda. 17:2 E Natan a l'ha dije a David. Fa tut lòn che a l'é drinta a tò cheur përchè Dé a l'é con ti. 17:3 Tutun, cola midema neuit Dé a l'é andait a comuniché a Natan costa paròla: 17:4 Vaje a dì a David mè servent: Parèj a dis Nosgnor: It saras pa ti che t'am drisseras na ca përchè mi i peussa steie.17:5 Përchè i l'hai pa abità drinta na ca, dal di che i l'hai fait monté la gent d'Israel fin-a'l di d'ancheuj. Ma i son ëstait sota na tenda, d'un tabernàcol a n'àutr tabernàcol. 17:6 Daspërtut che i l' hai marcià con la gent d'Israel, l'hai-ne mai parlà con un dij Giùdes d'Israel, che i l'avìa comandaje dë mnè an pastura mè pòpol , e l'hai-ne miraco dije: Përchè t'am drisse pa na ca'd séder?

17:7 Ore, donch, dije a mè servent, David: Përparej a dis Nosgnor dj' Armeje: Mi i l' hai pijate da la stabi, antramentre ti 't sbergiairave ''l cit ëstrop përchè ti't fùisse prinsi për mia gent, Israel. 17:8 E mi i son ëstait con ti daspërtut andova che ti 't l'has marcià, e i l'hai ardovù a nen [1] ij tò nemis dëdnans ëd ti, e i l'hai fate un nòm tanme ij potent [2] che a son an sla tèra. 17:9 I l'hai prontà un pòst për mia gent, Israel, e i l'hai dëstinalo përchè a peussa steje pasi; ij fieuj dla përversità a-j mnasseran pa pì, coma che a l'avìo fait anans, 17:10 e fin-a dal temp che i l'avìa mandà'd Giùdes për guerné Israel, mia gent. Mi i l'hai sotmetù tuti ij tò nemis. E ore i son mi a dite che 't farai na ca. 17:11 E a-i rivrà, ant ël moment che ij tò di a saran compì per andétne con ij tò pare, i farai alvé toa posterità dòp ëd ti, un dij tò fieuj, e i stabilirai sò regn frem. 17:12 A sarà chiel a construime na ca, e mi i farai an manera che sò tròno a vada a mantense frem për sempe. 17:13 Mi për chiel, i-j saraj tanme un pare, e chiel a sarà un fieul për mi. I-j gavrai pa mè grinor, com i l'avia solevaje [3] mia protession a tò predecessor. 17:14 Nen mach, ma i stabilirai për sémper mia ca e mè regn: e sò tròno a l'avrà mai pì fin. 17:15 Sòn, a l'é lòn che a l' é andait a dije Natan a David ant ël moment che a l'ha comunicaje costa vision profetica.

Preghiera 'd David a Nosgnor

17:16 Antlora re David a l'é andait a stesse dëdnans ëd Nosgnor e a l'ha dije: Chi son-ne mi, Signor Dé, e còsa ch'a l'é mia famija, përchè ti't l'àbie portame fin-a dova che i son ? 17:17 E sòn a l'é stait ancora pòch a tò euj, o Dé! e ti't l'has parlà dcò dla ca'd tò servent për ël temp a vnì. E ti 't l'has provëddùme parèj coma che i fùissa un grand òm, ti che it ses ël pì àut, Nosgnor Dé! 17:18 Lòn che podrialo ancora dite David an sl' onor che ti' t -j fase a tò servent? Ti't conòsse tò servent. 17:19 Nosgnor, për amor dël tò servent, e conform a tò cheur, it l'has vorsù fé tut sòn, fasend savej a tò servent toe maravije. 17:20 Nosgnor, a-i é gnun parèj ëd ti, e pa d'àutri dio che ti, conform a tut4 lòn che i l'oma sentù con nòste orije. 17:21 E an sla tèra a-i é pa na sola nassion che a sia parèj ëd toa gent Israel, che Dé a l'é vnùit a dësangagé për formé sò pòpol, për fete un nòm e për compì 'd maravije e miracoj, an taparand ëd nassion dëdnans a toa gent che ti't l'has rëscatà d'Egit. 17:22 Dla gent d'Israel, ti't l'has fane un pòpol për sémper, e ti, Nosgnor, it ses vnùit a esse sò Dé. 17:23 Ore, donch, Nosgnor, ch'a sia frema për sempre toa promëssa a tò servent e soa ca; e fà conform a toa paròla. 17:24 Ant ël moment che la gent at dirà: Ël Signor dj'Armeje a l'é 'l Dé d'Israel, a arconòsrà che tò nòm a l'é sensa fin. E la ca'd tò servent David a sarà fongà dëdnans ëd ti. 17:25 Përchè ti, mè Dé, it l'has arvelaje a tò servent ëd vorej fondé na ca për chiel. Për sòn mi, che i son tò servitor, im n'anacalerai 'd preghete përparej. 17:26 Ti, Nosgnor, it ses dabon Dé e it l'has comunicaje a tò servent costa bon-a promëssa. 17:27 Ore, ch'at piasa benedì la ca'd tò servent, përchè a peussa esse an etern dëdnans ëd ti! Përchè lòn che it benedisse ti Nosgnor, a sarà benedì përsémper.

Nòte

• [1] An Ebràich : "tajà fòra"

• [2] An Ebràich : "ij Grand"

• [3] Dcò : scartà

• [4] opura: conform a tuti

• [5] opura: toa paròla a peussa esse stabilìa an manera përmanenta