Salm 17

Ij Salm

17. Nosgnor!! Considera mia giusta càusa

Ël Salmista a ciama Nosgnor ch'a 'nterven-a an sò favor përché soa vita a l'é mnassà da nemis arzigos. A fà apel a la giustissia divin-a, përchè a l'é cert ëd soa nossensa. Pròpi përchè a l'é nossent, chiel as aspeta d'ancontré Nosgnor e arsèive na paròla ëd consolassion.

¹Orassion ëd David. Nosgnor!! Considera mia giusta càusa. Fà atension a mè crij d'agiut. Scota la preghiera ch'it smon-o s-cet. ²Fà na giusta decision an mè favor! Delibera lòn ch'a l'é giust! ³Ti 't l'has guardà da bin le motivassion ëd mè cheur. It l'has esaminame ant ël mentre ch'i dormìa. It l'has fane na valutassion e 't l'has trovà ch'i l'avìa gnun pecà. I l'hai ferm la determinassion ëd dì gnente ch'a peussa disse ‘n pëccà. ⁴I l'hai nen seguità lòn che 'l mond a fà. Giusta coma ti 't l'has comandà, i l'hai nen seguità le pianà 'd coj ch'a son dij violent. ⁵I seguito diligent la via ch'it l'has mostrame. I na ciapo gnun-a deviassion. ⁶Nosgnor! It t'invoco përchè it ëm scotraj. Scotame! Scota lòn ch'i diso! ⁷Fedel coma ch’it ses, fa vëdde a tuti le maravije ch'it fas, ti ch'it libere coj ch'a vardo a ti për trové 'd protession dai sò nemis. ⁸Guern-me tanme ti 't guerneissa ël luminèt dël tò euj! Stërmëme a l'ombra 'd toe ale! ⁹Guern-me da coj òm gram ch'am ataco. Ij mè nemis am stan d'antorn mach për massé. ¹⁰A l'han ëd cheur ëd pera, a parlo con arogansa. ¹¹Am ataco, adèss lor am stan d'antorn. A l'han l'intension ëd campeme a tèra. ¹²Ël mè nemis a l'é tanme 'n leon ch'a veul fé a tòch soa preda, tanme 'n leon giovo ch'as quacia an dij leugh stërmà.¹³Seurt fòra, Nosgnor! Pija posission dëdnans a chiel! Butlo an gionojon! Dovra Toa spa për libereme da stj'òm gram! ¹⁴Dovra Toa potensa për libereme da sti sasin, dai sasin dë sto mond! Soa prosperità ‘d lor a-j rend arogant. Ti 't l'has daje abondansa 'd beni, tut lòn ch'a vorio. A l'han tante masnà e a lor a-j lasseran le soe richësse. ¹⁶Për lòn ch'am rësguarda, përch' i son nossent, i vëddrai Tò visagi. Quand che mi 'm dësvijaraj, I godrai 'd Toa rivelassion.