Ij Salm

38. Nosgnor, i l’hai fate perde la passiensa

L’autor a ciama a Nosgnor ëd liberelo dai sò nemis. A confessa ij sò pëccà e a arconòss che ‘l motiv përchè chiel a l’é an crisi a l’é l’arzultà dl’assion dissiplinària ‘d Nosgnor. Pura, a ciama a Nosgnor ëd nen chitelo.

¹Un Salm ëd David anté ch’a ciama a Nosgnor ëd visesse ‘d chiel. Nosgnor, i l’hai fate perde la passiensa, vera, ma castigh-me nen con tanta fùria. ²Toe frece a l’han frapame e am son ficasse ant la carn, e ij tò colp am craso. ³Për motiv ëd toa ira, mè còrp antregh a l’é malavi; i l’hai përdù la salute^[1] për motiv dij mè pëccà. ⁴Mie colpe am rivo fin-a dzura dla testa, a son un pèis ch’a l’é tròp grand da porté. ⁵Le ferije ch’i pòrto an s’ mè còrp a van an cancren-a e a spusso, e lolì për motiv dij pëccà ch’i l’hai faje da stùpid. ⁶I son prostrà e abatù, i marcio tut ël dì trist e con la testa bassa. ⁷Na frev afoà am divora le buele, e ant tut mè còrp a l’é restaje pì gnente ‘d san. ⁸I son ësfinì e del tut disfàit. Ij mè lament a seurto da ‘n cheur angossà. ⁹Ti’t sas, Nosgnor, lòn ch’i n’hai anvìa përchè ti të scote bin minca mè sangiùt. ¹⁰Mè cheur a martèla, mie fòrse am bandon-o; ël lum dij mè euj as dëstissa. ¹¹J’amis e jë vzin as na stan bin lontan e a l’han pàu ‘d mia maladìa; fin-a mia famija as na sta lontan da mi. ¹²E coma se tut sossì a bastèissa nen, ij me nemis am buto dëdnans ëd tràpole për masseme. Coj ch’am veulo mal a fan dij progèt për ruvineme. A studio tut ël dì dij tradiment. ¹³Mi, contut, a soe mnasse ‘d lor i faso ‘l ciòrgn, i veuj scoté gnente; coma s’i fussa mut i doverto gnanca mia boca. ¹⁴I faso coma s’i sentissa nen, coma s’i l’avèissa gnente da replicheje.

¹⁵Nosgnor! Mia speransa a resta an ti; lass-me pa sensa rëspòsta, Signor, mè Dé. ¹⁶I l’hai pregà: “Lassje pa arlegress-ne dij mè sagrin, o ch’a canto vitòria ‘d mia dësfàita”, ¹⁷përchè i son lì-lì për tombé e i peusso pì nen soporté mè dolor. ¹⁸I confesso mia colpa, mè pëccà am tormenta. ¹⁹I l’hai ancora tanti nemis violent, a son ëd legion coj ch’am m’han an òdio sensa rason. ²⁰Am arpago con ël mal, ma mi i l’hai faje mach ëd bin; am acuso ch’i l’hai sercà ‘d fé ìl bin. ²¹Nosgnor! Chitme pa! Mè Dé! Slontante pa da mi! ²²Ven an pressa a giuteme, mè Signor, mè Salvator!

Nòte

1. O “ij mè oss a treuvo nen d’arpòs”.