Esechiel

6

Idolatria ant ël templ

¹La sesta anada da la deportassion ëd Jeconìa, ël sinch dël mèis ch’a fà ses, antramentre che mi i j'era setà drinta 'd ca mia, con dëdnans j'ansian ëd Giuda, la man ëd Nosgnor a l’ha ciapame^[1]. ²E vardè lòn che i l'hai vëddù: a l’era na figura ch’a smijava n'òm. Da lòn ch’a smijava soa vita an giù, a l’era parèj dël feu. Da la vita an sù a speldrìa coma l'argent afoà. ³Cola figura a l'ha dëstendù coma na forma 'd man e a l'ha rancame për ij cavej. Antlora, an cola vision mandà da Nosgnor, sò Spìrit a l'ha fame aussé an tra tèra e cel e a l'ha transportame a Gerusalem. I son artrovame drinta la pòrta intérna a nòrd dla sità, andova che as trovava na statua che a l'era n'ofèisa a Nosgnor medésim^[2]. ⁴A l’improvista a l’é manifestasse la presensa gloriosa^[3] dël Rè d’Israel, pròpi coma i l’avìa vëddula ant la pian-a. ⁵Nosgnor a l’ha dime: “Esechiel, varda anvers ël nòrd”. E mi i l'hai aussà j'euj e i l'hai vëddù n'autar che a dasìa ansima a na mistà pagan-a, cola ch’a l’avìatissà la gelosìa 'd Nosgnor. ⁶E Chiel a l'ha dime: "Fieiu d’òm, vëddes-to lòn ch’a fan? J'Israelita as dan a pràtiche scrose. I son obligà a chité mè Santuari. Ma 't vedras d'assion ch'a faran na vira pì scheur! " ⁷Antlora a l'ha mname a la pòrta dl'andron, e i l'hai vëddù: a-i j'era un pertus ant la muraja. ⁸ a l'ha dime: "Fieul d'òm, traversa la muràja!" Mi i l'hai traversà 'l mur, e i l'hai dëscorvù na pòrta. ⁹A l'ha dime ‘Intra e beica 'l mal abominàbil ch'a fan ambelessì’. ¹⁰I-i son intrà e i l’hai vëddù ‘d rapresentasion d’ògni sòrt ëd reptij e d’àutre bestie abominàbil, tùit j’idoj d’Israel, ch’a l’ero placà a le muraje tut d’antorn. ¹¹Setanta òm dj’ansian d’Israel, con an mes Jaazanìa, fieul ëd Siafan, minca un a l’avìa un turìbol an man ch’a fasìa na nivola d’ancens ch’a montava dzora ‘d soe teste.

¹²Parèj Nosgnor a l’ha dime: “Fieul d’òm, é-lo ch’it l’has vëddù lòn ch’a fan ij prinsipaj d’Israel con ij sò idoj ‘d lor ant ëd stansie scure? Lor a diso: ‘Tant, Nosgnor a lo vëd pa. Nosgnor a l’ha bandonà ‘l pais!’. ¹³E a l’ha dime ancora: “Ven, e it farai vëdde d’abominassion fin-a pes che cole!”.

¹⁴Antlora a l’ha portame a l’intrada dla pòrta nòrd dël templ ëd Nosgnor, andova ch’a j’era ‘d fomne setà ch’a pioravo për ël dio Tammuz. ¹⁵A l’ha dime: “L’has-to vëddù lòn, fieul d’òm? Ma ancora ti ‘t vëdras d’abominassion bin pes che cole-lì.

¹⁶Peuj a l’ha portame ancora ant l’andron interior dël templ ëd Nosgnor. A l’intrada dël Santuari ëd Nosgnor, an tra ‘l vestibol e l’autar, a-i era apopré vinti-sinch òm ch’a dasìo la schin-a al santuari ëd Nosgnor e ch’a l’avìo la facia virà vers l’oriente: as prostërnavo an adorant ël sol!”. ¹⁷Nosgnor a l’ha dime: “L’has-to vëddù, fieul d’òm? A la gent ëd Giuda a-j parëss pòca ròba j’abominassion ch’as comëtto ambelessi! Apress d’avèj ampinì ‘l pais ëd violense e d’avèj provocà mia flin-a, varda coma as buto dëdnans a mi për ofend-me an facia. ¹⁸Donca, ëdcò mi i-j rëspondrai dëscadnand mia furia. I l’avrai gnun-a pietà ‘d lor e i-j përdonrai nen. Bele se am faran d’invocassion dësperà, i-j scotrai nen”.

Nòte

• 1. Andé↑ O “a l'é tombà dzora 'd mi”.

  2. Andé↑ O “ch’a l’avìa rendù Nosgnor motobin gelos”.

  3. Andé↑ O “glòria”.