Michèa

2

Ij làder ëd tèra a perdran sò pais 'd lor

¹Maleur a coj ch'a penso 'd malfàite e che a tramo 'l mal ansima ai sò let! Da le prime lus ëd la primalba a-j compisso, përchè 'l podèj a l'é ant soe man ëd lor. ²A l'han l'anvìa dij camp e as në fan padron; a veulo le ca e as le pijo: lor a ciapo l'òm con soa ca, ël padron con soa famija. ³A l'é për lòn ch' ël Signor dis: "Varda che ‘dcò mi i l'hai an testa un pian contra costa geneuria, che i podreve pì nen tiré 'l còl andarera; e i podreve pì nen marcé con la testa àuta, përchè costì a sarà un temp ëd maleur. ⁴An col dì-là, as componrà na sàtira contra d’ vojàutri! As canterà na plenta ch’a dis: 'Nojàutri i soma stàit dëspojà 'd tut; Nosgnor a l’ha spartì la tèra ch’a l’era ‘d nòst pòpol con na còrda, gnun a-j la darà andaré: nòstri camp a son ëstàit dàit a col che an ravagia'. ⁵Gnun at assegnerà dla tèra ant la comunità ‘d Nosgnor^[1].

Polémica an tra ‘l profeta e ij sò aversari

⁶Am diso: “Prédica nen cole ròbe lì! Profetisa nen an cola manera-lì! Dësgrassie parèj an podran mai rivene adòss!”. ⁷L’eve pròpi da parlé parèj, famija d’Israel? Avrà-lo passiensa lë Spirit ëd Nosgnor ëd vòstra condòta? S’i fasèisse lòn ch’i dovrie fé i trovereve che mie paròle a son na consolassion^[2]. ⁸Vojàutri, contut, iv compòrte coma ‘d nemis ëd mè pòpol. Voi i feve nen d’àutr che ranché 'l mantel ëd coj ch’a l’avìo fiusa ‘d vojàutri, i-j dëspoje tanme d’òm ch’a artorno da na guèra. ⁹Le fomne 'd mia gent, vojàutri i-j tapareve via da le ca dova ch'as treuvo bin; e ai sò cit voi i-j porte vìa për sèmper l'onor che mi i l'hai daje. ¹⁰A l’opòst, i sareve vojàutri a d’esse forsà a parte, përchè costa tèra a le nen sicura! Ël pëccà a la dësblerà dël tut! ¹¹S’a-i fussa un busiard ch’a cor dapress al vent e ch’av disèissa costa busiardarìa: “Iv promëtto la benedission ëd vin e ‘d bira!”, collì a sarìa ‘l profeta giust për ësto pòpol!

Nosgnor a ristabilirà sò pòpol

¹²Ël Signor a dis: “Mi i veuj buté ansema Giacòb tut antregh, i veuj torna unì lòn ch'a-i resta d'Israel. I-j mugerai coma le feje ‘d Bosrà, coma në strop an mes a soe pasture. A saran pì numeros che j’abitant d’Edom. ¹³Col che a fà la brecia, a-j monterà dë 'dnans: lor a faran la brecia, lor a passeran la pòrta, lor a në sortiran: ël re a-j passrà danans e Nosgnor a la testa 'd tuti.

Nòte

1. Quand che ‘l giudissi a sarà a la fin e ‘l pòpol a sarà ristabilì an soa tèra, coj ch’a j’ero stàit angord e ch’a l’avìo nen fàit cas a la lotisassion antica a-j sarà nen consentì ‘d pijé part a la ridistribussion dla tèra.

2. O “av farìo ‘d bin”.