Provèrbi

22

¹A l'é mej na bon-a fama che 'd gran sostanse; n'àuta stima a l'é mej che d'argent o d'òr.

²Ij rich e ij pòver a l'han sossì an comun: tùit e doj a l'ha faje 'Nosgnor.

³Na person-a prudenta a preved ël pericol e a pija 'd precaussion, ma 'l bonomass a va anans a l'òrba catòrba e a na patìss le conseguense.

⁴Vera umiltà e timor ëd Dio a pòrto a 'd richësse, onor e longa vita.

⁵Ël senté dle person-e fàusse a l'é traditor e pien dë spin-e: coj ch'is ten-o a la vita a lo schivio.

⁶Mostra ai cit ël senté giust ch'a l'han da seguité: quand ch'a saran chërsù a lo chitran pa.

⁷Pròpi coma Ij rich a dòmino an sij pòver, coj ch'ampërmudo a dvento s-ciav dij sò creditor.

⁸Coj ch'a sëmno ingiustissie a l'avran n'amson ëd dësgrassie e sò regn dë sparm^[1] a vnirà a la fin.

⁹A sarà benedì col ch'a l'é generos, chi ch'a fà part ëd sò pan con ij pòver.

¹⁰Campa feura lë schërgnidor^[2] e as n'andran ëdcò le polémiche dësùtil. Beghe e insolense a spariran.

¹¹Ël rè a veul bin ai net ëd cheur, a l'é amis ëd coj ch'a parlo grassios.

¹²Nosgnor a guerna coj ch'a l'han ëd conossensa, ma a ranvërsa ij pian dij traditor^[3].

¹³Ël poltron a dis: "Là feura a-i é 'n leon: s'i vado giù për la stra a podrìa masseme!".

¹⁴La boca dla bagassa^[4] a l'é tanme 'n trabucèt arzigos, a-i tombran coj ch'a fan anrabié 'l Signor.

¹⁵Ël cheur dël giovnot a l'é pien ëd folairà, ma la bachëtta 'd coj ch'a san dissiplinelo a la tapareran vìa da chiel.

¹⁶Coj ch'a craso ij pòver e coj ch'a giuto ij rich a vnì sèmper pì rich, a vniran pòver lor medésim.

Prima colession dle sentense dij savi

¹⁷Scota bin lòn ch'a diso ij savi; angagia tò cheur a amprende mie istrussion, ¹⁸përchè a l'é bon ëd guerné soe sentense ant ël cheur pr' esse sèmper pronte an sij làver. ¹⁹Tut sossì i lo mostro a ti, éh, pròpi a ti, përchè ti 't bute ant ël Signor tuta toa fiusa. ²⁰I l'hai scrivute trenta sentense ch'a conten-o 'd consej e 'd savèj, ²¹për ch'it t'amprende a conòsse la vrità e ch'it daghe na rispòsta fidel quand ch'at mando a dé 'n mëssage.

I. ²²Profita pa dël pòver përchè ch'a l'é pòver e crasa nen ël bzognos ant ij tribunaj. ²³Nosgnor an përson-a a dësfendrà soa càusa e a gavrà la vita a coj ch'a l'avran gavaje tut lòn ch'a l'ha.

II. ²⁴Fate nen amis ëd na përson-a cagnin-a e sie nen sòcio 'd gent rabiosa, ²⁵përch' it podries amprende a fé l'istess che lor e parèj tombé 'nt un trabucèt mortal.

III. ²⁶Compërmëttete nen an strenzand ëd man sensa penseje bin a lòn ch'it fas e avalisand ëd débit d'àutri. ²⁷S'it peudes nen paghé, fin-a 'l let at sarà gavate da sota!

IV. ²⁸Bogia nen ëd termo antich, coj ch'a l'han posà ij tò grand. ²⁸Vëddes-to 'd përson-e 'd bon-a cognission ch'a san fé bin sò travaj? Bin, cole-là a saran ciapà al servissi 'd rè, pa al servissi 'd gent ordinaria!

Nòte

1. O "cavija (regal) ëd soa furia".

2. Na person-a ampërtinenta, piantagran-e. Quajdun ch'a peul nen esse cambià con la dissiplin-a o la coression, ma ch'a dëspresia e dësturba tut lòn ch'a l'é d'edificassion moral o social.

3. O "a vija për fé conòsse la vrità e a dëscheuvr l'angann dij traditor".

4. O "dl'adultera", "ëd na fomna inmoral".