Surtìa[modifiché]

6

¹Nosgnor a rëspond a Mosè: “Adess ti ‘t vëddras lòn ch’i farai al Faraon: quand ch’a sentirà la fòrsa ‘d mia man i l’obligherai a lassé seurte j’Israelita; ansi, a sarà chiel a forseje a chité ‘l pais”.

Ël pòpol a veul pì nen sté a sente Mosè

²Nosgnor a l’ha dit a Mosè: “Mi i son ël Signor^[1]. ³I son manifestame a Abraham, a Isach e a Giacòb coma “ël Dé tut-potent^[2]”, ma i son pa arvelame antlora con mè nòm, ch’a l’é “ël Signor”. ⁴I l’hai confermà con lor mia aleansa e conform ai sò tèrmin, i l’hai promëttuje ch’i l’avrìa daje ‘l pais ëd Canan, anté che lor a vivìo tanme dij foresté. ⁵Ti’t peude sté sicur ch’i l’hai sentì ij gëmm dj’Israelita, ch’a son adess dë s-ciav dj’Egissian. Im na rendo bin cont^[3] ch’i l’hai fàit n’aleansa con lor.

⁶A l’é për lòn ch’it l’has da dije al pòpol d’Israel: ‘Mi i son ël Signor. Iv tirerai fòra dai travaj forsà ch’av fan fé j’Egissian, e iv libererai da la s-ciavensa. Con la fòrsa ‘d mè brass iv riscaterai e a lor a-j darai ‘n castigh grev. ⁷I-j farai vëdde che vojàutri i seve mè pòpol e che mi i son vòst Dé. Antlora i savreve che mi i son ël Signor, vòst Dé, col ch’av tira fòra dai travaj forsà ch’av fan fé j’Egissian. ⁸Apress iv mnerai ant ël pais ch’i l’hai promëttuje a Abraham, a Isach e a Giacòb, av lo darai an proprietà. I lo diso mi, ël Signor”.

⁹Mosè a l’ha nunsià tut sòn a j’Israelita. ma lor a l’han pì nen vorsulo sté a sente. A l’ero vnì dëscoragià për motiv dla durëssa dël travaj ch’i l’avìo da fé.

Neuva mission ëd Mosè e Aron dëdnans al Faraon

¹⁰Nosgnor a l’ha dit a Mosè: ¹¹“Va a parlé al Faraon, ël rè d’Egit, përchè ch’a lassa seurte j’Israelita dal pais”. ¹²Mosè a l’ha rësponduje a Nosgnor: “Gnanca j’Israelita a l’han ëscotame: coma ch’i podrìa feme scoté dal Faraon, mi ch’i sento genà a parleje a la gent?”. ¹³Ël Signor a l’ha parlà con Mosè e Aron e a l’ha comandaje ch’a andèisso a trové j’Israelita e ‘l Faraon për fé seurte j’Israelita dal pais d’Egit.

Registr dij grand ëd Mosè e Aron

¹⁴Costi-sì a son ij grand dla lìnea genealògica prinsipal dj’Israelita^[4]: Fieuj ëd Ruben, ël prim-génit d’Israel: Palu, Hesron e Carmi. Ij sò dissendent ëd lor a son dventà la tribù ëd Ruben. ¹⁵Fieuj ëd Simeon: Iemuel, Iamin, Ohad, Iachin, Sohar, e Siaul. Ij sò dissendent ëd lor a son dventà la tribù ‘d Simeon. ¹⁶Ij nòm dij fieuj ëd Levi e dij sò dissendent: Levi a l’ha avù tre fieuj: Gerson, Cheat e Merari. Levi a l’é vivù sent-trenta set agn. ¹⁷Ij fieuj ëd Gherson: Libni, e Simei, con le soe tribù. ¹⁸fieuj ëd Chehat: Amram, Isar, Hebron e Usiel. Chehat a l’è vivù sent-trentatre agn). ¹⁹Fieuj ëd Merari: Mali e Musi. Costi-sì a son ij dissendent ëd Levi. ²⁰Amram a l’è mariasse con la seur ëd sò pare, Jochebed, ch’a l’ha daje doi fieuj: Aron e mosè. Amram a l’é vivù sent-trentaset agn. ²¹Fieuj d’Isar: Cora, Nefeg e Sicri. ²²Fieuj d’Uziel: MIsael, Elsafan e Sitri. ²³Aron a l’é maridasse con Eliseba, fija d’Aminadab e seur ëd Nason, ch’a l’ha daje quat fieuj: Nadab, Abihu, eleasar e Itamar. ²⁴ij fieuj ëd Core: Assir, Elcana e Abiasaf. Costi-sì a son le tribù dij dissendent ëd Core. ²⁵Eleasar, fieul d’Aron, a l’é maridasse con un-a dle fije ‘d Putiel, ch’a l’ha daje un fieul, Fineas. Tuti st-sì a son ij grand dle famije levite, elencà scond a le soe tribù. ²⁶L’Aron e ‘l Mosè nominà an ësta lista a son j’istess che Nosgnor a l’avia dije: “Fé seurte dal pais d’Egit j’Israelita tanme la formassion ëd n’armada”. ²⁷e tùit e doi, Mosè e Aron, a son andàit a parlé con ël Faraon, ël rè d’Egit, për fene seurte j’Israelita.

Mosè e Aron torna confermà an soa mission

²⁸Ël dì che Nosgnor a l’ha parlà con Mosè ant ël pais d’Egit, ²⁹a l’ha dije: “Mi i son ël Signor. Fà savèj al Faraon, ël rè d’Egit, tut lòn ch’it diras”. ³⁰Mosè a l’ha rëspondù a Nosgnor: “I lo peudo nen fè! Im sento genà a parleje. Përchè ch’a l’avria da scoteme ‘l Faraon?”.

Nòte

1. AndéO “Mi i son Jahweh”. “Jahweh” a l’é na trasliterassion dël nòm pròpi YHWH che quaivòta as rend coma “Geòva”. An costa tradussion ëd sòlit i lo rendoma “ël Signor” o “Nosgnor”.

2. AndéNa tradussion ëd אֵל־שַׁדַּי (’el-shadday).

3. AndéO “i son visame”.

4. AndéCosta lista ‘d nòm a mostra che Mosè e Aron a son ëd dissendent ëd Levi, la sëppa dij sacerdòt. Costa lista a giuta a identificheje e a acrediteje coma ij porta-vos ëd Nosgnor da la mira dla stòria pì larga d’Israel.