Surtìa

37

L’Érca

¹Bessalel a l’ha fàit l’Érca ‘d bòsch ëd gasìa, ëd sinch branche ‘d larghëssa per tre ‘d longhëssa, e tre d’autëssa. ²A l’ha arvëstìla d’òr pur da drinta e da fòra, e a l’ha faje na garlanda d’òr tut dantorn. ³A l’ha fàit fonde quat anèj d’òr e a l’ha fissaje ai quatr canton ëd sota, doi anèj da ‘n fianch e doi da l’àutr. ⁴Peui a l’ha fàit dë stanghe ‘d bòsch ëd gasìa e a l’ha arvëstìe d’òr, ⁵e a l’ha faje passé për drinta dj’anèj dij fianch dl’Érca për podejla trasporté. ⁶A l’ha faje ‘dcò ‘n cover-cc dël përdon d’òr pur, ëd sinch branche ‘d larghëssa për tre ‘d longhëssa. ⁷A l’ha fàit ëdcò doi cherubin sislà d’òr e a l’ha butaje un a minca stremità dël cover-cc dël përdon. ⁸Minca ‘n cherubin a vardava da na stremità dël cover-cc dël përdon. ⁹Ij cherubin a stavo l’un a front dl’àutr, con soa facia ch’a vardava ‘l cover-cc dël përdon; a lo guernavo con le doi ale dëstendùe.

La tàula dij pan dl’oferta

¹⁰Peul Bessalel a l’ha fàit ëdcò la tàula ëd bòsch ëd gasìa. Soa longhëssa a l’era ‘d quatr branche, soa larghëssa ‘d doe branche, e soa autëssa ‘d tre branche. ¹¹a l’ha arvestila d’òr pur e a l’ha faje na garlanda d’òr tut dantorn. ¹²A la tàula, tut dantorn, a l’ha faje na curnis ëd quatr dìl con na garlanda d’òr. ¹³A l’ha fàit fonde quatr anèj d’òr e a l’ha fissaje ai quatr canton ai quatr pé dla tàula. ¹⁴A tocavo ‘l bòrd ëd dzura, për feje passé le stanghe e parèj trasporté la tàula. ¹⁵Le stanghe ch’a l’ha fàite a j’ero ‘dcò ‘d bòsch ëd gasìa e a l’ha arvëstìe d’òr; a sërvìo për trasporté la tàula. ¹⁶Ëd pì, a l’ha fàit d’òr pur j’asi da buté an sla tàula: ij sò piat, le soe tasse, e ij sò càles për le libassion ëd vin.

La girindòla d’òr

¹⁷Bessalel a l’ha ‘dcò fàit la girindòla d’òr pur sislà, A l’ha fàit la girindòla antrega e soa decorassion d’un sol tòch: sò pé, ël bion, ij càles, ij but e le fior . ¹⁸Dal fust sentral a seurtìo ses brass: tre brass da na banda e tre da l’àutra. ⁹Minca ‘n brass a l’avìa tre pom a forma d’amàndola, con ij càles e le fior. A j’ero parèj ij ses brass ch’a surtìo dal bion dla girindòla. ²⁰Ël bion dla girindòla a l’avìa quatr pom a forma d’amàndola, con ij sò càles e soe fior. ²¹A j’era n’arbut d’amàndola sota sota minca na paira ‘d brass andova ij ses bras as estendìo dal bion sentral, tut fàit d’un sol tòch. ²²Sti pom e sti brass a formavo ‘n sol tòch con la girindòla, e tut a l’era sislà con d’òr pur. ²³A l’ha ‘dcò fàit soe set lampie con ij sò mochèt e pòrta-mochet d’òr pur. ²⁴Për la girindòla con tùit ij sò asi, a ‘ha dovrà trenta chilo d’òr pur.

L’autar dl’ancens

²⁵L’autar për smon-e d’ancens a l’ha falo ‘d bòsch ëd gasìa e quadrà: doe branche ‘d larghëssa, doe ‘d longhëssa e quatr d’autëssa. Ij còrn dij quatr canton ëd dzora a j’ero tut d’un tòch con l’autar. ²⁶A l’ha arvëstilo d’òr pur: ël dëdzura, ij soi fianch dantorn, ij sò còrn; e a l’ha faje na garlanda tut d’antorn. ²⁷An doi dij fianch dl’autar, sota la bordura, a l’ha fissaje doi anèj d’òr anté ch’a l’avìo da passeje le stanghe për trasportelo. ²⁸A l’ha faje dë stanghe ‘d bòsch ëd gasìa e a l’ha arvëstìje d’òr.

²⁹A l’ha ‘dcò fàit l’euli për l’unsion sacra e l’ancens aromàtich pur, pròpi coma ch’a lo fan ij përfumé.