Surtìa

36

¹Parèj, donca, Bessalel, Oliab e tuti coj che Nosgnor a l’ha dotaje ‘d talent a d’anteligensa për fé d’ògni sòrt ëd travaj për ël servissi dël santuari a butran an esecussion tut lòn che Nosgnor a l’ha comandà.

Ij cadò a j’ero fin-a tròp

²Mosè a l’ha donca convocà Bessalel, Oliab e tuti coj che Nosgnor a l’avìa dotaje ‘d bon-e man e ch’a l’avìo anvìa d’angagesse an col’ euvra e ‘d butela an esecussion. ³Mosè a l’ha fidaje ëd përson-a tut lòn che j’Israelita a l’avìo portà për l’euvra dël santuari. Tutun, dàit che minca na matin j’Israelita a portavo an continuassion d’oferte volontarie a Mosè, ⁴j’arté ch’a l’ero ocupà ant ij divers travaj dël santuari a l’han lassà mincadun ël travaj ch’a fasìo, ⁵e a son andàit a parlé con Mosè. A l’han dije: “Ël pòpol a pòrta pì ‘d lòn ch’a l’é necessari për l’euvra che Nosgnor a l’ha comandà ‘d fé. ⁶Antlora Mosè a l’ha ordinà ch’as publichèissa costa crija për tut l’acampament: “Che gnun, nì òm nì fomna, a porta pì d’oferte për l’euvra dël santuari”. E ‘l pòpol a l’ha chità ‘d porté d’oferte: ⁷Soe contribussion ëd lor a l’ero pì che bastévoj për completé ‘l proget antregh.

La strutura dël Tabernacol

⁸Tuti j’arté ch’a colaboravo ant l’euvra dël Tabernacol a l’han donca fàit des tèile ‘d lin bin filà ‘d fil tensù ‘d pórpra violèta o vermèja, o ‘d color ëscarlata. A l’ha ornaje con figure ‘d cherubin brodà ‘d manera artistica. ⁹Tute le tèile a j’ero precis dl’istessa mzura; quatòrdes mèter ëd longhëssa e tre ‘d larghëssa. 36:10 A l’han giontà l’ùn a l’àutr sinch dle tèile, e con j’àutre sinch a l’han fàit l’istess. ¹¹Peui a l’han fài¹⁰sinquanta ànsole ‘d porpra violeta e a l’han butaje an sla broa dl’ùltima tèila ‘d minca série. ¹²Le sinquanta ànsole longh la broa ëd na tèila a corëspondìa a le sinquanta ànsole long la broa dl’àutra tèila. ¹³Peui a l’ha fàit sinquanta bocle d’òr e a l’ha fissà ansema le tende longhe con le bocle. A l’é parèj che ‘l Tabernacol a l’é stait realisà d’un sol pess.

¹⁴A l’ha peui tessù óndes tèile ‘d pluch ëd crava për fé na covertura dla tèila ch’a quata ‘l Tabernàcol. ¹⁵Coste óndes tèile a j’ero precis dl’istessa mzura: quindes méter ëd longhëssa për des ëd larghëssa. ¹⁶A l’ha giontaje ansema, da na banda, sinch tèile, e da l’àutra banda a l’ha giontaje ansema j’àutre ses. ¹⁷A l’ha fàit sinquanta ànsole al bord dla tèila ch’a l’era a la broa dla prima série, e sinquanta ànsole al bòrd dla tèila ch’a l’é a la broa dla sconda série. ¹⁸A l’ha fàit sinquanta bocle ‘d bronz për gionté ansema la tèila, ëd manera da formé un tut ùnich. ¹⁹Për la tenda chiel a l’ha fàit ancó na covertura ‘d pèil ëd feja tenzùe ‘d vermèj, e na dzura-covertura ‘d pèil ëd delfin.

²⁰Për sustnì ‘l Tabernàcol, Bessalel a l’ha fàit ëd colòne ‘d bòsch ëd gasìa e a l’ha butaje drite. ²¹ Minca na colon-a a fasìa vint branche d’autëssa për tre ‘d larghëssa, ²²e a l’avìa doe ancastrure paralele: parèj a l’han fàit për tute le colon-e dël tabernacol. ²³A l’han fàit donca le colon-e për ël Tabernacol: vint colon-e për ël fianch meridional. ²⁴A l’ha ‘dcò fàit quaranta sòcoj d’argent e a l’ha butaje doi sota ‘d minca colon-a, un a minca facia ‘d mincadun-a dle colon-e. ²⁵Për lë scond fianch dël Tabernacol, ël fianch a nòrd, a l’ha fàit d’àutre vint colon-e, ²⁶con i sò quaranta sòcoj d’argent sota le vint colon-e, doi për minca un-a colon-a. ²⁷për ël fianch ch’a l’é daré dël Tabernacol, ch’a da a ponent, a l’ha faje ses colon-e; ²⁸e doe da pì për ij sò doi canton darera. ²⁹Coste doe colon-e a corispondìo a le doe colon-e dij canton, dal bas fin-a an àut, anté ch’a-i é ‘l prim anel. Parèj a l’han falo con le doe colon-e dij doi canton. ³⁰An tut, a-i ero eut colon-e con ij sò sëddes sòcoj d’argent, l’é a dì, doi sòcoj për minca na colon-a.

³¹A l’ha peuj fàit ëdcò ‘d traverse ‘d bòsch ëd gasìa: sinch për le colòn-e d’un fianch dël Tabernacol, ³²sinch për cole dl’àutr fianch e sinch ëd pì për le colon-e dël fianch da dré dël Tabernacol, ch’a dà a ponent. ³³A l’ha fàit che minca na traversa sentral a passèissa a metà autëssa dle colon-e, da na banda a l’àutra. ³⁴A l’ha laminà d’òr le colon-e e le traverse, e a l’ha fàit d’òr j’anej che le traverse a l’avio da passeje.

Ij ridò

³⁵Apress a l’ha fàit ël ridò ‘d lin bin filà ‘d fil tenzù ‘d pórpra violeta, vermèja, o d’ëscarlata, con figure ‘d cherubin brodà ‘d manera artistica. ³⁶A l'ha fàit për ël ridò quatr colon-e ‘d bòsch ëd gasìa ch’a l’ha peui quataje d’òr. Ij sò rampin a j’ero ‘dcò d’òr. Për sosnì le colon-e a l’han fondù quat sòcoj d’argent.

³⁷Për l’intrada dla tenda, a l’ha fàit n’àutr ridò brodà’ d fil tenzù ‘d pórpra violeta, vermèja, o d’ëscarlata. A l’era ‘d lin bin filà. ³⁸A l’ha fàit le sinch colon-e con ij sò rampin, a l’ha quatà d’òr ij capitej e j’anej, ma ij sòcoj a l’ha faje ‘d bronz.