Surtìa

29

Consacrassion dij sacerdòt

¹Costa-sì a l’é la sirimònia ch’it l’has da fé për consacré Aron e ij sò fieuj për ch’ a sio ij mè sacerdòt: Pija un tòr giovo e doi moton ch’a l’abio gnun difèt. ²Peui, con fior ëd farin-a ‘d gran fà dij pan sens’ alvà ampapëttà con d’euli e ‘d fogasse sens’ alvà onzùe d’euli. ³Ij pan butje ant na cavagna e portla al Santuari con ël veilèt e ij doi moton.

⁴Apress, fà acosté Aron e ij sò fieuj a l’intrada dla Tenda dl’Ancontr e ambelelà lavje con d’eva. ⁵Peui, vestiss Aron con le vestimenta sacerdotaj - la tùnica, la mantlin-a, l’éfod e la petorin-a, e gropje a la vita la sintura dl’éfod. ⁶Butje an testa ‘l turbant e fissje dnans la làmina sacrà. ⁷Fàit lòn, pija l’euli dl’onsion santa e vërsjelo an sla testa për consacrelo.

⁸Apress, fà acosté ij sò fieuj, vestje con soe tùniche, ⁹le senture e ij turbant. Antlora ‘l drit al sacerdòssi a sarà ‘l sò ‘d lor për sèmper.^[1] A l’é parèj ch’it l’has da consacré Aron e ij sò fieuj.

¹⁰Fà porté ‘l tòr giovo a l’intrada dël Tabernàcol. Aron e ij sò fieuj a l’avran da buté soe man ëd lor ansima dla testa dël veilèt. ¹¹Peui dësgosa ‘l tòr a la presensa ‘d Nosgnor a l’intrada dël Tabernacol. ¹²Pija sò sangh e onz-ne con ël dil ij canton dl’autar; vërsa ‘l sangh ch’a resta ai pé dl’autar. ¹³Pija ‘dcò ‘l grass ch’a quata ‘l vènter dla bestia, la rèit ch’a l’é dzura ‘l fidich e ij doi rognon con sò grass, e faje brusé tut lòn an sl’autar. ¹⁴Ma la carn, la pell e la merdarìa dël veilèt, brusje da fòra dël campament. Lolì a l’é ‘n sacrifissi d’espiassion për ël pëccà.

¹⁵Apress, pija un dij moton, e che Aron e ij sò fieuj a buto soe man ëd lor asima dla testa dël moton. ¹⁶Peui dësgosa ‘l moton e sbrincc-ne ‘l sangh contra ij quatr fianch dl’autar. ¹⁷Squarta la bestia, lavne le buele e le piòte e butje dacant la testa e j’àutri tòch dël còrp. ¹⁸Peui brusa la bestia antrega an sl’autar. Costa-sì a l’é n’oferta ‘d bon odor fàita a Nosgnor; a l’é n’olocàust për Nosgnor.

¹⁹Pija dapress l’àutr moton, e che Aron e ij sò fieuj a buto soe man ëd lor asima dla testa dël moton. ²⁰Peui dësgosa la bestia, pijne ‘l sangh e onz-ne ‘l lov dl’orija drita d’Aron e ij lov dij sò fieuj. Butlo ‘dcò dzura ‘l pòless ‘d soe man ëd drita e dzura ‘l dilon dij sò pé ‘d drita. Sbrincia ‘l rest dël sangh contra ij quatr fianch dl’autar. ²¹Pija ‘dcò ‘d sangh da l’autar e d’euli da consacrassion, e sbrincc-ne Aron e ij sò fieuj a an soe vestimenta ‘d lor. Parèj, chiel e ij sò fieuj, con soe vestimenta ‘d lor a resteran consacrà.

²²Pija ancora le part grasse ‘d col moton: la coa, ël grass ch’a quata ‘l vènter, la rèit ch’a l’é dzura ‘l fidich, ij doi rognon e ‘l grass ch’a-i stà dantorn, ansema a la cheussa ‘d drita. cost-sì a l’é ‘l moton dl’investiora sacerdotal. ²³Da la cavagna ‘d pan sens’ alvà ch’a-i é dëdnans a Nosgnor, pijne ‘n pan riond, na fogassa ampapëttà con d’euli e na galëtta onzùa d’euli. ²⁴Buta tut sossì ant le man d’Aron e dij sò fieuj për fé l’elevassion dëdnans a Nosgnor. ²⁵Apress, pija torna tut lolì da soe man ëd lor e it lo bruseras an sl’autar ansema ‘l rest dl’olocàust, oferta ‘d bon odor fàita a Nosgnor. ²⁶Apress, pija ‘l pét dël moton dl’investiura d’Aron e present-lo dëdnans a Nosgnor. Cola-lì a sarà toa porsion.

²⁷Parèj it consacreras ël pét presentà a Nosgnor e la cheussa dl’oferta ch’a lé arservà për chiel. ²⁸Cola-lì a sarà, për na lej përpetua, la porsion d’Aron e ‘d sò dissendent, përchè ch’a l’é n’oferta dj’Israelita ch’a ven dai sò sacrifissi ‘d comunion: cola-lì a l’é la part arzervà a Nosgnor.

²⁹Le vestimenta sacrà d’Aron a l’avran da esse dàite an ardità ai sò dissendent, e as le butran adòss për arsèive l’unsion e l’investiura sacerdonal. ³⁰Ij dissendent ch’a-j sucederan ant ël sacerdòssi a l’avran da porté coste vestimente për set dì, quand ch’a l’avran da intré ant ël Santuari për ufissieje.

Ël past sacrifical

³¹Apress, pija ‘l moton dl’investiura sacerdotal e fà cheusse soa carn ant un leugh sacrà. ³²Aron e ij sò fieuj a na mangeran con ël pan dla cavagna a l’intrada dël Tabernacol. ³³Mach lor a podran mangé la carn e ‘l pan ch’a l’é stàit dovrà për soa purificassion ëd lor ant la sirimònia dl’ordinassion. Gnun d’àutri a podrà mangene, përchè a son ëd ròbe sacrà. ³⁴Se l’indoman as treuva ancora dla carn e dël pan dla sirimònia dl’investiura, as ha da bruselo; che gnun a na mangia, përché ch’a l’é ‘d ròba sacrà. ³⁵Fà tut sossì con Aron e ij sò fieuj, precis com it l’hai comandatlo. La sirimònia dl’investiura a durerà set dì.

Consacrassion dl’autar dl’olocàust

³⁶It l’has da sacrifiché minca dì un tòr giovo durant set dì tanme espiassion dël pëccà. Fane n’oferta d’espiassion dzura l’autar, e onz l’autar për consacrelo. ³⁷Purifica l’autar, e onz-lo për consacrelo minca dì për set dì. Apress ëd lòn, l’autar a sarà sacrà ‘d manera assoluta. Tut lòn ch’a toca l’autar a resterà consacrà.

L’olocàust përpetuo

³⁸Costa a l’é l’oferta che ‘d manera përpètua it ësmonras minca di dzura l’autar: doi babèro d’un ann. ³⁹Un dij babèro a l’han da esse smonù a la matin, l’àutr a la sèira. ⁴⁰Con ël prim babèro smon-a tre chilo ‘d fior ëd farin-a ampapëttà con un lìter d’euli vèrgin; an pì, vërsa coma na libassion^[2] un lìter ëd vin. ⁴¹A la sèira it faras l’istess con l’àutr babèro; a lo compagneras con l’istessa oferta e l’istessa libassion che cola dla matin. A sarà n’oferta ‘d bon odor a Nosgnor.

⁴²A saran costi-sì j’olocàust ch’i l’eve da smon-e ‘d manera përpetua da generassion a generassion dëdnans a Nosgnor, a l’intrada dël Tabernacol; a sarà là ch’it rëscontrerai e ch’i parlerai con ti. ⁴³A sarà là ch’im rëscontrerai con ël pòpol d’Israel, ant ël leugh ch’a resterà consacrà për mia presensa gloriosa. ⁴⁴Vera, mi i consacrerai ‘l Tabernacol e l’autar, e i consacrerai Aron e ij sò fieuj për esse a mè servissi coma ‘d sacerdòt. ⁴⁵I pijerai residensa an mes a j’Israelita e i sarai sò Dé ‘d lor. ⁴⁶Antlora a savran che mi i son ël Signor, sò Dé ‘d lor, ch’a l’ha faje seurte dal pas d’Egit për vive an mes a lor. Mi i son ël Signor, sò Dé ‘d lor.

Nòte

1. O “Costa-sì a l’é na lej përpetua”.

2. O “oferta liquida”.