Ij nùmer

28

Oferte ‘d minca dì

¹Nosgnor a l’ha ‘ncora parlà a Mosè. A l’ha dije: ²“Dà a j’Israelita coste prescrission: ‘Avej soèn dë smon-me ant ël temp giust l'oferta ch’am m’é dovùa, ij mè nutriment consumà dal feu d’odor agreàbil’. ³Dije ‘dcò: “Costa-si a l’é l’oferta ch’im presentreve minca dì: doi babero d’un ann sensa difèt coma n’olocàust përpètuo. ⁴Un dij doi i l’ofrireve la matin, l’àutr a la sèira, ⁵compagnà da n’oferta ‘d tre chilo ‘d fior ëd farin-a ampastà con un lìter d’euli d’oliva vérgin. ⁶Sto-sì a l’é l’olocàust përpètuo che già a së smonìa an sël Mont Sinai, n’oferta consumà dal feu, n’oferta d’odor agreàbil a Nosgnor. ⁷A l’oferta dël prim babero i-j giontreve na libassion d’un lìter ëd vin fòrt, ch’a sarà versà ant ël santuari an onor ëd Nosgnor. ⁸L’àutr babero i lo smonreve a la sèira, ansema a n’oferta ‘d farin-a e ‘d vin coma ch’a l’era fasse la matin. A l’é n’oferta consumà dal feu, n’oferta d’odor agreàbil al Signor.

Oferte dël Saba

⁹Ant ël dì ‘d Saba i ofrireve doi babero d’un ann sensa difèt, compagnà da n’oferta ‘d ses chilo ‘d fior ëd farin-a ampastà d’euli e ‘d na libassion ëd vin. ¹⁰Cost olocàust i lo smonreve tùit ij saba, che a sarà giontà con soa libassion al sacrifissi complet ëd tùit ij di.

Oferte dël prim dì dël mèis

¹¹Ël prim ëd tùit ij mèis i smonreve an olocàust a Nosgnor doi vailèt già fàit, un moton e set agnej d’un ann ch’a l’abio gnun difèt. ¹²Për minc’ animal smonù, i giontreve n’oferta ‘d fior ëd farin-a ampastà con d’euli; n’oferta ‘d neuv chilo për minca ‘n vailèt, ëd ses chilo për moton, ¹³e ‘d tre chilo për minca ‘n babero. Lolì a l’é n’olocàust d’odor agreàbil al Signor, consumà an sò onor. ¹⁴La libassion ëd vin a sarà ‘d doi liter për minca ‘n vailèt, d’un liter e mes për moton e d’un liter për minca ‘n babero. Sto-sì a l’é l’olocàust che tùit ij prim dì dël mèis i smonreve për tùit ij mèis dl’ann. ¹⁵An pì dl’olocàust përpètuo e dla libassion ed vin corispondenta, i smonreve al Signor un boch an sacrifissi pr’ ël pëccà.

Oferte për la festa ‘d Pasca e dij Pan sens’ alvà

¹⁶Ël dì quatòrdes dël prim mèis, i selebrereve la Pasca an onor dël Signor, ¹⁷e ‘l quindes ëd cost midem mèis a comenserà la festa ‘d set dì. Durant coj dì-lì i mangereve ‘l pan sens’ alvà. ¹⁸Ël prim dì dla festa a-i sarà n’adunansa santa e i fareve gnun-a sòrt ëd travaj. ¹⁹I smonreve coma ‘n sacrifissi brusà ‘n olocàust an onor dël Signor doi vailèt già fàit, un moton e set babero, ch’a l’abio gnun difèt. ²⁰Për minca n’animal smonù, gionteje n’oferta ‘d fior ëd farin-a ampastà d’euli; n’oferta ‘d neuv chilo për minca ‘n vailèt, ëd ses chilo pr’ ël moton, ²¹e ‘d tre chilo për minca ‘n babero. ²²An pì, smon-e ‘n boch an sacrifissi pr’ ël pëccà, coma ‘n sacrifissi d’espiassion a vòst favor. ²³Tute coste oferte i le smonreve an pì dl’olocàust ëd minca matin, ch’a l’é l’olocàust përpètuo. ²⁴I fareve parèj tùit ij dì për na sman-a; i jë smonreve coma d’oferte consumà dal feu, d’odor agreàbil al Signor, an pì dl’olocàust përpètuo e dla libassion ëd vin corispondenta. ²⁵Ël dì ch’a fà set iv riunireve coma n’adunansa santa, e an col dì lì i fareve gnun-a sòrt ëd travaj.

Oferte dla festa ‘d Pancòsta o dle Sman-e

²⁶Ël dì dla festa dle primissie dël camp, quand ch’i smonreve al Signor l’oferta dl’arcòlt neuv, l’é a dì, la festa ‘d Pancòsta, iv riunireve an adunansa santa, e i fareve gnun-a sòrt ëd travaj. ²⁷I smonreve an olocàust d’odor agreàbil al Signor doi vailèt già fàit, un moton e set bebero d’un ann. ²⁸Për minca n’animal smonù, giunteje n’oferta ‘d fior ëd farin-a ampastà d’euli; n’oferta ‘d neuv chilo për minca ‘n vailèt, ëd ses chilo për moton, ²⁹e ‘d tre chilo për minca ‘n babero. ³⁰Ëd pì, smon-e un boch an sacrifissi d’espiassion a vòst favor. ³¹I presentreve tute coste oferte, ëd pì dl’olocàust përpètuo, ansem a l’oferta corispondenta ‘d farin-a. Smon-e sèmper ëd bestie ch’a l’abio gnun difèt ansema a la libassion ëd vin corispondenta.