Ij nùmer

18

La riabilitassion dij sacerdòt

¹Antlora Nosgnor a l'ha dije a Aron: Ti, tò fieuj, e la casà 'd tò pare con ti, i sareve grevà dal pèis ëd le colpe comëttùe anvers ël Santuari. Tutun, dle trasgression ch’as comëtto ant l’esercissi ‘d vòst sacerdòssi, i sareve responsabij mach ti e ij tò fieuj.

²Pòrta con ti ij tò frej, la tribù ‘d Levi, la tribù ‘d tò pare, parèj che lor a peudo giontesse a ti e d’esse d’agiùt damentre che ti e ij tò fieuj i sareve dëdnans la Tenda dl’Aleansa^[1]. ³Lor a l’han la responsabilità ‘d pijesse soen ëd vojàutri e dël Tabernacol antregh, ma a condission ch’a vado pa avzinesse a j'asi dël Santuari, nì a l'autar, përchè a l’abio nen a meuire nì lor e nì vojàutri. ⁴Lor a l’han da giontesse a vojàutri e a saran responsabij dla Tenda dël Rëscontr, pr’ ël servissi dla Tenda, ma gnun ch’a na sia pa autorisà^[2] a podrà avzinesse a vojàutri. ⁵Mach vojàutri i esercitereve le funsion dël Santuari e dl’autar. Parèj i evitereve ch’a s-ciata torna mia indignassion contra j’Israelita. ⁶A l’é stàit mi ch’i l’hai sernù ij vòstri frej, ij Levita, d’an mes a j’Israelita. Për vojàutri lor a son tanme ‘n cadò dël Signor për fé l’esecussion dij dover dla Tenda dël Rëscontr, ⁷Ma it ses ti e ij tò fieuj ch’iv cariereve dij dover sacerdotaj për tut lòn ch’as fà a l’autar e ant ël Leugh santissim ch’a-i é darera dël Ridò. A l’é mi ch’iv faso ‘l don dël sacerdòssi. A vojàutri i fido le funsion sacerdotaj, ma la përson-a ch’a l’é pa autorisà ch’a-j s’avzin-a a l’avrà da esse condanà a mòrt^[3].

Ij dirit dij sacerdòt

⁸Nosgnor a l’ha ‘ncora dije a Aron: Varda, I l’hai date la responsabilità 'd tut lòn che a ven prëlevà an sj'oferte. Costa part ëd tut lòn che j’Israelita am consacro, i la dago a ti e ai tò dissendent coma ‘n privilegi d’unsion sacerdotal. A l’é un dirit përpètuo. ⁹Dle oferte pì sacrà, con l’ecession ëd tut lòn ch’a l’é stàit brusà për mi, a l’è ‘d vòstra pertinensa sossì: tut lòn che j’Israelita am presento coma d’oferte ‘d farin-a, ëd sacrifissi pr’ ël pëccà e sacrifissi ‘d riparassion. Cole-lì a son d’oferte santissime ch’a son ëd pertinensa toa e dij tò dissendent. ¹⁰I-j mangereve ant un leugh sacrà. A na podran mangé, contut, j’òm e ij giovnòt dle famije sacerdotaj, përchè ch’as trata d’aliment sacrà.

¹¹Ëd pì, at corispond la part arzervà dle oferte dj’Israelita che ti ‘t t’has presentame. It na faso don, ai tò fieuj e a toe fije coma ‘n dirit përpètuo. Tuti coj ch’a son ëd toa famija e ch’a son an condission ëd purëssa ritual a na podran mangé. ¹²It dago ‘dcò tute le primissie dj’arcòlt che j’Israelita a smon-o al Signor: la part pì bon-a dl'euli, dël vin e dël forment. ¹³Tute le primissie dl’arcòlt dij camp ch’a son smonùe al Signor a saran për ti. Coj ch’a son ëd toa famija e ch’as trovo an condission ëd purëssa ritual a na podran mangé.

¹⁴A l’é ‘dcò ‘d toa pertinensa tut lòn che Israel a consacra ‘d manera compléta al Signor. ¹⁵Tùit ij primnà, tant dj’òm che dle bestie, che j’Israelita a smon-o al Signor, a saran për ti. Contut, faje paghé un riscàt pr’ ij primnà dj’òm e dij primnà dle bestie impure. ¹⁶A l’avran da esse riscatà quand ch’a compisso un mèis. As na fisserà ‘l pressi an sinch sicl d’argent, conform a l’unità ‘d pèis ufissial dël Santuari, ch’a l’é ‘l sicl ëd vint ghera. ¹⁷Ij primnà dle vache, dle feje e dle crave, contut, as le podran pa riscaté përchè ch’a son sacrà. Vërsa ‘l sangh ëd lor ai pè dl’autar e brus-ne la grassa com un përfum d’odor agreàbil al Signor. ¹⁸La carn ëd lor a vnirà a ti; coma ch’a son për ti ël pét e la còssa drita ch’a l’han presentame.

¹⁹Tuta la part arzervà ‘d lòn che j’Israelita a presento a Nosgnor coma d’oferte sacrà, mi i la dago a ti, ai tò fieuj e a toe fije. A l’é ‘n dirit përpètuo, n’aleansa ch’i faso con ti e con ij tò dissendent, sigilà con ëd sal dëdnans al Signor.

Dover dij Levita

²⁰Nosgnor a l’ha dije ‘ncora a Aron: “ Ti ‘t l’avras gnun-a ardità an soa tèra ‘d lor, nì ‘t t’avras na qualsëssìa porsion ëd proprietà an tra ‘d lor - i son mi toa porsion e toa ardità an tra j’Israelita. ²¹Varda, i l’hai daje ai Levita tute le décime che j’Israelita a l’han da paghé, coma salari pr’ ël servissi ch’a fan a la Tenda dël Rëscontr. ²²J’Israelita a l’avran pì nen da acostesse a la Tenda dël Rëscontr, dësnò lor a l’avran da porté ‘l pèis ëd sò pëccà e a l’avran da meuire. ²³Ël servissi dla Tenda dël Rëscontr a sarà carià mach ai Levita, e lor a saran responsabij dle trasgression ch’a comëtto. Costa-sì a l’é na lej përpètua pr’ ij vòstri dissendent. Ij Levita a l’avran gnun’ àutra ardità an tra j’àutre tribù, ²⁴përchè soa ardità ‘d lor a saran le décime che j’Israelita a riservo pr’ ël Signor. A l’é për lòn ch’i l’hai dije che lor a ‘rseivran gnun’ ardità an tra j’àutre tribù.

Istrussion pr’ ij Levita

²⁵Nosgnor a l’ha parlaje ‘ncora a Mosè. A l’ha dije: ²⁶It l’has da parlé ai Levita e dije: ‘Quand ch’i l’avreve arseivù da j’Israelita le décime ch’i dago a vojàutri tanme n’ardità, smonje la décima part al signor. ²⁷Costa oferta a sarà coma s’i l’avèisse riservà pr’ ël Signor la décima dël gran ch’a ven da l’éira e dël vin neuv ch’a riva dal tòrcc. ²⁸Parèj, ëdcò vojàutri i riservereve da tute le décime ch’i l’avreve arseivù da j’Israelita n’oferta pr’ ël Signor. Cost’oferta ch’i riservereve pr’ ël Signor dèila al sacerdòt Aron. ²⁹Dij don ch’i l’avreve arseivù, riservene la mej part coma n’oferta consacrà al Signor’’.

³⁰Ai Levita dije ‘dcò: ‘Quand ch’i l’avreve separà la mej part dle décime, a sarà coma si vojàutri, ij Levita, i l’avèisse pagà le décime an sël ricavà dl'èira e an sla réndita dël tòrcc. ³¹I podreve mangé lòn ch’a vansa an qualsëssia leugh con vòstre famije, përché ch’a l’é ‘l salari pr’ ël servissi ch’i feve a la Tenda dël Rëscontr. ³²S’i l’avreve riservà la mej part pr’ ël Signor, i sareve nen colpèivol ëd profané j’oferte sacrà dj’Israelita, e i l’avreve nen da meuire.

Nòte

1. Mach lor a podran ufissieje.

2. O “gnun ëstrangé” .

3. O “a meuirerà”.