Giosuè

21

Le sità levìtiche

¹A son presentasse peui al sacerdòt Eleasar e a Giosué, fieul ëd Nun, ij capfamija dij Levita e ij capfamija dj’àutre tribù d'Israel. ²A l'han parlaje an Silo, ant la tèra 'd Canaan, an costa manera: “Nosgnor a l'ha comandà për mojen ëd Mosè che an fusso donà 'd sità për steie, con ij sò anviron, për nòst bestiam”. ³Antlora j'Israelita a l'han daje al Levita quèich sità con ij sò pasturagi, gavandje da soe proprietà conform a lòn che Nosgnor a l’avìa dije. ⁴A son tirasse le sòrt anans ëd tut për la famija dij Coatita: e a costi Levita dissendent dël sacerdòt Aron, a son tocaje tërdes sità an tra le tribù ëd Giuda, Simeon e Beniamin. ⁵A la resta dla posterità 'd Coat, conform soe famije, a son tocaje an sòrt des sità dle tribù d'Efraim, ëd Dan e dla mesa tribù ëd Manasse.

⁶Ij Ghersonita a l'han avù për sòrt tërdes sità, da le famije dla tribù d'Issacar, da cola d'Aser, ëd Neftali e da la mesa tribù ëd Manasse an Basan. ⁷Ai fieuj ëd Merari, conform soe famije, a son tocà dódes sità dla tribù ëd Ruben, cola ëd Gad e da la tribù ëd Zabulon. ⁸Parèj, donca, j'Israelita a l'han daje an sòrt, tute coste sità con sò anviron ai Levita, parèj coma che Nosgnor a l'avìa comandaje për mojen ëd Mosè.

⁹Coj dla tribù ëd Giuda e dla tribù ëd Simeon a l'han assegnaje coste sità nominà ambelessì con ij sò nòm. ¹⁰Coste sità a son peui tocaje ai fieuj d'Aron, ch'a l'ero dle famije coatita, fieuj ëd Levi, përchè la prima sòrt a l'era surtìa për lor. ¹¹A son ëstàie assegnà Chiriat-Arba, (Arba a l'era pare d'Anach) ciamà 'dcò Ebron, an sla montagna 'd Giuda, con soa adiacense tut d'antorn. ¹²L’istess, ël teritòri davzin a la sità e a sò vilagi a l'é stàit donà a Caleb fieul ëd Jefune. ¹³A l'han daje ai fieuj dël sacerdòt Aron, le sità d'arfugi për j'amassida, Ebron e soa campagna; peui Libna e sò anviron. ¹⁴Jatir e soe adiacense, Estemoa e soa campagna, ¹⁵e Olon con sò anviron, e Debir, ¹⁶e Ain con soe adiacense, e Juta e Bet-Semes , tute con sò anviron; an tut neuv sità ch'a fasìo part ëd cole doe tribù là. ¹⁷Dla tribù ëd Beniamin a son sërnusse: Ghibeon e Gheba, con tut dantorn, ¹⁸Anatòt e Almon, con soe adiacense: an tut quat sità. ¹⁹An tut ai sacerdòt fieuj d'Aron, a son assegnasse tërdes sità, con sò pasturagi davzin.

²⁰Ora, a la rimanensa dle famije levìtiche, a-i j'ero 'dcò ij dissendent ëd Coat, che a l'ha l'avù, tirà a sortegi, coste sità dla tribù d'Efraim: ²¹Sechem, sità 'd sosta legal con sò anviron, an tra ij mont d'Efraim; e ancora Gheser; ²²Chibzaim e Bet-Oron: quat sità con sò pàscoj. ²³Da la tribù ëd Dan, Elteche, con soe adiacense, Ghibeton, con soa contà, ²⁴Ajalon, con sò anviron, Gat-Rimon con soa provinsa: quat sità. ²⁵Da la mesa tribù ëd Manasse: Tacanach e Gat-Rimon^[1], tute con sò anviron: doi sità. ²⁶Përparèj che des sità con tui sò anviron a son stàite për le famije dij Coatita, rimanensa dla stirp levìtica. ²⁷Da la mesa tribù ëd Manasse a lé 'dcò stàit donà a le famije dij Levita ch'a dissendìo da Gherson: Gòlan,butà ant ël Basan, sità d'arfugi për j'amassida, e Bestarat: doi sità con sò pasturagi. ²⁸Da la tribù d'Issacar: Chison, Daberat, ²⁹armut e En-Ganim: quat sità con rispetiv sircondari. ³⁰Da la tribù d'Aser: Misal, Abdon, ³¹Elcat e Recob: quat sità, con sò anviron d'antorn. ³²Da la tribù ëd Néftali: Chedes, sità 'd sosta për n'amassida, butà an Galilea, Amot-Dor e Cartan: tre sità, con tui sò anviron. ³³An tut, le sità con sò pasturagi, dàite a vàire famije ghersonite e son ëstàie tërdes. ³⁴Da la tribù ëd Zabulon a l'han ëdcò donaje a le famije merarite, posterità e rimanensa dij levita: Jocneam, Carta, ³⁵Dimna, Nacalal; quat sità con sò anviron tut d'antorn. ³⁶Da la tribù ëd Ruben: Beser, sità 'd sosta për n'amassida e ant ël desert dla piarda: Jacas, ³⁷Chedemòt e Mafacat, quat sità con tuj sò anviron d'antorn. ³⁸Parèj ëdcò da la tribù ëd Gad a l'han donàje: Ramòt dël Ghilead, sità d'arfugi për n'amassida, Macanaim, ³⁹Chesbon e Jaser, quat sità con sò pasturagi tut d'antorn. ⁴⁰An tut ij fieuj ëd Merari, dividù conform soe famije, che a formavo la rimanensa dij Levita a l'han avù dódes sità.

⁴¹An tut, ij Levita, an mes ai fieuj d'Israel a l'han otnù quaranteut sità, con sò anviron ëd pastura dantorn. ⁴²A l'ero tute sità con sò teritòri an adiacensa: parèj a l'é stàit për tute cole sità.

⁴³Donca, Nosgnor a l'ha daje a j'Israelita tuta cola tèra, ch'a l'avìa giurà 'd doneje ai sò cè. Lor a l'han arseivune 'l domini e a son staie. ⁴⁴Nosgnor a l'ha conceduje 'dcò la pas con le gent avzin-e, conform a la promëssa fàita ai sò grand, e nen un nemis a l'é ancalasne n'arviresse contra dj'Israelita, nen mach, ma 'l Signor a l'ha daje tùit an sò podèj. ⁴⁵Gnanca 'n mòt ëd tute le promësse propìssie fàite da Nosgnor a la ca d'Israel a son tombà: tute as son compìe.

Nòte

1. Mal fé la tradussion ambelessì: a s-ciòd da la lista dle sità danite che a-i j'ero anans. Jë LXX a leso Iebatha (Ιεβαθα), la volgata: Jeblaam, la volgata clementin-a: Gethremmon; 1 Chr 6:55 HT (6:70 ET) a les Bil'am (בִּלְעָם). Comsissìa la pì part ëd le version moderne a manten ël nòm ëd "Gat Rimon".