Giosuè

18

Assegnassion dël teritòri an tra le tribu ch’a-i restavo

¹Dòp d'avèj conquistà la tèra, tuta la comunità d'Israel a l'é assemblasse a Silo, andova a l'ha drissà la tenda dël rëscontr. ²A set tribù a l'era ancora pa stàita assegnà soa part ëd teritòri. ³Për lòn Giosué a l'ha dije al pòpol d'Israel: “Còs spetes-to a pijé ‘l possess ëd la tèra che 'l Signor, Dé dij vòstri cè, a l'ha dave? ⁴Sernì tre òmo për tribù. Mi i-j manderai a esploré 'l pais. A lo travërsran e a pronteran un pian d'arpartission ëd le tère. Peui a vniran da mi, ⁵e as divideran ël teritòri an set tòch. An tute le manere la tribù 'd Giuda a restrà an sò teritòri ant ël meridion, antramentre che ij dissendent ëd Giusep a saran ant ël sò a setentrion. ⁶Scrive con deuit la ripartission dël teritòri e portémlo. Ambelessì, an presensa dël Signor nòst Dé, i i tirerai le sòrt. ⁷Ma a diferensa dj'àutri, ai Levita, a-j tocrà gnun-a part, përchè sò but a l'é 'd serve Nosgnor tant 'me sacerdòt. Le tribù 'd Gad, ëd Ruben e la metà dle famije 'd Manasse peui, a l'han già avù soa tèra a levant dël Giordan, coma che Mosè a l'avìa concedùje”.

⁸Antlora j’òm ancaricà dl'esplorassion a son partì. Giosué a l'avìa comandaje: “Andé, përcore 'l teritòri da na part a l'àutra. Fene na descrission scrita e peui torné sì da mi. Ambelessì a Silo, dëdnans a Nosgnor, i-i tirerai le sòrt ëd le part”. ⁹Cola gent a l'é andasne, e a l'han traversà la region: a l'han prontà un document drinta un lìber dividù an set part e con la lista dle sità; peui a son tornà da Giosué al camp ëd Silo. ¹⁰E Giosué a l'ha campà le sòrt për lor a Silo a la presensa 'd Nosgnor; parèj che chiel a l'ha assegnà na part a tute le tribù d'Israel ch'a l'ero ancora sensa tèra.

Teritori assegnà a Beniamin

¹¹A la tribù ëd Beniamin a l'é tocaje ël prim teritòri sortegià: as trovava an tra la tribù ëd Giuda e le bande dij dissendent ëd Giusep. ¹²Soa frontiera da la part ëd setentrion a partìa dal Giordan; e cost finagi a dovìa monté an sla còsta 'd Gérico anvers tramontan-a, për peui monté ancora an montagna da la part ëd ponent për rivé al desert ëd Bet-Aven. ¹³Da là le bòine a passavo an sël fianch meridional ëd Lus, ciamà Betel, peui a calavo a Ataròt-Adar, dzora 'd la montagna a mesdì dël Bet-Oron ëd sota. ¹⁴Da là ël finagi a virava 'd diression e da la banda 'd ponent ëd costa montagna e a piegava a mesdì fin-a a la sità 'd Chiriat-Bal o Chiriat-Jearim, ch'a l'era 'd proprietà dla tribù ëd Giuda. Cost ël confin a ponent. ¹⁵A mesdì, la frontiera a partìa da Chiriat-Jearim e andasìa vers levant; e a rivava a le sorgiss dj'eve 'd Neftoach. ¹⁶Peui a calava a j'erse dla montagna ch'a sovrasta la valada ëd Ben-Inom, a la mira pì setentrional ëd la comba dij Refaim. ¹⁷A virava a tramontan-a, an passand anvers le Curve d'En-Semes e a Ghelilòt, an facia dla montà d'Adumim. Peui ël finage a calava al ròch ëd Boan,(Boan a l'era 'l fieul ëd Ruben); ¹⁸a passava a setentrion dal pendiss che a së spòrs an sla comba dël Giordan për calè ant ël desert, ¹⁹e a traversava la cala 'd Bet-Ogla. A finìa ant ël gòlf setentrional dël Mar Mòrt, andova a dësboca ël Giordan. Costi-sì ij finagi meridionaj. ²⁰Ël confin oriental a l'era 'l Giordan. Coste a son le borne assegnà a le famije dla tribù ëd Beniamin.

²¹Le famije 'd Beniamin a l'ero padron-e 'd coste sità: Gérico, Bet-Ogla, Emech-Chesis, ²²Bet-Araba, Zemaraim, Betel, ²³Avim, Para, Ofra, ²⁴Chefar-Amoni, Ofni, e Gheba: ant tut dódes sità con sò anviron. ²⁵Ghibeon, Rama, Beròt, ²⁶Mispe,Chefira,Mosa, ²⁷Rechem, Irpel, Tarala, ²⁸Zela-Elef, la sità dij Ghebusé, valadì Gerusalem, Ghibea, Chiriat-Iearim: an tut quatòrdes sità con sò anviron. Costì ël teritòri che le famije dla tribù ëd Beniamin a l'han arseivù.