Giosuè

15

Teritòri assegnà a Giuda

¹Ël teritòri assegnà an sòrt a le famije dla tribù ‘d Giuda së spantiava fin-a a la ponta meridionala dël desert ëd Zin, ai finagi con j'Edomita an diression ëd Teman. ²Costa frontiera dël sud a part da le rivere meridionale dël Mar Mòrt, ³e a passa a mesdì dla montà d'Acrabim^[1], a traversa ël desert ëd Zin e, a sud ëd Cades-Barnea, a riva a Chesron e fin-a a Adar; d'ambelelà a vira vers Carca. ⁴A passa peui da Atzmon e a va anans fin- al torent d'Egit, për rivé al mar,. “Sòn a sarà,” a l'ha dit Giosué, “vòst finage meridional”. ⁵Le borne ëd Levant a saran ël Mar Salà, fin-a a la boca dël Giordan. ⁶Da là a monta vers Bet-Ogla, a passa a nòrd ëd Bet-Araba, a monta fin-a al ròch ëd Bocan, fieul ëd Ruben; ⁷peui, an partend da la comba d'Acor, a monterà a Debir e ancora fin-a ai torniché setentrionaj ëd la banda 'd Ghilgal, ch'a l'é pròpi an fàcia a la montà d'Adumim, a sud dël torent; a calerà peui davzin a j'eve ëd En-Semess, për fé cap a En-Roghel. ⁸Da là le bòine a monta peui për la valada 'd Ben-Chinom fin-a al versant ëd mesdì dla montagna dij Ghebusé ch'a lé Gerusalem; che peui a s'ausserà fin-a al cò dël mont ch'a l' an facia al varèj d'Chinom a ponent, a lë stremità dla comba dij Refaita a tramontan-a. ⁹Da la ponta dla montagna, ël finage a së slarga fin-a a la sorgiss dj'eve 'd Neftoach, a seguitrà vers le sità dël mont Efron, e a s'ëslonga peui fin-a a Bala, ch'a sarìa Chiriat-Jearim. ¹⁰Da Bala a virerà peui a ponent anvers la montagna 'd Seir, a passerà për la còsta setentrional dël mont Jearim, ch'a l'é Chesalon, e a cala a Bet-Semess an passand da Timna. ¹¹Da là le borne a van anans anvers la banda 'd tramontan-a d'Escron, an spantiandse vers Sicron, e passand për mont Bala e prolungandse fin-a a Jabnel, për rivé al mar. ¹²Finage 'd ponent a sarà 'l Mar Mediteràni*. Coste le bòine da tute le bande dij Giudé conform a soe famije.

Caleb e Otniel

¹³A Caleb, fieul ëd Jefune, Giosué a l'ha daje na part an mes dij fieuj ëd Giuda, parèj coma che Nosgnor a l'avìa comandaje, visadì: la sità d'Arba pare d'Anach, ch'a sarìa peui Ebron. ¹⁴E Caleb a l'ha dëspossessà da là ij tre dissendent d'Anach, valadì le famije ëd Sesai, Achiman e Talmai. ¹⁵Da là a son montà vers j'abitant ëd Debir, che antlora as ciamava Chiriat-Sefer. ¹⁶E Caleb a l'ha dit: I darai mia fija Acsa da marié a col che a conquisterà la sità 'd Debir. ¹⁷E Otniel ben Chenas, frel pì cit ëd Caleb, a l'ha pijala; e Caleb a l'ha daje soa fija Acsa tant 'me sposa. ¹⁸E a l'é capità che Otniel a l'avìa convinciù Acsa a ciamé a sò pare un tòch ëd tèra; ël di dël mariagi Acsa a l'é calà dal borich e Caleb a l'ha ciamaje còs d'àutr a vorìa. ¹⁹A l'ha rëspondù: “Dame un present! përchè la tèra ch'it l'has dame a l'é tuta arsuvà, dame n'adoss”. Antlora 'l pare a l'ha donaje doe sorgiss aranda dël camp: dzora e sota dla tèra.

Sità ‘d Giuda

²⁰Costa a l'é l'ardità dla tribù dij fieuj ëd Giuda scond soe famije. ²¹Le sità butà an brova a sud dla tribù giudea, vers ël finagi d'Edom, a l'ero: ²²Cabtzel, Eder, Jagur, China, Dimon-a, Adada, ²³Chedes, Catzor, Itnan, ²⁴Zif, Telem, Bealot, ²⁵Catzor Cadatta, Cheriot, Chetzron ch'a sarìa Catzor, ²⁶Amam, Sema, Molada, ²⁷Catzar-Gada, Chesmon, Bet-Pelet, ²⁸Catzar-Sual, Beer Seba, Bisiotia, ²⁹Baala, Iim, Esem, ³⁰Eltolad, Chesil, Corma, ³¹Ziclagh, Madmana, Sansana, ³²Lebaot, Silchim, Ain e Rimon; an tut vinteneuv sità, e sò vilage. ³³Ant la region bassa: Estaol, Zorach, Asna, ³⁴Zanoa, En-Ganim, Tapua, Enam, ³⁵Jarmut, Adulam, Soco, Aseca, ³⁶Saraim, Aditaim, Ghedera e Ghederotaim: quatòrdes sità e sò vilagi. ³⁷Zenan, Cadassa, Migdal-Gad, ³⁸Dilean, Mitzpa, Joctel, ³⁹Lachis, Botzcat, Eglon, ⁴⁰Cabon, Lacma, Chitlis, ⁴¹Ghederot, Bet-Dagon, Nama e Macheda: sëddes sità e sò vilagi. ⁴²Libna, Eter, Asan, ⁴³Ifta, Asna, Netzib, ⁴⁴Cheila, Aczib, e Maresa: neuv sità e sò vilagi. ⁴⁵Ecron, le sità 'd sò teritòri e sò vilagi; ⁴⁶da Ecron e a ossident, tute le sità davzin-e a Asdod e sò vilagi. ⁴⁷Asdod, le sità dij sò anviron e sò vilagi; Gasa, le sità 'd sò teritòri e sò vilagi fin-a al torent d'Egit e al Mar Gròss, ch'a serv da finage. ⁴⁸Ant la contra 'd montagna: Sanoir, Iatir, Soco, ⁴⁹Dana, Chiriat-Sana, ch'a sarìa Debir, ⁵⁰Anab, Estemo, Anim, ⁵¹Gossen, Colon e Ghilo: óndes sità e sò vilagi. ⁵²Arab, Duma, Esan, ⁵³Janim, Bet-Tapua, Afeca, ⁵⁴Cumta, Chiriat-Arba, ch'a l'é Ebron, e Zior: neuv sità e sò vilagi. ⁵⁵Maon, Carmel, Zif, Juta, ⁵⁶Jesrel, Jocdeam, Zanoach, ⁵⁷Cain, Ghibea e Timna: des sità e sò vilagi. ⁵⁸Calcul, Bet-Zur, Ghedor, ⁵⁹Marat, Bet-Anot e Eltecon: ses sità e sò vilagi. ⁶⁰Chiriat-Bal ch'a sarìa Chiriat-Iearim, e Raba: doi sità e ij sò vilagi. ⁶¹Ant ël desert: Bet-Araba, Midin, Secaca, ⁶²Nibsan, Ir-Amela e En-ghedi: ses sità e sò vilagi. ⁶³Për lòn ch'a riguarda ij Ghebusé ch'a stasìo a Gerusalem, ij Giudé a l'han pa podùje mandé via; e ij Ghebusé a l'han abità con ij fieuj ëd Giuda an Gerusalem, fin-a al di d'ancheuj.

Nòte

1. AndéLa Rampa djë Scorpion” (עַקְרַבִּים [ʿaqrabbim] a veul dì “scorpion (plural)” an Ebràich