Giosuè

12

Lista dij rè dla Transgiordània conquistà

¹An precedensa ël pòpol d'Israel a l'avìa già conquistà e ocupà ël teritòri a levant dël Giordan, da la valada dël torent Arnon, fin-a al mont Ermon e a tut ël desert, fin-a a la comba dël Giordan. Doi rè a l'ero stàit butà an derota. ²Un a l'era Sicon, ël rè amorita ch'a stasìa an Chesbon. Sò ream a comprendìa metà dël teritòri ëd Ghilead; a andasìa da la sità d'Aroer, an sle rivere dël torent Arnon, con ansema ël fondval arlongh ël torent e a rivava fin-a al torent Jaboch, andova a passava la frontiera con la tèra dj'Amonita. ³A comprendìa 'dcò la comba dël Giordan da la rivera 'd levant dël lagh ëd Galilea fin-a al Mar Mòrt, an diression ëd Bet-Jesimòt. A mesdì a rivava fin-a ai teritòri butà a j'erse dël mont Pisga. ⁴L'àutr rè butà an derota a l'era stàit Ògh, rè 'd Basan, un dij darié dissendent dij gigant Refaim. Ògh a l'avìa soa residensa ant le sità d'Astaròt e d'Edrei. ⁵Sò regn a comprendìa tuta la caden-a dl'Ermon, ëd Salca e tut ël pais ëd Basan, fin-a a le borne con ij Ghesurita e ij Magnacatita. Nen mach, ma ancludìa 'dcò l'àutra metà dël teritòri ëd Ghilead, fin-a a la frontiera dël ream ëd Sicon, rè 'd Chesbon. ⁶Costi doi rè a l'ero stàit butà an derota da Mosè, ël servent ëd Nosgnor, e da j'Israelita. Mosè a l'avìa assignaje col teritòri a le tribù 'd Ruben, ëd Gad e a na mesa tribù 'd Manasse.

Lista dij rè dla Cisgiordània conquistà

⁷Giosuè e ij fieuj d'Israel, traversà 'l Giordan, a l'avìo sconfigiù tuit ij rè a ponent dël fium: da Bal-Gad, ant la comba dël Lìban, fin-a a la caden-a dël mont Calach, ch'a va vers Seir. Giosué a l'ha dividù ël pais an tra le tribù ancora sensa tèra e a l'ha assignane a tute na part. ⁸Ës teritòri a comprendìa la montagna, la pian-a^[1], la comba desértica dël Giordan e soe erse^[2], le barase^[3] e 'l desert dël Negheb. Cost teritòri a l'era ocupà da Hitita, Amorita, Canané, Perissita, Evé e Ghebusé. ⁹La gent d'Israel a l'ha batù ij rè 'd coste sità: Gérich, Ai, davzin a Betel, ¹⁰Gerusalem, Ebron, ¹¹Jarmut, Lachis, ¹²Eglon, Gheser, ¹³Debir, Gheder, ⁴Corma, Arad, ¹⁵Libna, Adulam, ¹⁶Macheda, Betel, ¹⁷Tapuach, Chefer, ¹⁸Afech, Saron, ¹⁹Asor, ²⁰Simron-Meron, Acsaf, ²¹Tanach, Meghido, ²²Chedes, Jocneam ant ël Carmel, ²³Dor an sla colin-a, Goim an Galilea, ²⁴e Tirza. An tut trantun rè.

Nòte

1. Ij contrafòrt ëd la pian-a(שְׁפֵלָה, shephelah) a son la region ëd transission an tra ij pais ëd le montagne dla Giudea e la pian-a dla rivera dël mediterani. Coste a son aree 'd càlcar eocénich con un model separà d'erosion, seul e covertura vegetal.

2. J'erse (עֲרָבָה,'aravah) a son na caraterìstica geogràfica che a së spantia da la Galilea al Mar Mòrt fin-a 'l Gòlf d' Aqaba. Ambelessì as deuv arferisse a la comba dël Giordan e a n'area che a s'ëspantia dal Negev a mesdì dël Mar Mòrt.

3. Le barase (אֲשֵׁדוֹת,'ashedot) as arferisso a la montà dla valada del Giordan fin-a a la colin-a e a le pian-e (o desert) a sud ëd la region ëd le colin-e.