Giosuè

11

Bataja ‘d Merom

¹Quand che Jabin, rè d’Asor, a l’é vnùit a savèj dle vitòrie ‘d Giosuè, a l’ha mandà ‘d mëssagé a anformene ij rè dj’anviron: Jobab, rè ‘d Madon, al rè ‘d Simron, e al rè d’Acsav, ²ai rè ch’a dominavo la region ëd le colin-e dël nòrd e ant l’Arabà a sud ëd la comba ‘d Chineret, dij pais bas, e ant la region ëd Dor, a ponent. ³A son ëstane ‘dcò anformà ij Canané 'd tuta cola region, j'Amorita, j'Hitita, ij Perissita e ij Ghebusé, tuta gent ch'abitava ant ij pòst ëd montagna e j'Evé ch'a stasìo ai pé dël mont Ermon, ant la comba 'd Mispa. ⁴Costi rè, antlora, a son mobilitasse con tute soe trupe ‘d lor: a l’ero numeros tant coma la sabia an sla rivera dël mar, con motobin ëd cher da guèra e ‘d cavaj. ⁵A son butasse tuti ansema e acampasse a j’aque ‘d Meron, determinà a ‘taché j’Israelita.

⁶Nosgnor a l’ha dije a Giosuè: “Pijete nen paura ‘d lor. It vëdras che doman a st’ora-sì mi i-j faraj tuti tombé mòrt dëdnans a Israel. Ti ‘t tajeras ij garèt dij sò cavaj e it-j bruseras ij cher da guèra. ⁷Antlora Giosué a l'é andàit con tuta soa armeja al lagh ëd Merom e a l'ha tacà ij nemis ëd sorprèisa. ⁸Ël Signor a l’ha faje tombè tuti an man dj’Israelita, ch’a l’han butaje an derota e a l’han daje dapress fin-a a Sidon, la gran sità, e a Misrefòt-Main, anvers nòrd, e fin-a a la valada ‘d Mispa a levant. La dërota ‘d tuta sta gent a l’é stàita tan granda ch’a-i na é restane pì gnun viv. ⁹Giosuè a l’ha peui fàit precis coma Nosgnor a l’avìa comandaje, visadì, a l’ha strupiaje ij garèt ai cavaj e a l’ha brusà tùit ij sò cher da guèra.

Conquista d’Asor

¹⁰A l’artorn da cola bataja, Giosuè a l’é ‘dcò ‘mpadronisse d’Asor, che ant ij temp antich a l’era stàita la sità capital ëd tuti coj regn. A l’ha fàit massé ij sò rè, ¹¹e a l’ha votà a lë stermini tùit ij sò abitant an passandje a fil dë spa. Gnun a l’é restane viv, peui a la sità a l’ha daje feu. ¹²Giosuè a l’ha conquistà tute coste sità real e a l’ha ciapà ij sò rè, anientandje con la spa, precis com a l’avìa comandà ‘d fé Mosè, ël servent ëd Nosgnor. ¹³Contut, con l’ecession d’Asor, j’Israelita a l’han pa daje feu a le sità fabricà an sle colin-e. ¹⁴Ëd lor j'Israelita a son mach ëspartisse ‘l botin e le bes-ce. Nopà, j'abitant a l'han massaje tuti; gnanca un ëd lor a l'é scampà. ¹⁵Nosgnor a l'avìa daje costi órdin a sò servent Mosè. Peui Mosè a l'avìa passaje a Giosué. Giosué a l’é stàit ubient an tut e për tut a lòn che Nosgnor a l’avìa comandà ‘d fé.

Giosuè a compiss la conquista ‘d tut ël pais

¹⁶Giosuà, donca, a l’ha conquistà tut ël pais, comprèis ël teritòri dle colin-e, tut ël Negev, tuta la region ëd Gosen, ij pé dle colin-e^[1], la comba desèrtica^[2], la region dle colin-e d’Israel e ij sò pé; ¹⁷dal Mont Calach an sù vers Seir, fin-a al Bal-Gad ant la comba dël Lìban sota dël mont Ermon, a tramontan-a. Giosuè a l’ha caturà e fàit massé tùit ij rè ëd coj teritòri. ¹⁸A Giosuè la guèra contra tuti coj rè a l’è costaje vàire. ¹⁹Mach na sità a l’avìa fàit un tratà ‘d pas con Israel sensa combate: e a l'é stàita Ghibeon, abità da j'Evé. Tute j'àutre sita a son ëstàite conquistà con j'arme. ²⁰Ij sò abitant a l'avìo vorsù feje oposission an tute le manere a j’Israelita. Ma soa testassarìa a l'era vorsùa da Nosgnor^[3]: chiel a-j condanava përparèj a lë stermini e a-j destinava a esse massà tui, sensa clemensa. A l'era col-lì ël comand che Mosè a l'avìa arsèivù da Nosgnor.

²¹Dòp tut sòn, Giosuè a l’ha ‘tacà e anientà j’Anachita ch’a stasìo ant la region ëd le colin-e - a Ebron, a Debir, a Anab, an tuta la region montaniosa ‘d Giuda e d’Israel. Giosuè a l’ha anientà lor e soe sità ‘d lor. ²²Pì gnun ëd lor a l'é restaie an vita an mes d'Israel: càiche scampà a l'é survivù. ant le sità 'd Gasa, Gad e Asdod, fòra dal teritòri d'Israel. ²³A l’é parèj che Giosué a l'ha conquistà la tèra che Nosgnor a l'avìa comandaje a Mosè ‘d conquisté. Giosué a l'ha dàila an ardità a j'Israelita e a l'ha dividula an part, un-a për tribù. An cola manera la gent a l’é arposasse da la guèra an tut ël pais.

Nòte

1. Ij pé dle colin-e (שְׁפֵלָה, “shephelah”) as arferisso a la region ëd transission an tra le colin-e dla Giudèa e la pian-a dla còsta dël Mediterani.

2. La comba desèrtica (עֲרָבָה, ʿaravah, o Arabà) a së stend da la Galilèa al ansen ëd Aquabah. Ambelessì as arferiss probàbil la Val dël Giorda, e la banda pì larga dla comba sota ‘l Mar Mòrt.

3. O “Nosgnor a l’avìa decidà che ij sò abitant a l’avèisso andurì ‘l cheur e a l’avèisso fàit guèra contra Israel.