Giòb

38

Ël prim discors ëd Nosgnor

¹Antlora Nosgnor a l'ha antërpelà Giòb da 'n mes dla tempesta e a l'ha dit: ²"Chi ch'a l'é col-lì ch'as përmet ëd trové da dì 'd mie decision con paròle da gnorant? ³Ch'a ven-a anans coma n'òm, përchè i l'hai 'd ròbe da ciameje e i veuj na rispòsta!".

Le maravije dl'univers

⁴Andova ch'it j'ere ti quand che mi i pogiava le fondassion dla tèra? Famlo savèj, ti ch'it pretende 'd savèj tut! ⁵Chi é-lo ch'a l'ha determinà soe dimension e ch'a l'ha tirà na còrda për mzurela? ⁷Còs é-lo ch'a ten sù soe fondassion e chi é-lo ch'a l'ha pogià ij sò canton ëd pera ¹mentre che le stèile matinere a cantavo an còr e ij fieuj 'd Dé a crijavo 'd gòj? ⁸Chi é-lo ch'a tenìa 'l mar ant ij sò confin quand ch'a sortìa coma na masnà dal vènter ëd soa mare ⁹mentre mi i lo vestìa con ëd nivole e lo fassavo con ëd top ëspess? ¹⁰I son stàit mi a sarelo tra 'd pòrte 'd fer e a buteje 'd limit. ¹¹I l'hai dije: "Ti 't peudes andé mach fin-a a sto pont sì e nen pì an là. Ambelessì toe onde poderose a deuvo fërmesse".

¹²L'has-to mai comandà a la matin ëd seurte fòra e a l'alba ch'a vnèissa sù ant l'orient? ¹³Has-to mai stendù la lus dël dì fin-a a la fin dla tèra e sopatane la coerta për gavene le bòje^[1]? ¹⁴Coma la lus as avzin-a, la tèra a ciapa soa fòrma tanme 'd creja pressà sota 'n cacèt; a l'é vestìa 'd color splendrient. ¹⁵Coj ch'a son gram la lus a j'ambarassa e a fërma 'l brass ch'a l'era ausasse për patlé violent.

¹⁶Has-to mai esplorà le sorgiss dël mar o marcià ant le galerie ancreuse ch'a-i son al fond dla tèra? ¹⁷Sas-to andova ch'a son le Pòrte dla mòrt o l'intrada dël pais dël top? ¹⁸Has-to mai considerà vàire ch'a l'é l'amplëssa dla tèra? Dimlo s'it lo sas!

¹⁹Da 'ndova ch'a ven la lus? Andova ch'as artira lë scur? ²⁰Peudes-to porteje ciaschëdun a soa ca? Sas-to coma riveje? ²¹Ëd sicur tut sòn ti 't lo sas, përchè ti 't ses nassù prima che tut a fussa creà, e ti 't l'has tanta 'd cola esperiensa! Nen vera?

²²Ses--to intrà ant ij depòsit ëd la fiòca o vëddù ij magasin ëd la tempesta? ²³(Ij gran ëd la tempesta mi i-j guerno pr' ël temp dël castigh, pr' ij dì dle bataje e dla guèra). ²⁴Andova ch'a l'é 'l senté ch' a men-a a la sorgiss ëd la lus? Andova ch'a l'é la ca dël vent ëd levant? ²⁵Chi é-lo ch'a l'a creà 'l canal dij torent ëd la pieuva? Chi é-lo ch'a l'ha tracià 'l senté dla lòsna? ²⁶Chi é-lo ch'a fà pieuve ant ël desert, ant na tèra sëcca dov' a-i stà gnun? ²⁷Chi é-lo ch'a manda la pieuva për sodisfé 'l teren chërpà e fèje chërse d'erba ténera? ²⁸E chi é-lo 'l pare dla pieuva, o col ch'a génera la galaverna? ²⁹Cola ch'a l'é la mare dla giassa? Chi é-la ch'a fà nasse la brin-a dal cél? ³⁰Përché l'eva as cambia an giassa pì dura che la pera, e la superfice dl'eva a géila.

³¹Peudes-to guidé 'l moviment dle stèile, o grupé ansema le Pléiadi, o dësblé le còrde d'Orion? ³²Peudes-to guidé la sequensa dle stagion o deje na diression al Gran Cher con le soe roe^[2]. ³³Peudes-to regolé le lej dl'univers? Peudes-to dovreje për regolé la tèra? ³⁴Peudes-to deje na vos a le nivole parèj ch'a faso tombé la pieuva? ³⁵Peudes-to fé paruté la lòsna e fèjla campé giù pròpi andoa ch'it veule ti?

³⁶Chi é-lo ch'a dà d'intuission^[3] al cheur o ch'a dëspensa d'anteligensa a la ment? ³⁷Chi podrìa-lo mai conté 'l nùmer ëd le nivole? Chi é-lo che podrìa fé dëbordé ij vas dl'eva dël cél? ³⁸për fela tombé am sël terèn sëch e dur tanme 'd mon cheuit?

Le maravije dël mond dle bestie

³⁹Podries-to provëdde a la lionëssa soe pijàite, o sodisfé l'aptit dij lion giovo ⁴⁰quand ch'a son cogià ant soe tanere o ch'a speto cocià ant ij leugh andoa ch'a së stërmo? ⁴¹Chi é-lo ch'a provëd da mangé ai cornajass quand ij sò polastrin a crijo a Dé ch'a l'han fam e as na van an gir a l'arserca 'd quejcosa da mangé?

Nòte

1. O "Ij malign", "ij gram", "për porté a la fin la gramìssia dla neuit".

2. O "L'orsa con ij sò orsòt".

3. O "ch'a dà sapiensa".