Deuteronòmi

27

Istrussion për la granda Ciambrea litùrgica

¹Mosè e j’ansian d’Israel a l’han daje costi órdin al pòpol. A l’han dije: “Guerné tùit ij comandament che ancheuj iv dago. ²Ël di che i passereve ël Giordan për intré ant ël pais che ël Signor tò Dé at dà, drissa 'd gran’ pere e daje la biaca 'd caussin-a; ³peui scrìvie dzora tute le paròle 'd costa lej, cora ch'it saras passà për rivé a la tèra che 'l Signor tò Dé at dà, tèra andova làit e amel a scoro, coma che 'l Nosgnor Dé dij tò antich, a l'ha promëttùte. ⁴E ant ël moment ch'it passeras ël Giordan, drissa an sël mont Ebal coste pere, coma che mi 'v comando, e arìssje 'd caussin-a. ⁵E ambelelà it buteras an pé pr’ ël Signor tò Dé, n'autar che ël fer a l'àbia pa travajalo. ⁶Për fabrichelo, ti ‘t podras mach dovré ‘d pere nen travajà. Dzura ‘d cost autar ti t'ësmonras d'olocàust al Signor tò Dé, ⁷e 'dcò ëd sacrifissi ëd comunion: mangg-ne là la carn, an fasend festa an onor dëll Signor, tò Dé. ⁸Scrìvie ansima a costi ròch, an manera bin ciàira, tute le paròle 'd costa lej.

⁹Peu, Mosè, compagnà dai sacerdòt levita, a l’ha parlà parèj a tut ël pòpol d’Israel: “Stà ciuto e scota, Israel: d'ancheuj ti 't ses vnùit a d’esse ‘l pòpol dël Signor, tò Dé. ¹⁰It obidiras a la vos dël Signor tò Dé e it butras an pràtica ij sò comandament e soe lej, che d'ancheuj mi 't dago.

¹¹An col midem di Mosè a l'ha daje st'órdin a la gent an disendje: ¹²Le tribù ch’i dirai a l’han da benedì ‘l pòpol an sël Mont Gerizim quand ch’i passereve ‘l Giordan: Simeon, Levi, Giuda, Issacar, Giusep e Beniamin. ¹³E coste àutre tribù a l’han da sté an sël Mont Ebal për pronunsié le maledission: Ruben, Gad, Aser, Zebulun, Dan, and Naftali.

Dódes maledission

¹⁴Ij Levita a l’avran da parlé e a diran a àuta vos a tuti j’òm d’Israel:

¹⁵“Ch’arsèiva na maledission chi ch’as fà n’idol ëscurpì o fondù, euvra d’òm, che ‘l Signor a detesta, e a l’adora dë scondion!”. E tut ël pòpol a rëspondrà: “Àmen!”.

¹⁶“Ch’arsèiva na maledission chi ch’a dëspresia sò pare o soa mare!”. E tut ël pòpol a rëspondrà: “Àmen!”.

¹⁷“Ch’arsèiva na maledission chi ch’a dëspiassa ij termo dla proprietà ‘d sò vzin!”. E tut ël pòpol a rëspondrà: “Àmen!”.

¹⁸“Ch’arsèiva na maledission chi a fà perde la stra a ‘n bòrgno!”. E tut ël pòpol a rëspondrà: “Àmen!”.

¹⁹“Ch’arsèiva na maledission chi a vìola ij dirit dij forësté, dj’orfanin e dle vìdoe!”. E tut ël pòpol a rëspondrà: “Àmen!”.

²⁰“Ch’arsèiva na maledission chi ch’as cogia con un-a dle fomne ‘d sò pare; përchè lolì a sarìa në dzonor grev për sò pare^[1]!”. E tut ël pòpol a rëspondrà: “Àmen!”.

²¹“Ch’arsèiva na maledission chi ch’as cogia con na bes-cia!”. E tut ël pòpol a rëspondrà: “Àmen!”.

²²“Ch’arsèiva na maledission chi ch’as cogia con soa bela seur da part ëd mare o ‘d pare!”. E tut ël pòpol a rëspondrà: “Àmen!”.

²³“Ch’arsèiva na maledission chi ch’as cogia con soa mare-madòna!”. E tut ël pòpol a rëspondrà: “Àmen!”.

²⁴“Ch’arsèiva na maledission chi a massa sò pròssim an dë stërma!”. E tut ël pòpol a rëspondrà: “Àmen!”.

²⁵“Ch’arsèiva na maledission chi ch’as lassa soborné e a sassina ‘n nossent!”. E tut ël pòpol a rëspondrà: “Àmen!”.

²⁶“Ch’arsèiva na maledission chi a osserva pa ij comandament ëd costa lej e a-j buta nen an pràtica!”. E tut ël pòpol a rëspondrà: “Àmen!”.

Nòte

1. Let “...përchè a àussa la coverta 'd sò pare!”.