Deuteronòmi

23

D’esclusion da la ciambrea dël pòpol

¹N’òm ch’a sia stàit castrà o ch’a l’abia avù ‘l pénis tajà a podrà pa esse amëttù ant la ciambrea ‘d Nosgnor^[1]. ²Dla midema manera, a podrà pa intré ant la ciambrea ‘d Nosgnor un bastard^[2]. E gnanca ‘n sò dissendent fin-a a la generassion ch’a fà des a-i podrà esse amëttù.

³J’Amonita e ij Moabita^[3] a podran pa esse amëttù ant la ciambrea ‘d Nosgnor, e lolì gnanca la generassion ch’a fà des dij sò dissendent a-i na saran amëttù. A lo podran mai essje, ⁴përchè ch’a l'ero pa vnùve ancontra con pan e eva, an vòst viage, ant ël moment ch’i surtìe d'Egit e për ël fàit che a l'avìo ciamà Balam, fieul ëd Beor, da Petor ant la Mesopotàmia, e a l'avìo daje 'd sòld për maledite. ⁵Ma 'l Signor tò Dé a l'ha pa scotà Balam; nen mach, ma për ti a l'ha cambià la maledission an benedission, përchè 'l Signor tò Dé at veul bin. ⁶Serca mai, për tant ch'it vive, la prosperità 'd lor, nì sò bin. ⁷Nopà l'Edomita, da già ch'a l'é tò frel, it dovras mai abominelo; e parèj gnanca l'Egissian, përchè it ses stàit òspite an sò pais. ⁸Ij fieuj che a-j nasran a lor, dla tersa generassion, a podran intré ant la ciambrea 'd Nosgnor.

Purëssa ritual dël campament

⁹Quand ch’it antrapijeras na campagna militar contra ij tò nemis, vardte bin dë schivié tut lòn ch’at podèissa rend-te impur^[4]. ¹⁰S’a-i fussa an mes a ti cheidun ch’a sìa vnùit impur për ëd polussion^[5] nuiteje, ch’a seurta dal campament e ch’a-i torna pa durant ël dì. ¹¹Quand ch’a rivrà la sèira as laverà con d’eva e a podrà torné al campament a l’ambrun-a dël sol. ¹²Ël còmod për fé ij tò bzogn it l’has da tnilo fòra dal campament. ¹³An tò echipagiament, porta ‘dcò na palëtta e quand ch’it seurte a fé ij tò bzogn, fate na tampëtta. Apress, quata ij tò escrement con ëd tèra. ¹⁴Che parèj a-i sia gnun-a porcarìa an tò campament, ch’a l’ha da esse sant, për ch’a l’é ‘l Signor, tò Dé, ch’a na sta ‘n mes. A l’ha da essje gnente ch’a-j fasa dëspiasì, përchè a l’é chiel ch’at lìbera e ch’at dà ij tò nemis ant le man; dësnò chiel a podèissa bin andess-ne.

Ne s-ciav fugitiv

¹⁵Dajlo pa ‘ndré a sò padron në s-ciav ch’a sia scapà e arfugiasse da ti. ¹⁶A podrà ‘d sicur resté da ti, an tò pais, ant ël leugh ch’it serne, ant un-a dle sità che chiel as treuva mej. Daje gnun-a molèstia!

Nò a la prostitussion sacra

¹⁷A gnun Israelita, òm o fomna ch’a sia, a l’é consenti ‘d pratiché la prostitussion sacra. ¹⁸S’it l’has da compì ‘n vot, pòrta nen al templ dël Signor, tò Dé, na paga da bagassa, o la paga d’un can, l’é a dì n’òm ch’as prostituiss. L’un-a e l’àutra pràtica a son ëd ròbe abominèivole pr’ ël Signor, tò Dé.

Ij préstit a ‘nteresse

¹⁹It-j faras pa a tò frel Israelita ëd préstit a 'nteresse, nì ëd dné, nì ëd proviande, nì ëd tut lòn che as peul prestesse a 'nteresse. ²⁰A lë strangé it podras bin presteje a 'nteresse, ma nen a tò frel israelita; përche ël Signor tò Dé at benedissa an tut lòn ch'it faras, ant ël pais andova che të staghe për intré për ess-ne padron.

Ij vot

²¹Quand ch’it fase ‘n vot al Signor, tò Dé, it tarderas pa a compilo; përchè ël Signor, tò Dé, at na ciamerìa sicura cont, e ti 't sarìe colpèivol d’un pëccà. ²²S’it asten-e da fé ‘n vot, it comëtte gnun pëccà, ²³ma, s’it na fas un, agiss conform al vot che it l'avras fàit al Signor tò Dé ‘d manera volontària.

Dirit ëd cheuje ‘d frut

²⁴Quand ch’it intre ant la vigna ‘d n’àutr, it podras mangé tuta l'uva che 't veule, ma it në butras pa ant la toa cavagna. ²⁵L’istess, s’it passe pr’ el camp d’un àutr, it podras ciapé dë spì con la man, ma pa nen dovré na mëssòira për pijene.

Nòte

1. Sossì a l’avìa pa da fé con la discriminassion d’òm andicapà, ma che ant ël servissi religios dël Tabernacol, a diferensa ‘d lòn ch’a fasìo ij pagan, mach d’òm complèt a podìo ufissié.

2. Na përson-a nassùa fòra d’un mariagi legitim. Ël “bastard” ממזר : a l'era 'l fieul ëd n'Israelita con un ch’a l’era nen ebrèo.

3. A l’ero ij dissendent ëd Lot e ‘d soe doe fije (cfr, Génesi 19:30-38) ch’a l’ero ‘l frut d’un ansest. Tutun, coste doe nassion a l’avìo ‘dcò mostrà d’avej gnun-a disposission a dé d’ospitalità a Israel (v. 4)

4. Ël contest, ambelessì, a rend ciàir ch’as trata nen ëd n’avertiment moral, ma ‘d n’esortassion a schivié tut lòn ch’a podèissa dësqualifiché l’Israelita da la partisipassion a d’atività religiose. Dë schivié d’assion grame as na parla an d’àutri leugh.

5. Polussion dë sperma o ‘d porcarìa.