Deuteronòmi

19

Le sità d’arfugi

¹Ant ël moment che 'l Signor tò Dé, a l'avrà ësterminà le nassion, dont ël pais a l'é an camin ëd dete, e ti 't l'avras dëspossessaje e i të staras andrinta ëd soe sità e an soe ca, ²sern-te tre sità, an mes dël pais, che 'l Signor tò Dé, at dà an possess. ³Ti 't tniras soe stra an bon ëstat, e ti it dividras an tre 'l teritòri che 'l Signor tò Dé at don-a n'ardità: sòn përchè tuit j'amassida a-j peuda trové arfugi.

⁴Costa-sì a l’é la lej ch’a riguarda col ch’a-j scaperà për salvesse la vita se për dësgrassia a l’avrà massà quaidun sens’ avèjne ‘d nemicissia. ⁵Sto-sì a l’é ‘l cas ëd l’òm che, con sò compagn, as na va ‘nt la foresta për fé ‘d bòsch e, an brandend un piolèt për campé giù na pianta, ël fer a jë scapa ‘d man e a frapa sò amis e col-lì a va a meuire. Col ch’a n’é responsabil a peudrà ‘rfugesse ant una ‘d cole tre sità e as salverà la vita. ⁶Parej chiel a podrà schivié ‘l vendicator dël sangh^[1] che, anfurià, a-j corerà dapress e, arciapandlo an sla vìa, a podrìa bin masselo, bele se sto-sì a sia nen un cas ëd condan-a a mòrt përchè, quand ch’a l’é capitaje la dësgrassia, a l’era nen an nemicissia contra soa vìtima. ⁷A l’é për lòn ch’it comando ch’it serne cole tre sità.

⁸Se ‘l Signor tò Dé a slarga ij tò confin coma ch’a l’ha giuralo ai tò antich, e at dà tuta la tèra ch’a l’ha fane la promëssa ai tò cé - ⁹a la condission che ti 't guerne e pràtiche tùit ij comandament che mi 't prescrivo d'ancheuj, an voréndje bin al Signor tò Dé e an seguitand sèmpe ij sò vieuj: a coste tre sità ti 't në giunteras ancora d'àutre tre. ¹⁰Parèj, ant ël pais che ‘l Signor, tò Dé at dà an ardità, a sarà pa vërsà ‘l sangh d’un nossent: ti ‘t saras pa responsabil ëd soa mòrt^[2]

¹¹Ma se a-i j'ancàpita che n'òm anghignonà 'd sò pròssim as buta a l'avàit contra 'd chiel, a-j vòla a còl e a lo bat a mòrt, e peui as na scapa drinta un-a 'd coste sità, ¹²j’ansian ëd cola sità a lo andran a ciapé e a lo butran ant le man dël vendicator dël sangh, per ch’a lo peussa massé. ¹³Abie gnun-a compassion ëd col-lì: ranca vìa da Israel ël sassin d’un nossent, e antlora at andrà tut bin.

Ij confin ëd le proprietà

¹⁴Dëspiassa nen ij tèrmo dla proprietà ‘d tò pròssim, cola ch’a sarà marcà^[3] ant l’ardità ch’it arseivras ant ël pais che ‘l Signor, tò Dé at dà.

Ij testimòni

¹⁵A l’é pa pro la testimoniansa ‘d na sola përson-a për fé condané quaidun, qualsëssìa a sìa ‘l crimen o ‘l pëccà ch’a l’abia comëttù. La question a l’ha da esse definìa për la diciarassion ëd doi e tre testimòni. ¹⁶Se ‘n testimòni fàuss a s’ausserà contra ‘d cheidun për acuselo ‘d manera përversa, ¹⁷antlora tùit e doi ij contendent as presenteran al templ dël Signor e a dëspiegheran ël cas ai sacerdòt e ai giùdes ch’a sio an funsion an col moment-là. ¹⁸Ij giùdes a faran n’investigassion precisa: s’a ‘rzulta che ‘l testimoni a l’é fàuss e ch’a l’ha fàit na calunia contra sò frel Israelita; ¹⁹It l’has da aplicheje la pen-a che chiel a vorìa për sò frel. Ranca vìa ‘l gram da ‘n mes a ti. ²⁰J’àutri, ch’a na sentiran parlé a n’avran tëmma, e gnun për l’avnì a farà pì d’assion grame coma cole-lì. 19:21 Abie gnun-a compassion dël colpèivol: vita për vita, euj për euj, dent për dent, man për man, pé per pé.

Nòte

1. גֹּאֵ֨ל הַדָּ֜ם (goel haddam), col ch’a l’ha mandat ëd fé giustissia an massand ël sassin.

2. O “a-i sarà nen ëd sangh dzora 'd ti”.

3. O “coj ch’a l’avìo piantà j’antich”.