Coelet 11

11

A venta travajé malgré l’incertëssa dl’avnì

11:1 Fà comersi ëd toe produssion, campje da l’àutra part dël mar, e con ël temp at artorneran dij profit¹, 11:2 Ma divid ij tò investiment an tra set o eut pòst divers, përchè ti 't sas pa che dësgrassie a podrio capité an sla tèra.

11:3 Se le nivole a son pien-e d’eva, a la sverso an sla tèra; se na pianta a tomba a meridion o a tramontan-a, ambelelà andova ch’a casca, là a resta.

11:4 Col ch’a-j dà da ment al vent a sëmnarà mai e col ch’a varda le nivole a mëssonrà pa.

11:5 Pròpi coma ch’as peul nen comprende ‘l senté dël vent o ‘l mistèri dla vita ch’as fòrma ant na fomna ansenta, parèj ti ‘t peudes nen comprende lòn ch’a fà Nosgnor, përchè a l’é chiel ch’a fà tut.

11:6 A la matin smen-a toa smens, e a la sèira daje nen d’arlass a toe man, përchè it sas nen d’ andov a vniran ij tò profit, se da un travaj e da l’àutr o da tùit e doi.

Valèisse dla vita durant la gioventura

11:7 Coma ch’a l’é dossa la lus! Coma ch’a l’é bel da vëdde ‘l sol d’un neuv dì ch’a monta!

11:8 Se n’òm a viv për tanti agn, ch’as jë gòda tuti, e ch’a pensa ‘dcò ai dì sombr, ch’a saràn ëdcò tanti: tut lòn ch’a-j riva a l’é vanità.

11:9 Alégher, giovo, an toa gioventura, e ch’as argiojissa tò cheur ant ij dì ‘d toa gioventù. Séguita pura le stra ‘d tò cheur e j’anvìe dij tò euj. Contut a venta savèj che Nosgnor at ciamrà an giudissi për tut sòn. 11:10 Tapara vìa la malinconìa da tò cheur, slontan-a da tò còrp ël dolor, ma arcòrd-te che gioventura e caviera nèira a son un buf ëd vent.

Nòte

1 O ”Campa tò pan an sj'eve, përchè con ël temp it lo troveras torna”.

À à È è É é Ì ì Ò ò Ó ó Ù ù Ë ë