Coelet 10

10

La folairà e la saviëssa

10:1 Parèj coma na mosca mòrta a peul vasté 'l balsam dël përfumé: un pòch ëd matarìa a vasta¹ la saviëssa e l'onor.

10:2 Ël pensé dël savant a lo porta an sla strà giusta, ma col dël sensa sust an sla sbalià².

10:3 As peul arconòsse na përson-a sensa sust fin-a da la manera ch’a marcia an sla stra. A l’é coma s’a disèissa a tuti: “Mi i son un fòl”.

10:4 Se la flin-a d'un potent as anvisca contra 'd ti, lassa nen tò pòst, sta calm, përché la calma a pasìa 'dcò le ofèise pì greve.

10:5 A-i é n’àutr mal che mi i lhai beicà sota 'l sol: ëd rè e ‘d governator a peudo fé n’eror pitòst grev: 10:6 quand ch’a buto ant ij pòst pì àut d’autorità dij fòj e coj ch’a-i san fé, ëd gent dal valor provà, an posission basse. 10:7 I l'hai vëddù dë s-ciav ch’a van a caval e 'd prinsi marcé a pé coma 'd sërvent.

10:8 Col ch'a scava na tampa a podrìa cascheje andrinta, e col ch'a dësbela na muraja a podrìa esse mordù da na serp. 10:9 Col ch'a s-ciapa le pere a podrìa fesse dël mal e col ch'a ressia 'l bòsch a-i è privo ch’as taja.

10:10 Se 'l fer a taja nen e as mòla pa 'l fil, a venta travajé 'd pì: a-i la fà col ch'a deuvra bin la saviëssa.

10:11 Se 'l serpent a lo mòrd anans d'esse anciarmà, a còsa serv a fé l'ancantador?

10:12 Le paròle dla bòca dël savi a-j vagno d’aprovassion³, ma ij làver dël sensa sust a lo mando an malora⁴. 10:13 Ij sensa sust a fondo ij sò pensé an sù ‘d fàusse premësse: a l’é parèj che soe conclusion a saran ëd matarie grame.

10:14 Ël sensa sust a dis tròpe paròle: Sà-lo nen l'òm lòn ch'a-j capitrà? Col ch'a l'é ch'a-j dirà lòn ch'a-i sarà dòp ëd chiel?

10:15 Ij fòj a fan mach un pò ‘d travaj e già a son strach: a peudo gnanca pì trové la strà ch’a-j pòrta a ca⁵.

10:16 Maleur a ti, paìs, ch'it l'has un fiolin sensa esperiensa për rè, e andova ch’ ij prinsi a son là ch’a fan festa fin-a da la matin! 10:17 Ti, bonorà, pais, ch'it l'has për rè n'òm lìber e ij prinsi a fan disné quand ch'a l'é l'ora përchè a l’han fam e nen da sventronà.

10:18 Për la gargarìa ël sofit a droca e për la fagnanerìa dle man a pieuv antëcà.

10:19 Për esse content as fan ëd disné e 'l vin a dà gòj a la vita, ma a son ij sòld ch’a conto da pì. 10:20 Sparla nen dël rè gnanca con ël pensé e maledis nen ël potent gnanca da stërmà an toa stansia da let, përchè n'osel dël cél a podrìa portèje la vos e dije lòn ch’it l’has dit!

Nòte

1 O “A peul conté da pì che”.

2 Let. “...a va a la drita e col dël sensa sust a va a snistra”

3 O “binvolensa”.

4 Le parole a arvelo ‘l cheur ëd l’òm, e lòn ch’as dis a peul avèj conseguense greeve (Maté 12:24-37).

5 O “a la sità”.

À à È è É é Ì ì Ò ò Ó ó Ù ù Ë ë