Principais elementos arquitectónicos
A catedral converteuse no edificio paradigmático da arquitectura gótica e o modelo francés na súa expresión máis representativa.
A nova espiritualidade relixiosa da época, así como as innovacións técnicas e construtivas, permitiron levantar edificios máis altos e luminosos. Os elementos que fixeron posible este cambio foron fundamentalmente o arco apuntado ou oxival,máis lixeiro que o de medio punto, e a bóveda de cruzaría,resultante do cruzamento de dous arcos oxivais, cuxa estrutura permitía descargar o peso directamente sobre columnas e piares, liberando ao muro da súa función de soporte.
Grazas a eses dous elementos, os arquitectos puideron abrir grandes ventas, que despois serían ricamente decoradas con vidreiras de cores. A maior altura e amplitude das naves, xunto ao alixeiramento dos muros, obrigou aos arquitectos a reforzar exteriormente a estrutura do edificio mediante un complexo sistema de arcobotantes e contrafortes que contrarrestaban o peso das bóvedas interiores.
En planta, a catedral gótica presenta unha organización moi
característica:
Tres ou cinco naves lonxitudinais, sendo a central de maior altura e anchura que as laterais.
Cabeceira cun transepto máis curto.
O deambulatorio ou xirola, rodeado de capelas radiais, adquire un gran protagonismo.
No exterior, o elemento máis destacado é a fachada occidental.Flanqueada por dúas altas torres, na súa estrutura xeralmente pódense distinguir varias franxas horizontais superpostas.
Abaixo, e correspondéndose en número coas naves interiores, atópanse as portadas, cunha rica decoración escultórica. Sobre elas, e non sempre na mesma orde, adoitan aparecer un corpo de arcadas, un gran rosetón e un triforio con esculturas. Esta estrutura, ademais, repítese nas fachadas do transepto.
A catedral de Notre Dame presenta un triplo pórtico, frixo con estatuas, rosetón, ventás, arcada e torres.
Outros elementos destacados do exterior son a cuberta a dúas augas que cobre as bóvedas interiores e o ciborio, que en ocasións coroa o cruceiro.
Os outros elementos arquitectónicos que se poden ver -agullas e pináculos de forma piramidal ou cónica, que rematan as cimas das torres, e os gabletes ou remates en punta a xeito de frontón- son utilizados para acentuar a verticalidade da construción.