Puff with Custard filling (by Vanlily)
愛上puff簡直令我有相擁恨晚既感覺, 如此簡單易做又好味既甜品, 我對佢既熱愛情度, 係一發不可收拾!
自己做過幾次, 也從書本網上看過一些理論和資料等, 總結了一個較詳細既食譜, 就同大家分享一下我做puff既心得喇!
材料:
水 65g
奶 65g
牛油 60g
糖 3g
鹽 2g
低筋麵粉 70g
蛋 3隻
做法:
1) 先準備好所有材料: 奶, 牛油, 雞蛋要室溫; 低粉過篩
* 要準備好, 因為一陣所有步驟都係要一口氣做哂既!
2) 水,奶,牛油,糖和鹽一同煮至牛油溶化,熄火
* 牛油溶化就要即熄火, 避免水份蒸發
因為當puff入爐後, 水份會化做蒸氣, 可令粉糰發大, 但同時有濕氣又會令puff有鬆軟的效果~ (好神奇!)
3) 一次過加入已篩過之低筋麵粉,立即快速攪拌至材料混合成麵糰
一次過加入粉
* 如果唔一次過, 粉糰油脂浮於表層, 粉內既筋性就好難出來, 咁就發唔到喇~
攪拌混合
à初初粉糰會有粗粒, 出現散開型態 (左圖)
à 再快手攪拌至粉糰光滑令身, 好快就會成為一糰 , 開中火, 繼續大力混合 (中圖)
à 最後煲底會出現一層薄膜(約1min), 粉糰又不會黏住個煲 (右圖) , 即係OK, 熄火!
4) 先加入半份蛋汁,快手攪拌, 再分次逐少加入蛋汁, 直到粉糰拌起, 出現倒三角及有墜手既感覺.
襯熱加入蛋汁
* 目的是把水份均勻地鎖住於粉糰中, 增加水份令粉糰入爐後發大
先加入半份, 再逐少加入蛋汁
* 一開始加太少蛋汁, 蛋汁會熱熟, 所以先加半份
* 但如果一口氣加入蛋汁太多, 粉糰會太稀救唔番!! 所以之後要逐少加入
* 注意整個過程要太約5mins完成, 因為粉糰凍左變乾左會好難唧喇!
關鍵"倒三角"
* 適中既軟硬度, 就係粉糰有倒三角既出現, 而且仲要有墜手既感覺, 要個粉糰有少少想跌想跌咁先ok~ (見movie)
5) 入唧袋, 唧出大小均一既形狀
* 我個環就係因為太大, 所以小既ok大既都未得, 出爐就未如理想! 留意留意!
* puff 與 puff之開要留有適當距離等佢地發大
6) 於泡芙面上塗蛋汁(易上色)/ 噴水,中層, 180c-200c, 20-25mins
*蛋汁出來個色會上色d
中途千萬不可打開爐
* 因為puff入爐後脹到最大既形狀之後, 熱力會繼續將puff內既組織抽乾水份
* 如果未完成就打開, 水份未抽乾, 一出爐就會下陷啊~ 要比d耐性哦~
爐火要適中
* 我試過太大火, 水份蒸發得太快, 會有裂紋出現
* 但又唔可以太低溫, 因為咁會好難熟, 所以爐火一定要自己試過先知~
7) 最後將出爐puff切開2半, 或者底開個小洞, 用唧咀唧入吉士, 就ok喇~
*可用專用唧吉士入puff既唧咀, 但我覺得唔需要~
吉士食譜:
牛奶 250g / 糖 60g / 蛋黃 60g / 栗粉 25g / 牛油 12g / 雲呢拿籽 1/4條
1) 粟粉, 30g糖和50g奶先拌勻, 後加蛋黃
2) 剩下200奶, 雲呢拿籽和30g糖煮沸, 邊煮邊拌
3) 將(2)倒入(1)中, 攪拌後再倒回鍋中煮至沸和稠身
4) 關火後將糊過篩, 到糊降至60c時, 加入室溫牛油, 拌勻後冷藏3小時使可使用
http://hk.myblog.yahoo.com/vanlilychan/article?mid=2523