好奈冇整蛋糕，裝潢係我嘅弱點，一來冇心機，
二來懶，諗住自己食就唔洗裝飾啦，
次次都係攞啲千年朱古力出嚟，
放係面扮下野，當我整完個蛋糕，直係提唔起勁，
再從新整一堆野去裝飾。
用貴野綠茶粉真係唔出色，一啲都唔綠。
但係今次個拖肥餡做得好滿意，小小苦加甜味，個內部各層厚度都好平均。
做咗一個5"加4個細嘅，終於都攞4個細嚟玩下，
亂咁試個綠茶淋面，個淋面又綠到得人驚，
下一次要減減綠茶粉，因為太綠及太貴，
一樽細綠茶粉，做3次餅就用完，有啲肉赤。
小山進蛋糕底28cmx28cm薄蛋糕一片
全蛋130g 砂糖70g 蜂蜜7g 粟膠7g 低粉75g 無鹽牛油10g 牛奶18g
1) 牛奶及牛油坐熱水
2) 蜂蜜、粟膠坐熱水至40度，加入全蛋及砂糖，打起
3) 加入篩過的低粉拌勻，再加入熱牛油及奶拌勻
4) 入爐用170度焗25分鐘即可
綠茶慕斯6"份量
奶20g 砂糖30g 綠茶粉8g 淡忌廉300g 魚膠片5g 酒5g
1) 淡忌廉打起7成備用，綠茶粉加糖攪拌勻，加入熱奶及魚膠片，再拌入淡忌廉拌勻。
拖肥餡5"份量
砂糖35g 淡忌廉130g 蛋黃2個 魚膠片2g
1) 砂糖煮至金黃色，加入蛋黃及淡忌廉攪拌勻，再煲至85度過篩，加入魚膠片放涼，雪冰硬可用。
綠茶淋面(4小個份量)
熱水20g 淡忌廉15g 砂糖35g 綠茶粉5g 魚膠片2g
1) 砂糖加綠茶粉攪勻，加入熱水及魚膠片，再加入淡忌廉，放涼可用。