Ara

Altar de pedra para sacrificios con sangue, ofrendas ou libacións con viño. As votivas estaban dedicadas a unha divindade. 

ARAS VOTIVAS

Os romanos prometíanlle aos seus deuses levantarlles aras - altares- se estes cumprían as súas peticións. De aí a presenza habitual das fórmulas EX VOTO "por un voto, unha promesa", ou V(otum) S(olvit) L(ibens) M(erito), "cumpriu o seu voto de libre vontade".

As aras adoitan presentar orificios na parte superior para facerlles ofrendas á divindade: perfumes ou alimentos para queimar, líquidos para verter, etc.

Temos dedicacións aos deuses protectores dos viaxeiros: Neptuno, deus do mar, que ampararía aos navegantes, e os Lares Viales, os deuses dos camiños, que protexerían aos viaxeiros nas rutas terrestres. A deusa Fortuna, que aparece mencionada en dúas ocasións, invócase para ter "boa fortuna" en calquera empresa, mentres que a dedicación a I.O.M. (Xúpiter Óptimo Máximo) reflicte o culto ao deus supremo dos romanos, manifestación de obediencia ao poder imperial.

Estela

Monumento de pedra de caracter funerario, que nos da información sobre o defunto (profesión, idade, familia, etc.)