Vec Sig Dehuex

(白椿)

Lu Juxbingg huanik

Jieko si jit xee qoxjuix suiw suiw ar ee jabow ginxaw, mrqycc ix byy hingwcur tagceh, qanda’ air sngw, diwsuw hro haghau logde quixlyrr vxenr.

“Ar, toxiar lar, toxiar lar, qamxx byy benw tagceh dyrr erdangr did diyc hyw singjig ee vanrhuad?” Qenww vaiw narr hro vavax mamax ma, ix dyrr anxnex sniu.

U jit qangx, ix decc siaw qecdngxqangx itding rair qaux ee suanwsut-siokdee, sen’ jyr dy’ jyr byy lo laii, qycc jiokk air kunr :e, ix cununn hachir .jit .xe, langg dyrr vreh .kiw .laii, qniaa anww guardniaa laii. Dirr hiax, jit jangg snuandee-ciu cai tringg tringg, qo’ jit luiw huex dng’ decc kuix.

“Ar, narr laii venr jyr jitt luiw dehuex, m jaix zuarrr hyw lehh! Haghau longxx benw qycc kir, qanda’ huex kuix suiw suiw dyrr did langg tniar, jiokk hyw :e. Ar, jiokk sniu beh venr jyr jit luiw huex.”

Ix naxx anxnex sniu, naxx qra bin dux uaw kir dehuex taujingg pnri diyc huex ee pangbi. Hex pangbi pangx qaxx sniu’ quer tauu, qra pni-aw cringr .diyc, “Hatcniur,” Jieko pah jit xee kacniur, langg taukag gongg .kir, bagjiux marr amwhinn .kir. Quer .u .jit .kun .ar, jiacc hueguann dngw .laii, qetqyw jnuaxngiu? M jaix dangsi’aw, qaqi venr jyr vec sig ee dehuex, acc bagjiux jingg jit xee qapp qaqi jabjiog cancniu ee jabow ginxaw dirr hiax kia tringg tringg, itdid decc knuar henrjuxsii ee vec dehuex.

Jieko simlai jin’ diyhqniax, mrqycc ix sniaxmic longxx berdangr jyr, qanda’ erdangr knuar hitt xee jabow ginxaw suar .lyc beh congr sniaw.

“Ar, zuarrr nirr suiw ee hueluiw, qycc u jiokk pangx ee kiwbi. Narr erdangr qra ix cah dirr huevann lairdew, vruee guaw tagceh, m jaix zuarrr hyw lehh, laii kir qra abuw qongw.” Sniu qaur jiax, kavo qinw suaw, papapa jauw duiww cur-lai kir. Byy zuarrr quw, Jieko ee mamax dyrr tec jit qix jenw cauw jenw huex ee qadyx laii qaur guardniaa.

“Oox, jiokk hranw did tniax diyc liw qongw beh tagceh. Qacc si beh tagceh dyrr siongrr hyw :ar. Qrax dehuex jitt kuanw siyw dairjir qycc sngr sniaw?”

Naxx qongw naxx drang ciuw, dyrr qra Jieko soxx venr ee hitt luiw huex lenrr kix dair hiyc longxx qrax .lyc .laii, cah dirr huevann lairdew, kngr diamr Jieko juvangg ee dyh-dingw. Venr jyr dehuex ee Jieko an’ judyh-aw ee jit qag knuar .quer .laii, jabow ginxaw jin’ hnuahiw, ngii qunwqunr ee bagjiux itdit knuar huevann, cuir-aw ciyr bibix.

Byy zuarr quw, jabow ginxaw jre .lyc .laii, kaisiw jyr guanvunw ee suanwsut-siokdee. Venr jyr huex ee Jieko si jiokk gairgiyc, jiokk qenwsiaur, qui’ xee bin angg qongwqongr. Si anxjnuaw?

Suanwsut lenrsibpo-aw lairdew longxx si siaw m driyc ee dap’anr, qycc kacc hiauhing .ee si jidsiwqer niaux viwvar ovec rue, ovec jut ee quair dohingg, jabow ginxaw singx qra ovec rue ee doo iong cit’aw crid qaxx cingkir cingkir, qycc qra m driyc ee dap’anr longxx qaiw hro driyc, qecdngwqangx rair qaux ee siokdee marr juanvo siaw hyw, qycc knuar knuar .jit .xe jiacc siux .kiw .laii. Jieko dirr vnix:a knuar jit xe quw, marr liyc aw jaingiaw suanwsut ee jywhuad, qamxqag cuwbi, be kamc did zimxsiu qanda’ dirr vnix:a knuar, itdit gniaurgniau suanx, sniu be qaqi laii siaw, mrqycc dy’ venr jyr huex ar, sniaxmic dairjir longxx berdangr jyr.

Jabow ginxaw qra suanwsut lenrsibpo-aw siux hyw liauxau, dyrr qycc qra gixbunn-kywvunw tec .cud .laii. Kywvunw-dingw hanwzi vnix:a huanrnarr u iong envid juwimx ee ser ser zi hilakanah longxx qra crid driau, ixqingx qar .quer ee bunjniux singx liu liu tak tak .jit .xe, sinx :ee marr dairsingx junxvi, cir tak ven, qycc laii dyrr qra envitap-aw qapp juvaux vniar vniar crid crid lehh, congr cingkir liauxau, envid siah hro suiw suiw, kywvunw cam’ po-aw puewhap qongkywviyw dausaux, dangjee kngr zip kir juvaux-lai, qycc qra juvaux siwjniar siwjniar kngr diamr judyh-dingw.

Suar .lyc, ix qra judyh-aw ee quirtuah pah kuix, ban ban aw kingg lairdew ee mihqnia. Lairdew u qiongg jnrix .zip .kir, congwdi langg, ovec siaw, ziok qui’ uann ee juaxdiauu-aw, gnoxhuex jabsig, dnii jywhuew luan caucaux ee snuawjad-aw qapp cunx :ee ee mihqnia.

Jabow ginxaw singx qra juaxpnir vnex hro vnee, jit dniux jit dniux tac hyw tangx jyr qewsuanwjuaw iong. Luan caucaux ee snuawjad-aw giuw dit, jiauww sikdir dnii dirr snuawkunn-dingw. Jitt dangdiongx, Jieko si gairgiyc qaxx be qongw .did, bagjiux qimx qimx knuar, bin angg qongwqongr, jiokk sniu beh qra qaqi venr byy .kir.

Jabow ginxaw qra vangqingx ee dairjir longxx jyr hyw liauxau, dyrr jauw laii mamax dng’ decc byingg ee jauwkax. Langg kuu .lyc, ciuw duw dirr tokax, qongw,

“Abuw, hro guaw laii qra liw dauwsnaqangx.”

Mamax jit sii cuir suacc qongw be cud ue, bagjiux liac jabow ginxaw knuar .jit .xee, suah .lyc, iong damm damm ee siangx ciuw qra jabow ginxaw lamw diauu diauu, qongw,

“Ar, liw dangsi’aw venr jyr jiacnirr quaix ee ginxaw lehh?” ue naxx qongw, bagsaiw cniu jinjux-kuanw loglog dih .lyc .laii.

Venr jyr vec huex ee Jieko knuar diyc jitt bo jingqingw, qui’ xee langg qamxsimx qaxx cuah dinxdang. Jieko cniu anxnex hro mamax lamw diauu tniawsiyh ee dairjir si jurjaw dyrr m bad u .quer .ee. Ix jitt jun u vah kuanw simjingg, himsen, uixkud, koxlenn, hnuahiw, visiongx…., jit xee jit xee puu .kiw .laii. Jit sii zimw be diauu, cniu lorjuiw ee jului dih dirr dyh-dingw. Jur jex ixau, jabow ginxaw soxx jyr ee muixx jit qnia dairjir byy jit qnia si hro Jieko byy qamxsimx :ee.

Laii jiyx ix sngw ee pnaiw ving’iuw longxx vaiwtog mamax qra qirjuat driau, qanda’ qapp hyw ee ginxaw cud kir sngw.

“Jieko ar Jieko, dua vngrtangw, Jieko si vnerhongx ee logdersingx, jit nii nng vaiw ieiyh. Langg’ beh cutgiap, ix qycc ciux ciux ciux.”

Pnaiw hagsingx anxnex qra tixciyr, ix marr si dirr cur nirr ciyr .jit .xe nia.

Tagceh jigua narr u siqanx dyrr duer mamax yc jiamjiw ciacsiur, amwtauu aw dyrr qra aqongx ee qingqactauu duii duii luanw luanw lehh, mamax ee pacpair, vavax ee cekenw, longxx sui’ kir jyr hyw. Qaqi ee dairjir byy jit hxang si rair hro mamax iacc si amaw huanlyw .diyc. Tong’ cur ee langg longxx giaugii qycc qamxsimx, dua qra ylyw, jit qnia jit qnia lexbut longxx brew laii sniuw .ix. Mrqycc jabow ginxaw jin’ dingxjinx qra hex siux hyxser, qanda’ iong Jieko guanlaii hiaxee qu mihqnia.

Narr viw cur ee langg qycc kacc diyhqniax giaugii :ee si haghau ee sensnix lor. Cuxjingg sionrkyr, bylun tniax diyc sniaw, taukag longxx si lee lee ee Jieko, jitt jun si sniaxmic longxx sui’ tniax sui’ erhiauw, qycc dniardnia tec cud lenrr sensnix dyrr qamxqag jin’ pnaiw hueingr ee bunrdee.

Iauxx m si anxnex nia. Ixjaw dirr unrdongrdniaa sngw ee sii, jiokk air huachiux, jiokk air sniurkir, qycc jiokk sairpuad ee Jieko, qenww kuix cuir dyrr qongw gairhni ciwcak ee gensuu. Hitt xee langg langg toxiar ee Jieko, qui’ xee venr jyr cinced qycc unziuu, sniaw kuanw cittyy sngxhuad longxx byy qingw, sngw ee sii ciydiyy u guankir, cam’ jingwlangg jywhuew sngw qaxx jnia’ kuaiwlok. Iurqycc jiokk kongxqaux, ixjingg byy air qapp ix qniaa siy’ uaw ee vingiuw, longxx venr jyr air cam’ ix sngw, air jiyx pnua laii cur nirr. Jabow ginxaw vutquanxsii dy’ cam’ vingiuw diam diam aw sngw, diam diam aw tagjux.

Laii cur nirr ee vingiuw dagg xee longxx ylyw Jieko dyh-dingw huevann soxx cah ee hitt luiw vec sig dehuex jin’ suiw. Hitt sii jabow ginxaw longxx anxnex rinr,

“Guaw itdit longxx sniu qongxx laii venr jyr jitt luiw vec dehuex neh.”

“Jingwqingx or?” je xui vingiuw longxx duiww diyc jabow ginxaw ee surjingg simx ylyw janwtanr. Jieko soxx venr ee vec dehuex suii diyc zirjiw quer .kir, zuxx laii zuxx visiongx qapp hibii.

“Cniurr guaw jiacc pnaiw ee ginxaw, dyrr anxnex laii siausid .kir, hro hitt xee jabow ginxaw dairter guaw jyr Jieko. Narr anxnex, huanrser dagg xee langg m jaix e zuarr nirr hingrhog lehh! Sinn ar, dyrr hro hitt xee dairter guaw ee jabow ginxaw hingrhog kuaiwlok, itdit qaur ingxuanw lonxx byy venr!”

Ix uiww simlai qidyw qycc qidyw, jului loglog itdit dinx .lyc .laii. Dyrr dirr ix anxnex juruanr jurvix jidiongx, langg ee guankir longxx siauboo driau, jit bak nih, tauu dyrr damr .lyc .laii.

“Ueer, ueer, Jieko, dua hyw dairjir, juanvo longxx si qxah. Nacc e qra singjikdnuax cangr .kiw .laii lehh? Siyw kiw .laii jit .xe, Jieko. Qanda’ tagceh duiww sintew si byy hyw .ee. Liw .kiw .laii lar.” Mamax dua sniax decc qra qiyr. Hud .jit .xe, Jieko bagjiux vreh qimx, jiacc jaix qaqi pag dirr pah kuix ee suanwsut-kywvunw-dingw kunr m jaix zuarr quw.

Binrtauujingg huevann lairdew cah ee dehuex, jitt sii qanda’ qix qapp hiyc iauxx qycc lauu diauu lehh. Hex sria .kir ee hueluiw, huebin dywkab dirr dyh-dingw, quixlyhh xee huevan siwsnuar lag dirr vnix:a.

guanjokjiaw: 夢野久作 Yumeno Kyusaku