inghiongglo_6
inghiongg lo -6
Bunchhai huan'ik
JIYH MOHUAD DYJAUW
Zuqyw ngiaa diyc singwli ee inghiongg did diyc luxsinn iacc si lamsinn ee jiokhog, zircniaw sinn bingkag pair ix jah moxjiongw jyrhog siarhue ee ingxsingx berlauriyc dngw laii zinqanx, anne morhiamw ee juewau qaidnua dyrr e did diyc ciaujurzenn vyxviwjiaw juanlik jicii.
Lingrgua jit bin, zuqyw inghiongg byy qor siuxhorsinn ee huanxduir cruw diyc singwlirpinw, iacc si inghiongg dngw laii qaur zinqanx suacc hro sinbingg/ iaumoo hunwno, anne morhiamw sinue ee jiongbuew qaidnua dyrr e si jit dniuu huihiamw ho'ngg diyhqniax, ongxongw si hixcutsingr ee duiziok. Inghiongg beh dyjauw kyxlingg e siurr mohuad joxdongr, marr kyxlingg jiyh mohuad jo ix siamw quer joxgai, anne, jitt dniuu jauw siy' ziog dyrr e venr qaxx jin' hogjap.
--- Campbell, <Cingbin Inghiong>
1950 nidai diongqii, CAMPBELL dirr WASHINGTON D.C. ee qokburngi qar nng dxangx ee donghongx dethak, hagsingx dy' si jit quaw junxvi beh paiwju haixgua ee guarqauguann, huanxingr qik zet, jex hro CAMPBELL derr id vaiw iwsig .diyc, ix soxx qar ee mic, vutjixsirr dairhagsingx/ hagjiaw jiacc u cuwbi.
1968 nii, M.MURPHY iaucniaw ix kir Qajiux BIG SUR ee ESALEN Ginxqiuwsow qangxhak. Suar .laii ee jap-qauw nii, CAMPBELL jing'au ham' jokqax SAM KEEN/ taiwqigqunn saihu C.AL HUANG/ simlixhagqax J.W.PERRY ... dirr ESALEN habjog kuikyr. Jitt xee qinggiam, dua ~ kokdua ix sinuerhak ee ingwiong huanruii.
1972 nii ui' S.LAWRENCE tewhiux. Qycc laii quixarr nii, je vaiw cut'iuu, kir quer LCELAND/ TURKEY/ EGYPT/ GREECE, qycc dirr Danglam'ax jinwhingg jit jua dngg siqanx ee luxhingg.
<THE MASKS OF GOD> derr sir vunw, marr si juewau jit vunw dirr 1968 nii cutvanw. Jex si CAMPBELL zi-jap nii uansingg ee qewik, ixx genxqiur sinue ee ligsuw huatdenw/ zinlui jongqaur ee cavedsingr jyr jongjiw, bogdig si beh ham' <Cingbin Inghiongg> horsiong voxciongx. Sir nii au, cutvanw liauw <MYTH TO LIVE BY>, juxvenx <THE PORTABLE JUNG> cutvanw, 1974 nii cutvanw <THE MYTHIC IMAGE> si BOLLINGEN herlet siongrr hyw ee jokpinw ji' id.
Brown : guaw bad ham' liw jywhuew dirr Qajiux vakhaixhnua sraiw ciax cittyy, dirr CARMEL --- liw siauwlenn sii kir quer ee soxjai --- u quer lanbongg ee qiwik. Guaw kiokk m jaix liw si jnuaxngiu laii ESALEN qar ceh?
Campbell : hex li jitmaw ixqingx jap-lak ~ jap-cid nii (1968) ee dairjir lor! M.MURPHY jiapsiu A. WATTS ee qenwgi, iaucniaw guaw laii ESALEN qangxhak. ESALEN cavutdyx marr si hitt sii singlip ee.
U jit vaiw, guaw beh kir MILWAUKEE, dirr Qurqimsnuax juanw huiqix, u jit diamxjingx ee langwpang. R.PRICE vruee MURPHY laii cue guaw, mng guaw qamxx u cuwbi laii jiax (ESALEN) qar kxyr. Guaw dap'inr ar. Taukixsingx guaw qangw ee lueriongg juann si sinuerhak, siongrkyr ee derdiamw dyrr si jitt qingx qauwsig. Hagsingx huanxingr jin' zet, cuxau dyrr itjair laii lor.
----------------------------------------
Ciauquer zi-jap dxangx ee siqanx, CAMPBELL uirr ESALEN cuex zip jit qrow cingsinx ee snewmiarlat. Muixx jit xee tniax ix kxyr ee hagguann/ qauwjitquann, likuix qauwsig sii, dy' cniurr camqax quer vowdyrdairhue hitt ngiu, jingsinn qongcaiw, qamxsiu diyc GALAHA/ KALI/ HERMES ee kexsi, m si dergak huew ee kiongxvor. Jurlaii byy laursux e cniurr CAMPBELL hitt ngiu, erdangr hro tniajiongr tiongsimx hixet qycc puewhok. Dirr ESALEN qar .quer ee langg, byy jit xee erdangr cniurr ix qra zedjingg/ hagsut/ diwhui qethap qaxx hiacc uanjuann.
--------------Michael Murphy -----------
Kixtauu jixsirr qar sinuerhak, aurlaii u jit xee diongrdua huatdenw. U jit vaiw, SAM KEEN qaur NEW YORK laii cue guaw, qingquer tyxlun, gunw quatding beh dirr ESALEN habkuix jit xee kxyr. Gunw u jit xee lixlun, SAM huisiongg gauu cue cud vadd langg simliw bunrdee ee qattauu. Jitt jiongw dairjir, guaw byy zinruii jixu cimdo simliw hunsig jiacc jyr e qaur, jerje sijun, langg e hamrzip simliw bunrdee, jixsirr mow jit xee simqad jokquair, qra jitt xee qad ciausuaw .jit .xe, jurzenn dyrr did diyc sikhongr.
Hex si jit xee jin' hyw ee sinuerhak guanliw. Dirr Inwdo, iaumoo virr zinruii jixsirr iwsig ee jongwgairjiaw, si hiaxee e ingxhiongw langg ee iwsig jingwsiongg unrjog ee surbut huawsinx. Gunw incuw sniu cud jit xee juxir : SAM hurjig ham' hagsingx duiwdamm, cue cud inx bunrdee ee qad, guaw hurjig cue inx simliw bunrdee dirr sinue ee duiwingr jingjed.
Jex si jit xee cuwbi ee lixlun, zircniaw be sionghai zimrhylangg. Sursit jingwbingg, gunw ee lixlun si qniaa e tongx :ee. U snax ~ sir xee qywanr, gunw dy' huisiongg u singqyw, jex si guaw derr id vaiw zinrbad diyc sinue hongbin ee diwsig, erdangr unriong laii qaixquad sidjer simliw bunrdee.
<CINGBIN INGHIONGG> QAPP JINGSINHUNLEHJINGR
Brown : Jyr jit xee jingsinkyx isux, guaw duiww liw ham' PERRY jongsu ee habjog digvet u cuwbi. Linw si jnuaxngiu siybad :ee?
Campbell : MICHAEL u jit vaiw siaw puex hro guaw, mng guaw qamxx u cuwbi laii Qurqimsnuax, ham' jit xui jingsinkyx isux PERRY qniwbin, qongw duiwhongx si jingsinhunlec hongbin ee juanqax. Guaw huepuex qongw guaw m bad jingsinhunlec. Danrsi MICHAEL huee qongw, m quanw guaw si m si beh ham' PERRY huerbin, ix dy' si beh guaw laii kuix kxyr. Guaw qongw, kuix iuxquanx JOYCE ee kxyr, jnuaxngiu neh? Hyw ar! Ix rinr.
Anne, guaw dong'ir ham' PERRY dirr ESALEN sna' qnir, PERRY singx qiar jit quaw jingsinhunlehjingr ee siongrdingx hertongw bunjiux hro guaw knuar. Guaw huathen, cuthen dirr jingsinhunlec vnerlangg ee huanwsiong herlet ham' guaw <Cingbin Inghiongg> soxx dramm diyc ee sinue iwsiong siongdongx itdir.
Jaiww crur hro guaw iwsig .diyc, guaw soxx cuwbi ee sinuerhak, vutjixsirr sunn hagsudsingr, ham' sidjer sing'uac si sna' lenn :ee.
Brown : sursit-siong, guaw marr si anne jiacc qapp liw siybad. 1970 nidai diongqii, tak diyc liw <THE MASKS OF GOD> derr id vunw <PRIMITIVE MYTHOLOGY> sii, qamxqag lairdew hiaxee sinue, cniurr guaw simlixhunlec ee vnerlangg qongw ee qowsu.
Campbell : Driyc! Jin' sinqii. Vutqyr jitt jiongw quanlenn marr hro guaw dirr 1960 nidai, ziaw .quer dua mohuann. Dongsii siauwlenlangg kaisiw suh behuniyc (LSD), guaw ee <Cingbin Inghiongg> hro HIPPIES dongwjyr Singwqingx. Guaw sriu diyc jikjue.
QNIAA ZIP SNEWMIA, QNIAA HIONGR LINGSINGR
Kennard : Dirr liw qangxenw qetsog au, qamxx bad duw quer laii mng bunrdee :ee, e hibang liw iong snax-jap biyxjingx, qongw cud snewmia jinjniar iwgi si sniaw?
Campbell : [ciyr] byy, byy, guaw m bad duw quer anne ee langg.
Kennard : Liw tniax langg' qangw suah au, qamxx bad mng quer enxqangxjiaw anne ee bunrdee?
Campbell : byy, guaw be mng jitt jiongw bunrdee, zircniaw tongsiongg jixsirr langg' mng guaw bunrdee. [ciyr] sursit-siong, guaw siongrr qniax :ee, si mng guaw jitt jiongw bunrdee, jitt xee si siongrr lann dab :ee. Lingrgua jitt lui qydnii :ee, si hiaxee duxdecc siaw poksu lunrbunn ee langg, inx e iauqiuu uirr inx teqiongx digvet ee camkyxceh/ luirsu jitt lui ee dairjir. Jiaxee si guaw duw .quer ui'id ee kunwziauw.
Kennard : Hiaxee poksurvanx hagsingx longxx siaw sniaw?
Campbell : inx siaw ee debak u quaw hro langg sniu diyc air ciyr! [ciyr] cniurr u jit xee poksu hagsingx genxqiur :ee si MILTON dirr <Jap-sir Jua Six> si jnuaxngiu iong “ ;” jitt xee hunhy huhy.
Kennard : Liw jnuaxngiu jaix? Si liw mng ix?
Campbell : m si, si ix jurqiw qra guaw qongw :ee. Jinjniar si jit xee ho'ngg sniu byy ee debak.
Kennard : Qamxx u duw quer vixqaur kacc cuwbi ee bunrdee? Liw uanjuann m bad :ee? in'ui anne, qra liw cua zip jit xee sinx lingxhik?
Campbell : Siongrr cuwbi ee jit xee bunrdee, si 1967 nii dirr jiax MASLOW qauwsig siongrkyr sii, u langg mng “WAITE DECK OF TAROT CARDS ee huezi u sniaw siongrdingx amwsi?”
Ixjaw m bad sniu quer jitt xee bunrdee. Knuar quer jitt jiognw TAROT ang'axpiaux, hex si ZIMMER laursux siongrkyr qongw .diyc ee nng ~ snax hxang su, ang'axpiaux qamm u sniaw siongrdingx, guaw jit diamw aw dyrr byy qaiwliam, qra mng ee langg qongw, “ hro guaw jit hur vxaii (78 dniux juaxvaii) jah dngw kir sniu knuar mai lehh, bin'axjair jiacc qra liw qongw.”
Hex si jit xee jin' ciwqig ee tiaujenr. MAJOR ARCANA (qidiongx ee 22 dniux) qaixtok cud quiw jxox juxdee, qidiongx jit jxox siongrdingx zinsingx sir qaidnua: jiyxhuer/ singsik/ jongwlenn/ jerhuer (SENILITY), DANTE bad dirr <CONVIVIO> siongser tyxlun.
Lingrgua jit jxox marr si sir dniux vxaii qowsingg. Derr id dniux rue :ee si jit xee jabow qra jit xee nasig kiwbingw-lai ee juiw iacc si moxmic dryr zip lingrgua jit xee angsig kiwbingw, hyrjyr “junxjad(?)”. Derr zi dniux si “moquiw”, dairviauw dergak. Qycc laii jit dniux rue ee si luii kar diyc quann tah, jitt xee tah qiyr “huixbedtah”, si lenrgik ee tuantongw siongrdingx, siongrder iong luii qra juerog qongr cruir, huixbet driau hitt xee langg qra liac diauu ~ ee jurgnow hertongw.
Derr sir juxdee ee derr id dniux si “tendongg”, siongrdingx snewmia ee kaisiw, rue ee si nng xee angsig ee kiwbingw, dngdecc dryr mic hro erbin ee sewqair. Dyrr si DANTE soxx qongw ee LA VITA NUOVA, sinx snewmia --- ui' jit xee bacsinx kiwbingw dryr zip jit xee lingsingr kiwbingw hro did diyc sinx snewmia.
Qra jiaxee juxdejox he jywhuew, dyrr e did diyc jit xee jin' suiw ee hertongw, inx soxx beh qaixsueh :ee, vutjixsirr langg dirr qniaa quer zinsingx sir qaidnua ee simliw jongrtair, marr si zinsingx ee lingsingr juanxhuar.
MINOR ARCANA (56 dniux) ee sir jxox, u iwsur ee soxjai si jin' Diongsewqiw ee mic. Dnaxx soxx jaix siongrr jaw jit hur TAROT vxaii, iokk 1392 nii Huatqog qokongg CHARLES harling jewjy. Dongsii DANTE jiacc siw byy zuarr quw. Sir jxox vxaii ee juxdee hunvet si qnuaiw-aw/ singwvuex/ vyxqiamr/ jniver siongrdingx quiwjok/ sinjid zinguann/ u jnii ee jngjuw/ longbinn, si Diongsewqiw siarhue sir qaiqib.
Snewmia u nng xee qaidnua, jit xee si snax-jap-go qaur sir-jap huer sii, si snewmia drat qaur siongrr ong siqii; derr zi qaidnua si likuix snewmia. Guaw huathen “MONOR ARCANA” sir jxox qar langg jnuaxngiu ui' qokk langg jitgiap/ uirdir jinwzip snewmia, “MAJOR ARCANA” si jixcud jit diauu lingsingr jinwhuar ee lo, TAROT jingxqyy qetqor hongsid si jitt jiongw siongrdingx hertongw. Guaw qamxqag, inx jurqiw jauw laii guaw binrtaujingg, hro guaw laii qaixtok, si jin' bixbiau/ cuwbi ee qinggiam.
Kennard : Hro guaw hnowhenn :ee dyrr si dirr jiax, mow langg qniaa qaur liw binrjingg, mng liw jit xee bunrdee, liw qra jingsinn juanxhiongr TAROT. Qingquer genxqiur, qaixsueh liauw inx siongrdingx iwgi, qongw inx erdangr hro lanw jaix jitmaw lanw zinsingx ee uirdir. Anne qycc si anxjuanw neh? Jiaxee mic qamxx qongw jitmaw qycc duiww lanw u jok'iong? Liw qycc jnuaxngiu tudzenn did diyc lingqamw, knuar cud qidiongx amwsi, qra jurqiw qongw “ ahha! Dyrr si anne?”
Campbell : Liw jaix,TAROT si sngr mia/ sngr singwqeh jilui iong :ee, jiurr guaw soxx jaix, vauhamm ui' Aujiux Diongsewqiw iwsig tuax cud laii ee snewmia nadoo, soxx suxiong ee siongrdingx huhy, jicjair siongdongx je DANTE dethak ee luerhamm, hro guaw ee simx dua dinxdang.
DANTE dirr 1321 nii quewsinx, lanw jitmaw soxx jaix siongrr jaw ee TAROT, cavutdyx si qang jit siqii ee sanxbut, ui' jit quaw huanxduir TAROT ee qangxdy jiacc jaix hitt sii ixqingx u TAROT, hnowhenn ee si, sinhu jnuaxngiu e huanxduir? genxqiur quer dyrr jaix sniaw en'iuu, qivunw-siong, vauhamm liauw AGNOSTICISM ee dethak. Jitt diamw erdangr ui' inx duiww sewqair buadzit jitt xee quanliam ee lixqaiw huanxngiar cud, jniawtongw Qidog qauwhue qra dongwjyr ligsuw surqnia, zinruii sewqair buadzit si jaxban beh huatsingx ee dairjir, sursit-siong, sinue siongrdingx soxx dramm :ee, si lingsingr surqnia, sewqair buexzit sriok lingsingr :ee, m si ligsuw :ee.
Dongsii ee Hok'imsux, viw jitmaw qex jit vxo, lanw qongw Derr Go Hok'imsux---si <THOMAS Hok'imx (GOSPEL ACCORDING TO THOMAS)>, iokk 1954 nii dirr EGYPT ee suabok ow .cud .laii :ee, ceh qin buexdnua, qiwjair suxdoo anne mng Iasox “ jruw ar! Siongrder ee qog dirsii qangwlimm?”
”siongrder ee qog si be cniurr liw zinruii hitt ngiu laii qaur, langg byy qihue qongw: qinw laii knuar! Qinw ~ laii knuar! Siongrder ee qog laii ar! Ve ee qog vunxlaii dyrr dirr siwqer qokk de, jixsirr langg knuar byy ziiw!” Iasox anne huee.
Jitt xee dab, ham' Marko Hok'imx jap-snax jniux soxx biyue siongrder ee qog lailimm ee jingqingw (zinjuw e jre hunn laii, siwqer dy' u dua jaieh jilui), si dua dua byy qang or!
<THOMAS Hok'imx> soxx viauxhen cud ee quanjiaur, iong Vudqaur ee uergiw si potee (BODHI). Jixiaur liw ngua jit xee quandiamw/ qakdo, dirr ganxjingg :ee, si siwqer zidciux qngx ngiar ~.
Jex si TROAT vuerau ee dethak. Juewau jit dniux vxaii hyrjyr “sewqair”, rue :ee si qe'nngrhingg ee guarkingx dionghngx jit xee tiauwbuw ee lenrqimsu, sir vnix:a qag dairviauw sir xui suxdoo ee huezi. Ngua jit qxur qongw, siongrder ee qog dirr jitt sii jitt de, dirr derqiuu-dingw, m si moxjiongw su'iaur danxtai laii huatsingx ee dairjir, m si moxjiongw ligsuw sursit.
Jitt xee huathen den .diyc guaw.
Arrien : liw qamxx siongsinr TROAT? Liw ixqingx tak cud ix siongrdingx iwhamm, mrqyxx narr iong laii sngr mia, liw qamxx e siongsinr?
Campbell : Guaw be iong laii sngr mia, jixsirr jyr genxqiuwjiaw, qra liw qongw ix ee siongrdingx/ jiaxee siongrdingx si zuarr bixbiau lehh ziiw.
Arrien : Liw byy siongsinr ix erdangr qra liw qongw sniaw?
Campbell : ix hro lanw jit vxag snewmia ee qewigdoo, hro lanw jaix snewmia dirr byy qang qaidnua soxx quanjur :ee si sniaw/ jnuaxngiu tesingx muixx jit xee snewmia qaidnua ee lingsingr tingdo. Jex vunxsinx si jin' bixle ee sinwsid.
Arrien : Liw qamxx u qamxqag diyc tenqog dirr jitt xee sewqanx?
Campbell : dongzenn e qamxqag .diyc, muixx jit xee langg longxx ersaih tihh. Qingjew dua vairci sidai, u jit xee qangxdy qaxx jin' jingcaiw ee sinhu, dagg vaiw dyrr iong anne ee ue qetsog qangxdy “ Linw qamxx u knuar diyc hitt xee ywvir? Qamxx u qoxbuw linw hro linw hnuahiw? Muixx jit xee huerjiongr dy' e dab “ si ar! Jruw! Gunw u knuar .diyc!
Liw qamxx u knuar .diyc?
Arrien : si ar! Jinjniar sinqii ... ...
Campbell : zuqyw liw qamxqag knuar byy, jixsirr byy langg qar liw rair jnuaxngiu knuar dairjir. Jex si jit xee dua bunrdee, guaw byy zinruii dairviauw vnertair, si lanw bunrhuawsuw byy anne ee quanliam soxx drir, si jitt xee guan'inx, hitt xee lixiuu suacc qra li driau .kir, liw rair kyr jurqiw cue dngw laii. Vutqyr beh cue diyc jitt xee quanliam, vingrr m si byy snuawsyh, TROAT dyrr si jit xee jangxtauu.
Arrien : ix qamxx ui'hiap diyc qauwhue ?
Campbell : Jex guaw m jaix. Guaw m jaix dongsii sidjer jinghongw, erdangr hro lanw jyr tuilun :ee qycc jiyw qaxx byy quiw hxang. Guaw qandna' jaix , ui' jap-sir sewqiw kaisiw, u quaw byy qang itvnuax susiongw hongsid kaisiw cuthen. Guaw lingrgua sniu beh qongw :ee, be jiyw langg zinruii, TROAT quanliam laijurr EGYPT. Qisit uanjuann si Diongsewqiw ee siongrdingx texhe, si Aujiux ee quanliam.
JURZENN QUEWDINGG JONGW SI SXEN :EE
Brown : Lanw byy hxuad knuar diyc tenqog dirr jitt sii jitt de, si m si lanw ham' jurzenn jiqanx uaicuac .kir iuxquanx?
Campbell : Lanw jingxqyy jongqaur tuantongw dy' si dywhiongr lunlixhak, m si penhiongr ciaubudjid, soxx quansimx :ee si sxen-og, driyc-cyr jitt lui ee bunrdee. Lanw tuantongw si byy sinwzim jurzenn/ zinrding hex si duirlyc :ee, siongsinr siongrder congwjy tende banrbut au, langg dyrr huanrjue ar, cuxau quer diyc sxen-og camlam ee sing'uac. Dirr jitt xee quandiamw-ha, liw si byy hxuad uaxkyr jurzenn, rair caixcuw dyrdig libdniuu, qingsiongg diaux jniar hing'uii, qin sxen li og.
Dyrqax kiokk m si anne knuar dairjir. Inx iauqiuu sunrhok/ quiuaw jurzenn, jerje guansiw bunhuar qangrkuanw erdangr dirr jurzenn-diongx andah qaxx jin' hyxser.
Sniu beh zinrbad jurzenn si sxen jitt diamw, iwsig su'iaur qinglik juanvnuaa juanxhuar, jex guaw kir Zidvunw luxhingg sii qamxsiu .diyc/ hagsip .diyc. Sindyrqaur u anne jit qxur ue “jurzenn ee quewdingg byy kyxlingg vanhamm og.”
HERACLITUS (dethagqax) marr u luirsu qongxhuad “ soxu surbut dy' si sxen :ee/ driyc :ee/ gi :ee, kiokk u langg qra mow quaw su qongw jyr driyc, qycc qongw mow quaw si m driyc :ee.” jex jiacc si ciaubudjid suuii hongsid.
----------------------------------------
Qingwvair! Qingwvair! Qingwvair! Ui' Inwdo qokk der laii jiax qingwvair, jinjniar si uixdai diausingr soxjai. Jingxqyy diausingr ee quanliam --- suaw hiongr jurqiw simlingg diongcux diauvair --- dirr jiax bingngiu virr huawjyr sidjer/ sinkux ee hingdong. Zuqyw liw diausingr sii sukyw jurqiw decc jyr sniaw, e lixqaiw si hiongr liw ee luerjai suaw dinxdang, anne diausingr si jin' hyw :ee.
------ Campbell -------
Arrien：Zidvunw si sniaw hro liw zinrbad diyc jitt diamw? Liw qamxx u sniaw digvet texqiam?
Campbell : 1954 ~1955 jiqanx, guaw bad dirr Zidvunw genxqiur Vudqaur/ Sindyrqaur, inx ee qingdenw kexhuad guaw jerje. Hex si suxx langg lanbongg ee zidjiw. Byy langg e qra liw qongw liw u guanjue, sidjai kinsangx! Guaw qac'ir krngr ving'iuw, beh qra jnii sangr hro simliw hunsiksux, vutzuu tec jiaxee jnii kir Zidvunw qniaa ~ lehh. Hiax e sauwduu liw simdiongx ee vunwsyr. Guaw uanjuann air diyc Zidvunw. Srinx vnix narr longxx si air, dyrr byy zimrhyy tongwkow lor.
Favrot : Cniurr Zidvunw siarhue qetqor jiacc giamqinw, qywzinn sniu beh viauxhen congwjyrsingr/ doglip jingsinn, qamxx m si jin' lann?
Campbell : Guaw m jaix beh jnuaxngiu dab jitt xee bunrdee. Dirr hiax guaw druar cid qywguec. Danrsi zinruii siarhue qetqor bardah vingrr m si pnaiw su, jiwjiyw hro liw be tec jurqiw byy songxkuair :ee kir pywhai vadd langg ee simjniaa! Zidvunxlangg byy quanw si m si kuaiwlok, bin itdit vyxcii ciywiongg, guaw qamxqag jex si jin' hyw ee dairjir. Kyxlingg sniu' je qywzinn juriuu byy itding si vit'iaur :ee.
Zidvunw qycc u jit hxang qibiau ee mic --- huexciax. Suibongw jixsirr ban nng hunjingx, ciajam itding e hongsangr qra luxkeh hue sitlew. Liw qamxx jaix inx cingwjiw ciax u zuarr qinw? Jit diamxjingx jauw jit-vah go-jap iacc si nng-vah ingliw hiacc qinw. M na qinw nia, qycc si jai qaxx naxx cingwjiw.
Knuar lanw Bixqog ee huexciax snex jyr sniaw kuanw? Aix! U jit vaiw, guaw ui' NEW YORK Ci jre huexciax kir STAMFORD, jit lo kikix kokkog henw be tingg, ciax jinr jam sii, hionghiongg laii jit xee qinxqib dongr ciax, hitt sii guaw jre dirr canciax, dyh-dingw soxu ee mic juanvo lag ui' tokax .kir. Hogbursingx qniaa zip laii qongw jit qxur jin' qoxjuix ee ue “benw qniax! Gunw dagg vaiw qaur jiax dy' si anne.”
SINWZIM DAIRJURZENN
Favrot : Liw qamxx zinruii lanw bunhuar hro qywzinn sniu' je juriuu?
Campbell : M si, guaw m si beh qongw jitt xee. Jixsirr qongw Zidvunw hro guaw ee qamxqag u zuarr janw! Guaw dirr hiax yc diyc langg qaix sinwzim dairjurzenn. Dirr Zidvunw gersut/ jurzenn juanzenn ittew, hro liw m jaix inx horsiong jiapsuar dirr dyhh.
Zidvunw ee sirbiy ham' dongde jurzenn kuanqingw hyhaii itdir, cniurr KYOTO hiaxee sirbiy (SHOKOKU-JI/ RYOANJI/ SANZENIN ...), dniaa ee derser dy' si ban ~ quann kiw kir, qniaa lehh qniaa lehh, hionghiongg kuikuah kiw laii, qandna' kyr inx duiww dniaa ee vowqiok, dyrr e hro iwsig did diyc kuidenw.
Dirr Zidvunw, lingsingr/ bactew jiqanx qethap qaxx jin' ba. Guaw tak dairhak/ cutgiap nng ~ snax dxangx, longxx si unrdongrguann, vutqyr unrdong jixsirr sinkux ee caulen. Narr qongxx duanwlen :ee si KARATE iacc si luirsu ee donghongx buxsut, jinghongw dyrr byy qang lor. Jiaxee buxsut erdangr hro liw zinrbad .diyc, lingsingr/ simlingg ee lat duiww sinkux si zuarr diongriaur lehh, inx dagg hxang su dy' si ixx jitt jiongw honghuad unrjog. Zidvunxlangg bingvik jongqaur qaucab simlixsingr, si huatsingx dirr srinx-siong ee dairjir.
-------------------------------------------
Druar dirr Zidvunw si jin' songxkuair :ee, hiaxee langg qik qiongdiau bixqamw. Muixx jit xee liw knuar e diyc ee soxjai, dy' qamxqag hiax huad cud ee qngx, jiwjiyw guaw u jitt jiongw qamxsiu. Hex si dersiong ee tenqog. ... ... guaw qamxqag Zidvunw ee gersudqax viw cutqelangg qyckacc uac cud Vudqaur jingsinn. Gersudqax qniaa :ee si jit diauu byy li sxer ee dyrlo ... ...
------- Campbell ------
Mrqyxx lanw kiokk air mng jit quaw ham' lanw jurqiw buquanx ee bunrdee, cniurr <Singwqingx> qiwjair qongguann snax-jap nii huatsingx dirr JERUSALEM ee dairjir si m si jinjniar :ee jilui.
DAISETSU SUZUKI dirr jit vaiw senhak qangxjy qongw jit xee qowsu : jit xee siauwlenn huesniu mng suhu “guaw qamxx u vudsingr?”
“Byy.”
“Mrqyxx guaw tniax qongw soxu ee mic dy' u vudsingr, jiyhtauu/ huex/ jiauw/ jauxsiur, soxu itcer, dyrr longxx u.”
“Driyc! Soxu ee mic dy' si u vudsingr, jiyhtauu/ hueluiw/ bidpangx/ jiauw-aw longxx u, mrqyxx liw lergua.”
”Uirjnuaxngiu guaw byy?”
”In'ui liw mng liauw jitt xee bunrdee.”
Dyrr si qongw, jitt xee huesniu e tec cud jitt xee bunrdee, viauxsi ix sing'uac byy ciuauat vunxguann (TRANSCENDENT SOURCE), si qolip dan'ui ee jongrtair -diongx. Incuw dirr mow xee iwgi-ha, byy qraur juqeh virr zinrding u vudsingr.
Gersudqax binrduir ee tiaujenr luirsu anne, beh jyr qaur hro jokpinw be jniajyr jurgnow hiphongx ee sidtew/ be ham' quansiongxjiaw hunli. Jit qnia jinjniar qybingg ee gersut jokpinw, e hro knuar ee langg sanxsingx “ahha! Hex dyrr si guaw!” ee qamxqag, jokpinw soxx qongw cud :ee si ix jurqiw ee qngx qapp lingliong. Qinggiam juxgi qongw bixqamw texgiam si “cam'uw qidiongx”, sursit-siong vutjixsirr camqax ziiw, qycc si zinrdongg.
Inwdorqaur siongrr diongriaur ee bunrdee si, guaw si'angw? Mng jitt xee bunrdee si diongriaur siulen ji' id. Guaw qamxx si jitt xee sinkux? Bad dirr irvirkyx qar quer vudhak kxyr, decc junxvi juliau sii, duiww beh jnuaxngiu qra inx qaixsuad vudsingr ee quanliam u damrvyc kunwlann. Soxui vudsingr (BUDDHA CONSCIOUSNESS), si jit jiongw muaw siwqer dy' u ee iwsig, lanw juanvo longxx si ix ee denxhen/ juann si vudlui/ si tner kiw laii jingxqyy uxdiu ee jitt xee uixdai iwsig ee byy qang denxhen, cauxbok/ jiyhtauu/ soxu ee mic dy' si u vudsingr :ee.
Siongrkyr sii, guaw anne qra hagsingx qongw “knuar tenvongg ee denrhuew. Linw ersaih iong dysor ee LIGHTS, qiongdiau :ee si jit liap jit liap denrhuexqiuu-aw, marr ersaih qongw si LIGHT, soxx jixzin :ee si poxpenr ee qngx. Suibongw qongxhuad byy qang, jixzin qang jit hxang su, si qang jit qnia dairjir ee nng jiongw qongxhuad.”
Zidvunxlangg qra qiongdiau qywtexsingr ee lingxhik hyrjyr “surhuatqair”, poxpenwsingr :ee si “lixhuatqair”, marr qycc anne qongw “su-lriw bugai”, dyrr si qongw, qywtew/ poxpenr si horsiong byy joxgai :ee/ byy hunvet :ee.
Qauwsig u jit liap denrqiuu siyx pnaiw .kir, hurjig quanliw :ee be qongw “camw lor! Hex si guaw siongrr qac'ir ee jit liap denrhuexqiuu, marr si siongrr diongriaur ee jit liap, jinjniar si dua jaieh.” ix e jyr :ee si qra siyx pnaiw .kir :ee vrag lyc laii, ngua jit liap sinx :ee kiw .kir.
Dycc jit jiongw kacc diongriaur? Si qngx vunxsinx? Iacc si denrqiuu? Inx jixsirr vudsingr ee qangqu. Liw beh hro liw jurqiw zinrdongg dycc jit xee? Si qangqu vunxsinx? Iacc si qangqu soxx jicjair :ee? Zuqyw liw zinrdongg jicjair ee mic, liw dyrr si zinrdongg vudsingr, marr viauxsi, liw zinrdongg “langg/ guaw ittew” ee guanliw, dyrr si jitt xee guanliw ee jok'iong, e hro lanw knuar diyc langg' u guilan sii, benw sniu sui' cud ciuw qiur langg'. Lanw narr erdangr tamwzip jitt xee cimjann, dyrr e jaix, “langg/ guaw cavet” jixsirr sikongx sewqair ee jit xee hamsor.
Tarnas : ham' Vudqaur vixqaur, Qidokqaur naxjunxx duiww sinue iwsiong ee siongrdingx singwqeh siongdongx kiamwkuad. Vutqyr, guaw huaiqii jitt diamw si m si qandna' sik'iong dirr jniawtongw/ jewdorhuar ee Qidokqaur, jiurr guansiw Qidokqaur, inx lixqaiw siongrdingx ee linglik jit diamw aw dyrr byy sux Inwdorqaur/ Vudqaur, qamxx driyc?
Campbell : diongrdiamw si, Inwdorqaur/ Vudqaur marr e duiww sinue iwsiong jyr ligsuxsingr ee qaixtok, qongw diyc Vut dirr sewqanx ee dairjir, danrsi jiaxee jywhuad, dy' virr zinruii si cuwiaur :ee, soxx qiongdiau :ee si, sinue iwsiong/ qywzinn snewmia ee siongquansingr, zinrdingg jiaxee iwsiong soxx jixzin :ee, si qywzinn ee luerjai. Vixzu, dairvorhun ee Vut byy ligsuw sidjairsingr, marr byy langg siongsinr inx jinjniar dirr ligsuw cuthen quer. Quansewimx jitt xui buhan juvi ee posad, duiww Diongqoklangg/ Zidvunxlangg laii qongw, m si jinsit ee ligsuw zinbut, jixsirr sunzenn sinue iwsiong, siongrdingx moxjiongw jursinx jigua ee mic.
Danrsi Qidokqaur ee tuantongw kiokk qiongdiau rair duiww sinue ee qongxhuad/ iwsiong jyr ligsuxsingr liauxqaiw. Zuqyw liw duiww jit xee qidokdoo qongw, Iasox m si jinjniar ui' siw qyc'uac kiw laii, byy jinjniar sringx tenx, hex liw ee ue jiong' e qowsingg ix duiww sinwgiongw ee diongriaur uihiap.
Qycc narr si duiww jit xee Iutaiwqauwdoo jitgii, qamxx u cud Aiqib jitt huesu/ MOSE qamxx u dirr SINAI Snuax niaw jap-qaiwling, boghuix si decc ziaxkangx!
Lingrgua jit bin, Inwdorqaur kiokk qinvunw byy quanw nng-cingx/ snax-cingx nii jingg huatsingx quer sniaw, quawir :ee si jitmaw u sniaw huatsingx dirr liw srinx-siong, quansimx :ee si sinue iwsiong qamxx u duiww liw kiw jok'iong.
Iutaiwqaur/ Qidokqaur dy' si ui' siongrdingx soxx qetqor ee hertongw, inx iong'unw qitnax ee qaixtok hongsid. Sursit-siong, samvud-gorsii e u jit xee sendix/ iacc si sinviwjuxgirjiaw knuar cud jiaxee iwsiong ee digjid, tec cud uanjuann ham' jniawtongw byy qang ee quandiamw.
Ixx Qidog dingr sibzirqer jyr le, suibongw liw ersaih qra qaixsueh jyr jit xee dua viqiok, ADEN huan liauw jue, lanw dy' duar guanjue, Qidog vutditvud kiwsag jurqiw snewmia qruar dirr sibzirqer-dingw uirr lanw siogjue. Mrqyxx jex jixsirr jit jiongw kyxlingg qaixtok ee hongsid.
Qycc u vadd jiongw qaixsuad, qongxx si jit jiongw dirr siqanx-diongx sidhen ingxuanw ee zedsingg, qra id puar jyr jerje cuiwpnir, jiaplap iwjir siurkow jyr iuxqix hixlok ee jit vorhun. Cniurr ST.AUGUSTINE qongw quer “Iasox qniaa hiongr sibzirqer, cniurr sinniuu qniaa hiongr sinlongg.” si duiww Iasox dingr sibzirqer quanliam uanjuann byy qang ee qaixtok.
Lingrgua jit xee le si “siqanx jiongqed (THE END OF TIME)” ee quanliam, qra dongwjyr ligsuw surqnia si kyxciyr ee. Zuqyw si ligsuw surqnia, hex ham' lanw qycc u sniaw quanhe? Sewqair buadzit ee diongriauwsingr si simliw surqnia. Liw rair qra huan'ik quer laii, qycc iong jitt jiongw hongsid kir qinggiam ix ee iwgi.
Dng' liw knuar diyc ingxuanw ee qngx ui' siqanx-diongx byy qang hongsid jiywsia cud, knuar cud jitt xee quanliam cniurr gersut, si beh qra moxjiongw jinliw henxsi hro liw knuar, liw dyrr jinjsit qinglik siqanx ee jiongqed. In'ui liw guanlaii ee snewmia --- qandna' e ixx ligsuw hongsid sukyw ee snewmia --- jiongqed ar! Jex si sinue ee qonglingg. Liw narr m duiww jongqaur quanliam jyr sinuersid qaixtok, inx jixu lunlyc jyr sinhak ee kyxciwdee ziiw.
Tarnas : Soxiw qongw, jewdorhuar ee Qidokqaur si qra sinue ligsuxhuar/ kurtexhuar, jiacc qniaa zip huncelo?
Campbell : m driyc qaxx jin' lirhai.
Tarnas : Hex si qongw, qra guarjai ee mic qazip Qidokqaur, anne qamxx u iyc tangx qiur?
Campbell : jex mah, laii qaur sehongx ee GULU (Inwdo dyrsux)/ RINPOCHES (TIBET siongrsux) zuxx laii zuxx je, dirr jitt jiongw tiaujenr-ha, Qidogdoo kyxlingg kaisiw anne sniu : mr, kyxlingg e hro Qidokqaur qewsiok qongxdai huatdenw, vingrr m si vangjan sanwciaclangg, si cue cud lanw luerjai sinsingr guantauu, m si jurqiw uac, si uac dirr hitt xee uac dirr lanw lairbin ee qidog nirr. Dirr danghongx ee qauwiok-ha, lanw sehonglangg kaisiw zinrbad jongqaur qywzinn texgiam ee jit bin.
Qidog/ Vuddyy ee quanliam si uanjuann qang qewdat ee sinue siongrdingx huhy. Inx si nng jiongw byy qang ee qongxhuad, beh qongw :ee kiokk si id-bo.-id-ngiu (itboo-itngiu) ee dairjir: jit jiongw ciauuat ee lingliong iwsig, tner diauu jingxqyy sewqair, marr tner diauu liw.
Liauxgno diyc jitt diamw, qycc qinqir liw simlingg diongcux sing'uac, si liw zinsingx ee qiuwsiok, qycc iwbi diyc liw rair hro jurqiw qapp jurzenn cniur qang diau, diyh'air zinrbad, jurzenn vunxsinx si hyhaii :ee. Mrqyxx <Singwqingx> ee tuantongw suacc tnix cax de .kir, anne qra lanw qongw “ u jit xee sxen ee siongrder congwjy jit xee sxen ee sewqair, suar laii, jit xee siaog :ee longr .zip .laii qra jitt xee sewqair bruw qaxx luan caucaux, jurzenn virr uziamw ar. Ui' jitt xee jendee, driyc-cyr/ sxen-og ... dringw jiongxjiongw zirguann duiwlip dyrr itdit vuh .cud .laii, jixiaur liw jiapsiu jitt jiongw ciongbuanw duiwlip ee qewdat hertongw, dyrr benw sniu e sunrhok jurzenn. Qidokqaur soxu huhy zirbew dy' si ciongbuanw driyc-cyr, jue-camwhuew ee zirguann duiwlip.
Guaw sniu be cud, jitt jiongw quandiamw narr byy qauwhue jewdorhuar jyr lat, qamxx iauxx erdangr kyr qitnax sniaw lat laii jicjair. Dagg vaiw sniu diyc jitt xee bunrdee, guaw dy' e sniu kiw ixjingg LISTERINE suawkauxjuiw ee jit qxur qongxqywsuu: “liw siongrr hyw ee ving'iuw marr be qra liw qongw liw cuir caur.”
Danrsi qauwhue kiokk qra liw qongw lenrr siongrr hyw ving'iuw marr be qra liw qongw ee dairjir : liw u jue, dongsii qycc qongw, liw erdangr ui' ix hiax did diyc qaixiyc.
Dng' buhingg ee vne cue diyc iuxhingg ee iyhhngx sii, liw cue diyc :ee, si erdangr brew-bre ee mic.
Brown : uirjnuaxngiu lanw sehonglangg e songwsid liw soxx qongw ee “ham' dairjurzenn cniur qang diau” ee iwsig?
Campbell : lanw jitmaw duiww jinwhuar quandiamw, ban ~ hiongr viw DARWIN kacc jaw ee JEAN-BAPTISTE DE MONET LAMARCK/ GOETHE huejuanw. Byy cyr! GOETHE marr u jit xee iuxquanx jinwhuar ee lixlun. SCHOPENHUAER siaw liauw jit pnix jin' janw ee bunjiux hyrjyr <THE WILL IN NATURE> , marr si luirsu ee quandiamw.
Grof : Soxiw liw zinruii, dyrr si guansingjid jancur ee budjid, marr si u quaw iwhiongr (INTENTION)?
Campbell : Juadduir si anne! U jit vaiw ving'iuw S.KELEMAN iaucniaw guaw kir knuar ix dirr PENNSYLVANIA dairhak pah ee jit qix ngiaxpnir, lueriongg si guansingjid dirr hamwqniar-ha ee uahdang jingqingw. Ngiaxpnir nirr knuar diyc guansingjid lrauu hiongr jitt vingg, qycc lrauu quer hitt vingg, jin' qinw hingsingg jit diauu ser ~ ee tonglo, qanxdanx qongw, inx si uirr jurqiw kiw cur.
Denrngiaw knuar suah, ui' Qurqimsnuax sraiw ciax dngw laii ESALEN sii, bagjiux soxx knuar diyc :ee dy' si guansingjid! Guu jiac ee cauw si guansingjid, guaw tauu-dingw ee tnix si guansingjid. Hex si jit jiongw lingxgno/ kexsi, jingxqyy sewqair dy' si u iwhiongr ee guansingjid/ ciongbuanw iwsig qapp lingliong.
Ui' hitt sii kiw, guaw qamxqag lingliong/ iwsig si qang jit hxang su ee nng bin.
Grof : Jitmaw budlixhagqax marr anne qongw.
Campbell : guaw jaix, u jit xee HARVARD tewhiux ee singbudhagqax siaw .quer jit dniux puex hro guaw, qra ix dirr jit xee qokjer huergi-siong huatviauw ee lunrbunn qiar hro guaw, qongw “suibongw hex si hro guaw kyhak iwsig byy jurjai ee huathen, mrqyxx guaw vutditvud singzin, jurzenn si u iwhiongr :ee.
-----------------------------------------
Sinue sursit-siong si qongjiongr ee bang, erdangr sag dinxdang/ sokjyr siarhue, huanw quer laii qongw, qywzinn ee bang si siyw sinue, si quanhe hiaxee erdangr tuidong/ kig cud qywzinn ee sinn/ vnuawsinn/ siuxhorlat: siamwlau cud hiaxee dirr liw amwiwsig kixjy liw snewmia ee qniahniaa/ iogbang/ bogviaux/ qewdadquanx.
-------- Campbell, <THE MYTHIC IMAGE>
Brown : Jex qamxx m si ham' liw soxx yc :ee duxhyw dywvingw? Budlixhak ee lixlun si byy iong'unw iwhiongwsingr jitt xee quanliam junjai ee.
Campbell : jit xee iusiur kyhagqax ho'ngg e ylyw tihh, si an' jingwqir qongxue, byy quanw si m si uihuanw soxx yc .quer :ee. Guaw zinruii jitt jiongw jingsinn si dairvorhun jongqaur zinsu soxx kiamr :ee : byy quanw u qyckacc je vutli ee jingwqir, inx iuguann dne ann inx sinhak juxdniux, siw marr m qaixvenr.
Jinjniar kyhak tairdo si: lanw m si decc cue jinliw, si cue unrjog ee qaxsed (WORK HYPOTHESE) laii qaixsueh sinx huathen ee sursit. Itvnualangg kiokk byy liauxqaiw kyhak ee jitt bin.
Guaw zinruii sinue si singbudsingr ee hamsor ji' id, soxiw duiww singbut itdit jin' u cuwbi, sinkux muixx jit xee kiwquanx dy' u ix jurqiw ee tuisaklat, muixx jit xee kiwquanx ee lat byy qang, lanw dyrr e qamxsiu diyc sna' ciongx ee lingliong dirr lanw lairbin jok'iong, lanw simlingg hingtair, si ui' jiaxee ciongtut soxx qowsingg :ee.
Hex dyrr si jurzenn decc qongxue. Sinue dyrr si jiaxee lingliong tauwquer jit quaw gixzinhuar ee iwsiong jurgnow viauxdat.
SIARHUERSINGR RAIR HAM' SINGBUDHAK CNIUR QANG DIAU
Cockrell : Liw zinruii dycc jit quaw iwsiong hertongw, si lanw texgiam ciauuadjiaw siongrr hyw ee mngtangx?
Campbell : Guaw tak <UPANISHAD> iacc si Vudqingx sii, dyrr e u anne ee qamxqag. Jiaxee jongqaur tuantongw, m quanw si quewkir/ henrjai, dy' si ixx ciauuadjiaw jyr diongrdiamw. Inx dy' bingvik, soxu ee snewmia henrsiong, vutqyr si cimjann lat ee ngiaxsiong ziiw.
---------------------------------------
Guaw qamxqag, guaw qangjog ee diongriaur singqyw, si inwjingr liauw dngquw ixlaii guaw cimcimx qencii ee sinwliam: zinlui ee tongxitsingr, m na viauxhen dirr singbut-siong, marr viauxhen dirr jingsinsuw, cniurr sewqair muixx jit xee soxjai jing'au jraur cud qang jit siuw qauhiongxkig, suibongw u jerje juxdee e qingquer huatdenw/ kokdua/ venwhingg/ uaicuac. Dnaxx, qokk soxjai ixx qik quan'imx jiongww sniax jywhuew cniur cud, diddit mairhiongr siongrr quann hitt liap snuax buexliux .kir, hex si xe jit lunn enxjaur ee cuthuatdiamw. Guaw zinruii, dirr birlaii lanw jiong' u kyxlingg tniax diyc qangrkuanw juxdee jaiww crur enxcniur, m quanw hingsid-siong ngua quer ...
---- Campbell <THE MASKS OF GOD>
Lanw sinkux itdit u lingliong decc kiw jok'iong, byy langg jaix inx ui' dyhh laii, qamxx laijurr mow ciauuat lanw iwsig jigua ee mic, simrjiww lenrr qowsiongw dyrr byy. Jiaxee lingliong cniurr crur-guanjuxliap dirr tamwcikkir ingbo-siong laii byy ngiaw, kir byy ziah. Snewmia ui' jiaxee hingsid kixjy kiw laii, lanw ee iwsig suacc juanw kir qor vadd hxang, iacc si gnorqaiw jit quaw ham' jurzenn dywvingw ee lunliw quanliam.
Sinue ee iwsiong si duiww ciauuadjiaw tauwbinghuar. Muixx jit xee sinvir iwsiong dy' jixhiongr jurqiw ixgua; muixx jit xee sinbingg dy' hiongr ywvir packuix. Linw rair jaix, ve ee qog vunxlaii penwvor juann soxjai, jixsirr langg knuar byy ziiw.
Linw itding rair hro jurqiw hiongr jitt xee packuix.
Cockrell : Hiaxee e qewsiok vyxcii duiww ciauuadjiaw vnuawtauwbingg ee sinwgiongw tuantongw, ham' lanw jitt xee venr qaxx byy tauwbingg :ee u snaiw byy qang?
Campbell : Lanw ee tuantongw vingrr m si venr qaxx byy tauwbingg, si jit kaisiw dyrr byy tauwbingg. Guan'inx si Qidokqaur iong tak snuawbunn/ m si tak six ee hongsid laii qaixtok sinue. Zuqyw liw si jiauww snuawbunn hongsid, qycc iong sinue laii jingwbingg liw ee tuantew iacc si siarhue viw langg' quann jit qib, hex dyrr gnorzip bedoo lor! Jitt jiongw taghuad guaw qra hyrjyr vnertair sinuerhak (PATHOLOGICAL MYTHOLOGY). Vixzu, “siongrder ee suanxbinn” ee quanliam si vnertair :ee. Sursit-siong, soxu ee langg dy' si siongrder ee suanxbinn. Iwsig diyc liw jurqiw sriu undenw jyr siongrder ee suanxbinn, byy dairviauw liw viw langg kacc qyqib, si muixx jit xee langg dy' cniurr liw qang, si jit xee sinqii ee junjai, si kia dirr ywvir/ ciauuat ee qicow-siong.
Soxu ee jun'iuw dy' si vudsingr ee jun'iuw. Dnaxx lanw jaix <UPANISHAD> ee jokjiaw, vutqyr nng ~ snax xee miaa, inx si kauw-hni snatuann lyc laii :ee, jitt jiongw jinghingg m si jitmaw jiacc anne, dirr qongguann jingg qauw ~ jap sewqiw jaw dyrr si kauxtuann :ee. Inx bingvik jingxqyy henrsiong sewqair jixsirr jit xee ywvir ee dausia, jitt xee ywvir ee qinqix si liw ee jun'iuw.
Liw si hitt xee liw beh cue ee ywvir. Vutqyr, jitt xee “liw” vingrr m si hitt xee liw ving'iuw soxx zinrbad ee liw, m si hitt xee dirr henrsiong sewqair liujuanw ee liw. Si liw hitt xee ixjingg / ingxuanw jun'iuw ee qinqix, si liw iuxhan sinkux soxx jixzin ee duiwsiong.
Gisid/ sinue ee qonglingg ersaih qongw si hro liw ee iwsiksimx (CONCIOUS MIND) ham' henrsiong sewqair ee qinqix/ digvet si ham' liw hingdong ee qinqix huatsingx jiapciog, hro liw hingdong sii, byy qycc ixx jurgnow/ si ixx jit xee ciauuat quewdingg ee jicjaiwjiaw sinhun hingdong. Dng' sinue qra liw ham' siarhue jyr lenqed sii, si lenjiab dirr moxjiongw viw liw kacc dua ee mic, danrsi siarhue iauxx byy qraur dua, rair qycc lenn kiw kir kacc dua ee jingxqyy sewqair. Liw narr qandna' ham' siarhue qad jywhuew, liw dyrr e ham' siarhue hitt ngiu byy qaur dua. Sniu beh venr qaxx jinjniar dua, rair jyr qaur --- iong K.G.DURKHEIM ee ue qongw --- “duiww ciauuadjiaw tauwbinghuar”, jex si jingxqyy surqnia ee quanqenr. Narr qra sinue dongwjyr sursit, dyrr sitkir tauwbingsingr, venwjniaa gordy ee dosiong.
Guaw zinruii dongdai ee movne si taiww qiongdiau siarhuersingr, sniu' knuar kinx singbudsingr. Dng' guaw tak diyc RUSSIA singbudqaxVAVILOFF ee duwjog sii, hro guaw jin' qamxdong. Ix ee singbudhak ham' LYSENKO soxx qongw, siarhue erdangr sokjy jurzenn ee lunrdiamw uanjuann byy qang.
Siarhue qinvunw byy kyxlingg sokjyr jurzenn. Aurlaii VAVILOFF virr vangwsag dirr SIBERIA, lenrr dirsii quewsinx dyrr byy langg jaix. Ix si zi-jap sewqiw siongrr uixdai ee singbudhagqax ji' id, ham' STALIN quandiamw tnix cax de.
Guaw huathen lanw dairhak qar lanw qaix zuhyy sing'uac sii, qiongdiau diongrdiamw qangrkuanw he dirr siarhuerhak, hiyrgyw si, qar lanw quer jit jiongw hunsimx ee sing'uac, lanw ee siarhuerhak li singbudsingr ee qinqix hng ~ ~. jitmaw juxdy lanw sing'uac ee nng dua ligliong si qingjer/ jingwdi, jex si uirsniaxmic itcer venr qaxx hunwluan ee guan'inx. Lanw rair dngw kir jurzenn, ham' ix hyhaii itdir, jex marr si sinue beh qra lanw qongw :ee. Jap-qauw sewqiw sii, u quaw siarhuerhak kinghiongr ee zinluirhagqax juxdniux, sinue/ gisid si langg iwdoo kongwjer jurzenn ee viauxhen. Jex sidjai jin' lirqingx. Sinue/ gisid qinvunw m si uirr kongwjer jurzenn, si uirr kongwjer siarhue, hro siarhue/ jurzenn vyxcii hiabhyy. Jetkingr gisid ee zimrbu si hro langg dirr qinglik diongrdua surqnia sii (cniurr jinwzip zinsingx byy qang qaidnua/ dauzip jenwjingx/ ui' jenwdniuu dngw laii), be sitkir ham' jurqiw singbudsingr qinqix jiapciog, hro vyxcii ham' jurzenn itdir. Mrqycc qingjer dongrqix kiokk qra jex itcer dy' bruw qaxx hai liauxliauw.
SIONGRDER SI MNGSINN
Cockrell : Qamxx ersaih cniaw liw dramm EDEN Hngg ee ciu/ Sibzirqer ciu/ Vuddyy hiauxgno ee ciu, inx jiqanx u sniaw qiongrtongx diamw? Lanw jnuaxngiu qaixtok, jiacc e hro jniajyr lanw tonghiongr ciauuadjiaw ee zibkauw?
Campbell : Quiw nii jingg, guaw knuar diyc dirr jit xee lab .lyc .kir ee soxjai, huad jit jangg ciu, hex qinx m si jngr zip todew, si juanw hiongr aurbin, dngg qaxx ui' lap'yx hitt vingg ee vnipyx kir. Jitt diamw liw si byy hxuad iong sunzenn qihailun qaixsueh.
Dnaxx lanw duiww zinlui enxhuar ee nadoo si jnuaxngiu? Sir qaidnua hunvet si HOMO FABER/ HOMO ERECTUS/ HOMO SAPIENS/HOMO SAPIENS SAPIENS. Jitt sir xee juanxhuar ee muixx jit qrii, longxx si huatsingx dirr VingHyy dua dua siauter au, dy' si cuthen qaxx jin' tudzenn, ciauquer DARWIN lixlun ee qaixsueh huanruii. Rair jaix, DARWIN lixlun nirr, budjiongw ee enxhuar su'iaur quixarr bxan nii ee siqanx.
Zenau, dirr MIOCENE (li jitmaw iokk 2,300 bxan nii) qin buexqii sii, Inwdo liogde ham' Aujiux/Ajiux dairliok nng xee siy' longr, hingsingg HIMALAYAS Snuax, anne qycc sanxsingx jit xee juann sinx ee kuankingw. Suar .laii, dew ~ quiw vah nii jiqanx, jit pruex sik'ingr sinx kuanqingw ee sinx budjiongw cuthen lor.
Jex itcer huatsingx qaxx jin' qinw, ciaux cud DARWIN jinwhuawlun qaixsueh linglik. Anne vingrr byy viauxsi jinwhuawlun sithau, jixsirr, qihailun quandiamw ee jinwhuawlun sithau lor. Dnaxx jinwhuawlun dngdecc ban ~ hiongr LAMARCK ee quandiamw huejuanw. LAMARCK viw DARWIN kacc jaw tecud jinwhuawlun ee singbudhagqax.
GOETHE marr dramm .quer snewmia jinwhuar bunrdee, zuqyw guaw byy qir m driyc, ix qongw :ee, qaix si <Cauxbok Venwhingg (THE METAMORPHOSIS OF PLANTS)>. Dongzenn GOETHE viw DARWIN jaw vnuar sewqiw, ix ee quandiamw ham' DARWIN uanjuann byy qang. Ix m si tauwquer qihaisingr qaisuad jinwhuar, si zinruii jinwhuar ee dongrlik, laijurr iuxqitew ee luervo, e hunhuar/ e enxhuar, si vunxsinx luerjai guansingjid ee tuisaklat. Qycc zinruii singbut ee jinwhuar hunrjyr nng dua lorsnuar, jit xee si dongrbut ee jinwhuar, siongrr quanqib ee si langg, lingrgua jit xee si sidbut jinwhuar, siongrr u dairviauxsingr :ee si ciu.
Liw ersaih qongw, ciu si cur ee siongrdingx. Incuw, huedngw jurzenn sewqair siongrr hyw ee iwsiong si ciu. EDEN Hngg vunxlaii si cauxbok soxx qowjniaa ee jurzenn lingxhik, langg virr dongwjyr jurzenn ee jit vorhun he zip hiax. Danrsi langg soxx binrduir :ee, si jnuaxngiu dirr vyxcii jurzensingr ee dongsii hiongr jit jiongw kacc quann qxaix ee iwsig/ mairhiongr hunhuawsingr ee iwsig. Vunxlaii kyxlingg e dirr iwsig-diongx besid, mrqyxx ciu qra kiuw dngw laii.
EDEN Hngg ee ciu sursit-siong u nng jangg. Jit jangg hro liw dirr siqanx gua cittiyy; jit jangg si hro liw jinwzip siqanx lingxhik ee sxen-og ciu, jiax itcer dy' si zirguann :ee, quewkir birlaii/ langg guaw/ sxen og, si likuix EDEN Hngg ee duarmngg. Soxiw giamqeh qongw laii, ADAM/ EVA m si hro siongrder qnuaw cud laii, si jiac liauw senrokciu ee quexjiw, dongsii inx dyrr ixqingx likuix tendongg lor. Cuxau, inx qenwsiaur jurqiw ciacsinx lortew, qinw cue snxax cing, si in'ui inx u liauw lxamm-luw ee zirguann quanliam. Sniu beh dngw kir EDEN Hngg, diyh'air bingvik itcer si “id” ee dyrliw.
Derr zi jangg si siqanx gua ingxsingciu, si huedngw qaur “id” ee ciu. Mrqyxx <Congwsewqiw> ee siongrder kiokk byy guanrir langg dngw kir EDEN Hngg, ix sniu beh jyr ui'id ee sinn, byair hro liw jaix, liw marr si be hiuxnua :ee, jiacc e qongw “hex langg zuqyw jiac liauw ingxsingciu ee quexjiw, dyrr e venr ham' lanw qang, lanw qnuaw inx jauw.”
------------------------------------------
Mngsinn siongrdingx liw ee qniahniaa/ jipquad, si hro liw huee be dngw kir EDEN Hngg ee guan'inx. Vuddyy kiokk jre dirr poteciu-kax, giac kiw jniawciuw qongw “benw qniax, cngx quer inx, laii guaw jiax!”
--------- Campbell
Campbell : Zi crur dairjenr qiqanx, dng' lanw iauxx qycc ham' Zidvunxlangg siy' taii sii, NEW YORK u jit hxun vywjuaw kranx jit vxag NARA jit qingx sirbiy mngsinn ee siongwpnir, anne siaw “ Zidvunxlangg vair cniurr (kiongxvor/ air siyjenr) jitt ngiu ee sinn!”
Qinvunw m si anne! Mngsinn siongrdingx liw ee qniahniaa/ jipquad, si hro liw berdangr dngw kir EDEN Hngg ee guan'inx. Vuddyy jre dirr poteciu-kax, giac jniawciuw qongw “benw qniax inx, cngx quer inx, qaur guaw jiax laii!”
jitt dniux siongwpnir hro guaw hionghiongw bingliauu, lanw ee siongrder qisit si mngsinn, kia dirr EDEN Hngg ee duarmng, vutjunw zimrhylangg qniaa .zip .kir.
Soxiw, lanw ee jongqaur qivunw-siong si duihongr ee jongqaur.
Qidokqaur ee tuantongw, Iasox si hitt xee cngx quer EDEN Hngg duarmngg, jiac diyc ingxsingciu quexjiw, vingrr huawjyr ciu ee langg, jitt jangg ciu si sibzirqer. Jex si dingr sibzirqer ee jingi: sunrhak, hongwha. Dngw kir qaur hitt xee sinsingr vuthiuw ee qin'guann kir, si liw ham' banrbut soxx qiongriuw ee qide.
Iasox virr dingr ee sibzirqer si EDEN Hngg ee derr zi jangg ciu, siongdongx Vuddyy did dy ee hitt jangg poteciu --- ingxuanw snewmiarciu. Potee ee iwsur si “qakgo diyc liw jurqiw si liw dngdecc jauxcue :ee”, liw si liw ingxuanw ee jun'iuw. Mrqycc lanw ee jongqaur tuantongw kiokk qra lanw qongw, lanw ham' Iasox si byy qang :ee, ix si lanw ee bohuan, duisuii ee duiwsiong. <THOMAS hok'imx> Iasox qongw “huanrnarr jiac guaw cuir jiac ee mic ee langg, e venwjniaa guaw, guaw e jniajyr ix”
jex si Vudqaur/ Qidokqaur byy qang ee soxjai. Jaiww jit crur, lanw virr hongwdiok. Dirr Qidokqaur, liw byy kyxlingg jniajyr Iasox. Danrsi dirr Vudqaur, liw vunxsinx ixqingx si Vut, jixsirr liw jurqiw m jaix ziiw.
U jit vaiw, jit dniuu enxqangw-diongx guaw marr qongw diyc jitt diamw, jinjniar ee qidokdoo, qaix qra hitt xee dirr ix lairbin ee Qidog uac cud laii. Quiw lexvair au, jit xee tniax quer jitt xee qangxenw ee luxsingr qra guaw qongw, dng' hitt sii jre dirr ix srinx-vinx jit xui quawsu viauxsi “jex si setdok”.
Zuqyw jex si setdok, u si'angg beh qra guaw qongw, <Singwqingx> beh qongw :ee dauwdew si sniaw?
---------------------------------------
Guaw bad dirr SWISS ee ASCONA tniax quer DAISETSU SUZUKI jingcaiw enxqangw. Jiurr guaw jai, hex qycc si ix derr id vaiw dirr ERANOS FOUNDATION qangxenw. Tniajiongr dy' si Aujiulangg, qandna' ix jit xee Zidvunlangg. Jitt xui bad taur sendethak ee lau sensnix (dongsii iokk 91 huer), nng ciuw dah dirr sinkuxvnix, didbak knuar tniajiongr qongw “jurzenn duiwkongr siongrder. Siongrder qapp jurzenn duiwlip. Jurzenn duiwkongr langg. Langg qapp jurzenn duiwlip. Langg duirkongr siongrder. Siongrder qapp langg duiwlip.(Qidokqaur) jinjniar si jit jiongw kyxciyr ee jongqaur.”
---------- Campbell
Campbell : Tak siyxhak sii, lanw diyh'air amwliam qauwgi dab-mng, qidiongx u anne ee lueriongg:
“Siongrder uixsniaxmic jy liw?”
”Siongrder jy guaw, si uirr beh guaw dirr sewsiong air Ix/ hogsai Ix/ ingiau Ix qapp zid'au ham' Ix jywhuew i.-ingxuan-u. kuaiwlok sing'uac dirr tenqog.”
Dirr anne ee suuii-diongx, langg/ sinn si lypok/ juxlangg quanhe. Siongrder vingrr byy hro guaw liauxqaiw guaw ee sinsingr.
U jit xui qoxjuix ee siauwlenn luxsu, vunxlaii si siuluw, tniax quer guaw jit crur qangxenw au, dyrr huansiok ar. Hitt vaiw enxqangw suah ix qniaa laii mng guaw, “liw qamxx siongsinr Iasox Qidog si siongrder ee qniaw ? ”
”Byy sinr, duhuix lanw muixx jit xee dy' si siongrder ee qniaw.”
Jex si cavet ee soxjai. Linw qamxx bingliauu guaw ee iwsur? Zuqyw qra sinn ee kexsi juan'iuxhuar, dingxii qra zinsingr ui' qidiongx tiux driau. Jixiaur liw jip'id jitt jiongw juan'iuw, liw dyrr si jurzin dirr juantew zinlui jigua. Guaw zinruii, liac diauu ~ sinn kexsi juan'iuxhuar, si jit qnia kyxpnar ee dairjir. Hex si jit xee huanxdong ee hertongw, si ham' siqanx dongrtair duiwlip :ee. Hex si pnaixmic.
Dirr juann sewqair ee juan'iuxhuar jongqaur tuantongw dng' mairhiongr sna' longr/ juanxhingg ee jitt sii, si m si erdangr qir diauu jitt diamw, digvet diongriaur! Lanw ui'id ee qahiongx qandna' erdangr si jingxqyy derqiuu.
Campbell : <Singwqingx> soxx qiwjair Iasox itsingx is ix qawsi lanw ee iwgi siongrdingx. Tak ee sii, liw m si cniurr tak C.SANDBURG siaw ee <LINCOLN> hitt ngiu, erdangr cue diyc sidjer sing'uac ee sewjed qiwlok. Sursit-siong, ham' sidjer huatsingx dirr Iasox snewmia ee dairjir buquanx, jixsirr ham' jitt xee snewmia ee iwhamm iuxquanx.
Vuddyy sing'uac dirr 563~483 nii B.C. jiqanx, quewsinx au derr id juanxser derdiamw si CEYLON, siqanx si 80 nii B.C., lanw m jaix zimrhyy iuxquanx jitt xee Vut ee su, cniurr lanw m jaix zimrhyy iuxquanx Qidog/ ZOROASTER ee su. Soxu iuxquanx inx jit sxer surjig dy' si tuansuad, si beh qra liw qongw, inx sing'uac dairviauw sniaw iwgi. Dnaxx liw sniu beh jaix Qidog qongw quer sniaw? Qandna' erdangr tauwquer sir hok'imx/ derr go hok'imsux (THOMAS hok'imx). Ix jurqiw qycc qongw quer sniaw neh?
Si'angw e hibang jurqiw si tauwquer mngdoo derjuw ee vitqir hro aurdairlangg jaix neh?
----------------------------------------
Soxui posad, si hiaxee liauxgno jurqiw ciauuadsingr au, jurguan cam'uw sewqanx su ee langg. Soxui yc Qidog, si h.-hnuahiw-h. cam'uw sewqanx ee koxlan.