1 Solomon siquax diongx ee Gnaxqyx.
2 Guan ix ing ix ee cuir laii jimx guaw,
In'ui liw ee aiwjingg viw jiuw kacc hyw.
3 Liw ee qyiuu pangx qycc hyw;
Liw ee miaa cincniu dyr .cud .laii ee qyiuu;
Soxiw jiongww jaboxginxaw longxx tniar liw.
4 Guan liw kanx guaw, guanw dyrr jauw laii duer liw;
Ongg cua guaw zip ix ee vangg-lai;
Guanw beh in'ui liw laii hnuahiw kuaiwlok,
Guanw beh qiwliam liw ee aiwjingg, ngiaa quer hyw jiuw;
Inx tniar liw si ingqaix :ee.
5 Jelusalem ee jiongww jaboxginxaw ar,
Guaw si ox, iauxquxx snix juer hyw,
Cincniu Kedar ee vowvnii,
Cincniu Solomon ee dniuwlii.
6 M tangx knuar guaw li'aw ox sig,
Si in'ui zit pak guaw.
Guaw ee laurbuw jiaxee qniaw bad siurkir guaw,
Inx hro guaw qowsiuw pudyhngg;
Danrsi guaw qaqi ee pudyhngg, guaw byy qowsiuw.
7 Guaw simx soxx tniar :ee ar, qriuu liw qra guaw qongw,
Liw dirr simxmih soxjai cri ngiuu, ziddiongdaur hro inx hiyh dirr simxmih soxjai;
Dirr liw dangpnua ee ngiuu-qrunn ee vnix:a,
Guaw sniaw su cincniu dar bin ee langg ar?
8 Luxqair diongx derr id suiw :ee ar, liw narr m jaix,
Jueww liw cud .kir, duer ngiuu-qrunn ee kaziah kir;
Cri liw ee snua'ngiuu-aw, dirr bogjiaw ee vowvnii vnix.
9 Guaw soxx tniar :ee, guaw vixping liw,
Cincniu Falaoh ee ciax ee bew.
10 Liw vinwvnix ee xmngg vnrix jin' suiw,
Liw ee amrqunw qruar jinjux ee len-aw, jin' hyw knuar.
11 Guanw beh qra liw juer qimlen-aw,
Snriux ginliuw-aw.
12 Ongg jre ix ee dyh ee sii,
Guaw narda ee hniu'iuu cringr cud ix ee pangbi.
13 Guaw soxx luan'air :ee si juer guaw jit vaux ee bud'iyc,
Duar dirr guaw ee hxingx-jingg.
14 Guaw soxx luan'air :ee, si juer guaw jit vaux ee jngxqachuex,
Dirr Engedi ee pudyhngg lai.
15 Guaw soxx tniar :ee, knuar ar, liw jin' suiw; knuar ar, liw jin' suiw;
Liw ee bagjiux cincniu hunxjiauw.
16 Guaw soxx luan'air :ee ar, knuar ar, liw jin' suiw, sidjai tangx hnuahiw;
Lanw ee binrjingg longxx si cnilik ee sig.
17 Lanw ee cur ee ngi'aw si vikhniucaa,
Ix ee qag-aw si siongveccaa.
2 Guaw si Salon ee muiquiwhuex,
Si snuaqog diongx ee vikhabhuex.
2 Guaw soxx tniar :ee dirr jiaxee jaboqniaw ee diongqanx,
Cincniu cxir-aw lai ee vikhabhuex.
3 Guaw soxx luan'air :ee, dirr jiaxee davoqniaw ee diongqanx,
Cincniu ciurnaa diongx ee vinqyxciu;
Guaw jin' hnuahiw jre dirr ix ee imwngw;
Ix ee quexjiw guaw jiac liauw jin' dnix.
4 Ix cua guaw zip ensiac ee soxjai,
Ing tniar juer qii dirr guaw ee dingxbin.
5 Qriuu linw ing pudyvniaw laii vow guaw ee lat, ing vinqyw laii iongw guaw ee jingsinn;
In'ui guaw dui' aiwjingg laii drir vni.
6 Ix ee dyr ciuw poo guaw ee taukag,
Ix ee jniar ciuw py guaw.
7 Jelusalem ee jiongww jaboxginxaw ar,
Guaw qiw ling'iongg ixqip den'iaw ee logbuw, cetced huanhur liw,
Byc did paccnew ix, byc did qiauxziauw guaw soxx tniar :ee,
Tingwhau ix qaqi jingguan.
8 Ar, guaw soxx luan'air :ee ee sniax, knuar ar, ix laii lar;
Dirr snuax nirr diyy, dirr nxiaw nirr tiaur.
9 Guaw soxx luan'air :ee, cincniu ling'iongg iacc si lok-aw;
Knuar ar, ix kia dirr guanw ee cniuviah au;
Dui' txangx-aw decc knuar;
Dui' tang'axjiw decc tamr.
10 Guaw soxx luan'air :ee cud sniax duiww guaw qongw,
Guaw soxx tniar :ee, guaw ee bixzinn, kiw laii qapp guaw snaqab kir.
11 Knuar ar, in'ui dangtnix ixqing’ quer,
Ho ixqing’ suah lar.
12 Venww de ee huex ixqing’ kuix,
Jiauw-aw hauw ee sii qaur lar;
Dirr lanw ee qingxlai tniax qnir qajuix ee sniax.
13 Buhuaqyxciu ee quexjiw jiamrjiam singsik,
Pudyciu kuix huex tror cud ix ee pangx;
Guaw soxx tniar :ee, guaw ee bixzinn, kiw laii qapp guaw snaqab kir.
14 Guaw ee jnixaw ar, liw dirr jiyhpang lai, dirr snuagamm unxbat ee soxjai;
Qriuu liw jrunw guaw knuar qnir liw ee bin, tniax qnir liw ee sniax;
In'ui liw ee sniax unhyy, liw ee bin snix juer suiw.
15 Diyhh qra guanw liac holii, ser jiah holii, dyrr si vairhuai pudyhngg :ee;
In'ui guanw ee pudyy duxaw beh kuix huex.
16 Guaw soxx luan'air :ee sriok guaw, guaw iarr sriok ix,
Ix dirr vikhabhuex diongx cri ix ee ngiuu-qrunn.
17 Guaw soxx luan'air :ee ar, guan liw zit lianglingw, ngiaw cundngg ee sii, dywdngw .laii.
Cincniu ling'iongg iacc si lok-aw,
Dirr Beter ee snuax nirr.
3 Guaw mii .sii tex dirr guaw ee bincngg, cue guaw ee simx soxx tniar :ee,
Guaw cue ix, iarr cue be diyc.
2 Dnaxx guaw beh kiw laii siwqer qniaa dirr sniaa-lai,
Dirr quelo, dirr kuankuah ee soxjai,
Guaw beh cue guaw ee simx soxx tniar :ee;
Guaw cue ix iarr cue be diyc.
3 Sniaa-lai sunjax ee langg duw diyc guaw,
Guaw mng inx qongxx: Linw u knuar qnir guaw simx soxx tniar :ee iacc byy?
4 Guaw lirkuix inx byy zuarr hng,
Dyrr duw diyc guaw ee simx soxx tniar :ee,
Guaw knii ix, m hro ix kir;
Tingwhau guaw cua ix zip guaw laurbuw ee qrex,
Dyrr si snix guaw ee vangg-lai.
5 Jelusalem ee jiongww jaboxginxaw ar,
Guaw qiw ling'iongg ixqip den'iaw ee logbuw, cetced huanhur liw,
Byc did paccnew ix, byc did qiauxziauw guaw soxx tniar :ee;
Tingwhau ix qaqi jingguan.
6 Hitt xee dui' kongwiaw nirr laii, hingjong cincniu huexhunx ee tiau,
Ing bud'iyc qapp zuxhniux, ixqip singlixlangg dagg ngiu ee panghunw laii hro ix pangx :ee,
Si jirjui ar?
7 Knuar ar, si Solomon ee qiy,
Siwuii u lak-jap xee iongxsu,
Longxx si dui' Islael iongxsu diongx qingw :ee.
8 Inx longxx erhiauw ing qiamr, gauu qaujenr,
Langlangg vue dyx dirr iyx nirr,
Dihongg mii .sii ee guihiamw.
9 Solomon Ongg ing Lebanon ee caa,
Uirr qaqi juer jit dingw qimlenw.
10 Ix ee tiau si ing ginn juer :ee,
Ix ee drew si ing qimx juer :ee,
Ix ee driam si jxiw sig :ee,
Qidiongx si ing Jelusalem ee jiongww jaboxginxaw ee aiwjingg pox :ee.
11 Zion ee jiongww jaboxginxaw ar, linw diyhh cud kir knuar Solomon Ongg,
Ix dir benxliuu, dyrr si dirr ix habhunx ee zit, ix ee simx hnuahiw ee zit,
Ix ee laurbuw qra ix dir :ee.
4 Guaw soxx tniar :ee, knuar ar, liw jin' suiw, knuar ar, liw jin' suiw,
Dir puer ee lairbin liw ee bagjiux cincniu hunxjiauw;
Liw ee taumngg cincniu snua'ngiuu qui' din;
Dyw dirr Gilead Snuax-vnix.
2 Liw ee cuiwkiw cincniu duxaxx jenw xmngg ee jit qrunn ngiuu, sew cingkir jnriu .laii,
Dagg jiah u siangsniqniaw, byy jit jiah sitlyc ix ee qniaw.
3 Liw ee cuiwdunn cincniu ju'angg snuar,
Liw ee cuir iarr snix juer hyw,
Liw ee vinwvnix dirr puer-lai,
Cincniu jit der siahliuu.
4 Liw ee amrqunw cincniu David ee daii, kiw juer qunjongqik;
Viah-dingw diaur jit-cingx xee vinvaii,
Longxx si iongxsu ee dinvaii.
5 Liw ee nng xee linx, cincniu jit duir lok-aw,
Jiac cauw dirr vikhabhuex diongx,
Dyrr si logbuw siangsnix :ee.
6 Qaur zit lianglingw, ngiaw cundngg ee sii,
Guaw beh kir bud'iyc ee snuax, qapp zuxhniux ee snuatauu.
7 Guaw soxx tniar :ee, liw uanjuann suiw,
Liw byy jit diamw aw hacuu.
8 Guaw ee sinniuu, liw diyhh dui' Lebanon qapp guaw laii, dui' Lebanon qapp guaw laii,
Dui' Amana ee dingxbin, dui' Senir qapp Hermon ee dingxbin;
Dui' sraix ee het, dui' var ee snuax knuar .lyc .kir.
9 Guaw ee siyxbe ar, guaw ee sinniuu ar.
Liw duat guaw ee simx, liw ing bagjiux jid'err knuar,
Ing liw ee amrqunw ee jit diauu qimlen-aw, duat guaw ee simx.
10 Guaw ee siyxbe, guaw ee sinniuu, liw ee aiwjingg jnaixngiu hiacc bixbiau.
Liw ee aiwjingg jnaixngiu viw jiuw kacc hyw;
Liw ee qyiuu ee pangbi jnaixngiu viw itcer ee hniuliau kacc ngiaa.
11 Guaw ee sinniuu ar, liw ee cuiwdunn cincniu bidvoo decc dih,
Liw ee jic-xe u bit u nix;
Liw ee ihok ee pangbi cincniu Lebanon ee pangbi.
12 Guaw ee siyxbe, guaw ee sinniuu, dyrr si qnuaisyw ee hngg;
Kamwbat ee jnew, hongbat ee juixjnuaa.
13 Liw soxx cud si siahliuu ee hngg, u siongrr hyw ee quexjiw,
Jngxqachuex qapp narda ee ciu.
14 U narda qapp huan'anghuex,
Ciongvoo qapp ziogquir, ixqip jiaxee zuxhniux,
Bud'iyc, dimhniux, qapp itcer siongrdingw ee hniuliau.
15 Liw si hngg-diongx ee juixjnuaa, uahjuiw ee jnew,
Dui' Lebanon lrauu .lyc .laii ee kejuiw.
16 Vakhongx ar, diyhh kiw .laii, lamhongx ar, diyhh laii,
Cuex laii guaw ee hngg, hro ix ee pangbi huad cud;
Guan guaw soxx luan'air :ee zip ix ee hngg-lai,
Jiac ix hyw ee quexjiw.
5 Guaw ee siyxbe, guaw ee sinniuu ar, guaw zip guaw ee hngg-lai,
Banw guaw ee bud'iyc qapp guaw ee hniuliau,
Jiac guaw ee bidvoo qapp guaw ee bit;
Limx guaw ee jiuw qapp guaw ee nix;
Guaw jiaxee ving'iuw, diyhh laii jiac;
Guaw soxx luan'air :ee, laii limx, qycc limx jerje.
2 Guaw kunr, guaw ee simx iauxx jingsinn;
Jex si guaw luan'air :ee ee sniax, ix pah mngg. Guaw qongw:
Guaw ee siyxbe, guaw soxx tniar :ee, guaw ee hunxjiauw,
Guaw ee sunjuann :ee, qriuu liw qra guaw kuix mngg;
In'ui guaw ee taukag lorjuiw muaw muaw. Ix qongw:
Guaw ee taumngg hro mii .sii ee lorjuiw dih damm.
3 Guaw ixqing’ trngr guaw ee snxax, beh jnaixngiu qycc cing?
Guaw ixqing’ sew guaw ee kax, jnaixngiu tangx qycc pah lasamm ar?
4 Guaw soxx luan'air :ee, dui' mngkangx crunx ciuw zip .laii;
Guaw ee simdngg uirdiyhh ix laii qikdong.
5 Guaw kiw .laii, beh qra guaw soxx luan'air :ee kuix mngg;
Guaw ee nng qix ciuw ee bud'iyc dih .lyc .kir,
Guaw ee jngxtauu-aw u bud'iyhjiab dih dirr mngcnuawvnir.
6 Guaw qra guaw soxx luan'air :ee kuix mngg;
Danrsi guaw soxx luan'air :ee ixqing’ uat dngw srinx kir lar;
Guaw uirdiyhh ix ee ue, sinn vuthurtew;
Guaw cue ix iarr cue be diyc; guaw qiyr ix, ix iarr byy rinr.
7 Sniaa-lai sunjax ee langg duw diyc guaw,
Pah guaw, siongx guaw;
Qor sniacniuu ee langg cniuw guaw muax sinkux ee qin'aw.
8 Jelusalem ee jiongww jaboxginxaw ar,
Guaw cetced huanhur liw, narr duw diyc guaw soxx luan'air :ee, diyhh qra ix qongw,
Guaw in'ui aiwjingg drir vni.
9 Liw jitt xee luxqair diongx derr id suiw :ee ar,
Liw soxx luan'air :ee, viw vadd xee soxx luan'air :ee u simxmih kacc ngiaa?
Liw soxx luan'air :ee, viw vadd xee soxx luan'air :ee u simxmih kacc ngiaa,
Liw jiacc anxnix cetced huanhur guanw?
10 Guaw soxx luan'air :ee, si vec qycc angg,
Si banrlangg diongx ee derr id :ee.
11 Ix ee taukag cincniu siongrr hyw ee qimx,
Ix ee taumngg suii .lyc .laii, ox cincniu oax.
12 Ix ee bagjiux cincniu kex-vnix ee hunxjiauw,
Ing nix sew ix, andir habsig.
13 Ix ee cuiwpew cincniu pangx huex qui' vaii, cincniu pangx cauw ee daii,
Ix ee cuiwdunn cincniu vikhabhuex, qycc dih lyc bud'iyhjiab.
14 Ix ee nng ciuw cincniu qimkuann snriux ng'gik;
Ix ee sinkux cincniu diaukig ee cniurgee, jiu'uii snriux lamvyxjiyc.
15 Ix ee katuiw cincniu siahjiyc, anx dirr hyw qimx ee jxy;
Ix ee kuanxsid cincniu Lebanon,
Qycc jin' suiw cincniu vikhniuciu.
16 Ix ee ue qigqii dnix, ix uanjuann tangx tniar;
Jelusalem ee jiongww jaboxginxaw ar,
Jex si guaw soxx luan'air :ee, jex si guaw ee ving'iuw.
6 Liw jitt xee luxqair diongx derr id suiw :ee ar,
Liw soxx luan'air :ee kir dyclyc?
Liw soxx luna'air :ee uat dngw kir dyclyc,
Hro guanw tangx qapp liw kir cue ix.
2 Guaw soxx luan'air :ee lyc kir ix ee hngg,
Qaur pangx huex qui' vaii, dirr hngg-lai cri ngiuu-qrunn,
Qycc banw vikhabhuex.
3 Guaw sriok guaw soxx luan'air :ee, guaw soxx luan'air :ee iarr sriok guaw;
Ix dirr vikhabhuex ee diongqanx cri ngiuu-qrunn.
4 Guaw soxx tniar :ee ar, liw suiw cincniu Tirzah,
Snix juer hyw cincniu Jelusalem,
Uigii cincniu giac duarqii ee qundui.
5 Liw ee bagjiux m tangx knuar guaw,
In'ui e duat guaw ee simsinn;
Liw ee taumngg cincniu snua'ngiuu qui' din,
Dyw dirr Gilead ee snuax-vnix.
6 Liw ee cuiwkiw cincniu qui' din ee ngiubuw,
Sew cingkir jnriu .laii;
Dagg jiah u siangsniqniaw,
Byy jit jiah sitlyc ix ee qniaw.
7 Liw ee vinwvnix dirr puer-lai,
Cincniu jit der siahliuu.
8 U lak-jap xee ongho, veh-jap xee vinrhuix,
Iarr u sngr be liauw ee qiongluw.
9 Guaw ee hunxjiauw, guaw ee sunjuann :ee si dog'id :ee;
Ix si ix ee laurbuw dogsnix :ee,
Si snix ix :ee soxx digvet tniar;
Jiaxee jaboxginxaw knuar .qnir, dyrr ylyw ix u hokkir;
Ongho vinrhuix knuar .qnir, iarr ylyw ix.
10 Hitt xee ngr guarbin knuar .cud .laii, cincniu jaxkiw-sii ee qngx,
Suiw cincniu guec, cingqed cincniu zit,
Uigii cincniu giac duarqii ee qundui :ee,
Si jirjui ar?
11 Guaw lyc kir gnirkag ee quexjixhngg,
Beh knuar snuaqog diongx cnicuir ee sidbut,
Beh knuar pudyy huad ngiw iacc be,
Siahliuu kuix huex iacc be.
12 Byy pacsngr ee sii, guaw ee simx andir guaw,
Dirr junquir ee langg ee ciax.
13 Dyr .laii ar, dyr .laii ar, Sulam ar,
Dyr .laii, dyr .laii, hro guanw knuar qnir liw.
Linw uirhyy beh knuar Sulam,
Cincniu knuar Mahanaim ee tiauwbuw ar?
7 Zinqunx ee jaboxqniaw ar, liw ee kax cing ree jnaixngiu hiacc suiw;
Liw ee duartuiw ngii, qut cincniu dinvyw,
Si qikiauw ee ciuxqangx juewjniaa :ee.
2 Liw ee dorjaii cincniu ngii ee vxuex,
Byy kiamwkueh diauhyy ee jiuw;
Liw ee vakdow cincniu qui' dxuix ee bec,
Jiu'uii u vikhabhuex.
3 Liw ee nng xee linx, cincniu jit duir lok-aw,
Dyrr si logbuw siangsnix :ee.
4 Liw ee amrqunw cincniu cniurgee ee tah,
Liw ee bagjiux cincniu Hesbon ee dii, uaw qin Bat Labim;
Liw ee pni cincniu Lebanon ee tah, ngr Damaskus :ee.
5 Liw ee taukag dirr liw ee sinkux cincniu Karmel,
Liw ee taukag dingw suii .lyc .laii ee xmngg si jxiw sig :ee;
Ongg uirdiyhh ix ee taumngg be li .did.
6 Guaw soxx tniar :ee, liw jnaixngiu hiacc suiw;
Jnaixngiu hiacc tangx hnuahiw, hro langg hnuahiw kuaiwlok!
7 Liw ee sinjaii cincniu jyxciu,
Liw ee linx cincniu qui' pax ee quexjiw
8 Guaw qongw: Guaw beh jnriu jitt jangg jyxciu,
Knii ix ee qix;
Guan liw ee linx cincniu pudyy qui' pax,
Liw ee kiwbi cincniu vinqyw.
9 Liw ee cuir cincniu siongrr hyw ee jiuw,
Uirdiyhh guaw soxx luan'air :ee limx liauw qud'auu,
Lrauu zip kunr ee langg ee cuiwdunn.
10 Guaw sriok guaw soxx luan'air :ee,
Ix iarr himbo guaw.
11 Guaw soxx luan'air :ee ar, laii ar, lanw laii kir snuadniuu,
Lanw laii kir hniusia hiycmii.
12 Lanw tauwjaw kiw .laii, kir pudyhngg, knuar pudyy vuh ngiw kuix huex iacc byy,
Siahliuu kuix luiw iacc byy.
Guaw dirr hiax beh jiong' aiwjingg hro liw.
13 Hongqax cud pangbi;
Dirr lanw ee mngg-vnix u dagg ngiu jin' hyw ee quexjiw, sinx :ee, qu :ee, longxx u;
Guaw soxx luan'air :ee, jex longxx si guaw qra liw jikju :ee.
8 Kow be did diyc liw juer guaw ee hniadi,
Bad suh guaw laurbuw ee nix :ee;
Dyrr guaw narr dirr guarbin duw diyc liw, dyrr qapp liw jimx cuir,
Iarr byy langg e knuawkinx guaw.
2 Guaw beh inxcua liw, cua liw zip guaw laurbuw ee qrex,
Ix beh qawsi guaw;
Guaw beh hro liw limx diauhyy ee jiuw, qapp siahliuu ee jiab.
3 Ix ee dyr ciuw e poo guaw ee taukag,
Ix ee jniar ciuw beh py guaw.
4 Jelusalem ee jiongww jaboxginxaw ar,
Guaw cetced hunahur linw,
Byc did paccnew ix, byc did qiauxziauw guaw soxx tniar :ee,
Tingwhau ix qaqi jingguan.
5 Hitt xee kyr dirr ix soxx luan'air :ee, dui' kongwiaw jnriu .laii .ee,
Jex si jirjui?
Guaw dirr vinqyxciu xe qiywcnew liw,
Liw ee laurbuw dirr hiax qingquer tongwkow,
Dirr hiax qingquer tongwkow snix liw.
6 Qriuu liw jiong' guaw he dirr liw ee simx, cincniu inr; he dirr liw ee cinxqud, cincniu inr;
In'ui aiwjingg u dua lat cincniu siw,
Dowki janzimw cincniu imhuw;
Soxx huad cud ee zedsimx cincniu huexiam;
Si qik binglet ee iamrhuew.
7 Jerje juiw be e bet aiwjingg,
Duarjuiw iarr be e imbat ix;
Narr u langg beh ing qrex-lai juanvo ee giap ngua aiwjingg,
Dikkag hro langg biauxsi.
8 Guanw u jit xee sewhanr siyxbe, iauxx bue diongxsingg,
Langg laii qongw cinjniaa ee zit,
Guanw diyhh qra guanw ee siyxbe jnaixngiu sethuad?
9 Ix narr si cniuu, guanw beh dirr ix ee dingxbin kiw gintah,
Ix narr si mngg, guanw beh ing vikhniucavanw uii ix.
10 Guaw si cniuu, guaw ee linx cincniu lauqyh;
Hitt sii guaw dirr ix ee bagjiux diongx cincniu did diyc ving'anx ee langg.
11 Solomon dirr Baal Hamon u jit kux pudyhngg;
Ix jiong' jitt xee pudyhngg jox hro qowsiu ee langg;
Inx dagg langg uirdiyhh inx ee quexjiw diyhh lap jit-cingx ginn.
12 Guaw ee pudyhngg, guaw qaqi ee, si dirr guaw ee binrjingg;
Solomon ar, hitt jit-cingx qruix how liw,
Nng-vah qruix hro qowsiuw quexjiw ee langg.
13 Liw diamr dirr hngg-diongx :ee, dangpnua longxx air tniax liw ee sniax,
Qriuu liw hro guaw iarr did diyc tniax .qnir.
14 Guaw soxx luan'air :ee ar, liw diyhh qinw qinw laii,
Cincniu ling'iongg iacc si lok-aw dirr pangx cauw ee snuax.