Cniqngx Guehqngx

1.quewnivng

Quewnizit, dua tuanngii. Jit der guehdyh-aw, sir xee duarlangg qaccamx jit xee sir huer ginxaxqniaw decc uiloo, jre qaxx jin’ tanglangx. Qex cai lecc snax~nng jiah iw-aw zip .kir marr tywdongr.

Huexqyx p.-pigpok-p. qunw ciangrciang. Ehngamr ee dyjiw qra dniaxqamxquar henx .kuix suar qiyr dag’ee kiw di. Sui’ langg jit nguaw bixhunxcaw, dyh-dingw ee cair, vatvyxqex, angsiyhii, vokbah, hongrbuexhee, qapp jit vnuaa hijiw lunrlac lunrlac, jairr langg’ qac’ir gneh kir puer. Ginxaxjaix vawtauu kacc byy, vun ciaciax, vo vo diyhh kyr duarlangg. Jyr langg’ laurve :ee jit langg jit vingg jre dirr ix vongvnix decc suhau. Nng xee a’maw jre diamr duiwbin bagjiux babuix, knuar a'sunx :ee qaukax heaxciuw jiokk u kuanxkig, liamdongsii iarr suacc be qor did jiac.

“A’vax, guaw beh jiac linghee.”

Jit sinkux cing qaxx loo ~ ~, ginxaxlangg dnaxx jiacc kuix cuir, dirr ix jniawciuxvingg ee laurve duewciuw qra gneh .laii.

“A’diax, guaw beh limx dee dee.”

Ginxaxlangg qycjaiww cud bingrling, dywciuxvingg ee laurve jiksii kir tinn.

“Sniu’ dua cuir lar! Siyxtingg aw kir qee .diyc kacc kuair!” Dua hanr maw huah sniax qra ginxaw ee a’diax dongwdauw.

“Ciuw bag qaxx iuu dapdab. Singx qra crid crid lehh.” Ser hanr maw tiux jit dniux mi’axjuaw hro ginxaw ee a’vax.

Dinxdong!

Guarvnix u langg decc cic denrlingg. Sir xee dua langg bagtauu kiycqingw. Jre uaw mngg :ee u zinrlo, vreh kiw srinx kir kuix.

“Liw si si’angw a?”

Jniw qniaw qenrdiux, byy-vxag-byy-drngg, qnir diyc langg laii dyrr mng.

“Jex a’qox. Liw byy qinw qiyr a’qox.”

Jyr langg’ a’vax :ee qar ginxaw qiywcuir. Ginxaw sraiw piah, jiahqen, ix qargni m tanwcuir.

“Mair qiong’ah ix qiyr lar! Sir huer ginxaw narnia.”

Dua hanr maw jid’err cud sniax, ser hanr maw lenmisii janwcuir, juairlinwdngw an’ nguaxduu-aw tec jit hur nguaxdi .cud .laii.

“Jitt hy tnix, cair juw hyw kuair lingw. Iarr m jaix qinnii liw e dngw .laii iacc be, mrjiacc qiyr dag’ee singx jiac, byy danw .liw”

Nguaxdi kuanw .laii, ser hanr maw naxx decc lixhue. Duxx qaur cur :ee hiongr jairjy led'ui hue vutsi, qongxx lo nirr jikciax jin’ byy dairuaa.

“Dycc jit vaiw quewnii quewiau byy jikciax?” Dua hanr maw bin aur aur. “Qoklangg narr u jurqag, diyrr jaix rair lingrjaw cutmngg.”

“Hyw ar lar. Dngw .laii liw iarr liam, byy dngw .laii liw iarr liam. Juann liw ee ue liauliauu.”

Knuar m si sewbin, ser hanr maw kia cud laii uan’ue, quewvnee.

“Aax!”

Duarlangg jit qxur laii jit qxur kir qor qongw. Jit dniaw huexqyx vangr lecc hro qunw. Ginxaw jenrtangg kir bongx, hro siyx tngx tngr jit xe, tniar qaxx nicnih hauw.

“Iyhlangw lairdew u Mensolatam. Qinw tec laii qra buah lar!”

Dua hanr maw cud cuir. Ginxaw ee a’vax qinw kir tec .laii.

“Pokpa ar lar. Unw tniar qaxx. Guaw jit xee simqnuax aw aloo.” Ser hanr maw tauu iux bin ziauu, jiokk m qramx ee kuanw.

Iyh-aw buah hyw. Ginxaw iuguann hauw be diam.

“Jit dxngr vng jiac qaxx dy’ hyxser hyxser. Byy-dair.-byy-jir…”

Ginxaw ee a’diax, quanrr jyr langg’ a’hniax :ee, lauu jit xee uerbuew qorr toxkuir junw .quer, cur-lai kiwhunx an' hutdiamw qangr qaur gingdiamw. Iw nirr jre iauxx bue siyx hitt xee hionghiongg vreh kiw srinx.

“A’ic, jex hro liw quewnii.”

Jaboxqniaw qra angvaux dux hro laurbuw, tokax hingliw qycjaiww qnrua kiw.

“Liw anne si beh congr sniaw?” Jyr langg’ laurbuw :ee mng qaxx cnejinx .kiw .laii.

“Guaw diamr jiax cak langg’ bak. Tanwjaw laii jauw kacc si siaur.”

Qongw suah, m tniax qexkngr, uad lehh dyrr kir.

“Lanw dingw siwlangg qnaxx si u juer okjig, jiacc e cud qaxx jitt hy horter laii lecc lenhuee siwjingr!”

Dua hanr maw cyh cyh qiyr. Ser hanr maw byy cuir byy jic, lrauu duiww vakdoxdew ee bagsaiw byy langg sigsai.

2. sexsnaqix

Lyc lamm ee qysog qonglo, ciax trad trad dni. Jnriu vag :ee jidlo tongtaur, jit diamxjingx tangx jauw qauw-aw qongliw, taubuew longxx byy jikdauw. Vnivnii jit jua lo, beh kir viw beh dngw qex dingvue siqanx. Dirr beh dngw laii ee ciax-dingw, koxceh ee simjniaa qui’ lo duer diauu diauu. Jitt kuanw ee lingdii tangx qiamw jidvnuar, benw tihtua, jerjiyw marr sngr u quaw voxsow.

Qeci jing cnicnix. Sowsii qa’iac ee diamwtauu jinw iarr qnuaix mngg cnuar hxo, byy decc jyr singliw. Cuiwdunn qnuaa qaxx ote, jnaixtauu-aw dangr qaxx gnirhue. Puesnax ca'uaw, bic'am, suar qra amrqunxmuax muax kacc bat lehh. Din’aiho decc lyc. Hongx uadzuxx cinwlingw. Qingqactauu ee pnai’aw u quaw dangrsniax. Dimdang ee kavo bersux decc siy’ vixping.

Taixqyxquiw. Uir langg' ciux. Javox puer jabow. Ginxaw luan luan snix.

Qaur cur, huatqenr duarmngg iuqycc hro langg punr cad. M jaix siaw zuarr quw ar. Zirqauxamr, dag’ee diamr cur uiloo jiacc quewnivng, pacsngr kacc byy langg knuar .qnir. Binaxjair kacc jaw kiw laii qra crid driau dyrr si.

Syxsii kinx lat aw jun .kuix. Cur-lai denrhuexpok'aw qngx ngiawngiar. Vangqingx qapp langkectniax longxx byy knuar qnir langngiaw, dogdok igqingx hitt tauu cicix-cabcap u langg decc juewsniax.

“Liw tacc e decc sew snxax?”

“Liw tacc e jauw .dngw .laii?”

Luxjuxlangg qapp lamjuxlangg ox zinn duiww vec zinn, bagjiux longxx denw qapp ngii qunwqunr, bersux decc viw dxaur dua luiw.

“Sew snxax-aw dxiamr m siux lanw ee snxax.” Dirr huloqingx ee lamjuxlangg dairsingx kuix cuir.

“Si anxjnuaw?” Luxjuxlangg qycjaiww mng.

“Qniax uer diyc amwsamwvni a! Jex iarr suacc diyhh qycc mng?”

“Inx jairjaw dyrr jaix lanw nng langg druar jywhuew. Lanw snxax qaux hro inx hitt qingx sew beh qui’ dxangx ar!”

“Diamwtauqex si qongxx, inx kanx:ee qniax qauquankeh narr jaix, jit quaw singliw e jauw liauw liauw.”

Qongw qaur jiax sngr id cringx zi bingg ar. Luxjuxlangg trow jit xe kuir, binrsig amwdam.

“Liw tacc jiacc qinw dyrr dngw .laii?” Diyc lamjuxlangg jitt vingg decc jamng.

“Langg’ cur nirr u haursnix, u sunx, u vuanwjuw. Laurzet ciccah. Lanw kir si qex dinr kaciuw :ee u nia.”

Uermngg dew, rinr diyc danqanw. Lamjuxlangg iarr byy qycc duix, tauu jinx bak giac, jin’ jaix kindang.

Qex langg qex kaqow. Jit xee nuaw, jit xee tua. Kacc dua niaw :ee, jit vingg liac snaaxdau, jit vingg giuw snaaxqix, sianglangg sowciuw qra snxax jun hro dax.

“Sidjai diyhh laii hag jit daii sexsnaqix jiacc driyc.” Lamjuxlangg naxx decc siux snadiamx, cuir drang cuir qongw.

“Beh hag m kacc kuair. Qra denrkiwhangg qiyr, inx sui’ qrngx .laii. Aursii suaw cur qex jit qnia qahuextauu, qauwsiqaur liw dyrr jaix qankow.”

Luxjuxlangg qra atcic dongr qinw qinw. Sexsnaqix ee dairjir athe. Javox :ee kir pak snxax. Jabow :ee kir sew ciuxbin.

“Uat dngw srinx, 2111 nii beh quer ar. Limw limw aw beh jit sewqiw jinwjingg, sewqair zinkauw quewdyx. Je taucuir, gnoxqog byy qraur jiac, iauhngx tong' siwqer. Cnicamw dai naxx cincniu lensiogqiok, dagg qangx u, longxx byy hiycjam. Jin’ tenhing. AIDS ee irhongsia ingwsii cutsir. Angngix-aw quer dorjer jingr judau, qui' siwlangg longxx benw qniax e uer .diyc. Siangx ve byy buw iacc siangx buw byy ve ee qekauw dauc dauc aw qniasii. Zinkauxsor u jewkongr, niucauw u qauwgiac. Jitt aursinx, iauqix srid dxngr :ee vutqenr jongjig.”

Ciuxbin sew cingkir qex jiokk dasangx, luxjuxlangg dirr bincngg-dingw vnuar tedyw, denrsi bongxx knuar.

“Lanw laii snix .jit .xe.”

Lamjuxlangg bongx ingg uaw laii bincngpox, cnex-vrong-vec vrong laur jitt qxur.

“Linw qinaxzit jiacc huanxsiongr si decc jnaixaxngiu? Lenmix beh air sexsnaqix, lenmix beh dic ginxaxngix.”

“Cur nirr qex jit xee ginxaw, simqnuax unxsun, qniaa kacc e quxdngg.”

“Lanw vutviw inx hiaxee siangx ve iacc siangx buw ee qadingg, tagceh, knuar isingx, gulinghunw jiaxee ginxaw ee soxhuir, dagg hxang qnuatniax qra inx vangvow qaxx qaur. Ngix-aw jap qywguec lyc too, dua cuir kuix kuix, vo vo longxx diyhh jnii. Liw qnaw cinwcaiw qongw. Jitt hy dairjir, guaw m qnaw angxlangw sniu.”

“Jnihang, guaw jongxvaulamw. Angngix-aw, iarr diyhh liw jiacc u jaidiau snix.”

“Liw qyckacc gauu tanr, qamxx tanr e diyc langg’ duiww lanw ee juncunn?” Luxjuxlangg jin’ qra lauwkuir. “Guaw ing’amr dngw .laii, knuar diyc duarmngg iuqycc ho’ngg luan jry dy’ iauxx bue qra liw qongw. Lanw qaqi beh dauwdin, byy sniaw tangx kauwhnix. Ginxaw buqox. Hydikkow hro ix cutsir duer lanw sriu jitt dingxhy ee buxban, cauxdac?”

Qauwnau qaur jiax, javox :ee vnixcuir .kir. Denrhuew qimr huax, bincngg-dingw :ee lamw siy’ uaw. Qyckacc byy, henrvosii sianglangg longxx u pnua.

3. hunenr

“Dangw :ee, liw diongdaur m si beh ho’ngg cniaw? Jinw quiw diamw ar? Qycc m qinw kir ngua snxax?” Qongw :ee ciuw naxx qiw viacjingx.

“Kuix dyh longxx marr be junxsii. Anx lar!”

“Kacc jaw zibsik, kir hiax keh quejiw marr hyw, kacc ngiaa ho'ngg nicnih danw.”

M-jing.-m-guan, Dangw :ee an’ pongwiw vreh kiw, cuir-lai qauhqauc liam.

Bongr bongr, angtiab byy jah .cud .laii, vngrdiamr hit m driyc qingx .kir. Kar denrnue mng jit xe juxser. Qnuaw qauwui, dre dirr lakdeaw ee hyrgii tec .cud .laii, duiwqingw dngdecc kuix cair.

Nguar qaur :ee u siongr diyc xui dyrr zimrir jre. Jap langg gxiac ee ngi’nguaidyh, juanjuanx cnihun binrtew, byy qaxx jit xee sigsai.

“Lanw si Dniux Huw iacc Liau Huw ee jogcinx, ving’iuw?” Jre dirr Dangw :ee qecviah xui ee ozisang hyxlew aw mng.

“Longxx si. Guaw inx dairhak ee dongcongx.” Dangw :ee nng qxur junw .quer.

Ozisang qongxx si viauxqu. Qang dyh :ee, ix diog'id siaurqair hro Dangw :ee, longxx byy tiauwkamw. Uree danzinn, uree u pnuarlam. Lenqex-qapkauw jongw laii .ee marr u. Dongliauu, cuwvnix, jiwqaux, mirsnuawcinx. Jitt dyh si jabcaiwmi.

Linghee qapp vauhii ee pingvnuaa jiac byy diyc, vehpniwqex sangr .laii, jingwlangg cniaw nguar qaur :ee singx drang di.

“Dangw .Sensnix kixqex bue?” Kimhingx jit der gneh laii nguaw-drew, viauxqu mng kiw.

“Iau... iauxx bue.” Dangw :ee qongw qaxx qalauxqalew, ngingix-ngwngr.

“Guanw qongsix dagg qywguec longxx e qra sinlyy vran siongwcinx. Javox :ee vaiwlak, jabow :ee lexvaiwzit. Jitt jam aw duxhyw guaw decc jyr juxtauu. Au lexvaiwlak, narr byy sna’ kiwhiamm, huangingg liw laii. Junxnarr siongr byy, guanw u cuann qiwliamrpinw.”

Viauxqu hnuaibacsnix, cinwcaiw ciyr .jit .xe, cuiwpuexbah jrig hiongr quann, bagjiux buix buix qiongrbeh knuar byy bagjiuzinn.

“Guanw jaboxqniaw qinnii zxic-veh, uana iauxx bue qewcua. Qamxx erdangr camqax?” Cuwvnix obasang mng.

“Iarr u hitt hy berdangr?” Viauxqu duiwcuir rinr. “Guanw qongsix ee jabow jit’uann, guarjaii siongdongx, lairjaii byy poxtongx, e'ee jniawsiong haghau cut'yc :ee.”

Hiciwqnex pangg .laii, jauxdyh :ee qra sui’ langg kad jit nguaw. Dyh-dingw ee vnuaa-aw qah nguaxjnuaa, ix sunrsuar jah jauw.

“Qamxx u tniax qongxx inx nng xee si'angw beh snix?” Dongliauu mng, di vangwhe, qra kruar dirr tngsijy ee tngsii giaa kiw laii beh kad qnex.

“Qongxx anwbai kir iongxsingdongg kid, byy beh qaqi snix.” Viauxqu rinr dairsingx. “Hyw jxingw diyhh quewdiuu dauc dauc aw cue. Inx nng xee longxx byy ingg qaxx. Jongw berdangr lo nirr dnuasinhanr ovec giuw jit xee?”

“Inx qokk langg qamxx m si longxx u jit xee hniaqyx? Si jre dirr dycc jit dyh?” Dongliauu giahbak ngic'ngih knuar.

“Jit xee dirr haixgua, jit jua lo ciax kiw duw tnix. Qigua hitt xee, narr u laii marr si hro inx sirduarlangg qex laklenw byy binrkangw narnia." Viauxqu tror duarkuir.

“Anxjnuaw qongw?” Dongliauu jiokk cnigii.

“Vnivnii javohanr m kir cue, koxkoxx beh kir air jabow, jiacc laii jit xee ngua quer jit xee, longxx be dniardiyc. Uewsuewvni dyrr si anne decc uer laii uer kir. Hongsniax qongxx u tausnex jit xee, ginxaw jin’ qaurkee. Urngiaw si jyrgiap.” Viauxqu naxx qongw naxx hnair tauu.

“Huatlut duer be diyc sidai m siuqaiw. Siarhue m zin angbow-duir, dandanx quewqip inx pnua gauu ngua. Ixx simx ter simx sniu, anne qamxx u qondy?”

Dangw :ee be lunw did krir, ue jit sniax qut .cud .kir. Qang dyh :ee tauu lee lee, gairgiyc ~.

Sinlangg laii decc qingwjiuw. Jit xee sejongx dnaxvan, jit xee sinniusnax quaww sinniubang, longxx vec liaksiag.

“Jitt duir kaksit u suwpuer.” Sinlangg uad kir qecviah dyh, cuwvnix dirr inx kacngx-au ylyw.

“Langg’ inx jurr dairhak dyrr jywhuew, longxx byy qaux vadd xee. Siarhue beh dikdnia, inx si dua qix tiau.”

Viauxqu janwcuir. Jurr duxjiah dakkauw, viauxqu m bad qra bin uat duiww Dangw :ee hitt vingg .kir.

Iyjixvan ee vnuaa-aw binrdingw jit pnir jit pnir ee entuiw byy sniaw langg junwbun, dnitngx qnuaw huwhur sangr jnriu dyh. Jiuxenr qaur cud. Sinlangg dirr kauxbin daplew. Langkeh vailet danw beh qra inx qongw hyw ue. Dniux Huw nng xee laurbuw qapp Liau Huw nng xee laurve kia dirr siangvingvnix draur pnuardnuaa.

“Knuar jiax laii. Ciyr .jit .xe.”

Liapngiaxsux huah hyrling. Jingwlangg knuar qniawtauu qig ciywbin, taubuew go biyxjingx byy-ciauu-byy-suaw, ham' catauangx uanxzenn byy zi.

4. gedjuw

Hunenr suacdyh. Sir lenw ee qiauciax suar suar qra langkeh jair lirkuix vngrdiamr. Byy jurqa’iong :ee, benw qniaa benw jauw, mngkakauw u quixnarr daii qewdingg :ee, diyhvan dyrr tangx vreh kiw jre. Kiam drew :ee, ingg kax bongxx qniaa, qongciax iacc denrciax iauxx jamxzenn aw u .jit .der .aw, m si cuir qnir bak qnir. Unn unn aw kog, qinxjuahban iarr e qauwui.

Siyjiuw jiac qaxx sampongrpiangw, qnialo dac-cid-dac-veh, cid denx veh dyw. Majiuw, ciax laii dyrr kiw. Qaur qaxx buew jam hro unwjiangr dua :ee qnuaw lyc ciax, jiacc jaix h.-hunrdun-d. hit m driyc hiongr.

Quer cialo kir dngdanw qang jit lo ee qongciax. Qaur cur, siyjiuw trer iauxx bue jiaujngg, ciuw e junr, bagjiux kiw en’ng, syxsikangx kacc anxjnuaw dy’ duir be junw. Ciavnuaa jit kunr, zip laii qaur cur lairdew, knuar diyc pongwiw dyrr sniu beh trex. Bagjiupuee dang qaxx, jit hunjingx kacc kniax dyrr binn .kir. Juiwcnew, txangx-gua amwox, sinkux-dingw qex jit niaw jnitanw.

“Ehng’amr jiac sniaw?” Bagjiux vreh iauxx bue jiauu qimx, jiahvng ee dairjir mng qinw qinw.

“Jarhngx jit quaw cunx vng, guaw diongdaur qra vuu jniaw muee junw dxngr. Jinw iauxx cunx vnuar dniaw, tng hro siyx dyrr tingwhyw jiac.” Cuwlairlangg qongw.

“Tacc e jiacc jiap decc jiac muee?” Jiac jiuw :ee qig jit xee hiabhiamm ee binrsig.

“Jit lexvair siongrr qex nng dxngr suah, si decc zuarr jiap?” Cuwlairlangg hunhue. “Liw diongdaur jiacc jiac hixjiuw, hongkongwlow, hibah-b. Amr dxngr jiac kacc cringx lehh, qamxx byy kacc hyw?”

Jiac jiuw :ee byy ue hyw duc, pni-aw bongx lehh siw cuir.

Amxmuee beh tng kuair kuair ar. Tualorvow ven ven. Daurluw, amquex-aw, qapp jniuwqniux, quanwtauu qycc gneh dyrr u. Qiamm ac’nng kar .jit .liap. Jitt snax hxang laii dyrr jiokk u qiamsiamx. Mirtix qapp bacsox qah lecc puer. Jit dyh sir~go hxang cair, longxx mrbenw kixdang diyc dniaxjaur.

“Linw qniaw u qongw dangsii beh dngw .laii bor?”Jiac jiuw :ee mng, muee naxx vex.

“Byy.”

“Beh qui’ qywguec byy knuar qnir langg! Si decc vnir sniaw bangw?”

Cuwlairlangg byy inwsniax.

Jiac jiuw :ee hingr tic. Ervox qang dyh :ee, ix sui’ xee aw pinxpingg, pah diamxsor. Qongw kiw diyc jre siy’ qecviah kacc nguar qaur hitt xee, tamluanrsiauw, amrqunxqinx jiauu puu puu .cud .laii.

“Qongw qaxx bersux ix longxx byy supenx zuarr u qongdy lehh. Hitt kox bacqenw vacbinrvah qapp jabow :ee decc draur. Ix liahjunw langg’longxx knuar m cud!”

Cuwlairlangg iuguann qig diam diam, id genn vnuar qxur dy’ byy.

“Ix jid’err laii jre diamr guaw vnix:a, guaw dyrr cuiliau jitt vuah :ee digduanr m si sniaxmih kuanw dingxsiklangg.” Jiac jiuw :ee qongw iauxx byy qauwkuir. “Iarr u langg vran hixsu longxx byy singx dnaxtingr, tiab-aw jiacc laii luanrjap vangr. U qraur suex siauu! Angvaulew lanw iarr byy viw langg’ kacc ser vaux, suacc diyhh qapp jitt hy kuanw kasaux jre dauwdin!”

“Linw haursnix qapp jit xee jabow dongcongx decc dauwdin.” Quw quw byy cud sniax, cuwlairlangg au’imx jiokk dimm.

“Dnaxx liw si decc qongw sniaw? Guaw tniax longxx byy!” Jiac jiuw :ee ciux crangr bak qangr.

“Linw haursnix iwair buw :ee, byy air qangx :ee. Anne tniax u bor?” Cuwlairlangg vangr sniax.

“Liw tacc e jaix? Ix qra liw qongw :ee?”

Jiac jiuw :ee iaxx u gignaiw. Cuwlairlangg dimr tauu, byy genn byy qxur.

“Junw junw dirr guarkauw qaux diyc pnaiw ving’iuw. Liw dyrr beh hro vnuax cud kir druar. Ix tak genxqiuwsow jinwjingg druar cur nirr dy’ longxx byy qyc’ngiu!” Jiac jiuw :ee tikme cuwlairlangg.

“Hex si liw gamrbak berhiangw knuar. Ix tak dairhak ee sii, qisit dyrr u huatjig.” Cuwlairlangg unn unn aw qongw kiw. “Iarr m jaix ix lunw zuarr quw ar. Guaw kir laur ix qongw. Ix jit sniax dyrr jiauzin, longxx byy muakamr.”

Jiac jiuw :ee bin-aw cnex sunxsunw, cuir-aw bih bih, diyc ix dner diam diam.

Cuwlairlangg uermngg jid’err kuix, byy-qimr-byy-ki, siaur diauu aw qongw kiw. “Ix qniax dycc jit qangx hro liw huatqenr diyc sniaxmih pnirbagpang kiw gisimx, mrjiacc lib’ir beh vnuax cud kir druar. Ix byy air liw jaix, jaiwsnax qiyr guaw cenban m tangx qra liw qongw. Jitt jann si naxx jit liap jiyhtauu kngr dirr guaw simtauu. Liw uana ix ee laurve, liw iarr diyhh draur jerdnax.”

“Liw qongw :ee byy cyr. Guaw beh laii cue siongrr quan’uix ee isingx, it'ir beh qra ix ee vne idi hro uanjuann.” Jiac jiuw :ee qongw diyc jamxjec.

“Liw si decc sniu sniaxhuer? Jnaixngiu qra linw qniaw knuar jyr vnerlangg?” Cuwlairlangg qongw qaxx duarbuw sniax. “Lenrr lanw jyr sirdua :ee dy’ m liongrjingg, ix cud siarhue e qyckacc pnaiw kiarkiw!”

“Dyrr si rair hro ix jaiqiyh qongxx ix si decc huan jiongww og. Liw sniu byy jinx, nngxciuw qra am’ngaa, uadziaxx e hai diyc ix.”

“Liw pacqec dac jiacc gne, qamxx m qniax ix sniurduanxqenr?”

“Cri qaxx jitt hy vutsiaur qniaxzii, guaw jiacc diyhh laii siw siw lehh, kacc benw lecc siawvai verqongx.”

Jiac jiuw :ee sraiw kiarbak, qongw qaxx qargee-cetciw. Cuwlairlangg auqngw dni, bagkox cilunr damm bagqnii.

5. bongdng’iam

Mibuew aw, tnix iauxx bue qngx, qelo jing jiaucjiah. Qiuwhorciax ee cialee benw dua sniax. Dngxuad rair qiamxsog dujairgua, cni’angdingx u naxx byy. Jidlo duiwdit liuliux kir, qinw qinw ar dyrr qaur iquanw.

Jiamx hueh, giam ziy, jiyr ciauimpyx, byy qaxx jit hxang lakqaux. Ciavnuaa jit linr dngw, zidqiuu pak kacngx.

“Bongdng’iam, rair jiksii ciuxsut.” Isingx qanxdanx qongw.

“Ciuxsut? E guihiamw .be?” Javolangg mng qaxx jiokk cnijinx.

“Ciuxsut rair jur basia, byy vauniaw e jingsinn. Mrjiacc diyh’air linw ciamx qamguanrzi inxdamr jiacc u kuiciuw.”

Isingx ee sniasaur lingxvingx-v., tniax ee langg sniaw kuanw simjingg qaxnaxx iarr byy decc ciuwcaiw.

“Liw qnaxx huanrjiaw ee hniaqyx hnor? Diyhh singx kir duartniax ee lenqui vran zip ngi ciuxsiok.”

Horsu qaudair dairjir, lingxdam ee textair ham’ isingx byy juac. Bagkox ox ox, erdauxciux vuh quixnarr qix .cud .laii, javolangg dimr tauu suecsia, byy-guan.-byy-kir.

Dnaxjinw si snax~nng qxur junw .quer. Rair siaw rair tnrix :ee dyrr diamw diamw qimx, byy decc qoxqanw. Qandna’ jit xee miaa dyrr siaw siongrr byy snax vaiw.

Ciuxsiok vran suah qnuaw .dngw .laii, vut’ir, puawvnirlangg vingww dirr ciuxsudvangg ar, qongxx si isingx duxhyw u ingg.

“Vnerngi berdangr jiac hrunx. Beh jiac, kir guarkauw jiac.”

Vniawsaur ee a’sangw decc lux tokax, lux qaur der knuar .diyc sui’ qra huacme. Hrunx berjingrr diamw, javolangg qinw ciuw qra pniax zip kir vunwsywlangg, m qnaw qycc vog.

Ciuw iab au, dirr hangrlo ongxhuee suaw kavo. Liamrtauu suacc tapkax diddit laii.

“Qamxx e ciuxsut vairvanw, jurr anne byy qycc jingsinn?” Huanlyw qaxx ui qiongrbeh qiuwqinx.

“Vngrngi narr liamdongsii beh ham’ cinlangg sionggi, lanw qamxx erdangr juxdit’ir?”

Jit xee simqnuax v.-vexjig-j. Sniu laii kir dryr qiongrbeh vxag puar. Uadnaxx sniu, uadnaxx m driyc. Hongwdnaw denrue qra kar. Kacc benw jit diamxjingx, huanrjiaw jniawvan ee cinsiok qnuaw qauwui.

“M hyw qycc tuatic ar! Dairjir qniaa qaur jiax laii, quatduanr rair hro guanw a’ii inx jaix.” Viauxjew sraiw bagqag, sutdit qongw.

“Ix langg jitt diap dirr ciuxsuddaii. Lanw duarjuxir jit sniax tywdit qongw qongw .cud .kir. Inx sirduarlangg beh narr berdangr sna’ guanjingg, jurr anne buxaxqniaw-jxingg quatjuat, lanw qamxx duir ix e quer?” Javolangg mng, bagbaitauu pacqad.

“Linw qamxx be jurr tauu qaur buew dyrr huanlyw quewqongr?” Viauxjew qongw. “Guanw siyxdi dyrr si lamluw-air. Guanw longxx suijai ix, jit qxur dy’ byy qongw .anxjnuaw.”

“Qiamxcaiw linw daux kacc kaitongx. Inx dua hanr laurbuw jib sixvanw, duiww qniaxzii jiokk giamgaii, singwde qycc baiw. Jex liw viw guaw kacc jaix.”

“Suacc berhiangw singx an’ guanw a’ii hiax he gxiyy?” Viauxjew sniu vorsor.

“Guaw qapp linw viauxsiyxmue ee dairjir, guanw ser hanr laurve suha qra guanw dua hanr laurve sueh tauwqix. Guanw dua hanr laurve hunlii aw dy’ byy liongrjingg, suar qiyr guaw diyhh kir cue sensnix idi. Ix qycc ciangwsniax, qongxx guaw narr byy qapp linw viauxsiyxmue cew liauw li, aurquer byy beh zin guaw jitt xee haursnix.” Javolangg tauu damr damr, bin-aw amr amr.

“Guaw ter linw am’oo, u si jidsii. Ngx ngx iab iab, kacc anxjnuaw dy’ be diaudit lar.”

Viauxjew hyw genn hyw giw qycjaiww qra quexkngr. Javolangg dimr tauu.

Nng diamxjingx siab siab, ciuxsudvangg ee mngg kuix .kuix. Bongdngg jiacc ho’nggg taiquah driau :ee basia bue trer, iauxx m jaix langg. Vutziqyr, tauu jiww buew sngr u sunrsi zibqiok.

“Vnerlangg duxx ciuxsut liauw, sindew kacc hix, diyhh zip qaho vnervangg iongxjing, jit vaiw qandna’ iong’unw jit xee qasiok zip kir qra knuawvne.“

U singg decc vuerliam ceh, horsu qaudair dairjir jiokk sunrliur, longxx byy tiauwjiamx.

Viauxjew ham’ javolangg duiwbin kia. Liw knuar guaw, guaw knuar liw. It’au, byy sriok qaicinx :ee qiukax lunxciuw.

“Guaw dngw laii kuanw quaw iauwing :ee. Tauwjaw jre qiuwhorciax laii, c.-cneqongg-q., sniaxmih dy’ byy jah.”

Uat dngw srinx vangr vo qniaa, javolangg qinxqniux lyc lautuix, vangr liulongg kir cing’ingg.

6. genxqiuwsingx

Jre denrciax narr u xui, juceh vitdnia tec cud laii qeqiamw knuar. Knuar quw, bagjiux e siab, taukag e pilyy. Siarhuerhak ee genxqiuwsingx, cam’ langg u dirdai :ee, dagg hxang sing'ir. Cecvunw jiamrsii hongwha, dnax tauu quanknuar langjingr, kiarr vnuar ingqanr, vnuar jyr genxqiur. Cuahqag jit duir siauwlenn lamluw ciuw kanx ciuw, qringx duw qringx diam diam kia lehh, longxx byy qongxue. Diwqag diyc bagjiux dingr dirr hitt soxjai u kacc quw, taujingg qapp vnix:a :ee soksog giyw .jit .xe. Crenx duiww crenx, tanxcuahjua jit xee javolangg kiaukax dnir kenciyr, marr m jaix jimjiog ix zuarr quw ar. M qnaw qycc luanrsuw siongr. Jit xee simqnuax zuu cakcag. Ngar tauu dngw laii knuar ceh kacc unxsun.

Dingxdauwvvox qux diamr dirr isingquanw vuepnua viauxsiyxmue. Gorsii-buew, dah qongciax vniar kir haghau jimr dirr dosuquanw ee tagcectniax nng~snax diamxjingx, mngxvox ee kywtingg auxbann aw gnerdauw. Damwsinn damwsinn. Suisinx ee vyhhyvingx jitt sii dng’ hyw ing. Tauhiac puee puee aw tuiquih .jit .xe. Siongrkyr ducqux si e pnaiw sewbin. Tauwjaw tnisig barburqngx dyrr cutmngg. Snax ox sir amr dngw qaur cur, jiacc beh cuann tuiwngua ee cingkir snxax sew sinkux, siyxdi laii longr mngg.

“Guaw qinaxzit kir inw taulo ee sii sriu tauqelangg buxlong. Liw qamxx u qauwsiu iacc juanbunqax tangx cingxmng, knuar diyhh ing ludhuad dycc jit diauu qra hitt xee asapuxluw :ee zip sowjng?”

Siyxdi hranw did cue langg’ gimxgi iacc tyw qiuwvingx. Juanqangx laii kuix cuir, dairjir dingrquix be ser diauu. Sew sinkux jitt jann anwha, cingkir snxax ban aw si tec .cud .laii. Jyr langg’ duarjiw :ee qra snaaxduu ee mngg sag uaw .kir.

“Si sniaxmih kuanw taulo? Langg’ anxjnuaw qra liw buxlong?” Genxqiuwsingx mng, uanxzenn qauwsiu ee kuiwkauw.

“U jit qingx inwvanxdiamr dah qywvec beh cue jauw guarkauw :ee. Guaw kiaa guaw hitt daii go-jap aw jair Siaurcii beh dngw .kir ee lo nirr ngiaw .diyc dyrr zip kir beh inw. Inx jniawtauu dyrr mng guaw qamxx u jiac dok ee anwdew, suar qiyr guaw rair singx kir dua qingx i’ngi giam knuar u uer diyc pnaixqniaxjingr bor. Guaw mng qongxx jyr snuaxqangx sngr diamxjingx :ee qamxx iarr diyhh jiacc qanghux? Suacc rinr qongxx qangbuxduir :ee kacc diyhh quewdiuu. Liw tangx qra tniax lecc quiw qxur?” Siyxdi naxx qongw naxx angrsniax.

“Liw cua jabow-ving’iuw jywhuew kir INTERVIEW?”

Duarjew mng. Siyxdi dimr tauu.

“Inx qamxx u anwsngr beh caixiong :liw?”

“Dniardiyc si byy a! Jex iarr suacc diyhh mng?” Siyxdi huacsniax. “Inx byy air cniar lamluw-luann :ee m qnaw duiwjiab qongw, kiw nuatauu beh qra guaw diaux qoxdongw. Ciuxlo jiacc cox. Cinwcaiw langg marr knuar u.”

“Liw pacsngr beh anxjnuaw?”

“Zip dnriaa qra inx qryr a.” Siyxdi duiwcuir rinr. “Ludling vec juaw ox zri siaw qaxx bingg duw bingg, qongxx ingwbo langg simx diyhh vingxjingr, duarser bak u pen'ir sen’ m tangx. Narr byy sanwsimx jit vaiw qra inx qar quaix, vadd zit aw m jaix beh qycc u zuarr je sriu hai?”

“Liw beh qniaa huatlut?”

Siyxdi qycjaiww dimr tauu.

“Jitt jann beh qui’ee quewqib vadd langg, vin’ simx qongw, u kacc vutdit.” Jyr langg’ a’jew :ee kuitiah. “Dongqisii, liw narr danzinn-dogbew, jabow-ving’iuw mair cua .kir, jiaxee jap-jap-veh-veh :ee vyh qnaxx longxx be huatsingx?”

“Jitmaw si anxjnuaw? Liw huanxdngw decc jikvi guaw, m?” Siyxdi venr hongbin.

“Siarhue dyguann, langg vah kuanw cxenx ngiu. Beh anzenn kiarkiw, qokk langg diyhh jaix jinwter, banrhang singx ioksog qaqi.”

“Sngr qongxx guaw si hairtangg, pnaixtangcir, vorvinn ziaw kangx kiw surduanx dy' driyc lar!” Siydi qui’ee bin cad .kiw .laii.

“Mrbenw qongw qaxx jiacc qiamm! Qikkir be qaixquad did dairjir.”

“Lunxkir qamxx dyrr erdangr?”

Id laii id ongw, duarjew siyxdi jnewcuir jnewjc. Qongcinx qiongrbeh venr surjuw. Nihuer kacc je :ee niu siyxdi lamw xe iyx.

“Guaw u sigsai :ee decc jyr ludsux. Guaw jiacc laii qra cingxqaur, knuar diyhh jnuaxngiu cuxdir kacc suwsi.”

“Benw lar.” Siyxdi jit sniax qra huee driau. “Inx hiaxee venrhorsu si byy kxiw how, juann qnir jnii siw. Guaw laii bangrlo-dingw mng bangriuw kacc taulo dit.”

Siyxdi uad lehh cud .kir. Genxqiuwsingx jre diamr bincngg-qnii sim jit vox quw, sniu jitt qnia, liam hitt hxang, dogdok be qir did rair sew sinkux.

7. alubaido

Luxhingsia iacc kechangg, jyr qapp iulamw cittyy u qanquer :ee, Cid~Veh-guec si dua guec. Singliw qa'iac, qowkeh lentac laii. Kaciuw byy jiokgiac. Cue hiyczuac ee hagsingx-ginxaw jyr dew qangx laii alubaido. Tauqex sinlyy siangx vingg tanr, diamwkeh marr cingwir.

Sniaa-lai jit qingx dua qingx vngrdiamr kranx qongxqyr beh cniar vangcex. A’di aw pah dua mngg kuix dua hxo, resume binrdingw q.-qongzenn-z. juwbingg “u jit xee qau’ongw nng nii ee jabow-ving’iuw.”

“Beh, laii; m, tair.”

Qacc u juxsimdnia, huan hongx huan ho dyrr kacc m qniax. Inw taulo ee puex qiar .cud .kir, qecdngw qangx jaixkiw dyrr u denrue laii. Singquanw zinsu :ee iog ix erdauwvox kir vngrdiamr benrdamm.

“Juxjiac, uersingx si derr id iauwhang. Qingliw qaur obasang, byy hunx duarser hanr, muixx jit xee longxx rair jyr sintew qiamjax.”

Buibak, pnirdyx qiamr qiamr, kicqauqud giaa giaa, duiwbin jre :ee sniasaur vnii pypyx, tauu jiww buew, binrcniux byy uadkuanw. A’di aw qra cuann ven ven ee qiamxjax vywqywsux kngr diamr vanrqongdyh-aw-dingw. Byy derr zi qxur, a’di aw jniurcuw.

Cid diamw vnuar jniurqangx. A’di aw kiaa odobai, dagg qangx jaixkiw cid diamw quer dyrr qauwui. Bagjiux tenw dua luiw decc knuar, hnirkangx vniar kangx kangx decc tniax, kaciuw liamjiap qycc kiauw qud, jycsid u liac diyc buxbak. Vnivnii siqanx, a’di aw kangkuer jyr langg’ ee dingvue je.

“Linw sirduarlangg longxx juxliw-qib :ee. Jiauwgiac, cur nirr byy kiamwing jiacc driyc. Liw jiacc vniawsir, qaqi u sniaw qewik, si bor?” Dingxsix jin’ hnowhenn.

“Guaw tak luxsia-quanxliw. Dairhak jutgiap anwsngr dyrr jyr jitt dxoo. Tranr hiyczuac singx laii qenwsip. Jyr zuxx je, yc zuxx je. U hyw byy baiw.”

Dingxsix dimr tauu qiamx viw duarbuxongx.

Cego snruar qangjnii. Dingrgiac guehsinx jiauu niaw qaxx diyc, qaikunn-jiongxqimx jit-cingx kox jairgua, qongsix qex hro a’di aw cingx-go jyr sniuxqimx.

Hnuahiw qaxx be qongw .did, a’di aw kar denrue iog jabow-ving’iuw cud laii beh kingwjiog.

“Bunbingg jitt qingx ee tngtauu vutjiw aw janw, jiokk jnia’ cnexcuir qycc lirvii. Danrgai, rair kaix dua vah jiacc jiac e kiw.” Jabow-ving’iuw hyw ir qra diamxdnaw.

“Hongwsimx lar. Qinaxzit jnijuiw jin’ liongrsing. Qewsiaur jitt jann benw kuawhuann.”

A’di aw jiokk iangkir, jabow-ving’iuw ee ciuw kanx lehh, duarvaii-duarpiyr qniaa zip kir cantniax.

“Sensnix siyxjiaw beh air jiac sniaw? U mi u vng. Sui’ langg jit nguaw tngx. Kuivii-siyxcair u sir sig, suijai qingw jit cud, menu dingxquann u.”

Hogbursingx hyw ciywsinn, qongxue sokdo liyc aw u kacc qinw. Zit .sii dirr vngrdiamr qra langg’ tinn dee, sangr osiboli, amwhunx-sii laii jiax sriu cik'ingr, a’di aw jidsii m jurzuu suacc kiw kongsinn.

“Eer, liw beh jiac sniaw ? Langg’ decc mng liw.”

Tniax diyc jabow-ving’iuw ee qongxue-sniax, a’di aw ee sinhunn lenmisii vuex dngw laii vunxui. Caiwdnuax binrdingw ee siongwpnir, dagg hxang dy’ hyw jiac kuanw. A’di aw qapp jabow-ving’iuw qongw tonghyy, sui’ langg diamw byy qangg, sii qaur jiacc laii dauxngua.

“Liw aurviah hitt xee siyxjiaxlangg, liw iyh ix si jniawqingx iacc penvangg?” Jidbin danw vngrdngr, jabow-ving’iuw siwqer siongr, ciuw viw vyr a’di aw knuar.

“A’niaa uer! Hitt xee dyrr guanw jongxqingliw!” A’di aw knuar qaxx cuir kuix hna hna, byy knuar jniw :ee huanxdngw jimjiog lau :ee.

“Liw si qongxx vec taumngg hitt xee si linw vngrdiamr ee jongxqingliw?! Acc qapp ix jre dauwdin :ee qamxx inx qelai?” Jitt sniax, jabow-ving’iuw qyckacc hnowqii.

“Guanw jongxqingliw u jit xee sir huer jaboxsunx, sngr jyr maw ar. Ix vnix:a hitt xee, lenmau qigqik zi-jap tongw, tangx jyr inx jaboxqniaw qycc u cunx.”

“Vutsuxquiw. Jiac jiacc lau ar, qycc decc vnir jitt cud.”

Uertauu dnaxx jiacc la kiw, jauw dyh :ee qra vngrcair pangg .laii. Kaiqangw qex-bi-qex-sor, liaurliw hyw jiac pnaiw jiac byy qangai, jit duir siauwlenqex jre siy' duiwsiongr, jiac vng puer ue qig kuehaii.