Daigiw Siuiongw Qongxue

(Jit-vah-kxongr-lak) Uxdiu ee jinliw lanw anwjnuaw knuar be did diyc

Cincniu tnide ee dua dyrliw, uxdiu ee jinliw, jex beh qongw, qongw be cingcyw, beh siaw, siaw be jiauu liauw. Soxiw Sikkiax taubuew sir-jap-qauw nii ee diongqanx, cutgua siwqer kir vowqaur, qaur buew ix qaqi qongw, guaw qongw byy jit qxur driyc. Cincniu senjongx, ix byy ing vudqingx lip qxaur, ix ing ixx simx tuann simx ee huatdo, jiong’ vudsimx tuann hro jingwlangg, qongw hitt xee vudsimx, diyrr si uxdiu ee jinliw, tnide ee dyrliw. Diyrr si vudsimx, beh jiong’ hitt xee dyrliw tuann hro jingwlangg ee simlai, m si dui’ guarbin ing huatdo qra ix tuann :ee, si jurr qokk langg qaqi liauxgno, diyrr si qaqi kir cue hitt xee dua dyrliw, qaqi kir hiauxgno jiacc hyw. Air beh did jitt xee dyrliw, diyh’air knuar bxan but, giac tauu knuar tensiong, ngar tauu cad derliw, bagjiux soxx knuar :ee, hnirkangx soxx tniax :ee, byy jit xee byy m si vudsimx ee huathen, diyrr si uxdiu ee jinliw. Soxiw jiauw-aw decc hauw ee sniax, tangtua decc hauw ee sniax, qeww iarr si jitt xee tuann simx ee iwsur soxx huathen .cud .laii .ee. Cincniu cnix, angg, ngg, vec, vah kuanw ee huex, ixqip cnicuir ee cauw-aw, iarr longxx si jit xee uxdiu ee dua bunjniux. Decc huathen tnide ee dyrliw, tnideqanx bxan hxang mic, bingg bingg viauxsi hitt xee jinliw jairr lanw bagjiux-jingg, lanw anwjnuaw knuar be diyc, anwjnuaw be hiauxdid? Si in’ui u hex bongrsiongw iogsimx trad druar dirr simqnuax nirr jiacc e anxnix. Huansewqanx tagceh bingliw ee langg, ingqaix diyhh jiong’ qaqi tagceh soxx yc diyc tenqix tauwted, simde linglongw, knuar diyc bxan mic, longxx u hitt xee huersimx ee soxjai, jiong’ hex kir qar vadd langg jiacc hyw.

(Jit-vah-kxongr-cid) Beh congr qonggiap ee viwquad

Beh congr surgiap, jongw diyh’air jabhunx qingxqair, jabhunx jimjiog. Jongw si jit bin diyhh kacc duardnaw, narr sniu liauw anxnix driyc, diyrr m tangx diuduu, jid’err diyrr kir juer, diyrr si simqnuax diyhh cincniu tnix hiacc dua, cinciu haiw hiacc kuah, m tangx kujib siyxkuaw su, vutsii qamxqag diyc jit jiongw siausaw ee cuwbi jiacc hyw. Setsuw narr si sniu’ quer giamjingr, longxx berhiauw did tangx juanxvenr, beh juer dairjir, longxx jiauww quiqiw, ing jxinn ing ciyh, suix jit cunr jit hunx, dy’ bersaiw did ciaucud huanruii gua. Narr si hitt kuanw, diyrr cincniu ciutnix sathuat ee krir, e jiong’ bxan hxang mic hro ix dax .kir, qetqiok longxx be sxingg su. Narr si sniu beh congr qewser-lirbinn(qiuwjer sewqanx lirig vecsnir) ee qonggiap, diyrr ingqaix diyhh u cincniu cuntnix unhyy ee krir, e jiong’ bxan hxang mic hro ix huatsingx hro ix iongxsingg jiacc hyw. Jongw .zii genn .ji’, diyhh jabhunx jai’ngiaw cunsingx ciusad ee tenliw, ing laii juer singqongx ee viwquad.

(Jit-vah-kxongr-veh) Jinjniar ee bunjniux qapp imgak

Langlangg ee simqnuax vunxlaii u jit vxo jinjniar ee bunjniux dilehh, narr erhiauw did tangx tak jitt xee jinx bunjniux, dyrliw diyrr jurzenn e did .diyc, hyvid diyhh kir tak vadd langg soxx juer ee bunjniux. Kyxsiyh, jitt xee jinx bunjniux e hro qoxjaw ee ceh suar qra ix hrongx diauu .did. Iurr cincniu langlangg ee simqnuax, vunxdew u jit hxnag jinjniar ee imgak dilehh, narr erhiauw tangx tniax jitt xee jinx imgak, lanw ee simsingr diyrr jurzenn e hxyy, hyvid diyhh kir tniax vadd langg enxjaur ee imgak. Kyxsiyh, jitt xee hyw imgak iarr hro siok quax siok bruw luan .kir. Soxiw juer hagjiaw ee langg, m tangx hro guarbin ee mic iuxhik, ingwqaix diyhh jiong’ hitt xee pnaiw mic qra ix vaiduu, itdit kir cue vunxlaii qaqi soxu ee jinx bunjniux, jinx imgak, jiacc u tangx did diyc hitt xee qik biau ee soxjai, hro lanw u loring.

(Jit-vah-kxongr-qauw) Diyhh qaixngua jitt snax hxang

Sywsingr ee langg, ix ee singr cincniu huew, gu diyc dairjir diyrr voghuad, byy jit hxang byy siyx, uree siyx qaxx suacc oiuw .kir. Qnuaxunx ee langg, ix ee simqnuax cincniu juiw, gu diyc dairjir diyrr rimx but, byy jit hxang byy hro ix lingw. Iaxx arr jippiah ee langg, gu diyc dairjir diyrr qowjip qaqi ee iwqenr, longxx be tangx iong .did. Siogguw qongw gni caa pah gni jner, qonghog hunxsu, diyrr si jitt kuanw langg. Jiauww tauduxaw soxx qongw sywsingr :ee, qnuaxunx :ee, jippiah :ee jitt snax kuanw ee langg, berdid tangx hiablik dongsimx, jyrsingg surgiap, jiong’ hitt xee hingrhog lauu hro au dai ee langg. Langg narr u jitt kuanw ee pnaiw piah, diyhh qinw huanxsingw jiamrjiam qaixngua jiacc hyw.

(Vah-jap) Qongxue juewsu jongw diyhh qinxsin

Lanw qongw liauw jap qxur, suizenn si qauw qxur driyc, mrquxx sewqanx ee langg, lanw qongw driyc :ee inx knuar juer vingsiongg, byy qra lanw ylyw, dendyww jiong’ hitt qxur qongw m driyc :ee kiyh .kiw .laii jikvi. Iaxx arr beh congr dairjir, qewue liauw jap hxang, qidiongx u qauw hxang singqongx, iarr byy langg qongw hitt xee qonglyy qruix lanw jit xee, dendyww jiong’ hitt xee byy singqongx hitt hxang kiyh kiw laii qongw, qra lanw suansiauu. Soxiw qunjuw ee langg, suizenn ix ee hagbun, ix ee diwsig, jabhunx ciongmuaw, iarr m kingw suiven kuix cuir qongxue. Hex si qniax liauw qongw kacc kuair, sidhingg kacc yh. Iaxx juer dairjir vutsii kiamsunr, m kingw cud hongtauu, denw ix ee vunxsu, hex si qniax liauw dairjir juer liauw u tauu byy buew. Soxiw qunjuw ee langg, beh qongw jit qxur ue, beh congr jit hxang dairjir, jabhunx jimjiog jiacc qongw jiacc juer.

(Jit-vah-jap-id) Zinqanx u nng diauu lo

E hac tenliw, hitt diauu lo jin’ kuacdua. Lanw narr sniu duiww hitt diauu kir, lanw ee simqnuax diyrr kuikuah, jin’ cingsongw, jinwcuw ee iongxkir diyrr cud .laii. H.-hnuahiw-h. ee diongqanx congr dairjir, dairjir dniardiyc e kuair singqongx, iurr qniaa hitt diauu tenliw ee lo nirr kir diyrr jin’ unxdangr, iaxx longxx byy jit diamw aw guihiamw. Iaxx narr si duiww ziniok ee lo kir, jinjniar guihiamw. In’ui si hitt diauu ziniok ee lo ser diauu qycc ec, zicniaw siangx vingg u cauxaxciwpiw, narr liyc liyc aw kap .diyc diyrr e diyhsiongx, zuxx qniaa zuxx pnaiw. U soxjai juann juann si tomuee, narr jid’err vuac lyc kir hitt lairbin, jinr vutjinr, trer vutter, qetqiok ham lyc jinwter-liongxlann ee koxqingw. Soxiw langlangg diyhh jaix jitt xee zinqanx u jitt tenliw qapp ziniok jitt nng diauu lo, diyhh duiww hitt diauu tenliw ee lo kir qniaa jiacc hyw.

(Jit-vah-jap-zi) Bingli cam’ kikkir

Lanw langg narr u bingli ee liamrtauu dilehh, suizenn knuawkinx onghoo huwquir ee derui, qamguan druar qanglangg vinjen ee derui, mrquxx hex si viaxbin-siong niarnia. Hitt xee langg ee simqnualai iuguann u onghoo huwquir dilehh, be ciautuad dinbongw. Jitt kuanw ee langg bersaiw did qongw si jinjniar iuxdy ee qunjuw. Iaxx arr lanw langg diyh’air u jit xee jingwkir. Setsuw narr byy jitt xee jingwkir, diyrr jurzenn e hro kikkir cimzip ix ee sinkux-lai. Suizenn ix congr jit xee dua surgiap, hitt xee qonglyy jidsii qniadang tnikae, qetqiok si byy loring hro au dai ee langg knuar liauw byy qawdit, byy langg ylyw ix ee qonggiap, dendyww qongqig ix ing vawsut laii hai ongdy.

(Jit-vah-jap-snax) Hingrhog qapp jaie

Langg soxx qongw hitt xee hingrhog, lanw suizenn air beh did .diyc iarr berdangr did .diyc. Lanw ee simqnuax longxx byy sniu pnaiw, vutsii hro ix cingsongw kuaiwlok decc quer zit, lanw diyrr mrbenw kir qriuu hingrhog, hitt xee hingrhog qaqi e laii. Huanrr hitt xee jaie, suizenn sniu beh siamxvi m hro ix laii, iarr berdid jiauww anxnix. Jongw si lanw narr jiong’ beh kiakangx .langg, beh diaulann .langg, beh hamrhai .langg, beh uanongw .langg, ongxkud langg, jautad .langg, kiaukow .langg, hitt kuanw ee simqnuax longxjongw druu hro byy .kir, longxx byy sniu pnaiw, simqnuax vutsii cingsongw, tangx lirkuix jitt xee jaie. Druu kiw jitt xee huatdo ixgua, dy’ iarr byy vadd mic honghuad. Jongw si suizenn did diyc hingrhog, iarr birvid tangx hnuahiw. Suizenn gu diyc jaie, iarr birvid tangx vi’aix. Vutsii qinxsin qingxqair dihongg, iaxx arr jidbin simqnuax vangr hro kuix, vutsii cingsongw si si derr id hyw.

(Jit-vah-jap-sir) Quxdngg ee hingrhog cam’ jinx ee diwsig

Hiauhing did .diyc ee hingrhog, hiauhing did .diyc ee singqongx, jitt kuanw longxx byy quxdngg. Qingquer quixnarr nii, qanlann sinkow jiacc did .diyc ee hingrhog, did .diyc ee singqongx, jitt kuanw jiacc e quxdngg. Si in’ui hiauhing did .diyc ee singqongx, narr jid’err gu diyc qankow, diyrr suisii siamxjaur. Hitt xee hingrhog diyrr e byy .kir. Tak quiw vunw aw jrux, did .diyc ee diwsig si jidsii :ee, qra langg’ jiyh :ee siangg kuanw, m si qaqi soxx u ee jinx diwsig. Tak jujuw-vikqax, knuar hitt xee jongjiw, ursii sinr, ursii gii, sniu laii sniu kir, zen’au did .diyc ee diwsig, jex jiacc si qaqi ee, m si qra langg’ jiyh :ee, si jinx :ee, m si qew :ee. Soxiw lanw langg diyhh jaix jingtauu soxx qongw ee dyrliw, m tangx sniu beh hiauhing singqongx, hiauhing hingrhog. Iarr m tangx sniu tak quiw vunw ceh diyrr qaqi qikkuir, qongw ix si hagjiaw. Jongw diyh’air siu’iongw did diyc sidjai ee kuiwlat qapp quxdngg ee hingrhog jiacc hyw.

(Jit-vah-jap-go) Tnix e dendyr inghiongg

Tnix ee iwsur jin’ ywbiau, hro langg’ sniu be diyc. Vixlun ue laii qongw, duiww hitt xee langg diarsingx apjer, hro ix qankow, qaur lorbuew jiacc beh hro ix knuiwuac, hro ix qongbingg-huwquir. Iaxx arr urdangsii aw kixtauu hro ix knuiwuac, lorbuew jiacc hro ix qankow, jex longxx si tnix juer dairjir dendyr inghiongg hyqed. Cincniu Hongsinn Siuwqed jurr jit xee vijen ee lojaii kiw, diddit cutsinx, qaur buew e var juhoo, jex diyrr si kixtauu apjer, aurbuew hro ix knuiwuac ee jit xee sidle lar. Iurr cincniu Napoleon juer hongder ciongwhingg tenha, qaur buew hro langg’ liac kir hitt xee buzinn dxyw suar siw .kir, m senrjiongx. Hex diyrr si dairsingx hro ix knuiwuac, qaur buew hro ix qankow jit xee ee sidle. Soxiw juer qunjuw ee langg, narr gu diyc ving’anx byy dairjir ee sijun, ixqingx erhiauw did tangx pacsngr qankow ee sii, tangx laii junxvi dihongg, longxx byy u kangpang, tnix iarr byy huatdo tangx qra ix dendyr.

(Jit-vah-jap-lak) Derr id kuaiwlok si simxmic

U langg did diyc hyw miasniax, hyw derui, hitt xee langg ee simqnuax, qyxzenn jin’ tangx hnuahiw, longxx byy jit diamw aw huanlyw iacc be. Guaw pacsngr linw vutsii simtauu decc huanlyw jiacc driyc. Linw huanlyw si simxmic neh? Diyrr si qniax liauw ix ee derui m jaix e hro langg’ duat .kir iacc be, iurr qniax liauw ix ee surgiap m jaix e sitvai iacc be, iurr qniax liauw ix ee jnijaii m jaix e hro langg’ cniuw .kir iacc be, huanlyw dangx huanlyw saix, simqnuax vutsii byy ingg ciccih. Iaxx arr cincniu druar dirr longcuanx jycsitlangg, tnix bue qngx diyrr kiw laii jycsid, jyh qaur zidtauu amr jiacc hiyckunr, qui’ zit byy ingg ciccih lryy qaxx vnuar siw. Mrquxx inx jiahcing ixgua longxx byy sniu vadd mic, longxx byy huanlyw, vutsii jiapqin tenzenqair ee surbut, kacc juriuu, kacc cinghog, sun tenzenn, dagg xee kacc dngg huewsiu. Inx ee kuaiwlok jiacc ersaiw did qongw jinjniar si kuaiwlok, vutviw u dua derui ee langg.

(Jit-vah-jap-cid) Juer pnaiw juer hyw diyhh jnaixngiu jiacc hyw

Qaqi u juer pnaiw dairjir, ix narr erhiauw did sniu huanlyw, qniax liauw langg’ jaix, hro langg pixvok, narr si jitt kuanw ee langg, iaxquxx u jit diamw aw liongsimx dilehh, u tangx ngwbang e quexvnir juer hyw. Iaxx narr si u juer pnaiw longxx m qniax langg’ jaix, m qniax langg pixvok, hitt kuanw ee langg ixqingx si liongsimx songwjin, dniardiyc be huanxhuew. Iaxx narr si u juer hyw su, air beh qnuaxqinw hro sewqanx ee langg jaix, sniu beh air hro langg’ ylyw, narr si hitt kuanw ee langg suizenn u juer hyw, mrquxx hitt lairdiongx u dongrvutdong diyhrr beh juer pnaiw ee liamrtauu dilehh. Soxiw juer pnaiw erhiauw tangx qinw huanxhuew juer hyw, byy dikkag air hro langg’ jaix, juewlangg ingqaix diyhh jitt kuanw jiacc hyw.

(Jit-vah-jap-veh) Gu diyc qankow iarr vutvid huanlyw

Langg gu diyc pnaiw un, diyrr dagg hxang dairjir longxx berdid tangx jiauww lanw ee iwguan, narr liyc liyc aw dinxdang, diyrr e koxtangr. Langg narr duirlyc jitt kuanw koxqingw ee sii, hitt xee huanqingw ee jailiau longxx si lanw ee iogsik. Lanw suizenn si qankow, mrquxx vutdix-vutqag ee diongqanx, ersaiw ing hex laii dri lanw ee sintew, buaa lanw ee pinxhing, qetnix lanw ee diwsig, anxnix huanxdngw u tangx did diyc huisiongg ee lirig. Langg narr gu diyc hyw un, cincniu sun hongx sraiw junn. Hitt kuanw ee sunrdiau, naxx cincniu tec jin’ je dycniux ee qesix, vaii druar dirr lanw ee sinvnix. Lanw narr byy urhongg byy jimjiog, diyrr e hro ix siongx .diyc. Soxiw lanw langg dirr sunrdiau dik’ir ee sii, diyh’air jaix tangx qingxqair. Qankow ee sii, diyhh tunlunw, zuxx uadd katkow siuhing jiacc hyw.

(Jit-vah-jap-qauw) Qadingg uanbuanw si jueww dua hingrhog

Lanw ee hingrhog suizenn u jin’ je kuanw, jongw si qidiongx derr id hingrhog, diyrr si lanw cur-lai ee langg, dagg xee longxx byy qex ue siy’ ma uanqex, h.-hnuahiw-h. erdid qeur zit. Jex jniar si dua hingrhog. Narr air beh jitt kuanw, lanw cur-lai ee langg suizenn u juer m driyc, u quewsid, iarr m tangx dua siurkir, dua sniax qra ix ma. Jongw si iarr m tangx byy qra ix ma, byy qra ix jikvi, quwjai hro ix kir juer pnaiw. Duiww sirser, ingwqaix qra ix qawsi diyhh qawsi. Duiww siwdua, ingwqaix rair juwir diyrr qra ix juwir. Jongw si m tangx sniu’ hiongg, sun sun aw qra ix qongw jiacc hyw. Narr m qnaw didjiab qra ix qongw ee dairjir, narr qongw vadd mic dairjir, duiww vnix:a unn unn aw qongw hro ix tniax. Qinaxzit qongw hro ix tniax, inx iaxquxx be hiauw .did ee sii, qycc quer quixnarr zit jiacqycc qra ix qongw. Qongxue diyhh unsun, cincniu cunhongx hyzit duiww hitt xee vingseh hro ix jiamrjiam sriaux .kir. Narr erdid tangx anxnix, ersaiw did qongxx bohuan ee qadingg lar. Lanw ee qadingg narr uanbuanw, qui’ qex ee langg dagg zit u tangx hnuahiw quer zit, anxnix sngr si derr id hingrhog lar.

(Jit-vah-zi-jap) Vingsor diyhh jabhunx ing simlik

Suizenn e vingw ciax ee og bew, narr si u langg qra ix hunwlen, diyrr e venr juer hyw bew, ersaiw did juriuu kiaa, juriuu pauw. Soxx qongw og bew og langg kiaa, diyrr si gauu hunwlen ee iwsur. Suizenn e jauxboo ee pnaiw tih, narr si gauu jur :ee diyrr longxx be jauw .cud .kir, erdid tangx jiauww hitt xee boo jur cud qokk jiongw ee kiwqu. Langg iarr si cincniu jitt kuanw. Hitt xee langg suizenn u pnaiw piah puawpah, narr u langg gauu qra ix jixdy, hro ix e hiauw did sniu hunwhuad siuiongw, qiuxjingr ix ee piacpnir, diyrr e vnir juer hyw langg. Jongw si ix narr be hiauw did tangx qakcniw, vindnua air cittyy, kangx kangx jiac vaw dro zit, diyrr qui’ siwlangg berdid cuttauu. Qoxjaw Bingdiauu ee dua hagjiaw Vik Sab Sensnix u qongw jit qxur “langg snisingg puawvni si be qenwsiaur”. Narr si qui’ siwlangg longxx byy jingsinn ee huanlyw, hex si vingsor byy ingrsimx ee jingwqur. Hitt kuanw ee langg jinjniar kyxlinn. Jitt qxur ue jinjniar byy cyr.