poxmngg pinw
Hitt sii, Iwjir Buqiongjin Posad an jyrui vreh kiw, jniawvingg qingqah teh teh, habjiongw hiongr Vuddyy mng qongxx, "Sewjunx, Quansewimx Posad inhyy hy juer Quansewimx?"
Vuddyy qra Iwjir Buqiongjin Posad qongw, "Senrlamjuw, narr u buliongrsor vaccingbanrig ee jiongwsingx jysiu diyc jiongxjiongw ee tongwkow qapp huanlyw, tniax diyc Quansewimx Posad, itsimx cinghox ix ee miaa. Quansewimx Posad jiksii e tniax diyc hex imsniax. Inx jinrqaix e did diyc qaixtuad.
Narr u langg cisuw cinghox Quansewimx Posad ee miaa, setsuw hamrzip dua huew, huew iarr siyx ix be diyc, in'ui u posad uilingg sinlik ee enqor. Narr hro dua juiw lrauu .kir, cinghox ix ee miahy, dyrr tangx qaur qaxx cenw ee soxjai.
Narr u vakcingbanrig ee jiongwsingx uirdiyhh beh qriuu qimx, ginn, liulii, ciaquu, bexlyw, san'oo, hoxpig, iacc jinjunx dingxdingw ee vyrvuer laii hamrzip duarhaiw. Qaxsuw junjiah huan diyc quixaxhongx, suar piauliuu duirlyc Rakshashas Qxuiw Qog. Qidiongx narr u simrjiww dna' jit langg cinghox Quansewimx Posad ee miaa :ee, hiaxee langg jinrqaix tangx an' Rakshasha ee jailan tuatlii .cud .laii. In'ui u jitt hy in'enn, mrjiacc qiyr juer Quansewimx.
Narr qycc u langg liamdongsii beh virr hai. U cinghox Quansewimx Posad ee miaa :ee, duiwhongx soxx giac ee dycniux iacc qunwduii e jit quec aw jit quec dng .kir. Ix dyrr tangx laii did diyc qaixtuad.
Narr snax-cingx daircenx qoktow hitt lairdew siwqer si Yaksha qapp Rakshasha jiaxee qxuiw beh laii ziauxhai langg. Tniax diyc u langg cinghox Quansewimx Posad ee miaa, jiaxee og qxuiw lenrr qorr og bak qra knuar dy' byy huatdo, hongwqiamx qra qahai.
Qycc setsuw u jit xee langg, bylun u jue iacc byy jue, sinkux virr iong syh-aw iacc kaqee qapp ciuxqee vak diauu lehh. Jid'err cinghox Quansewimx Posad ee miaa, hiaxee sokvak jinrqaix dng .kir, ix dyrr did diyc qaixtuad.
Narr snax-cingx daircenx qoktow lairdew jit siwqer u gigcat. U jit xee dua singlixlangg cuarniaw jit din quijah quiwdiong vyxbut ee singlixlangg qingquer jit diauu hiamw lo. Qidiongx u jit xee langg anne ciangr qongxx, 'Jiongww senrlamjuw, mrbenw qniahniaa. Linw ingdongx itsimx cinghox Quansewimx Posad ee miahy. Posad tangx qra byy kiongxuir ee simx vowsix hro jiongwsingx. Linw narr cinghox ix ee miaa, dyrr tangx an' jiaxee gigcat lairdew jauxtuad .cud .laii.'
Jiongww singlixlangg tniax .diyc, longxx cud sniax liam 'Namo Quansewimx Posad'. Cinghox ix ee miaa :ee jiksii did diyc qaixtuad.
Iwjir buqiongjin! Quansewimx Dua Posad ee uilingg sinlik dyrr cincniu jitt kuanw jiacnirr qongxdai.
Narr u jiongwsingx jing'iok kacc dang :ee, dniardnia cuir liam qycc qiongqingr Quansewimx Posad, ix dyrr tangx qapp iogbong li hng hng. Narr u kacc je uanwhun :ee, dniardnia cuir liam qycc qiongqingr Quansewimx Posad, ix dyrr tangx qapp uanwhun li hng hng. Narr u kacc cigaii :ee, dniardnia cuir liam qycc qiongqingr Quansewimx Posad, ix dyrr tangx qapp cigaii li hng hng.
Iwjir Buqiongjin! Quansewimx Posad u cincniu jitt kuanw jiacnirr qongxdai ee uilingg sinlik, duiww jerje longxx u vangjan. Mrjiacc jiongwsingx ingqaix suwsiongg dirr simlai liam ix ee miaa.
Narr u jaboxlangg qiubang beh snix javox, lexvair qapp qingsen Quansewimx Posad, ix dyrr e snix diyc u hokdig qiamx u diwhui ee javongix. Narr qiubang snix diyc jabow, ix dyrr e snix diyc siongwmau duanjniar ee jaboxngix. Ngix-aw jingg sxer u jingr dikhing ee qinx, jingwlangg longxx e qra tniawsiyh qycc junqingr.
Iwjir Buqiongjin! Quansewimx Posad dyrr si u jitt kuanw ee sinlik. Narr u jiongwsingx qiongqingr lexvair Quansewimx Posad, hokkir be vehvec liauw .kir. Mrjiacc jiongwsingx longxx ingqaix cisiuw Quansewimx Posad ee miahy.
Iwjir Buqiongjin! Narr u langg cisiuw lak-jap-zi-ig posad ee miaa, hex miaa ee sowliong dyrr cincniu Ganges Hyy ee suax hiacc je, qycc jin ix ee itsingx qiongqib imxsit, ihok, cngpox, qapp iiyc hro hiaxee posad. Liw sniu sniaw kuanw? Jitt hy senrlamjuw iacc senrluxjuw, inx ee qongdig u je bor?"
Iwjir Buqiongjin rinr qongxx, "Jiokk je, Sewjunx."
Vuddyy qongw, "Narr qycc u langg cisiuw Quansewimx Posad ee miahy, simrjiww dna' jidsii lexvair qapp qiong'ingr narnia, jitt nng jiongw langg ee hokvyr longxx vingdingw byy jingcax, vaccingbanrig qiab iarr sngr be liauxjin. Iwjir Buqiongjin! Cisiuw Quansewimx Posad miahy tangx did diyc cincniu jitt kuanw buliong buvenx ee hokdig qapp lirig."
Iwjir Buqiongjin Posad mng Vuddyy qongxx, "Sewjunx! Quansewimx Posad anxjnuaw dirr jitt xee Saha Sewqair iulik? Anxjnuaw uirr jiongwsingx qangxsuad vudhuad? Lirven ee sinlik qycc si sniaxmih kuanw?"
Vuddyy qra Iwjir Buqiongjin Posad qongw, "Narr u mow jit xee toktow ee jiongwsingx ingdongx siurr Vut laii ditdo :ee, Quansewimx Posad dyrr henr Vut ee sindniux laii qangxsuad vudhuad. Narr ingdongx siurr Pratyeka laii ditdo :ee, ix dyrr henr Pratyeka ee sindniux laii qangxsuad vudhuad. Narr ingdongx siurr Sniabunn laii ditdo :ee, ix dyrr henr Sniabunn ee sindniux laii qangxsuad vudhuad. Narr ingdongx siurr Brahma Ongg laii ditdo :ee, ix dyrr henr Brahma Ongg ee sindniux laii qangxsuad vudhuad.
Narr ingdongx siurr Shakra laii ditdo :ee, ix dyrr henr Shakra ee sindniux laii qangxsuad vudhuad. Narr ingdongx siurr Jurjai Tnisinn laii ditdo :ee, ix dyrr henr Jurjaii Tnisinn ee sindniux laii qangxsuad vudhuad. Narr ingdongx siurr Tnisinn Dua Jiongxqunx laii ditdo :ee, ix dyrr henr Tnisinn Dua Jiongqunx ee sindniux laii qangxsuad vudhuad. Narr ingdongx siurr Vaisravana laii ditdo :ee, ix dyrr henr Vaisravana ee sindniux laii qangxsuad vudhuad.
Narr ingdongx siurr siyw ongg laii ditdo :ee, ix dyrr henr siyw ongg ee sindniux laii qangxsuad vudhuad. Narr ingdongx siurr diongxjiaw laii ditdo :ee, ix dyrr henr diongxjiaw ee sindniux laii qangxsuad vudhuad. Narr ingdongx siurr qusu laii ditdo :ee, ix dyrr henr qusu ee sindniux laii qangxsuad vudhuad. Narr ingdongx siurr qnuatauu laii ditdo :ee, ix dyrr henr qnuatauu ee sindniux laii qangxsuad vudhuad.
Narr ingdongxx siurr Brahman laii ditdo :ee, ix dyrr henr Brahman ee sindniux laii qangxsuad vudhuad. Narr ingdongx siurr bikiu, bikiuni, lamqusu, iacc luxqusu laii ditdo :ee, ix dyrr henr bikiu, bikiuni, lamqusu, iacc luxqusu ee sindniux laii qangxsuad vudhuad. Narr ingdongx siurr diongxjiaw, qusu, qnuatauu, iacc Brahman jiaxee ee hurluw laii ditdo :ee, ix dyrr henr hurluw ee sindniux laii qangxsuad vudhuad.
Narr ingdongx siurr siauwlenlangg iacc siauwluw laii ditdo :ee, ix dyrr henr siauwlenlangg iacc siauwluw ee sindniux laii qangxsuad vudhuad. Narr ingdongx siurr tnisinn, lringg, yaksha, gandhava, asura, garuda, kinnara, mahoraga, langg, iacc huizinlui dingxdingw laii ditdo :ee, ix jinrqaix henr jiaxee sindniux laii qangxsuad vudhuad. Narr ingdongx siurr Giaa Qimqongx Sinn laii ditdo :ee, ix dyrr henr Giaa Qimqongx Sinn ee sindniux laii qangxsuad vudhuad.
Iwjir Buqiongjin! Jitt xee Quansewimx Posad singjiu jitt hy kuanw ee qongdig, iong qorr jiongxjiongw hingtew, iulik jerje qoktow laii dortuad jiongwsingx. Soxiw linw jiaxee ingdongx itsimx qiong'ingr Quansewimx Posad. Jitt xee Quansewimx Dua Posad dirr kiongxhongg iacc qiplann ee sii e sisiar byy qniahniaa hro jiongwsingx. Soxiw jitt xee Saha sewqair dyrr longxx qra qiyr juer Byy Qniahniaa :ee."
Iwjir Buqiongjin Posad qra Vuddyy qongw, "Sewjunx! Guaw dnaxx ingdongx qiong'ingr Quansewimx Posad."
Ix dyrr qra amrqunw ee jerje juvyw qapp judui vrag .lyc .laii, longxjongw qewdat vaccingx niuw qimx. Ix qongw, "Zinjuu :ee ar, cniaw jiapsiu jiaxee uirr hxuad ee qiongqib, cniaw jiapsiu jiaxee dinvyw judui."
Hitt sii Quansewimx Posad m kingw jiapsiu. Iwjir Buqiongjin qycc hiongr Quansewimx Posad qongw, "Zinjuu :ee ar! Cniaw linbinw guanw jiaxee, jiapsiu jiaxee judui."
Hitt jun Vuddyy qra Quansewimx Posad qongw, "Qaidongx linbinw Iwjir Buqiongjin Posad qapp jingwderjuw, tnisinn, lringg, yaksha, gandharva, asura, garuda, kinnara, mohoraga, langg, ixqip huizinlui dingxdingw jiaxee laii jiapsiu jitt xee judui."
Hitt dangjun Quansewimx Posad u linbinw jingwderjuw qapp tnisinn, lringg, langg, ixqip huizinlui dingxdingw jiaxee, dyrr jiapsiu hitt xee judui, suar qra hunx juer nng hxun. Jit hxun hongrhenr hro Sakiamuni Vut, jit hxun hongrhenr hro Je Vut Vyxtah.
"Iwjir Buqiongjin! Quansewimx Posad u jitt hy kuanw jurjai ee sinlik dirr Saha Sewqair iulik."
Hitt sii, Iwjir Buqiongjin Posad iong siqur mng qongxx,
"Qibiau siongrtew jiauvi ee Sewjunx
guaw dnaxx qycjaiww mng kiw
Vut ee juxde u sniaw inenn
tangx virr qiyr juer Quansewimx?"
Qibiau siongwtew jiauvi ee Sewjunx huedab Iwjir Buqiongjin iong siqur,
"Guaw qongw hro liw tniax quanhe Quanimx ee sowhingg
Ix gauu ingwsiser dirr siwhngx qokk soxjai
Dua sewguan cimx naxx haiw
Qinglik quer ee qiapsor vutsugi
Hogsai quer cing'ig xui vut
Huad dua cingjing guan
Guaw uirr liw qanxliok qangxsuad
Tniax diyc ix iacc knuar diyc ix
Dirr simlai liam ix ee miaa byy qnaiwdng
Tangx bet soxu ee kow
Qaxsuw u langg hingx kiw hai langg ee liamrtauu
Jiong' liw sag lyc dua huexknex
Simlai liam Quanimx hitt xee lat
Diwsuw huexknex e vniwjniaa juixdii
Iacc dirr duarhaiw piauliuu
Lringg, dua hii, qapp jerje qxuiw laii beh uilann
Simlai liam Quanimx hitt xee lat
Diwsuw pylong berdangr qra liw tunjiac
Iacc dirr Sumeru Snuax ee snuadingw
Hro langg' sag .lyc .kir
Simlai liam Quanimx hitt xee lat
Diwsuw e cincniu zidtauu dirr kongdiongx diamr lehh be duirlyc
Iacc virr og langg duizib
Vuac lyc Vajra Qimqongx Snuax
Simlai liam Quanimx hitt xee lat
Diwsuw jit qix mox dy' be sunxhai
Iacc duw diyc caddongw vauuii
Qokk langg giac dyx beh qahai
Simlai liam Quanimx hitt xee lat
Diwsuw inx sui' langg longxx kiw jusimx
Iacc jysiu qok'ongg ee koxcow
Siurr dohingg decbeh siurjiongx
Simlai liam Quanimx hitt xee lat
Diwsuw dyx jit quec aw jit quec dng .kir
Iacc virr siuqimr vak diauu lehh
Kax qapp ciuw u kaliauu ciuxkaur
Simlai liam Quanimx hitt xee lat
Diwsuw syxlen lag .kir did diyc qaixtuad
U jiuwjow qapp jerje dog'iyc
Soxx beh laii hai liw ee sniwmia
Simlai liam Quanimx hitt xee lat
Diwsuw denwdyww hai diyc ix vunxlangg
Iacc duw diyc siaog ee Rakshasha
Qapp dok lringg ixqip jerje qxuiw dingxdingw
Simlai liam Quanimx hitt xee lat
Diwsuw inx liammisii longxx m qnaw laii qahai
Narr virr hiong'og ee bingxsiur vauuii
Inx ee kaziauw jin' lrai jin' tangx qniax
Simlai liam Quanimx hitt xee lat
Diwsuw inx sogsok jauw kir qaur buvenx ee uanxhongx
Bongxjuaa qapp getaxtangg
Inx ee dogkir naxx iam huew decc dyc
Simlai liam Quanimx hitt xee lat
Diwsuw inx tniax diyc sniax e trer dywdngw .kir
Duw diyc amr hunn, luii dann, siccuah
Lyc pauc iacc lyc dua ho
Simlai liam Quanimx hitt xee lat
Diwsuw vyrhong'uw jiksii siausnuar .kir
Jiongwsingx u jiongxjiongw ee kunwlann qapp jaieh
Virr buliong ee tongwkow soxx apvig
Quan'imx bibiau u diwhui ee lat
Tangx qiuwjo sewqanx ee kunwkow
Sintongx ee lat jiokgiac qycc jiauvi
Duarsiwqer siulen diwhui qapp hongvenrhuad
Sibhongx soxu ee qoktow
Ix byy jit xui byy kir
Jiongxjiongw og ee kiwlo
Dergak, qxuiw, jingsnix
Snix, lau, vni, siw jiaxee kow
Ix e suxx inx longxx jiamrjiam bet .kir
Ix u jinsit ee quancad, cingjing ee quancad
Qapp qongxkuah diwhui ee quancad
Qycc u visimx ee quancad qapp jusimx ee quancad
Diyhh suwsiongg qra jiokguan qapp qingwuir
Ix byy uwuer u cingjing ee qngx
Diwhui ee zit ciongpuar soxu ee oamr
Tangx hanghok hongx qapp huew ee jailan
Cingbingg ee qngx poxpenr jiyr dirr sewqanx
Cisiuw qaiwlut u linbinxsimx ee giogtew bersux luiqongx dinxdang
Ju'air ee sim'ir naxx hunn hiacc bibiau
Lyc naxx qamlo hitt kuanw jingwhuad ee ho
Dubet jiongwsingx huanlyw ee huexiam
Siy' jner siy' qryr ee soxjai
Iacc jenwdin diongqanx ee kiongxhongg qapp qniahniaa
Simlai liam Quanimx hitt xee lat
Diwsuw jingwlangg ee uanwngor longxx tewsnuar
U bixbiau sniaimx ee Quansewimx
Ix ee sniax naxx laujuiw
Viw sewqanx zimrhyy sniax longxx kacc hyw tniax
Soxiw diyhh suwsiongg uadliam ix ee miaa
Dagg vaiw liam longxx m tangx u giga
Quansewimx jitt xui cingjing ee singwjiaw
Dirr koxnauw iacc duw diyc sixbongg ee jaieh
Tangx junw juer uaxhnua
Itcer qongdig jiauvi
Ix iong juvix ee bagjiux knuar jiongwsingx
Hokkir jurjib naxx haiw hitt kuanw ee buliong
Soxiw ingqaix qra qnialew"
Hitt sijun Qowsiuw Toxde Posad an' jyrui vreh kiw, qniaa hiongr jingg duiww Vuddyy qongw, "Sewjunx, narr u jiongwsingx tniax diyc Quansewimx Posad Pinw laii jaiqiyh ix jurjai ee qonggiap, jaix ix duiww tong' tenha kuix mngg denxhen cud sintongx ee lat, qaidongx jaix jitt xee langg qongdig be jiyw."
Vuddyy qangxsuad jitt vxo Poxmngg Pinw ee sii, jingwlangg lairdew veh-bxan sir-cingx xee jiongwsingx jinrqaix huatguan beh jingwgiam diyc jniawsiong Anuttara-samyak-sambodhi.