Boxdanx Dinglangw

Lu Juxbingg huanik

Derr id

Agiuara Sinzaburo hro druar dirr sniuvangg ee Tomozo jiyx kir Iokokaua diyr hii. Hex si Go-guec cex ee dairjir. Mrqycc ix duiww diyr hii si jit diamw aw cuwbi dy’ byy, ix dyrr qra quanr-aw-lai ee siyjiuw itdit limx. Sinzaburo beh cud laii jitt jua lo si u guaninx :ee.

Guanlaii qycc kacc jaw quixlyhh qywguec jingg, ix cam’ isinglangg Iamamoto Sijio dangjee kir hongqingw kux Kameido knuar muihuex. Beh dngw .laii ee sii, siqanx dy’ iauxx jaw, Sijio qongxx sunrlo beh kir knuar ix jit xee vingiuw, miaa qiyr jyr Ijima Eizaemon, si jit xee buxsu. Eizaemon dirr Iokokaua u jit qingx vedjongx.

Sijio laii qra knuar, Eizaemon dongzenn jin’ hnuahiw. Ix u jit xee dogsingluw, miaa qiyr Ojuiu, snex jyr jiokk aiwqiaux ee mongiu.

Jurr jitt vaiw knuar muihuex, sunrsuar jiyh hitt xee qienn sigsai Ojuiu liauxau, Sinzaburo mee qapp zit dy’ decc sniu Ojuiu ee hingngiaw. Ix qaqi qycc m qnaw kir cue Ojuiu, soxiw vutquanw sii dyrr decc danw Sijio laii, tangx dangjee kir hitt qingx vedjongx. Jitt jua Tomozo jiyx diyr hii marr hyw, suibongxx m si didjiab kir hitt qingx vedjongx, siongrr jiyw marr erdangr dirr guarkauw knuar.

Hitt jaixkiw, inx dyrr dirr Kanda Siohei Qiyy hiax cniar jit jiah junn-aw laii qaur Iokokaua. Bibii aw hongx cuex .laii, liuxciu-kax liangg liangg, nng langg jin’ cingsongw, jit xee dyrr kaisiw diyr hii, jit xee limx jiuw.

Byy zuarr quw, Sinzaburo dyrr juir bongg bongg, kaisiw kunr. Hongx naxx cuex, siqanx quer .kir marr longxx m jaix. Sinzaburo itdit longxx byy jingsinn.

Zidtauu liyc aw beh ciaa saix, u damrvyc aw lianglingw ir. Tomozo cud sniax qra qiyr, ”Siauwiaa, siyw kiw .laii .jit .xe, qycc kunr e qamw .diyc.”

Sinzaburo bagjiux tiw qimx, knuar anww hnua-vnix .kir, u knuar diyc nng renn livax-cniuu cam’ jit xee siyw mngg, hex kaksit si Ijima Qrax ee vedjongx byy m driyc.

Sinzaburo jitt sii langg jingsinn longxx laii, qongw,

”Tomozo, dirr jiax siyw kyr hnua .jit .xe, guaw beh kir hiax.”

Junn kyr hnua hyxser, ix dyrr vreh .kiw .kir, knuar junw lorhiangr, duiww siyw mngg hitt vingg tauu itdit qniaa .kir, sniu qongxx dirr siyw mngg guarkauw siamx .jit .xe dyrr hyw. Nacc jaix qniaa uaw .kir, jiacc jaix siyw mngg byy qnuaix. Ix dunwdnex .jit .xe, sniu beh huee tauu, mrqycc iauxx si jin’ bongxdongw, dua dnaw qra qniaa .zip .kir.

Inui bad laii .quer, lorcauw liyc aw sik, ix en’ diyc ciacsiongg jaijingr ee jnuajuixqaux naxx qniaa naxx knuar, byy zuarr quw, laii qaur jit qingx siapdiap suwsi, u sir der tatami hiacc dua ee vangqingx-kauw, knuar diyc bangxdar dinx .lyc .laii ee bincngg-vnix, Ojuiu jre dirr hiax, binrsig si vec siwsiag.

Sinzaburo liamx kax neh vo qniaa uaw .laii, qra juaxmngg giuw kuix. Ojuiu dnax tauu knuar duiww jitt vingg laii, bagjiux sui’ venr jyr uac lingwlingr .kiw .laii.

“Sinzaburo Qxunx, liw laii ar?”

Ojuiu inui jiokk quw longxx decc suliam Sinzaburo, langg suacc venr qaxx sen sen byy jingsinn. Jitt jun knuar diyc Sinzaburo, jit sii suacc be qir did viwsur, jin’ dairhongx qniaa laii javolangg ee singkux-vnix, qra ix ee ciuw kanx lehh zip kir bangxdar-lai.

Ojuiu dyrr itdit vingw ar vingw, m jaix decc ciaucue sniaxmic, byy zuarr quw, dirr bincngg-vnix tec cud jit xee drew enjix juixhunw ee pang’ap-aw laii.

“Jex si a’niaa lauu hro guaw jyr uiqir, guaw jiokk dinsiyh ee pang’ap-aw, dnaxx sangr hro :liw, liw narr knuar diyc jex dyrr naxx knuar diyc guaw qangrkuanw.”

Ojuiu qongw uann, dyrr qra pang’ap-aw dux qaur Sinzaburo bin-jingg. Hex si jit xee snriux diyc ciutnix tangtua huecauw, sikdir hunbingg, jin’ suiw ee ap-aw.

Sinzaburao jrih quer ciuw, simqnuatauu jit jun ee unluanw, duxx beh qra quar pah kuix laii knuar, jitt sii u langg hionghiongg qra juaxmngg giuw kuix qniaa .zip .laii, jniar si Ojuiu ee hurcinx, buxsu Eizaemon. Ojuiu qapp Sinzaburo qniax jit xe tiaur .kiw .laii. Buxsu ciuw tec dinglangw, dux qaur nng langg bin taujingg.

Ix dairsingx duiww qaqi ee jaboxqniaw qongw,

“Ojuiu, liw quer laii jitt vingg.”

Suar .lyc dyrr qapp Sinzaburo bin duiww bin siy’ siongr.

“Liw si dycc jit xee?” buxsu kuiwkauw jin’ uigiamm.

Sinzaburo singkux kurku junx, sintew qiongrbeh qiux jyr jit uann.

“Siyw:ee si Agiuara Sinzaburo, jin’ bongxdongw laii qaur jiax. Pnaixser.”

Eizaemon krir cuahcuac, ciux cangr bak qangr, knuar duiww Ojuiu hiax kir,

“Qycc anxjnuaw qongw, liw marr si buxsu ee jaboxqniaw, cinwcaiw cua javolangg laii vangqingx, singg sniaw kuanw! Narr hro sewqanlangg jaix, qongxx Ijima ee qahongx byy giamm, miasniax pah pnaiw, siah joxsenx ee texben, vuthaur, vutgi, vutsiaur ee qniaxsunx. Guaw dnaxx beh qra liw taii .siw, liw qakgo .laii!”

Sinzaburo hiongr jingg dac jit vo qongw,

“Danw .jit .xe, siyxjiaw byy jit diamw aw cacyr. Beh cuxhuat, liw dyrr cuxhuat siyw :ee!”

Jitt sii, Ojuiu qinw jriab lecc qongw,

“M si, m si, si guaw m driyc. Cuxhuat guaw!”

Knuar diyc Ojuiu anxnex decc uiho Sinzaburo, Eizaemon be kamx did sniurkir, jitt sii dyx ixqingx vuec .cud .laii ar, ix jin’ duar sniax qongw,

“Nng xee longxx qangrkuanw vutgi ji’ jue! Guaw singx cuxhuat qaqi ee luxzii, jiacc qycc laii siusip :liw!”

Naxx qongw ue ee sijun, jit dyx ixqingx duiww Ojuiu ee amrqunw hionghiongg pud .kir, Ojuiu jit liap Simata hxingg ee taukag dyrr anww tokax qy .kir.

Sinzaburo qniax jit xe, langg hiongr vnix:a kix .kir, mrqycc dyx-buew qewsiok pud uiww ix ee cuiwpew laii, cuiwpew qaur erhaii qui’ee tniar .kiw .laii!

Sinzaburo aix jit sniax jin’ dua sniax, Tomozo qinw qniaa uaw kir ix ee singkux-vnix,

“Siauwiaa, Siauwiaa, liw si jyr diyc sniaxmih og bang? Huah qaxx hiacnirr dua sniax? Mair hro guanw ter siauwiaa liw huanlyw!”

Sinzaburo hro Tomozo cud lat qra iyy jingsinn .kiw .laii. Bagjiux tiw dua luiw, siwqer knuar knuar, jin’ cneqongg qongw,

“Tomozo, guaw ee tauu qamx u lag .kir?”

“Hex or, guaw knuar .jit .xe, dagg vxenr guaw dirr junn-vnix kar hunsaiw ee sii, hunqongw-tauu dniardnia longxx e lag lyc kir juiw-drew.”

“M si lar, guaw si qongw, guaw ee langtauu lar, u sionghunn bor?”

“Liw ee langtauu hyw hyw dirr liw ee amrqunw dingxquann, nacc u sniaxmih sionghunn?”

Ue qongw qaur jiax, nng langg dyrr diam .lyc .laii. Sinzaburo byy simjingg qycc iusniuw, dyrr cuix junn qinw kuix dngw .kir.

Vreh jnriu hnua ee sii, Tomozo qra Sinzaburo qongw,

“Siauwiaa, liw u mihqnia lag .lyc .laii.”

Tomozo kiyh .kiw .laii qaux hro Sinzaburo, guanlaii si hitt xee pang’ap-aw.

Derr Zi

Siqanx si Ulanpunn Jed, Veh-guec jap-snax, amwsii tauu aw. Sinzaburo qra jewvair-vnxee mihqnia longxx cuann hyxser, naxx jewvair, naxx qra votuann vaii dirr gimjnii-kax, bangxaxhunx diamw dyc, cimcauw hxingg ee kuesnir naxx et naxx qnuaw bangw. Ix jitt jun jre dirr votuann, limx dee, sniuw guec, sniu kiw byy zuarr quw ee dairjir.

Dingw qywguec, jiokk quw byy siy’ cue ee isinglangg Sijio laii cur nirr qongw kiw, dingw vaiw dirr Iokokaua vedjongx qnir bin sigsai ee Ojuiu, inui mee qapp zit longxx decc suliam Sinzaburo, suacc laii puawvne siw .kir. Tniax diyc jex, Sinzaburo qankow jiokk quw ee siqanx. Ix qra Ojuiu ee miaa siaw dirr vangx-aw-dingw, cai kiw kir vuddnuaa, dagg qangx siongrqingx huehiongr, jin’ utjud decc quer zidjiw.

Ingamr Ulanpunn Jed, suibongxx si qapp jingww langg qangrkuanw jewvair, mrqycc itdit sniu :ee iauxx si Ojuiu. Siqanx dy’ jin’ amr ar, cunx Sinzaburo jit langg dirr bongg bongg guehsig erbin limx dee.

Hionghiongg dirr ciurjangg livax ee guarkauw, u tniax diyc kok kok kok ee caqiac-sniax. Sinzaburo byy dniudii qra bagjiux giyw duiww hiax kir, knuar diyc jit xee taumngg kox jyr ngivnuaa hxingg, vnuawlyxlau ee jaboxlangg, ciuw tec jit xee ziauqingw, juaxbin, ciuxqangx iuwlo, sikcaiw senxiam, sudongsii siongrr siqniaa ee boxdanx dinglangw, naxx qniaa naxx uaw .laii.

Ix aurviah duer jit xee jaboxginxaw, taumngg srex jyr bunqimx Takasimata hxingg, ciuw tec jit qix Qniadox hongqeh, dingxquann rue diyc pusewhue ee ngii hxingg snir-aw. Ix srinx cing ciucauw sig niw ee hyhok. Jap-cid~veh huer cuttauu ee niqiw. Kiyh siyw qxingw ee snaqix-buew si iong amwangg sig ee qyqib diuduan jyr ee. Bibii aw hongx cuex .laii, snaqix-buew dyrr hnair .jit .xe hnair .jit .xee, hro langg longxx knuar qaxx bangg .kir.

Sinzaburo qamxqag hitt xee siauwluw jin’ binrsik, inui iauxx qycc li jiokk hng, dyrr diam diam aw knuar. Quer .jit .dah .quw .aw, Sinzaburo quikir qniaa uaw laii livax vnix:a neh quann, taur quer amwdam ee guehqngx knuar kacc jinx. Jitt sii, qniaa taujingg, tec dinglangw ee jaboxlangg kavo tingg dirr livax-gua, knuar diyc livax-lai ee langg, qongw,

“Oox, liw si Agiuara Qongjuw?”

Sinzaburo marr knuar cringx ar, Ix si Ijima Qrax ee qanxvi Oione. Qinw qiyr,

“Ar, liw si Oione, linw nacc e laii qaur jiax lehh?”

Sinzaburo si an’ Sijio hiax tniax qongxx siyxjiaw Ojuiu siw byy zuarr quw, qanxvi Oione marr laii siw .kir, mrjiacc anxnex mng. Ix sui’ sniu hex si Sijio qongw m driyc .kir.

Dnaxx knuar diyc inx nng langg kia dirr livax guarkauw siy’ duiwbin qongw ue jin’ sitlew,

“Cniaw qinw zip .laii, an’ taujingg hiax juaxmngg giuw kuix zip .laii.”

Qanxvi Oione dairsingx zip .laii, duer aurviah ee siauwluw jniar si siyxjiaw Ojuiu.

Oione singx qongw ue,

“Qapp gunw sniu :ee longxx byy qang, gunw si tniax qongxx qongjuw liw ixqingx laii quewongw ar.”

Jitt sii Sinzaburo qra ix an’ Sijio hiax tniax .laii ee dairjir qongw .cud .laii. Oione qongw, ”Liw kir hro Sijio penr .kir ar.”

Qycc laii, Oione ue dyrr ban ban aw qongw. Oione qra inx nng langg nacc e laii jiax ee qingquer qongw tauwvec. Hex si mow jit qangx, Eizaemon ee jit xee ceciab, hy jyr Okuni, kipenr Ojuiu qongxx Sinzaburo ixqingx siw ar. Ojuiu siongsinr ix ee ue, dyrr beh cutqex jyr niqox. Okuni qongw mrbew jingwqingx cutqex, simlai u hitt xee iwguan dyrr hyw. Dairjir jit sii byy simsig, iurqycc jit jann laii. Jitt vaiw ngua lauriaa beh qra Ojuiu jiyx angx puer sair. Ojuiu anxjnuaw dy’ m dapingr, bruw qaur lorbuew, verqniaw cincniu snehunrlangg.

Jinw siyxjiaw cam’ qanxvi nng langg dirr snuaqog-diongx jit xee miaa qiyr Misakimura hiax jit qingx puar cur jiyh druar, Oione qeqiamw jyr quaw jiamjiw ciuxqangx, hyw-pnaiw jongw si anxnex decc dro zit.

Oione qycc qongw, Ojuiu duiww diyc Agiuara Qxunx ee suliam si jiokk minua, dagg qangx dy’ liam vut, siongrqingx huehiongr. Qinaxzit si Ulanpunn Jed, siyxjiaw qanxvi nng langg siwqer camvair sinvut, diwsuw jiacc amr iauxx bue dngw .kir.

Tniax qaur jiax, Sinzaburo jaingiaw Ojuiu ving’anx byy dairjir, langg jin’ hnuahiw. Ix qongw,

“Anxnex jin’ hyw, guaw jiax marr qangrkuanw, qra siyxjiaw ee miaa siaw dirr vaii-aw-dingw, muixx zit liam vut huehiongr.”

Jriab .lyc, Oione qongw,

“Liw qacc si qacir gunw siyxjiaw qaur jitt kuanw dervo,”

Oione liac Ojuiu knuar .jit .xe, dyrr qycc qongw .lyc .kir,

“Gunw siyxjiaw viauxsi ix dyrr junw qongxx beh qapp hurcinx duanrjuat quanhe iacc si ho’ngg jam tauu, marr beh jiapsiu Agiuara Qxunx liw ee jingir. Dnaxx dy’ jiacc amr ar, liw erdangr lauu gunw druar jit mee bor?”

Jex jniar si Sinzaburo ngwbang ee dairjir, mrqycc sniuvangg lingrgua iauxx u druar jit xee lyxjiaw, hy jyr Hakuoudodo Iusai, decc qa’ngg vokquar qiamx knuar binrsiongr jyr qanqiw, suwsiongg laii Sinzaburo jiax pywdau, qamxqair. Sinzaburo u sii hiamm ix jin’ jabcab, lysyx. Qapp Ojuiu ee dairjir narr hro jaix dyrr jin’ byy hyw.

Sinzaburo qongw,

”Taujingg u jit xee langg jin’ jabcab, siangrr hyw mair hro jaix. Cniaw linw an’ aurviah zip .laii.”

Oione dyrr cuix q.-qiuniuw-n., iauxx qycc decc dunwdnex ee Ojuiu an’ aurviah zip .kir. Jitt jit amr siyxjiaw qanxvi dyrr anxnex lauu lyc laii quer jit mee. Qecdngw qangx tnix iauxx bue qngx, nng langg dyrr diam diam aw lirkuix .kir.

Jurr hitt qangx kiw, Ojuiu muixx amr longxx laii Sinzaburo ee cur nirr quer mee. Qaur qaxx derr cid qangx ee vnuar xia, druar dirr sniuvangg ee Tomozo dagg amr dy’ tniax diyc Sinzaburo cur nirr u langg qongw ue ee sniax, sniu qongxx jin’ qiquair, Sinzaburo si qapp si’angw decc qongw ue? Ix hnowhenn beh jaix jit xee dexdir, dyrr laii qaur Sinzaburo vangqingx guarkauw, an’ jahhorvangx ee kangpang, tauu kix kix siamx .kir, bangxdar-lai pox jit niaw siangx langg kuah ee cauxciyc, Sinzaburo qapp jit xee jaboxginxaw jre dirr hiax.

Tomozo tiw dua bagjiux knuar, tniax diyc jaboxginxaw qongw,

“Agiuara Qxunx, guaw narr qapp gunw qahu duanrjuat quanhe, quaw cam’ Oione nng langg, ngwbang liw dyrr rair qra gunw siuliuu or.”

Sinzaburo sui’ rinr qongxx, “Hex si dongzenn. Liw narr ho’ngg duanrjuat quanhe, guaw dendyww hnuahiw, mrqycc liw si dogsingluw, si mrbenw huanlyw ho’ngg duanrjuat quanhe. Narr qaur aurvaiw, mair qra lanw qiongg beh tiah hunkuix, guaw dyrr si jit xee jiokk hingrhog ee langg, qycc kacc qankow guaw marr qamguan.”

Jitt sii hitt xee jaboxginxaw qycc qongw,

“Hnuaidit guaw dyrr zinrding liw si guaw ee angsair, junw qongxx hurcinx beh qra guaw jam tauu, guaw marr byy iauwqinw. Mrqycc liw narr venwquar, qra gunw hiaux .kir, gunw si byy rair or.”

Tniax diyc jaboxginxaw qongw qaxx jiacc qauwqag, Tomozo dyrr beh jaingiaw jitt xee jaboxginxaw si snex jyr sniaxmih kuanw mongiu. Tauu kix kix knuar be jinx, ix dyrr amrqunw crunx dngg, jahhorvangx vuew kacc dua pang lehh, ix knuar diyc sniaw?

Hitt xee taumngg srex jyr Simata hxingg ee jaboxginxaw jurr iyvo kaisiw, xe vnuar srinx si qngcingx tauwbingg ee, singkux qanda’ puee vaux qud, snruar pongxpongw ee vinwmngg dah dirr cnevec sig ee binrmau dingw. Ix crunx cud nng qix ciuxqud, jitt nng qix ciuxqud cincniu dalenx .kir ee cauex, sikdir naxx vehsig ee lahjig, kinx kinx aw kox dirr Sinzaburo ee amrqunw. M jaix qycc decc qongw sniaw.

Jitt sii hitt xee taumngg srex jyr ngivnuaa-hxingg, vnuawlyxlau ee qanxvi kia .kiw .laii, xe vnuar srinx qangrkuanw si qngcingx tauwbingg :ee.

Tomozo knuar qaur jiax, bagjiux qui’ee oamwhinn .kiw .laii, langg dywsiangwhniar, hunrdyw beh vnuar xee sisinn.

Derr snax

Tomozo kurku junx dngw qaur cur. Bagjiux jit kreh, sui’ sniu diyc hitt nng xee jabow ee hingngiaw, qui’ mee byy kunr, tnix bue qngx dyrr jauw laii Hakuoudodo Iusai jiax, qra iauxx decc kunr ee lyxjiaw caw .kiw .laii,

“Sensnix, Agiuara Qongjuw dairjir giamdiong ar!”

Lyxjiaw iong lyy lyy ee sniax qra rinr,

“Si sniamih dairjir hioh?”

Tomozo iauxx qycc decc kurku junx, qongw,

“M si guaw air qinxdniux, air huanlyw. Qongjuw inx cur muixx amr longxx u jaboxginxaw laii siy’ cue quer mee!”

Iusai rinr ix qongxx,

“Siauwlenn dogsinx ee lamjuw soxjai u jabow laii siy’ cue, jitt kuanw dairjir, liw decc qinxdniux sniaw? Hitt xee jabow si tohuiw cadaxtauu hioh?”

Tomozo jit sii dua jic qongw be cringx,

“M si hitt xee iwsur lar,….”

Ix qra jaramr knuar .diyc .ee longxx qongw hro Iusai tniax.

Iusai jitt sii sniaimx vangr qe qongw,

“Jitt jann dairjir m hyw hro vadd langg jaix.”

Lyxjiaw jitt sii quaiw-aw tuh lehh, cam’ Tomozo dangjee duiww Sinzaburo ee cur laii.

Sinzaburo knuar diyc inx tauwjaw dyrr jywhuew laii siy’ cue, muaw bin giaugii. Iusai qongxx beh ter Sinzaburo knuar binrsiongr, ix an’ qxui-lai zimm jit xee hamwqniar .cud .laii, qra Sinzaburo ee bin jniar ciuw vingg knuar, dyr ciuw vingg knuar, qongw,

“Agiuara Qxunx, jiauww liw ee binrsiongr laii knuar, qycc mrbenw zi-jap qangx, liw itding siw.”

Sinzaburo qui’ee langg longxx gang .kir, qongw,

“A ar, guaw…”

Lyxjiaw qycc qongw jit vxenr,

“Itding siw, byy huatdo.”

Sinzaburo qinw qycc mng qamxx byy benw siw ee honghuad?

Lyxjiaw jitt sii iauxx beh qra diaux, qongw,

“U si u, qniax liw jyr be qaur.”

Sinzaburo simtauu jit qib, sui’ qongw,

“Si sniaxmih honghaud qinw qra guaw qongw, guaw itding jyr qaur.”

Lyxjiaw jitt sii jiacc qongw,

“Liw rair dairsingx qra muixx amr laii cue :liw ee jabow vrag lirkuix, mair qycc hro ix laii cue :liw. Cunx :ee dyrr byy vanrhuad lor.”

Sinzaburo jitt sii iauxx sniu beh hunhue, ix sniu qongxx Ojuiu ee dairjir langg’ longxx m jaix, dyrr qongw,

“Byy a, nacc u sniaxmih jabow laii siy’ cue ee dairjir?”

Lyxjiaw ue qycc vig ann .laii,

“Anxnex liw dyrr byy lauxsit ar. Jaramr dyrr u langg knuar .diyc, liw iauxx beh unxmuaa? Hitt xee jabow dauwdew si si’angw?”

Sinzaburo jaingiaw dairjir berdangr qycc amkamr, dyrr qongw,

“Ix si Guhix derkux hiax, jit xee buxsu miaa qiyr Ijima Eizaemon ee jaboxqniaw lar. Guanvunw guaw liaurqiyr ix ixqingx siw ar, jit tniax ix qongw, jiacc jaix m si anxnex, dairjir iauxx u jit qnrua, jitt jun ix cam’ qanxvi Oione nng langg druar dirr snuaqog-diongx jit xee Misakimura ee soxjai. Guaw sniu qycc benw zuarr quw, guaw dyrr beh qra ix crua jyr boxqniaw.”

Lyxjiaw Iusai jit sii kuiwkauw byy hyw .kiw .laii, qongw,

“Jinjinx ovec laii! Ix si jit xee quixhunn neh! Dandanx sniu qongxx ix si siw .kir ee langg, liw dyrr berdangr qycc jinr jit vo jyr sniaxmih dairjir, nacc e qongxx beh crua ix jyr boxqniaw?”

Mrqycc Sinzaburo iuguann m siongsinr. Iusai bagjiux byy dngxlunn, gingg diyc Sinzaburo, jin’ dingxjinx qra qongw,

“Narr iauxx m siongsinr, Agiuara Qxunx, guaw mng :liw, hitt xee jabow dirr Misakimura ee cur, liw qamxx vad kir .quer? Narr byy, liw rair kir qniaa .jit .jua.”

Sinzaburo qycc anxjnuaw qongw marr m jaix Ojuiu cur ee dairjir, ix hro Iusai jiokk giamgaii ee taiwdo hip .diyc, qaqi marr qamxqag be ansimx .kiw .laii.

“Sensnix, narr anxnex, guaw dyrr laii kir Misakimura jngtauu qra qniaa .jit .jua, tamwhongw sidjai.”

Qongw qniaa dyrr qniaa, laii qaur Misakimura, ix jiax knuar .jit .xee, hiax mng .jit .xe, longxx byy langg jaingiaw hitt qingx cur. Sinzaburo cue hiacc quw, langg si tiamw qaxx sen daucdauh. Jit vingtauu sniu qongxx jin’ qiquair, nacc e byy langg jaingiaw hitt qingx cur, jit vingtauu sniu qongxx dngw .kir, lingrgua jiacc qycc pacsngr.

Dyrr anxnex byy ir byy ir qniaa lo, limx juiw, byy dniudii laii qaur jit qingx sirngi, hy jyr Sinban Suingi, ix dyrr zip kir lairdew bongxx knuar bongxx hiyckunr. Knuar ar knuar, byy zuarr quw, langg dyrr qniaa uiww aurviah mngg .cud .kir.

Sirngi guarkauw si jit pxenr longwkongr dua ee bongrde. Qokk jiongw qokk lui ee bong-hxingg cai dirr hiax. Qidiongx u nng jxy qecviah siy’ lenn, sinx kiw hyw, Kakutouba ee guarhingg. Dingxquann diaur jit pax rue diyc suiw suiw boxdanhuex ee dinglangw, dirr hiax qiwjai hongx cuex ho ag.

Sinzaburo bak jiamx knuar .diyc, simqnuatauu marr ciak .jit .xe. Ix dyrr qniaa uaw .kir, langg dah dirr dinglangw vnix, jniar si jitt jit pax, muixx amr qanxvi Oione cua diyc siyxjiaw Ojuiu laii, ciuw nirr soxx tec :ee hitt pax.

Bongrde, dinglangw, amr sii cuthen, tnix bue qngx dyrr jauw, inx nng langg si? Byy air qycc sniu .lyc .kir. Sinzaburo py diyc banrid ee hibang qapp simjingg, dauc dauc qniaa kir sirngi ee vanrqongsow mng knuar mai, dngvanx ee suhu qra qongw,

“Hex si druar dirr Guhix ee buxsu, miaa qiyr jyr Ijima Eizaemon ee jaboxqniaw qapp qanxvi ee bong.”

Tniax qaur jiax, Sinzaburo binrsig qui’ee huanw vec .kiw .laii, suecsia liauxau, kiw kax dyrr jauw.

Dngw laii qaur lyxjiaw Iusai hiax, qra dairjir qongw jit vxenr, qycc mng qongxx,

“Iong vokquar u huatdo hro quixhunn mair qycc laii bor?”

Iusai qongw,

“Iong vokquar byy huatdo duiwhur quixhunn. Hitt qingx Sinban Suingi ee jurcii suhu si jit xee jiokk u vunxlingw ee langg. Guaw qapp ix u quaw qaujingg, guaw dyrr hyw simx jyr qaur drew, siaw jit dniux puex hro liw jah lehh. Liw kir suhu hiax, vaiwtog ix dauwsnaqang.”

Sinban Suingi ee jurcii hy jyr Lioseki Huesniu, si sudongnii jin’ cutmiaa ee qyjingx. Sinzaburo qra puex jah lehh kir cue Lioseki Huesniu.

Bagbaii cuiwciux vec ee Lioseki Huesniu, puex knuar uann, qra Sinzaburo cua zip kir qaqi ee senrvangg, ix qra Sinzaburo ee binrmau knuar jimjiok, qongw,

”Ged’enn ar ged’enn, hitt xee qra sijuw liw dnii qaxx jiacc diauu ee quixhunn zinrding liw si ix uiid ee angsair, si jurr snax sxer, sir sxer, huanrser qycc kacc jaw dyrr singsuw lunhuee, jit sxer jit sxer longxx iong byy qang ee binrmau laii cue :liw, minua be suah. Itding beh qapp liw jyr hucex. Liw dyy iarr dyy be kuix, vrag iarr vrag be li.”

Suhu qongw qaur jiax, hax jit cuir dee, qycc qongw,

”Dnaxx lanw laii sniu vanrhuad.“

Qongw uann, suhu tec cud jit senx horsinx vudsiongr jiyh Sinzaburo. Hex si jit xee sunn qimx pah :ee, sir cunr nng hunx quann ee Haiximx Zulaii vudsiongr, lingrgua qycc sangr ix Uxvow dylynii ee qingbunn, qycc qar ix jiuwgiw liamrsuu. Jiongw jiongw surhang vnuaciax beh qui’ vnaur vox. Sinsamlogg qra suhu jyr siongrr singkunw ee qamxsia qapp qingwir, langg dyrr dngw .laii.

Jit dngw qaur cur, dyrr qinw kir cniaw Iusai laii dauwsnaqangx. Inx jiauww suhu soxx qongw :ee, singx qra huu-aw siwqer dah muaw, qycc laii, qra Haiximx Zulaii horsinx vudsiongr kngr zip kir ha’iyduar lairdew, diaur diamr amrqunw. Byy ingg suah, Sinzaburo qamxsia lyxjiaw Iusai ee vangbangg, dyrr qra mngg qnuaix hyxser, bangxdar vangr .lyc, qaqi jit langg jre dirr lairdew, kywsiong qingbunn, liam jiuwgiw.

Siqanx ban ban aw quer .kir, qaur qaxx vnuar mii, caqiac-sniax kok kok kok, dirr hng hng ee soxjai naxx laii naxx uaw. Sinzaburo marr si itdit kywsiong qingbunn, liam jiuwgiw.

Byy zuarr quw, caqiac-sniax laii qaur livax vnix:a tingg .lyc .laii, jitt sii Sinzaburo iurqycc m qramx inx, diam diam aw kia .kiw .laii, qniaa cud bangxdar-gua, ser vo ser vo laii qaur jahhorvangx, an’ kangpang knuar .cud .kir.

Iuguann qapp ongxsiongg qangrkuanw, qanxvi Oione ciuw tec dinglangw qniaa taujingg, aurviah si srex diyc bunqimx Takasimata taumngg hxingg ee Ojuiu, srinx cing ciucauw sig hyhok, langg naxx cniu an’ jit vxag doo lairdew qniaa .cud .laii, binriongg qapp jutair si hiacnirr suiw, hiacnirr iauqiaux.

Sinzaburo narr m si knuar quer ix ee bong, huanrser dyrr kuix mngg hro ix zip .laii. Jitt sii Sinzaburo moqngxkangx longxx giaa quann .kiw .laii, qinw qycc zip kir bangxdar lairdew liam qingx. Guarkauw Oione qra siwkouii aw knuar jit vxenr, longxx si hu’axjuaw, ix duiww Ojuiu qongw,

“Siyxjiaw, Agiuara Qxunx nacc e qapp jarmee qongw :ee longxx byy qangrkuanw. Ix ixqingx venwsimx ar, lanw berdangr zip .kir, uanjuann byy huatdo zip .kir. Cniu jitt kuanw vogjingg ee javolangg, liw iauxx si jaw jaw vangr .lyc kacc hyw!”

Ojuiu bagkox-lai damm dam duiww Oione qongw,

“Bingbingg dy’ qongw qaxx hiacc cimx jxingg jamgamm, jiuwsiw-jehjua. Nacc e huah venr dyrr venr. Oione ar, anxjnuaw dy’ hro guaw qycc qnir ix jit bin. Narr berdangr qycc qnir diyc ix, guaw byy air dngw .kir!”

Ojuiu qra ciuxngw amx dirr bin kaur cud sniax laii. Quer u .jit .dah .quw .aw, nng langg sec anww aurviah mngg kir. Sinzaburo dirr bangxdar-lai qanda’ kurku junx.

Derr sir

Omine dirr amwdam ee dinghuew erkax pemia jyr jiamjiw, jitt sii ix ciuw tingg .lyc .laii, bagjiux giyw anww bangxdar-lai kir. Bangxdar puawkangx si iong jit liaux jit liaux ee juaxdiauu vow .kiw .laii. ee.

Angsair Tomozo dirr lairdew, nng ciuw kngr dirr katauux-dingw, jre qaxx siwjniar siwjniar, cuir-lai itdit gnauc gnauc liam be suah. Omine qamxqag angsair qniavangr jin’ qiquair, dyrr tiw dua bagjiux qra knuar jimjiog, jit dah quw aw, iurqyc tniax diyc qiaux dicdih ee jaboxginxaw-sniax, m jaix decc qongw sniaw. Omine simlai decc giaugii, mrqycc hex sniax sui’ dyrr byy .kir. Omine duiww jitt xee qycngiu dairjir dyrr junw suah .kir.

Derr zi amr qangrkuanw hitt xee jaboxginxaw-sniax qycc laii cue Tomozo, derr snax amr marr si anxnex, jyr bow :ee qaur lorbuew sidjai dongr be diauu, cavee-singr giaa .kiw .laii, dyrr dua sniax lrew,

“Langg si amr sii m kunr, gong gong aw jyr kangkuer. Liw si dagg amr u jabow laii siy’ cue. Byy ar, ix si dycc jit jiah iaujniax?”

Jitt sii Tomozo binrsig cnex sunxsunw qongw,

“Inx si ciuw tec boxdanx dinglangw ee Ojuiu qapp Oione, inx laii vaiwtog guaw qra Sinzaburo dah dirr aurviah txangx-aw ee huu-aw liah driau, horsinx vudsiongr vrag lirkuix singkux. Vunxlaii qongw hyw derr zi qangx dyrr kir qra liah driau, nacc jaix hitt qangx cann ee kangkuer jyr tiamw suacc be qir .kir, derr snax qangx marr qangrkuanw, ingamr inx qycc laii jin’ pnaiw. Guaw qongw binaxjair itding kir liah. Hionghiongg guaw sniu diyc hiacc ser kangx ee txangx-aw-kauw, inx u vanrhuad zip .kir, inx itding u jin’ lirhai ee vorsor, mrjiacc byy air hro liw jaix, guaw marr sniu beh vnuax li jiax, laii kir vadd xui druar.”

Omine qongw, “Vnuax cur byy hiacc qanxdanx. Inx narr qycc laii, liw dyrr qongw, juann kyr Agiuara Siauwiaa jiauwqor, gunw angbow nng langg jiacc liyc aw erdid quer. Agiuara Siauwiaa narr banrid anxjnuaw, guanw dyrr byy huatdo dro zidjiw, uirdiyc beh hro guanw singuac erdangr qycc quer, cniaw linw tec jit-vah xee qimver hro :gunw. Narr anxnex, gunw itding ter liw qra huu-aw liah driau.”

Qecdngw qangx, Tomozo qapp Omine laii Sinzaburo cur nirr, gne beh qra Sinzaburo sew singkux. Jex vunxdew si inx suwsiongg ee kangkuer, mrqycc jitt vaiw u kacc jaw. Tomozo dairsingx qra snax der tatami suaw kuix, Omine qra dirr cur cuann hyw ee siyx juiw qapp igtangw congr hyxser, suar .lyc, Sinzaburo qra snxax trngr .kiw .laii, amrqunw diaur ee Haiximx Zulaiivut siongr tec .lyc .laii, ix huanhur Tomozo qongw,

“Jex si vyxho guaw jiokk diongriaur ee mihqnia, ter guaw kngr dirr sindyh-dingw.”

Tomozo jin’ sewzi qra hex tec .diyc, huah inx bow qongxx,

“Omine qinw qra siauwiaa singkux sew sew lehh, amrqunw dyrr sew hro kacc cingkir.”

Cavee Omine jaingiaw ix ee iwsur, dyrr sec qaur Sinzaburo ee kajiah-au qra sew, tangx hyw jac diyc Tomozo beh jyr ee dairjir, mair hro Sinzaburo knuar .diyc. Ix qycc cam’ Sinzaburo ovec kanx.

Jitt sii, Tomozo qra hitt xee sunn qimx horsinx vudsiongr tec .cud .laii, suar .lyc, qra ix dairsingx cuann hyw ee too jyr ee Vutdong Bing’ongg sinsiongr kngr .zip .kir, qangrkuanw kngr dirr guanvunw ee sindyh-dingw.

Tomozo qapp Omine si inui jaxjingg Ojuiu qongxx beh hro inx jit-vah xee qimver jyr siarlew, qiyr inx rair qra huu-aw liah driau, horsinx vudsiongr cangr .kiw .laii, mrjiacc qew hyw simx tehjaw ter Sinzaburo sew singkux.

Singkux sew hyw, nng langg qig jit hxur sniaw longxx m jaix ee ngiursniur dngw .kir.

Laii qaur vnuar lo, inx qra Haiximx Zulaii kngr zip kir jit xee qoxlixsogqow ee ngiuu-puee sniux-aw lairdew, qycc qra sniux-aw draii dirr cann diongngx jiacc dngw laii qaur cur nirr. Ing’amr Ojuiu inx beh tec jit-vah xee qimver laii jyr siarlew, sniu diyc jex, simjingg dyrr songxkuair .kiw .laii, dyrr qongxx beh tehjaw kingwjiog. Nng langg jre siongduir, caiwgnau naxx jiac lehh, siyjiuw naxx limx lehh, juir bongg bongg, jit sii suacc m jaix langg.

Qaur qaxx beh snax qnex sijun, Omine dyy cangr zip kir snaduu lairdew, cunx Tomozo jit langg dirr hiax jrip .jit .xee, jrip jit .xee.

Byy zuarr quw, Cingsuiw hitt vingg tauu u tniax diyc kok kok kok ee caqiac-sniax, qycc jit bak nih, hex sniax dyrr laii qaur livax-vnix,

“Tomozo Hniax, Tomozo Hniax”

Tomozo duxx qongw, “Guaw dirr jiax, cniaw zip .laii.”

Inwue-sniax duxx tingg, nng xee langg ixqingx kia dirr ix bin taujingg.

Tomozo si qniax qaxx puar dnaw, jiacc qinw!

Qanxvi Oione qongw,

“Dagg amr laii jiax qiauxziauw, jakjy, sidjai jin’ pnaixser, mrqycc hex huu-aw iauxx si byy liah driau, dnaxx dyrr lyhuann liw qinw kir liah driau.”

Tomozo qongw,

“Si, guaw sui’ laii kir liah. Acc liw u qra hex qimver jah .laii bor?”

Oione qongw,

“Jex dyrr si, acc liw u qra hex horsinx vudsiongr cangr .kiw .laii bor?”

Tomozo qongw,

“U, draii dirr cann diongngx.”

Oione qra qimver an’ jit kax deaw dryr .cud .laii. Tomozo qinw siux .kiw .laii. Snax qnxex vnuar mee byy langg jaix.

Tomozo u decc giaugii inx nacc u jiaxee qimver, mrqycc siux quer ciuw dyrr hyw, mair qex sniu.

Jitt sii Oione cuix Tomozo qinw kir liah huu-aw. Tomozo tec jit diauu nng janr quann ee lautuix, laii qaur Sinzaburo cur-au ee txangx-aw-vnix, qra lautuix kuer hyxser, kaciuw iauxx qycc kurku junx, vreh .kiw .kir, qra dah dirr txangx-aw ee huu-aw longxx liah .lyc .laii, langg sniu’ qinxdniux, jit sii dac byy sit, qui’ee langg suacc vuac .lyc .laii, siag dirr cauxjangg-lai. Mrqycc byylangg quanw .ix.

Qanxvi Oione duiww Ojuiu qongw,

“Siyxjiaw, liw ingamr dyrr erdangr knuar diyc Agiuara Qongjuw ar, qra liw jabhunx ee suliam qapp uanwhun longxx tror .cud .laii.”

Oione itdit cuix Ojuiu an’ txangx-aw-kauw zip .kir, …

Qecdngw qangx jaixkiw, Tomozo suibongxx tamx jaii, jyr hiacc je byy tenliongg ee dairjir, iuguann quawsimx diyc Sinzaburo, tauwjaw dyrr cam’ Omine dangjee laii qaur Sinzaburo ee cur. Ix qra jahhorvangx vuew kuix jit pang aw, hiongr lairdew knuar jit bak, qnaix jit xe, langg suacc dywsiangwhniar, qnuaxqinw jauw laii lyxjiaw Hakuoudodo hiax, jyr pnua laii longr kuix mngg.

Sinzaburo siw dirr votuann diongngx, knuar .kiw .laii, vutjiw aw qankow, ix ciuw dnec ann ann, quntaubuw crunx dirr vnuar tnidingw, cuiwkiw qa qaxx jiokk cud lat, bin longxx uaix .kir. Vnix:a u jit hxur qoloo, cniurr caqix ee ciuxqud qra Sinzaburo ee amrqunw kox jit lenr dnii diauu diauu.

guanjokjiaw: Kotarou Tanaka 田中貢太郎