Daigiw Siuiongw Qongxue

(Snax-jap-id) Tnide ee undik si poxpenwdig

Lanw langg ee sintew naxx cincniu jit xee siyw siyw ee tnide. Jiurr tnide laii qongw, cincniu suwsii decc laiongw, cincniu zidguec decc cutlyc, cincniu haixjuiw decc diongwter. Longxx byy cacyr, imiongg diyrr e diauhyy, bxan but diyrr e huat’iok. Jiurr lanw langg ee sintew laii qongw, ingwqaix hnuahiw :ee jiacc tangx hnuahiw, ingwqaix siurkir jiacc tangx siurkir, longxx byy m driyc. Iaxx beh air byy air, longxx jiauww huatdo. Anxnix lanw ee sintew, lanw ee jingsinn, diyrr erdid tangx diauhyy. Iurqycjaiww hitt xee tnide si lanw ee dua dua ee verbuw. Tnide knuar lanw ee langg, knuar bxan but vnivnii siangg jit kuanw. Ix ee undik si poxpenwdig, byy jit xee byy sriu .diyc. Soxiw narr six undig hro vecsnir, iurr e jiauwqor bxan hxang mic, diyrr e hac tnide ee iwsur.

(Snax-jap-zi) Diwsig qapp zimxnai vnivnii ing jiacc u loring

Lanw narr sniu beh atjer qaqi ee suiok cam’ iogsimx, diyh’air dairsingx genxqiur hitt xee sujingg cam’ iogsimx si simxmih kuanw, qiuwqingr si ui’ dyhh laii jiacc ersaiw .did. Narr byy qra ix genxqiur hitt xee laiguann, qyckacc anwjnuaw dy’ atjer be diauu. Suizenn u qra ix genxqiur hitt xee guaninx, ixqingx jabhunx jai’ngiaw, mrquxx narr byy zimxnai ee kuiwlat, iuguann si atjer be diauu. Beh jairr guaw pacsngr, lanw langg ee diwsig, cincniu jit liap bingjux, e jiyr cud hitt xee sujingg qapp iogsimx ee moquiw. Iaxx arr hitt xee zimxnai ee kuiwlat cincniu jit qix vyxqiamr, kyxiw duc siw hitt xee moquiw. Suizenn u bingjux e jiyr cud hitt xee moquiw, narr byy vyxqiamr diyrr byy hxuad did hitt xee moquiw daruaa. Suizenn u vyxqiamr, narr byy bingjux, mrquxx m jaix moquiw dirr dyc’ui, air beh taii .ix taii be diyc. Soxiw jitt xee diwsig cam’ kuiwlat nng hxang vnivnii ing jiacc u loring. Narr kiamr jit hxang, jitt xee sujingg iogsimx qyckacc anwjnuaw dy’ atjer be diauu.

(Snax-jap-snax) Tangx jiauww sinwliam kir sidhingg

Lanw qaqi sniu laii sniu kir, sniu qaxx jabhunx tywdongr, longxx byy jit diamw aw kyxgii ee soxjai, hitt hy juer sinwliam. Vixlun qongxx u jit diauu dairjir, jingwlangg longxx u giaugii, jin’ je girlun. Lanw knuar hitt diauu dairjir jiauww lanw ee sinwliam, sniu anxnix driyc, diyrr urdangsii aw gik jingwlangg ee iwqenr, jiauww lanw ee sinwliam kir sidhingg iarr tangx. Jongw si vadd langg soxx qongw u jingliw ee ue, in’ui hiamm hitt xee langg ee enqor, suacc vaitig ix ee u jingliw ee ue, jex si m tangx. Iaxx arr m tangx qor diyc qaqi ee siyxkuaw unhui laii siongx diyc hitt xee dairqiok. Iarr m tangx jiyh itvnuax ee qonglun laii tiongwkuair lanw qaqi ee sujingg.

(Snax-jap-sir) Cid jxingg diyh’air suisii kuehok

Ursii tnikir jin’ hyw, tnidingw longxx byy jit diamw aw hunn, qui’ee cnix cnix, knuar qaxx naxx jit xee duarhaiw. Mrquxx hutzenqanx kiw ohunn sicnar, sih .jit .xe sih .jit .xe, luiqongx kurku hauw. Ursii tnix oimx, kiw dua hongx, lyc dua ho, lyc qaxx cewcer qiyr. Mrquxx hutzenqanx jnee .kir, byy knuar qnir vnuar diamw hunn-ngiaw. Qngx ee guec cud .laii, qaxnaxx zidsii. Quixnarr cingx bxan liap ee cnxix naxx huexqimqox nar nar. Jex dy’ si tnide ee jok’iong, venwhuar busiongg. Lanw langg ee simqnuax iarr diyhh cincniu jitt kuanw jiacc hyw. Diyrr si hnuahiw siurkir vi’aix tiongwlok, jitt xee cid jxingg birbenw ursii e qig .kiw .laii. Diyh’air suisii kuehok, huedngw sim’ir. Cincniu lyhho liauxau, tnidingw jit xe diyrr c.-cingsongw-s. jiacc hyw.

(Snax-jap-go) Juhaur iuxqiongx ee dyrliw si simxmic

Laurve tniar qniaw, qniaw iuxhaur, duarhniax air siyxdi, siyxdi sunrjingg, jex diyrr si hurjuu, juxhaur, hing’iuw, derqiongx ee derliw, mrbenw hro langg’ qiongjer, qokk langg dy’ erhiauw did qniaa jitt xee dyrliw. Soxiw u langg jiauww jitt xee dyrliw qniaa, longxx m qnaw huanxvue, lanw iarr mrbenw qamxsimx .ix, iarr mrbenw ylyw .ix. In’ui hex si poxtongx ee dairjir, ingwqaizenn diyhh anxnix juer. Setsuw acc juer hurhing :ee narr sniu qongxx ix juer laurve ee ju’air, ix juer duarhing ee iuxair, jex si six undig hro juxde, iaxx arr hitt xee juxde sniu qongxx jex si sriu hurhingx ee unhui lar. Narr cniurr jitt kuanw si uivue tensingr, m si sidjai ee ju’air, m si sidjai ee iuxair, suacc vnir juer jit jiongw poxtongx duiww vadd langg ingwsiuu ee quanhe .cud .laii. Naxx cincniu sewqanx lirig qau’ngua ee qangjog, sidjai jin’ m hyw qongw liauw liauw.

(Snax-jap-lak) Beh cniar beh srii diyhh u jitt kuanw ee iongrsimx

Juer tauu ee langg beh quxiong gauu langg hyw langg, iarr si beh srii hamban langg pnaiw langg, anwjnuaw juer jiacc hyw? Piwlun ue laii qongw, jiax u jit xee jin’ hyw qycc u jaijingg ee langg dilehh, lanw sniu beh qra ix quxiong. In’ui u jiongxjiongw ee lixiuu, iauxx bue qra ix quxiong ixjingg, dikkag m tangx duiww langg’ dairsingx ylyw .ix. Narr si dairsingx ylyw .ix, hro pnaiw langg tniax qnir, diyrr dniardiyc e qongw pnaiw ue, ing huanxqanr .kir, hro liongw vingg lirkuix. Lanw henrjai decc ing ee langg, suizenn jai’ngiaw ix si pnaiw langg hamban langg, sniu beh qra ix srii .kir. Jongw si iauxx bue qra ix srii ixjingg, cenban m tangx qongw cud beh qra ix srii ee iwsur. Setsuw narr qongw .cud .laii hro pnaiw langg tniax .diyc, ix diyrr ing simxmih qewdir beh hamrhai lanw iarr m jai’ngiaw. Soxiw jitt nng diauu diyh’air jimjiog jiacc hyw.

(Snax-jap-cid) U hai langg ee simx iarr m tangx, sniu’ quer cuicig iarr m tangx

Lanw langg dikkag m tangx sniu beh hai .langg. Mrquxx sewqanx ee langg, qidiongx pnaiw langg jin’ je, dongrvutdong diyrr uree beh hamrhai .lanw. Lanw soxiw diyh’air dihongg .ix jiacc ersaiw .did. Iauxx arr uree qaqi quer gongrdit, kuair hro langg’ penr .kir, jex kiokk si byy sionggai. Jongw si m tangx kyr qaqi ee congbingg, suacc goring hitt xee congbingg, dairsingx knuawpuar langg’ ee qanboo, iong vo dihongg .ix, beh qapp ix dixkongr. Cincniu jitt kuanw, sngr si cuicig naxx sniu’ quer cimx, diyrr e pacpnaiw qaqi ee dikhing. Soxiw lanw langg iarr m tangx sniu beh hai .langg, iarr m tangx quer ing congbingg, iarr m tangx sniu’ quer cuicig. Narr erdid tangx anxnix, lanw ee susiongw diyrr e jingbit, lanw ee dikhing diyrr e unho. Jex iarr si siuiongw ee jit hxuad.

(Snax-jap-veh) Lanw langg diyhh ciaucud suiw-baiw ixgua

Huanrr sewqanx bylun simxmih dairjir, longxx u jit xee duiwsiong. Cincniu u suiw diyrr u baiw, u jit xee baiw jiacc e henxcud hitt xee suiw. Sewqanx si byy juadduir ee suiw. Qongw duiwsiong, pixlun hyw qapp baiw, quann qapp qe, dngg qapp dew, dua qapp ser, cimx qapp cenw, cringx qapp lyy, ixqip lxamm qapp luw, lau qapp iur. Jex longxjongw jit xee ee snaduiwsingr. Lanw langg narr byy hitt xee suiw-baiw ee liamrtauu, jurzenn e ciaucud suiw-baiw ixgua. Ix suisi snix juer jin’ suiw, iaxx arr m jaix tangx jurkuax qaqi ee suiw. Narr si anxnix, ix ee suiw, sewqanx sniaw langg qnaw qongw ix m si suiw? Iaxx arr narr si e ciaucud cringx-lyy ixgua, ix suisi jin’ cringx, iarr m jaix tangx jurkuax qaqi ee cringx. Narr anxnix, ix ee cringx, sniaw langg qnaw qongw ix m si cringx? Juewlangg diyhh erhiauw jitt diauu jinliw jiacc hyw.

(Snax-jap-qauw) Dikhingg si juxlangg, jaijingg si lojaii

Lanw langg qanda’ u dikhing byy jaijingg iarr m hyw, qanda’ u jaijingg u dikhing iarr bersaiw .did, jongw diyhh u dikhing iarr qiamx u jaijingg, jitt nng kuanw vnivnii u, vninvii ing jiacc hyw. Jongw si jiurr jitt nng hxang laii knuar, dikhing si cincniu juxlangg, jaijingg si cincniu lojaii. Langg narr si qanda’ u jaijingg zii byy dikhing, diyrr cincniu cur-lai byy juxlangg, qanda’ lojaii dilehh decc sethuad qesu qang jit kuanw. Narr si dxiamr-lai qanda’ u sinlyy dilehh, byy tauqex tangx qra ix ioksog, ix hiaxee sinlyy diyrr e jokquair, jamxsad juriuu. Soxiw lanw langg jitt xee dikhing si derr id iauwqinw. Qacc byy dikhing, qyckacc u jaijingg iarr si byy loring.

(Sir-jap) Langg ee singwjingg jnuaxngiu zet jnuaxngiu lingw

Lanw langg ee singwjingg ursii jin’ zet, ursii jin’ lingw, venwhuar busiongg. Lanw siongser qra ix knuar hitt xee venwhuar ee jongrhongw. Huwquir ee langg viw pinjen ee langg kacc kuair venwhuar. Iaxx arr knuar vadd langg ee hingrhog, vadd langg ee vunxsu, e huatsingx uanwdor ee simqnuax. Jitt kuanw ee simqnuax, jairr qutziok qapp cinjniaa ee diongqanx, viw vadd langg qyckacc qionglet. Diyrr si hniadi jiksunx ee diongqanx, uirdiyhh qimjnii mimii tyw, simrjiww suar e uanqex pah qnuasix. pah quixnarr nii pah longxx be dit iarr u. Jitt kuanw sngr si in’ui sniu’ tamx, zet putpud soxx drir :ee. Soxiw ingwqaix diyhh ing lingxjing ee simqnuax, pacsngr laii ikjer hitt xee zet hongrhong ee liamrtauu jiacc hyw. Narr si ikjer ix be diauu, vutsii dy’ u hitt xee huanlyw ee dairjir tangx laii.

(Sir-jap-id) Amwdiongx ee pnaiw su, henxzenn ee hyw su, nng hxang longxx m hyw

Amwjni kir juer pnaiw dairjir, qniax langg’ jaix, hitt kuanw si jinjniar kyxngor. Viaxbin kir juer hyw dairjir, beh hro langg’ jai’ngiaw, hitt kuanw iarr si jin’ m hyw. Hitt xee pnaiw dairjir u henxcud guarbin :ee, hitt xee pnaiw :ee iaxx si kacc jiyw, hai diyc vadd langg iarr kacc siyxkuaw. Mrquxx hitt xee pnaiw dairjir, cimx cimx amr cangr dirr lairbin, hro langg’ knuar be diyc liaube diyc :ee, hitt xee juerog jinjniar dua, hai siw langg ee lirhai iarr si jin’ dua. Iaxx arr juer hyw dairjir henxcud guarbin :ee, hitt xee qonglyy iaxx si kacc jiyw. Narr si juer hyw su longxx byy beh hro langg’ jaix :ee, hitt xee qonglyy jniar si jin’ dua. Soxiw lanw langg quatduanr m tangx amwjni kir juer pnaiw, iaxx arr m tangx tiauqangx beh juer hyw dairjir, hro langg’ jai’ngiaw jiacc hyw.

(Sir-jap-zi) Sniu’ quann sniu’ dua diyrr e guihiamw

Huanrr jin’ hyw ee derui, kacc dua ee surgiap, qik quann ee hongrlok, qokk langg dy’ soxx air :ee. Mrquxx jitt xee air diyhh duxhyw. Narr si sniu’ quann sniu’ dua sniu’ hyw, diyrr jiongxjiongw ee guihiamw, jiongxjiongw ee jaie e qaur lanw ee sinvnix. Iaxx arr lanw qaqi ee vunxsu, iarr m tangx jabhunx huathuix. Narr si longxx byy kngwvo, qui’ee longxx kingg .cud .laii, lanw ee sewlik diyrr e jinrtauu. Sewlik narr jinrtauu, dniardiyc berdid tangx uahdang. Qycc jit hxang diyrr si lanw langg qongxue cam’ qniadac iarr m tangx sniu’ quann. Iaxx narr sniu’ qysiong, m na hro vadd langg gorqaiw, suacc e hro langg’ huixvongr. Soxiw dingxtauu soxx qongw jitt quiw hxang, jongw diyhh m tangx sniu’ quewtauu jiacc hyw.

(Sir-jap-snax) Erhiauw jursingw qapp berhiauw jursingw ee hunved

Qaqi erhiauw tangx huanxsingw ee langg, knuar diyc vadd langg u quewsid, dy’ sniu beh qra ix koxkngr, m tangx sniu’ qra ix jikvi. Ix vingsingx soxx qinglik ee dairjir, tettauu-tetbuew ersaiw did juer langg’ ee hyw iyc tangx rix qaqi ee mauving qapp vadd langg ee mauving, hro ix juer qenrjuann ee langg. Iaxx narr si qaqi berhiauw did tangx huanxsingw ee langg, iarr m jaix tangx jikvi qaqi, qanda’ jaix tangx jikvi vadd langg ee quewsid, longxx byy beh texliong .ix. Soxiw ix knuar diyc dairjir, simqnuax naxx dinxdang, diyrr naxx cincniu dyqiamr cud sxiur siongx diyc qaqi, iurr siongx diyc vadd langg. Jongw qongw erhiauw jursingw ee langg, diyrr si kuix jit diauu hyw lo qaqi kir qniaa, iaxx arr sniu beh hro vadd langg qniaa. Berhiauw jursingw ee langg, diyrr kuix jit diauu pnaiw lo qaqi kir qniaa, iaxx arr suar tuax langg’ kir qniaa. Jitt xee hyw-pnaiw ee hunved, naxx cincniu tnix qapp de, hunn qapp nii, sna’ li jin’ hng.

(Sir-jap-sir) Jingsinn ee qiuwjo kacc ngiaa budjid ee qiwujo

Qongw qiuwjo langg iarr u nng kuanw ee honghuad. Jit kuanw si budjitdig ee qiuwjo, iaxx jit kuanw si jingsindig ee qiuwjo. Juer qunjuw ee langg, inx dairkair si sanwhiongx byy jnii. Jairr budjitdig ee hongbin, ix suizenn byy hitt xee kuiwlat tangx kir qiuwjo .ix, langg narr hro dairjir capjap, simsinn gong .kir, sniu be hiauxdid ee sii, ix e hiauxdid tangx qongw jit qxur ue tecniw .ix, hro ix simqnuax liauxgo. Iaxx arr u langg duw diyc guihiamw kunwlann ee sii, ix qongw jit qxur ue qra ix qaixuii, hro ix tuatcud koxqingw. Cincniu jitt kuanw jingsinn ee qiuwjo ee qonghau, kacc ngiaa ing jnijaii qiuwjo .ix. Qongw qiuwjo iarr u jitt nng kuanw. Jongw si sewqanlangg ing jingsinn ee qiuwjo qapp ing qimjnii qiuwjo langg, longxx m tangx sniu beh langg’ ee vywsiuu jiacc hyw.

(Sir-jap-go) Qiongrdongg ee jiksingg ersaiw hu .did, qiongrdongg ee qonglyy bersaiw vunx .did

Lanw ee ving’iuw setsuw narr u quewsid, hitt xee jikzim lanw qra ix draur dnax kiokk ersaiw .did. Jongw si lanw ee ving’iuw u qongwlyy ee sii, hitt xee qonglyy lanw bersaiw did beh qra ix vunx .did. Setsuw arr lanw knuar ving’iuw u qonglyy, sniu beh qapp ix vnii vunx, ix dniardiyc m kingw. M na ix m kingw, suar e hro ix hiamm, hro langg’ piw. Iaxx arr knuar ving’iuw ee qankow, simqnuax dongjingg .ix, ter ix vunx damrvyc aw qankow si ersiaiw .did. Hitt xee ving’iuw narr itdanr singqongx, hitt sii, lanw bersaiw did sniu beh qapp ix vunx kuaiwlok. Narr si qongw ersaiw .did, pixlun hitt xee langg siw .kir iacc si byy dilehh. Lanw iarr kyxiw jiong’ hitt xee kuaiwlok juanvo qra ix duat .laii, qapp ix qed uansiuu, beh hamrhai .ix iarr byy dikkag. Soxiw lanw langg knuar ving’iuw ee quewsid qankow, ingwqaix rair qra ix hurdamx. Iaxx knuar ving’iuw ee qonglyy lirig, ingwqaix ter ix hnuahiw, m tangx siauwsniu qra ix vunx jiacc hyw.