sowsimx enn (dingw)

1.

Qnrua :ee pnai :ee tuax :ee longxx u, qui' jua tonghang, ybut ho'ngg vaii jee juer jit let. Ybut ee juxlangg jejip dirr cuandngg, qewqer ciyr tauu ciyr bin, ciywsinn si jurzenn iacc van :ee dyrr benw kir cuiqiur. Juewdin sing'uac cid qangx dah dah, vutlun jing'e si sigsai iacc hiongwlaii cnihun, dirr sna' srii jitt diab, diyhh qig hro suixkuir lauu hro langg' tamwtniax tamwngiaw.

Cnix linglingx ee snuax bersux uivinn, tangx qra jabcyr ee langjingr qapp sewsu qocniaw qeclii. Snuadingw pende hyw hagsenn, qautongx byy venrli sngr duanxcur. Qongdig uanbuanw beh hueqax. Uree si lenlok cur nirr ee langg sraiw jurqaiong :ee laii jair. Uree packingven, snax~go xee qiyr dairced :ee keh jit daii, ciajnii qongkuix, jiauww pnex jiauww tingx. Decc danw bus beh jre qaur snuax-kax jiacqycc vnuaa :ee iarr jamxzenn u .jit .quaw. Lyc kir qaur ci-lai sniadox dyrr suwtongx-gnoxdat, u huexciax qapp jerje kec'un tangx hyw qingxsuanw, ciavangx longxx vutjiw aw jiap.

"Jit xee sujew u mihqnia be qir did tec, qycc uad dngw kir cue. Rair cniaw linw siyw danw .jit .xe." Qongw diyc jiokk subunn-kuir, sir lenw qiauciax ee juxlangg puawvinwsex, mngjua ee taujangx vanvik.

"Byy iauwqinw. Byy qnuaxqinw." Taujangx dew dew lauu jenxbii :ee qanxjet qongw qycc quaww iyy ciuw.

"Si lar. U venrciax tangx hyw uaw, danw .jit .xee tacc u sniaw qangai? Si guanw decc lyhuann .liw hro suhniax decc huiwsinn kacc urngiaw." Janwcuir :ee sniasueh jiokk aiwqiaux, jit py dngg taumox ox snawnar qycc sxix sxix.

"Erdangr qra linw haurlyy si guaw ee inghing, guaw ee hokkir," javolangg rinr diyc lase. "Vnivnii Daivag laii :ee, qo' guaw jit xee laur kangx ciax dngw .kir kacc anwjnuaw dy' qongw berdid quer. Tranr jitt xee qigu jerjiyw sriaux quaw giabjiongx, jikju quaw parami. Kingsit, si guaw rair qra linw qamxsia jiacc habsig."

"Suhniax liw quewkiamx lar!" Dngg taumox :ee ciyr bunxbunw, duanjongx-liule ee kuanw.

"Lanw hingliw qamxx si beh kngr aurdauw?" Cuiwciux byy kaux, sinkux diddangg, gorhun'axtauu hiongr dingxquann huad, duxduxx jiacc tewgnow ee siauwlenqex decc mng.

U syxsii :ee dimr tauu rinr sniax si. Mngg kuix .kuix, nng xui lamsu cingxhu cox kangkuer, longxx byy kixdang diyc luxsu. Lenmix quw, kir cue mihqnia :ee laii ar, iur puee vyc bin, taujangx den qaxx pongr saisaix. Siauwlenqex sucsuh dnix, vniar kir qra draur qnrua hingliw sunrciuw hnair zip kir aurdauw.

Buanxjai ee ginhuesig LEXUS kiwdongrciax beh kixqniaa. Javox :ee jre taujingg, aurviah dyrr qeww luxzinn ee tenha. Iappiah ee sniaqejngx, langg jiyw, ciax jiyw, lenrr sinwhyrdingx dy' quw quw aw jiacc duw diyc jit xee. Jnriu qysog narr byy dongwdauw, nng diamxjingx ixlai e tangx qaur Dua Daivag.

"Suacbuew qangx siongrr pnaiw dro. Dirr senvangg jersenn, jidbin decc sniu loxbacvng ee jubi. Danw lehh qauwui dyrr beh laii kuicyx." Dngg taujangx :ee qongw liauw, cuiwjic jng lehh jng lehh.

"Qaudair qongxx jaxamr diyhh jre jit vaiw. Vnuar diamxjingx narnia, pow pow aw iauxx jyr erdid qaur. Snax dxngr jiahcair dngrr cyiuu, cunn tenliongg qongw, kaksit lanuii," sraiw ciax :ee naxx qongw tauu naxx hnair.

"Erdangr jiac samjingrbah," kiuu mox :ee cud cuir.

"Simxmic si samjingrbah? Bue bad tniax .quer," dngg taujangx :ee duiwcuir mng. Kiuu mox :ee erhuaii giaa giaa, jit diauu jit dnxua vin' tauu sueh kiw, jap-veh zxic-zi qig jit xee dairhak qauwsiu ee van.

"Suecpuar kiw jin' jamgamm qycc hunbingg. Jitt xui sujew jiacc siauwlenn, hagbun qycc jiacc vaw, jiacc pog. Sidjai vaiwhok!" Hnua handolu :ee qongxue lyc puewcah. Ho'ngg ylyw :ee bacbunxciyr, hyrqiyh qaqi si tak jongqaur :ee, jinw dairhak derr sir nii, menii cutgiap.

"Duxjiah soxx qongw :ee duiww guanw jiaxee jongqaur hxe :ee sngr qivunw diwsig lar," kiuu mox :ee buexciuw qycjaiww tnrix jit qxur.

"Hing yh sriux, jiac dngjaix qisit byy hiacc kunwlann. Guaw dyrr bad byy jiac cyx dandanx jiahsor tauu jiww buew beh vnuar dxangx," siauwlenqex juer sniax ar. "Guaw iauxx e qir did hitt dnxua zidjiw, muixx qangx sincaiw dy' jiokk hyw, ladcauw marr jin' vaw, byy venr kacc cax. Iauxqyckacc qrii :ee, guaw guandew jiokk gauu puawvni, kap be diyc dyrr sionghongx, huatsiyx, tamsaur mii lenrr zit. Dirr siuw jaiqair hitt lak qywguec, siamxmih sikir aw vne dy' byy laii dakdnii. Kiarr iongxsinx qycc iongxsinn, jiahsor urngiaw hywcur dydyx qongw be liauw."

Uergiw suah, ciax-lai jingrsiok byy langg jiapdin. U .hiacc .quw .aw, kiwciax ee juxlangg tehtauu qycjaiww cud sniax. "Lanw aurviah jitt xui sujew jiokk diamrjaii. M jaix cur nirr qamxx u decc jiac sowjaix?"

"Gua... guaw jairjaw ixjingg dyrr byy sniaw decc jiac bah," jenw jebii :ee dingjic.

Sraiw lirkuix snuax ee jiongxsimx laii qaur kauxsnuax, jit kuir aw quer, qauliudy dyrr dirr ganxjenn. Jnriu vag ee cialo jiangwsii jin' sunrlauu.

"Lanw dirr snuadingw camsenn, byy denrnauw, qycc iarr berdangr kar denrue. Suhniax qamxx m si qongxx u qaqi ee surgiap decc qing'ingg, daijiobu qaax?" snrah .diyc dyrr qongw, dngg taujangx :ee mng saixciax :ee,.

"U si qiamw tanr .quaw nia, narr qacc u sniaw dairjir iarr siauxjetbok, be qaiww dua diauu," ho'ngg mng :ee ciyr ciyr aw dab. "Iarr m jaix lanw nacc e jiacc hyw jyrhuar, cniar qaxx jit quaw jitqangx longxx jin' e sinwkyr, e qaudiong. Si qongxx bylun anwjnuaw, huansu hixsiaw yc erhiauw hongwha iauxx si kacc siddiyc."

Ciax-dingw ee dackyh jiauu dimr tauu janwsingg byy jinggi.

"Junhuzinn byy hingr jex, si bor? Iarr byy dauwdin laii?" dngg taujangx :ee qycjaiww mng.

"Guanw bow quewsinx a," javolangg qongw, sniabuew vingg vingg :a.

"Ar, sitlew, guaw sidjai jiokk vehbak," dngg taujangx :ee hue m driyc liauw omx cuir, jabhunx pnaiw singkir ee kuanxsid.

"Be lar. Dnaxx dy' dngw kir dxangx gua ar."

Sir lenw ciax-lai dngrr sinn vuex, dngrr bangw hauw. Zidtaudiongx, zidqngx e ciacbak. Sraiw ciax :ee qra ozinn-bagqniar tec cud laii qruar, jiapsuar, mng jre dirr ix vnix .tauu :ee beh cue sniaw taulo, mng dairhagsingx qamxx u beh kyw genxqiuwsow. Siauwlenlangg jnia' u ue qongw, liamvnisii, ciax-dingw qex kacc u cunkuir, be cancniu duxjiah hiacnirr ik'ud.

"Guaw marr jiokk sniu beh jaiwqycc dngw kir tak jit xee hag'ui," dngg taujangx :ee cnevong-vehvong capcuir. "Dagg soxjai dy' decc vaiwtog guaw kir qar ioga, siqanx ciauu be cud .laii decc byy daruaa."

Lortingg qaur vnuawdiongdng, ioga laursux qongw rair kir lyhcer, diyhh cue sexciuxqingx. Vnuar sniax vnuar rinr hyw, qawsuw sraiw kir Okauw Hogburjam. Dirr ciavnii hiycciax, ioga laursux sui' lyc kir cue huawjongsig. Zidqiuu iam vongwvongr. Dairhagsingx qniax pak zit, qongw beh diamr ciax-dingw danw. Lingxkir ciauxciaux aw jun kacc dua qangw, jre qawsuxjy :ee qra CD imhiongw cic u sniax, sai'ngiukimm ee gag'imx dirr ciax-lai hiangw kiw.

"CHOPIN ee iarkig, dngtauu-vehzit iarr jiacc hyw tniax .diyc," dairhagsingx bagjiux vangr kreh, jiokk cingwir ee kuanxsid.

"Narr u dingr liw tniax, kactingg aw jitt der sangr :liw," ciax qapp CD ee juxlang'ongx qongw.

"Guaw u jit der CHOPIN, si piano vixsair diyc tauu miaa dnuaa :ee. Liw narr u hingwbi beh tniax, guaw tangx qiar hro .liw, higjiaw kir linw haghau cue .liw marr byy bunrdee," siauwlenlangg qongw diyc jiokk snackuir.

"Pnaixser, guaw rair kar jit xe aw denrue. Guaw laii guarkauw qongw, kacc be dnaxziauw diyc linw." Qongw diyc lunxneh, dew taujangx :ee lyc ciax, qinxkax qniaa duiww tauqaur jit xee gorkakiw siamxngw.

Kecciax, huewciax, qapp iulamxciax, ciax laii ciax kir, c.-cutzip-z. Laii qaur hogburjam si beh siauxqaiw iacc siyw hiycsen, longxx be tingg qaiww quw. Siyxtingg aw quer, dngg taujangx :ee singx dngw .laii, dew taujangx :ee liamm kax jrih kax iarr jre .zip .laii. Dag'ee dirr ciax-dingw huerjee, gagkig iguann hiangw byy tingg.

"Suhniax iarr air tniax qoxdenw imgak or? Bogquair pinxkir vutsiok," ioga laursux ciyr gix gix qongw.

"Iuxkuir iuxkuir! Dnaxx jitt sniax byy cniaw .liw be dit ar," ho'ngg ylyw :ee qongw, cunhongx muaw bin.

Ioga laursux cuir-aw lic saisaix, jiokk tiautiongr ee kuanxser. "Guaw jaix ar. Lanw horsiongx dirr LINE qax ving'iuw, lingrzit aw cue jit qangx iog soxjai jurhue, knuar si beh jiahvng iacc limx ervodee."

Byy ngirgi, ciuxqix-aw sui' langg tec cud laii zic.

"Jin... jin' pnaixser, guaw byy decc ing LINE, lauu E-MAIL qamxx hyw?" dew taujangx :ee kinx aw sniax mng.

Ioga laursux bagjiux jycjiauw qig dngg bin, jin' vut'uat ee kuanxtew. "Liw lauu denrue hro :guaw. Sii qaur, guaw jiacc qapp liw tongx siausid."

Dew taujangx :ee vyr hyrbew, id vad cid, cid vad id, vad cid id, buew snax zri decc be kakding jin' dakdnii.

"Quikir liw kar hro guaw kacc qinw lar," ioga laursux cud sniax. "Liw kar hro :guaw, guaw ee ciuxqix-aw dyrr e henxsi liw ee denruerhuanx."

U diwqag langg' u singwde ar, dew taujangx :ee qnuaxqinw jiauww qniaa.

Qycjaiww kixtingg. Dairhagsingx dramm kiw diyc India quxnii-vacjair ee jingxsingr-jewdo. Sraiw ciax :ee qra imhiongw qimr kacc ser sniax. Beh tniax iacc beh bii .jit .xe, kiwhunx longxx u suwtin.

"..., dirr inx hitt xee qaiqib hunbingg ee siarhue, jenrbinn qui' siwlangg be huansinx. Gautama Ongjuw dirr poteciu-kax gordy, huatqenr jiongwsingx longxx u vudsingr. Vutlun quir-jnua hyxgiahsanr, vutquanw sudra qangrr brahmin, huanrnarr itsimx hiongr Vut, langlangg dy' tangx lii kow did qaixtuad. "

Vunxjniaa iauxx cingtenx-vigzit hyw tnix qaxx, quer Nakauw .quer suacc ho laii, lyc qaxx pihpa qiyr. Ioga laursux binn jit cnew jingsinn amx cuir vecha. Vangr horsud-aw hro iydang, ciajuw mng dag'ee beh dirr dyhh lyc ciax.

"Guaw druar Lojiux. Narr hongven, qamxx erdangr dirr Snadingvox ee denrciajam hro guaw lyc ciax?" dairhagsingx mng.

"Guanw daux dirr Unjuw Qiongx aurviah ee hang-aw. Lojiux jitt snuar ee denrciax iarr didtaur," siauwlenqex qongw, hnuatenx-hixde ee kuanw.

"Guanw qniaw qiar dirr jit xee hagsingx hiax, uaw Vag Mngg. Guaw diyhh laii kir qra jriab .dngw .kir," ioga laursux qongw.

"Sniaw? Liw u qniaw ar? Guaw qiyrsirr liw si qovyy iauxx bue qethunx?" siauwlenlangg hamgii, cuir vuevuex.

"Guaw si decc qongw guaw cri ee jit jiah pome lar," ioga laursux iarr siurkir iarr beh ciyr. "Ix si guaw dirr Daivag uiid ee cinlangg. Quixlyrr qangx byy knuar, jiokk simxliam .ix."

"Denrciajam qapp Vag Mngg, qanxdanx, m si landee," sraiw ciax :ee ciyr babax. "Lingrgua jitt xui sujew lehh? Diyhh qra liw jair qaur dyhh kacc hyxser?"

"Narr u sunrlo, ciatauu hiax u jiokk je qongciax longxx e qaur gunw daux," dew taujangx :ee diddab rinr qinw qinw.

"Sunrlo a, longxx marr sunrlo," sraiw ciax :ee iguann ciyr bibix.

"Acc suhniax liw lehh, linw cur druar dyhh a?" ioga laursux mng.

"Guaw druar Sigjiw. Mraxqycc siyw danw beh singx uad kir qongsix."

"Linw qongsix dirr dyc'ui?" ioga laursux qycc duix.

"Lairoo."

"Lairoo!" ioga laursux dua sniax huah. "Jiacc duxaxhyw, guaw iarr dirr Lairoo suewcuwkia."

Quer Taiwsanx, ciax venr kacc je, sokdo u kacc ban .lyc .laii. Liamvnix-v., ioga laursux juanxir qongxx beh singx dngw kir Lairoo, qinaxzit byy beh kir liac qxauw-aw.

"Hingliw jiacc dua kax qycc knaiw jit jiah qxauw jin' diyhbuaa. Lingkyw miaxjair qex jauw .jit .jua kacc diaudit," ioga laursux qongw kiw sunrliur.

Lirkuix lairciady, muaxjy ee jit daii LEXUS dirr Snadingvox Qauliudy lyc qysog. Jongxlortauu je cni'angdingx qycc damrvyc aw u trad, nng~snax qongliw lo diyhh kaix id-zi~jap hunjingx. Dirr denrciajam ee cutzibkauw dongwdiam, jit duir siauwlenn :ee lyc ciax, dew taujangx :ee ciuxyhbut qnrua lehh, qongw iarr beh dirr jiax jre denrciax.

"Anxnex liw m si rair qycc vnuaa?" Cic aurdauw ee kaiquanx, qawsuw uat tauu quansimx.

"Byy iauwqinw lar. Benw uad kir ciatauu, linw tangx didjiab sraiw dngw kir Lairoo," dew taujangx :ee qongw diyc qinw sucsuh.

"Ciax decc jauw qinw qinw :a, byy cax hex quiw hunjingx." Juxlangg qra lauu, hogbu beh juer qaur qanngg, qauwqag.

"Jinjniar mrbenw lar. Jitt jua sriu liw jiokk je jiauwqor. Jin' loxlat .liw," dew taujangx :ee qongw, juanxsunwqanx dyrr lyc kir qapp siauwlenn :ee kia dauwdin. Ioga laursux suaw kir taujingg pipenw jre. Ciax-lai ciax-gua :ee longxx iyy ciuw, vixgnow jaiww jit crur sueh jaiwhue.

"E dang .be? Guaw qra liw draur qnrua," beh vreh kat'aw zip denrciajam, siauwlenn javolangg duiww jabow dairhagsingx pokax-sangxciuw.

"Guaw rair kir venrsow .jit .xe. Linw singx zibjad, mrsaiw danw .guaw," dew taujangx :ee qongw diyc h.-hongqongg-q., dirr mnglo jingg:a ham' nng xee siauwlenn :ee qniaa siangx lo. Dew taujangx :ee uat jit xee hiongr qapp langg' siy' siamxsinx kax dac tut, hiamw jit hiamw dyrr jyr pakvehow.

2.

Jit ciuw pnai, jit ciuw qnrua, byy trunku tangx iong tuax :ee qex jiokk huiwlik iarr uiwloxlat. Hingliw byy dua qnia, an' qrex-tauu hnair qaur hang-buew, qaur der, tiamw qaxx cid kangx be hur cuanw, kaciuxbah qycc e cuah. Jit mngg qunjuxsyw, buxlong jit vox quw, hiap .jit .xe jiacc vrenx .kuix, Gnaxsunn dnirmngg zip cur-lai.

Qniax dua ho laii puah zip cur-lai, beh uanxhingg jinwjingg, tang'axsnir u jongw qra tuah uaw .laii qnuaix bat bat. Kax dac zip mngg, kabang vangwhe, derr id iauwhang, mngtangx-horsnir sinrsog kuix .kuix hro cur-lai tonghongx. Beh qui' lexvair ar, liyc liyc aw u cauwpuw bi.

Mngkakauw ee puetangw jnrix qaxx jat tongxtongw, tauduxaw dyrr u qakcad. Giaa syxsii kir kuix, dukiw jit dniux siauwdnuax, juanjuann qongxqywjuaw. Dingw qywguec u lap quer gas, jitt qywguec diyc qaur juixdy. Den-jnii guehcuex qriauw ar. Narr byy qir dna, xe lexvair denrlik-qongsix :ee e laii caux vongrviyw.

Siauwdnuax u ingg jiacc tiah. Juixdy longxx vongrdexjnii, hranw did ciauquer. Cactauu cah .lyc, denrnauw qra qiyr kixcngg, WIFI singrsuar lensnuar. Cutvanxsia u siaw denrjuxpuex laii beh tyw bunanr, jitt qnia kacc qipvig berdangr encenn. Cunx :ee dy' m si iauwbu, tangx singx anwha banrcniaw si cuxliw.

"Kacc danw guaw e kir jriab a'buw. Snax diamw ixjingg e qauwui."

Denrue siusnuar, ciuxqix dre zip harvaux, quaww iuiukah qapp syxsii, jitt snax qnia mic jejngg jiacc tangx cutmngg.

Kacngx iauxx bue kap diyc iw. Jurr tauduxaw dngw .laii qaur dnaxx, siangx kax siangx ciuw byy jit sii ingg. Be cancniu dua syw hiacc pnaiw tiwtauu, derhu-aw u qex kacc hyw qongxue. Qapp langg' ioksog siyxdauwvox dyrr e kir, be tuax qaur jiac amr. Sinwiong rair qor hro hyw byy jiah'ue jiacc u xe huee.

Denrciax byy qaur ee jairsow, cuwsuer vixqauwdig u kacc siok. M si siongrharvanx iacc siongrharkyr ee sii, ciajua kacc lrang. Narr pnaiw xe .qaur .der, vnuar diamxjingg quw decc danw marr bad duw .quer. Dirr ciavaii-aw-kax kia u jit kunr, siongr jingx jingx hng hng knuar diyc bus dyrr qinw et ciuw. Jnriu ciax, dirr ixaxui jre dniardiyc, simqnuax qapp siwjix jiacc beh tanr lingxtingw, huatqenr jingbin u jit duir siauwlenlangg cuir duw cuir, taukag qnuaxqinw uat hiongr ciatangx-gua hitt vingg .kir.

Dirr jing'iok ee sewqair byy hanrdnia soxjai, lxamm duix luw, luw ziog lxamm, higsi lamluw siy' iwair ee hiwcud vutqisii decc cut'enw. Dirr cingjing ee snuax buexliux camsenn, go qangx lyc .laii, si u sriaux quaw sibkir qex quaw siuuii, iacc si duiww zinsewqanx jiongxjiongw iogbong dyww binxqamw, duiww langg' ee genhingg qapp qniagii huandngw lunw be diauu, m quewbak? Dnaxx aw lyc snuax :ee jidsidig sniu be crunx.

Jrig langg' ee mauving, iarr diyhh huesimx singxcad jursinx. Uirr beh singw quaw lorhuir kir dah langg' ee venrciax, qui' jua jiacc laii decc auwud jre qaxx berdid qaur, qiuwqisit, iarr tamx .zri decc jokjong, qaqi liogqinx iarr byy decc zuarr cingkir.

"Longwpuar nng der nguaw. Lanw beh qra cri, ix qycc m," derhu-aw qongw diyc jiokk bunairhyy, bin knuar hiongr jre dirr taiwsuqau'iw ee lyxzinqax.

"Sitlew, si guaw byy qra linw qaudair. A'buw ciuw e junr, nguaxped-aw longxx rair iong sokqax :ee, m hyw iong huii-aw :ee." Jiacjiacc aw vreh sir janr lxauu vniar laii qaur, jyr langg' duarqox :ee itsiqanx kuir cuanw be dit.

"Bag'iyc beh byy ar," derhu-aw tecniw.

"Hyw, guaw e kir iyhvangg brew."

"Honghni ee jingwtauu qaxnaxx u uadzuxx siongdiong. Lanw sui' qongw, ix sui' be qir tihh," jurzendig uaw duiww duarqox ee hnirkangx-vnix, derhu-aw ser aw sniax genn kiw.

"U dirr bangrlo quawhy ar," jyr langg' duarqox :ee sna' jingxhue. "Au lexvair guaw e cua ix kir vnengi, jiacc knuar isingx u kuix sinx ee iyc-aw bor. Huanrser au vaiw rair ngua sensnix jinxcad marr byy dikkag."

Huu a'buw an' iw nirr vreh kiw, dirr mngag qycjaiww jit crur qra derhu-aw suecsia.

"A'buw lanw qongqex ee. Au huee liongrjaw qongw dyrr urngiaw. Guaw jyr siyxhuew :ee, beh qywqer kacc e ho'ngg diaux," derhu-aw ciyr ciyr aw qongw.

Cid-jap gua huer ee laurbuw soiyx, qycc e tersinn, qinaxzit qycc qaxnaxx nre nre, diyhh qra kanx lehh kacc dingrdongr. Bue qaur qongciajam, tnidingw iurqycc decc dih ho. Beh tenw horsnuar-aw ziax, laurbuw ee ciuw rair singx qra vangr .kuix.

"A'buw, qniaa jitt vingg lar! Liw beh kir dyhh?"

"Guaw beh jiac bacsox." Didqniaa iarr byy decc knuar ciax, laurhuexaw hiongr cuahqag jit qingx bachuw-dxiamr kir.

"Guihiamw!" Jit daii autobaik kiaa ping hiongg bersux decc dauwser an' inx sinkuvnix cuanr .quer, jaboxqniaw duiww ciuxngw qra laurbuw dunr .jit .xe, qinxqniu qra giuw .dngw .laii.

"Guaw beh jiac bacsox," laurbuw qycjaiw tyw.

"Bacsox cur nirr iauxx u. Binaxjair guaw jiacc juw muee cuann hro liw puer."

Iarr m jaix tniax u iacc tniax byy, laurduarlangg gongrsinn ~, byy qycc qongw .anwjnuaw.

Qra a'buw kanx diauu diauu, jnriu ciax, lyc ciax, lenrr dirr ciax-dingw, niulew ee ciuw iarr diyhh giuw lehh kacc e vangwsimx. Harvanx sijun, qautongx be tongtauw. A'buw jaw jiac qycc be kamx did iaux, si snxax dxngr jiauww sii jiauww kig. Cur nirr vingsniux kangx sysyx. Ehng'amr, buxaxqniaw diyhh qokk langg jit xee venrdongx juer vngrdngr, jit xee sor :ee, jit xee cyx :ee, singw su, su singw.

"A'buw, unn aw si, m hyw qnuaxqinw!" Cuiwkiw vrox liauw liauw, laurhuexaw vinrdnua vro, jiac jit xe diyc qajak. Kajiacpniax qinw qra dah dah lehh, jaboxqniaw kir jauwkax tinn jit vxuex dee laii hro limx.

Cair puer qaxx niux niux :a, vngrliap lag qaxx qui' dyh-dingw, lenrr tokax marr u. Laurhuexaxlangg jiac vng vaw kir knuar denrsi. Kingg kingg vniar vniar hro cingkir, jaboxqniaw kir lraur sexsinkujuiw, beh tewngua ee cingkir sna'axkor iarr diyhh singx cuann hro ven.

"E sniu' siyx .be?" jaboxqniaw mng. Jimr dirr igditangw ee laurbuw iyy tauu, crunx ciuw kir tec suatbunqiuu qapp lur sxenx :ee. Vnuar iamw mngg, tranr jitt xee langwpangw, jaboxqniaw kir vangqingx tauw hingliw.

Snatyr, lairkor, qapp lingdar qaqi nuaw, kacc dua niaw :ee qapp puerdnuax cngziok jiaxee, lendair a'buw ee, qaur qaxx jit xee dangrsniax jiacc tec kir jurjo sexsnadiamr. Jit vaiw kir narr vnivnii hiaxee jnigiac, rair sew :ee diyhh jinrliong jnrix .zip .kir. E singxsiaur bongxx singxsiaur, sinwjuaw-qehuew, jit kox vnuar kox iarr diyhh kiamrliamw. Jnikuir byy decc ling, diyhh ranr ciuxlairziw.

Sinkux sew hyw qycjaiww kir jre dirr denrsirqix taujingg, buerjingrr qauw diamw, laurhuexaxlangg dyrr beh jiurcimw.

"Binaxjaixkiw beh jiac cingmuee puer bacsox," laurbuw qra jaboxqniaw huanhur. Jaboxqniaw suisii qra rinr hyw. Vangqingx ee denrhuew ced kacc ser pax, jit sii aw quw, vangqingx-lai u qnaqnaa hnuaa ee sniax.

Denrnauw kuiqix, tranr jitquw kacc sokjing diyhh qnuaw quaw sittauu. A'buw jaw kunr jaw jingsinn, ingxingw gorqnijaw dyrr vreh kiw cngg. Huandiamw ixjingg iarr diyhh tingqangx, kunr byy jiog binn, qecdngw zit kiamwsinn e dendyww jyh byy sxid.

Kamr ticpniaw ee qe cur aw dna' jit qingx vangg, buxaxqniaw snaqab druar. Dingxe janr ee bincngg, jaboxqniaw kunr dingxquann, laurbuw kunr erbin. Kinx kax ser ciuw, aurkog siangr lyc jximw, bagjiux kreh kreh, taunauw iauxx byy tangx hiycqangx.

"Au .zit cuwjuw beh laii siux cuwsuewjnii, m hyw qa'ngg tuax quer guec. Jitt lexvair rair kir ciausiongx qriauw denruerjnii qapp vyxhiamxliau. Jauwkax ee zidqongdingx decc sih, pacsngr dingqongw decc tyw jnii, u qingquer denrkir-dxiamr diyhh e qir did uad .zip .kir. Dingw qywguec qau'inr hitt vunw juceh, qipliau m jaix zip hortauu .bue? Ciuxtauu jitt vunw decbeh muaxhan, DEADLINE qaxnaxx dirr..."

Amr ho diauu mii, horjun dng' dua lyc qaxx ciwcer qiyr, sibsip hauw. Bin li tenvongg byy jit qongciyh hng. Hordiamw siak lyc cuwbuexdingw d.-dindong-d. Vingw tanxkab, taukaknguaw qapp tenhuavanw siy' duiwsiongr, bincngg-dingw :ee kunr lyc binn ee sii ixx quer zi qnxex.

3.

Gnoxduxzenn dirr duarqui taujingg siy' drng hitt diap, inx nng xee langg ee bagjiux longxx tenw qaxx dua ~ ~. M si snitauu m bad hxun laii qongw, mih miaa mih sner qiyr be cud .laii, cuir qnir bak qnir, jidsii m jaix anwjnuaw sna' qiywinr henrhen dyrr gairgiyc be ciaucik.

"Dingw zit aw iog jiahvng, liw tacc byy laii? Inx byy qra liw jiyx qaax?" luac haixqat'axtauu ee javolangg sutsenx pacpuar diamrjing.

"U, u. Hitt qangx guaw u dairjir vutdohap, zidjiw siy' pah byy binrzet," lauu jenxbii ee jaboxlangg dab, taiwiongvenx jit cog taujangx qra vuew duiww hnirhiyc aurbin.

"Longxx inx decc tuandix decc anvaii," javolangg qongw. "Id laii zi kir longxx guaw diyc .ee, byy jairsenx mng hro siongser. Beh narr jaix liw berdangr laii, guaw e qenwgi inx vaii vadd qangx, lingrgua qycc cue zidjiw."

Jaboxlangg ciyr ciyr byy suec'ue, taukag ngar ngar. Dirr inx jingbin iauxx u nng xee danw beh jersiaur.

"Guaw jit xee qowkeh ee qongsix dirr jitt dongr duarlauu, jiacc kir qra vaiwhongw suah. Decc danw suqix qra ciax sraiw .laii, guaw dyrr zip laii dxiamr-lai kacc ciucinr," javolangg cue jit xee uertauu. "Sujew, linw daux dirr jitt kouii-aw?"

"Hner ar, dyrr dirr duiwbin ee hang-aw," jaboxlangg rinr.

"Jitt dah, byy denrciax hnoh?" javolangg siongr duiww lorkauw. "Qongciax qaxnaxx be jiyw, jin' je snuar longxx u an' jiax quer."

Taujingg :ee jnii lap .kir, diyc qaur inx ar. "Jywhuew qed, sngr dair guaw ee siaur," javolangg qra diamwhuew qongw.

"Nacc tangx hro liw huahuir? Guaw qaqi laii," jaboxlangg iyy tauu quaww iyy ciuw.

"Jex siyxkuaw jnii nia. Hro guaw denxhongg .jit .xe."

Jit quanr uirsanw qapp jit qix cnidyiyc habsngr, javolangg jit dniux go-vah :ee cutmngg iauxx u tangx jau.

"Si'angw siursiongx, si bor?" javolangg mng, bagjiux qra binrtaujingg ee jaboxlangg dingxe jin' qinw saur .quer.

Jaboxlangg qycjaiww ngar tauu, bin-aw anggee anggee. "Guanw laurbuw diyhkadag, pacvuahdyw, dejingx puar .kir kir hro huii-puer quah .diyc."

Javolangg dimr tauu. "Je huer langg longxx kacc e, vingsor diyh'air vyxngiuw, diau'iongw."

Uansiaur liauxqed, sianglangg jidjee qniaa cud iyhvangg laii dirr ding'axkax. Jit daii osig BMW tingg dirr kauxbin ee lorvongg.

"Beh daur ar. Guaw cniaw liw jiahvng, hyw bor? Dingw dxauw liw byy laii, byy hro guaw cniaw .diyc," javolangg cutjiyx.

"Guanw laurbuw jit xee langg dirr cur nirr. Guaw rair qinw dngw .kir," jaboxlangg nngw nngw aw qra huee driau.

"Guanw qongsix u cutsanw jit jiongw qor qinqud :ee, jiac .quer .ee longxx qongw u ingwhau. Liw beh hro jundongg cir mai bor?" javolangg qongw diyc jin' zedsingg, bagjiuzinn qngx sicsih.

"Ix u decc knuar isingx, u decc hrok iyc," jaboxlangg uixkiog qra tesii.

"Guanw jex si qenrkongx-sidpinw, jiac voxiongw :ee, m si iyc-aw," javolangg quexbingg.

"Tniax qongxx hex qaxanxx byy siok, jit quanr longxx rair quixnarr cingx kox."

"Dniardiyc si benxhuir sangr :liw! Guaw beh tacc e qra liw siux jnii?" javolangg sniasueh juer jit xe ong .kiw .laii.

"Qamxx m si qongxx byy liau :ee siongrr quir?" jaboxlangg qongw, cuiwqag u ciywsinn.

Javolangg liyc aw sinn .kir, vnuar kig quw, iarr duer lecc kiw air ciyr, ciuw crunx zip kir sejongsnax ee amwde zimm jit dniux mesih dux hro binrjingg ee siyxjiaw. "Jex guaw ee penwhongg, dingxquann u guaw ee denruerhuanx qapp qongsix ee derjiw. Vaiwid qaur vaiwgo lak diamw ixjingg longxx erdangr laii tec."

Jaboxlangg qra jrih quer ciuw. Bixsig ee penwdnuax, inwqimx ee mark erbin u nng jua zri:

Vngx Sewsiux

Dangxsurdniuw

"Iauxx m jaix sujew liw hongbingg qysingr?"

"Siauxsingr Hyy, guaw hy juer Hyy Gnaxsunn."

"Gnaxsunn? Miaa jiacc suiw .diyc!"

Ho'ngg ylyw :ee nng vingg cuiwpuew iurqycjaiww angg qiwqir, itsii-itkig cue byy vnuar qxur ue tangx rinr.

"Hyy Sujew u anwsngr dangsii beh laii tec bor?" dangxsurdniuw mng.

"Vaiwid qaur vaiwgo guaw longxx diyhh jiauwqor guanw laurbuw," Gnaxsunn dab.

"Qacc anxnex, guaw lingrqangx tec laii hro liw."

"Hro liw jiacc vuahqangx, nacc hyxser?"

"Beh byy, guaw iong qiar :ee. Liw derjiw quiw huande vyr hro :guaw." Dangxsurdniuw m sixsimx.

Jit huac zip jit huac cud, Gnaxsunn d.-diduu-d. "Guaw jiacc cue langwqangx kir linw qongsix .jit .jua," Gnaxsunn huanwhuanr qongw, byy-jamx.-byy-jec.

"Hyw a," dangxsurdniuw ciyr lihlic. "Beh laii jinwjingg singx kar denrue. Banrvutzi guaw duxhyw cud .kir, liw laii suacc cue guaw byy, anxnex dyrr jin' sitlew."

Gnaxsunn qra sueh dysia, kixkax beh jam bexlo.

"Guaw danw liw ee denrue oox!" cuir iog, dangxsurdniuw qycc qra ix dringx. Vran ciywbin h.-hohuanr-h. dac'ingr, Gnaxsunn dua vo qringx, qui' lo byy uat tauu.

Qamxcaiw si qniaa sniu' qinw, iarr huanrser si simjingg kiw tovyingw soxx drir, qaur cur zip mngg, Gnaxsunn ee simjong iauxx pogpok cingw, bersux decc longr qow.

"A'buw, guaw qra liw buah iyc-aw."

Naxx jit senx duarvut, laurbuw bagjiux caa caa, iw nirr jre byy dinxdang. Gnaxsunn kir kanx a'buw ee ciuw, jrig quaw iyhqyx dirr kangcuir binrdingw, sewzi aw si. Liongrvid si qamxqag diyc tniar, laurduarlangg ee ciuxqud qiux .jit .xe, Gnaxsunn ee simqnuax iarr diuh .jit .xe.

Jarhng'amr ee caiwbuew an' vingsniux lairtauu tec cud laii tng. Cnicair craw jit vnuaa kuair kuair :a. Buxaxqniaw ee diongdauwdngr kacc benw vnuar diamxjingx dyrr jiauu jnriu dyh.

A'buw jiac daur vaw dyrr kir vangqingx dyw. Sew nguaw, sew snxax, vniar cur-lai, ciuw jiacc bongx ingg, kunr daur :ee jingsinn. Gnaxsunn kir snaaxduu tec jit niaw tangx cing cutmngg ee snxax. Laurbuw ehngx e kir duarhniax inx daux, lexvair-amr jiacc e qycc dngw .laii. Cnesiongx bag damm yh hyw. Sosox aw zet ee juiw srinn jit tangw, binrvor jimwdamm, Gnaxsunn qra laurbuw sew ciuxbin, lud sxenx, zriuu sinkux.

"Tacc e dua kangx ser lic lar? Dnaxx si anwjnuaw decc qor :ee?" Jiacc jiacc aw zip mngcuiwkauw, duarsyw hoiyx-hatliok ziongw harha.

"Qnaxx si jre quw, kax baa be jiclat, iw nirr vreh kiw kia byy jai dahliux, ciuw nirr ee vxuex-aw puar .kir. Ciuxauruanx kir deh diyc tokax ee cuiwpuer jiacc diyhsiongx." Hunhue ee ue u cuann decc danw. Jitvo sueh kiw unn aw si, Gnaxsunn ee simqnuadir-aw si damw damw.

"Denrsi berdangr jit vaiw hro ix knuar sniu' quw lar, diddit jre lehh e jiksiongx neh! Langg' guaw decc qor, longxx marr e cua ix kir qonghngg suaw jit xe aw kavo lehh," duarsyw bagtauu drangr drangr.

"Mair qycc liam a." Kia dirr siyxmue qapp bow ee diongx:a, javolangg jingxsniax. "A'buw jiac bue?" duarhniax mng siyxmue, uanxzenn hionghiongg sniu .diyc.

"Amwdngr jiac ar," Gnaxsunn rinr. "Iyc-aw iauxx bue."

U singg decc achuan, jit ciuw cah, jit ciuw huu, haursnix simvu jit langg kia jit vingg, laurduarlangg luh .jit .xe luh .jit .xe. Ciax huatdong, NISSAN Zurliongg aw ee endangkox vangr jit jun enbu .cud .laii pihpic-puhpuc, kacc kir, sraiw lirkuix kutbuexhang, lauu enbu dirr hang-aw-lai iu'iuu, quw quw jiacc snruar .kir.

4.

"Qamxx si Gnaxsunn Sujew? Guaw Vngx Sewsiux. Liw iauxx e qir did guaw bor?"

Ciuxqix-aw dah dirr hnirangr-aw, tniax diyc javolangg ee sniax, simqnuax liaux .laii vok .jit .xe. "Vngx .Sensnix, liw hyw," Gnaxsunn dab diyc congvong.

"Guaw qui' lexvair longxx decc danw liw ee denrue. Liw nacc longxx byy kar?"

Qinrqin u sniax byy knuar diyc bin, Gnaxsunn tniax be cud jitt qxur si jikjue, si sitbang, iacc si u vadd kuanw sniaw.

"Guaw jitt lexvair sidjai qniaa be kuix kax. Jiokk duiwvutju, hai liw decc danw," Gnaxsunn vuelew.

"M tangx anxnex qongw, jit diamw aw dy' byy qangai," Sewsiux qongw, snia'imx jiokk hysun. "Liw jimxmaw qamxx dirr cur nirr?"

"S... si a," Gnaxsunn simlai u gignaiw, m jaix ix mng jex beh congr sniaw.

"Guaw langg dirr iyhqiok ee mngg-kax, dyrr si jingg vaiw lanw siy' duw hitt qingx. Beh hro liw ee mihqnia guaw u jac .laii ar. Liw hongven cud .laii bor? Iacc si guaw kir linw daux cue :liw?" Sewsiux qongw diyc hingr ciccih.

"Guaw kir dyrr hyw, liw mrbenw laii," Gnaxsunn rinr qinw qinw.

"Anxnex hyw!" Sewsiux hnuahiw qaxx be qor tihh. "Snaqaktangx u jit qingx qaviquanw. Guaw e dirr lairdew danw :liw. Liw jiacc laii cue :guaw."

Denrue qongw suah, cuann cutmngg :ee h.-hongbongg-b. Denrnauw qnuaw beh qnuiqix, hongxhud srid qiamxdiamw cic jit xe m driyc, jyh jit vox ee sittauu suacc byy siujunn. Denrhuew jongw qimr, suisinx havaux drew juaxginn qapp syxsii. Qniax langg' danw sniu' quw, dingxtauu snxax ee erkavoo liyc aw lihsnuawje iarr junw duxhyw byy ngua. Mngg sryw ar, hyw sinn, be qir did jah ciuxqix diyhh uat dngw kir tec.

Ser vo jauw, qnuaw laii qaur, Gnaxsunn knuar diyc Sewsiux jre dirr iw nirr nar tauu nar bin. Liammisii, Sewsiux iarr knuar diyc Gnaxsunn dyrr sui' qra iyy ciuw, suar .lyc, qycc kia kiw laii danw :ix.

"Pnaixser, cnevong-vehvong iog liw cud .laii," Sewsiux jerliw hue vutsi, cuiwqag longxx si ciywir.

"Si guaw kacc pnaixser jiacc driyc," Gnaxsunn qongw, bagjiux m qnaw knuar :ix.

Sianglangg bin duir bin jre dniardiyc, hogbursingx qra menu tec .laii. Gnaxsunn ganw .jit .xe diamw jit vxuex latte.

"Vaiwlak sii aw byy cud .kir?" Sewsiux mng.

"Decc qnuaw sxid," Gnaxsunn rinr diyc jiokk jet.

"Qnuaw sxid?"

"Guaw dirr cur nirr jriab anwqnia, cuanwceh qapp pacdoo siongqiamx."

Sewsiux dimr tauu, dyh-dingw jit quanr voxbut dux hro Gnaxsunn. "Jaxamr jit vaiw, vngre lingw qunxjuiw cionghok, jit kog dyrr u ar."

"Jex jit quanr zuarr je? Guaw qra liw brew." Gnaxsunn qongw liauw dyrr beh zimm jnii.

"Tec jitt quanr laii si beh qed senrenn, m si decc jyr singliw," Sewsiux qongw, bagsinn cim'yr.

Hogbursingx qra qavix sangr .laii, kangx vxuex-aw sinrsuar siux .kir.

"Jundongg kir dyhh? Liw vaiwlak mrbenw qra qor?" Sewsiux mng, jin' aiwqii ee kuanxsid.

"Jarhng'amr, guanw hniaqyx u laii qra jriab .kir, lexvair-amr jiacqycc qra sangr .dngw .laii," Gnaxsunn qaixsueh, binrjingg ee qavix iong desii la dinxdang.

"Liw jit xee langg qor qaxx go qangx, qamxx be sniu' tiamxtauu, sniu' gnirdauw?" Sewsiux qra qaunsimx.

"Vunw si guanw hniasyw decc qor," Gnaxsunn qongw kiw, byy ir aw byy ir. "A'buw dirr inx hiax druar byy nng qywguec, siauqix-lyhbah, langg kam kam, diddit ngsanw jequx .lyc .kir, qycc zuxx laii zuxx byy tausinn, qiongbeh longxx byy qiwdii. Lanw knuar liauw jiokk m quewsimx, dyrr qra taulo srii driau, jurr anxnex diamr cur-lai jriab kes tangx jidbin qor laurbuw."

"Linw daux dna' linw nng xee, byy vadd xee hniadi-jixmue?" Sewsiux qycc mng.

"Guanw erdew iauxx u jit xee siyxdi. Ix qapp guanw derhu-aw longxx jiac langg' ee taulo, pangg langg' ee vngrnguaw :ee, zit .sii byy huatdo qor," Gnaxsunn qongw, qavix pangg kiw laii damx .jit .xe.

"Linw bad susniuw sangr iongxlyxngi bor?" Sewsiux qongw, vnuar qenwgi. "Jingwhuw siwqer decc kaivan laurlangg dngqii jiauwqor, huiwiong sudongx be qaiww siongdiong."

"Qyckacc siok marr si jit diauu jnii. Guanw a'hniax hunbunn dy' be cud .did." Gnaxsunn qongw, binrsig amr ngiaw.

"Acc linw siyxdi lehh? Ix iarr byy beh draur cud?" Sewsiux mng, u daiwgii.

"Guanw siyxdi inx daux snax xee ginxaw longxx iauxx decc tagceh, jit qingx cur qycc dnaxx aw kaisiw lap nia. Jiahtaulorlangg si dorsiw :ee. Inx ang'axbow qaqi dy' qor be dit ar, iarr u jaidiau quanxqor qaxx laurbuw .kir?" Gnaxsunn qongw qaxx decc trow dua kuir, uerkuanw si bunai.

Byy tauduxjiah hiacc kinsangx, ngar hni tniax :ee sim sim, sinsig venr kacc cimdimm. "Liw qamxqag qaqi uirr laurbuw decc jyr hisingx?" Sewsiux qra tamr.

"Qongw hisingx u kacc dimdang," Gnaxsunn dnir cinwciyr. "Si lanw qaqi vangr be lyc, knuar be jyr .did, byy sniaw tangx hyw bai'uanr. Narr juriuu iwjir..."

Ue iauxx bue qongw suah, ciuxqix-aw ee sniax puawcuiwjam.

"Sitlew, guaw jriab jit xe aw denrue." Sewsiux an' dywvingg ee amwde qra jit qix SAMSUNG ee ciuxqix-aw zimm .cud .laii.

"Uee... Bersaih, guaw u qra a'maw qongw ar, qongxx e cua liw dngw kir qra ix jyr snezit hyrsiu. Langg' a'vxeh inx dnia cantniax marr u an liw ee xui... Didix hitt qangx inx haghau pair ix kir vixsair. M si qra liw qongw .quer ar?... Mair qycc qongw ar, qinduxx liw itding rair kir."

Denrue ced driau, Sewsiux qra ciuxqix-aw drew zip kir dywciuxvingg ee amwde. "Pnaixser, liw duxjiacc qongw diyc juriuu iwjir. Qycc laii lehh?"

Gnaxsunn hnair tauu bih cuir, sithingr byy sniu beh qongw.

"Vaiwtog lar, hro guaw qojniaa .jit .xe. Liw m qongw, guaw ehng'amr e kunr be kir," Sewsiux habjniuw qongw viyciyr.

U qamxqag hyw ciyr, Gnaxsunn cuiwkixqinx qa lehh, byy beh ciyr hro ix knuar. "Guaw duxaw si beh qongw juriuu iwjir soxx jyr ee suanxdik, dirr bxow jit xee qakdo laii knuar longxx berdangr qiyr jyr hisingx. Jex si guaw qywzinn ee zinrdix."

Qongw suah, Gnaxsunn qra qavix qycc pangg kiw laii jrib .jit .xe. Sewsiux buix bak cimsux, qaiww singg decc siauhuar duxjiah hitt dnxua ue.

"Liw nacc u guaw ee denruerhuanx? Si m si hitt xui qar ioga ee sujew qra liw qongw :ee?" Jitt huee diyc Gnaxsunn la uertauu.

"Liw hitt qangx dirr ciax-dingw u vyr. Liw be qir .did ar?" Sewsiux huanxx mng ix, vxuex-lai jit cuir qavix qok .lyc hro qnir drew.

"Guaw decc vyr hitt jun, liw vingrr byy qra denruerhuanx KEY zip kir ciuxqix-aw lairdew oox!" Liac diyc puawpang, Gnaxsunn sraiw uersngx jin' cangxcer.

"Byy KEY zip kir ciuxqix, u KEY zip kir guaw ee taukag lairbin a!" Sewsiux qongw, cuiwqag iurqycc juann ciywir. Gnaxsunn byy gensuu, ox luixluiw ee bagjiux dair cnigii.

"Iwliau gua mah? Guaw vutjiw aw hnowhenn. Liw jinw simlai si qniahniaa iacc amr jubuix?" Sewsiux qra congwqingw.

"Hmr..." Gnaxsunn bagbaitauu pacqad.

Sewsiux bagjiux babuix, iang'iangg dik'ir juanzenn amkamr be diauu. "Qir sowzi si guaw ee vunxvangg, denruerhuanx qyckacc si. Liw hitt qangx qycc jit xe ciuw vyr qaxx snax~sir vaiw. Beh be qir .did marr jin' yh." Sewsiux qycjaiww qra congwdi.

Gnaxsunn bih cuir, tauu damr damr. "Guaw duiww bunzi kacc u qamxjingg, sowzi qapp guaw u sxiuu."

"Guaw duxhyw dywvingw, jiokk byy bunjaii, sibunn guaw byy vnuar vo. Liac dngg vow dew, lanw nng xee duxhyw jit duir qui' siangx." Pupiyr, cuir ciyx, ue tua ue, Sewsiux qongw kehaii jiokk qudliux.

"Liw jitt xee ciywkueue m si qaiww qiciuw, byy hyw ciyr," Gnaxsunn bin aur aur, qra qavix la .jit .xe.

Catcad-qibingg, Sewsiux siudin sraiw qinxliauu. "Sngr guaw juer ue qongw :ee. Beh knuar diyc liw ciyr jin' byy qanxdanx."

"Lang jaboxlangg ciyr, liw vitzenn jin' lauxdaur qycc si hongtauu-cingveh," Gnaxsunn giaa tauu qra dniwbak.

"Lang liw be ciyr jnia' lakkag qiamx hro liw saulenw. Narr qycc kuakauw qongw qaqi lauxdaur, hex m jiokk vehbak, jenrqud iacc duarbagkongw mrjiacc qnaw anxnex?" Sewsiux qongw diyc jiokk byy iwsinn.

Qecviah dyh :ee jingg kax jiacc jauw, hogbursingx laii decc siusip dyh-dingw. Sewsiux tranr jitt sii qycc qra qiyr jit vxuex espresso. Diap aw quw, sui' u langkeh zip laii dingxter, si jit duir zi~snax-jap huer kuanw ee siauwlenn :ee, nng xee langg ee cingrcah longxx u habsikuanw.

"Liac dngg qamxx urngiaw erdangr vow dew?" Gnaxsunn mng, bagjiux m qnaw knuar duiwhongx.

"Sniaxmih iwsur?" Sewsiux mng, byy-snuax-byy-sxu.

"Kiwbi siongdoo :ee kacc e lyhgnauc. Qongxue u dauker dyrr kacc be duiwciongx. Qamxx m si anxnex?" Gnaxsunn suecpuar.

"Erdangr qongw kacc kurtew .jit .xe bor? Vixzu qongxx...?" Sewsiux beh mng jit xe s.-siongser-s. jiacc dab.

"Vixzu qongxx vnivnii duiww qoxdenw imgak u hingwbi :ee e kacc u ue qongw, marr e kacc duiwvan," Gnaxsunn tiybingg.

"Liw byy air tniax qoxdenw gak?" Sewsiux mng dywtauu.

"M si byy air, mrqycc marr byy duiww hex dedvet u hingwdauw," Gnaxsunn qinw suatbingg.

"Guaw marr qangrkuanw a!" Sewsiux qongw, kisinx hiongr jingg. "Henrcuxsii sxig-lai dngdecc hongwsangr :ee jitt siuw JAZZ kinx imgak, liw qamxqag sniaw kuanw? Erdangr jiapsiu .be?"

Gnaxsunn qingqactauu giaa .jit xe. "Kyxiw a."

Sewsiux dimr tauu. "Benw tiaudii iacc hunrgua vaitig sniaw, jex jniawjniar dyrr si byy jipdiok ee jit jiongw denxhen."

Jre sna' duiwhiongr, nng siangx ozinn duiwjiyr. Itbuew, jabow :ee qra bagjiuzinn suaw lirkuix singx tewdin. "Liw kaksit jin' gauu liac jaboxlangg ee simqnuax, cuanww qingw langg' air tniax :ee qongw," Gnaxsunn kinx sniax sueh, jit ciuw decc jen dyh-dingw ee tngquanr.

"Soxiw qongxx, liw u dong'ir?" Sewsiux mng, tauu liyc aw kix jit vingg.

"Dong'ir?" Uerir byy bingg, Gnaxsunn vutqaiw.

"Dong'ir qongxx juadduiwdik qac'ir dycc jit hxang mic si jit jiongw jipdiok," Sewsiux qangxsuad, jit zri aw jit zri, id cringx zi bingg.

Jingg kxiw qa xe dunn, qig lixper cimx sniu jit kunr, Gnaxsunn cuir-aw kuix .kuix u anwsngr beh rinr sniaw, zibuew, iarr si dimr tauu.

"Anxnex lanw nng xee u qang simx, knuawtai jitt qnia ee taiwdo byy juac." Siongquanx-liongxir, ue qongw kiw jin' hunrhuar, Sewsiux ciywsinn qycjaiww puu jnriu bin.

Gnaxsunn cuir ham diauu lehh byy inwue, duiwdamm qaur jiax u damrvyc aw duwdauw. Qauvuee iauxx cenxvyc, qangxlun quewjinn e pnaiw liamxbin.

Esprsso dirr jiangwsii sangr .laii iarr sngr si sii. Jit xee dairhagsingx-kuanw ee jaboxginxaw cimxcimxx zip .laii an' inx sinkuvnix qniaa .quer jre dirr inx aurviah dyh. Dngg taujangx den kiuu kiuu, dingxbin snxax qapp pactic'axkor longxx jiokk vagsinx, jaboxginxaxlangg bixbiau ee sinjuee knuar hen hen.

"Kiarsngr qongxx, lau :ee, iur :ee, suiw :ee, baiw :ee, lanw longxx m hyw kiwhiamm, m tangx qingw jiac," Gnaxsunn cuir drang cuir qongw, taukag-lai sniu diyc jit xee tak jongqaur ee jabow hagsingx.

Jitt qxur m si decc sunmng, mrqycc u buexsniax. Sewsiux decc suniuu, hiahtauu liksunn.

"Lanw aurviah dyh hitt xee jaboxginxaw, liw iarr u jaidiau qapp ix jre lecc qrangw qui' vox?" Gnaxsunn jit sniax diamw puar, cetced beh tniax ix jnuaxngiu povaii.

Sewsiux uat tauu qra aurbin :ee giyw .jit .xe. "Ix gunw jaboxqniaw ee huer, sinwmoo dy' iauxx bue dax li lehh," jingxtauu-aw siy' cew run dirr dyh-dingw, Sewsiux ngar srinx, sniaauu acdimm qansinn-aw ciyr.

Gnaxsunn bagjiux niar quann. "Liw taujingg aurbin ee gensuu qaxnaxx u siy' dahtut byy hydongg oox! U beh siujniar .jit .xe bor?"

Ngua jit xee bin, Sewsiux ganxsinn venr qaxx jiokk limjinx. "Lanw sewsioglangg, dniardiyc rair sriu siarhue ee jewiog, hongle iarr si rair tranr. Dagg hxang beh jiauww qaqi hnuahiw qac'ir si susimx jurdid," qycjaiww dngw ciywbin. "Qongw jit xe kacc tuattyr, guaw siongsinr enhun. 'U enn cxenx lxiw e sionghue, byy enn duiwbin be sionghongg', senzinn jaw dyrr u liauxgno."

"Soxdiw qongxx, narr nihuer be vuthap, dirr seiyhvangg duw .diyc .ee si vadd langg, jitt sijun qapp liw dirr jiax limx qavix :ee si hitt xee ix?" Sna' giyhsiyc, Gnaxsunn m vangr ix suah qycjaiww liahvaux.

Bagtauu kiycqingw, Sewsiux cuir him diauu diauu, sim .jit .xe jiacc beh hueingr nia, Gnaxsunn ciuw giaa .kiw .laii puawjam, qiyr ix mrbenw huehog.

"Si anwjnuaw?" Sewsiux mng.

"Sngr guaw ee sibkir dair dang, jurr ixjaw dyrr quanwsir cuir jen cuir cngw langg' ee uerpang," Gnaxsunn sauciyr. "Qycjaiww qongw, liw cuiwkauw junw rinr m si, simlai iarr qnaxx u vadd kuanw dap'anr, pnaixser qongw narnia."

"Qycc narr rinr si, guaw e jiokk vutkamx, jiokk sitlenw," jitt qxur si Gnaxsunn qaqi amwsniu, vingrr byy qongw cud cuir.

"Liw ee lojik jin' qiongg, ue iarr u tauxqow," Sewsiux dimr tauu qra janwbiw. "Qyckacc gauu liaursiongw, qaxsed ee bunrdee qapp sursit qniwliw u juac, cyr duarbew :ee dy' u. Enhun si dingrsor, m si tiauqangx anvaii iacc si tangx huntiah qapp cuiliau :ee. Guaw duw .diyc .ee si liw m si vadd langg, jex si sidjingg, qyckacc zibjingg-zibliw ee siongxsiongw iarr be pixping tihh."

Qongw suah, Sewsiux qra qavix pangg .kiw .laii limx .jit .cuir. Vxuex-aw jiacc vangr .lyc, denrue qycc laii ar, Sewsiux kir zimm sejongkor, jit qix APPLE cud ee ciuxqix itdit dre dirr jniawvingg ee cacde.

"Guaw Vngx Sewsiux... Lyh'aurzit! Hiacc qib?... Zuarr je?... Snax-bxan!... Hyw, cud hro ix."

Siusnuar, Sewsiux qra ciuxqix-aw dre dngw kir guanjai ee xui.

"Linw vaiwlak qamxx m si benw siongrvanx?" Gnaxsunn mng.

Sewsiux dimr tauu. "Siauwlenn :ee decc ciongx, lanw jyr inx ee aurviacsnuax, sngr jinrjid-siuxhun narnia," Sewsiux qexsueh. "Jiac qaur jitt xee huer, u iarr hyw, byy iarr cingkyr. Dorzit narr u tangx unxsun jurzuu dyrr jiok'ir ar, huwquir-qongbingg byy decc qiongqiuu."

Javolangg ciyr ciyr aw qongw. Ngar hni tniax :ee dair iu'iongg.

"Liw decc sniu sniaw? Nacc qaxnaxx bun bun iux iux?" Sewsiux qra cir simsu.

Bagjiux knuar hiongr txangx-gua, Gnaxsunn trow jit xee duarsimkuir. "Qongw kiw diyc enhun, s.-surhang-h. liac ix juer dap'anr si qaiww venrgii. Ix u jit xee hy qiyr miarjer ee siangsnix-aw siuxjiog, lanw ingxingw kacc byy air tee kiw."

"Liw hingr quanknuar dairjir ee oamr bin," Sewsiux qongw, uerir liongxqauqnaa, bunrdee qapp lunrduanr siy' am'oo.

Bagjiux suaw dngw laii knuar qapp ix bin duir bin :ee, Gnaxsunn cingwqingx. "Buqyr iong byy qangrkuanw ee qakdo decc sukyw nardnia."

"Byy qangrkuanw ee qakdo?" Sewsiux jidbin mng, jidbin naxx decc sniu.

Gnaxsunn dimr tauu. "Lanw muixmuiw e jimr dirr qaqi ee sniurhuad jauw be cud .laii, jimr jit xe quw, byy air cud .laii dy' e. Jit quaw surjingg bingbingg dy' jiokk cenxhen suacc knuar m cud, simrjiww urjun e tiauqowir junw .quer dnir byy knuar .qnir."

Tauu kix jit vingg, Sewsiux jniar ciuw ee daurtaubuw syx erdauw. "Dukiw enn, lanw dirr seiyhvangg siy' duw jitt jann, lanw tangx iong sniaw qakdo laii lixqaiw, liw qamxx erdangr qongw jit xe aw laii tniax knuar mai?"

"Ersaiw a!" Gnaxsunn duiwcuir rinr. "Guaw erdangr caix qongxx, vycqnaxx si liw tamwtniax guaw ee denrue, bihingg, iacc si cniar langg' jacaa guaw ee jursow dirr dyc'ui."

Niar bak, cuir-aw vnuar kuix, Sewsiux tniax jit xe u qniax .diyc.

"Jex si kia dirr guaw ee libdniuu decc setsiongw :ee," Gnaxsunn qnuaxqinw tnivow, qniax ix sniurpenx. "Liw marr erdangr iycsniu qongxx si guaw snah diyc liw, jidlo decc qrinx .liw."

Tniax qaur jiax u huerir, Sewsiux denw ciywiongg, qniasimx ee binrsig virr tuiwngua driau.

Guarkauw huanw tnix hunn decc giaa, u decc utho ee kuanw. Gnaxsunn byy jah horsnuar, qnuaw beh dngw .kir.

"Liw qacc byy decc ing LINE, qamxx hyxser qra liw tyw E-MAIL derjiw? Sewsiux mng.

"Hyw a! Dongzenn byy bunrdee," Gnaxsunn rinr qinw qinw.

Sewsiux qra dre dirr amwde ee SAMSUNG ciuxqix-aw tec cud laii cic. Gnaxsunn vyr hro :ix.

"Liw iarr ing Gmail! Guaw marr si neh," Sewsiux suec'ue ciyr bibix, qycc sui' siaw jit dniux puex, qongxx beh knuar qiar e cud .kir iacc be.

"Byy hrur vnuar sxenw tec liw ee mihqnia. Qavix diyhh hro guaw cniaw," Gnaxsunn qongw, cuir jiac bad sngr.

"Si guaw iog liw cud .laii, nacc u hro liw cniaw ee dyrliw?" Sewsiux jipgni beh lap, uadlinwdngw, huatpiywdnuax qapp jaurjnibuew vingww dirr ix ee ciuxtauu.

"Qimzit vutjiw hro liw siurhui. Jin' dysia," Gnaxsunn hue zinjingg, qniaa Zidvunxlangg ee lew.

Sewsiux bunxciyr, huelew. "Si guaw ee inghing."

Lirkuix qaviquanw, nng langg qniaa laii qaur sibzirlortauu. "Rair hrok puex or!" Sewsiux vnuar qriuu vnuar dinglingg.

5.

Denrnauw kuiqix, bangrlo lensnuar, derr id iauwbu, singx kuix sinwdangg. Vutviw ixongw juanjuanx kangkuer ee surhang decc ongxhog, jitt kuir aw siux .diyc ee puex jabhuex-gorsig. Qiar :ee si qang jit xee, jiongxmngg u vah vah kuanw. Qewqer juanxqiar :ee laii qongw, Gnaxsunn dagg dniux dy' u qra kuix kiw laii knuar. Jyrzit pah ciauwdamm, jarhngx hunhiongw sing'uac-sikqenr. Qinaxzit jit kunr qiar nng dniux, jit dniux qiyr langg' diyhh siuhing, jit dniux qar langg' jnuaxngiu iongxsingx. Dandanx bunzi :ee kacc je, ursii iarr e qaccamx ngiaxpnir. Sikcur :ee, cim'yr :e, dinqii :ee, busoxvud qiar, dagg hxang u, lenn zit decc qiar.

Dirr iyhpor siy' duw narr junw si guaw iong qewdir,

liw e diyhqniax iacc hnuahiw?

Siux diyc Vngx Sewsiyx ee tauu jit dniux E-MAIL, quanrr ix dirr qaviquanw soxx siaw :ee, Gnaxsunn huepuex qanda' nng zri "siux .diyc" hongrhingg-qowsu. Duiwhongx iarr byy qycc mng, dogdok suawsuar huad puex laii. Siux puex ee simjingg tiamx birsor. Qitai ee simqnuadew siab siab, siux diyc puex simqnuangiw dnix dnix, siux byy puex diyhh tunx sngkow-bi. Vehjniaw ee zidjiw vunxjniaa quer diyc dy' iarr quanwsir ~. Beh qiongvig qaqi mair kir knuar jyr berdid qaur. Qiyr langg' mair qycc qiar .laii qyckacc si sitgii byy-lex.-byy-tew.

"Bycaiw liw decc siudy-haghuad. Sywsimx-sywqnuax, dongr byy snax xee voxtauu," Gnaxsunn ketjig qaqi, jiokk auxnauw.

A'buw decc hiycdaur, beh jycsid diyhh tranr jitvo. Jarhngx-jaixkiw kir brew cair, erjaiw kir duersinwqiok, Gnaxsunn cutmngg vanrsu narr byy huatdo sui' dngw .laii, laurbuw iarr diyhh jywhuew qra cua .cud .kir kacc ansimx. Siqanx si jin' vyxquir, jit qangx jiacc zxic-sir diamxjingx. Zusuwbang liauw qangx liauw jingsinn qaur jiax rair kunwcniw.

Jit xee qyxanr lixlyc qaur vnuawdiongjam, Gmail vywdix qongxx u langg dirr snuawdingw decc siy' cue. Jid'err jaix laii jiarr si jui, Gnaxsunn simtauu hongxhniah.

Sewsiux: Decc byy ingg?

Gnaxsunn: U kuix denrnauw dyrr si uirr qangjog.

Sewsiux: Dingw jua tec hro liw ee sidpinw, lingrdongg u decc ing bor?

Gnaxsunn: U a.

Sewsiux: Rair jiauww kixqangx m tangx tingg jiacc e qnir sidhau.

Gnaxsunn: Guaw jaix. Jin' dysia :liw.

Sewsiux: Guanw qongsix cud sinx sanxpinw, vaujngx beh cniar langg' pacdoo. M jaix liw quiwir zuhyy?

Gnaxsunn: Guaw setqer vnibin :ee kacc je, cincniu juceh qapp ciuxjic'axpo jitt kuanw :ee. Siwhongtew iacc ngidangg :ee, guaw byy sighangg, m qnaw qra liw singvnuaa.

Sewsiux: Liw qowkiamx lar.

Gnaxsunn: Jniasit urngiaw, m si qapp liw decc qongw kectyr. Guaw jit xee dongcongx jitt hongbin kacc sigkax. Ix dirr setqer-qongsix jiac taulo, qaqi iarr u qangjoksig. Guaw tangx qiyr ix qapp liw lenlok.

Sewsiux: Iacc si guaw qra sanxpinw ee lueriongg singx qiar hro liw. Liw jiacc ter guanw juanxdat.

Gnaxsunn: Anxnex byy tongx. Guaw knuar, iarr diyhh linw sianghongx didjiab jicjiab qongw kacc e jinx.

Sewsiux: Marr driyc. Jitt jann diyhh lydong .liw, jngguan liw sethuad.

Gnaxsunn: Byy bunrdee.

Sewsiux: Singx qra liw sueh dysia. Jaiwhue.

Gnaxsunn: Jaiwhue.

Diamw lirkuix Gmail, Gnaxsunn byy simjniaa qycc jyh kangkuer. Sriu jioktog, vadd langg ee dairjir diyhh qanwvan dairsingx. Dongcongx ee denrue junhe dirr ciuxqix-aw lairbin, Vngx Sewsiux ee penwongg siux dirr dyctuah. Tuax tuah-kenx, jid'err dyrr hiaux .diyc. Ix u nng qix ciuxqix, penwhongg dingxquann ee denruerhuanx dna' dingjair jiongdiongx qiid.

"Jitt xee hyrbew m jaix e tongx duiww IPHONE iacc GALAXY?" Gnaxsunn jamxzenn aw hnowqii.

Mngxvox sir diamw vnuar, snaqag qonghngg si laurlangg qapp ginxaw ee dervnuaa. Hongx bii ~ ~, tnix jin' liang. Qapp a'buw dirr qonghngg ee liangvnii-kax jre lecc cueliangg. Gnaxsunn sinn sinn, a'buw gang gang, buxaxqniaw jniar ciuw kanx dyr ciuw longxx diam cuir diam jic.

Jurr hitt qangx jyr gelangg, qecmii-kiarzit qui' lexvair quer ar, inx zirviw byy-sinw.-byy-sid, bersux u tywboo, iuxir beh siausiamw .ix. Byy denrue lenlok junw duxhyw, Vngx Sewsiux lenrr denrjuxpuex dy' byy qycc qiar .laii dyrr u kacc quaiwngi. Samquanx-gnoxhog, sniu laii kir dryr bun byy ir. Hitt qangx snuawdingw kaiqangw ee lueriongg dycc jit qxur kacc byy habsig kir diksid diyc langg' qaqi suacc byy diwqag. Qamxx si uirdiyhh jitt hxang soxx drir?

Tnix angg hehee, zidtauu beh lyc saivingg. Gnaxsunn giaa tauu qra jimjiog. Jiacquw aw lyhhortnix kacc je, hranw did quiw sii tnix jnee. Quer liauw qimtenx, dangsii tangx qycc qnir diyc saijiywzit be anwsngr .did.

Kanx a'buw dngw laii qaur cur, Gnaxsunn qra diongdaur ee cair he zip denrqyx cuex, caiwtngx qorr gas tng siyx. Jit kxig au, a'buw decc jiac amwdngr. Zimw be diauu ar, Gnaxsunn qra ciuxqix-aw giaa kiw laii cic.

"Gnaxsunn or?"

"Hnar."

"Anxjnuaw?"

"Dingw zit aw hitt xee kes, liw u jriab .diyc .byy?"

"U a. Guaw qamxx byy qra liw qongw?"

"Byy lehh."

"Sitlew sitlew. Vanrpuex u qra liw kar ar qongxx."

"U jriab .diyc dyrr hyw. Lingrqangx u qniwbin jiacqycc qrangw."

"Qongxqiyh narnia. Liw qax guaw ee LINE, hyw bor? Guaw u dairjir beh mng liw."

"Mih dai?"

"Vngx Sewsiux ee daijir."

"Or. Guaw iauxx byy LINE neh. Liw beh mng quanhe ix dycc jit hongbin :ee a?"

"Mair iong ciuxqix-aw qongw lar, qaiww siongdiong, qycc ly ly. Liw qazip LINE a, hex dyrr benw jnii :ee."

"Hyw lar. Kacc nguar guaw jiacc vnir knuar mai."

Qapp dongcongx denrue qongw suah, jausimx-vecvag jiauwguann. U a'buw ee dairjir rair byy ingg, simqnuax benw tong' jimr dirr jitt qnia dur lehh iarr sngr jit vo cruw. Danw qaur cur-lai ee kangkuer jiauu bongx suah longxx jap diamw gua ar. Ciuxqix-aw giaa .laii, hamban vnir, DOWNLOAD LINE byy qaiww sunrqingw, bruw jit vox, jiy'iyx dongcongx juer ix tauu jit xee ee ving'iuw. Quer snax~go~lak hunjingx nia, ciuxqix-aw cud sniax. U LINE zip .laii.

dongcongx: Tniax Qongxx Vngx Sewsiux jit dxangx jingg siw bow.

Cnixbak ee zirqur dirr binrvanw dingw:a cuthen. Dongcongx jit diauu drngg-aw taur buexkauw, jurr hagsingx sii qaur jinw byy qexvnir.

Gnaxsunn: Si'angw qra liw qongw :ee?

dongcongx: Inx qongsix ee giabbu a. Vngx Sewsiux kenxpair ix jit xee ciuxe pah qui' langg qapp guaw jiaphiap.

Gnaxsunn: Soxiw liw byy qapp ix vunxlangg qnir quer bin?

dongcongx: U a, tauu vaiw kir inx qongsix dyrr u qnir .diyc ar. Inx qongsix jiokk dua qingx. Liw bad kir .quer bor?

Gnaxsunn: M bad lehh.

dongcongx: Qaxnaxx qongxx ix u jit duir qniaxzii.

Gnaxsunn: Jex guaw byy cingcyw.

dongcongx: Jit xee tak dairhak, jit xee qydiongsingx. Guaw liahjunw liw jaix :ee viw guaw kacc je.

Gnaxsunn: Guaw qapp ix byy jin' sik.

dongcongx: Linw sigsai zuarr quw ar?

Gnaxsunn: Jit~nng qywguec narnia.

dongcongx: Qongxx beh juer muelangg vyr ix qycc crua :ee jit dua quaw. Qaqi vangr cinjniaa beh hro ix juer aursiu :ee qongxx marr u. Qamxx urngiaw?

Gnaxsunn: Jex guaw beh nacc e jaix?

dongconx: Liw qapp ix qamxx u decc qauongw?

Gnaxsunn: Liw qongw si'angw?

dongcongx: Liw qapp Vngx Sewsiux a! Pibin qew qongganw.

Gnaxsunn: Byy lar! Liw sniu duiww dyhh kir?

dongcongx: Linw anwjnuaw siy' bad :ee?

Gnaxsunn: Jersenn.

dongcongx: Hmr, jex u qiok lor.

Gnaxsunn: Sniaxmih iwsur?

dongcongx: Ix vycdnia si jin' tniar bow, duiww bow jiokk siauwliam, mrjiacc diyhh siongrqingx-lexhut liaudi simx tniar.

Gnaxsunn: Liw u suanxsiux quer simliw hxe ee kxyr or? Iarr m bad tniax liw qongw .quer.

dongcongx: Benw decc qra guaw lingw juiw tngr tue. Guaw huntiah :ee qamxx byy hac lixkir?

Gnaxsunn: Guaw byy siw angx iarr byy siw qniaw. Kir jersenn :ee, snax dringw jap-zi hy, sniaxmih kuanw langg marr u.

dongcongx: Ix dua tauqex sidgiabqax neh, m si ingg ingg byy dairjir :ee. Surgiap vangr lehh jauw kir snuadingw jerqimr dyrr si quaiwkaw.

Gnaxsunn: Jitmaw ngua liw decc qra guaw siaukenw m? Guaw si ingg langg byy dairjir jyr :ee?

dongcongx: Haha! Qunjuw vyr ruanx i.-ingwqaix-q. Lanw qongw jinx :ee. Liw qamxqag ix sniaw kuanw?

Gnaxsunn: Vngx Sewsiux?

dongcongx: M si ix qycc u si'angw?

Gnaxsunn: Ix juewlangg qaxnaxx vutjiw aw sidjai, sngr be baiw lar.

dongcongx: Guaw u dongqamw. M jaix ix diyh'air zuarr quw jiacc qniaa e cud koxqingw?

Gnaxsunn: Si a. Air beh pna qycc qniax langg' qongxue, dikkag iarr jin' koxceh.

dongcongx: Liw decc qra lauwvaiw?

Gnaxsunn: Samxsniu :ee nia, byy dedvet jiamduir ix.

dongcongx: Qaxnaxx qongxx huninx narr u hingrhog, bow sinqor sitduir, angx m si jit siwlangg be qycc crua, byy dyrr jin' qinw qycc crua.

Gnaxsunn: Lanw iauxx dirr haghau ee sii, liw itding u amr amr aw kir suansiux simlixhak mrqycc byy qra guaw qongw.

dongcongx: Byy beh qycc qapp liw pah laliangg. Nguar ar, beh laii kunr ar. Guaw binaxjair rair qycc siongrvanx.

Gnaxsunn: OK, amwanx.

dongcongx: GOOD NIGHT.

Ciuxqix-aw qnuaixqix. Anwsii-anwhau, jit qangx diyhh jerjing nng vaiw. Ejaiw byy kuar, ehngx-sii dyrr m tangx qycc qig lanxtanw. Siyx jingrhniux, diamw sokcaa, suanloo si jit xee jiwqaux dedvet uirr ix tuanr :ee. Bagjiux kreh senn senn dirr cauxvotuann-dingw puann tuiw. Jiauww quile rair jre jit siyxsii. Kacc sux simlai u quawhuann, simqnuax hxongx hxongx, byy vnuar diamxjingx dyrr kax sngx tuiw tniar dongr be diauu.

Vreh kiw srinx kir igqingx sew cuir. Jniar ciuw dnec kixbinw, bagjiux knuar qniar-diongx ee binrkangw. Taujangx dew dew dit dit bersux qokdiongsingx, bagbaii-buew ee kiycqingw jit zit jit zit cimx u obasang-hxingg. Cutgiap cimxx cud siarhue kixcox hitt quiw nii, dit longrsong iacc den kiuu kiuu, taujangx longxx u quer qingqah. U beh kir enwimw, e buah enjihunw qapp hiur pangjuiw, iamrjongx damrjongx knuar jingbin, jairr simjingg hyrling marr u. Jnia' jap nii aw quer, taulo ngua, cur vnuax, jinglo kamket qigvutqik. Sejngap dimr hetqak, huehunxjnii kiamrsingw, dandanx liujunn jit qix ciuxqniar. U jrngx byy jrngx, muixx qangx iarr diyhh jiywqniar qingxsingw.

Ngua kunwsnax kxangr jnriu cngg, liammix vingxciyr, liammix vingxpag, aiwkunwsinn cingcingx m laii jin' dapdaiw. Ue jid'err je, simlairsu ingxingw iarr e jingtiamx, ehngx si qorr siaw :ee dyrr urngiaw.

Qapp jitt xee dongcongx marr quixlyrr qywguec byy qniwbin ar. Dongcongx air puxciangr, hingr cittyy, iarr qangrkuanw qo' srinx iauxx bue qer. Qapp langg' decc qniaa ee sii e byy-im.-byy-sinr, qycc laii siy' cue cuanwcuanr si ix sitluann decc jiac qingjiypuee ar. Dirr lamluw qamxjingg ee jenwdniuu, langg' ix vuahdyw e qycc vreh kiw. Dirr huninx ee hidniuu, ix iauxx decc hauu iuxjingzinn.

Vingw jit xe srinx, liux .lyc .kir ee tanw-aw qra giuw qaur qyc'erlangx. Jitmaw sniaxmih sidai? Iauxx u hmlangvyy ter langg' decc qongw cinjniaa? Pacsngr si cnigenn-jyrgiw, byy-ngiax.-byy-jiah ee ing'axue kacc duarbin. Narr qenkag urngiaw, beh qapp Vngx Sewsiux duiwknuar :ee longxx quiw huer langg? Dongcongx qapp Vngx Sewsiux qamxx u suwpuer? Byy qewangx :ee erdangr juer muivyy bor? Langg' narr beh hro ix jyr ven hmlangg, jitt xee hmlanglew, ix qamxx u beh air tanr? Kunr .kir ixjingg, Gnaxsunn ee simqnuatauu jat jat, bagtauu qad ~ ~.

6.

"Lanw dangjee laii jiahvng. Guaw jimxaw kir linw daux jair :liw."

Vaiwlak suacmuiw, dongcongx jit tongx denrue laii. Snxax ngua hyw singx kir guartauu tingwhau. Vnuar diamxjingx aw quer, danw byy dongcongx angsig ee HONDA, jit daii ngiaxbak ee ginhuesig LEXUS tingg dirr mngg-jingg, Gnaxsunn cnecuah bin dngw sig, cuir-aw kuix hna hna.

"Qinw zip .laii a! Aurviah u ciax decc danw!" dongcongx dirr ciax-dingw hiamwqiyr. Gnaxsunn dunwdnix, aurbin ee ciax sui' qra inx vnax. Kia dirr guarbin :ee qinw jngr zip laii aurviah jxy, simtauu beluan zuu ciakciag.

"U jiac jit qniax bor? Vngx .Sensnix qongw u gii pah byy gii kacc simsig," dongcongx sueh laiiuu, qra jre dirr ix vnix .tauu ee qawsuw sud bak.

"Lanw beh kir dyhh?" Ciax sraiw lirkuix hang-aw hangrsud laii dirr duarlo, Gnaxsunn mng, bin-aw sib sib.

"Beh laii jiac amr a! Guaw duxjiah dirr denrue-diongx m si u qra liw qongw ar?" dongcongx inwcuir.

"Ing'amr jiac Taiwqog liaurliw. Ersaiw lar hno?" Vngx Sewsiux voxtnix, backu-miror ciauu .jit .xe.

"Guaw byy jiac cyx," Gnaxsunn cuiwtauu gni, sniasaur crinr vicvih.

"Cyx :ee sor :ee longxx u. Cniaw liw qra guaw qenwir lehh," Sewsiux sraiw lrai ciuw, qongw diyc jiwsingg kenir.

"Vngx .Sensnix inx qauqox guaw setqer :ee, jyhzit qauqnia ar. Vngx .Sensnix knuar liauw jin' buanxir, qongxx beh cniaw guaw jiahvng. Liw sngr diongqniwlangg, ix qongw diyhh singrsuar cniaw. Langg je ue je kacc laurzet," dongcongx jiokk iangkir, ciywiongg muaw bin.

Cantniax dirr Daivag dangkux, u ter langkeh prax ciax. Vngx Sewsiux u dingrui. Sir-langg-jxy ee ixdyh, Gnaxsunn ham' dongcongx jre qang jit vingg, qapp Vngx Sewsiux jre siy' hiongr.

"Linw air jiac sniaw?" Hogbursingx qra caiwdnuax sangr .laii, Vngx Sewsiux mng nng xui luxsu.

"Guehniuu heaxvniaw siongrr cutmiaa, dniardiyc rair qiyr .jit .hxun. Cunx :ee dyrr qaux hro Vngx .Sensnix vaiviw," dongcongx cuir kuair, singx qongw singx ngiaa.

"Cangsuanr qamxx iarr byy jiac?" Sewsiux mng jre dirr ix duiwbin :ee.

"Guaw jiac bacvnix-sor," Gnaxsunn qanxiaur qra rinr. Vngx Sewsiux dimr tauu, hiongr hogbursingx et ciuw beh qiyr cair.

"Hevniaw, jnir lohii, qapp qaliw-xiaa qxex, dingw:a jiaxee juw nng langg hxun. Erdew beh diamw :ee cuann snax xee langg ee gxiac. Jit xee samvuex bacqox, cnibogquex lingxvnuaa iarr jit xee laii. Jit vnuaa vikhap craw losunw, ingwcair iarr craw .jit .vnuaa. Hongrlaii-caxvng mair camx bacsox. Lingrgua cuann jit dniaw snghiamx tngx, juw sor :ee." Jiokk qudcuir, Sewsiux juwbunn dyccair benw sniaw quer sulu.

Hogbursingx qra soxx diamw ee cair qycc liam jit vaiw, liauxau qra menu jongw siux .kir dyrr tejauw.

"Guaw kir linw qongsix quixnarr jua, longxx byy knuar diyc liw," dongcongx kiw jit xee uertauu.

"Guaw jarhngx jiacc cutqog dngw .laii," Sewsiux qaixsueh.

"Kir dyhh a?" dongcongx duix lyc mng.

"Diongqog," Sewsiux dab.

"Kir cittyy?" dongcongx qycjaiww duix.

"Kir hiax camqax genxtyxhue qiamx camquanx iyc-ciangw, marr u kir vaiwhongw lanw Daiuann kir ee jit quaw kiwgiabjuw qapp sinsiongx," Sewsiux unn aw suecbingg.

"Acc si dirr Diongqog dyc'ui?" dongcongx mng iauxx byy qauwkuir.

"Quixnarr xui. Mrqycc genxtyxhue si dirr Siongrhaiw."

"Kir quiw qangx?" Gnaxsunn mng.

"Jap qangx. Gmail dirr hiax byy lorsaiw, rair vnuaa cniuu jiacc siux e diyc," Sewsiux qniaa sukangx qongw amwgiw, bagjiux knuar Gnaxsunn.

"Sniaxmih jiacc Gmail, Facebook qapp Line marr qangrkuanw byy nowsaii," dongcongx ciamwcuir, m jaix kenkunx.

Lingxvnuaa ven :ee singx sangr .laii. Sewsiux cniaw nng xui luxsu kiw di. Uat linr dngw, caxvng qapp cnicair iarr liogsiok jnriu dyh.

"Liw byy jiac cyx. Acc jiuw lehh? Qamxx iarr byy limx?" Sewsiux mng Gnaxsunn.

"Ix jurr kir siulen, lenrr beh'axjiuw dy' byy limx. Guaw qongw ix jauxhuew-zibmoo ar, ix iarr byy decc qra lanw ciuwcaiw," dongcongx qra Gnaxsunn kuex.

"Jiuw siauw byy sniwmia, siauw jiuw simtauu be dnia," Gnaxsunn dyww vog.

"U junxjad, mair quewqongr, angg jiuw samvutsii aw limx .quaw, duiww sintew be baiw." J.-jingwqingx-q., Sewsiux ue qongw suwvnidit.

"Beh air sintew hyw, angg jiuw m si iauwiong. Genwvii ingmic m si hyw dairjir," Gnaxsunn qongw, j.-jonggiamm-g.

"Liw byy hingr tiaujenr?" Sewsiux ee sunmng u amr ir.

"Knuar kuanw vaar," Gnaxsunn rinr. "Narr byy vit'iaur, e siamw dyrr jinrliong siamw. Lanw vunw kacc dew, bexziw-aw byy qraur, be kamx did ciwhiamw."

"Liw duw diyc dairjir kacc e lunxdnaw," Sewsiux qongw, uerkuanw kacc singg si he qetlun, m si jit xee gibun.

"Ix sewqair siyw dnaw :ee, liw m jaix?" dongcongx capcuir. "Jiyx ix jre hunn-dingw vueciax iacc knuar quixaxcud, ix longxx qra lanw hnair tauu byy air cir."

"Qriuu simx vingjing dyrr decc be did diyc ar, cue ciwqig si qaqi tyw puee tniar," Gnaxsunn venrvog.

Jit ciuw hii jit ciuw qxex, jauxdyh :ee jyr jit xe sangr .laii. Sikdir suiw, hyw jiac kuanw, longxx m si Gnaxsunn ee cair. Qajair, juanling uirr ix liaurliw ee tngx duewbuew marr sangr laii qaur.

"Jiac cair byy jiac cyx, hunjiuw byy damx, qycc iarr byy air cittyy, uac lehh u sniaw sing'ir?" dongcongx qongw, cuir-aw qig kiaur kiaur.

"Vryw an'unw byy decc qriuu sing'ir. Dagg qangx narr u tangx v.-ving'anx-a. dyrr jiok'ir ar," Gnaxsunn qongw suah, giaa tngsii-aw limx jit cuir tngx.

"An'unw qapp busiongg qamxx be sna' jringx?" Sewsiux vrag uerqud.

Bih cuir, Gnaxsunn cimsux. "Busiongg si henrsiong, iarr qnaxx si sowdnia :ee, byy tangx hro lanw jangw. Beh an'unw bor dyrr juanzenn jairr guaw. Ngua jit qxur qongw, sewqingw venwngua ciangjai, jnuaxngiu binrduir, qaqi si erdangr qanxdyc :ee."

"Cid jxingg liok iok si tensingr. Sniu huanrr sniu, beh jyr ingqaix byy hiacc qanxdanx," Sewsiux hnair tauu dnir ciyr.

"Jex guaw dong'ir. Jiac snax vew ingwcair byy jaidiau jnriu setenx," vangwdnaw giaa tauu knuar, Gnaxsunn qapp Sewsiux sir bak siongduir.

"Omidohut or. Guaw ing'amr hii lar bah lar tunjiac jiacc je, qiglogtenx unxdangr byy lanw ee xui," dongcongx qig ueaxzinn.

Siongrau jit cud hevniaw sangr .laii. Dongcongx iong di gneh jit der dirr Gnaxsunn binrjingg lang. "Liw knuar guanw jiac hevniaw, be genr qaax?"

Gnaxsunn ciyr ciyr, hnair tauu.

"Be genr, acc e iar .be?" Sewsiux tamwmng.

"Genr qapp iar longxx si iogliam, longxx si jip'ir soxx drir," Gnaxsunn dauc dauc aw sueh kiw. "Qniwnarr u iogbong dyrr e u libdniuu. Iong qaqi ee libdniuu knuar surjingg, kacc anwjnuaw dy' iuxhan. Tam'iok dng be li dyrr be tethuar. Be tethuar, be singxgo, ciauhuann dyrr e lentac laii."

"Langg narr venr qaxx cincniu liw longxx byy iogbong, zinlui m liammix dyrr qomox jec jxingw," dongcongx lingxciyr, vnuar vetsed.

"Sewqair jerje soxjai ee ginxaw jiac be vaw cri be dua, jaboxginxaxtunn bue qewangx dyrr ursinx, jex jiacc si henrvo quanhe zinkauw ee bunrdee," Gnaxsunn binrsig venr jiokk giamsiog. "Qycjaiww qongw, henrdai kyqix jiacc hautdenw, qamxx diyhh kir huanlyw byy qniaw tangx snix? Qniax snix sniu' je kacc sidjingg."

"Soxiw qongxx, liw byy air snix?" Sewsiux mng.

"Angngix :a vunxsinx dyrr si sik'iok ee sanxbut. Snix. lau, vni, siw... jitt dringw hxang veh dua kow, snix vaii derr id," Gnaxsunn qongw, dyh-dingw ee qunxjuiw pangg kiw laii limx .jit .cuir.

"Qamxx m si qongxx, itdanr juer laurbuw e venr kacc giamxgni, kacc qenqiongg?" dongcongx iarr sniu diyc jit qxur laii sna' qig.

"E kacc qenqiongg .be singx lag jit vnix. U ginxaw liauxau, ingxingw e venr qyckacc jursux, qaqi e tangx juewlangg dyrr hyw. Air qniaw viw langg' kacc gauu, kyxcir ee hunsor ngiaa quer jit hunx sngr jit hunx, sokdo viw langg kacc qinw jit biyw sngr jit biyw. Juer verbuw :ee qaqi suving dyrr jiacc dang, beh anwjnuaw qar qniaw duiww langg' liongsen u tniawsimx?" Gnaxsunn dyww mng jairjy :ee.

"Verbuw tniar qniaw hro liw qongw qaxx jiokk m dat. Lamluw jiqanx ee air m dyrr qingwqax benw lun kiw," Sewsiux cinwciyr, iyy tauu.

"Dyrr driyc m," dongcongx dongkir qra janrsniax. "Ongxqow-laiqimx, hiacc je hiwqiok iacc siyxsuad longxx decc janwtanr aiwjingg. Jairr liw decc knuar, hex m longxx pnar qxow?"

"Air dangwjinx junjai m si byy. Diyhh byy susimx, duiww langg' byy su'iok ee tniawtangr iacc huirair jiacc e quxdngg, marr jiacc be vniwkuanw iacc venwhingg," Gnaxsunn qongw, binriongg u venr kacc ziusun.

Jauxdyh :ee pangg snax nguaw o-aw seqokbiw laii, qongxx si cantniax sna' hing :ee. Jit dxngr vng qaur qaxx buextauu, dongcongx mng Sewsiux nacc e sniu beh kir jersenn.

"Jit xee ving'iuw vyr guaw kir :ee," Sewsiux qanxliok qra dab.

"Liw qamxx e qycc kir?" dongcongx jin' hnowhenn.

"Narr byy qycc kir, qnaxx e byy jaidiau qapp Gnaxsunn Sujew duiwdamm. Narr beh qycc kir, guanw cur nirr viacduu lairdew ee jit quaw ngiujiuw rair singx cuxliw driau kacc si," Sewsiux naxx qongw naxx decc ciyr. Dongcongx tniax diyc iarr dngw ciywbin, duiww jitt xee huedab henxzenn u cingwir. Gnaxsunn diam jecjeh, bin hongrhong zet, m jaix diyhh duer lecc ciyr iacc u vit'iaur jit qxur nng qxur tnrix tauu tiab buew.

Sewsiux tec sinwiongrkah hro hogbursingx huatsiaur. Id lxamm zi luw qniaa laii dirr dxiamr-gua. Cantniax ee langg qra ciax sraiw .laii, qycc ter luxsu kuix ciamngg. Dongcongx byy ziongrui, byy virhiamm, kir jiamr taujingg ee xui qnuaw huwhur. Gnaxsunn jre aurviah, hnuasimx-hixguan.

"Ing'amr sriu liw singrir kuanxtai, hro liw jin' suxhuir," ciax kixqniaa, dongcongx qamw Sewsiux ee jxingg.

"Dysia liw singdingw guanw jitt qnia sittauu qiuwhuew," Sewsiux huelew, ue qongw diyc suwvingsanx.

Lirkuix cantniax, benw go hunjingx dyrr qaur dongcongx inx daux. Dongcongx lyc ciax. Gnaxsunn iarr duer lecc lyc .kir tangx ngua jre taujingg jiacc hac lexlo.

"Qitai au huee jaiww sionghue oox," dirr ciax guarkauw, dongcongx duiww Sewsiux qongw.

Vaiwlak ee veh diamw gua, ciax decc jauw sun sun :a, byy sniaw e trad. Qedingw ee neondingx siamw sicsih, suiw-baiw jairr langg' knuar.

"Liw dirr qamxjingg-siong bad sriu kikkuix," Sewsiux vnuar mng vnuar lun decc qra damxhongw. Gnaxsunn uat tauu qra ganw .jit .xe, byy-cuir-byy-jic.

"Liw byy air dramm jitt hongbin ee dairjir?" Sewsiux mng.

"Dyrr si byy sxingg jingwqyw a, iarr byy sniaw qiqiok tangx jiau'iauu :ee," Gnaxsunn puee puee aw qongw, qingqactauu giaa .jit .xe.

"Sniaxmih dingxinx?" Sewsiux qinxsin sna' tamr.

"Javolangg vangr jaboxlangg qamxx u kueckiamr in'iuu?" Gnaxsunn koxciyr iur sniasueh.

"Qamxx erdangr qongw jit xe aw laii camkyw? Guaw jiac qaxx jitt xee huer, m bad qa'ngg vangwsag .quer," Sewsiux vangr sniax qongw duarue.

Gnaxsunn dua lat cuanw jit xee kuir. "Byy suiw, byy siauwlenn, berhiauw sainaix, hamban juxjiac, be snix, be..."

"Liw be snix or?" Sewsiux pacjam Gnaxsunn ee uervnir.

"Guaw si vixping laii qongw," Gnaxsunn qew kenciyr.

"Liw sriux koxhingg si uirr beh acjic imiok." Srinn diyc uerciux, Sewsiux iurqycc u lunrduanr.

"Jiyh liw duxjiah ee ue qongw, langg u cid jxingg liok iok. Aiwjingg ee haghunx si suanxsiux, byy hiacc quandiong. U suanw byy suanw, si dingkyx iacc vutde, buexbin longxx tangx quewlenn. Qra knuar sniu' dang si qex giaa qee." Gnaxsunn qongw, snah simkuir.

Quer jit xee cniangdingx, ciax sraiw jnriu qyqer. Diamr dirr quann diamw, dua Daivag ee iarqingw dirr bag'e.

"Acc liw lehh? Surgiap vangr lehh, jit jua kir qaur snuadingw yc jyrsenn-unrkir iurqycc uirr dycc jit jann?" Diyc qaur Gnaxsunn cud dree.

"Guaw si laurqonow, qurnii jiacc siw bow. Sensux narr junw si jiauww jingwtauu kindang kiyh hagsingx, jiauww gxiac, guaw e vaii viw liw kacc taujingg," Sewsiux qongw, jin' byy iwsinn ee kuanw.

"Liw jiokk siauwliam linw bow," vnuar mng vnuar lun, Gnaxsunn decc yc jin' qinw.

"Siauwliam m si jingwkag ee dongrsuu," Sewsiux qongw, uat tauu qra Gnaxsunn knuar .jit .xe.

"Byy, rair ing dycc jit xee dongrsuu jiacc driyc?"

"Guaw narr jaix, qiamxcaiw dyrr mrbenw jauw kir snuadingw ar."

Gnaxsunn uat tauu, hautqenr Sewsiux marr dngdecc qra knuar.

"Guanw bow bad tyw kechniax qapp langg' tongqanx, tec guaw tanr ee jnii sed endauu hro guaw ciog .diyc," bagjiux knuar lo, Sewsiux sniasaur ving'unw ving'unw.

Bu'iwqanx le diyc langg' ee sukangx, duc diyc langg' ee huiwbuw, Gnaxsunn cokgok jiokk vut'anx byy qycc kuix cuir, lenrr cuanxkuir dy' qig simsimx, m qnaw sniu' dua sniax.

Lyc qyqer laii qaur cirqex, ciax-lai iuguann diam jutjud. Nngr duiww jit jxy tenqiyy quer uat zip laii Gnaxsunn inx daux ee hang-aw, lordingx byy jin' qngx, iarr byy vnuar xee quewlorlangg. Qaur der, tingg ciax. Gnaxsunn jiacc beh suecsia, byy-di.-byy-dang, Vngx Sewsiux zic uaw crunx ciuw qra lamw. Gnaxsunn uiwhniah diyc cniqniax, sunwsikqanx kiw gongrsinn byy qapp ix duxjuiw. Sewsiux sanwdnaw qra uaw dirr ix hingkamw ee luxtew lamw qyckacc ann, tauu ngar lyc singrser beh qra ngaxcuir. Sniu diyc duxjiah jre dirr jitt xui ee dongcongx, Gnaxsunn huehunn, cuir qimxmew uad duiww vnix:a kir m hro ix saixquewbew. Jin kuiwlat duah lehh dyrr beh lyc ciax, qinw viakviag naxx jit xee bongrjong qxuiw, Gnaxsunn giaa syxsii kuix cur nirr ee duarmngg, byy qycc uat tauu knuar.

7.

Lexvair jaixkiw, iam lewler ee zidtauu pak kacngx, Gnaxsunn iauxx dirr bincngg-dingw lanxsix kunr. U iwdir qinw beh kixcngg, sinkux m sriu ix cesaiw jin' luexjir. Nng vingg ee bagjiupuee dang hnuaichnuaih tner be kuix, jitew sen laklag byy air dinxdang. U qa'ngg inwdamr, qongxx siongrqaiww byy dirr vaiwid jaixkixvox, uerqyw e singx qaux .cud .kir, kanvanxzi ee zirqyw langg' u hro ix kuanuan jit lexvair. Snaaxkor jit drunx naxx snuax iauxx bue sew. Amwtauu aw a'buw dngw .laii ixjingg diyhh vniar cur-lai. Kangkuer jiokk andauw berdangr siyw tingkax. Byy qinw vran, cngpox qyckacc sox iarr byy huatdo songxsimx kunr.

Siangx kax dac lyc de iauxx kunwbin kunwbin jiokk kiamwsinn. Lyc bincngg singx qiamxjax ciuxqix, byy denrue, byy mesiji, kiokk u jit dniux viaudee qiyr juer "quewongw" ee denrjuxpuex decc tingwhau ix. Gnaxsunn quanknuar huad puex ee siqanx. Vnuawmii nng diamw vnuar!

Simjong pogpok cingw, ciuw pirpi cuah, dniwbak juxser knuar, Gnaxsunn qui' sinkux ee sewvaux jiauu jingsinn.

hongx qnuaa ho dua ee amwmii

ix dirr lanw binrjingg qui lecc camwhuew

qiyr lanw siawbenw ix mair siaw hiusux qapp ix hiulii

surgiap decc vniar

ginxaw rair cniaa

qeqangx cua qniaw e tuax pxangg

qojiongx-bunai

kangkag angbow juer snax dxangx

itdit qaur qurnii ix quewsir

liw qapp laurbuw ee sing'uac guaw e quanqor

setsuw liw ciuw beh hro guaw kanx

guaw tangx qniaa cud ongxquer ee oamr

narr si liw u iwhiongr juer guaw ee pnuarlam

Vudbunn ee derjuw byy haulak

jiac qaxx quer go-jap

dandanx liw hro guaw simx qycjaiww dinxdang

Puex byy dngg, mrqycc u amwir, luerdiongx jit quaw zirganw vauhamm jiokk je jingjad tangx hro langg' cimsux. Tak jit vxenr byy qraur, Gnaxsunn jimjiok qycc knuar, nng vaiw snax vaiw .quer, iauxx siaulap be liauw li.

Vixjiyr jingg mii dirr ciax-lai ee dongrjog, jitt dniux puex u singg proposol, jingcax cuwsu dendyr. Hingdong qapp suatbingg jiauvi, beh air m air, Gnaxsunn beh quad jinwjingg diyhh sniu hunbingg.

Jit ciuw sauwciuw, jit ciuw vuawqix, benw ing taukag ee sittauu naxx decc jyr. Qeau juer sitdig hro ix qniasimx, cauxsyh iarr e knuar juer juaa, lingcuw cue jit xee u decc siuhing kacc be vuerhuanw :ee, siongwtew dyrr kacc cinwcaiw. Capjauw si anxnex qaax? Vnivnii jyr oquix, u tniar bow qapp byy tniar bow, dycc jit xee e kacc cionghun? Kir snuatauu-kokbuew hagsenn qriuu tauxvangr, ix duiww bow si diwhun iacc m qramx? Qaqi qapp laurbuw ee sing'uac sriu ix jiauwqor. Huanruii hiacc kuah, vaux snuax vaux haiw, ix decc qongw :ee si sniaw? Muaw vxag ee giga, tangx duiwjiab qra mng mah? Siaw puex kir qa'ngg mng qaxx u jit qix vner, lorbuew kiokk byy-her.-byy-lyc, m si sniaw dairqor, jing'ir vutqaix.

Lacsap snxax jit dua hniah sreh zip jit kax deaw tec kir sexsnadiamr, ixtauu-aw jre lehh tniwsaix, jniar sniu dyr sniu, langg nua nua. U jah jit vunw ceh vunxdew anwsngr naxx danw naxx knuar, ix lenrr qra tec .cud .laii bongxx henx dy' byy hingwdauw. Snxax sew hyw huedngw qaur cur. Kuix denrnauw uirr singqer. Quewkir zxic-sir siyxsii huatsingx ee dairjir dirr taukag-lai sec linlongx, jyh u sxid jiacc quaiwqii.

Votuann qra cniaw .cud .laii. Quiw hunjingx aw quer, simqnuax iuguann zuu cangxcangw. Qaur jiax laii u singxgo, siamxbih m si taulo. Decc ducqux ee denrnauw qycc qra qiyr cnew, jap qix jnaixtauu-aw tniax taukag jixhuix.

aiwjingg si ciahuaa ee mic

guanw hurdamx be kiw

byy cunn vnirvunw

siongrr qniax sitkax diyhsiongx byy jaidiau idi

Puex qiar .cud .kir, dimdang ee iwsinn qyxvitzenn u kacc siautauw. Danw puex si lingrr kuanw ee tuabuaa. Hing did duiwhongx byy hro ix sniu' danxhau, huepuex dirr vnuar diamxjingx au.

aiwjingg si iamm si cor si dee si bit

jiac suienn-sor :ee knuawtai jing'enn

qamxx berdangr iong vnivnuangiu ee kiwkair cuxliw?

Taukag iauxx zuu qawqar, langg' iurqycc danr jit xee bunrdee lyc .laii. Qiogser bingg ~ ~. Duiwtauu diddit jinwvingx byy qiux ciuw. Simqnuax be andnia sniu be huanciax :ee jixu tewsiuw. Denrnauw qnuiqix, Gnaxsunn beh jiamrsii tewcud jenwdniuu.

Amwhunx lak diamw tongw, hniaqyx qra laurbuw sangr .dngw .laii. Gnaxsunn sinkux sew hyw, taujangx iauxx damm damm.

"Soxvaiw jiac vng vaw, a'buw dyrr tyw beh jiac iyc-aw. Liw si u congr sniaw hro jiac, si bor?" hniaqyx mng, caur tauu caur bin.

"U a, qenrkongx sidpinw, qor qinqud :ee," Gnaxsunn dab.

"Hex m quir somsomx?" hniaqyx qycc mng, iux tauu iux bin.

"Ving'iuw sangr :ee, benw jnii," Gnaxsunn qanxiog qra rinr.

"Cew! Liw si m tangx hro a'buw ovec jiac. Jiac diyc qew iyc-aw siongsit si e byy mia!"

"Guaw jaix lar."

Crinr tauu crinr bin, duarhniax siyxmue nng langg uermngg longxx byy dngg.

Zidjiw decc quer u langg tangx sniu, amwmii decc kunr qycjaiww u bang. Ciax-lai cinzet ee mosyx qapp puesinr qamxsingr ee qywvik qaiww singg longxx m bad huatsingx, E-MAIL iguann jujux laii uanxzenn ingxsiongquer. Jingquax jit qangx jit diauu, sengiuu lau quax qaccamx Daigiw :ee, jiyc'iong quakig viauw simsniax iarkuxqnaw, Sewsiux vunxsinlangg byy qycc u jit qxur vnuar zri.

"Liw jitt vaiw ee cacdoo jiokk u uahkir, puewsig marr cuttenx suiw." Bue bad u, jongxvenjib cet'ir kar denrue laii qra ylyw. "Liw jiacc cue jit qangx laii cutvanxsia. U jit vunw ceh ee hongbin beh qawtog .liw, diyh'air qapp liw singx hiabgi."

Hiw cud bongrgua. Jarhngx kir iuqiok niaw jnii knuar diyc i'giac, siongrsin byy nng-bxan, jiacc decc huanlyw sittauu narr be suawjiab, cutguec qnaxx e diaur dniaw diaur jaur. Denrue qongw suah, Gnaxsunn simlai itdit juimx .kiw .laii.

Tnix hniaxhniaw. Hongx kinx, hunn vyc, zidtauqngx unhyy, byy cua a'buw laii kir qonghngg suaxkax qongw be did quer. Cipvorqniaa, qniaa qaur hangrtauu samcelo, u denrue laii. Knuar diyc denruerhuanx, Gnaxsunn simqnuax pogpok dnua, qnuaw beh jriab, hiamw jit hiamw cic m driyc xui.

"Halo, si guaw."

"Guaw jaix."

"Liw dirr guarkauw?"

"Cua guanw a'buw cud laii laux laux lehh. Sniaxmih dairjir?"

"Marr byy. Sniu beh tniax jit xe aw liw ee sniax nardnia."

"..."

"Liw longxx jaw kunr iacc nguar kunr?"

"Jap-id diamw vnuar sngr jaw iacc nguar?"

"Liw jap-id diamw vnuar kunr? Guaw jaix a."

"..."

"Singx anxnex. Guaw jiacqycc kar hro :liw."

"Hngr."

"BYE BYE."

"BYE."

Qra ciuxqix-aw dre dngw kir gu'axkor aurviah ee lakde, Gnaxsunn kanx a'buw quer samcelo. Quanw ix sigsai, cnihun, iacc vnuar bin siongsik, qenww dirr qonghngg duw .diyc .ee, Gnaxsunn longxx ciyr bunbunx qapp langg' siy' jiycmng. Qimdnuawzit hongx jiokk ziuu, zit jiokk nngw. U jitt jiongw tnix si zuarr quw ixjingg, Gnaxsunn sniu be kiw .laii.

Lingbuxciax unliauu aw sag, jit xee mamax cing jit sux henwniaw u suwkaisniux ee suatcnix ngiujongx dirr qonghngg-lai sehkolinx. Gnaxsunn u jit niaw sna' cincniu :ee iauxx kngr dirr cur nirr ee ngiuhogduu jiokk quw byy cing, siyw danw dngw .kir u pacsngr qra cue .cud .laii hro ix qnir tnizit.

Itvnuax qongsix u siongrvanx ee zidjiw, Gnaxsunn longxx qapp a'buw dauwdin. Iurqycc qaur vaiwgo ar. Jiac amr vaw beh qra a'buw sangr kir siyxdi inx daux, qniaa qaur ciavaii-aw jiacc huatqenr ciuxqix-aw byy jah, songxkax, vandnua dngw kir tec. Beh uaw lak diamw cutmngg, qauw diamw gua dngw qaur cur singx knuar ciuxqix. Snax tongx denrue byy jriab qapp jit diauu mesiji, jiauu qang jit xee denruerhuanx huad :ee. Siongrr tauu:a jit tongx si lak diamw tongw kar :ee, mesiji qiwjair ee siqanx si lak diamw sir-jap-cid.

Mamax qamxx hniaqyx jriab .kir ar? Sniu beh iog liw jiac amr.

Byy qra kar denrue, Gnaxsunn iong mesiji qra huee:

Jitt qywguec huexkaux diyc guanw siyxdi. Inx ang'axbow ehng'amr longxx rair qavanx. Guaw diyhh qra a'buw sangr kir inx daux. Jitmaw jiacc qaur cur.

Tekst huad .cud .kir, Gnaxsunn qapp pokqongw ee viah siy' duiwsiongr, vnuar diamxjingx quw quer byy-dongr.-byy-jing. Beh uaw jap diamw denrlingg juer sniax. Mngg kuix .kuix knuar diyc langg dyrr kia dirr mngkadaux, kia diamr mngg-lai jitt vingg :ee tehqingx, simjong hiamw dnia .kir.

"Byy beh hro guaw zip kir jre?" Sewsiux mng, jit ciuw hnua mngkingx.

"Puawcuwtangw-aw, pnaixser cniaw liw zip .laii," Gnaxsunn qongw, tauu lee lee.

"Anxnex lanw laii vadd xui."

"Vadd xui! Beh kir dyhh?"

"Guaw jai'ngiaw jit xee tangx hyw knuar iarqingw ee hyw soxjai."

Gnaxsunn dnia dnia sim .jit .xe. "Liw siyw danw lehh. Guaw kir giaa syxsii."

Vnuar iamxmngg, Gnaxsunn uaddngxtauu zip laii vangqingx, mihqnia sax lehh, dingxtauu snxax sikjuiw u kacc tunn be hur ngua, denrhuew ced huax jiokk cniuxcuah, Sewsiux dirr mngcuiwkauw kia uervingx.

Gnaxsunn qra duarmngg giuw uaw .laii, Sewsiux jurzendig trer jit vo, ix hitt daii ginhuesig ee LEXUS tingg dirr cuahqag suisii knuawqnir-q.

"E kir qaur jiokk hng .be?" Jre zip laii ciax-lai, Gnaxsunn mng.

"Vutjiw aw u .jit .jad .aw. Diyhh piacjing jiacc u hyw qongqingw." Sewsiux qra nih bak.

Vaiwgo-amr quer jap diamw ar, qelo ee langg qapp ciax iauxx laurzet cecex. Binaxjair benw siongrvanx, beh tentaix jniawdngsii.

"U unrjuanxciuw decc sraiw :ee hitt daii BMW, qamxx iarr liw ee?" Gnaxsunn bongxx cue ue qongw.

"Hitt daii sngr qongsix ee qongburciax, mrqycc longxx guaw decc suxiong kacc je," Sewsiux dab, kauximx byy quann byy qe.

"Nng daii ciax, nng qix ciuxqix, qongbu qapp sukiax dai hunx kiw jin' bingg be siy' lam," Gnaxsunn qongw, vnuar qra kiycciyr.

"Marr byy," Sewsiux hnair tauu. "Qongx :ee qapp sxux :ee diongx:a ee qaiwsnuar ciangjai hro langg' liac be junw rue be cringx."

Quer jit xee siangcelortauu, jingbin ee lo beh vreh snuaqia ar. Sewsiux diam jicjih, bugensuu, hyw cincniu jimjiog decc knuar lo, iarr huanrser decc cniaqig simjingg.

"Linw bow jairsnix ee sii, linw ang'axbow ee qamxjingg sniaw kuanw?"

"Liw sniu lehh? Ix amwjni dirr guarkauw decc cri qimhii," Sewsiux pngc .jit .xe.

"Hex si ix. Acc liw lehh?" Gnaxsunn sewzi aw tamwmng.

"Liw si anwjnuaw e anxnex mng?"

"Jnii byy nng xee vuac be dann."

Sinsig venwkuanw, Sewsiux cuiwqag suee suee. "Guanw bow u kechniaqyx, guaw decc draur huexqir."

Gnaxsunn bagjiux lililutlud. Bongxx mng nia, vut'ir, Sewsiux sit sit aw qra rinr.

"Linw bow qamxx jaix?" Gnaxsunn suawser qycc mng.

"M jaix," Sewsiux rinr, byy jit kig aw enuan. "Byy langg jaix. Guaw m bad qa'ngg qongw .quer."

Bin siyx hongrhong, Gnaxsunn qamxqag ciax-lai jiokk utzuac, sinkux jiokk siyzet. Jiauwliw, snuadingw e kacc cnilingw jiacc driyc.

"Liw bad qac'ir quer u bow :ee bor?" Diyc qaur Sewsiux decc cud bunrdee.

Byy sui' qra rinr, Gnaxsunn ee taukag-lai puu cud jit~nng xee javolangg ee sinngiaw. "U. Mrqycc, guaw byy qapp langg' jywhuew."

"Si lar. Liw jin' jursiuw, iwjir jin' qiongg gauu cunn dngg, huanrser si inenn iaxx byy singsik, enn iauxx bue puu marr u kyxlingg. Miardoo vutsiongdongg viw vutdingw," Sewsiux vaii jingliw. "Siongduir jing'air, singr ursii dendyww kacc dansunn."

"Anwjnuaw qongw?" Gnaxsunn lig bagbaii.

"Juer angx :ee cue tanwjiac jabow tauw qapp juer angx :ee kir air diyc vadd langg, liw narr si langg' ee qeau, dycc jit jiongw hro liw kacc dongr be diauu?" Sewsiux cud bunrdee mng dywdngw. Gnaxsunn dimgimm byy qra rinr. Sewsiux tanwser qycc vow jit qxur. "Iong qorr sniu :ee byy sngr tongqanx, anww lxut byy jue. Narr jiurr dyrdig-bin lun kiw, hex dyrr jairr langg simqnuax cuiciauu."

Jit daii HARLEY duarhingg qiciax dirr inx aurviah, beh ciauciax singx cic lacvah. Qiciax ee juxlangg cing jit niaw ox bakbag ee puesnax. Au jxy jit xee cing zedkor qapp tangxhiax ee memex qorr siangx ciuw qra ciajuw ee eriyx kip diauu diauu. Qiciax kiaa qaur inx jingbin, sir lenw ee ciajingdingx jiyr diyc siyxjiaxlangg odowangg ee hiaee, hiaangr quer katauux, jit siangx katuiw jiokk jiahbak.

Ciax vreh qaur jit xee quando, Dairvag ee iarqingw dirr ciatangx-gua. Sewsiux dirr snuavag jit xui kacc kuah ee soxjai tingg .lyc .laii, enzin qimr srid. Gnaxsunn kuix ciamngg singx lyc ciax.

Snuax-lai ee hongx u kacc lingw, Gnaxsunn qiuqnuaa, nng qix ciuxqud py hxingx. Duer dirr ix aurbin ee Sewsiux liur guarsnax qra muax, ciuw sunrser hnua dirr ix qingqah. Byy qra ix ee ciuw vuew .kuix, qeh nngw niaw snxax, Gnaxsunn iaxx qamxsiu e diyc javolangg ciuxjniuw ee siyliyx.

Cnxex qngx guec hen, iarsik cingsimx-bingbak, jit jua laii qaur jiax u qewdat. Quw quw aw jiacc jit daii ciax an' inx kajiah-au ee lo qingquer ixgua, siwvnix dngrdiamxsniax.

"Liw qapp ix anwjnuaw sigsai :ee?" Gnaxsunn mng, snia'auu qe qe.

"Guaw qapp si'angw? Guanw bow iacc si..."

"Liw qapp liw hitt xee sionghyw :ee, linw anwjnuaw sigsai :ee?" Bingg qongw, Gnaxsunn qycjaiww mng.

"Kir erqangw cutdniux ee sii, dirr denxlamxdniuu siy' bad :ee," Sewsiux unn unn aw sueh kiw.

"Ix iarr tauqelangg?"

"M si, ix juer giabbu decc ho'ngg cniar."

"Ix quiw huer langg?"

"Snax-jap dingxe hitt dah aw ee kuanw. Be qir .did ar."

"Linw dauwdin zuarr quw?"

"Nng nii gua."

"Au .laii lehh?"

"Ix kir drng diyc vadd langg. Langg' si tangx qra crua :ee," Sewsiux qongw diyc byy-lamx.-byy-ne. Gnaxsunn diam .kir, bunrdee byy qycc danr .cud .laii. Dudzenqanx, Sewsiux tauu ngar .lyc .laii qra jimx cuiwdunn. Gnaxsunn vangr quwjai ix byy lunr byy qunwqiong. Sewsiux jongwdnaw qra niaucqniauc ee siauxtew lamw uaw .laii, cuiwjic cimzip Gnaxsunn ee cuir-lai beh kir la ix ee jic.

Jit daii autobaik peciax puc .quer dua dua sniax. Sewsiux dnax tauu jimjiog, ciuw sog ann qra Gnaxsunn moh diauu diauu.

"Liw qapp linw bow, linw nng xee si'angw kacc jaw huanxvue?" Gnaxsunn mng, cuiwpuew dah dirr Sewsiux ee hingkamw.

"Guaw qapp langg' tiah huexqir vnuar dxangx au, guanw bow hro guaw huathen ix taux jiac cyx. Qra lanw qongw jiacc dauwdin nng~snax vaiw narnia, marr m jaix urngiaw iacc byy," Sewsiux qongw, ciuw naxx decc syx Gnaxsunn ee taujangx.

"Liw qapp langg' hitt jun narr byy cew, liongrvid liw e qapp bow lirenn, crua huexqir jyr aursiu," Gnaxsunn vnuar liahpow.

"Quer liauw srinx, suah liauw dai, sniu hex qex liauw sinn. Ganxjenn :ee jiacc si s.-sidjai-j, cunx :ee longxx qisiongrlun." Qongw suah, Sewsiux iurqycc beh tamqiuu luxsingr ee dunn. Gnaxsunn tauu kenr kenr, siangx ciuw giaa quann kir qaux Sewsiux ee amrqunw. Cuiwdunn siy' duw jitt diap, gensuu qapp giliam longxx qra vangwhetdiux.

Uadzuxx nguar, ciax uadzuxx je. Qongqingw u lewdauw, kixlyc ee cialiongw e hro langg' kacc vairhingr.

"Linw bow qamxx si puawvni quewsinx :ee?" Gnaxsunn mng, jit ciuw lamw Sewsiux ee iyx.

"Hngr," Sewsiux iong jit zri qra rinr.

"Sniaxmih vni?"

"Gamm," Sewsiux dab, iurqycc jit zri nia.

"Tuax zuarr quw?"

"Hauthen liauxau kacc byy vnuar dxangx."

"Ix si dir diyc sniaxmh gamm?" Naxx cincniu decc mngranr, Gnaxsunn ee bunrdee siy' lensuar.

"Nguar ar, hyw laii dngw ar," Sewsiux byy qra inwdab, ciuw muax dirr Gnaxsunn ee qingqah hiongr ciax ee honghiongr kir.

Huetauu ciax, jidlo dngrr sniasueh. Ciax sraiw laii qaur snuakax, Gnaxsunn jimjiog lorpiaux, diwqag beh kir ee lo qapp cur dendywtauu hiongr.

"Liw beh jair guaw kir dyhh?" Gnaxsunn mng, u giliam.

"Liw sniu beh kir dyhh?" Sewsiux dyww mng ix, auimx qerdiau.

"Sniaxmih iwsur?" Gnaxsunn u cnigii.

"Liw kacc air kir vngrdiamr iacc WEGO?" Bagjiux knuar lo, Sewsiux mng, sniasaur iguann dimm dimm.

Cuiwkiw qa xe dunn, Gnaxsunn hmc hmc. Byy tingwhau dap'anr, Sewsiux jueww ix qewsiok sraiw. Gnaxsunn simqnuax qunxqunxjun.

S.-simliam-l. vutsii quawdiaur qaiww sunxsinn, buexqiok si siongsimx. Jitt xee qapp ixjingg :ee si m si e byy qangg? Jit xee u siurqair :ee. qimzit uirdiyhh sinvnidaux jitt xee javolangg puawqair, si tangx iacc m tangx? Ciax decc danw angdingx dirr lorkauw dongwdiam. Limdin, lixdir cuiqnuaw ix diyhh lyc ciax tewsiog, simlai qycc qniax narr lyc ciax, cuxkir langg' e qapp ix snuawqaux, juadlo, sniu diyc dyrr jin' m qramx. Beh jnia' jap dxangx byy qapp langg' qauongw, Gnaxsunn liaurqiyr qaqi vingww vangwhiux, be qycc sriu jing'iok ziauxluan. Tnide soxx sed :ee, langg ee iwjiwlat diyh'air zuarr dua jiacc u jaidiau qapp ix dixdik?

Jap xee kiw veh xee lyc cniurr sngwvnuaa, simtauu iauxx bue qatdnia, angg dingx venr cnix dingx. Qycjaiww kixtingg kacc byy go hunjingx, handolu pangw duiww jniawvingg sraiw zip laii vngrdiamr ee ciady, Sewsiux qra ciax tingg dirr duarmngg cutzibkauw ee taujingg. Ciax qaux hro siaurdiw kir tingg, Sewsiux qra Gnaxsunn ee ciuw kanx lehh beh kir lenqui vran ciek in. Gnaxsunn tauu damr damr. Luw byy angx, lxamm byy bow, m si juer sniaw ziauxhai hongsiok :ee, tauwsiwlangg tauu vaiw qapp javolangg kuix vangqingx, Gnaxsunn uiwsiauxzinn, jiokk be jurjai.

Jre liulongg qaur jap-zi lxauu, hangrlo ee jnidiauu qau viakviag, kavo be juer sniax. Iong kacpnir kuix vangqingmngg, Sewsiux qui' lo qra Gnaxsunn ee ciuw kanx diauu diauu longxx byy vangr.

"Guaw rair singx kir sew jit xee aw ciuxbin," Gnaxsunn ser aw sniax qongw.

"Knuax knuax aw laii byy qnuaxqinw. Lanw u qui' amr ee siqanx," Sewsiux qongw, sniaauu jiokk unziuu.

Igvangg jamxzenn aw dua qingx. Venrsow qapp SHOWER qycc u qeckuix. Gnaxsunn ciangjuiw sew sinkux liauw vaux dua diauu binrqinx cud .laii, Sewsiux srinx cing vngrdiamr virvan ee iukada an' bincngg-qnii vreh kiw srinx qniaa hiongr ix.

"Liw jiokk pangx :ee." Bagjiux lyy dakdag qycc exsniax, Sewsiux ee iogjingg jin' cenxhen.

Qanda' lauu jit pax mngag ee dingx, li cngpox siongrr hng. Qigua :ee, Sewsiux jongw qra qimr huax. Sianglangg vreh jnriu bincngg, ig'ix trngr driau, dua diauu binrqinx tauw kuix. Ciacsinx-lortew jit duir lamluw, siautauw qigjingg jiawiong duiwhongx ee sinkux.

"Guanw bow diyc gamm ee vorui dirr juxqiongam." Dairjir vran suah, jit ciuw lamw qang cngg kunr :ee, Sewsiux suec'ue, bin hiongr tenhuavanw.

8.

Jing cnicnix ee tywvangg, lingxkiwkangx huad .cud .laii .ee si iid ee sniax. Vunxjniaa bak sarsi, Gnaxsunn bagjiux juer jit xe tenw dua luiw, bin sitsig, sinkux qiuquec qig tehqingx.

"Liw benw diyhqniax, guaw cingkir :ee," Sewsiux qinw qongw hro ix kuansimx.

"Qamxx e si liw uer hro linw bow :ee?" sniu diyc luerdiongx ee verving, Gnaxsunn mng, snia'imx e junr.

"Ingqaix m si," Sewsiux qongw, jiokk ser sniax.

"Liw iaxmaw byy huatdo kakding," Gnaxsunn qongw. Sewsiux qig sib sib byy cuiwjic.

Vingw jit xee srinx, Gnaxsunn bin hiongr hunxviah. "Duiwduu hitt xee giabbu, liw iauxx u vadd langg bor?"

"Byy," Sewsiux duiwcuir rinr.

"Guaw qamxx erdangr siongsinr liw qongw :ee?" Gnaxsunn mng Sewsiux, qiamx mng qaqi iarqyxqnaw.

"Guaw m si hiacc snuaxpec e lamrsamw laii :ee." Sewsiux u quaw huexkir, pue henx .kuix vreh kiw srinx, qra kondom vrag .lyc .laii danr zip hnuaitaudyh erdew ee vunwsywlangw.

"Liw hitt xee qu sionghyw :ee, liw u air .ix bor?" Sewsiux dywdngw laii cngpox-dingw, Gnaxsunn qra mng.

"Hex longxx quewkir ar. Mair huir simsinn sniu hiaxee," Sewsiux qongw, qra mipue giuw kacc quann.

"Singr viw aiwjingg kacc dansunn, jex si liw qongw ee ue." Gnaxsunn qycjaiww vingw jit xee srinx bin hiongr sinkuvnix :ee. "Guaw beh jai'ngiaw liw ee qacsimdur si dansunn iacc hogjap :ee?"

Lig bagbaii, Sewsiux trow jit kauw kuir. "Singr iacc air, jairr guaw, longxx byy siongqonggiap dansunn. Dirr siongqair, beh jinr beh trer erdid cunqiux, tangx diwsimx-diwmia, beh jngzenn vangwhed iacc vangwciuw marr byy bunrdee, juanquann jairr guaw ee ciuxtauu."

"Liw dirr siongdniuu qaiww singg jiokk henbenw, jiokk u ganw?" Gnaxsunn qongw, vnuar qra gex.

"Viw did jingdniuu dangxjinx u qex kacc lyhciuw." Sewsiux dab, vnuar suatciaur, ngar lyc kir jimx Gnaxsunn ee hiahbaii.

"Jingdniuu liw marr qaiww quanwciuw be hamban a," Gnaxsunn qra saksaux. "Ziog jiacc qaur guec nia, guaw langg jinw qapp liw dirr bincngg-dingw ar."

Gang .jit .xe, Sewsiux crunx ciuw kir syx Gnaxsunn ee hni-aw. "Lanw suisii erdangr vran qethunx, narr junw liw beh."

Jex qamxx sngr si qiuhunx? Gnaxsunn dniwbak qra knuar. "Dna' dauwdin jit vaiw dyrr beh qethunx, liw si decc qnuaxqinw sniaw?"

"Huninx e hro langg' simqnuax dikdnia, kacc benw kir juax ciamx sngr mia," Sewsiux kinsangx aw dab. Gnaxsunn qanda' tniax, byy inwue.

"Liw u beh qer .guaw bor?" Sewsiux duiww ix liahbak.

"Jiacqycc venrknuar."

"Venrknuar sniaw?"

"Jyr langg' ee aurbuw qapp hongrtai daqeqnuax, qongw sit :ee, guaw iauxx byy vaxag."

"Guaw laii anvaii linw qniwbin?"

"Jiacqycc qongw." Sueh liauw, Gnaxsunn bin qycjaiww kir hiongr viah. Dyw tanxkisinx, Sewsiux qra Gnaxsunn lamw uaw .laii, jit qix katuiw kuar dirr luxtew tngwciacteh ee sinkux, qui' amr qra ngaw lecc kunr.

U limr .jit .cnew, tnix qngx .bue m jaix, tangaxvor qau ducduh. Iauxx binn binn :a, Gnaxsunn u diwqag Sewsiux decc qra bongx, cuiwdunn dux uaw .laii ee sii, Gnaxsunn cuir kuix .kuix gniajih ix ee cuiwjic. U siux diyc inxdamr ee sinwhy, lxamm dingw luw xe, Sewsiux qycc qra tyw jit vaiw. Sianglangg ciek aut laii dirr lobbi si snax diamxjingx au ee dairjir.

Siaurdiw qra ciax sraiw .laii, Sewsiux sniuw ix jit dniux angsig ee langtaujuaw juer ciuxsngjnii. Vaiwlak ee jaxvox byy ciadin, lo qamxqag kacc kui'uii, simjingg iarr duer lecc kuikuah.

"Linw daux longxqiong kia quiw pnee? Nacc qaxnaxx ec ducduh, m si qaiww hyw kiarkiw ee kuanw," Sewsiux mng, ciuw hnua handolu.

"Hex jojiyh :ee, m si guanw qaqi ee cur. Kacc dua qingx :ee cuwsuer lap be kiw," Gnaxsunn qongw, ciuw decc jen jngxqah.

"Jitmaw ee laurlangngi vran kiw u liauu u diau :ee jiokk je, setvi jamgamm, juangiap-hunwlen qauwqag, diamxdinn, kuanqingw marr vutjiw aw cing'iux. Liw u beh kyxlu qra mamax sangr kir hiax bor?" Sewsiux mng, bagjiux jimjiog lorjua.

"Kaix be lyc, jiamrsii byy jitt xee anwsngr," Gnaxsunn huedab byy vnuar diamw diuduu.

"Snesingg si guaw laii jiliw. Jnigiac ee dairjir, liw benw kuawsimx," Sewsiux qongw, duiww Gnaxsunn ciyr .jit .xe.

Tniax jit xe cuir-aw kuix hiahiax, Gnaxsunn sraiw cuahbak qra knuar. "Qaxnaxx m si qaiww tywdongr. Qycjaiww qongw, laurbuw m si guaw jit xee langg ee. Liw ee sim'ir u singlingw dyrr si."

"Liw ee cinlangg dyrr si guaw ee cinlangg. Guaw cniaw jiahvng iog liw ee hniadi-aw cud laii siongliongg marr ersaiw. M hyw qapp guaw sewzi," Sewsiux cimciyc, qongw diyc jiokk sunrjingg.

Iyy tauu biciyr, Gnaxsunn byy ciur ix.

U denrue laii. Sewsiux jit ciuw hnua handolu, jit ciuw kir cic ciuxqix.

"Lu Siyxjiaw, simxmih dairjir?... Guaw jaix, ehng'amr guaw e kir... Mrbenw, tongdix Goo Qingliw kir huadlyc... Hmr, hyw."

Denrue qongw suah, Gnaxsunn uat tauu qra knuar.

"U Zidvunw ee langkeh beh laii, guaw diyhh kir anwnai. Qongsix ee suvan kar laii decc tecniw," Sewsiux qanxiaur qexsueh.

Qauwui tingg ciax, Sewsiux qra Gnaxsunn ee ciuw kanx laii jimx . jit .xe. "Rair qaur vaiwzi Zidvunw ee langkeh jauw jiacc e kacc juriuu."

"Liw jyww liw kir byy ingg, mrbenw huanlyw guaw," Gnaxsunn qra ciyr .jit .xe.

"Guaw jiacqycc kar denrue hro :liw."

"Narr byy siqanx, benw kar marr byy iauwqinw."

Gnaxsunn lyc ciax. Danw qaur ix zip .kir mngg qnuaix .uaw .kir, Sewsiux jiacc sraiw lirkuix.

Zidjiw decc quer qex jit hxang qitai, u qniwbin byy qniwbin, Sewsiux dagg amr longxx e kar denrue laii.

"Byy tniax diyc liw ee sniax e sitbinn." Sewsiux jiar denrue tuansangr jing'ir. Junw huelencuir qamgenn-kaxgiw nia, Gnaxsunn marr sna' dingwtniax.

Byy qycc jiauwgiac decc jingrsiux, qui' qangx decc sniu hitt xee javolangg jin' liauw simsinn. Vaiwgo vunxjniaa u cuir iog beh siy' qnir. Beh amr aw, Sewsiux jit tongx denrue laii, qongxx qongsix limsii-lim'iau u dairjir rair cuxliw qniaa be kuix kax, qapp Gnaxsunn qaiw iog vaiwlak jywhuew kir jiac amr.

Ciuxqniar dirr ciuxtauu, jid'err giaa kacc qin, ovanx qapp likhunn knuar qnir qnir. Sniu beh buah jit xe aw binriuu iacc pah jit xee aw huehunw, qesix qapp jailiau jiauu kiamr. Sewsiux air pangkir. Byy pangjuiw tangx punr, sinkux qorr satbunjingx sew hro pangx qongwqongr marr sngr venwvo.

"Guaw u qapp langg' iog binaxjair beh knuar cur." Amwvng jiac vaw, Sewsiux qra ciax sraiw kir luxquanw. Nng langg sionghyw quer, buanxjiog liauxau, Sewsiux qongw kiw, bagjiux kreh kreh.

"Atqer zuarr je?" Gnaxsunn mng, dyw tanxciyr iauxx liyc aw decc cuanw.

"Nng-bxan-sir. Nng qingx vangg. Qycc qra jam jit~nng cingx aw ingqaix byy bunrdee," Sewsiux qongw diyc jai viacviah.

Nng-bxan-sir ee jidvnuar si bxan-zi, Gnaxsunn cuir sngr, viw jitmaw dagg qywguec decc lap :ee qex nng-cingx. U liulongg, jairqin u qonghngg, li Sewsiux qongsix be qaiww hng, qewsiaur dirr nng-bxan-go ixha, diauqnia qongxx si anxnex setding :ee. Iongxlyxngi dew siqanx-lai byy beh kir, suer jit qingx kacc dua qingx :ee, Sewsiux jiokk qencii. Dingw zit aw tee kiw ee sii, Gnaxsunn byy ngirgi, Sewsiux huandngw qangx sui' diogciuw kir bangrlo cue. Cuwsuer, Sewsiux qongw beh jiingr jongxvaulamw, Gnaxsunn duiww jitt jann kiokk u kuawgai.

"Acc byy, lanw liac dionghyy, hro guaw draur cud jidvnuar, anxnex m dyrr hyw? Vitqingr, vaiwlak sii aw guaw marr druar e diyc." Uerir jiokk hunrdun, qongw ee sii, Sewsiux qra Gnaxsunn nih bak.

Cur iauxx bue cue .diyc, beh iokhue iarr diyhh kir guarbin. Byy cincniu tauu vaiw juanqangx kir dua vngrdiamr, qycc laii dyrr jiurqin cue luxquanw jyr sanxquir.

"Dingw lexvair lanw kir knuar :ee hitt qingx, dionglangg u qycc kar denrue laii decc mng. Liw kakding byy air?" Sewsiux decc mng Gnaxsunn, naxx qra kondom hnir zip kir vunwsywlangw, dirr bincngg-vnix nia, mrbenw lyc .laii.

"Byy sexigjyy qanda' SHOWER byy lixsiongw. A'buw sew sinkux air iong jimr :ee," Gnaxsunn qongw, naxx decc cing lairsnakor.

Cuiwdax. Vangqingx-lai u virvan siyquanr. Gnaxsunn lyc bincngg kir tinn jit vxuex dee, Sewsiux qongw beh air beeru. Gnaxsunn kuix vingsniux qnrua jit quanr cud laii hro ix. Jiacc jap diamw gua, nng xee longxx amwqongjiauw, denrsi qra kuix .kuix qeqiamw knuar dniudanw aiwkunwsinn laii. Denrsi dngdecc vyr jit diauu Dalai Lama ee sinbunn, qongxx Cina iurqycc decc vangwdiaux, hangxhib, qiyr Daiuann jingwhuw m tangx huad ciamjingr hro ix laii hongxbun iacc vran huathue.

"Liw siongsinr henrvo ee Dalai Lama si jingg jit xee juanxser dautaix :ee?" Sewsiux mng, beh'axjiuw qok .jit .cuir.

"Si m si jniawqangw jingg:a hitt xee juanxser :ee vutciangjai, Dalai Lama longxx ginxaw-sii dyrr cutqex, jex si sidsu, benw siy' jnewcuir :ee," Gnaxsunn qongw, qra tanw-aw giuw qaur hiap-xe. "Sewqanx narr u kacc je langg decc quer cincniu Dalai Lama ee sing'uac, lanw jitt xee sewqair qaidongx e kacc vinghyy. Jenwjingx, dongrluan, iacc huanrjue surqnia iarr e qiamxjiyw jiacc driyc."

"Liw u sniu beh kir juer niqox?" Sewsiux mng, tauu kix kix.

"Iauxx m qnaw siauwsniu," Gnaxsunn iyy tau. "U huatsimx au cutsir qycc qapp vut qet'enn, simrcniaw cutqex, jitt sxer iarr diyh'air minua sriux simhing jiacc u huatdo."

"Guaw narr huatguan au siwlangg beh qycc qapp liw dauwdin, anxnex beh jnuaxngiu vran?" Vnuar tedyw, Sewsiux nng vingg ee jingxtauu-aw siy' cew tnaw aurkog.

"Liw jiac jiuw, jiac cyx, qycc kunr jabow, cuiwkauxguan hro liw singjinx dyrr jin' byy tniliw," Gnaxsunn qexqud qongw.

"Liw kunr guaw, qaqi iarr byy singx huanxsingw?" sueh giyhciyr, Sewsiux ee ciywsinn cangr be diauu.

"Jiwjiyw, guaw u ixx dorjaii uiqair," Gnaxsunn dangwbak vuahdyw ix ee jingliw.

"Qajair liw jyr ginxaw ee sii, verbuw byy qra liw sangr kir amngi. Narr byy, guaw lenrr jitt sxer dyrr byy tangx qapp liw jywhuew," Sewsiux vnuaa cuiwgimw, qig ueaxzinn.

"E jywhuew si guaw qaqi beh air, m si kyr bxow sniaw langg junsimx iacc bu'ir anvaii laii soxx drir." Gnaxsunn qongw kiw jiokk dingxjinx.

Sewsiux niar bak, tauu iurqycc kix jit vingg, henxzenn byy bingvik u quawgii.

"Derjuw jokget, yc vut byy cringx, duw diyc moqongx lauxqunr laii siy' snriaa, vec qii dyrr giaa lecc lang, iarr m jaix diyhh duxjuiw," Gnaxsunn qongw, uerkuanw si bunai.

Sewsiux tniax diyc kiw air ciyr. "Guaw krngr liw sniu kacc kuix lehh. Tauu qaxx sew ar, jit diamw niaux, vah diamw marr niaux."

Sewsiux qra Gnaxsunn giuw uaw .laii lamw lecc jimx. Dirr cngpox siy' siamm decc siy' enw, jabow :ee u cing sindexsnax, javox :ee trngr teh teh.

"Qongw liw air .guaw," Sewsiux tyxvyw, qra Gnaxsunn deh lehh.

"Qongw air m si e venr hogjap? Liw qamxx m si kacc air dansunn?" Gnaxsunn naxx qongw naxx decc cuanw.

"Vehqunxjuiw siongrr dansunn," Sewsiux inwcuir. "Byy-bir.-byy-sor, sniu' jiap limx e cuir vec, vingxvag."

Gnaxsunn dnir cinwciyr, qingw jit qxur sengiuu lau quax iong qorr cniur :ee, "LOVE YOU MORE THAN I CAN SAY."

"Hmr, liw ee qauauu be baiw. Lingrqangx lanw laii kir karaoke hro liw denxuix .jit .xe."

Denrsi qapp denrhuew jongw qimr, Sewsiux qra Gnaxsunn ee snaaxkor trngr hetqak. Sehongx ee qiglok cniaw jit vnix. Inx sianglangg ee tendongg ehngmii dirr bincngpox.

9.

Sewsiux vaiwsir kar denrue hro Gnaxsunn, qongxx vaiwgo rair kir Qyhiongg cutdniux, itdit qaur xe lexvaiwid, kiarr jitt lexvair nng langg berdangr jywhuew. Vaiwgo-amr iauxx u qapp Gnaxsunn lenlok, qycc kir, Sewsiux jurr anxnex longxx byy siausid. Qongxx vaiwid e dngw laii Daivag, qaur qaxx vaiwzi iauxx byy siy' cue. Vaiwsnax amwsii jap-id diamw quer, Sewsiux denrue laii, qiyr Gnaxsunn cud laii qapp ix iokhue.

"Guaw berdangr vangr guanw a'buw qoqox jit xee dirr cur nirr," Gnaxsunn ser aw sniax qongw denrue.

"Ix qamxx iauxx bue kunr?" Sewsiux mng.

"Kunr ar. Mraxqycc ix ursii aw e kiw laii venrsow."

"Liw cud .laii lar, jit xe aw quw dyrr hyw," Sewsiux qra qojniaa.

"Bering .did lar. Ciax laii ciax kir, ongxhuee dy' beh qui' diamxjingx, diamw gua jxingx!"

"Lanw laii kir linw qinrdaux ee luxsia. Guaw cue diyc soxjai sui' dyrr kar hro :liw."

Diuduu .jit .xe, Gnaxsunn qra rinr hyw.

Vnuar diamxjingx au, Sewsiux denrue laii, qongw ix ixqingx ciek in, qiyr Gnaxsunn qauwui didjiab laii vangqingx. Byy beh duawmee dandanx hiyckunr, nng diamxjingx kiyh jit vaiw vangqingsuer. Sraiw qinw liauu, byy qex sueh, juewquir quer, nng langg dyw tanxciyr dirr bincngg-dingw hnarhna cuanw.

"Liw qapp liw hit xee qu sionghyw :ee longxx hiycmee iacc kiuke kacc je?" Gnaxsunn mng, qra sinkuvnix :ee giyw .jit .xe.

"Guaw hitt jun u bow, amwsii longxx rair dngw .kir," Sewsiux kreh bak, uanxzenn decc sniu quewkir.

"Ix qer .langg liauxau, linw qamxx iauxx u lenlok?" Gnaxsunn tamwmng.

"Ix byy qapp langg' qethunx," Sewsiux rinr, sniaimx lyhqe.

"Hnaa! Liw nacc jaix?" Gnaxsunn bagjiux denw dua luiw.

"Ix qaux .diyc hitt xee si guaw ee sinlyy," Sewsiux qongxue-sniax byy-lenx.-byy-lex. "Siongrdingxnii ix cuarbow u vangr tiab-aw hro :guaw, sinniuu si vadd langg."

Jit bin citkauxdoo draur be uanbuanw, Gnaxsunn ee lyxde qiongrbeh qig puar. "Hitt xee sinlyy qamxx iauxx decc jiac liw ee taulo?"

"Jaw dyrr byy druar ar."

"Hitt dangsii, liw qamxx jai'ngiaw inx decc qniaa?"

Sewsiux hnair tauu, bagjiux caa caa. "Ix hiongr guaw jiauzin ee sii ixqingx qapp langg' decc lun qewcua ar."

Simqnuax liac lecc ciangw, Gnaxsunn qingxgok, iong bagbuew qra ganw .jit .xe. "Linw bow siw, liw qamxx u kir cue :ix?" Gnaxsunn mng diyc damw damw.

Sewsiux dangwbak, liac Gnaxsunn qimx qimx knuar. "Guaw kir cue Vudjow, byy kir cue ix."

Byy lauu lxii aw siqanx hro mng ee langg huanxingr, Sewsiux crunx ciuw qra ciah teh teh ee Gnaxsunn lamw lehh. "Qongw liw air :guaw."

Gnaxsunn trow jit xee kuir. "Liw iurqycc laii ar."

"Liw qongw, vaiwtog, guaw beh tniax liw qongw," Sewsiux qra qiutyw.

Gnaxsunn kinx lat qra sag .kuix, lyc bincngg kir cue snxax beh cing. "Liw dac'ingr beh cua guaw kir cniur karaoke dy' iauxx byy lehh." Gnaxsunn vnuar sngxciyr. Sewsiux bin iux iux ciyr be cud .laii.

Nng diamxjingx bue buanw dyrr trer vangqingx. Gnaxsunn qnuaw beh dngw .kir, byy danw Sewsiux kir kanx ciax. "Byy quiw vo lo. Sraiw ciax rair kaux jit linr. Guaw iong qniaa :ee kacc qinw."

Dirr MOTEL mngkauw hunx siangvingg, inx jit langg qniaa jit lo.

Vnuar qniaa vnuar jauw, dngw laii qaur cur zip laii kunwvangg, Gnaxsunn huatqenr laurbuw ee cngpox kangx kangg byy langg, cuwqingx tong' siwqer cue, denrhuew kuix qaxx qngx ngiawngiar, byy dyrr si byy.

C.-conghongg-h. jongg kir qaur qonghngg. Opuw opuw, u jit xee pulongrjiaw dirr liangdingg-lai dyw lecc kunr, Gnaxsunn byy knuar diyc vadd xee langngiaw.

A'buw qamxx e sitsu, huatsingx sniaw iwgua? Narr jurr anxnex prangw .qnir sitjongx, cinjniaa qapp hniadi-aw inx e anwjnuaw qra lunrjue? Iurr tiamxtauu iurr qniahniaa, jit sinkux nngxsngx, Gnaxsunn tuax mia vniar kir cutsow.

"Guanw a'buw urhuewlangg ciangjai e dongwgong, qaqi jit xee dirr guarkauw e sitbee qniaa m jaix lo," auu jad, Gnaxsunn angr pni angr pni.

"Liw cud kir zuarr quw?" qingxcat'uann vnuamng, uerkuanw lingxvingx-v.

"Cud .kir .jit .xe narnia, kacc byy nng diamxjingx," Gnaxsunn rinr diyc qniasimx-lunxdnaw.

"Jiacc amr ar, si u dyc'ui tangx kir?" Lanxsix lanxsix, qingxcat'uann tauu ngar gnar ser aw sniax decc liam. Tniax byy qaiww bingg, Gnaxsunn byy inwue. Cing jewhok :ee iarr byy qycc mng.

Nng lenw :ee qapp sir lenw :ee jiauu cutdong, Gnaxsunn iarr jnriu qingxcatciax. Bus tauu vrangx siongrr jaw iarr diyhh go diamw. Snaqnix-mivnuar, ciavaii-aw u langngiaw. Taujangx vehpuw ee a'vyy :a cuir-aw vnuar kuix, qo' jit xee dirr ixliauu jre lehh decc ducbinn, jit din langg cnii uaw .kir iaxx m jaix cnew.

Kanx laurbuw lyc qingxcatciax, Gnaxsunn dirr cur taujingg hiongr qingxuann qnialew sueh qamxsia. Zip laii cur-lai, laurbuw dyw lyc bincngg qycc kunr. Hen dyrr tiamw qaxx, Gnaxsunn dirr cngg-dingw jitt sii vingxkiycciyr, sui'au katanxpag, beh tniqngbauw jiacc bii .jit .sii .aw. Hitt ejaiw, a'buw jiauwguann jaw jingsinn.

Ngua snxax beh cutmngg, Gnaxsunn naxx decc vecha. Cutvanxsia denrue kar laii quixnarr vaiw ar, jarhngx qycc iong denrjuxpuex qra huad juewau-tongdiab anrsii-anrkig, qongxx Gnaxsunn qinaxzit narr byy kir, inx dyrr beh cue vadd langg. Byy simjniaa jyr kangkuer cid cenn veh cenn, jidbin iarr huanlyw jitt vaiw ee qihue narr quewjua, xe vrangx langg' qnaxx e qra ix let juer omiadnuax.

Qra laurbuw qiar cuwvnix ee oksangr, Gnaxsunn jaixkiw iauxx bue qauw diamw dyrr kir danw qongciax, dirr cutvanxsia jre beh qui' diamxjingx qapp langg' pah kechabzi, dngw qaur cur ziddaur-d. Qnrua duxjiah kir caixvan ee quexjiw sangr cuwvnix singrsuar jriab a'buw dngw .laii liauxau diyhh singx cuann daur. Laurbuw ehngx beh kir a'hniax inx daux, rair cuann rair kuanw :ee diyhh liongrjaw junxvi hro ven, kacc be qaur sijun decc snax qalauc sir diyhvuac.

Sewsiux iurqycc qui' lexvair byy lenlok ar. Sniu ix sniu qaxx sitbinn venr juer suwsiongg ee dairjir. Qamxx si kir erqangw cutdniux iacc si qycc cutqog .kir? Jiahvng ee sii sniu, qingw cair ee sii sniu, sexdng ee sii sniu, dirr bincngw-ding qyckacc si sniu be suah, qaxnaxx muixx jit sii muixx jit kig, Gnaxsunn ee taukag-lai juann decc sniu Vngx Sewsiux.

Qau caigii ee qu jingwtauu qycjaiww laii decc jngg. Jing'air qapp dowhun si siangsnix-aw, Gnaxsunn jiokk jaw ixjingg dyrr u qamxgo. Kacc hingr lamhuanx-luxair byy beh ciqair, qimzit siurbuaa si duxaxhyw narnia.

Simsinn be dnia. Jit dniaw tngx tng qaxx dax .kir pnri diyc cauwhuexsiyx bi jiacc diwqag, hiamw hiamw diyc huexqiab.

"Buec-aw lehh? Iarr byy knuar diyc buec-aw," hniasyw mng, ciuw naxx decc vingw vauhok-aw.

"Qamxx byy?" Gnaxsunn uaw kir cue.

"Liw jitt jam aw si decc anwjnuaw? Jiokk lauwcec," duarhniax hiamm siyxmue.

"Jingxtngg :ee ee kuanw," hniasyw saulenw, dua-hniax sraiw snaqakbak qra bow cnix.

E kiw uercnix :ee jauw liauxau, cur-lai jing jiaucjiauh. A'buw tong' zit byy quiw qxur ue sueh, u langg qiuwqingr dyrr u langkir. Jitt sii jitt diap, cur nirr dna' Gnaxsunn qodnuax srinx jiokk hibii

Veh diamw quer, simx bun jin qigtauu qiongrbeh sitsimx. U jaidiau amwliam ee denruerhuanx byy quiw jxox, Sewsiux ee si qidiongx jit xee. Jap xee siyxbexzi dauc dauc aw cic, Gnaxsunn ee ciuw kehkec cuah.

"Liw dirr dyhh? Qamxx u dirr Daivag?" Gnaxsunn mng, snia'imx e junr.

"U," Sewsiux cyxcyw rinr.

"Liw jinw cud .laii .jit .xe, hongven bor?" Tauu vaiw juxdong sna' jiyinw, Gnaxsunn qamxqag jiokk vutjurzuu, simqnuax zuu qongqongg.

"Hngr," Sewsiux rinr, ue byy je.

"Beh iog dirr dyhh? Iacc si liw beh laii jriab .guaw?"

"Lanw laii kir linw daux hiax ee qaviquanw," Sewsiux rinr diyc qinw viakviag. "Dyrr snaqaktangx hitt qingx hyw lar."

Cuann cutmngg benw nng hunjingx, qniaa qaur nng langg tauu vaiw siy' iog ee qaviquanw, Gnaxsunn zip kir lairdew danw. Kacc quer, Sewsiux iarr qauwui, jiacc jre .lyc nia, denrue laii. Sewsiux qra kngr dirr jniawvingg cacde ee APPLE ciuxqix-aw zimm cud laii tniax.

"Pinxliau u bunrdee?... Sangr kir vadd xui qiamxgiam knuar mai... Dangsii?... Hyw. Vaiwsnax ixjingg cniaw Angg Cniuxdniuw cud vywqyr."

Qongw suah, Sewsiux qra ciuxqix-aw dre dngw kir guanjai ee xui, jiapsuar qra amwde hitt qix SAMSUNG tec cud laii qnuaiqix.

"Si anwjnuaw beh qra ciuxqix-aw qnuaix .kiw .laii?" Gnaxsunn mng.

"Decbeh byy den ar." Sewsiux rinr diyc h.-hohun-h.

Qavix sangr .laii, Sewsiux liammix camx tngg liammix dryr gulinx. Gnaxsunn byy-dongr.-byy-jing, cuanvan ee ue dirr cuir-kauw.

"Liw decc jauxvi .guaw?"

Sewsiux bih cuir byy inwdab.

"Liw qamxx si u vadd langg?"

Byy qra rinr, Sewsiux kir kanx Gnaxsunn ee ciuw. Gnaxsunn qra vuew .kuix. Sewsiux damr tauu, ciuu-drngg-ciuu-do ee ngiursniur.

"Liw iauxx bue huedab guaw ee bunrdee."

Tauu iuguann cih cih, javolangg bin iux iux. "Ix qongw beh dngw laii guaw ee sinvnix," Sewsiux towkauw, iguann hohun.

"Ix! Qu sionghyw :ee?"

Sewsiux dimr tauu, bagjiux byy knuar Gnaxsunn.

"Dangsii ee dairjir?"

"Dingw jua kir Qyhiongg, dirr denxlamxdniuu qapp ix amwhap. Ix jai'ngiaw guanw bow qeuwsinx, dngw laii Daivag ixau iurqycc laii cue :guaw," qongw suah, Sewsiux ee binriongg qyckacc jaux.

"Linw qamxx u dauwdin?"

"Byy," Sewsiux duiwcuir rinr, giac tauu qapp Gnaxsunn siy' duiwsiongr.

"Mrquxx liw u sniu beh qapp ix dauwdin."

Sewsiux tauu qycjaiww ngar .lyc.

"Liw qamxx byy qra qongw liw sinkuvnix u langg ar?"

"U," Sewsiux dimr tauu. "Ix qongw ix itdit byy qra guaw vangr be qir, duiww guaw ee qamxjingg iguann jiokk cimx."

Tniax qaur jiax, Gnaxsunn dua lat cuanw jit kauw kuir. "Liw quatding beh jnuaxningiu?"

Sewsiux bagtauu qad uaw .laii. "M jaix rair anwjnuaw qongw."

"Sniaxmih iwsur? Si m jaix anwjnuaw juer quatding, iacc si m jaix anxjnauw qra guaw qongw liw ee quatding?"

Giamxzenn sitsniax, Sewsiux ham ham m qnaw knuar .ix. Qarqinx, Gnaxsunn vorvinn vreh kiw srinx.

"Mair jauw," Sewsiux kir giuw Gnaxsunn ee ciuw.

"Liw dy' jaix guaw byy dnaw, jitt hy qxiauw jiacc honghiaux, guaw i be dyw, m qnaw vniawvyh."

Gnaxsunn cud lat lingr kuix Sewsiux ee sokvak. Bersux sriu diyc ciwqig, Sewsiux c.-cneqongg-q. kia .kiw .laii. "Vadd zit aw qamxx erdangr qycc iog liw cud .laii?"

"Pnaixser, guaw ee dyrhing jiokk cenw, knuawtai sewqandai byy tangx hiacc huar," Gnaxsunn dnir koxciyr. "Qiamxcaiw sencid kir sniu' jiyw vaiw, rair kacc jiap camqax jiacc yc erhiauw hongwha."

"Pnaixser," Sewsiux ser sniax sueh, bin iux decdeh, tauu qycjaiww damwqe.

Srenx .kiw .laii, Gnaxsunn qa kixqinx. "Singsimx-sid'ir jriog liw hingrhog."

Jiokhog ee uergiw sueh cud cuir, Gnaxsunn uad lehh cud .kir byy huetauu. Guec hnaa hunn, lordingx iarr amwdam. Itdit qaur uat zip hang-aw-lai, Gnaxsunn vangr cutjai nng jua bagsaiw linr .lyc .laii.

(quewvanw)

Dirr vinquanw ee kecvangg cniuw amwox, ciah diauu diauu ee jit duir javox jabow ir-luan-jxingg-bee, javolangg vecsiwtenw, jaboxlangg kiabexlongx.

"Nge! A!"

Siongrr buew vaiw ee qauhap, duiww vixcuw ziogtew ee tamluann diyhh juer jit vxenr tauxvangr. Ioksog qim'au m qycc qniwbin iacc amr sionghue. Singr ee iogbong druu jairgua, javox :ee kiychun, u camcab quaw uanwkir iarquxqnaw. Jabow :ee dyrr longxx byy vyxliuu, bersux decc voxjue, iong jin zedjingg qapp kuiwlat decc hongrhenr. Sna' jiahngar ee jitew qihux siy' kap, javolangg ersinx byy beh longx hormuax.

"Vngx Sewsiux, guaw air liw. Guaw ee simx ingxuanw sriok liw ee."

Qaur qaxx qigjingg ee qigkamw, jaboxlangg sitsinn hiamwhuah.

10.

"E-MAIL u siux .diyc ar. E cniaw cutlap qiawginn kir liw ee kauxjy. Liw binaxjair iacc au .zit jiacc tec po-aw kir lur knuar u hue .zip .kir bor."

Diwsimx-diwhueh, qui' lexvair jit jyr mii, mii jyr zit decc vniar sinmia, bunanr qapp cacdoo juer jit xe qauhur, langg' u singlok beh jiliw jidvnuar qipqimx hro Gnaxsunn dngxdyr. Cosunn rair lap cuwjox, cuwtauqex e laii siux qinw qinw. Gnaxsunn jingrr qaur dnaxx iauxx m bad qa'ngg cenenn .quer. U jit qingx puar cur-aw decc pacjox cutsuer, cuwjuw inx daux m si hyxgiahdew.

Quixnarr qangx byy cua a'buw kir guarkauw nar zit qniaa kahuex. Juer laurbuw :ee bersux jai'ngiaw jaboxqniaw uirr singgiap decc pacvniar, byy qra Gnaxsunn caw beh cud .kir, iarr be tyw beh jiac jitt hxang limx hitt hxang. Qimzit siyjne hyw hongzit, kanx a'buw laii kir qonghngg jre .jit .xe, binaxjaixkiw cua a'buw laii kir caiwci-aw kuanw quaw hyw jiahmic habingqaix.

"Uatqag hitt qingx daurlinx-dxiamr dywvnuaa ar."

"Jit qangx jyr byy zuarr je singliw, jaw dyrr hyw siux siux .kiw .laii ar." Dirr qonghngg decc kaiqangw, nng xee hurzinlangg jre dirr Gnaxsunn inx qecviacvnix.

Bad qauquanx quer jit vaiw ee diamwtauu, nii-tauu kaidiongx, Gorzidjangr jiacc jiac .quer nia dyrr dyxdiamr, qyckacc byy, iarr viw Gnaxsunn ee luanjingg kacc dngg huewsiu.

"Susii narr dac'ingr qer ix, sewbin huanrser dyrr e byy qangg," Gnaxsunn decc sniu huanxhuew.

"Cuir jiacc gne, jit qxur guaw air liw m guan qongw, aiwzinn-aw duer langg jauw qaizenn," Gnaxsunn jursingw.

"Qu cajaux, kuair dyhhuew. Bactew ee iogbong jiacc qiongciuw dng' zedquanw, 'guaw air liw' diyhh qongw quiw vaiw jiacc banw ix e diauu?" Gnaxsunn sniu dywtauu ter qaqi venrho.

"Jit diamw niaux, vah diamw iarr niaux." Vngx Sewsiux qongw .quer ee ue uanxzenn iauxx dirr Gnaxsunn ee hnirkangx-vnix. Dongcox narr qethunx, dairjir si e venr kacc jabjyc u nia. Qycjaiww draur jit vaiw, duiww inx nng xee u sniaw jingcax?

Denrue-sniax hiangw, Gnaxsunn huehunn, ciuw nirr ee ciuxqix-aw hiamw jit diamw aw lag .kir.

"Hyy Siyxjiaw, linw jinwjingg laii knuar hitt qingx u snax bin txangx :ee, cuwjuw u lakqer. Linw u beh kyxlu knuar mai bor?"

"By... byy lehh," Gnaxsunn vnuar tuntor.

"Guaw ciuxtauu u quaw budqnia, qamxqag u hac linw druar. Si m si guaw tuann hro liw bongxx kyxcamx?"

"M... mrbenw lar."

"Iacc si guaw duiwjiab qapp Vngx .Sensnix lenlok?"

"Driyc driyc diyc, liw kar hro :ix, aurzit aw mrsaiw qycc cue guaw. Pnaixser lar."

Jit tongx denrue qongw qaxx berdid suah, jit qxur "qapp ix cew ar" sueh be cud cuir decc jiahlat.

Ervox hyw tnisii, daurhuex-dnar u ciax laii qonghngg vnix:a decc bre. Qudcuir ee daurhuex camx qrunn qaxx nua nua ee todaurzinn, lingxvingx ee otngjuiw ngiuw .jit .siac, buxaxqniaw jit langg jit nguaw, u hingrhog, u qamxunx, cuiwtauu qapp simdew qeww dnix dnix.

"Zinsingx uanxzenn jit dniuu bang, cunbang qyckacc iongngi cnew. Cutqii ee hiwbunn, dirr henrsit siarhue qapp hiwvnee-dingw enw vutjin. Qaqi jyr juxqag jitt cud e sidsit qamxqag diyc tniar ziiw."

Liapngiaxqix decc hib, u sinwjiaw mng kiw. Jiar bangrlo, tniax lau suhu kaipuar benw han sii han kig.

"Ng.-ngidnii-d. ee lamluw quanhe kyxviw ininx daurdinn. Liw kuihu guaw, guaw hiauvue liw, jingg sxer siy' kiamr iacc au sxer diyhh hingg, si rinx si qryw birkyxdix. Zinqanx huwquir huex-qranx lxo. Diyhh uac dirr dongha, kixsimx-dongrliam sisii rair u qakcad. Susimx qapp siogsimx diyhh siusog, tniawsimx qapp jusimx rair vuengiuw. Byc did juer sionghai si qinqix."

Dirr diam hongx ee cimx qnxix, nng jua unsiyx ee bagsaiw lrauu .lyc .laii be juer sniax. Gnaxsunn hongrqaur. Miaczit vutquanxtax, siok'enn iacc uanwget, jitt sii jitt kig, ix beh siaxsimx vangr juiw lrauu.