DERR 39 JNIUX
LUN SINGSANW QAPP KANWHO SANWHU
Suibongxx sanxkyx si lingrgua jit kyx, iarr singsanw ee su si kanwho jit hxang digvet ee ihak, iauxquxx kanwho ingqaix diyhh jai’ngiaw anxjnaixngiu liaurliw jitt hy singsanw ee su. Iarr diyhh jaix jitt hy singsanw ee su si jurzenn :ee, m si simxmic vnirjingr, mrquxx sisiongg cincniu vnirjingr ee qauqair. In’ui singsanw ee sii, narr byy sewzi hro cingkir, jitt hy jurzenn ee su, e kuair kuair venr juer vnirjingr, lenlui diyc sniwmia.
Ursii hitt hy bue bad yc sanxkyx ee kanwho, hutzenn duw diyc sanxhu, jiurr kacc byy dnaw. Jitt kyx ee dairliok, si vangjan juer kanwho :ee e bingvik jiauwqor sanxhu ee lixkir. Tauu jit hxang diyhh jaix, iarr jit siwlangg m tangx be qir .did, jiurr si sanxhu guihiamw ee guaninx, si dui’ byy cingkir ee enqor. Narr si sanxhu kiyh ginxaw, quer quiw zit liauxau, e kiw zet, dairkair si in’ui bisingbut zip dirr singkux-lai; m si in’ui decc dew, decc crid ee sii, kir hro lingw .diyc.
Beh liaurliw singsanw ee su, diyhh virvan vangqingx, bncngg, sanxhu qapp longxjongw soxx beh ing ee mihqnia. Singsanw ee sii diyhh vangjan sanxhu; kiyh liauxau, qyc cavutdyx jap zit quw, qor laurbuw qapp ginxaw. Narr e ing .did, kanwho kacc hyw diyhh dui’ bue singsanw ee dairsingx, kir diamw dirr sanxhu ee cur.
Kanwho soxx beh ing ee mihqnia vaii dirr erdew:
Texunkir.
Siaudog’iycjuiw cincniu quer sac ee vaselinum.
Dyrziyrdy ee ciurlingqngw (lxamm :ee, cavutdyx 10 hy).
Dyrziyrdy ee vyleqngw (luw :ee).
Quanwdngkir.
Imdy quanwkair hxuad ee qesix (derr 381 bin).
Qadyx, vak jaiduar ee snuar,q app vausiongliau.
Siaudok-iyh’uann, hydrargyri perchloridi.
Cingkir ee binxaw, qapp satbunn.
Lotio acidi borici qapp lotio argenti nitratis, sew bagjiux ee iyhjuiw.
Laurbuw qapp ginxaw soxx beh ing ee mihqnia, qesix longxx diyhh dairsingx virvan hro jiaujngg, in’ui qniax liuw ginxaw beh cutsir ee sii, byy ingg tangx laii virvan. Diyhh urvi dua niaw iuvor, narr byy dua niaw, jit diauu jiurr hyw; siaudok ee citvor, mihuex, haa vakdow ee vor, anzenn vinxjiamx, siyx ee kunwsnax. Quixnarr diauu cingkir ee binrqinx, dairsiauxven ee kiwqu. Jit xee kangx ee punn he bincngg-xe, tangx log qnialangg ee mic. Qycc virvan kacc je qunxjuiw hro ix siyxkuaw hee(?).
Diyhh urvi ginxaw soxx beh ing ee mic, qu ee tanxaw, quixnarr diauu nngw ee vor, acc si binrqinx, acidum boricum iyhhunw, siaudok-mihuex, misex, haa vakdow ee vor, e siyx ee snxax, quixnarr qix dua qapp ser anzenn vinxjiamx. Hitt diauu beh vak dorjaii ee snuar diyhh siaudok, qniax liauw u simxmic bisingbut dui’ hiax zip.
Vangqingx, diyhh u kongkir qauwgiac je, qapp zit ee qngx, cincniu dirr derr 13 jniux u qongw kiw. Dirr vangqingx-lai cincniu duu, iw, dyh, hitt hy mic, naxx jiyw naxx hyw. Vangqingx dairsingx cingqed kacc hyw. Narr vangg-lai dervanw u cux derjenx, jiurr diyhh qngw .kiw .laii, sew dervanw.
Bincngg diyhh he kacc kuah ee soxjai, hro ix siangx vingg u lo, tangx hro isingx uaw. Cux bincngg ee sii diyhh cux jit niaw iuvor, dirr ziog’aw dingxbin; dirr jitt niaw iuvor ee dingxbin diyhh cux jit niaw puerdnuax; dirr jitt niaw ee dingxbin qycc cux jit niaw iuvor; dirr jitt niaw iuvor ee dingxbin diyh jiong’ kacc qau ee puerdnuax, acc si nng~snax diauu binrqinx cux qutvnuaa-xe. Qi’uu diyhh cux cincniu vingsiongg bincngg ee kuanxsid. Iarr vak jit diauu dngg ee binrqinx dirr bincngg uaw kax hitt tauu, tangx hro sanxhu kiuxlak.
Virvan sanxhu: Sanxhu diyhh jaix jitt xee singsanw ee su si jurzenn :ee, mrbenw qniax. Narr sanxhu jaix ix ee siqanx decbeh qaur, ingqaix diyhh dagg zit sew siyjuixik hro singkux longxx cingkir. Iarr dagg zit diyhh u dairven. Narr byy dairven, kanwho diyhh virvan satbunjuiw ee enema quanwdngg. Siauxven iarr diyhh tongx, narr byy, diyhh jiong’ ciurlingx catheter qra ix dyrziy sut. Si jueww iauwqinw diyhh cingkir, narr byy, qniax liauw vongqongx e huat’iam (derr 244 bin).
Guarimvo (ersinx guarbin ee soxjai), diyhh ing siyx juiw qapp satbunn sew cingkir. Hitt diap soxx ing ee citvor diyhh quer sac, jiacc e cingkir. Diyhh dairsingx ing nng vaiw cingkir juiw, jiacc ing cingkir juiw qapp 1.0 c.c. lysol iyhjuiw. Sew liauxau diyhh jiong’ siaudok ee citvor, acc si mihuex he amx guarimvo, iarr vak hro hyxser. Anxnix juer, sewkunw kacc be dui’ hiax zip .kir.
Diyhh qra sanxhu cring cingkir, e siyx, e sew .did, ee ihok, qapp cing pongwsebuec. Jiong’ sanxhu ee taumngg srex kuix juer nng vingg qra vnrix.
Diyhh urvi qunxjuiw, lingw qunxjuiw, satbunn, quer sac ee binxaw, siaudok-oyhjuiw, longxx ven, hro isingx qapp kanwho tangx juer sew ciuw ee loring.
Narr ginxaw cutsir liauw, diyhh ing damrvyc lalunn siyx ee lotio acidi borici ee iyjuiw, sew bagjiux hro cingkir. Diyhh ing e siyx ee pue, acc si tanxaw, qra ix qah hro hyw, tingwhau kacc anjing, jiacc qra ginxaw sew. Si iauwqinw diyhh qah hro hyxser, m tangx hro ix ing ciuw, zuee bagjiux.
Ginxaw cutsir liauw, kanwho diyhh dairsingx qor laurbuw. Narr isingx byy qongw, m tangx sew imdy-lai, in’ui vingsiongg sii mrbenw sew. Guarbin ee qnialangg qapp huih, diyhh sew hro cingkir. Iarr ix ee snaaxkor narr bag diyc qnialangg diyhh ngua, qra ix cing cingkir qycc siyx ee snaaxkor. Bincngg ee puerdnuax qapp tanxaw diyhh cingkir. Ix ee mehpog, qapp hokib, diyhh sngr, suar qir lehh. Qaur laurbuw longxx anjing, kanwho diyhh qor ginxaw.
Ixqingx u qongw diyc sew bagjiux, mrquxx bagjiux-lai narr u lxangg, diyhh ing 2 per cent lotio argenti nitratis dih quiw diamw he bagjiux-lai.
Diyhh jaix, duxaxx cutsir ee ginxaw iauwqinw diyhh cing hro ix siyx, in’ui si jin’ kuair qamw .diyc. Hiaxee sueziok, qycc byy qraur guec ee ginxaw, qycc kacc kuair qamw .diyc. Ursii diyhh ing vu nxng ee kiwqu hro ginxaw dyw quixnarr zit, diyhh dniardiyc ee undo, qaur kacc iongw, e hokib vingsiongg kongkir ee sii.
Sexik: Duxaxx cutsir ee ginxaw ee singkux, u vehsig ee mic qiyr juer tai’iuu (胎脂, vernix caseosa). Jiong’ lalunn siyx oleum olivae qra buah singkux, jiacc ing siyx juiw sexik. Jitt hy siyx juiw undo diyhh u 100 dxo F. (37.8∘C.) ee siyx. Narr si ginxaw sniu’ sueziok, be kamx did sexik, diyhh ing kacc nngw qycc siyx ee binrqinx qra ix vaux, aurlaii jiacc jiong’ siyx ee mihuex vaux hro hyxser. Ginxaw he dirr punn-lai ee sii, kanwho diyhh ing dyr ciuw he ginxaw jniawvingg ee qyc’erkangx-xe. Sew liauxau, jiacc unn unn aw jeh hro dax. Ginxaw ee puee sna’ uaw ee soxjai, cincniu dirr amrqunw, qaixvnix, diyhh ing erbin soxx qir ee iyhhunw qra samw. Diyhh knuar ginxaw decc hokib u hyw .byy, jaiduar u lrauu huih .byy, iarr singkux dagg soxjai cincniu cuir-lai, qongbunn, ziyrdy, u longxx hyw .byy.
Ing jitt xee iyhhunw qra samw jaiduar:
Acidum boricum
Zinci oxidum
Amylun (hunxjniux)
}Qokk hxang vnii je
Ing siaudok ee vor acc si mihuex amx lehh, jiacc ing haa vakdow ee duar, haa hro ann. Diyhh siongsiongg hro jaiduar xyx cingkir dax li, byc did hro dagjid dui’ hiax zip .kir. Aurlaii sew singkux ee sii, jaiduar m tangx sew kacc hyw, qanda’ ing sinx ee iyhhunw qapp vor, jiurr hyw. Jaiduar qycc go~lak zit e qaqi lag .kiw .laii. Qycc jit guehzit quw, diyhh ing jit der cingkir ee mihuex he dorjaii-gua, haduar haa hro ann, dihongg kiw tuatdiongg.
Jaidauu congr hyw diyhh ing hitt xee haa vakdow ee duar haa hro diauu. Jitt xee duar diyhh qra ix tni, viw ing vinxjiamw kacc hyw. Aurlaii qra ix cing snxax. Ix ee snxax dihh e siyx, kinx, iarr m tangx ann.
Dagg zit qra sanxhu ngua snax~sir vaiw ee vausiongliau. Singsanw liauxau diyhh dyw dirr bincngg siongrr jiyw jap zit, narr nng~snax lexvair kacc hyw. Ngua amx guarimvo ee vausiongliau ee sii, diyhh jin’ siyxsimx. Narr kanwho decc qor u tuanziamxvni ee vnirlangg, acc si qnialangg ee siongcuir ee vnirlangg, m tangx uaw sanxhu, qniax liauw e tuanziamw.