Tessalonika 2
SXINGR PAUL SIAW HRO TESSALONIKALANGG EE DERR ZI DNIUX PUEX
1 Paul qapp Silvanus, ixqip Timoti, siaw puex qiar hro Tessalonikalangg ee qauwhue, dyrr si diamr dirr lanw ee Ve Siongrder qapp Jruw Jesus Krist :ee:
2 Guan linw dui' Ve Siongrder qapp Jruw Jesus Krist did diyc undenw ving'anx.
3 Hniadi ar, guanw ingqaix uirdiyhh linw siongsiongg qamxsia Siongrder, jex vunw si habgii :ee, in'ui linw ee sinr ithuad diongxdua, qycc linw jiongww langg dagg xee sna' tniar ee simx longxx ciongjiog;
4 Drir qaur guanw dirr Siongrder jiaxee qauwhue jiong' linw laii kuakauw, in'ui linw dirr itcer ee kunxdiok qapp soxx sriu ee huanrlan diongx, u jrunn tunlunw qapp sinr ee simx;
5 Jex dyrr si Siongrder qonggi simxpnuar binghenw ee vinqir, hro linw tangx sngr juer e kamx did dirr Siongrder ee qog, dyrr si linw uirdiyhh ix siurkow :ee.
6 Siongrder jiauww qonggi, beh ing huanrlan vywingr hiaxee hro linw duw diyc huanrlan ee langg,
7 Iarr beh hro linw jiaxee siurr huanrlan ee langg qapp guanw dangjee did diyc anhiyh, dyrr si dirr Jruw Jesus qapp Ix u quanlingg ee tnisair, dirr huexiam diongx, dui' tnix henxhen ee sii,
8 Laii vywuanx dirr hiaxee m bad Siongrder qapp m sunrhok lanw ee Jruw Jesus ee hok'imx :ee.
9 Jitt hy langg beh siurr hinghuat, dyrr si ingxuanw ee bedbyy, lirkuix Jruw ee binrjingg, qapp Ix quanlingg ee ingqngx.
10 Dng' Jruw limqaur ee zit, Ix beh dirr jiaxee singwdoo did diyc ingqngx; qycc dirr hitt zit, Ix beh dui' longxjongw sinr ee langg did diyc ylyw, in'ui guanw duiww linw soxx qanjingr :ee linw u sinr.
11 Uirdiyhh anxnix, guanw iarr siongsiongg ter linw qidyw, guan lanw ee Siongrder knuar linw juer e kamx did dirr soxx sriu ee driaur, qycc ing quanlingg laii uanmuaw itcer soxx himbo ee hyw, qapp dui' sinr soxx juer ee qangx,
12 Hro lanw ee Jruw Jesus ee miaa dui' linw did diyc ingqngx, linw iarr dui' Ix did diyc ingqngx, jiauww lanw ee Siongrder qapp Jruw Jesus Krist ee xunx.
2 Hniadi ar, lun qaur lanw ee Jruw Jesus Krist ee limqaur, qapp lanw jurjip qruix Ix,
2 Guanw qriuu linw, bylun dui' sinr, iacc si dui' ue, iacc si dui' puex laii qaxmo guanw ee miaa :ee, qongw Jruw ee zit henrjai qaur lar, linw ee simjir byc did kuair kuair iydang, iarr byc did qniahniaa.
3 Bylun ing simxmih hxuad, itkair byc did hro langg inxiuw; in'ui hitt zit iauxx bue qaur, dikkag dairsingx u vue qxaur ee su, qapp hitt xee juerog ee langg, dyrr si dimlunn ee langg, cuthen;
4 Ix si juer duiwdik, iarr jurqyx vnuaa quer itcer cxingx juer Siongrder :ee qapp siurr qingwvair :ee; simrjiww jre dirr Siongrder ee dxen, viauxbingg qaqi juer Siongrder.
5 Guaw iauxx qapp linw dilehh ee sii, bad jiong' jiaxee su qra linw qongw, linw qamxx be qir .did mah?
6 Hitt xee decc joxdongr ix, hro ix qaur ix ee qrii jiacc cuthen :ee, dnaxx linw iarr jaix.
7 In'ui vuthuad ee viwbit ixqing’ decc unrdong, dogdok henrjai u jit xee joxdongr ix :ee, didqaur hitt xee joxdongr :ee dui' diong'ngx druu .kir,
8 Hitt sii, hitt xee vuthuad :ee beh cuthen, Jruw Jesus beh ing Ix ee kauw-diongx ee krir laii bet ix, ing Ix limqaur ee henxhen laii huewbyy ix.
9 Hitt xee vuthuad :ee ee limqaur si jiauww Satan ee unrhingg, ing itcer ee quanlingg, sinziah, qapp qew ee diaurtauu, qycc ing itcer vutgi ee kuixked,
10 Qniaa dirr hiaxee decc dimlunn :ee, in'ui inx byy jiaplap jinliw ee tniar laii did qiur.
11 Uirdiyhh anxnix, Siongrder jiong' cabiu ee unrhingg qangr hro inx,
12 Hro inx sinr vehcat, hro qniwnarr m sinr jinliw, kir hnuahiw vutgi :ee, longxx siurr gixduan.
13 Danrsi Jruw soxx tniar ee hniadi ar, guanw ingqaix ter linw siongsiongg qamxsia Siongrder, in'ui Siongrder dui' kixtauu qingw linw, beh hro linw did qiur, si jairdirr Sinn ee jniaa sxingr qapp sinr jinliw.
14 Uirdiyhh jitt xee, Ix dui' guanw soxx tuann ee hok'imx bad driaur linw, laii did diyc lanw ee Jruw Jesus Krist ee ingqngx.
15 Soxiw, hniadi ar, diyhh kia jai; linw soxx did .diyc ee tuansiu, bylun si dui' cuir qongw :ee, iacc si dui' guanw ee puex, huanrr soxx hagsip :ee, diyhh jipsiuw ix.
16 Lanw ee Jruw Jesus Krist, qapp lanw ee Ve Siongrder, dyrr si tniar lanw, iarr dirr undenw jiong' ingxuanw ee an'uir qapp hyw ee ngwbang sniuxsur lanw :ee,
17 Guan Ix an'uir linw ee simx, qenqor linw dirr itcer hyw :ee ee soxx qniaa, hyw :ee ee soxx qongw.
3 Hniadi ar, qetbuew laii qongw, linw diyhh ter guanw qidyw, hro Jruw ee dyrliw liuhingg did diyc ingqngx, cincniu dirr linw diongqanx jidngiu;
2 Qycc hro guanw did diyc tuatli byy lriw ee pniaw langg; in'ui langg byy longxx u sinr.
3 Jruw dyrr si sinwsit, Ix beh qenqor linw, qycc vyxho linw benw hro hitt xee pnaiw :ee hamrhai.
4 Lun qaur linw, guanw dirr Jruw cimx sinr, guanw soxx bingrling :ee, linw henrjai u decc qniaa, au .laii iarr beh qniaa.
5 Guan Jruw cua linw ee simx zip dirr Siongrder ee tniar qapp Krist ee tunlunw.
6 Hniadi ar, guanw dirr lanw ee Jruw Jesus Krist ee miaa bingrling linw, qniwnarr hniadi byy huatdo, byy jiauww guanw soxx tuansiu :ee laii qniaa, linw diyhh lirkuix ix.
7 In'ui linw qaqi jaix diyhh jnaixngiu yc guanw ; in'ui guanw dirr linw diongqanx m bad byy huatdo,
8 Iarr m bad vec vec jiac .langg, huanxdngw si diyhbuaa qankow, mizit juer qangx, benw did tualui linw diongqanx jit langg.
9 M si in'ui guanw byy qxuann, dogdok si air ing vunxsinx juer linw ee bongiu, hro linw yc guanw.
10 In'ui guanw iauxx qapp linw dilehh ee sii, bad anxnix bingrling linw qongxx, narr u langg byy beh juer qangx, ix iarr diyhh m tangx jiac.
11 Si in'ui guanw tniax qnir linw diongqanx u langg soxx qniaa byy jiauww quile, longxx byy juer qangx, dendyww decc juer hunrgua ee su.
12 Cincniu jitt hy langg, guanw diamr dirr Jruw Jesus Krist bingrling inx, qycc krngr inx, diyhh tiamjing juer qangx, qaqi tanr jiac.
13 Hniadi ar, linw qniaa hyw su, m tangx iawsen.
14 Narr u langg byy sunrhok guanw jitt dniux puex soxx qongw :ee, linw diyhh qra ix qir lehh, iarr m tangx qapp ix qauvuee, hro ix qaqi qenwsiaur.
15 Danrsi byc did knuar ix juer qiusiuu, diyhh qingxqair ix cincniu hniadi.
16 Guan ving'anx ee Jruw, dagg sii dagg hxang su, vunxsinx sniuxsur linw ving'anx. Guan Jruw qapp linw jiongww langg dilehh.
17 Guaw Paul cinvid cingxanx linw, dirr dagg dniux puex ing jitt xee juer qiwhy, guaw ee vitjig dyrr si anxnix.
18 Guan lanw ee Jruw Jesus Krist ee undenw qapp linw jiongww langg dilehh.