ester
1 Dng' Asuelo ee sii, (jitt xee Asuelo quanxhad jit-vah zi-jap-cid singw, dui' India qaur Kus,)
2 Asuelo Ongg dirr Susa Ongqiongx jre ix ee qok'ui.
3 Jerui derr snax nii, uirdiyhh ix itcer ee siuxlingw, zinsinn vanrdyh. Persia, Media u quanser :ee, qokk singw ee quiwjok qapp siuxlingw, longxx dirr ix ee binrjingg.
4 Hitt sii henxcud ix ee ingqngx ee qog ee vuwur, qapp qaqi hyw ee uigiamm ee junquir, ligquer jerje zit, dyrr si jit-vah veh-jap zit.
5 Jiaxee zit ixqing' muaw, ongg qycc uirdiyhh diamr dirr Susa Qiongx duarser ee vecsnir vanrdyh cid zit quw, dirr ongqiongx ee hngg ee ngi;
6 U vec :ee, cnix :ee, nraa ee vowlii, ing iuwdue qapp jxiw sig ee syh vak ginkuann dirr dairlixjiyc e tiau; u qimx, ginn ee cngg, vaii dirr angg, vec, ngg, ox, dairlixjiyc soxx pox ee de.
7 Ing qimx ee kiwqu hro langg limx, kiwqu jit xee jit kuanw. Ongg ee jiuw jin' je, jiauww ongg ee huwjiog;
8 Limx jiuw u dniardiyc ee le, m jrunw benxqiongw langg, in'ui ongg bingrling qiongx-lai itcer ee sinvok, hro langg qokk jiauww ix ee iwsur.
9 Ongho Vasti dirr Asuelo Ongg ee qiongx-lai, iarr uirdiyhh hurluw vanrdyh.
10 Qaur derr cid zit, ongg uirdiyhh jiuw, simx dikqaiw, dyrr bingrling Mehuman, Bizta, Harbona, Bigta, Abagta, Zetar, qapp Karkas, dyrr si siongsiongg qinsuii dirr Asuelo Ongg binrjingg hitt cid xee taiwqamr,
11 Duar ongho Vasti dirr ongho ee benxliuu qaur ongg ee binrjingg, hro hiaxee vecsnir zinsinn knuar ix ee suiw, in'ui ix ee binrmau jin' hyw knuar.
12 Danrsi ongho Vasti m kingw laii, m tranr taiwqamr soxx tuann ongg ee bingrling, soxiw ongg jin' siurkir, simlai cincniu huew dyc.
13 Ongg dyrr mng hiaxee bad sisu, u diwhui ee langg. Ongg u dniardiyc ee le, beh vran dairjir diyhh dairsingx mng jaix ludle, bingvik huatdo ee langg.
14 Hitt sii dirr ongg ee jyxiu siongsiongg qnir ongg ee bin, dirr qog-lai jre quann xui :ee, u Persia qapp Media cid xee dairsinn, dyrr si Karsena, Setar, Admata, Tarsis, Meles, Marsena, qapp Memukan.
15 Ongg mng ing qongxx, "Vasti byy juntanr taiwqamr soxx tuann Asuelo Ongg ee bingrling, dnaxx jiauww le lanw diyhh jnaixngiu vran ix ar?"
16 Memukan dirr ongg qapp hiaxee dairsinn ee binrjingg rinr qongxx, "Ongho Vasti soxx juer :ee m na quangai ongg, iarr si quangai Asuelo Ongg dirr dagg singw soxu ee dairsinn qapp jiongww vecsnir;
17 In'ui ongho soxx juer ee su, beh tuann qaur jiongww hurluw, beh qongw, 'Asuelo Ongg driaur ongho Vasti qaur ongg ee binrjingg, danrsi ix m laii.' Anxnix inx e biauxsi inx ee diongrhux;
18 Qinaxzit Persia qapp Media ee jiongww huzinn tniax qnir ongho soxx juer ee su, beh duiww ongg ee dairsinn anxnix qongw, dui' anxnix beh snix kiw jerje biauxsi qapp siurkir.
19 Ongg narr liac juer hyw, dyrr cud zurjiw siaw dirr Persia qapp Madai ee ludle diongx, hro ix be qexngua .did, m jrunw Vasti qycc qaur Asuelo Ongg ee binrjingg; ongg iarr diyhh jiong' ongho ee xui sniuxsur viw ix kacc hyw ee langg.
20 Ongg soxx qangr ee zurjiw venww tuann dirr ix ee qog, (ix ee qog kuacdua), dyrr hurluw longxx beh junqingr ix ee diongrhux, bylun junquir, vijen."
21 Ongg qapp hiaxee dairsinn longxx liac ix ee ue juer hyw; ongg dyrr jiauww Memukan ee ue laii qniaa;
22 Cud jiauwbunn dirr ongg hiaxee singw, qaur dagg singw, jiauww inx ee bunzi, qaur dagg xui ee vecsnir, jiauww inx ee kniukauw, hro juer diongrhux :ee dagg xee dirr qrex-lai juer jruw.
2 Jiaxee dairjir ixau, Asuelo Ongg ee siurkir suah, dyrr siauwliam Vasti qapp ix ee soxx qniaa, qapp ix jnaixngiu qangwjiw laii vran ix.
2 Dui' anxnix, qinsuii ongg ee zinsinn qra ix qongw, "Diyhh qra ongg cue suiw ee jairsikluw quixnarr langg;
3 Ongg diyhh pair qnua'uann dirr ix qog-lai ee dagg singw, hro inx jiyjip itcer suiw ee jairsikluw qaur Susa ee ongqiongx, qaur luxngi, qaux hro ongg ee taiwqamr Hegai, dyrr si jiangxquanw luxjuw :ee, iarr diyhh qiongqib inx cingkir sinkux ee pinxliau;
4 Ongg soxx qac'ir ee luxjuw, tangx setlip ix juer ongho laii ter Vasti." Ongg liac jitt xee su juer hyw, dyrr anxnix qniaa.
5 Susa Qiongx u jit xee Judahlangg, miaa qiyr Mordekai, si Benjaminlangg Kis ee jingsunx, Simei ee sunx, Jair ee qniaw.
6 Jingg Babylon Ongg Nebuqadnezar censuaw Judah Ongg Jehoiaqin, Mordekai iarr dui' Jelusalem siurr censuaw dirr hitt vxangx siurr liac ee langg ee diongqanx.
7 Ix vue'iongw ix ee jig ee jaboxqniaw Hadassah, iarr miaa Ester, in'ui jitt xee jaboxginxaw byy verbuw; ix ee binrmau suiw qycc hyw knuar; ix ee verbuw ixqing' siw, Mordekai dyrr jiaplap ix juer qaqi ee jaboxqniaw.
8 Ongg ee bingrling qapp jiauwsux ixqing' suanvor, dyrr jurjip jerje luxjuw dirr Susa ee ongqiongx, qaux dirr Hegai ee ciuw. Hitt sii Ester iarr sangr zip ongqiongx, qaux hro quanw luxjuw ee Hegai ee ciuw.
9 Jitt xee luxjuw did diyc Hegai ee hnuahiw. Hegai hyw kuanxtia ix, qnuaxqinw ing cingkir sinkux ee pinxliau hro ix, qapp ix ingqaix did .diyc ee hunrgiac; iarr dui' ongqiongx jiong' ingqaix hro ix ee cid xee qiongluw hro ix; vnuasuaw ix qapp ix hiaxee qiongluw qaur luxngi siongrr hyw ee soxjai.
10 Ester m bad qra langg qongw ix si simxmih jik, simxmih jok, in'ui Mordekai qiyr ix m tangx qra langg qongw.
11 Mordekai dagg zit dirr luxngi ee taujingg qniaa laii qniaa kir, rair jaix Ester ving'anx iacc byy, qapp ix jionglaii qingxgu jnaixngiu.
12 Jiauww hurluw ee le urvi jap-zi guehzit, dyrr si lak guehzit ing bud'iyc ee iuu, lak guehzit ing hniuliau qapp luxjuw cingkir sinkux ee vadd hy mic. Cingkir ee zit ixqing' muaw, jiongww luxjuw dyrr jiauww cuwsu zip kir qnir Asuelo Ongg.
13 Luxjuw zip kir qnir ongg si jitt kuanw; dui' luxngi qaur ongqiongx ee sii, qniwnarr ix soxx rair :ee longxx hro ix, iarr suar duar .kir;
14 Ehngx-sii zip .kir, qeh jaxkiw dyr laii derr zi xee luxngi, qaux hro ongg ee taiwqamr, dyrr si quanxliw vinrhuix :ee, Saasgaz ee ciuw. Narr m si ongg hnuahiw ix, qycc tee kiw ix ee miaa laii driaur ix, dyrr byy qycc zip kir qnir ongg.
15 Mordekai jiaplap juer ix ee jaboxqniaw ee Ester, dyrr si ix ee jig Abihail ee jaboxqniaw, jiauww cuwsur diyhh zip kir qnir ongg ee sii, druu kir ongg ee taiwqamr jiangxquann luxjuw ee Hegai soxx pair hro ix :ee, lingrgua byy tyw vadd mic; qniwnarr knuar diyc Ester :ee longxx hnuahiw.
16 Asuelo Ongg jerui derr cid nii, Jap-guec, dyrr si Tebet Guec, Ester did diyc suanw zip ongqiongx qnir ongg.
17 Ongg tniar Ester ngiaa quer jiongww luxjuw, ix dirr ongg ee bagjiux jingg did diyc undenw tiongxair. Ongho ee benxliuu dyrr dir dirr ix ee taukag, ongg setlip ix juer ongho, laii ter Vasti.
18 Hitt sii ongg uirr hiaxee dairsinn vacqnuax sed dua ensiac, dyrr si Ester ee ensiac, qycc anbuw dagg singw, jiauww ongg ee huwjiog, sniuxsur mihqnia.
19 Hiaxee jairsikluw derr zi vaiw jurjip ee sii, Mordekai jre dirr ongg ee mngg.
20 Ester jiauww Mordekai soxx bingrling :ee, m bad qra langg qongw ix si simxmih jok, simxmih jik; in'ui Ester juntanr Mordekai ee bingrling, cincniu jingg did diyc ix buxiongw ee sii jidngiu.
21 Dng' hiaxee zit, dyrr si Mordekai jre dirr ong ee mngg ee sii, ongg ee taiwqamr diongx u qor mngg :ee nng langg, Bigtana qapp Teles, qewboo beh hai Asuelo Ongg.
22 Mordekai jaix hitt xee dairjir, dyrr qra ongho Ester qongw; Ester dyrr ing Mordekai ee miaa jiong' hitt xee su qongw hro ongg jaix.
23 Ongg qiuwkamr jitt xee su, qoxzenn si sit, dyrr jiong' nng langg driaur dirr caa nirr, qra jitt xee su dirr ongg ee binrjingg qiwjair dirr ligsuw ee ceh.
3 Jiaxee diarjir ixau, Asuelo Ongg quxkiw Agag-jok Hammedata ee qniaw Hamam, qysingx ix, hro ix ee xui kacc quann dirr itcer dangliauu ee zinsinn.
2 Ongg ee zinsinn diamr dirr ongg ee mngg :ee, longxx qui lecc vair Haman, in'ui ongg iarr bad bingrling diyhh anxnix kuanxtai ix; dogdok Mordekai m qui m vair.
3 Hitt sii ongg ee zinsinn, diamr dirr ongg ee mngg :ee, qra Mordekai qongw, "Liw sniaw su uiqec ongg ee bingrling ar?"
4 Inx zidzit qra ix qongw, ix iarr m tniax inx; inx dyrr qra Haman qongw, beh knuar Mordekai ee su kia e diauu iacc be; in'ui ix u qra inx qongw ix si Judahlangg.
5 Haman knuar qnir Mordekai m qui m vair ix, Haman dyrr muaxvog siurkir.
6 Inx ixqing' qiyr Mordekai ee vunxjok qra Hpaban qongw; Haman liac juer herciuw hai Mordekai jit langg si siyxkuaw su, dyrr qewboo beh bet Asuelo tong' qog ee Judahlangg, dyrr si Mordekai ee vunxjok.
7 Dng' Asuelo Ongg derr jap-zi nii Jniax-guec, dyrr si Nisan Guec, langg dirr Haman ee binrjingg, jiong' hiaxee zidzit guehguec laii vruac puzim, dyrr si tiux ciamx; vruac diyc Jabzi-guec dyrr si Adar Guec.
8 Haman duiww Asuelo Ongg qongw, "U jit jok ee vecsnir, snruar kuix dirr liw ee qog dagg singw ee vecsnir diongx, inx ee ludle kacc qyc'ngiu dirr banrvecsnir ee ludle, iarr byy siuw ongg ee ludle; soxiw narr iong'unw inx, sidjai byy lirig dirr ongg.
9 Ongg narr liac juer hyw, diyhh cud bingrling laii bet inx; guaw dyrr ing ginn jit-bxan talent qaux dirr quanxliw jitt xee su ee langg ee ciuw, tangx siuzip ongg ee kowvangg."
10 Ongg dyrr vrag ix qaqi ee ciuxjiw hro Judahlangg ee duiwdik, Agag-jok Hammedata ee qniaw Haman.
11 Ongg qra Haman qongw, "Jitt xee ginn hro liw, hitt xee vecsnir iarr hro liw, jiauww liw soxx knuar juer hyw :ee cuxdi inx."
12 Jniax-guec jap-snax dyrr driaur ongg ee suqir laii, jiauww Haman itcer soxx bingrling :ee, qniabunn hro ongg ee zinsinn qapp dagg singw ee jongxdog, qapp jiongww vecsnir ee siuxlingw; qaur dagg singw jiauww inx ee bunzi, qaur jiongww vecsnir jiauww inx ee kniukauw, ing Asuelo Ongg ee miaa siaw ix, qycc ing ongg ee ciuxjiw kamr inr.
13 Hitt xee jiauwbunn si dui' ongg ee jauw bunsux :ee tuann qaur ongg ee dagg singw, bingrling jiong' Judahlangg, dui' siauwlenn qaur lau, ngex-aw, hurzinlangg, dirr jit zit lai, Adar Guec, dyrr si Jabzi-guec jap-snax, jaubet ix, taii siw ix, hro ix sixbyy, qycc cniuw inx ee huewjaii juer jongbut.
14 Hitt xee zurjiw ee qyw, caux qiar hro dagg singw, suanvor hro jiongww vecsnir, hro inx urvi tingwhau hitt zit.
15 Jauw bunsux :ee tranr ongg ee bingrling, qinw qinw kixsinx, jitt xee zurjiw dirr Susa Qiongx tuann cud. Ongg qapp Haman jre lecc limx jiuw; Susa Sniaa dua hunluan.
4 Mordekai ixqing' jaix itcer ee soxx juer, Mordekai dyrr tiah lic snxax, cing muasnax, samw huexhux, cud kir sniaa-lai, dua sniax vi'aix tikaur;
2 Qaur dirr ongg ee mngg-jingg; in'ui qniwnarr cing muasnax :ee berdid tangx zip ongg ee mngg.
3 Dirr dagg singw, dyrr si ongg ee bingrling qapp zurjiw soxx qaur ee soxjai, dirr Judahlangg ee diongqanx, u vi'aix qimwjiac tikaur camxceh; qycc u jerje langg dyw dirr muasnax qapp huexhux nirr.
4 Ester ee qiongluw qapp ix ee taiwqamr laii qra ix qongw; ongho dyrr iubun qaur qik, qiar ihok hro Mordekai cing, rair trngr kir ix ee muasnax, danrsi ix m singsiu.
5 Ester dyrr driaur ongg soxx pair suhau ix ee taiwqamr, miaa qiyr Hatac :ee laii, qiyr ix kir Mordekai hiax, rair jaix jitt xee si simxmih dairjir, simxmih indnuax.
6 Hatac dyrr cud kir qaur sniaa ee kuankuah ee soxjai, dyrr si dirr ongg ee mngg-jingg, qaur Mordekai hiax.
7 Mordekai dyrr jiong' ix itcer soxx duw .diyc .ee, ixqip Haman soxx qongw beh henr dirr ongg ee kowvangg ee ginn kaksit ee siauwgiac, tangx jaubet Judahlangg :ee, longxx qra ix qongw;
8 Qycc causiaw dirr Susa Sniaa soxx tuann beh jaubet Judahlangg ee zurjiw hro ix, hro ix tec hro Ester knuar, suar qra ix qongw bingg, qycc huanhur ix zip kir qnir ongg laii kunxqiuu ix, dirr ongg ee binrjingg uirdiyhh vunxjok ee vecsnir kunxced qiqiuu.
9 Hatac dyr laii ing Mordekai ee ue qra Ester qongw.
10 Ester qycc qra Hatac qongw, tog ix qra Mordekai qongw,
11 "Ongg ee jiongww zinsinn, qapp ongg hiaxee singw ee vecsnir, longxx jaix u jit diauu dniardiyc ee le, narr byy siurr driaur, jurjuanx zip lairngi qnir ongg :ee, bylun lamluw, narr m si ongg giac ix qimx ee qnuaiw-aw hro ix did diyc uac :ee, dyrr diyhh hro ix siw; dnaxx guaw byy siurr driaur qaur ongg hiax ixqing' snax-jap zit quw lar."
12 Inx dyrr ing Ester ee ue qra Mordekai qongw.
13 Mordekai huanhur langg qra Ester qongw, "Liw m tangx pacsngr liw dirr ongqiongx lai viw jiongww Judahlangg kacc e tuatli;
14 Dirr jitt sii liw narr jing jing longxx byy qongw, Judahlangg beh dui' vadd xui did diyc tuatli, did diyc jinxqiur, liw qapp liw ee laurve ee qrex e duw diyc bedbyy; beh sniaw jaix liw did diyc ongho ee xui m si in'ui qinaxzit ee siser ar?"
15 Ester dyrr huanhur langg huehog Mordekai qongxx,
16 "Kir jiyjip dirr Susa soxu ee Judahlangg, uirdiyhh guaw qimwjiac snax zit, zidmii byy jiac byy limx; guaw qapp guaw ee qiongluw iarr beh qimwjiac; guaw beh byy jiauww le zip kir qnir ongg, siw dyrr hro ix siw."
17 Mordekai dyrr kir, jiauww Ester itcer soxx bingrling :ee kir qniaa.
5 Derr snax zit, Ester cing ongho ee lexhok, kia dirr ongqiongx ee lairngi, dirr ongqiongx ee duiwbin. Hitt sii ongg dirr ongqiongx lai jre ix ee ong'ui, dirr ongqiongx ee mngg ee duiwbin.
2 Ongg knuar qnir ongho Ester kia dirr ngi-lai, ix dyrr did diyc undenw dirr ongg ee bagjiux jingg; ongg giac kiw ciuw-diongx soxx giac ee qimqnuaiw-aw ngr Ester. Ester dyrr jinwjingg, bongx ix qnuaiw-aw ee buexliux.
3 Ongg duiww ix qongw, "Ongho Ester ar, liw beh dnic simxmih, beh qriuu simxmih? Dyrr narr qog ee jidvnuar, iarr beh hro liw."
4 Ester qongw, "Ongg narr liac juer hyw, dyrr cniaw ongg qapp Haman qinaxzit laii hur guaw uirdiyhh ix soxx sed ee ensiac."
5 Ongg dyrr qongw, "Bingrling Haman qinw qinw laii, tangx jiauww Ester soxx qongw :ee kir qnirr." Ongg qapp Haman dyrr kir hur Ester soxx sed ee ensiac.
6 Dirr jiuxenn ee diongqanx, ongg qycc qra Ester qongw, "Liw soxx cringw si simxmih? Dyrr narr qog ee jidvnuar, iarr beh juewjniaa ix."
7 Ester rinr qongxx, "Guaw soxx cringw soxx qriuu :ee si anxnix.
8 Guaw narr did diyc undenw dirr ongg ee bagjiux jingg, ongg narr hnuahiw unxjunw guaw soxx cringw, qniaa guaw soxx qriuu :ee, dyrr cniaw ongg qapp Haman laii hur guaw soxx beh ter inx sed ee ensiac; guaw binaxzit beh jiauww ongg soxx qongw :ee laii qniaa."
9 Hitt zit Haman hnuahiw, simlai kuaiwlok, dyrr cud .laii. Haman knuar qnir Mordekai dirr ongg ee mngg byy kiw .laii, iarr byy uirdiyhh ix laii dinxdang, dyrr muaxsimx siurkir Mordekai.
10 Haman qaqi benxqiongw lunw lehh, dyr kir inx cur, dyrr crex langg qiyr ix ee ving'iuw qapp ix ee bow Zeles.
11 Haman dyrr jiong' ix vuwur ee ingqngx, qapp qniaxzii ee jue, qapp ongg qysingx ix, quxkiw ix vnuaa quer ongg hiaxee siuxlingw, zinsinn ee dingxbin, longxx qongw hro inx tniax.
12 Haman qycc qongw, "Ongho Ester, druu kir guaw ixgua, m jrunw simxmih langg qapp ongg hur ix soxx sed ee ensiac; binaxzit guaw iuqycc qapp ongg hro ix cniaw.
13 Danrsi guaw knuar qnir Judahlangg Mordekai jre dirr ongg ee mngg, dyrr jitt xee longxx byy lirig dirr guaw."
14 Ix ee bow Zeles qapp ix ee jiongww ving'iuw qra ix qongw, "Diyhh kia jit xee caqer quann go-jap dxng, binaxjaxkiw qriuu ongg diaur Mordekai dirr hitt dingxbin; zen'au liw tangx h.-hnuahiw-h. qapp ongg kir hur ensiac." Haman ylyw ix ee ue hyw, dyrr qiyr langg kia caqer.
6 Hitt mii ongg be kunr .did, qiyr langg tec ligsuw ee ceh laii; inx dyrr dirr ongg ee binrjingg tak ix.
2 Duw diyc ceh nirr u siaw qongxx: Ongg qor mngg ee taiwqamr diongx u nng langg, Bigtana qapp Teles, qewboo beh hai Asuelo Ongg; Mordekai vywqyr jitt xee su.
3 Ongg qongw, "Uirdiyhh jitt xee su, ing simxmih ingqngx junquir sniuxsur Mordekai ar?" Suhau ongg ee zinsinn rinr qongxx, "Byy sniuxsur ix simxmih."
4 Ongg qongw, "Jirjui dirr ngi-lai?" Hitt sii Haman zip ongqiongx ee guarngi, beh qriuu ongg diaur Mordekai dirr ix soxx qra ix kia ee caqer.
5 Ongg ee zinsinn qra ix qongw, "Haman kia dirr ngi-lai." Ongg qongw, "Qiyr ix zip .laii."
6 Haman dyrr zip .kir; ongg mng ix qongxx, "Ongg soxx rair ingqngx ix ee langg, diyhh jnaixngiu kuanxtai ix?"
7 Haman simlai sniu qongxx, "Ongg soxx rair ingqngx ix ee langg, jirjui e ngiaa quer guaw?"
8 Haman dyrr rinr ongg qongxx, "Diyhh jiong' ongg soxx kiaa ee bew, taukag dingw soxx dir ee benxliuu,
9 Jiong' jitt xee ihok qapp bew qaux dirr ongg jit xee qik junquir ee zinsinn ee ciuw, hro inx ing hitt niaw snxax hro ongg soxx rair ingqngx ix ee langg cing; qycc hro ix kiaa bew venww iuu sniaa-lai ee quelo, dirr ix ee taujingg suanvor qongxx, 'Ongg soxx rair ingqngx ee langg, ongg beh anxnix kuanxtai ix.'"
10 Ongg qra Haman qongw, "Liw qinw qinw kir, jiong' jitt xee ihok qapp bew, jiauww liw soxx qongw :ee, kuanxtai hitt xee jre dirr ongg ee mngg ee Judahlangg Mordekai; qniwnarr liw soxx qongw :ee m tangx jiyw jit langg."
11 Haman dyrr duar ihok qapp bew laii, qycc hro Mordekai cing ix; iarr hro ix kiaa bew, venww iuu dirr sniaa-lai ee quelo, dirr ix ee taujingg suanvor qongxx, "Ongg soxx rair ingqngx ix ee langg, ongg beh anxnix kuanxtai ix."
12 Mordekai dyr laii ongg ee mngg. Haman iubun, dar ix ee taukag, qinw qinw dyr kir inx cur.
13 Haman jiong' ix itcer soxx duw .diyc .ee longxx qra ix ee bow Zeles qapp ix hiaxee ving'iuw qongw; ix hiaxee diwsig ee langg, qapp ix ee bow Zeles, qra ix qongw, "Liw kixtauu sitvai dirr ix binrjingg ee Mordekai, ix narr qyxzenn si Judah ee jiongxjok, liw dikkag be ngiaa ix, beh dirr ix ee binrjingg sitvai qaur drew."
14 Inx iauxdecc qapp ix qongxue ee sii, ongg ee taiwqamr laii, qiyr Haman qinw qinw kir hur Ester soxx sed ee ensiac.
7 Ongg qapp Haman laii hur ongho Ester ee ensiac.
2 Jitt xee derr zi zit, ongg dirr ensiac ee diongqanx limx jiuw ee sii qycc mng Ester qongxx, "Ongho Ester ar, liw soxx cringw si simxmih? Guaw beh hro liw. Liw soxx qriuu si simxmih? Dyrr qog jidvnuar iarr beh juewjniaa ix."
3 Ongho Ester rinr qongxx, "Ongg ar, guaw narr did diyc undenw dirr liw ee bagjiux jingg, ongg narr liac juer hyw, dyrr guan liw rinw guaw soxx cringw, ing guaw ee sniwmia hro guaw, rinw guaw ee soxx qriuu, ing guaw ee jongjok hro guaw;
4 In'ui guaw qapp guaw ee jongjok siurr bre, beh siurr jaubet, inx beh taii siw guanw, hro guanw sixbyy. Setsuw bre guanw juer lovok juer luxvi, guaw iarr jing jing."
5 Asuelo Ongg rinr ongho Ester qongxx, "Qnaw junsimx juer jitt xee su :ee si jirjui? Hitt langg dirr dyclyc?"
6 Ester qongw, "Qiusiuu duiwdik dyrr si jitt xee pnaiw langg Haman." Haman dirr ongg qapp ongho ee binrjingg dyrr jin' qniax.
7 Ongg dua siurkir, dui' jiuxenn kiw .laii, zip kir ongqiongx ee huehngg. Haman iarr kiw .laii duiww ongho Ester qriuu sniwmia, in'ui knuar qnir ongg quat'ir beh hinghuat ix.
8 Ongg dui' ongqiongx ee huehngg dywdngw laii jiuxenn ee soxjai; hitt sii Haman ixqing' pag lyc dirr Ester soxx dilehh ee cngg. Ongg qongw, "Ix qycc dirr qiongx-lai, dirr guaw ee binrjingg, beh lingziok ongho mah?" Ue dui' ongg ee cuir qongw cud, langg dyrr kamr Haman ee bin.
9 Suhau Ongg ee taiwqamr u jit xee, miaa qiyr Harbonah, qongw, "Knuar ar, Haman uirdiyhh Mordekai kia jit xee go-jap dxng quann ee caqer; Mordekai dyrr si jingzit ing jinrdiongx ee ue vyr ongg :ee; dnaxx hitt xee qxer kia dirr Haman ee qrex." Ongg qongw, "Diaur ix dirr hitt dingxbin."
10 Langg dyrr diaur Haman dirr ix qra Mordekai soxx virvan ee caqer dingw; ongg ee siurkir jiacc suah.
8 Dng' hitt zit Asuelo Ongg jiong' Judahlangg ee duiwdik Haman ee qesanw sniuxsur hro ongho Ester. Mordekai iarr laii ongg ee binrjingg, in'ui Ester ixqing' qra ongg qongw, Mordekai si ix ee simxmih cinx.
2 Ongg vrag qaqi ee ciuxjiw laii hro Mordekai, dyrr si dui' Haman tec dywdngw :ee; Ester qycc setlip Mordekai laii quanxliw Haman ee qesanw.
3 Ester qycc dirr ongg ee binrjingg, pag dirr ix ee kax-xe, lrauu bagsaiw, qriuu ix druu Agag-jok Haman ee hamrhai, ixqip ix bohai Judahlangg ee qewboo.
4 Ongg ngr Ester giac kiw ix qimx ee qnuaiw-aw. Ester dyrr kiw laii kia dirr ongg ee binrjingg, qongw,
5 "Ongg narr liac juer hyw, guaw narr did diyc undenw dirr ongg ee bagjiux jingg, ongg liac jitt xee su juer driyc, guaw narr did diyc hnuahiw dirr ongg ee bagjux jingg, dyrr kunxqiuu cud jiauwbunn, cuxsiaux Agag-jok Hammedata ee qniaw Haman soxx qewboo ee jiauwbunn, dyrr si ix soxx siaw beh bet ongg dagg singw ee Judahlangg :ee;
6 In'ui guaw tacc e zimw did knuar qnir qaqi ee vecsnir siurr hamrhai? Tacc e zimw did knuar qaqi ee jongjok siurr bet ar?"
7 Asuelo Ongg dyrr qra ongho Ester qapp Judahlangg Mordekai qongw, "In'ui Haman bohai Judahlangg, guaw ixqing' jiong' ix ee qesanw hro Ester, iarr jiong' Haman diaur dirr caqer dingw.
8 Linw iarr tangx ing ongg ee miaa jiauww linw ee iwsur, siaw zurjiw hro Judahlangg, ing ongg ee ciuxjiw kamr inr. In'ui qniwnarr ing ongg ee miaa laii siaw :ee, ongg ee ciuxjiw kamr inr ee jiauwbunn, byy langg e cuxsiaux ix."
9 Derr snax guec, dyrr si Sivan Guec zi-jap-snax, hitt sii driaur ongg ee suqir laii, jiauww Mordekai itcer soxx bingrling :ee, cud jiauwbunn hro Judahlangg, iarr qaur dirr zinsinn, qapp dagg singw ee jongxdog, siuxlingw, dyrr si dui' India qaur Kus, qiong jit-vah zi-jap-cid singw, qaur dirr dagg singw, jiauww inx ee bunzi; qaur dagg jok ee vecsnir, jiauww inx ee kniukauw; qaur Judahlangg, jiauww inx ee bunzi, jiauww inx ee kniukauw.
10 Mordekai ing Asuelo Ongg ee miaa siaw zurjiw, ing ongg ee ciuxjiw kamr inr, jiong' hitt xee jiauwbunn qaux dirr kiaa bew jauw bunsux :ee. Inx kiaa ongg ee bexdiauu soxx snix :ee, qog-lai qongsu ing ee hyw bew, laii tuann ix.
11 Dirr zurjiw ee lairbin, ongg junw dirr dagg xee sniaa ee Judahlangg jurjip, kiw laii vyxho qaqi ee sniwmia, qniwnarr dagg singw ee vxingx qapp vecsnir beh qongqig inx :ee, inx tangx jaubet inx, taii siw inx, hro in qapp inx ee ginxaw, hurzinlangg sixbyy, qycc cniuw inx ee huewjaii juer jongbut;
12 Dirr Asuelo Ongg ee dagg singw, dirr Jabzi-guec, dyrr si Adar Guec jap-snax, hitt jit zit ee lairbin tangx anxnix juer.
13 Causiaw hitt xee zurjiw vanhingg dagg singw, vywqyr dagg jok, hro Judahlangg virvan tingwhau hitt zit, duiww ix ee duiwdik laii vywsiuu.
14 Hiaxee jauw bunsux :ee hrong ongg ee bingrling jin' vikced, kiaa qog-lai qongsu soxx ing ee kuair bew, qinw qinw kixsinx; jitt xee jiauwbunn iarr vanhingg dirr Susa Qiongx.
15 Mordekai cing nraa sig vec sig ee diauhok, dir dua dingw ee qimbenxliuu, qycc cing jxiw sig iuwduervor ee guarhok, dui' ongg ee binrjingg cud .laii.
16 Susa Sniaa ee vecsnir longxx cud hnuahiw knuaiwlok ee sniax. Judahlangg u ingqngx, hnuahiw, kuaiwlok, junquir.
17 Ongg ee zurjiw soxx qaur ee dagg singw, dagg sniaa, Judahlangg longxx hnuahiw kuaiwlok sed ensiac, liac hitt zit juer hyw zit. Hitt soxjai ee vecsnir in'ui qniax Judahlangg, jerje zip Judah-jik.
9 Jabzi-guec, dyrr si Adar Guec, jap-snax, ongg ee bingrling qapp zurjiw decbeh quxhingg, dyrr si Judahlangg ee duiwdik ngwbang did diyc quanxhad inx; danrsi dairjir duiwhuanw, huanxdngw hro Judahlangg quanxhad qniwnarr uanwhun inx ee langg;
2 Hitt zit dirr Asuelo Ongg ee dagg singw, Judahlangg longxx jurjip dirr inx ee sniaa, herciuw qongqig hiaxee beh hai inx ee langg, byy langg e dixdngx inx, in'ui jiongww vecsnir longxx qniax inx.
3 Dagg singw ee siuxlingw, dairsinn, jongxdog, qapp vanrliw ongg ee su ee langg, longxx laii vangjan Judahlangg, in'ui qniax Mordekai.
4 In'ui Mordekai dirr diaudingg jundua, miasniax venww tuann dagg singw; jitt xee Mordekai naxx sringx naxx dua.
5 Judahlangg ing dyx pah inx itcer ee duiwdik, taii siw inx, jaubet inx, cutjai iwsur qniaa dirr uanwhun inx ee langg.
6 Dirr Susa Sniaa, Judahlangg taibet go-vah langg;
7 Qycc taii siw Parsandata, Dalfon, Aspata,
8 Polata, Adalia, Alidata,
9 Parmasta, Alisai, Alidai, qapp Vaizata;
10 Jitt jap langg longxx si Hammedata ee sunx, Judahlangg ee duiwdik Haman ee qniaw; danrsi byy cniuw inx ee jaibut.
11 Dng' hitt zit jiong' Susa Sniaa siurr taii ee langgiac tingvyr dirr ongg ee binrjingg.
12 Ongg qra ongho Ester qongw, "Judahlangg dirr Susa Sniaa taii siw duiwdik go-vah langg, qycc taii siw Haman jap xee qniaw; dirr ongg qi'uu ee dagg singw m jaix juer jnaixngiu. Dnaxx liw soxx cringw si simxmih? Guaw beh hro liw. Liw soxx qriuu si simxmih? Iarr beh juewjniaa ix."
13 Ester dyrr qongw, "Ongg narr liac juer hyw, qriuu liw jrunw Susa ee Judahlangg, binaxzit iarr jiauww qinaxzit ee zurjiw laii qniaa, iarr jiong' Haman jap xee qniaw diaur dirr caqer nirr."
14 Ongg dyrr bingrling jiauww anxnix qniaa; hitt xee zurjiw tuann dirr Susa, langg dyrr jiong' Haman jap xee qniaw diaur .kiw .laii.
15 Adar Guec jap-sir, Susa ee Judahlangg qycc jurjip dirr Susa, taii siw snax-vah langg; danrsi byy cniuw inx ee jaibut.
16 Dirr ongg dagg singw qi'uu ee Judahlangg iarr longxx jurjip, kiw laii vyxho qaqi ee sniwmia, tuatli duiwdik, hiongxsiu ving'anx, taii siw uanwhun inx ee langg cid-bxan go-cingx, danrsi byy cniuw inx ee jaibut.
17 Adar Guec jap-snax qniaa jitt xee su, jap-sir anhiyh, ing jitt zit sed ensiac juer hnuahiw ee zit.
18 Susa ee Judahlangg jitt jap-snax jap-sir zit jurjip; jap-go zit anhiyh, ing jitt zit juer sed ensiac hnuahiw ee zit;
19 Soxiw diamr dirr hniusia ee Judahlangg, kiarkiw dirr byy sniacniuu ee votauu, dnaxx longxx ing Adar Guec jap-sir zit juer sed ensiac hnuahiw ee zit, juer hyw ee zit, ing lexmic sna' sangr.
20 Mordekai qiwjair hiaxee su, qycc siaw puex hro Asuelo Ongg dagg singw hngrqin soxu ee Judahlangg,
21 Dniardiyc inx dagg nii diyhh siuw Adar Guec jap-sir jap-go nng zit;
22 Jitt nng zit si Judahlangg tuatli duiwdik did diyc ving'anx ee zit; hitt guec si inbun venr juer hnuahiw, vi'aix venr juer hyw ee zit. Iarr diyhh siuw jitt nng zit juer sed ensiac hnuahiw, dairqex ing lexmic sna' sangr, jinwjer songwhionglangg ee zit.
23 Dui' anxnix Judahlangg, jiauww Mordekai soxx siaw hro inx ee puex, singzin beh jiauww inx kixtauu qniaa :ee laii siuw ix;
24 In'ui Judahlangg ee duiwdik, Agag-jok Hammedata ee qniaw Haman, sed qewboo qongqig Judahlangg beh bet inx, vruac pulim, dyrr si tiux ciamx, uirdiyhh beh vairhuai inx, jaubet inx.
25 Jitt xee dairjir qaur ongg ee binrjingg, ongg dyrr qangr zurjiw hro Haman, qewboo hai Judahlangg ee pnaiw qewboo qruix dirr ix qaqi ee taukag, qycc diaur ix qapp ix hiaxee qniaw dirr caqer dingw.
26 Dui' anxnix inx jiauww pulim ee miaa dyrr qiyr hiaxee zit juer Pulim Zit. Inx in'ui jitt dniux puex longxjongw ee ue, ixqip inx dirr jitt xee su soxx cinbak knuar .qnir, cinsinx duw .diyc ee su,
27 Judahlangg dyrr quat'ir singzin, inx qapp inx ee horer, ixqip qniwnarr qui'uaw inx ee langg, ninii beh jiauww soxx qiwjair, soxx dniardiyc ee qrii, siuw jitt nng zit, hro ix byy huewbyy;
28 Qycc beh qiwliam laii siuw hiaxee zit, dirr dagg dai, dagg qrex, dagg singw, dagg sniaa, hro pulim ee zit dirr Judahlangg ee diongqanx byy huewbyy; dirr inx ee horer qiwliam byy suah.
29 Hitt sii Abihail ee jaboxqniaw ongho Ester qapp Judahlangg Mordekai, ing juanquann siaw laii qenqor pulim ee derr zi dniux puex;
30 Qycc ing hyvingg singsit ee ue, siaw puex hro Asuelo Ongg qog-lai jit-vah zi-jap-cid singw soxu ee Judahlangg,
31 Beh qenqor jitt xee pulim ee zit dirr inx soxx dniardiyc ee qrii, jiauww Judahlangg Mordekai qapp ongho Ester soxx bingrling inx :ee, iarr jiauww Judahlangg uirr qaqi qapp inx ee horer soxx dniardiyc :ee, qimwjiac tikaur.
32 Ester ee jiauwbing qenqor pulim ee su, iarr u qir dirr ceh nirr.
10 Asuelo Ongg hro dax de qapp haixsu ee vecsnir longxx jinwqongr.
2 Ix ing quanvingr linglik soxx qniaa ee su, ixqip ongg quxkiw Mordekai hro ix qysingx siongser ee qiwjair, qamxx byy longxx qir dirr Media qapp Persia ongg ee ligsuw mah?
3 In'ui Judahlangg Mordekai juer Asuelo Ongg ee jnaixsiongr, dirr Judahlangg ee diongqanx juer dua, did diyc ix ee jiongww hniadi hnuahiw, uirdiyhh ix ee vecsnir doboo lirig, qycc an'uir ix ee jongjok.