job

1 Uz ee de bad u jit langg miaa qiyr Job, hitt langg uanjuann qycc jingwdit, qingwuir Siongrder, lirkuix jiaxee pnaiw.

2 Ix snix cid xee qniaw, snax xee jaboxqniaw.

3 Ix ee qegiap u ngiuu cid-cingx, logdyy snax-cingx, guu go-vah duir, lubuw go-vah jiah; iarr u jerje ceing ee langg; anxnix jitt langg dirr danghngx jingwlangg ee diongqanx si juer derr id dua.

4 Ix hiaxee qniaw kir sed ensiac dirr dagg langg ee cur, jiauww ix ee zidjiw; qycc crex langg kir cniaw inx snax xee jixbe laii qapp inx limjiac.

5 Ensiac ee zit ixqing' muaw, Job crex langg qiyr inx laii hro inx singwqed; qycc tauwjaw kiw .laii, jiauww inx jingwlangg ee siauwgiac henr siyjer; in'ui Job qongw, "Qiamxcaiw guaw ee qniaw u huanrjue, simlai kiwjuat Siongrder." Job siongsiongg anxnix qniaa.

6 U jit zit, Siongrder ee jiongww qniaw laii, qaqi kia dirr Jehovah ee binrjingg, Satan iarr laii dirr inx diongqanx.

7 Jehovah duiww Satan qongw, "Liw dui' dyclyc laii?" Satan dyrr rinr Jehovah qongxx, "Guaw dirr derjniu qniaa laii qniaa kir, venww qniaa dirr hiax, dui' hiax laii."

8 Jehovah duiww Satan qongw, "Liw u liusimx dirr Guaw ee lovok Job mah? In'ui derjniu byy lnagg cincniu ix uanjuann qycc jingwdit, qingwuir Siongrder, lirkuix jiaxee pnaiw."

9 Satan rinr Jehovah qongxx, "Job qingwuir Siongrder, qamxx byy indnuax mah?

10 Liw qamxx m si ing livax uii ix, qycc uii ix ee qrex, qapp uii ix siwbin itcer soxu :ee mah? Ix ee ciuw soxx juer :ee, Liw suwhog ix, ix ee qegiap iarr dirr de nirr qetnix jerje.

11 Dnaxx Liw narr crunx Liw ee ciuw, kap diyc ix longxjongw soxu :ee, ix dikkag dngbin kiwjuat Liw."

12 Jehovah duiww Satan qongw, "Knuar ar, ix itcer soxu :ee longxx dirr liw ee ciuxtauu, dogdok m tangx herciuw dirr ix ee sinkux." Satan dyrr duiww Jehovah ee binrjingg cud .kir.

13 U jit zit Job ee qniaw jaboxqniaw duxaxx dirr inx dua-hniax ee qrex decc jiac, decc limx jiuw,

14 U suwjiauw laii Job hiax, qra ix qongw, "Guu decc lee cann, lubuw dirr vnix:a jiac cauw;

15 Sabe ee langg hutzenn qaur, cniuw ix, ing dyx taii siw hiaxee lovok; jixu guaw jit langg jauw li laii vyr liw."

16 Ix iauxx decc qongw ee sii, qycc u jit xee laii, qongw, "Siongrder ee huew dui' tnix qangr lyc, siyx ngiuu-qrunn, qapp hiaxee lovok, laii bet inx; jixu guaw jit langg jauw li laii vyr liw."

17 Ix iauxx decc qongw ee sii, qycc u jit xee laii, qongw, "Qaldealangg vunx juer snax dui, hutzenn laii, pah logdyy laii cniuw ix, suar ing dyx taii siw hiaxee lovok; jixu guaw jit langg jauw li laii vyr liw."

18 Ix iauxx decc qongw ee sii, qycc u jit xee laii, qongw, "Liw ee qniaw, liw ee jaboxqniaw, dirr inx dua-hniax ee qrex decc jiac decc limx jiuw;

19 Hutzenn u dua hongx dui' kongwiaw cuex .laii, pah cur ee siwqaktauu, cur dyw, deh dirr siauwlenlangg ee dingxbin, inx dyrr longxx siw; jixu guaw jit langg jauw li laii vyr liw."

20 Job dyrr kiw .laii, tiah lic guarsnax, tir tauu, pag dirr de nirr laii vair; qongw,

21 "Guaw tngwteh cud laurbuw ee txex, iarr beh tngwteh dyr kir hiax. Jehovah sniuxsur, Jehovah tec .kir, diyhh ylyw Jehovah ee miaa."

22 Dirr jex itcer ee su, Job vingrr by huanrjue, iarr byy liac Siongrder juer byy hap.

2 Qycc u jit zit, Siongrder hiaxee qniaw laii, qaqi kia dirr Jehovah ee binrjingg, Satan iarr laii dirr inx ee diongqanx, qaqi kia dirr Jehovah ee binrjingg.

2 Jehovah duiww Satan qongw, "Liw dui' dyclyc laii?" Satan rinr Jehovah qongxx, "Guaw dirr derjniu qniaa laii qniaa kir, venww qniaa dirr hiax, dui' hiax laii."

3 Jehovah duiww Satan qongw, "Liw u liusimx dirr Guaw ee lovok Job mah? In'ui derjniu byy langg cincniu ix uanjuann qycc jingwdit, qingwuir Siongrder, lirkuix jiaxee pnaiw; liw suizenn qig guaw qongqig ix, byy indnuax huixhuai ix, ix iuguann jipsiuw ix ee sunjuann."

4 Satan rinr Jehovah qongxx, "Ing puee ngua puee, langg uirdiyhh ix ee sniwmia guan liauw ix itcer soxu :ee.

5 Liw crunx Liw ee ciuw kap diyc ix ee qud qapp ix ee bah, dyrr ix beh dngbin kiwjuat Liw."

6 Jehovah duiww Satan qongw, "Knuar ar, ix dirr liw ee ciuxtauu, dogdok diyhh lauu ix ee sniwmia."

7 Satan dyrr dui' Jehovah ee binrjinrr cud .kir, pah Job, hro ix dui' kax-drew qaur taukag dingw snix dogcngx.

8 Ix dyrr ing haurpniaper laii vee sinkux, jre dirr huexhux diongx.

9 Ix ee bow dyrr duiww ix qongw, "Liw iauxquxx jipsiuw liw ee sunjuann mah? Diyhh kiwjuat Siongrder laii siw."

10 Danrsi Job duiww ix qongw, "Liw qongxue si cincniu hiaxee gong ee hurzinlangg soxx decc qongw :ee. Lanw dui' Siongrder sriu hokkir, qamxx byy dui' Ix sriu jaieh mah?" Dirr jex itcer ee su, Job vingrr byy dui' ix ee cuir laii huanrjue.

11 Hitt sii Job snax xee ving'iuw tniax qnir ix duw diyc itcer ee koxlan, dag'ee dui' inx ee soxjai laii; dyrr si Temanlangg Elifaz, Suahlangg Bildad, Naamahlangg Zofar; inx siy' iog snaqab laii visiongx, an'uir ix.

12 Inx hng hng giahbak knuar, be zin did ix, dyrr dua sniax tikaur; dagg langg tiah lic guarsnax, ngr tnix ia tohunw dirr qaqi ee taukag.

13 Inx dyrr qapp ix jre dirr tokax cid zit cid mii, byy qapp ix qongw jit qxur, in'ui inx knuar qnir ix ee tongwkow jin' dua.

3 Au .laii Job kuix cuir, jiuwjow ix ee zit.

2 Job kuix cuir qongw:

3 Guaw cutsir ee zit, guan hitt xee zit byy .kir;

U huai'in davoqniaw hitt mii, guan hitt xee mii iarr byy .kir.

4 Guan hitt xee zit vnir juer oamr;

Guan Siongrder byy dui' dingxbin knuawqor ix,

Qngx iarr byy jiyr ix.

5 Guan oamr qapp siximr cimcuw ix;

Guan badhunn tingg dirr ix ee dingxbin,

Guan hro zit venr oamr :ee pacqniax ix.

6 Lun qaur hitt mii, guan oamr cniuw .kir;

Guan ix byy qapp nii-diongx hiaxee zit drangg hnuahiw;

Iarr byy zip dirr hiaxee guec ee siauwgiac.

7 Ar! Guan hitt mii byy u snix qniaw;

Inx diongqanx byy hnuahiw ee sniax.

8 Guan hiaxee jiuwjow zit :ee, jiuwjow ix;

Ixqip hiaxee e qikdong lringg :ee, jiuwjow ix.

9 Guan hitt mii tnix puxqngx ee cnxix vnir oamr;

Guan ix ngwbang qngx iarr be did .diyc;

Iarr byy knuar qnir jaxkiw-sii tnix tiachac;

10 In'ui byy qnuaibat snix guaw ee juxqiongx,

Iarr byy duiww guaw ee bagjiux ziakamr huanrlan.

11 Guaw sniaw su byy dirr txex nirr dyrr siw?

Sniaw su cud vakdow, byy suar dng kuir?

12 Sniaw su u katau'ux jrih guaw?

Sniaw su u nix hro guaw suh?

13 Narr byy anxnix, guaw ixqing' dyw lehh laii anzenn,

Ixqing' kunr laii jing jing;

14 Qapp derjniu led'ongg bosu snaqab dilehh,

Inx bad uirr qaqi kixjy pahngx ee soxjai;

15 Iacc si qapp u qimx ee siuxlingw dilehh;

Inx bad ing ginn ciongmuaw inx ee cur.

16 Iacc si cincniu qalauhsinx laii iamxbat :ee, guaw dyrr byy .kir;

Cincniu be qnir diyc qngx ee ngex-aw.

17 Dirr hiax pnaiw langg suah ix ee qiauxziauw;

Dirr hiax iawsen :ee did diyc anhiyh.

18 Dirr hiax siurr liac ee langg snaqab did diyc anzenn,

Byy tniax qnir dokqangx :ee ee sniax.

19 Sirser sirdua longxx dirr hiax;

Lovok tuatli ix ee juxlangg.

20 Sriu koxlan ee langg, sniaw su hro ix u qngx ar?

Simlai iukow ee langg, sniaw su hro ix u uahmia?

21 Inx ngwbang siw, iarr be did .diyc,

Cue ix, viw qrut kngwbat ee vyxvuer kacc cud lat.

22 Inx cue diyc hunbong dyrr kuaiwlok;

Hnuahiw qaur be qor .did.

23 Langg ee jendoo ixqing' amr bongbongx,

Siongrder siwbin uikunr ix, sniaw su hro ix u qngx ar?

24 In'ui guaw ing trow kuir ter jiahmic;

Guaw dua sniax hauw, cincniu dua juiw cringr cud.

25 In'ui guaw soxx jinx qniax :ee limqaur guaw;

Guaw soxx qniahniaa :ee qaur dirr guaw.

26 Guaw be did diyc anzenn, be did diyc vingjing, be did diyc anhiyh,

Itdit u huanrlan laii.

4 Temanlangg Elifaz rinr qongxx:

2 Langg narr beh qapp liw damlun, liw e hiam'iar .be?

Jirjui e qaqi ioksog byy qongxue ar?

3 Knuar ar, liw bad qawsi jerje langg,

Luanxziok ee ciuw liw iarr hro ix giamxgni.

4 Beh vuahdyw :ee, liw ing ue huu ix;

Katau'ux sngnngw :ee, liw hro ix iongxqnia.

5 Dnaxx dairjir qaur dirr liw, liw dyrr hunbee;

Kap diyc liw, liw dyrr qniahniaa.

6 Liw ee uaxkyr qamxx m si jairdirr liw ee qingwuir mah?

Liw ee ngwbang qamxx m si jairdirr liw soxx qniaa ee sunjuann mah?

7 Cniaw liw sniu knuar, byy jue ee langg jirjui u sixbyy?

Jingwdit ee langg dirr simxmih soxjai siurr jenxduu?

8 Jiauww guaw knuar, ing juerquar jingwjyh,

Ing okdok juer jingxjiw laii ia :ee, soxx siusingg iarr si anxnix.

9 Siongrder vunn kuir, inx dyrr sixbyy;

Ix cud dua siurkir ee hongx, inx dyrr siaubet.

10 Sraix ee hauw, bingw sraix ee sniax, longxx suah;

Sai'atunn ee cuiwkiw, longxx pacjic.

11 Lau ee sraix, in'ui byy tangx jiac dyrr siw;

Buw ee sraix, hiaxee qniaw iarr longxx siwsnuar.

12 U dairjir amwjni qaur dirr guaw,

Guaw hnirkangx iarr tniax qnir ix ser ser ee sniax.

13 Dui' mii .sii ngirsiong ee susniuw,

Dyrr si langg kunr dang binn ee sii,

14 Qniahniaa gniauhgniauc cuah limqaur guaw,

Hro guaw ee vacqud kehkec diy.

15 U sinn dui' guaw binrjingg qingquer;

Guaw sinkux ee mngqngw cangr .kiw .laii.

16 Ix tingg lehh; guaw beh knuar bingg ix ee hingjong;

U sxiong dirr guaw bagjiux jingg;

Jing jaucjauh, guaw tniax qnir u sniax, qongw,

17 E siw ee langg duiwdirr Siongrder qamxx si gi mah?

Langg duiwdirr congwjy ix :ee, qamxx si cingkir mah?

18 Knuar ar, Ix longxx byy sinwiong Ix ee lovok,

Iarr hiamm Ix ee suwjiaw juer gugong.

19 Hyhongr hiaxee kiarkiw dirr tocur,

Ix ee qinqix jairdirr tohunw,

Viw jiuwtangg kacc kuair siw :ee.

20 Dui' jaxkiw qaur ehngx, dyrr duw diyc huixbet,

Ingxingw byy .kir, byy langg kuawir.

21 Ix vowvnii ee syh qamxx byy dui' diongngx vuic .cud .laii?

Ix ee siw, longxx byy diwhui.

5 Dnaxx jueww liw qiuqiyr, knuar u jijui rinr liw ar?

Jiaxee sxingr :ee ee diongqanx, liw beh ngr jirjui ar?

2 In'ui siurkir ee simx, e hai siw gong langg;

Uanwdor e taii siw hamrban ee langg.

3 Guaw bad knuar qnir gong langg dingwqinx,

Hutzenqanx guaw jiuwjow ix kiarkiw ee soxjai.

4 Ix ee qniaxzii lirkuix an'unw hng hng;

Dirr sniamngg siurr apvig, iarr byy u jinxqiur inx :ee.

5 Iaux ee langg jiac ix soxx siusingg :ee,

Dirr ciwpuer lai iarr cniuw .kir,

U uahdauh kuix cuir tunx ix ee jaibut.

6 In'ui jaieh m si dui' too nirr cud .laii,

Huanrlan iarr m si dui' de nirr huatsnix.

7 Langg cutsir dniardiyc u huanrlan,

Cincniu huexcnix vuex jnriu quann.

8 Ngua juer guaw, guaw beh qiuqiyr Siongrder;

Jiong' guaw ee su qaudair Siongrder.

9 Dyrr si qniaa dairjir dua qaur be cikdok .did .ee,

Qniaa qrii su sngr be liauw :ee.

10 Ix lyc ho dirr derbinrjniu,

Sniuxsur juiw dirr canhngg nirr.

11 Beh andir vibii :ee dirr quann ee soxjai;

Beh quxkiw aicamw :ee dirr an'unw ee de.

12 Ix pywhuai qauxquair ee langg ee qewboo.

Drir qaur inx ee ciuw soxx juer :ee be singqongx.

13 Ix hro diwhui ee langg driongr qaqi ee kuixqer;

Hro kuixked ee langg ee qewboo qinw qinw vai.

14 Inx zit .sii duw diyc oamr,

Zit diongdaur siwqer bongx, cincniu mii .sii.

15 Ix qiur songwhonglangg, tuatli inx ee cuir ee dyqiamr,

Ixqip qiongvy ee langg ee ciuw.

16 Dui' anxnix, nngxjniaw :ee u ngwbang,

Vutgi :ee, cuir trad bat.

17 Knuar ar, Siongrder soxx qingxqair :ee, hitt langg u hokkir;

Soxiw liw m tangx knuawkinx Juanlingg :ee ee dokjig.

18 In'ui Ix hro langg tangwtniar, dyrr qra ix vaux bat;

Ix siongx langg, iarr Ix ee ciuw rix hyw ix.

19 Ix beh qiur liw, dirr lak vaiw ee huanrlan;

Dyrr narr cid vaiw, jaihai iarr byy kap diyc liw.

20 Dirr qihngx ee sii, Ix beh qiur liw tuatli siw;

Dirr qaujenr ee sii, Ix beh qiur liw tuatli dyqiamr ee sewlik.

21 Liw beh did diyc kngwbat, benw sriu cuiwjic ee qongqig;

Jaieh qaur ee sii, liw iarr benw qniax.

22 Jaihai qapp qihngx, liw beh ciyr ix,

Derjniu ee iaxsiur, liw iarr benw qniax.

23 In'ui liw beh qapp canhngg nirr ee jiyc qet'iog;

Can'iaw ee sriur iarr beh qapp liw hyhyw.

24 Liw beh jaix liw ee vowvnii ving'anx;

Liw beh kir knuar liw ee ngiuu-diauu longxx byy kiamwkueh.

25 Liw iarr beh jaix liw ee qniaxsunx jerje,

Liw ee horer cincniu derjniu ee cnicauw.

26 Liw beh huewsiu muaxjiog jiacc qruix bong,

Cincniu diurkunw qaur sii siukngr.

27 Knuar ar, jex guanw u caa qaur tetdew, sidjai si anxnix;

Liw diyhh tniax, jiapsiu laii juer liw ee lirig.

6 Job rinr qongxx:

2 Guan guaw ee iubun quer cinwdang,

Guan guaw itcer ee jaihai vnii vnii he dirr tenpingg;

3 Dikkag viw haixsnuax kacc dang;

Soxiw guaw ee ue luan luan qongw.

4 In'ui Juanlingg :ee ee jnxir sria diyc guaw;

Guaw ee simsinn limx diyc ix ee dok.

Siongrder ing guaw e qniax ee su vaidin qongqig guaw.

5 Iaw luu u cauw, qamxx beh cud sniax?

Guu u cauxliau, qamxx beh hauw mah?

6 Mic jniaw byy camx iamm, qamxx e jiac .did mah?

Nxng ee nngrcingx qamxx u jubi mah?

7 Guaw ee simx iamwjen, m air kap .diyc .ee,

Inx juer guaw pnaiw birsor ee jiahmic,

8 Guan guaw did diyc soxx qriuu :ee;

Guaw soxx himbo :ee, guan Siongrder sniuxsur guaw.

9 Dyrr si guan Siongrder deh cruir guaw.

Vangr ix ee ciuw, laii juat guaw ee sniwmia.

10 Narr anxnix, guaw dyrr did diyc an'uir;

Dirr tongwkow byy did diyc linbinw ee diongqanx, iauxx e kuaiwlok;

In'ui guaw byy uivue Jiww Sxingr :ee ee ue.

11 Guaw u simxmih kuiwlat, hro guaw iauxx decc ngwbang?

Guaw u simxmih qetqiok, hro guaw iauxx tangx tunlunw?

12 Guaw ee lat qamxx si jiyc ee lat?

Guaw ee bah qamxx si dangg :ee mah?

13 Vnagjan guaw :ee, qamxx m si longxx byy .kir mah?

Guaw ee diwhui, qamxx m si lirkuix guaw kir mah?

14 Juatbang ee langg, dyrr narr byy qingwuir juanlingg ee Jruw,

Ix ee ving'iuw iarr diyhh ing zinjuu kuanxtai ix.

15 Guaw ee hniadi gro guaw, cincniu kex,

Qycc cincniu kejuiw lrauu quer ee drew;

16 In'ui u vingx dyrr lyy,

U seh kngr dirr hitt lairbin;

17 Siyly ee sijun, inx dyrr siaubyy,

Zuac ee sii, dyrr dui' inx ee soxjai dax .kir.

18 En' kex qui' din decc qniaa ee langg uanx laii uad kir,

Inx jnriu qaur pahngx ee soxjai dyrr siw.

19 Tema qui' din qniaa ee langg decc liaubang,

Seba qui' qrunn ee langg decc tingwhau.

20 Inx uirdiyhh soxx ngwbang laii qenwsiaur,

Qaur der dyrr lauwkuir.

21 Dnaxx linw jinjniar byy mic;

Knuar qnir tangx qniax ee su dyrr lunw.

22 Guaw qamxx bad qongw: Cniaw linw hro guaw?

Iacc si: Dui' linw ee jaisanw ing mic sangr guaw?

23 Iacc si: Qriuu guaw tuatli duiwdik ee ciuw ar?

Iacc si: Siok guaw tuatli qiongvy ee langg ee ciuw ar?

24 Cniaw linw qawsi guaw, guaw dyrr jing jing;

Iarr hro guaw bingvik dirr simxmih su u cywgo.

25 Jingwdit ee ue, ix ee lat dua qaur jnaixngiu!

Linw decc venrvog, si venrvog simxmih?

26 Linw sniu beh venrvog langg ee ue mah?

Juatbang ee langg ee genlun, si cincniu hongx.

27 Linw liamx kaux rair did diyc byy ve ee qniaw,

Ing liw ee ving'iuw juer bexbe ee mic.

28 Dnaxx cniaw linw qamguan knuar guaw;

Guaw quatduanr byy dng' linw ee bin laii qongw vehcat.

29 Cniaw linw uat dngw, m tangx u vutgi,

Qycc uat dywdngw, guaw ee qonggi iauxquxx dilehh.

30 Guaw ee jic u vutgi mah?

Guaw ee cuir be hunvet jaihai mah?

7 Langg dirr sewqanx qamxx m si lykow ee siqii mah?

Ix ee zidjiw qamxx m si cincniu cniawqanglangg ee zidjiw mah?

2 Cincniu lovok cetced himbo zit lyc ee ngiaw,

Cincniu cniawqanglangg ngwbang qangjnii;

3 Guaw iarr anxnix itding qingquer jerje kanghux ee guec,

Qycc u iawsen ee mii qra guaw dniardiyc.

4 Guaw dyw lehh ee sii, dyrr qongw,

Simxmih sii tangx kiw .laii? Mii hiacc dngg.

Guaw huanx laii huanx kir diddit qaur tnix qngx.

5 Guaw qui' sinkux longxx si tangg qapp qui' der ee too;

Guaw ee puehux siucuir, dyrr qycc cud lxangg.

6 Guaw ee zidjiw viw sxyx kacc qinw,

Diddit quer kir byy soxx ngwbang.

7 Diyhh qir did guaw ee uahmia naxx cuanw jit xee kuir;

Guaw ee bagjiux be qycc knuar qnir hyw qxingw.

8 Knuar guaw ee langg, ix ee bagjiux beh byy qycc knuar qnir guaw;

Liw ee bagjiux beh siongr guaw, danrsi guaw byy dilehh.

9 Hunn siausnuar dyrr quer .kir,

Anxnix, langg lyc imqanx iarr be qycc kiw .laii.

10 Ix byy qycc dyr laii qaqi ee qrex,

Vunxsoxjai iarr byy qycc zin did ix.

11 Soxiw guaw byy beh ioksog guaw ee cuir;

Guaw ee sinn iukow, guaw beh anxnix qongw cud.

Guaw ee simx koxtangr, guaw beh anxnix hunsor.

12 Guaw qamxx si duarhaiw, iacc si qaulingg mah?

Liw qingxzenn sed jit xee qamsi guaw :ee ar?

13 Guaw narr qongw: Guaw ee bincngg beh an'uir guaw,

Guaw ee cngpox beh qraiw guaw ee iubun,

14 Liw dyrr ing binbang hro guaw qniax,

Ing ngirsiong hro guaw lunw.

15 Drir qaur guaw rair cuix hro siw;

Rair sixbyy, kacc ngiaa cunx jiaxee qud.

16 Guaw iamwhun sniwmia, m rair ingxuanw uac lehh;

Guan liw cutjai guaw; in'ui guaw ee zidjiw longxx si kanghux.

17 Langg si simxmih, drir qaur Liw liac ix juer dua,

Drir qaur Liw jiong' ix kuar dirr simx nirr,

18 Drir qaur Liw dagg jaxkiw qamwcad ix,

sikig ciwgiam ix?

19 Liw beh qaur dirsii jiacc uat dngw byy knuar guaw,

Kuanx guaw diap aw quw, hro guaw tunx nxua?

20 Qamwcad langg :ee ar, guaw narr u jue, gai diyc Liw simxmih?

Liw sniaw su ing guaw juer Liw ee jniwvew?

Drir qaur guaw knuar qaqi juer dang dnar.

21 Liw sniaw su m siawbenw guaw ee quewsid, druu kir guaw ee juerquar?

In'ui guaw dnaxx beh dyw dirr din'aix;

Liw beh diwir cue guaw, danrsi guaw ixqing' byy dilehh.

8 Suahlangg Bildad rinr qongxx:

2 Jiaxee ue liw beh qongw qaur dirsii?

Liw cuir-lai ee ue cincniu qongg hongx beh qaur zuarr quw?

3 Siongrder qamxx u pensux laii simxpnuar?

Juanlingg :ee qamxx u pensux, byy qonggi?

4 Liw ee qniaxzii narr u dikjue Ix,

Ix qauhur inx dirr inx ee quewsid ee ciuxtauu.

5 Liw narr diwir cue Siongrder,

Qycc duiww Juanlingg :ee qriuu xunx;

6 Liw narr cingkir, jingwdit, Ix beh uirdiyhh liw cnew .kiw .laii,

Qycc hro liw qonggi ee cur hingtongx.

7 Liw kixtauu suizenn biser,

Qaur buew beh jin' huatdat.

8 Cniaw liw camng jingg dai,

Duiliam inx ee ledjow soxx craa .cud .ee;

9 In'ui lanw vutqyr si jahngx jiacc u, m jaix vnuar hxang;

Lanw dirr sewqanx ee zidjiw cincniu ngiaw;

10 Inx qamxx byy qawsi liw, qra liw qongw,

Qongw cud ix simvag ee ue?

11 Louiw byy tobee, e huad mah?

Lodig byy juiw, e duarjangg mah?

12 Dng' ix cnicuir, iauxx bue quah .kiw .laii,

Viw longxjongw ee cauw dairsingx qodaa.

13 Qniwnarr be qir did Siongrder ee langg, ix ee lorqingr iarr si anxnix;

Byy qingwkenn ee langg, ix ee ngwbang beh byy .kir.

14 Ix soxx i'uaw :ee beh juaddng;

Ix soxx uaxkyr :ee si didubang.

15 Ix beh uaxkyr cur, danrsi cur beh dyw;

Ix beh knii diauu cur, jongxsi cur be quxdngg dilehh.

16 Ix siurr zit jiyr, dyrr cnicuir.

Ix ee dinn suanx qaur mauw hngg.

17 Ix ee qinx kunn dirr jiyhduix,

Taur qaur jiyc ee soxjai.

18 Ix narr dui' ix ee soxjai druu .kir, hitt soxjai dyrr m singzin ix,

Qongw: Guaw m bad knuar qnir liw.

19 Knuar ar, jex dyrr si ix ee lo ee kuaiwlok,

Ixau beh u vadd xee dui' de nirr snix .cud .laii.

20 Knuar ar, Siongrder dikkag byy kiwsag uanjuann ee langg,

Iarr byy hujo qniaa pnaiw ee langg.

21 Ix iauxx beh hro liw muaw cuir ciyr girgi,

Hro liw ee cuiwdunn cud hnuahiw ee sniax.

22 Uanwhun liw ee langg beh muaw srinx qenwsiaur,

Pnaiw langg ee vowvnii beh qruix dirr byy.

9 Job rinr qongxx:

2 Guaw jinjniar jaix si anxnix;

In'ui langg dirr Siongrder ee binrjingg, tacc e sngr juer gi ar?

3 Narr beh qapp ix venrlun,

Cingx hxang iarr be rinr Ix jit hxang.

4 Ix ee simx si diwhui, Ix ee lat si dua;

Jirjui dixkongr Ix, iarr did diyc anzenn?

5 Ix isuaw snuax, snuax iarr m jaix;

Ix siurkir diongx, hro snuax vxangx .lyc .kir.

6 Ix hro de dinxdang, lirkuix ix ee vunxui,

De ee tiau dyrr iycuah.

7 Ix bingrling zit, zit dyrr byy cud;

Qycc hrongx bat jiongww cnxix.

8 Ix qaqi tiw kuix tnix;

Qycc qniadac dirr haixingw ee dingxbin.

9 Ix congwjy Vakdauw, Camcnix,

Bauxcnix, qapp lamhngx ee bidqiongx.

10 Ix qniaa dairjir dua qaur be cikdok .did,

Qniaa qrii su sngr be liauw.

11 Knuar ar, Ix dui' guaw jiax qingquer, guaw iarr byy knuar .qnir,

Ix qniaa .quer .kir, guaw iarr m jaix.

12 Knuar ar, Ix cniuw .kir, jirjui e joxdongr Ix?

Jirjui qnaw mng Ix, Liw juer simxmih?

13 Siongrder dikkag byy siuhuee Ix ee siurkir,

Hujo Rlahab :ee, kutlyc dirr Ix ee erbin.

14 Hyhongr guaw taixtyw qnaw rinr Ix,

Iacc si qingw simxmih ue laii qapp Ix venrlun?

15 Guaw suizenn si qonggi, iarr m qnaw rinr Ix;

Dogdok duiww simxpnuar guaw :ee qriuu xunx.

16 Guaw narr qiuqiyr Ix, Ix narr rinr guaw,

Guaw iarr m sinr Ix u tniax guaw ee sniax.

17 In'ui Ix ing dua hongx pah guaw;

Byy enqor qetnix guaw ee siongx.

18 Ix m iong'unw guaw cuanw jit xee kuir;

Dogdok ing kow ciongmuaw guaw.

19 Narr lun qiongbingw, knuar ar, Ix ee lat dirr jiax,

Narr lun simxpnuar, jirjui e qra guaw dniardiyc qizit?

20 Guaw suizenn juer gi, guaw qaqi ee cuir beh dring guaw ee jue;

Guaw suizenn uanjuann, ix beh henxbingg guaw ee hinggik.

21 Guaw si uanjuann :ee, guaw byy qor qaqi;

Guaw knuawkinx guaw ee uahmia.

22 Tongtongx si jidngiu, soxiw guaw qongw,

Uanjuann :ee qapp qniaa pnaiw :ee, Ix longxx jaubet.

23 Jaieh narr hutzenn pah siw langg.

Ix dyrr tixciyr byy jue ee langg duw diyc ciwlen.

24 Sewqair qauhur dirr pnaiw langg ee ciuw;

Ix ziakamr simxpnuaxsix ee bin;

Narr m si Ix, si jirjui ar?

25 Guaw ee zidjiw viw jauw bunsux :ee kacc qinw,

Qinw qinw quer .kir, byy knuar qnir simxmih hokkir.

26 Qinw qinw quer .kir cincniu kuair junn;

Qycc cincniu ringx qinw qinw lrak mic.

27 Guaw narr qongw beh be qir did guaw ee ai'uanr,

Beh qexngua guaw ee iu'iongg juer hnuahiw;

28 Guaw dyrr qniax guaw jiaxee iukow;

In'ui guaw jaix Liw dikkag byy liac guaw juer byy jue.

29 Guaw beh siurr dingrjue,

Guaw sniaw su kangx kangx diyhbuaa ar?

30 Guaw narr ing seh ee juiw qaqi sew,

Ing qnix cingkir guaw ee ciuw,

31 Liw beh hed guaw dirr qaux-aw drew,

Guaw ee snxax iarr beh iamwngor guaw.

32 In'ui Ix m si cincniu guaw ee sewqanlangg, hro guaw tangx rinr Ix,

Iarr hro guanw tangx duiwsinr.

33 Guanw diongqanx byy u pnuawduanr :ee,

Tangx hro guanw zirviw hanghok ix.

34 Guan Ix suaw Ix ee qnuaiw-aw lirkuix guaw,

Byy ing Ix ee uigiamm hro guaw qniax;

35 Guaw dyrr qnaw qongw, iarr byy qniax Ix;

Guaw vunw m si hitt kuanw.

10 Guaw ee simx m rair uac:

Guaw beh duardnaw qongw cud guaw ee ai'uanr;

Guaw simlai ee koxtangr, guaw jiacc beh qongw.

2 Guaw beh duiww Siongrder qongw: Byc did dring guaw u jue,

Diyhh jixsi guaw, Liw uirsimxmih indnuax qapp guaw jingven.

3 Liw qniaa apjer, qycc knuawkinx Liw ee ciuw soxx jy :ee,

Qycc ing qngx jiyr pnaiw langg ee qewboo,

Liw qamxx liac jiaxee juer hyw mah?

4 Liw ee bagjiux qamxx si bah :ee,

Iacc si Liw decc knuar cincniu langg decc knuar mah?

5 Liw ee zidjiw qamxx cincniu langg ee zidjiw?

Iacc si Liw ee nii cincniu langg ee nii mah?

6 Liw jiacc qiuwkamr guaw ee juerget,

Jacad guaw ee juerquar.

7 Liw si m jaix guaw byy jue,

Iarr byy jit xee e qiur guaw tuatli Liw ee ciuw mah?

8 Liw ee ciuw u congwjy guaw, diaudog guaw ee suwjix vactew,

Liw iauxquxx decc huixbet guaw.

9 Qriuu Liw qiwliam, Liw bad jewjy guaw cincniu ciaux too jidvnuax;

Liw beh hro guaw qycc qruix dirr tohunw mah?

10 Liw qamxx m si vniar cud guaw cincniu nix,

Hro guaw qed qui' txuann cincniu nivniaw mah?

11 Liw ing puee qapp bah hro guaw cing,

Qycc ing qud qapp qinx hro guaw lenlok.

12 Liw ing uahmia qapp ju'air hro guaw,

Liw ee quanwqor vyxjuann guaw ee sniwmia.

13 Jiaxee su Liw longxx kngr dirr Liw ee simx;

Guaw jaix Liw vunw u jitt xee iwsur.

14 Guaw narr huanrjue, Liw dyrr juwir guaw;

Iarr byy beh liac guaw juer byy jue.

15 Guaw narr qniaa pnaiw, dyrr u jaieh,

Guaw narr juer gi, iarr m qnaw giac kiw tauu;

Muaxsimx qenwsiaur,

Cinbak knuar qnir guaw ee qankow.

16 Guaw narr tauu giac quann, Liw dyrr zib beh liac guaw, cincniu sraix,

Qycc henxcud Liw ee qi'ngi dirr guaw.

17 Liw qycc sed Liw ee qanjingr qongqig guaw.

Qetnix Liw ee siurkir dirr guaw;

Qunvingx jit dui quer jit dui qongqig guaw.

18 Liw sniaw su hro guaw cuttaix? M dat diyc hitt sii dng kuir,

Byy hro langg ee bagjiux knuar qnir guaw.

19 Anxnix guaw dyrr u, naxx cincniu byy;

Jid'err cuttaix dyrr sangr zip bong.

20 Guaw ee zidjiw qamxx m si jin' jiyw mah?

Qriuu Liw cniaw tingg, vangwkuanx guaw,

21 Hro guaw kir, byy dywdngw, dyrr si kir oamr qapp siximr ee de ee dairsingx,

Tangx liyc aw did diyc an'uir.

22 Hitt xee de amr amr cincniu obak,

Si siximr hunrdun,

Ix ee qngx cincniu obak.

11 Naamahlangg Zofar rinr qongxx:

2 Ue hiacc je, qamxx m diyhh rinr mah?

Qau ue ee langg, qamxx tangx cxingx juer gi mah?

3 Liw decc kuakauw, langg qamxx diyhh jing jing mah?

Liw decc tixciyr ee sii, byy langg hro liw qenwsiaur mah?

4 Liw qongw, Guaw ee dyrliw sunjuann,

Guaw dirr liw ee bagjiux jingg cingkir.

5 Guan Siongrder qongxue,

Qycc kuix Ix ee cuir venrvog liw;

6 Jixsi liw diwhui ee ywbiau,

Jex diwhui u dagg jiongw ee qonghau;

Liw diyhh jaix Siongrder byy longxjongw qir did liw ee juerquar.

7 Liw qamxx e cikdok Siongrder ee ywbiau mah?

Liw qamxx e cikdok Juanlingg :ee qaur tetdew mah?

8 Ix quann cincniu tnix, liw iauxx e juer simxmih?

Viw imqanx kacc cimx, liw iauxx e jaix simxmih?

9 Ix ee liong si viw de kacc dngg,

Viw haiw kacc kuah.

10 Ix narr qingquer, laii qnuaiqimr langg,

Driaur langg simxpnuar, jirjui e joxdongr Ix ar?

11 In'ui Ix jaix huqew ee langg;

Suizenn byy juwir, iarr longxx knuar qnir juerquar.

12 Kanghux ee langg longxx byy simsux,

Langg cutsir cincniu iaw luu ee luu-qniaw.

13 Liw narr duanjniar liw ee simx,

Qycc ngr Ix giac kiw ciuw;

14 Liw ee ciuw-lai narr u juerquar, dyrr diyhh druu kir hng hng,

Iarr m tangx iong'unw vutgi diamr dirr liw ee vowvnii lai.

15 Hitt sii liw dikkag giac kiw liw byy hacuu ee bin;

Liw iarr beh kia jai, longxx byy qniahniaa.

16 In'ui liw beh be qir did liw ee qankow;

Dyrr narr qir .did, iarr cincniu juiw lrauu .quer .kir jidngiu.

17 Liw ee singhuat kacc ngiaa ziddiongdaur,

Suizenn amr, iuguann cincniu jaxkiw-sii.

18 Liw beh an'unw, in'ui u soxx ngwbang;

Liw beh siwqer sunknuar, dyrr tangx ansimx kunr.

19 Liw beh dyw lehh, iarr byy u pacqniax liw :ee,

Qycc u jerje langg duiww liw qriuu xunx.

20 Jongwsirr pnaiw langg ee bagjiux beh huex;

Inx byy lo tangx dyjauw, inx soxx ngwbang cincniu kuir dng.

12 Job rinr ix qongxx:

2 Linw jinjniar si vecsnir ar,

Linw si, diwhui iarr qapp linw siw.

3 Guaw iarr u simsux, cincniu linw jidngiu;

Guaw byy kacc sux linw;

Jiaxee dairjir simxmih langg m jaix?

4 Guaw si qiuqiyr Siongrder, did diyc Ix tniax ee langg,

Iauxquxx hro dangpnua qicir;

Qonggi uanjuann ee langg, iarr hro langg qicir.

5 Anzenn ee langg simlai knuawkinx huanrlan;

Jex huanrlan ven ven decc tingwhau kax diyhdag ee langg.

6 Qiongdy ee vowvnii hingtongx,

Ziaw diyc Siongrder ee langg did diyc anzenn.

Dyrr si Siongrder dua sniuxsur dirr inx ee ciuw :ee.

7 Dnaxx liw kir mng jauxsiur, inx beh qawsi liw;

Iarr kir mng kongdiongx ee jiauw, inx beh qra liw qongw;

8 Iacc si qapp de qongw, ix beh qawsi liw;

Haiw-diongx ee hii iarr beh qra liw qongw bingg.

9 Dirr jiaxee itcer, jirjui m jaix,

Si Jehovah ee ciuw juer anxnix?

10 Itcer dongrbut ee sniwmia, qapp zinlui ee cuanxkuir,

Longxx dirr Ix ee ciuw.

11 Hnirkangx qamxx be ciwgiam gengiw,

Cincniu jniurqniux cir jubi mah?

12 Nilau :ee u diwhui,

Huewsiu je :ee u qenwsig.

13 Diwhui qapp linglik jairdirr Siongrder;

Ix u qewik qapp qenwsig.

14 Knuar ar, Ix tiachuiw :ee, be e qycc kixjy;

Ix qnuaiqimr ee langg, byy tangx qycc tauxvangr.

15 Knuar ar, Ix qimwjiw hiaxee juiw, juiw dyrr dax .kir;

Ix qycc hro juiw lrauu .cud, de dyrr venwcenx.

16 Quanlingg qapp haurlik jairdirr Ix;

Siurr behik, qapp behik langg :ee, longxx sriok dirr Ix.

17 Ix hro bosu duw diyc cniuxliac;

Qycc hro simxpnuawsix vniwjniaa gong langg.

18 Ix tauxvangr qun'ongg ee kunxvak,

Qycc ing duar vak inx ee iyx.

19 Ix hro jewsix duw diyc cniuxliac,

Qycc ciax dyw u quanlingg ee langg.

20 Ix qexcuac diongsinr ee langg ee ue,

Qycc druu kir laurlangg ee qenwsig.

21 Ix hro quiwjok siurr lingziok;

Qycc tauw kuix u lat ee langg ee iyduar.

22 Ix dui' oamr diongx henxcud cim'yr ee su;

Qycc duar cud siximr qaur qngbingg ee soxjai.

23 Ix hro vangqog hing'ong, iarr qycc huixbet;

Ix hro vangqog kuikuah, iarr qycc censuaw inx.

24 Derjniu vecsnir ee taulangg, Ix druu kir inx ee simsux;

Hro inx piauliuu dirr byy lo ee kongwiaw.

25 Inx byy qngx, dirr oamr diongx siwqer bongx;

Qycc hro inx denx laii denx kir, cincniu jiuxjuir ee langg jidngiu.

13 Knuar ar, jex itcer guaw ee bagjiux longxx knuar .quer,

Guaw ee hnirkangx longxx tniax .quer, iarr bingvik.

2 Linw soxx jaix :ee, guaw iarr jaix;

Guaw byy kacc sux linw.

3 Guaw sidjai air qapp Juanlingg :ee qongxue;

Guaw jin' air qapp Siongrder lixlun.

4 Linw si liapjy vehcad'ue :ee,

Longxx si byy loring ee isingx.

5 Guan linw itkair jing jing,

Jiacc sngr si linw ee diwhui.

6 Cniaw linw tniax guaw ee lixlun,

Diwir tniax guaw ee cuir ee hunsor.

7 Linw beh uirr Siongrder laii qongw vutgi ee ue mah?

Uirr Ix qongw kuixjar ee ue mah?

8 Linw qamxx beh pentanw Ix mah?

Beh uirr Siongrder venrho mah?

9 Ix narr craa cud linw, qamxx u hyw mah?

Linw e penr Ix cincniu penr langg mah?

10 Linw narr amwjni pentanw,

Ix dikkag beh jikvi linw.

11 Ix ee uigiamm qamxx byy hro liw qniax mah?

Ix ee tangx qnia'uir, qamxx byy limqaur linw mah?

12 Linw soxx qiwliam :ee jimgenn si cincniu huexhux;

Linw ee ngiaje si tobee ee ngiaje.

13 Linw jing jing, byc did cab guaw, quwjai guaw qongw,

Dyrr bylun simxmih, jueww ix laii.

14 Guaw sniaw su jiong' guaw ee bah qa dirr guaw ee cuiwkiw,

Jiong' guaw ee sniwmia he dirr guaw ee ciuw ar?

15 Knuar ar, Ix beh taii siw guaw, guaw byy tangx ngwbang;

Guaw beh dirr Ix ee binrjingg viauxvik guaw ee soxx qniaa.

16 Jex beh jniaa juer jinxqiur guaw :ee;

In'ui byy kensingg ee langg be didqaur Ix ee binrjingg.

17 Linw diyhh sewzi tniax guaw ee ue,

Hro guaw soxx venrlun :ee zip linw ee hnirkangx.

18 Knuar ar, guaw u vailet guaw ee anwqnia,

Guaw jaix guaw beh did diyc cxingx juer gi.

19 Jirjui e qapp guaw venrlun ar?

U, guaw dyrr jing jing laii dng kuir.

20 Dogdok u nng hxang, byc did qniaa dirr guaw,

Guaw dyrr byy siamxvi lirkuix liw ee bin.

21 Dyrr si Liw ee ciuw qiux dywdngw, lirkuix guaw hng hng;

Qycc byy ing Liw ee uigiamm hro guaw qniax;

22 Anxnix, Liw qiyr, guaw dyrr rinr;

Iacc si hro guaw qongw, Liw rinr guaw.

23 Guaw ee juerquar qapp quewsid u zuarr je ar?

Qriuu Liw hro guaw jaix guaw ee quewsid, guaw ee juerquar.

24 Liw sniaw su ngx Liw ee bin,

Liac guaw juer Liw ee duiwdik ar?

25 Liw qamxx beh iydang hro hongx cuex ee ciurhiyc mah?

Duizib qodaa ee cauw mah?

26 In'ui Liw qiwjair qankow ee su laii vran guaw;

Qycc hro guaw damdngx siauwlenn ee sii ee juerquar.

27 Liw ing kakaur kaur guaw ee kax, diwir knuar guaw itcer ee lo;

Liw qra guaw ee kadew uec dnia qaiwhan.

28 Guaw beh siurr vairhuai, cincniu cauwnua ee mic,

Cincniu diyc jiuwtangg ee snxax.

14 Dui' hurzinlangg soxx snix ee langg zidjiw dexjiyw,

U jerje huanlyw.

2 Ix cud cincniu huex, suar .lyc dyrr sria .kir,

Ix jauw .kir cincniu ngiaw, iarr byy tingg lehh.

3 Cincniu jitt hy ee langg, Liw qamxx kuix Liw ee bagjiux knuar ix ar?

Qycc cua guaw sriu Liw ee simxpnuar?

4 Jirjui e hro cingkir :ee dui' byy cingkir :ee cud .laii?

Byy jit xee e.

5 Ix ee zidjiw qiwzenn siurr hanrdnia, ix ee guec ee siauwgiac jairdirr Liw;

Liw iarr sed ix ee qaiwhan, hro ix be e vnuaa .quer;

6 Dyrr qriuu Liw bagjiux uat dngw byy knuar ix, hro ix e anx .did,

Cincniu cniawqanglangg juer uann ix ee qangx.

7 In'ui ciu narr cyr .kiw .laii, iauxquxx u ngwbang qycc vuh ngiw;

Nngw ee qix huad byy suah.

8 Suizenn ix ee qinx dirr de nirr jin' lau,

Ix ee jangg iarr siw dirr too nirr;

9 Qaur did diyc juiw zunrdik dyrr e qycc huad ngiw,

Iarr cincniu jaijingr ee mic huad qix.

10 Danrsi langg siw, dyrr dyw dit dit,

Kuir jid'err dng, langg dirr dyclyc?

11 Haiw-diongx ee juiw beh juaddng,

Hyjuiw beh siaubyy dax .kir;

12 Langg iarr si anxnix, dyw .lyc .kir be qycc kiw .laii,

Qaur tnix byy .kir, iarr be jingsinn;

Dngg dngg kunr, qiyr be cnew.

13 Guan Liw qra guaw kngr dirr imqanx,

Siux guaw dniardiyc zidqii, laii qiwliam guaw.

14 Langg siw e qycc uac mah?

Guaw dyrr tunlunw guaw lykow ee zit,

Tingwhau guaw tewngua ee zit qaur.

15 Liw jid'err qiyr, guaw dyrr rinr Liw;

Liw e himbo Liw ee ciuw soxx juer :ee.

16 Dnaxx Liw sngr guaw ee kavo;

Qamxx byy qamwcad guaw ee juerquar mah?

17 Guaw ee quewsid hro Liw hrongx dirr deaw lai;

Guaw ee juerquar Liw vak diauu diauu.

18 Snuax vxangx dyrr snruar snruar .kir,

Jiyhtauu suaw li ix ee vunxui.

19 Juiw e buaa liauw jiyhtauu;

Duarjuiw e ciongbyy derjniu ee too;

Liw iarr anxnix juat langg ee ngwbang.

20 Liw ingxuanw kacc ngiaa ix, ix dyrr quer .kir;

Liw venwngua ix ee binrmau, laii crex ix kir.

21 Ix ee qniaxzii did diyc ingqngx, ix m jaix,

Inx duw diyc qangwqe, ix iarr m jaix.

22 Dogdok ix ee ziogsinx qaqi decc tangwtniar,

Ix ee sinhunn qaqi decc iubun.

15 Temanlangg Elifaz rinr qongxx:

2 Diwhui ee langg qamxx beh ing kanghux ee diwsig laii rinr,

Iacc si ing danghongx ciongmuaw ix ee vakdow mah?

3 Ix qamxx beh ing byy lirig ee ue,

Qapp byy loring ee ue laii venrlun mah?

4 Liw sidjai huewbyy qingwuir,

Dirr Siongrder ee binrjingg joxdongr qingwkenn ee simx.

5 In'ui liw ee juerquar qawsi liw ee cuir,

Liw qingw kuixjar ee langg ee jic.

6 Dring liw ee jue :ee si liw ee cuir, m si guaw;

Liw ee cuiwdunn qanjingr liw ee m driyc.

7 Liw si tauu jit xee cutsir ee langg mah?

Iacc si viw jiaxee snuax kacc dairsingx siurr jy mah?

8 Siongrder viwbat ee jixir, liw bad tniax .qnir mah?

Diwhui qamxx si liw dogdid mah?

9 U simxmih liw jaix, guanw m jaix mah?

Iacc si liw bingvik, guanw byy bingvik ar?

10 Guanw diongqanx u taumngg vec :ee, qapp nilau :ee,

Viw liw ee laurve iauxx kacc lau.

11 Siongrder ee an'uir, ixqip Ix unhyy krngr liw ee ue,

Liw knuar juer siyxkuaw mah?

12 Liw ee simx sniaw su liac liw kir?

Liw ee bagjiux sniaw su decc grinn?

13 Jiacc hro liw ee sinn huanxduir Siongrder,

Iarr hro liw ee cuir qongw hiaxee ue.

14 Sewqanlangg si simxmih, e sngr juer cingkir ar?

Hurzinlangg soxx snix :ee si simxmih, e sngr juer qonggi mah?

15 Knuar ar, Siongrder byy sinwzim Ix ee sxingr :ee;

Jiaxee tnix dirr Ix ee binrjingg iarr byy cingkir.

16 Hyhongr kyxngor huxvai ee langg,

Limx juerog cincniu limx juiw :ee ar?

17 Guaw beh jixsi liw, liw diyhh tniax guaw;

Guaw beh qongw kiw soxx knuar .qnir .ee.

18 (Dyrr si diwhui ee langg dui' ledjow soxx tuann laii,

Iarr byy unxbat :ee.

19 Jitt xee de dogdok sniuxsur inx;

Iarr byy guarlangg dui' inx diongqanx qingquer.)

20 Pnaiw langg itsingx ee zidjiw si tongwkow,

Dyrr si uirr qiongvy ee langg soxx dniardiyc ee nigiac.

21 Tangx qniax ee sniax siongsiongg dirr ix ee hnirkangx;

Dirr ving'anx ee sii, huixbet :ee beh qaur ix hiax.

22 Ix m sinr e dui' oamr dngw .laii;

Ix hro dyqiamr tingwhau ix.

23 Ix siwqer tyxjiac, qongw: Dyclyc u ar?

Ix jaix u oamr ee zit ven ven decc tingwhau ix.

24 Huanrlan kunwkow hro ix qniahniaa, qycc ngiaa ix;

Cincniu qun'ongg virvan cutdin jidngiu.

25 In'ui crunx ciuw qongqig Siongrder,

Ing qiaugno kongwqu Juanlingg :ee.

26 Ix ing gni ee amrqunw, qau ee dinvai,

Jauw laii dixdik Juanlingg :ee.

27 In'ui ix ee bin jin' vuii,

Ix ee iyx vuii qaur u laa.

28 Ix kiarkiw dirr honghuer ee sniaa,

Byy langg kiarkiw ee cur,

Dyrr si decbeh venr juer toduix :ee.

29 Ix be did diyc hyxgiac, jaibut be dngg dngg dilehh;

Inx ee toxsanw iarr be snitnuar dirr de nirr.

30 Ix be tuatli oamr;

Huexiam beh siyx dax ix ee qix,

Ix beh dui' Siongrder cuir-lai ee krir laii byy .kir.

31 Ix m tangx uaxkyr huqew, laii penr qaqi;

In'ui huqew beh jniaa juer ix ee vywingr.

32 Ix ee zidqii bue qaur ee dairsingx, jitt xee dairjir beh jniaa;

Ix ee qix be cnicuir.

33 Ix beh cincniu pudyciu, ix ee liap bue sik dyrr lag,

Qycc cincniu qnanaxciu lag ix ee huex.

34 Byy kensingg ee lui dikkag byy snitnuar,

Vowlo :ee ee vowvnii, beh hro huew siyx .kir.

35 Inx huai'in janhai, snix cud juerget,

Vaklai soxx virvan :ee si kuixjar.

16 Job rinr qongxx:

2 Jitt hy ee ue, guaw u tniax qnir jerje lar;

Linw ee an'uir longxx si hro langg dyww qankow.

3 Jitt hy hongdongg ee ue, u qiongjin mah?

U simxmih qikdong liw laii rinr mah?

4 Guaw iarr e qongw cincniu linw jitt hy ee ue;

Linw narr diamr dirr guaw ee qingxgu,

Guaw iarr e draur qui' qnrua ee ue laii qongqig linw;

Qycc e duiww linw iyy guaw ee tauu.

5 Guaw e ing cuir hro linw qenqor;

Ing cuiwdunn ee an'uir hro linw qiamxkinx.

6 Guaw narr qongxue, guaw ee iubun iuguann byy qiamxkinx;

Guaw narr jing jing, dyrr iubun e lirkuix guaw mah?

7 Dnaxx Ix hro guaw kunwkow;

Liw hro guaw ee dangpnua lirkuix guaw.

8 Liw u liac diyc guaw, si tangx juer qanjingr,

Guaw ee siausanw kiw laii qongqig guaw;

Dng' guaw ee binrjingg juer qanjingr.

9 Ix siurkir, tiah lic guaw, kunxvig guaw,

Ix duiww guaw qa kxiw;

Guaw ee duiwdik bagjiux qimx qimx grinn guaw.

10 Inx duiww guaw kuix inx ee cuir,

Senr guaw ee cuiwpew laii lingziok guaw;

Inx jurjip laii qongqig guaw.

11 Siongrder jiong' guaw qaux hro vutgi ee langg,

Jiong' guaw hed dirr pnaiw langg ee ciuw.

12 Guaw anzenn ee sii, Ix qra guaw atjic,

Nic guaw ee amrqunw, qra guaw siag cruir cruir;

Qycc cai guaw juer Ix ee jniwvew.

13 Ix ee jnxir siwbin uii guaw, puawlic guaw ee jongrhuw;

Ix byy kuansur, jiong' guaw ee dnaw vniar dirr de nirr.

14 Ix pah guaw, pah liauw qycc pah;

Cincniu iongxsu jauw laii qongqig guaw.

15 Guaw tni muavor dirr guaw ee puehux,

Jiong' guaw ee qag danr lyc too.

16 Guaw ee bin in'ui lrauu bagsaiw dyrr venr angg;

Dirr guaw ee bagjiupuee u siw ee imwngw.

17 Danrsi guaw ee ciuw byy vyrgiok;

Guaw ee qidyw iarr si cingkir.

18 De ar, byc did ziakamr guaw ee huih;

Guan guaw ee auqiyr byy tinghiyh ee soxjai.

19 Knuar ar, dnaxx guaw ee qanjingr dirr tnix nirr,

Guaw ee vyxzin :ee dirr dingxbin.

20 Guaw ee ving'iuw qicir guaw,

Guaw ee bagjiux ngr Siongrder lrauu bagsaiw.

21 Guan ix ngr Siongrder laii ter langg venrbingg;

Cincniu langg ter ix ee cuwvnix venrbingg.

22 In'ui qycc quer quixnarr nii,

Guaw beh qniaa hitt diauu byy qycc dywdngw ee lo.

17 Guaw ee kuir juat lar, guaw ee zidjiw bedjin lar;

Guaw ee hunbong ven lar;

2 Sidjai u qicir guaw :ee dirr guaw jiax;

Guaw ee bagjiux siongsiongg knuar qnir inx ciwqig guaw ee su.

3 Guan Liw ing junxdngr hro guaw, qra guaw juer vyxzin dirr Liw ee binrjingg,

U jirjui kingw qapp guaw dunwciuw?

4 In'ui Liw ziakamr inx ee simx, hro inx byy bingliw,

Soxiw Liw byy beh hro inx singquann.

5 Langg qauhur ix ee ving'iuw kir hro langg cniuxduat,

Ix ee qniaw ee bagjiux beh sitbingg.

6 Guaw jniaa juer vecsnir diongx ee ciauwdamm;

Guaw hro langg nxua pruir qaur bin nirr.

7 Guaw ee bagjiux in'ui iubun laii en'ng,

Guaw ee vactew longxx cincniu ngiaw.

8 In'ui anxnix, jingwdit ee langg beh gonggniac,

Byy jue ee langg beh qikle qaqi laii qongqig byy qingwkenn ee langg.

9 Gi ee langg iarr beh qensiuw ix soxx qniaa ee lo,

Ciuw cingkir ee langg beh naxx qetnix ix ee kuiwlat.

10 Linw jingwlangg cniaw linw qycc laii,

In'ui linw diongqanx guaw cue byy jit xee diwhui ee langg.

11 Guaw ee zidjiw ixqing' quewsinx, guaw ee qewik,

Guaw ee simx soxx sniu :ee, ixqing' duanrjuat.

12 Inx liac mii juer zit, qongw,

Qngx qin oamr.

13 Guaw narr ngwbang imqanx juer guaw ee cur,

Guaw narr pox bincngg dirr oamr diongx;

14 Guaw narr duiww hiuxnua qongw: Liw si guaw ee laurve,

Duiww tangg qongw: Liw si guaw ee laurbuw, guaw ee jixbe;

15 Anxnix guaw ee ngwbang dirr dyclyc?

Guaw ee ngwbang, jirjui e knuar .qnir a?

16 Qaur juer jit xe anhiyh dirr too nirr ee sii,

Jex ngwbang beh lyc qaur imqanx ee mngcnuar hiax.

18 Suahlangg Bildad rinr qongxx:

2 Liw decc cue uerpang beh qaur simxmih sii ar?

Liw diyhh jimjiog sniu, zen'au guanw jiacc qongw.

3 Guanw sniaw su hro liw liac juer jingsnix,

Hro liw knuar juer laursiongg ar?

4 Liw jitt xee dua siurkir tiah lic qaqi :ee,

De qamxx e uirdiyhh liw laii siurr kiwsag mah?

Jiyhvnuaa qamxx e suaw kuix guan'uix mah?

5 Pnaiw langg ee qngx sidjai beh huax,

Ix ee huexiam beh byy qngx.

6 Ix vowvnii lai ee qngx beh vnir juer oamr,

Ix dingxbin ee dingx iarr beh huax .kir.

7 Ix giamxgni ee kavo, beh duw diyc joxgai,

Ix ee qewboo beh vnruar dyw ix qaqi.

8 In'ui ix ee kax hai ix qaqi zip hamrknix,

Ix qniaa dirr uahdauh ee dingxbin.

9 Kuantyr beh dnii diyc ix ee kaaurdnix,

Lybang beh liac diyc ix.

10 Uahkaur uirdiyhh ix draii dirr too nirr,

Vnuawsyh uirdiyhh ix dniux dirr lo nirr.

11 Siwuii u qniahniaa, beh hro ix qniax,

Qycc duiqnuaw ix ee kaaurdnix.

12 Ix ee kuiwlat beh suebii,

Jaieh ven ven dirr ix ee sinvnix.

13 Ix beh tunx ix ee puebah.

Pnaiw jingwtauu beh tunjiac ix ee jitew.

14 Ix beh dirr soxx uaxkyr ee vowvnii siurr vuic .cud .laii.

Duar qaur tangx qniax ee ongg hiax.

15 Byy sriok ix :ee beh kiarkiw dirr ix ee vowvnii;

Beh u ziu'ngg ia dirr ix soxx kiarkiw ee soxjai.

16 Dirr erdew, ix ee qintauu beh qodaa,

Dirr dingxbin, ix ee qix beh jenxduu.

17 Ix ee qiwliam beh bedbyy dirr derjniu,

Ix ee miazi iarr byy lauu dirr queci nirr.

18 Ix beh dui' qngbingg diongx siurr qnuaw qaur oamr;

Qycc beh siurr qnuaw cud sewqair.

19 Dirr ix ee vecsnir diongx beh byy qniaw byy sunx,

Dirr ix qiawkax ee soxjai, iarr byy lauu jit langg dilehh.

20 Uirdiyhh ix ee zidjiw, au .laii ee langg gonggniac,

Cincniu jingg ee langg ee qniahniaa.

21 Vutgi ee langg ee qrex, sidjai si anxnix,

Jex dyrr si m bad Siongrder ee langg ee soxjai.

19 Job rinr qongxx:

2 Linw hro guaw ee simx iukow,

Ing ue sionghai guaw, beh qaur dirsii ar?

3 Linw jex jap vaiw lingziok guaw,

Linw pnaiw kuanxtai guaw, iarr byy qaqi qenwsiaur.

4 Guaw narr qyxzenn u quewsid,

Jex quewsid si jairdirr guaw qaqi.

5 Linw qyxzenn beh duiww guaw kuakauw dua,

Qycc ing guaw ee lingziok jikvi guaw;

6 Dyrr diyhh jaix jex si Siongrder ongxkud guaw,

Ing Ix ee lybang uii guaw.

7 Knuar ar, guaw in'ui uan'ongw laii auqiyr, iarr byy did diyc tniax,

Guaw hauxqiur, iarr byy did diyc qongduanr.

8 Ix uijac guaw ee lo, hro guaw berdid quer .kir,

Qycc hro guaw ee lorqingr oamr.

9 Ix trngr kir guaw ee ingqngx,

Liur kir guaw taukag dingw ee benxliuu.

10 Ix dirr siwuii huixhuai guaw, guaw dyrr byy .kir;

Guaw ee ngwbang vuic .kiw .laii, cincniu vuic ciux.

11 Ix ee siurkir zet zet qongqig guaw,

Ix liac guaw juer Ix ee duiwdik ee jit xee.

12 Ix ee qunvingx jidjee laii, jy inx ee lo laii qongqig guaw,

Jrad ngiaa dirr guaw ee vowvnii ee siwuii.

13 Ix hro guaw ee hniadi qeh kuix hng hng,

Sna' bad ee langg qapp guaw cnisox.

14 Guaw ee cinlangg qapp guaw duanrjuat,

Guaw cinbit ee ving'iuw longxx be qir did guaw.

15 Qiawkax dirr guaw cur-lai ee langg, ixqip guaw ee luxvi, longxx knuar guaw juer guarlangg;

Inx knuar guaw juer guarvanglangg.

16 Guaw qiyr guaw ee lovok, ix m rinr,

Guaw diyhh cincuir qriuu ix.

17 Guaw cuir ee kiwbi hro guaw ee bow iamwjen;

Qapp guaw siangg vxag :ee iarr iamwjen guaw ee cauwbi.

18 Lenrr ginxaw iarr knuawkinx guaw;

Guaw narr kiw .laii, inx longxx qicir guaw.

19 Guaw cinbit ee ving'iuw longxx iamwjen guaw;

Guaw vingzit soxx tniar ee langg, duiww guaw vniwbin.

20 Guaw ee puee moh dirr guaw ee qud;

Guaw jixu cunx cuiwkixhnua.

21 Guaw ee ving'iuw ar, linw diyhh kyxlinn guaw, kyxlinn guaw;

In'ui Siongrder ee ciuw bongx diyc guaw.

22 Linw sniaw su cincniu Siongrder kunxvig guaw.

Liac guaw ee bah juer byy tangx vaxjiog mah?

23 Dnaxx guan jiong' guaw ee ue siaw .lyc .laii,

Qycc qir dirr ceh nirr;

24 Ing ticjam ing xenn kig diauu diauu dirr jiyc nirr;

Hro ix ingxingw dilehh.

25 In'ui guaw jaix qiuwsiok guaw :ee si uac :ee;

Zid'au ix beh kia dirr too ee dingxbin;

26 Guaw jitt xee puee vairhuai liauxau,

Guaw beh dirr ziogtew ee guarbin did diyc qnir Siongrder.

27 Guaw vunxsinx beh knuar qnir Ix si uirr guaw :ee,

Guaw cinbak knuar qnir Ix m si guarlangg;

Guaw ee simdngg dirr guaw ee lairbin qaur rngiuu .kir.

28 Linw narr qongw: Guanw beh jnaixngiu kunxvig ix!

Dairjir ee qinvunw jairdirr guaw;

29 Linw diyhh qniax dyqiamr, in'ui siurkir dyrr u dyqiamr ee hinghuat,

Hro linw jaix u simxpnuar.

20 Naamahlangg Zofar rinr qongxx:

2 Guaw ee simlai diyhqib,

Soxiw guaw ee simsux vig guaw diyhh rinr.

3 Guaw tniax qnir hitt xee lingziok guaw ee jikvi,

Guaw diwhui ee simx qar guaw rinr.

4 Liw qamxx m jaix dui' qoxjaw,

Dui' u langg dirr sewqanx ixlaii,

5 Pnaiw langg ee dairet byy quxdngg,

Byy qingwkenn ee langg ee hnuahiw bak nih quw nardnia?

6 Ix ee quann suizenn duw tnix,

Ix ee taukag suizenn qaur hunn nirr;

7 Ix qaur buew beh bedbyy, cincniu ix ee vunr jidngiu;

Vingsor knuar qnir ix ee langg beh qongw: Ix dirr dyclyc ar?

8 Ix beh cincniu binbang vuex .kir, byy tangx cue .diyc;

Ix beh siurr qnuaw jauw, cincniu mii .sii ee ngirsiong.

9 Vingsor knuar qnir ix :ee, ix ee bagjiux be qycc knuar qnir ix;

Ix ee vunxsoxjai iarr byy qycc knuar qnir ix.

10 Ix ee qniaxzii beh duiww songwhionglangg qriuu xunx,

Ix ee ciuw beh hingg huewjaii.

11 Ix ee qud muaw muaw u siauwlenn ee lat;

Jongwsirr beh qapp ix snaqab dyw dirr too nirr.

12 Juerog dirr ix ee cuir suizenn dnix,

Suizenn ix kngr dirr ix ee jic-xe;

13 Suizenn vyxsiyh, m kingw vangwsag,

Dniardnia qamm dirr ix ee cuir;

14 Ix ee jiahmic qaur ix ee drngg-aw dyrr venr,

Jniaa juer dogjuaa ee dnaw dirr ix ee lairbin.

15 Ix tunjiac jaivyw, beh qycc tror cud;

Siongrder beh dui' ix ee vakdow zimm .cud .laii.

16 Ix beh suh dogjuaa ee dok;

Juaa ee jic iarr beh hai siw ix.

17 Ix be did diyc knuar qnir qanghyy,

Lrauu bit qapp linx ee kex.

18 Ix diyhbuaa soxx did .diyc .ee, diyhh hingg langg, byy tangx jiac .lyc .kir,

Be e jiauww soxx qau'ik ee jaibut laii hnuahiw.

19 In'ui ix apjer songwhionglangg, qycc kiwsag ix;

Qiongjiamr langg ee cur, iarr be e kixjy.

20 In'ui ix ee simlai m bad anjing,

Ix soxx hnuahiw :ee longxx be vyxjuann.

21 Byy jit qnia byy hro ix tunx .lyc .kir,

Soxiw ix ee hoklok be quxdngg.

22 Dng' ix hyxgiac ciongjiog ee sii, beh qaur ehdec ee soxjai;

Qankow ee langg longxx beh cud ciuw pah ix.

23 Ix ee vakdow beh vaw ee sii,

Siongrder beh qangr bingxlet ee siurkir dirr ix;

Ix decc jiac ee sii, beh qangr siurkir dirr ix ee dingxbin.

24 Ix siamxli tih ee kiwqu,

Dangg ee qringx beh sria taur ix.

25 Ix jid'err vuic ix, dyrr dui' ix ee sinkux cud .laii,

Qngx nawnar ee jnxir-buew beh dui' ix ee dnaw cud;

Qniahniaa beh qaur dirr ix.

26 Itcer ee oamr siukngr uirdiyhh ix ee jaivyw,

Langg soxx byy vunn ee huew beh siybet ix;

Qycc beh siyhuiw lauu dirr ix ee vowvii :ee.

27 Tnix beh henxbingg ix ee juerog,

De beh kiw laii qongqig ix.

28 Ix ee qehuew beh byy .kir,

Longxx beh dirr Siongrder siurkir ee zit siaubet.

29 Jex dyrr si pnaiw langg dui' Siongrder soxx did .diyc ee hunrgiac;

Si Siongrder qra ix dniardiyc ee sanxgiap.

21 Job rinr qongxx:

2 Linw diyhh diwir tniax guaw ee ue,

Ing jitt xee juer linw ee an'uir.

3 Cniaw kuan'iongg guaw, guaw beh qycc qongw,

Guaw qongw liauw, quwjai liw qicir.

4 Lun qaur guaw, guaw qamxx si duiww langg ai'uanr?

Guaw ee simsinn jnaixngiu byy diyhqib ar?

5 Linw diyhh knuar guaw laii gonggniac,

Ing ciuw ngx cuir.

6 Guaw narr sniu .diyc, dyrr qniax,

Tong' sinkux gniauhgniauc cuah.

7 Pnaiw langg sniaw su uac lehh, jiac dngg huewsiu,

Sewlik qiongsing ar?

8 Inx knuar qnir qniaxsunx, qapp inx vnivnii singlip;

Inx ee horer dirr inx ee bagjiux jingg iarr si anxnix.

9 Inx ee qequanr anzenn byy qniax,

Siongrder ee qnuaiw iarr byy pah inx.

10 Inx ee guqangw snitnuar byy dng,

Inx ee gubuw snix qniaw, iarr byy duirtaix.

11 Inx crex ginxaw cud .kir, cincniu ngiuu-qrunn,

Inx ee qniaxzii siwqer diytiaur.

12 Inx duer linlongqow qapp kimm laii cniuwquax,

Qycc in'ui pinxsiaux ee sniax laii hnuahiw.

13 Inx dro quer zit, sursu hingtongx; bak nih quw lyc imqanx.

14 Inx duiww Siongrder qongw: Diyhh lirkuix guanw,

Guanw m air bad Liw ee lo.

15 Juanlingg :ee si jirjui, hro guanw diyhh hogsai Ix ar?

Guanw qiqiuu Ix, u simxmih lirig ar?

16 Knuar ar, inx ee hokkir m si dirr inx ee ciuw;

Guan pnaiw langg ee qewboo lirkuix guaw hng hng.

17 Pnaiw langg ee dingx beh huax, jaieh qaur dirr inx;

Siongrder ee siurkir hro inx duw diyc qankow, u zuarr je vaiw ar?

18 Inx cincniu hongx-jingg ee cauxaxiur,

Cincniu qongg hongx cuex .kir ee cokngx u zuarr je vaiw ar?

19 Linw qongw: Siongrder jiong' ix ee juerog qra ix ee qniaw jikju lehh;

Guaw qongw: M dat diyc vywingr ix vunxsinx hro ix qaqi jaix;

20 Hro ix cinbak knuar qnir qaqi vairhuai,

Vunxsinx limx Juanlingg :ee ee siurkir.

21 Ix ee niguec vnuawdiongdngg juaddng,

Quewsir liauw, ix dirr ix ee qrex u simxmih kuaiwlok ar?

22 Siongrder simxpnuar hiaxee dirr quann xui :ee,

Jirjui e jiong' diwsig qawsi Ix ar?

23 U langg qaur siw kuiwlat jiauvi,

Muaw muaw did diyc vingjing anzenn.

24 Ix ee hinghac jin' vuii,

Ix ee qutcew zunrdik.

25 U langg qaur siw, simx tongwkow,

Longxx m bad cir diyc hokkir.

26 Inx longxx jidngiu dyw dirr too nirr,

Hro tangg kamr bat.

27 Knuar ar, guaw jaix linw ee iwsur,

Qapp linw uan'ongw guaw ee qewboo.

28 In'ui linw qongw: Vawongg ee cur dirr dyclyc?

Pnaiw langg vingsii kiarkiw ee cur dirr dyclyc?

29 Linw byy mng quewlo ee langg mah?

Qamxx be zin did inx ee jingwqir mah?

30 Dyrr si pnaiw langg dirr jaieh ee zit did diyc lauu lehh,

Dirr siurkir ee zit did diyc tuatli.

31 Ix soxx qniaa :ee, jirjui dngbin qongw ix?

Ix soxx juer :ee, jirjui vywingr ix?

32 Ix e hro langg qrngx qaur tiongxsnuax,

Qycc u qowsiuw :ee dirr ix ee bong.

33 Snuaqog ee to'uann ix liac juer dnix;

Beh u jingwlangg duer dirr ix ee aurbin,

Cincniu dirr ix dairsingx :ee be sngr .did.

34 Linw soxx inwdab ee ue kingjinx longxx si qew,

Linw jnaixngiu kangx kangx an'uir guaw ar?

22 Temanlangg Elifaz rinr qongxx:

2 Langg qamxx e lirig Siongrder mah?

Diwhui ee langg sidjai si lirig qaqi.

3 Liw juer langg qonggi, qamxx hro Juanlingg :ee hnuahiw mah?

Liw soxx qniaa uanjuann, qamxx e hro Ix dikli mah?

4 Qamxx si in'ui liw qingwuir Ix,

Laii jikvi liw, simxpnuar liw mah?

5 Liw ee juerog qamxx m si dua mah?

Liw ee juerquar sidjai byy qiongjin.

6 Liw byy indnuax tec hniadi ee dngwtauu;

Qycc trngr byy tangx cing ee langg ee snxax.

7 Iawsen ee langg, liw byy ing juiw hro inx limx,

Iaugy ee langg, liw duiww inx siukngr jiahmic.

8 U linglik ee langg did diyc toxde;

Texben ee langg diamr dirr hitt diongqanx.

9 Liw hro qnuaxhu kangx ciuw dyr .kir,

Byy ve ee qniaw ee ciuxqud siurr atjic.

10 Soxiw uahdauh siwbin uii liw;

Qniahniaa hutzenn qaur, qiauxziauw liw,

11 Iacc si oamr hro liw byy tangx knuar .qnir,

Jerje juiw imbat liw.

12 Siongrder qamxx m si dirr tnix ee quann mah?

Diyhh knuar cnisinn ee qigtauu, jnaixngiu hiacc quann;

13 Liw dyrr qongw: Siongrder jaix simxmih?

Ix qamxx e knuar taur oamr laii simxpnuar mah?

14 Bat hun ziakamr Ix, hro Ix be knuar .qnir;

Ix qniaa dirr qiongcongx ee dingxbin.

15 Liw qamxx rair tranr qoxjaw ee lo,

Dyrr si pnaiw langg soxx qniaa :ee mah?

16 Inx si bue qaur sii siurr bet .kir,

Inx ee derqix hro duarjuiw lrauu .kir.

17 Inx duiww Siongrder qongw: Diyhh lirkuix guanw,

Qycc qongw: Juanlingg :ee e qra guanw juer simxmih ar?

18 Ix ing hyw mic ciongmuaw ix ee cur;

Guan pnaiw langg ee qewboo lirkuix guaw hng hng.

19 Girlangg beh knuar .qnir laii hnuahiw;

Byy jue ee langg beh tixciyr inx;

20 Qongw: Hiaxee kiw laii qongqig guaw :ee, qyxzenn siurr jenxduu;

Inx soxx cunx :ee longxx hro huew siyx .kir.

21 Dnaxx liw diyhh qapp Siongrder cinbit, dyrr e did diyc ving'anx;

Anxnix hokkir beh limqaur liw.

22 Dnaxx diyhh singsiu Ix cuir-lai ee qawsi;

Jiong' Ix ee ue kngr dirr liw ee simx.

23 Liw narr qui'ngr Juanlingg :ee, dui' liw ee vowvnii lai druu kir vutgi,

Liw dyrr did diyc hingx kiw.

24 Liw diyhh hed vyxvuer dirr din'aix nirr,

Hed Ofir ee qimx dirr kehyy jiyhtauu ee diongqanx;

25 Juanlingg :ee dyrr beh juer liw ee vyxvuer,

Juer liw ee bun'ginn.

26 Liw dyrr beh liac Juanlingg :ee juer hnuahiw,

Bin giac quann ngr Siongrder.

27 Liw qidyw Ix, Ix dyrr tniax liw,

Ix iarr beh juann liw ee guan.

28 Liw dniardiyc beh juer simxmih, hitt xee dairjir dikkag jniaa;

Qngx iarr beh jiyr liw ee lo.

29 Inx qangwqe ee sii, liw iuguann tangx qongw: Singquann;

Kiamvix ee langg, Siongrder beh jinxqiur ix.

30 Lenrr u jue ee langg, Siongrder iarr beh qiur ix;

In'ui liw ee ciuw cingkir, ix beh did diyc qiur.

23 Job rinr qongxx:

2 Dnaxx guaw ee ai'uanr sngr juer vuergik;

Guaw soxx sriu ee jikhuat kacc dang dirr guaw ee toxkuir.

3 Guan guaw e jaix dui' jnaixngiu cue Siongrder,

Hro guaw tangx qaur Ix ee jyrui.

4 Guaw beh vailet anwqnia dirr Ix ee binrjingg,

Guaw ee cuir qraur gxiac tangx venrbingg.

5 Guaw iarr did diyc jaix Ix rinr guaw ee ue,

Iarr bingvik Ix duiww guaw soxx qongw :ee.

6 Ix qamxx beh ing dua quanlingg qapp guaw qewqaur mah?

Dikkag byy anxnix; Ix beh ngar lyc tniax guaw.

7 Dirr hiax, jingwdit :ee e qapp Ix venrlun,

Anxnix, guaw beh ingxuanw tuatli simxpnuar guaw :ee.

8 Knuar ar, guaw jinwjingg kir, Ix byy dirr hiax;

Guaw tewau kir, iarr byy knuar qnir Ix;

9 Dirr dyr vingg Ix decc qniaa dairjir, guaw byy knuar qnir Ix;

Dirr jniar vingg Ix diamr bat, guaw iarr byy knuar qnir Ix.

10 Danrsi Ix jaix guaw soxx qniaa ee lo;

Ix ciwlen guaw liauxau, guaw beh cincniu quer tuanwlen ee qimx.

11 Guaw ee kax duer Ix ee kavo;

Guaw jipsiuw Ix ee lo, iarr byy pencuac.

12 Ix cuiwdunn ee bingrling guaw m bad uivue;

Guaw duiwdiong Ix cuir-lai ee ue, ngiaa quer guaw soxx diyhh ing ee bixniuu.

13 Ix u itding ee simjir, jirjui e qra Ix uat dngw ar?

Ix ee simx soxx air :ee, dyrr qniaa ix.

14 Soxx qra guaw dniardiyc :ee, Ix beh jniaa ix;

Jitt hy ee su Ix iauxx u jerje.

15 Soxiw guaw dirr Ix ee binrjingg girgi cuah;

Guaw sniu .diyc dyrr qniax.

16 In'ui Siongrder hro guaw sitdnaw,

Juanlingg :ee hro guaw girgi cuah;

17 In'ui guaw ee qniahniaa m si uirdiyhh oamr,

Iarr m si in'ui oamr ziakamr guaw ee bin.

24 Juanlingg :ee sniaw su byy jiong' siqii siukngr?

Bad Ix ee langg sniaw su byy knuar qnir Ix ee zit ar?

2 U langg isuaw derqair,

Cniuxduat qui' qrunn ee jingsnix laii cri ix.

3 Inx qnuaw byy ve ee qniaw ee luu,

Kanx qnuaxhu ee guu juer junxdngr.

4 Inx ciax songwhionglangg lirkuix lo;

Derjniu ee qankoxlangg snaqab kir bih.

5 Knuar ar, inx cincniu iaw luu dirr kongwiaw,

Cud kir juer qangx, qutlat cue jiac;

Kongwiaw qra inx ee qniaw cud jiahmic.

6 Quah cann nirr ee niucauw,

Banw pnaiw langg soxx cunx ee pudyy.

7 Tong' mii tngwvakteh byy cing snxax dyw lehh;

Qnualingw byy qah pue.

8 Dirr snuax nirr hro dua ho ag damm;

In'ui byy ziajac dyrr bih uaw dirr jiyh-kax.

9 Dui' laurbuw ee hxingx-jingg cniuw byy ve ee qniaw kir;

Qycc duiww songwhionglangg tec junxdngr;

10 Drir qaur langg byy snxax, tngwteh laii qniaa;

Iaux iaux decc dnax diurvew.

11 Dirr hiaxee langg ee uicniuu lai, keh iuu, dac jiuxkud,

Qaqi iauxquxx cuiwdax.

12 Dirr jerje vecsnir ee sniaa-lai u langg ai'aix canx,

Siursiongx ee langg ee simx vi'aix;

Siongrder byy qamwcad hitt xee vutgi.

13 Iarr u langg uivue qngbingg,

M bad ix ee lo,

Iarr byy diamr dirr ix ee lorjniu.

14 Taii langg :ee tnix puxqngx dyrr kiw .laii,

Taii siw qankow :ee qapp songwhionglangg,

Dirr mii .sii cincniu cat.

15 Qan'imm ee langg ee bagjiux tingwhau qaur honghunx,

Qongw: Byy langg bagjiux e knuar qnir guaw;

Qycc ziakamr ix ee bin.

16 Inx dirr mii .sii iah cuwkangx, zit .sii qaqi bih,

Iarr m jaix hitt xee qngx.

17 In'ui inx knuar tniqngjaw juer siximr,

In'ui inx dirr siximr jin' quanwsir.

18 Ix dirr juixbin jin' kinkuair,

Inx ee hunrgiac dirr derjniu siurr jiuwjow;

Ix byy qycc uat dngw laii qniaa pudyhngg ee lo.

19 Kongwhan qapp siyzuac siaubyy secjuiw;

Imqanx duiwdirr huanrjue e langg iarr si anxnix.

20 Huai'in ix ee txex beh be qir did ix; tangg jiac ix, beh liac juer dnix;

Ix byy qycc siurr qiwliam;

Vutgi beh cincniu ciu siurr atjic.

21 Ix kihu byy huai'in byy snix qniaw ee langg.

Byy hyw kuanxtai jiuxqnuaxlangg.

22 Qycc ing Ix ee quanlingg vyxjuann qiongbingw ee langg;

Suizenn ix ee uahmia juadbang, iauxquxx e qycc kiw .laii.

23 Ix sniuxsur ix anzenn, ix dyrr u soxx uaxkyr,

Ix ee bagjiux iarr knuawqor inx ee lo.

24 Inx singquann, diap aw quw dyrr byy .kir;

Inx qangwqe, hro langg siusip, cincniu jingwlangg,

Qycc cincniu behsui siurr quah .kiw .laii.

25 Narr m si anxnix, jirjui e jingwbingg guaw si vehcat :ee,

Iarr hro guaw ee ue qruix dirr kangx kangx ar?

25 Suahlangg Bildad rinr qongxx:

2 Quanlingg qapp uigiamm longxx si Ix ee,

Ix dirr quann ee soxjai qniaa hyvingg.

3 Ix ee qunvingx, qamxx e sngr .did mah?

Ix ee qngx jid'err cud, jirjui byy hro ix jiyr .diyc ar?

4 Anxnix dirr Siongrder ee binrjingg langg taixtyw e cxingx juer gi?

Hurzinlangg soxx snix :ee, taixtyw e cingkir?

5 Knuar ar, dirr Ix ee bagjiux jingg guec byy qngx,

Cnxix iarr byy cingkir.

6 Byhqiyh langg si tangg,

Sewqanlangg si dorunw.

26 Job rinr qongxx:

2 Byy kuiwlat :ee, liw u vangjan ix qaur jnaixngiu!

Ciuxqud nngw :ee, liw u jinxqiur ix qaur jnaixngiu!

3 Liw u jnaixngiu qawsi budix ee langg,

Qycc dua huatbingg jinsit ee diwsig?

4 Liw duiww jirjui qongxue?

Jirjui ee sinn dui' liw cud?

5 Imhunn gniahgniauc cuah,

Dirr juiw-xe, ixqip dirr hiax kiarkiw :ee.

6 Dirr Ix ee binrjingg, imqanx lorhen,

Abaddon iarr byy kamr bat.

7 Ix tiw kuix vakhngx dirr kongdiongx ee dingxbin,

Diaur de dirr byy u mic ee dingxbin.

8 Ing juiw vaux dirr Ix ee bat hunn lai;

Hunn dirr juiw ee erbin iarr be puawlic.

9 Ix ziajac Ix ee jyrui,

Qycc pox Ix ee hunn dirr hitt dingxbin.

10 Ix dirr juixbin uec cud qaiwhan,

Qaur qngx qapp amr qauqair ee soxjai.

11 Tnix ee tiau dinxdang,

In'ui Ix ee jikvi laii gonggniac.

12 Ix ing linglik qikdong duarhaiw,

Ix ing diwsig pacpuar Rlahab.

13 Ing Ix ee krir hro tnix u cingcaiw,

Ix ee ciuw cak taur gauu jauw ee juaa.

14 Knuar ar, jiaxee vutqyr si Ix soxx juer ee siyxkuaw :ee;

Linw soxx dui' Ix tniax .qnir ee sniax ser qaur jnaixngiu?

Ix dua quanlingg ee luii, jirjui e cikdok ar?

27 Job qycc suawjiab tee kiw ix ee genlun qongxx:

2 Siongrder duat guaw ee lixiuu;

Juanlingg :ee koxcow guaw ee simsinn;

Guaw qiw Ix ee ingxuac laii qongw;

3 (In'ui guaw ee uahmia iauxquxx uanjuann dirr guaw ee lairbin,

Siongrder ee krir iauxquxx dirr guaw ee pnirkangx;)

4 Guaw ee cuiwdunn quatduanr byy qongw vutgi,

Guaw ee jic iarr byy qongw kuixjar.

5 Guaw duanwduanr byy cxingx linw juer gi,

Guaw qaur siw, iarr m sngr guaw juer byy uanjuann.

6 Guaw jipsiuw guaw ee gi, byy beh vangwsag,

Guaw ee simx jit siwlangg byy jikvi guaw.

7 Guan guaw ee duiwdik cincniu pnaiw langg,

Guan hitt xee kiw laii qongqig guaw :ee, cincniu vutgi ee langg.

8 Byy qingwkenn ee langg, suizenn cniuw diyc jaili,

Siongrder cruw ix ee uahmia ee sii, iauxx u simxmih ngwbang?

9 Huanrlan limqaur ix ee sii,

Siongrder qamxx beh tniax ix ee qiuqiyr?

10 Ix qamxx e ing Juanlingg :ee juer hnuahiw?

Ix sisiongg qiuqiyr Siongrder mah?

11 Siongrder soxx juer :ee, guaw beh qawsi liw,

Juanlingg :ee soxu :ee, guaw iarr byy unxmuaa.

12 Knuar ar, linw vunxsinx longxx u knuar .qnir,

Sniaw su itjin huqew ar?

13 Pnaiw langg dui' Siongrder soxx sriu ee hunrgiac,

Qiongvy ee langg dui' Juanlingg :ee soxx did .diyc ee sanxgiap, dyrr si jitt xee.

14 Ix ee qniaxzii narr qetnix jerje, si beh hro dyx taii siw;

Ix ee horer byy tangx jiac qraur gxiac.

15 Ix soxx cunx ee langg beh duw diyc un'ik laii baijongr,

Ix ee qnuaxhu byy tikaur.

16 Ix suizenn jikju ginn cincniu din'aix,

Qycc virvan ijniuu cincniu too;

17 Ix jueww ix virvan, jongwsirr girlangg beh cing ix,

Byy jue ee langg beh vunx ix ee ginn.

18 Ix cincniu jiuwtangg kiw cur,

Qycc cincniu jiuxqnix :ee dah ix ee lxiauu-aw.

19 Ix hyxgiac dyw lehh, jongwsirr byy did diyc siubaii;

Ix tiw kuix bagjiux, dyrr byy .kir.

20 Qniahniaa beh cincniu dua juiw zib diyc ix;

Mii .sii ee dua hongx beh saur ix kir.

21 Danghongx cuex ix, ix dyrr kir;

Qycc qnuaw ix lirkuix vunxsoxjai.

22 In'ui Siongrder sria diyc ix, iarr byy kuansur;

Ix kow be tangx tuatli Ix ee ciuw.

23 Langg beh duiww ix pah pog'aw,

Iarr beh cud kauxhy, qnuaw ix lirkuix vunxsoxjai.

28 Cud ginn u ix ee kongr,

Soxx tuanwlen ee qimx iarr u ix ee soxjai decc cud.

2 Tih si dui' de nirr cruw .cud .laii,

Dangg si dui' jiyc rngiuu .cud .laii.

3 Langg siaubyy hitt xee oamr,

Cue qaur jin' cimx;

U oamr qapp siximr diongx ee jiyc.

4 Ix lirkuix langg qiawkax ee soxjai, kuix het;

Qniaa dirr hitt dingxbin ee langg byy sniu diyc ix;

Inx lirkuix langg, dui dirr het-diongx, hnir laii hnir kir.

5 Lun qaur de, bixniuu dui' hiax cud;

Ix ee erdew cincniu hro huew qra ix vingw .kiw .laii.

6 Ix ee jiyc-diongx u lamvyxjiyc,

Ix iarr u qimsuax.

7 Hitt diauu lo ingjiauw m bad;

Siyw ringx ee bagjiux iarr byy knuar .qnir.

8 Oksiur m bad dac diyc ix,

Bingw sraix iarr m bad dui' hiax quer.

9 Ix crunx ciuw pah ding jiyc,

Dui' snuax ee qinqix qra ix vingw .kiw .laii.

10 Ix dirr jiyhtauu diongx kuix qxaux,

Cinbak knuar qnir dagg ngiu ee vyxmic.

11 Ix trad bat juiw hro ix be dih .lyc .laii;

Qycc tec cud unxbat ee mic, hro ix qnir qngx.

12 Danrsi diwhui dui' dyclyc e cue .diyc?

Congbingg ee soxjai dirr dyclyc?

13 Ix ee qewjnii byy langg jaix,

Dirr uahlangg ee de iarr byy der tangx cue.

14 Cim'enx qongw: Byy dirr guaw jiax;

Duarhaiw qongw: Byy qapp guaw dilehh.

15 Be e ing ngqimx laii did diyc ix;

Iarr be e ing ginn juer ix ee qewjnii.

16 Ofir ee qimx be dat diyc ix;

Vyxquir ee pikgik qapp lamvyxjiyc iarr be.

17 Ngqimx qapp vylee be viw did ix;

Hyw qimx ee kiwqu byy qxaur gxiac qapp ix ngua.

18 Senhyy juixjnix longxx byy qraur gxiac tangx qongw;

In'ui did diyc diwhui ngiaa quer jinjux.

19 Kus ee nggik be viw did ix;

Jioksniaa ee qimx m dat diyc ix.

20 Anxnix diwhui dui' dyclyc laii?

Congbingg ee soxjai dirr dyclyc?

21 Qiwzenn duiww itcer u uahmia :ee ee bagjiux unxbat;

Duiww kongdiongx ee vuejiauw zia'iamw.

22 Abaddon qapp Sixsid qongw:

Guanw hnirkangx tniax qnir ix ee hongsniax.

23 Siongrder bingvik diwhui ee lo,

Iarr jaix ix ee soxjai.

24 In'ui Ix qamwcad qaur de ee qigtauu,

Venww knuar poxtnie.

25 Dniardiyc hongx ee kindang,

Qycc nriuu juiw ee jerjiyw.

26 Ix qra horjuiw dniardiyc le,

Qra luiden dniardiyc ix ee lo;

27 Hitt sii Ix knuar qnir ix, laii qongw bingg ix,

Ix jyrjniaa ix, qycc jacad ix.

28 Ix duiww langg qongw: Knuar ar, qingwuir Jruw dyrr si diwhui,

Lirkuix pnaiw dyrr si congbingg.

29 Job qycc suawjiab tee kiw ix ee genlun, qongw,

2 Guan guaw cincniu jiongjingg hiaxee guec,

Cincniu Siongrder vyxsiuw guaw ee zit.

3 Hitt sii Ix ee dingx jiyr dirr guaw ee taukag.

Guaw kyr Ix ee qngx qniaa quer oamr.

4 Cincniu guaw dirr ciutnix ee zit,

Dirr guaw ee vowvnii, Siongrder qapp guaw cinbit.

5 Juanlingg :ee iauxquxx qapp guaw dilehh,

Guaw ee qniaxzii dirr guaw ee siwuii.

6 Ing nix sew guaw ee kax,

Jiyhvnuaa qra guaw cud iuu jniaa kex.

7 Guaw qniaa qaur sniamngg,

Dirr queci sed guaw ee jyrui.

8 Siauwlenlangg knuar qnir guaw dyrr jauw kir bih,

Laurlangg iarr kiw laii kia.

9 Siuxlingw dyrr tingjiw ix ee ue,

Ing ciuw ngx inx ee cuir.

10 Quiwjok byy kuix sniax,

Jic-tauu liamm dirr jniurqniux.

11 In'ui hnirkangx tniax .qnir .ee, dyrr cxingx guaw juer u hokkir,

Bagjiux knuar .qnir .ee, dyrr qra guaw juer qanjingr.

12 In'ui guaw jinxqiur aiqiuu ee qankoxlangg,

Qapp byy ve ee qniaw, byy langg vangjan :ee.

13 Decbeh sixbyy ee langg qra guaw jiokhog,

Guaw iarr hro qnuaxhu ee simx hnuahiw laii cniuwquax.

14 Guaw cing qonggi, ix iarr ing guaw juer snxax,

Ing qongvingg juer pxaur, juer by.

15 Guaw juer cnimilangg ee bagjiux,

Juer vaixkax ee langg ee kax.

16 Guaw juer songwhionglangg ee ve,

Vingsor m bad :ee ee anwqnia guaw jacad ix.

17 Guaw pacjic pnaiw langg ee gejyy.

Cniuw ix ee cuiwkiw soxx qa :ee.

18 Guaw dyrr qongw: Guaw beh siw dirr guaw ee siu,

Guaw ee zidjiw beh qetnix cincniu suax.

19 Guaw ee qinx crunx qaur juiw-vnix,

Lorjuiw qui' mii lyc dirr guaw ee qix.

20 Guaw ee ingqngx siongsiongg sinx,

Guaw ee qringx dirr guaw ee ciuw qycjaiww ann.

21 Langg tniax qnir guaw, dyrr tingwhau,

Jing jing danw guaw jixqaur.

22 Guaw qongw liauw, inx dyrr byy qycc qongw;

Guaw ee ue cincniu ho dih dirr inx ee dingxbin.

23 Inx tingwhau guaw cincniu tingwhau horjuiw,

Dua kuix inx ee cuir, cincniu himbo cuntnix ee ho.

24 Inx sitbang, guaw an'uir inx;

Inx be e qexvenr guaw ee bin ee qngx.

25 Guaw qra inx qingw lo, guaw jre tauui;

Guaw cincniu ongg dirr qundui diongx kiarkiw,

Qycc cincniu an'uir siongsimx ee langg.

30 Jongwsirr henrjai viw guaw kacc siauwlenn ee langg tixciyr guaw,

Hitt hy langg ee laurve, guaw vunxdew knuar inx, be kacc sux guaw ngiuu-qrunn ee qxauw.

2 Inx ee jongwlenn ixqing' sueter,

Inx ee ciuw ee lat qapp guaw simxmih qansiap?

3 Inx in'ui kiamwkueh qapp iaugy, sintew siausanw,

Dirr honghuer lingxjing ee oamr diongx ker dax too.

4 Dirr cauxpy diongqanx banw lehog ee cair,

Qimciokhuex ee qinx juer inx ee jiahmic.

5 Inx dui' langg ee diongqanx siurr qnuaw cud;

Langg huah inx cincniu huah cat.

6 Inx suar diyhh diamr dirr snuaqog ee cimknix,

Dirr derhet qapp jiyhdong ee lairbin.

7 Dirr ciurnaa lai cincniu luu hauw;

Dirr ciwpuer kax decc cun'unn.

8 Inx si gong langg ee qniaxzii, si harjenrlangg ee qniaxzii;

Siurr vnipah qnuaw cud qingxgua.

9 Dnaxx jiaxee langg liac guaw juer inx ee quakig,

Juer inx ee uervnir.

10 Inx iamwngor guaw, lirkuix guaw hng hng;

Qnir diyc guaw ee bin dyrr pruir nxua.

11 In'ui Ix vangr ling Ix ee syh, laii koxcow guaw,

Inx dyrr dirr guaw ee binrjingg byy qaqi ioksog.

12 Vijen ee jingxlui dirr guaw ee jniar vingg kiw .laii,

Sag kuix guaw ee kax, jy hamrhai ee lo laii qongqig guaw.

13 Inx huixhuai guaw ee lo,

Qetnix guaw ee huanrlan,

Dyrr si byy did diyc vangjan ee langg.

14 Inx cincniu dui' kuacdua ee puawkiah laii,

Dirr huixhuai ee diongqanx dit dit qy .laii.

15 Qniahniaa ee su uat dngw qaur dirr guaw,

Inx qnuaxdiok guaw ee ingqngx cincniu hongx;

Guaw ee hoklok cincniu hunn .quer .kir.

16 Dnaxx guaw ee simsinn dirr guaw ee lairbin qik sitjir;

Huanrlan ee zit qra guaw knii diauu diauu.

17 Mii .sii guaw ee qud siurr ciwcak lutjad;

Tangwtniar ker guaw byy suah.

18 In'ui jitt xee dua ee lat, guaw ee ihok m jniaa ngiu;

Cincniu snxax ee amrqunxniaw qra guaw sog ann ann.

19 Ix hed guaw dirr tobee;

Guaw dyrr cincniu tohunw qapp huexhux.

20 Guaw qiuqiyr Liw, Liw m rinr guaw;

Guaw kia .kiw .laii, Liw qandna' decc knuar.

21 Liw venr janzimw laii kuanxtai guaw,

Qycc ing Liw ee ciuw ee dua lat kunxvig guaw.

22 Quxkiw guaw dirr hongx ee dingxbin, hro guaw kiaa ix;

Qycc siaubet guaw dirr jin' taur ee hongx.

23 In'ui guaw jaix Liw beh hro guaw qaur sixbyy,

Qaur hitt qingx uirdiyhh longxjongw u uahmia :ee, soxx dniardiyc ee cur.

24 Langg vuahdyw ee sii, qamxx byy crunx ciuw?

Duw diyc jaieh qamxx byy in'ui anxnix huah qiur?

25 Langg duw diyc huanrlan, guaw qamxx byy uirdiyhh ix tikaur?

Langg songwhiongx, guaw ee simx qamxx byy uirdiyhh ix iubun?

26 Guaw ngwbang did diyc hokir, jaieh dyrr qaur;

Guaw tingwhau qngbingg, oamr dyrr laii.

27 Guaw ee simdngg qunxqaw byy hiyh;

Koxlan ee zit limqaur guaw.

28 Guaw byy zidqngx dyrr tikaur qniaa .kir,

Guaw kia dirr hue-diongx, decc auqiyr qriuu vangjan.

29 Guaw qapp snuaqauw juer hniadi,

Qapp dyjiauw juer dangpnua.

30 Guaw ee puehux ox, dyrr liur .lyc .kir,

Guaw ee quttauu in'ui zet siurr siyx.

31 Soxiw guaw ee kimm vnir juer vi'aix ee imx,

Guaw ee siaux vnir juer tikaur :ee ee sniax.

31 Guaw qapp guaw ee bagjiux lip iog.

Taixtyw e juwir knuar jairsikluw ar?

2 In'ui Siongrder dui' dingxbin soxx dniardiyc ee hunrgiac,

Juanlingg :ee dui' dingxbin soxx pair ee qigiap si simxmih ar?

3 Qamxx m si huanrlan limqaur vutgi :ee,

Jaihai limqaur jokget :ee mah?

4 Ix qamxx m si qamwcad guaw ee lo.

Diamxsngr guaw ee kavo mah?

5 Guaw narr qapp huqew snaqab qniaa,

Kax narr qnuaxqinw duer kuixjar;

6 (Guan guaw hro qongdy ee tenvingg laii cinr,

Hro Siongrder jaix guaw ee sunjuann;)

7 Guaw ee kavo narr penli jniawlo,

Guaw ee simx narr qinduer guaw ee bagjiux,

Narr u lasamm liamm dirr guaw ee ciuw;

8 Dyrr guan guaw soxx jingr :ee, vadd langg jiac ix,

Guaw soxx cutsanw :ee, ix ee qinx siurr vuic cud.

9 Guaw ee simx narr hro hurluw inxiuw .kir,

Iacc si guaw bih dirr cuwvnix ee mngg decc danw;

10 Dyrr guan guaw ee hurzinlangg qra langg ex bry,

Vadd langg iarr qapp ix dangvangg;

11 In'ui jex si dua pnaiw,

Si simxpnuawsix ingqaix vran ee jue;

12 Jex si huew, siyx qaur bedbyy,

Vuihduu guaw itcer soxx cutsanw :ee ee qinx.

13 Guaw ee lovok luxvi qapp guaw venrlun ee sii,

Guaw narr biauxsi inx ee lixiuu;

14 Dyrr Siongrder kiw .laii, guaw beh jnaixngiu ar?

Ix simxmng, guaw beh jnaixngiu rinr ar?

15 Jy guaw dirr txex nirr :ee, qamxx m si iarr jy ix mah?

Jyrjniaa guanw dirr vakdow :ee, qamxx m si jit xee mah?

16 Guaw narr qimwjiw songwhionglangg ee iwguan,

Iacc si hro qnuaxhu ee bagjiux knuar qaur en'ng;

17 Iacc si guaw qaqi jiac damrvyc mic,

Byy ve ee qniaw jiacc laii byy hxun ar?

18 (Dui' guaw siauwlenn, ix qapp guaw snaqab duarhanr, cincniu qapp laurve jidngiu;

Guaw dui' cud laurbuw ee vakdow dyrr kansingg qnuaxhu;)

19 Guaw narr knuar qnir langg in'ui byy snxax laii siw.

Iacc si knuar qnir songwhionglangg sinkux byy tangx ziaqah;

20 Ix ee iyx narr byy qra guaw jiokhog,

Ix iarr byy dui' guaw ee ngiuu ee xmngg hro qaqi siyx,

21 Guaw narr in'ui knuar qnir dirr sniamngg u vangjan guaw :ee,

Dyrr kixciuw qongqig byy ve ee qniaw;

22 Guan guaw ee ciuw dui' qingqah lud .lyc .kir,

Guaw ee ciuxjad dui' qud jic .kir;

23 In'ui dui' Siongrder laii ee jaieh hro guaw qniahniaa;

In'ui Ix ee uigiamm, guaw drngx be kiw.

24 Guaw narr ing ngqimx juer ngwbang,

Duiww hyw qimx qongw: Liw si guaw soxx uaxkyr :ee;

25 Guaw narr in'ui jaibut hongsing,

In'ui Guaw ee ciuw tanr jerje laii hnuahiw;

26 Guaw narr knuar qnir zit decc huad qngx,

Guec qngx qngx decc qniaa;

27 Guaw ee simx dirr amwdiongx siurr inxiuw,

Iacc si guaw ee cuir qapp guaw ee ciuw sna' jimx;

28 Jex iarr si simxpnuawsix ingqaix van ee jue,

In'ui guaw anxnix si vuerbiu dirr dingxbin ee Siongrder.

29 Guaw narr liac uanwhun guaw :ee ee jaieh juer kuaiwlok,

Iacc si uirdiyhh ix duw diyc jaieh laii dik'ir;

30 (Qisit guaw byy iong'unw guaw ee cuir huanrjue,

Jiuwjow qriuu hro inx siw;)

31 Narr guaw vowvnii lai ee langg byy qongw,

Jirjui e cue diyc jit xee byy jiac ix ee hyw mic qaur vaw :ee?

32 (Cutguarlangg byy hiyh dirr quelo,

Guaw qra qnialo ee langg kuix mngg;)

33 Guaw narr cincniu vingsionglangg zia'iamw guaw ee quewsid,

Kngr guaw ee juerget dirr guaw ee hxingx-jingg;

34 Uirdiyhh qniax dua dui ee jingwlangg,

Qniax jongjok ee biauxsi,

Drir qaur jing jing m qnaw cud mngg---

35 Guan u jit xee decc tniax guaw!

(Knuar ar, u guaw soxx rue ee hy, guan Juanlingg :ee rinr guaw;)

Guan did diyc guaw ee duiwdik soxx siaw ee qywjng!)

36 Guaw dikkag beh vue ix dirr guaw ee qingtauu,

Dir ix juer benxliuu.

37 Guaw beh duiww Ix qongw bingg guaw kavo ee siauwgiac,

Beh cincniu zinqunx jiurqin Ix.

38 Guaw ee canhngg narr cud sniax qryr guaw,

Leqaux snaqab tikaur;

39 Guaw narr jiac ix ee cutsanw, byy hro ix qewjnii,

Iacc si hro giabjuw sitlyc ix ee sniwmia;

40 Dyrr guan cixaw huatsnix ter siyxbec,

Pnaiw cauw huatsnix laii ter duarbec.

Job ee ue bingvik lar.

32 Dui' anxnix jitt snax xee langg dyrr tingsuah, byy qycc rinr Job, in'ui ix qaqi knuar juer gi.

2 Hitt sii u Buzlangg, sriok dirr Rlam ee jok, Balakel ee qniaw Elihu, jin' siurkir; siurkir Job, in'ui ix liac qaqi viw Siongrder kacc u gi.

3 Iarr siurkir ix snax xee ving'iuw, in'ui inx sniu byy ue tangx rinr, iauxquxx griw Job u jue.

4 Elihu beh qapp Job qongxue, iauxx decc tingwhau; si in'ui inx viw ix kacc je huer.

5 Elihu knuar qnir jitt snax langg cuir-lai byy ue tangx rinr, dyrr dua siurkir.

6 Buzlangg Balakel ee qniaw Elihu rinr qongxx:

Guaw siauwlenn, linw nilau;

Soxiw guaw tewniu, m qnaw duiww linw vailet guaw ee iwqenr.

7 Guaw qongw: Zidjiw je :ee diyhh qongw,

Huewsiu quann :ee diyhh ing diwhui qawsi langg.

8 Narr si langg ee lairbin u simsinn,

Iarr Juanlingg :ee ee krir hro langg cangmiaa.

9 Kacc sirdua :ee, byy longxx u diwhui,

Kacc lyxlenn :ee, byy longxx e bingvik qongvingg.

10 Soxiw guaw qongw: Linw diyhh tniax guaw;

Guaw iarr beh vailet guaw ee iwqenr.

11 Knuar ar, guaw ixqing' tingwhau linw ee ue,

Qycc hnirkangx tniax linw ee lixlun;

Tingwhau linw cue diyc tangx qongw ee ue.

12 Guaw liusimx tniax linw.

Knuar ar, linw diongqanx byy jit langg vren dyw Job,

Iarr byy jit xee rinr ix ee ue.

13 Linw byc did qongw: Guanw duw diyc diwhui;

Siongrder e ngiaa ix, langg be e.

14 Ix byy ing ue qapp guaw venrlun;

Guaw iarr byy beh ing linw ee ue rinr ix.

15 Inx gang gang byy qycc rinr,

Byy ue tangx qongw.

16 Inx byy qongxue, dniardiyc kia lehh byy qycc rinr,

Guaw qamxx diyhh qycc tingwhau mah?

17 Guaw iarr beh jin guaw ee hunrgiac laii rinr,

Vailet guaw ee iwqenr.

18 In'ui guaw u ue muaw muaw;

Guaw lairbin ee sinn qikdong guaw.

19 Knuar ar, guaw ee vaklai cincniu hrongx bat bat ee jiuw;

Iarr cincniu sinx ee puede decbeh viag lic.

20 Guaw beh qongw cud, hro guaw tauxkir;

Guaw beh kuix cuir laii rinr.

21 Guaw byy beh knuar langg ee sinhun;

Iarr byy beh tiamxmi langg.

22 In'ui guaw be hiauxdid tiamxmi langg;

Narr u anxnix, dyrr congwjy guaw :ee beh qinw qinw dubet guaw.

33 Job ar, dnaxx cniaw liw tniax guaw ee ue,

Liusimx tniax guaw itcer ee gengiw.

2 Knuar ar, guaw dnaxx kuix guaw ee cuir,

Guaw ee jic dirr cuir-lai decc qongw.

3 Guaw ee ue beh qongw cud guaw simlai ee jingwdit,

Guaw ee cuiwdunn beh lauxsit qongw cud soxx jaix :ee.

4 Siongrder ee Sinn congwjy guaw.

Juanlinggg :ee ee krir hro guaw did diyc uac.

5 Liw narr e, dyrr diyhh rinr guaw,

Kiw laii kia lehh, vailet dirr guaw ee binrjingg.

6 Knuar ar, guaw dirr Siongrder ee binrjingg qapp liw jidngiu,

Iarr si ing too nic jniaa :ee.

7 Knuar ar, guaw byy ing uigiamm hro liw qniax,

Iarr byy ing guaw ee sewlik deh liw.

8 Liw soxx qongw :ee, guaw sidjai u tniax .qnir,

Iarr u tniax qnir liw ee ue ee sniax, qongw,

9 Guaw si cingkir, byy quewsid,

Guaw si cingvik, dirr guaw simlai iarr byy jue.

10 Knuar ar, Ix cue kangkiah laii qongqig guaw,

Liac guaw juer Ix ee duiwdik.

11 Ix ing kakaur kraur guaw ee kax,

Diwir knuar guaw itcer ee lo.

12 Knuar ar, qongw qaur jex, liw si vutgi, guaw beh rinr liw;

In'ui Siongrder viw langg kacc dua.

13 Liw sniaw su qapp Ix sna' jnex?

In'ui Ix ee su Ix longxx byy qexbingg.

14 In'ui Siongrder qongw jit vaiw,

Nng vaiw, jongwsirr langg byy diwir.

15 Langg dyw dirr bincngg kunr,

Qaur ix kunr dang binn ee sii,

Dirr binbang diongx, mii .sii ee ngirsiong.

16 Ix kuix inx ee hnirkangx,

Kamr inr dirr inx soxx sriu ee qawsi.

17 Beh hro langg qexngua soxx qewik ee su,

Atjiw langg ee qiaugno.

18 Joxjiw ix ee uahmia byy lyc cimx knix,

Ix ee sniwmia byy dui' dyqiamr laii siw.

19 Langg dirr bincngg nirr sriu tangwtniar ee qingxqair;

Dirr ix ee qud-lai cincniu qaujenr byy suah.

20 Drir qaur ix ee uahmia iamwjen jiahmic,

Ix ee simsinn iamwngor hyw bi.

21 Ix ee bah siausanw, byy tangx knuar .qnir;

Vingsor byy knuar qnir ee qud, dnaxx longxx tongw cud.

22 Ix ee sniwmia qin dirr cimx knix;

Ix ee uahmia qin dirr hiaxee bedbyy sniwmia :ee.

23 Narr u jit xee suwjiaw qapp ix dilehh.

Dyrr si jit-cingx diongx ee jit xee, ter ix qongxue :ee,

Jiong' langg soxx diyhh juer :ee jixsi ix;

24 Ix dyrr six xunx hro ix, qongw,

Qiur ix benw did lyc cimx knix,

Guaw ixqing' cue diyc sioghuee ix :ee.

25 Ix ee bah viw ginxaw ee bah kacc iuwnngw;

Ix beh hogdyr siauwlenn ee zidjiw.

26 Ix beh qidyw Siongrder, Siongrder hnuahiw ix;

Qnir diyc Ix ee bin laii hnuahiw;

Ix qycc sngr hitt langg juer gi.

27 Ix dirr langg ee binrjingg cniuwquax, qongw,

Guaw u huanrjue, dendyr sirhuix, byy lirig guaw.

28 Ix qiuwsiok guaw ee sniwmia, benw lyc cimx knix;

Guaw ee uahmia iarr beh knuar qnir qngx.

29 Knuar ar, jiaxee itcer ee su Siongrder qniaa dirr langg,

Nng vaiw, snax vaiw.

30 Uirdiyhh beh dui' cimx knix qiur ix ee sniwmia dywdngw,

Hro ix did diyc uahmia ee qngx jiyr ix.

31 Job ar, liw diyhh ngar hnirkangx tniax guaw ee ue,

Diyhh jing jing, guaw dyrr beh qongw.

32 Liw narr u ue tangx qongw, dyrr rinr guaw;

Jueww liw qongw, in'ui guaw rair liac liw juer gi.

33 Narr byy, liw diyhh tniax guaw qongw, liw diyhh jing jing,

Guaw beh qar liw diwhui.

34 Elihu qycc rinr qongxx:

2 Linw u diwhui ee langg, diyhh tniax guaw ee ue,

U diwsig :ee langg diyhh ngar hnirkangx tniax guaw.

3 In'ui hni-aw ciwgiam ue,

Cincniu jniurqniux hunvet jubi.

4 Lanw diyhh uirr qaqa qingw hitt xee habgii :ee,

Iarr diyhh snaqab jaix simxmih si hyw.

5 In'ui Job u qongw: Guaw si qonggi,

Siongrder duat guaw ee jingwliw;

6 Guaw suizenn u lriw, iauxx sngr juer qongw vehcat :ee;

Guaw suizenn byy quewsid, soxx sriu ee siongx be rix .did.

7 Jirjui cincniu Job muaw cuir buxban,

Cincniu limx juiw ar?

8 Ix qapp jokget :ee juer pnua lai'ongw,

Qapp pnaiw langg snaqab qniaa,

9 In'ui bad qongw: Langg hnuahiw Siongrder,

Longxx si byy lirig.

10 Soxiw linw bingliw ee langg, diyhh tniax guaw ee ue.

Siongrder duanwduanr be qniaa pnaiw,

Juanlingg :ee duanwduanr be qniaa vutgi.

11 In'ui Ix beh jiauww langg soxx juer :ee laii vywingr ix,

Jiauww langg soxx qniaa :ee laii hro ix duw .diyc.

12 Siongrder sidjai be juer pnaiw;

Juanlingg :ee iarr byy pensux laii simxpnuar.

13 Jirjui ing de tokdiong Ix ar?

Jirjui andnia juann sewqair ar?

14 Ix narr juansimx qor qaqi,

Jiong' Ix ee sinn qapp krir siuhuee qruix qaqi,

15 Qniwnarr u ziogtew :ee beh juer jit xe siw,

Langg iuguann beh qruix tow.

16 Liw narr bingliw, dyrr diyhh tniax jitt xee,

Ngar hnirkangx tniax guaw qongxue ee sniax.

17 Uanwhun qongvingg :ee qamxx e jiangxquann mah?

Hitt xee u qonggi :ee, u quanlingg :ee, liw qamxx e dring Ix u jue mah?

18 Ix duiww qun'ongg qongw: Liw si byy herlyc :ee;

Duiww quiwjok qongw: Liw si sia'og :ee.

19 Ix byy pensux kuanxtai u jiok'ui :ee,

Iarr byy kivinn diongrhur,

In'ui longxx si Ix ee ciuw soxx jy :ee.

20 Diap aw quw ee diongqanx, vnuawmii ee sii, inx dyrr sixbyy;

Vecsnir siurr iycuah, decc quer .kir;

Iongxbingw :ee siurr dubet mrbenw ing ciuw.

21 In'ui Ix ee bagjiux qamwcad dagg langg ee lo,

Knuar bingg ix ee kavo.

22 Byy u oamr, byy u siximr,

Tangx hro qniaa pnaiw ee langg kir bih.

23 In'ui Ix byy qra langg dniardiyc siqii,

Hro langg tangx qaur Ix ee binrjingg siurr simxpnuar.

24 Ix pacuir qiongbingw ee langg, mrbenw camng,

Setlip vadd langg laii ter inx.

25 In'ui Ix qamwcad inx ee soxx juer;

Dirr mii .sii ciax dyw inx, inx dyrr bedbyy.

26 Dirr jingwlangg decc knuar ee soxjai, Ix pah inx,

Cincniu pah juer pnaiw ee langg jidngiu.

27 In'ui inx qniaa pencuac byy duer Ix,

Iarr longxx byy diwir Ix ee lo.

28 Drir qaur hro songwhionglangg auqiyr ee sniax taur qaur Ix ee binrjingg,

Ix iarr tniax qnir kunwkow ee langg ee auqiyr.

29 Ix hro langg anjing, jirjui e hiamm Ix m driyc ar?

Ix ngx bin jirjui knuar Ix e diyc ar?

Ix kuanxtai jit qog iacc si jit langg longxx si anxnix;

30 Benw did byy qingwkenn ee langg juer ongg,

Benw did u langg longxlok vecsnir.

31 Qamxx u langg bad duiww Siongrder qongw:

Guaw ixqing' siurr jikhuat, byy qycc huanrjue ar?

32 Guaw soxx byy knuar .qnir .ee, qriuu Liw jixsi guaw,

Guaw narr bad juer pnaiw, guaw byy beh qycc juer ix.

33 Qamxx si Ix soxx vywingr, byy jiauww liw ee iwsur, liw jiacc tesii m sriu mah?

Dnaxx diyhh qingw :ee, si liw, m si guaw; liw soxx jaix :ee, jueww liw qongw.

34 Bingliw ee langg, qapp tniax guaw ee ue ee diwhuirlangg,

Beh duiww guaw qongw;

35 Job soxx qongw :ee byy diwsig,

Ix ee ue byy diwhui.

36 Guan Job siurr ciwgiam qaur tauwdew,

In'ui ix ee inwdab cincniu pnaiw langg.

37 In'ui ix dirr ix ee jue qycc qetnix vuergik;

Ix dirr lanw diongqanx paccuir;

Qycc ing jerje ue huanxduir Siongrder.

35 Elihu qycc rinr qongxx:

2 Liw liac jitt xee juer u habliw,

Liw qongw: Guaw ee gi ngiaa quer Siongrder ee gi ar,

3 Liw qingxzenn qongw: Jex u simxmih lirig liw?

Iuqycc: Guaw u simxmih lirig kacc ngiaa guaw kir huanrjue?

4 Guaw beh rinr liw,

Ixqip uaw liw ee dangpnua.

5 Liw diyhh giagbak knuar tnix,

Knuar hitt xee qiongcongx, si viw liw kacc quann.

6 Liw narr huanrjue, e hai diyc Ix simxmih?

Liw ee quewsid narr qetnix, e gai diyc Ix simxmih ar?

7 Liw narr qniaa gi, u simxmih hro Ix ar?

Iacc si Ix dui' liw ee ciuw u did diyc simxmih ar?

8 Liw ee pnaiw quanhe liw drangg lui ee langg,

Liw ee gi iarr quanhe sewqanlangg.

9 Langg in'ui siurr jerje vyrgiok dyrr auqiyr,

In'ui siurr qiongg ee langg apjer, dyrr hauxqiur.

10 Danrsi byy langg qongw: Congwjy guaw ee Siongrder dirr dyclyc?

Ix si hro langg mii .sii cniuwquax :ee.

11 Ix si qawsi lanw ngiaa quer derjniu ee jauxsiur,

Hro lanw u diwhui, ngiaa quer dirr kongdiongx ee vuejiauw :ee.

12 Inx dirr hiax auqiyr, jongwsirr byy u inwdab :ee,

In'ui pnaiw langg qiaugno ee enqor.

13 Huqew :ee, Siongrder byy beh tniax,

Juanlingg :ee iarr m knuawqor ix.

14 Hyhongr liw qongw, liw byy knuar qnir Ix;

Jitt xee anwqnia dirr Ix ee binrjingg, liw diyhh cniaw tingwhau Ix ar!

15 Dnaxx in'ui Ix byy siurkir laii jikhuat,

Iarr byy vutjiw juwir buxban;

16 Soxiw Job kuix cuir longxx huqew,

Qongw jerje budix ee ue.

36 Elihu qycc suawjiab qongw:

2 Liw qycc iong'unw guaw diap aw quw, guaw dyrr beh jixsi liw,

In'ui iauxx u ue beh uirdiyhh Siongrder laii qongw.

3 Guaw beh dui' hng hng cruw guaw ee diwsig,

Ing gi qruix hro congwjy guaw :ee.

4 In'ui guaw ee ue sidjai byy vehcat,

U diwsig jiauvi :ee qapp liw dilehh.

5 Knuar ar, Siongrder dua quanlingg longxx byy biauxsi langg;

Ix ee simsux linglik jin' dua.

6 Ix byy vyxho pnaiw langg ee sniwmia,

Si hro koxlan :ee did diyc qongvingg.

7 Ix ee bagjiux byy lirkuix girlangg;

Hro inx qapp qun'ongg snaqab jerui qaur ingxuanw;

Inx dyrr did diyc singquann.

8 Inx narr hro syxlen vak lehh;

Hro koxlan ee syh lriur .diyc;

9 Ix dyrr jixsi inx jaix inx ee soxx juer,

Ixqip inx soxx huan ee dang jue.

10 Ix iarr kuix inx ee hnirkangx laii siurr qawsi,

Huanhur inx uat .dngw .laii, lirkuix juerog.

11 Inx narr tniatanr laii hogsai,

Dyrr beh hingtongx quer zit,

Lignii anlok.

12 Narr m tniatanr, dyrr beh hro dyqiamr taii,

Gong gong laii siw.

13 Hiaxee simx byy qingwkenn ee langg jikju siurkir,

Ix kunxvak inx ee sii, inx iarr byy hauxqiur.

14 Ix beh dirr siauwlenn ee sii siw,

Inx ee sniwmia songwsid cincniu pnaiw ginxaw jidngiu.

15 Ix ing kunwkow laii qiur kunwkow ee langg,

Ing vyrgiok laii kuix inx ee hnirkangx.

16 Ix inxcua liw cud guiqib,

Zip dirr kuankuah byy ehdec ee de;

Vaii dirr liw ee dyh-dingw :ee si u iuzi muaw muaw :ee.

17 Liw ciongmuaw pnaiw langg ee gixgi,

Dyrr gixgi qapp pnuawduanr beh liac liw.

18 M tangx iong'unw siurkir qikdong liw, drir qaur liw buxban;

Iarr m tangx in'ui sioghuee ee qewjnii dua, laii qniaa penx.

19 Liw ee jnijaii, iacc si liw itcer ee sewlik,

Qamxx u haurgiam, hro liw byy duw diyc huanrlan mah?

20 Byc did himbo hitt xee amwmii,

Dyrr si vecsnir dirr inx ee soxjai duw diyc dubet ee sii.

21 Liw diyhh qinxsin, m tangx iwhiongr juerog;

In'ui liw qingw jitt xee, ngiaa quer koxlan.

22 Knuar ar, Siongrder ing Ix ee linglik laii qniaa dua su;

Jirjui juer qauwsux cincniu Ix ar?

23 Jirjui e dniardiyc Ix ee lo?

Jirjui e qongw: Liw u qniaa vutgi?

24 Liw diyhh qir did ylyw Ix soxx qniaa :ee juer dua,

Dyrr si langg soxx cniuwquax :ee.

25 Langg longxx knuar qnir ix;

Langg dui' hng hng knuar qnir ix.

26 Knuar ar, Siongrder jiww dua, lanw m bad Ix;

Ix ee nii ee gxiac be sngr .did.

27 In'ui Ix kip'inw jit dih jit dih ee juiw,

Dyrr dui' ix ee sipkir venwjniaa ho,

28 Dyrr si tnix soxx lyc :ee,

Laii ag jingwlangg.

29 Jirjui e bingvik hunn jnaixngiu tiw kuix,

Qapp Ix hingqiongx kurku hauw ee sniax?

30 Knuar ar, Ix huad cud Ix ee qngx dirr hitt dingxbin;

Ix qycc ziakamr haiw ee drew.

31 In'ui Ix ing jiaxee simxpnuar vecsnir;

Qycc sniuxsur hongsing ee bixniuu.

32 Ix ing denrqngx ziax ciuw,

Bingrling ix pah diyc duiwdik.

33 Ix ee sniax si viauxbingg Ix;

Iarr ing soxx beh kiw ee dua hongho jixsi jingsnix.

37 In'ui anxnix, guaw ee simx pogpok cingw,

Iydang lirkuix vunxui.

2 Diyhh diwir tniax Ix kurku ee sniax,

Ixqip Ix ee cuir soxx cud ong ee sniax.

3 Ix ee sniax huad cud qaur poxtnie,

Ix ee den sih qaur derqik.

4 Duewau u sniax kurku hauw;

Ix ing uigiamm ee sniax huad luii;

Ix ee sniax jid'err tniax .qnir, Ix byy tingjiw inx.

5 Siongrder huad cud luii ee sniax jin' qibiau;

Ix qniaa dua su hro lanw be cikdok .did.

6 In'ui Ix duiww seh qongw: Diyhh lyc dirr derjniu;

Duiww qui' jun ee ho,

Qapp qui' jun ee dua ho, iarr si anxnix qongw.

7 Ix qimwjiw dagg langg ee ciuw;

Hro soxx jy ee langg longxx e jaix.

8 Vacsiur zip het,

Longxx druar dirr inx ee dong.

9 Dua hongx dui' ix ee huxkor laii,

Qnualingw dui' vakhngx cud.

10 Dui' Siongrder ee vunn kxuir dyrr qenvingx;

Kuankah ee juiw dyrr qetding.

11 Ix hro sipkir jikmuaw dirr bat hunn,

Denw kuix denrqngx ee hunn;

12 Jitt xee si tranr Ix ee jixhuix siwqer qniaa dngxsec;

Dirr sewqair ee derbin,

Qniaa Ix itcer soxx huanhur inx :ee;

13 Higsi uirdiyhh jikhuat, higsi uirdiyhh zunrdik de,

Higsi uirdiyhh sihingg ju'air, jiacc hro ix laii.

14 Job ar, liw diyhh liusimx laii tniax;

Diyhh kia lehh laii sniu Siongrder qibiau ee su.

15 Siongrder jnaixngiu huanhur jiaxee?

Jnaixngiu hro hunn-diongx ee denrqngx jiyr cud, liw jaix mah?

16 Hunn jnaixngiu pox vnii dirr kongdiongx;

Hitt xee diwsig jiauvi :ee qibiau ee su, liw jaix mah?

17 Toxde in'ui lamhongx jing jing ee sii,

Liw ee ihok jnaixngiu siyly, liw jaix mah?

18 Liw qamxx e qapp Ix snaqab pox qiongcongx mah?

Jitt xee qiongcongx qending, cincniu juwjniaa ee qniar.

19 Guanw in'ui gugong be hiauxdid vailet guanw ee ue;

Liw diyhh qawsi guanw ingqaix duiww liw qongw simxmih.

20 Qamxx diyhh vyr Ix jaix, guaw beh qongw mah?

Langg qamxx rair siurr bedbyy mah?

21 Dnaxx langg byy knuar qnir qiongcongx lai canwlan ee qngx;

Dogdok hongx lecc quer, dyrr hro ix cingcaiw.

22 Qimx ee qngx dui' vakhngx cud .laii;

Siongrder u uigiamm tangx qniax.

23 Juanlingg :ee, lanw be e cikdok Ix;

Ix u dua linglik, u qongvingg ciongmuaw qonggi, byy beh koxcow langg.

24 Soxiw langg qingwuir Ix;

Ix byy knuar u diwhui ee simx :ee.

38 Hitt sii Jehovah dui' dua hongx ee diongqanx rinr Job qongxx:

2 Dnaxx jitt xee ing budix ee ue, hro soxx girlun :ee byy bingg,

Si jirjui ar?

3 Liw diyhh haa iyx cincniu dairdiongrhux;

Guaw mng liw, liw rinr Guaw.

4 Guaw he de ee derqix, hitt sii liw dirr dyclyc?

Liw narr jai'ngiaw dyrr qongw ix.

5 Jirjui dniardiyc ix ee cunwciyh,

Jirjui kanx jinsyh dirr ix ee dingxbin, liw jaix mah?

6 Ix ee derqix cai dirr simxmih ee dingxbin?

Iacc si ix qaktauu ee jiyc, jirjui andir ar?

7 Dng' hitt sii tniqngjaw ee cnxix snaqab cniuwquax;

Siongrder ee jiongww qniaw iarr longxx cud hnuahiw ee sniax.

8 Duarhaiw ciongx cud, cincniu dui' txex nirr cud .laii,

Hitt sii jirjui ing mngg qnuaix ix?

9 Hitt sii Guaw ing hunn juer ix ee snxax,

Ing oamr juer vor vaux ix;

10 Qra ix dniardiyc Guaw soxx lip ee qaiwhan,

Qycc qra ix sed mngqongg qapp mngg.

11 Qongw: Liw tangx qaur jiax m tangx vnuaa .quer,

Liw qiaugno ee ingw qaur jiax uijiw.

12 Dui' liw cutsir ee zit ixlaii, liw bad bingrling jaxkiw-sii,

Hro tniqngjaw jaix ix ee soxjai;

13 Hro ix kiuw de ee siwqik,

Jiong' pnaiw langg vnua .cud .kir?

14 Ix dyrr venwngua cincniu quer inr ee too,

Inx cuthen cincniu ihok.

15 Pnaiw langg soxx sngr juer inx ee qngx, dnaxx duiww inx siux dywdngw,

Giac quann ee ciuw beh atjic.

16 Liw bad zip haiw ee juixguann mah?

Iacc si bad qniaa dirr cim'enx viwbit ee soxjai mah?

17 Sixbyy ee mngg u qra liw kuix mah?

Siximr ee mngg, liw bad knuar .qnir mah?

18 De ee kuacdua, liw u knuar taur .byy?

Liw narr itjin jaix, jueww liw qongw.

19 Qngbingg kiarkiw ee soxjai, hitt diauu lo dui' dyclyc kir,

Qycc oamr ee soxjai dirr dyclyc;

20 Tangx hro liw cua ix dyr kir ix ee qingxqair?

Liw e jai'ngiaw taur qaur ix ee cur ee lo mah?

21 Liw jaix lar, in'ui hitt sii liw ixqing' cutsir,

Liw nihuer ee siauwgiac iarr je.

22 Liw bad zip seh ee kowvangg,

Iacc si knuar qnir pauc ee huxkor,

23 Dyrr si Guaw soxx siukngr laii tingwhau huanrlan ee qrii,

Tingwhau sna' taii qaujenr ee zit mah?

24 Qngx dui' simxmih lo vunx kuix?

Danghongx dui' simxmih lo siwqer cuex dirr derjniu?

25 Jirjui qra dua horjuiw kuix lo;

Iacc si virvan luiden ee lo;

26 Laii lyc ho dirr byy langg ee de,

Dirr byy langg kiarkiw ee kongwiaw;

27 Ho pahngx honghuer ee de did diyc qraur gxiac,

Hro cnicauw huatsnix.

28 Horjuiw u laurve mah?

Lorjuiw jit diamw jit diamw, jirjui snix :ee ar?

29 Vingx dui' simxmih ee txex cud?

Tnix ee sxngx, si jirjui snix :ee ar?

30 Jiaxee juiw qending cincniu jiyhtauu,

Cim'enx ee bin qed qui' der.

31 Bauxcnix qui' cog, si liw vak :ee mah?

Camcnix ee duar si liw tauw :ee mah?

32 Liw hro jap-zi xee qiongx jiauww ix ee sihau cud .laii?

Iarr cua vakdauw qapp ix soxx sriok ee cnxix mah?

33 Liw jaix tnix ee dingrle mah?

Iacc si sed ix ee qxuann quanxhad de mah?

34 Liw e cud sniax qiyr hunn,

Hro horjuiw jerje ziakamr liw mah?

35 Liw e huad cud sicnar, inx dyrr kir,

Duiww liw qongw: Guanw dirr jiax.

36 Jirjui ing diwhui he dirr lairbin?

Jirjui sniuxsur cangmiaa dirr simlai?

37 Jirjui e ing diwhui sngr hunn ee siauwgiac?

Jirjui e vniar tnix ee punn;

38 Hitt sii din'aix jniaa juer tobee,

Too dyrr qed qui' txuann?

39 Liw u qra buw ee sraix lrak diyc jiahmic?

Hro sai'axtunn jiac vaw mah?

40 Dyrr si ix dirr het-lai tnir kax,

Dirr unxbat ee soxjai bih lehh ee sii.

41 Oaqniaw ngr Siongrder aiqiuu;

Byy tangx jiac, vuex laii vuex kir ee sii,

Jirjui uirr oax virvan jiahmic ar?

39 Snuax nirr ee snua'ngiuu dirsii snix, liw jaix mah?

Logbuw snix qniaw, liw knuar cud mah?

2 Inx qruar qrui dirsii qaur guec, liw e sngr mah?

Inx dirsii snix, liw e hiauxdid mah?

3 Inx kutsinx snix qniaw,

Vangr cud inx ee lykow.

4 Inx ee qniaw jiamrjiam vuipauh, dirr snua'iaw diongxdua;

Inx cud .kir, dyrr byy qycc dywdngw .laii.

5 Jirjui vangr iaw luu cud kir juriuu?

Jirjui tauw snualuu ee syh?

6 Guaw ing kongwiaw juer ix ee cur,

Ing qiamm ee de juer ix kiarkiw ee soxjai.

7 Ix tixciyr sniaa-lai ee suanhuax,

Qnuaw jingsnix :ee decc huah, ix iarr m tniax.

8 Venww snuax si ix ee cauxdniuu;

Ix iarr cue dagg ngiu cnicuir ee mic.

9 Iaw guu qamxx kingw hogsai liw?

Iacc si hiyh dirr liw ee jxyy-vnix?

10 Liw e ing syh vak iaw guu dirr leqaux mah?

Ix beh duer liw vue snuaqog mah?

11 Qamxx tangx in'ui ix lat dua, dyrr uaxkyr ix?

Qamxx tangx ing liw ee qangx qaudair ix mah?

12 Liw qamxx tangx sinwkyr ix duar liw ee jingxjiw dyr .laii;

Qycc siusip liw ee gorqakdniuu mah?

13 Dyjiauw ee sxit hnuahiw decc et;

Danrsi ix ee sxit qapp xmngg u ju'air .byy?

14 In'ui ix vangwsag ix ee nxng dirr de nirr,

Hro ix dirr tosuax did diyc siyly;

15 Byy sniu diyc kax e lab .diyc,

Iaxsiur e dac .diyc.

16 Ix byy kyxlinn ix ee qniaw, cinciu m si ix ee;

Ix ee diyhbuaa kangx kangx, ix iarr byy kuawlu.

17 In'ui Siongrder hro ix byy diwhui,

Iarr byy hro ix u lingkiauw.

18 Ix tingxsinx quann quann ee sii,

Dyrr biauxsi bew qapp kiaa bew :ee.

19 Bew ee lat si liw hro ix :ee mah?

Liw ing e crangr .kiw .laii ee jangx muax ix ee amrqunw mah?

20 Liw hro ix diytiaur cincniu cauxmeh mah?

Ix denxuix pngwpngr hauw jin' tangx qniax.

21 Ix dirr snuaqog diongx ing dxee vee too, qaqi hnuahiw ix ee lat;

Ix cud kir gniajih vingkir.

22 Ix biauxsi tangx qniax ee su, iarr byy lunw;

Iarr byy in'ui dyqiamr laii uat dywdngw.

23 Jniwde qapp qngx nawnar ee cniux, ixqip ciuxviyx,

Dirr ix ee sinjniu kiangkiangx hauw u sniax.

24 Ix huatsingr qapp dua siurkir, jiong' too tunx .lyc .kir;

Jid'err tniax qnir sauwqag ee sniax, dyrr m dnia dnia kia lehh.

25 Qniwnarr sauwqag dann, ix dyrr qongw: Arhah,

Ix dui' hng hng pni qnir qaujenr,

Qapp qundniuw cincniu luii ee sniax, ixqip huachiamr ee sniax.

26 Bahhiyc decc vuex, tiw kuix ix ee sxit, ngr lamm kir,

Qamxx si kyr liw ee diwhui mah?

27 Ingjiauw cringr quann dirr quann ee soxjai jyh siu.

Si tranr liw ee bingrling mah?

28 Ix diamr dirr jiyhvnuaa.

Kiarkiw dirr snuajiamx qapp qenqor ee soxjai.

29 Dui' hiax cue jiahmic,

Bagjiux qimx qimx knuar hng hng.

30 Ix ee qniaw suh huih;

Siurr taii :ee dirr dyclyc, ix iarr dirr hiax.

40 Jehovah qycc rinr Job qongxx:

2 Hnor vren :ee, qamxx tangx qapp Juanlingg :ee venrlun mah?

Venrvog Siongrder :ee, dnaxx diyhh rinr ix.

3 Job dyrr rinr Jehovah qongxx:

4 Knuar ar, guaw si bixser, guaw beh ing simxmih inwdab Liw?

Guaw ing ciuw ngx guaw ee cuir.

5 Guaw ixqing' qongw jit vaiw, dnaxx byy beh rinr;

Qongw nng vaiw, iarr byy qycc qongw.

6 Jehovah dyrr dui' dua hongx ee diongqanx rinr Job qongxx:

7 Liw diyhh haa iyx cincniu dairdiongrhux,

Guaw mng liw, liw diyhh rinr Guaw.

8 Liw beh huewbyy Guaw ee qongvingg mah?

Liw beh gixdnia Guaw u jue, laii henxbingg qaqi juer gi mah?

9 Liw u cincniu Siongrder hitt hy ee ciuxqud mah?

Liw e cud sniax kiw luii, cincniu Ix mah?

10 Dnaxx liw tangx ing junquir uigiamm juer jngtna,

Ing ingqngx bixbiau juer ihok.

11 Diyhh vniar cud liw muaw muaw ee siurkir;

Knuar itcer qiaugno ee langg, hro ix qangwqe.

12 Knuar itcer qiaugno ee langg, accic hro ix qe,

Dac pnaiw langg dirr inx soxx kia ee de.

13 Qra inx juer jit xe kngr dirr tohunw;

Vaux bat inx ee bin dirr oamr bat ee soxjai.

14 Anxnix Guaw dyrr singzin liw;

Jinjniar liw ee jniar ciuw e qiur liw.

15 Dnaxx liw knuar hybew, Guaw jy liw, iarr jy ix;

Ix jiac cauw cincniu guu.

16 Knuar ar, ix ee kuiwlat jairdirr ix ee iyx,

Ix ee linglik dirr ix ee vakdow ee qibah.

17 Ix iyy buew cincniu vikhniuciu;

Ix ee duartuiw ee qinx sna' lenlok;

18 Ix ee quttauu cincniu dangqngw,

Ix ee jitew cincniu ticdiauu.

19 Ix si Siongrder jiaxee qangx ee derr id;

Congwjy ix :ee e ing dyx cinqin ix.

20 Jiaxee snuax sidjai qra ix cud jiahmic,

Can'iaw ee vacsiur iarr tittyy dirr hiax.

21 Ix dyw dirr lenhuehiyc kax,

Kunr dirr qui' py lodig ee imwngw xe, qapp juixkud lai.

22 Lenhuehiyc ee imwngw ziakamr ix;

Kex-vnix ee liuxciu uisec ix.

23 Knuar ar, dyrr narr hyjuiw huanwlam, ix iarr byy qniax;

Jordan Hyy diongr qaur ix ee cuir, ix iarr anzenn.

24 Jirjui e dirr ix bagjiux qimx qimx ee sii liac diyc ix,

Iacc si ing uahkaur qngr ix ee pni ar?

41 Liw e ing qaux tuax goghii kiw .laii mah?

E ing syh lriur ix ee jic mah?

2 Liw e ing syh qngr ix ee pni mah?

E ing cxir cak taur ix ee gejyy mah?

3 Ix beh ing jerje ue qriuu liw mah?

Duiww liw qongw unziuu ee ue mah?

4 Ix qamxx beh qapp liw lip iog,

Hro liw ingxuanw liac ix juer lovok mah?

5 Liw qamxx e qapp ix tittyy, cincniu jiauw-aw mah?

Liw e vak ix, hro liw siauwlenn ee luxjuw kanx mah?

6 Qui' vxangx ee tyxhilangg, qamxx tangx ing ix juer bexbe ee mic?

Iacc si e qra ix vunkuix hro singlixlangg?

7 Liw e ing kauliamm venww cak ix ee puee mah?

E ing hicex venww cxex ix ee taukag?

8 Liw ee ciuw hnua dirr ix ee dingxbin;

Qir did qapp ix qaujenr ee su, dyrr m qnaw qycc anxnix juer.

9 Knuar ar, liw siauwsniu ix si kangx kangx;

Jid'err knuar qnir ix, qamxx be sitdnaw mah?

10 Byy jit langg hiacc hyxdnaw qnaw ziaw diyc ix;

Anxnix, jirjui e kia dirr Guaw ee binrjingg ar?

11 Jirjui dairsingx hro Guaw, hro Guaw diyhh vywdab ix?

Tong' tnie longxx si Guaw ee.

12 Lun qaur goghii ee jitew, qapp ix ee dua lat,

Ixqip ix suiw ee qutqeh, Guaw be e byy qongw.

13 Jirjui e vrag ix ee guarsnax?

Jirjui e zip ix dingxe hamx ee diongqanx?

14 Jirjui e kuix ix ee cuir?

Ix ee cuiwkiw siwuii longxx si tangx qniax :ee.

15 Ix soxx kuakauw :ee si ix iongw ee lrann.

Hap uaw dyrr cincniu hongx bat bat,

16 Jit xee jit xee sna' lenn,

Qaur krir be e taur zip hitt diongqanx.

17 Longxx sna' lenlok,

Liamm juer jit xee, be sna' vunx kuix.

18 Ix pah qacniur, dyrr huad cud qngx;

Ix ee bagjiux cincniu jaxkiw-sii ee bagjiupuee.

19 Dui' ix ee cuir huad cud dyc ee huexvew,

Qapp vuex .cud .laii ee huexcnix.

20 Dui' ix ee pni cud enx,

Cincniu hniaa louiw ee dniaw decc qunw.

21 Ix ee krir hro huextnuar dyc,

U huexiam dui' ix ee cuir cud.

22 Ix ee amrqunw u kuiwlat siongsiongg dirr hiax,

Qniahniaa dirr ix ee binrjingg diytiaur.

23 Ix amrquix ee bah sna' lenlok,

Kac diauu ix ee sinkux, be e iydang.

24 Ix ee simx ding cincniu jiyhtauu,

Cincniu erdunw ee byrjiyc hiacc ding.

25 Ix jid'err kiw .laii, iongxsu longxx qniahniaa,

Qniax qaur sitsinn.

26 Langg narr ing qiamr, ing kauliamm, ing viyx, ing jiamx cniux,

Cak ix longxx be zip.

27 Ix knuar tih juer dax cauw,

Knuar dangg juer vrox ee caa.

28 Qingjnir be e hro ix dyjauw.

Ing syh hnir jiyc, ix junw juer diurcauw.

29 Tuii-aw ix sngr juer diurcauw;

Langg buxlang cniux, ix dyrr tixciyr.

30 Ix ee vakdow xe cincniu lrai ee cuwhiarper;

Ix cincniu ticpuee tuax quer too.

31 Ix hro cim'enx qunw cincniu dniaw;

Hro haiw cincniu diauhyy iuu ee vxuah.

32 Ix hro ix aurbin ee lo huad qngx;

Hro langg pacsngr cim'enx si vec taumngg.

33 Juann de byy jit xee e viw did ix;

Ix siurr jy juer byy qniahniaa :ee.

34 Qniwnarr quandua :ee ix knuawkinx ix;

Ix dirr itcer qiaugno ee joglui juer ongg.

42 Job rinr Jehovah qongxx:

2 Guaw jaix Liw banrsu longxx e.

Liw ee jixir longxx be joxdongr .did.

3 Jitt xee budix laii kamr bat soxx girlun :ee, si jirjui ar?

Soxiw guaw u qongw cud guaw soxx byy bingg :ee,

Dyrr si guaw soxx sniu be cud ee qibiau, guaw soxx m jaix.

4 Qriuu Liw tniax guaw, guaw beh qongw,

Guaw mng Liw, Liw rinr guaw.

5 Guaw jingg hnirkangx tniax qnir Liw,

Dnaxx guaw ee bagjiux knuar qnir Liw;

6 Soxiw guaw qaqi iamwngor,

Dirr din'aix qapp huexhux ee diongqanx huanxhuew.

7 Jehovah duiww Job qongw jiaxee ue ixau, Jehovah dyrr duiww Temanlangg Elifaz qongw, "Guaw ee siurkir duiww liw qapp liw nng xee ving'iuw huad .kiw .laii, in'ui linw girlun Guaw, byy qongw habliw ee ue, cincniu Guaw ee lovok Job soxx qongw :ee.

8 Dnaxx linw diyhh uirr vunxsinx cruw cid jiah guqangw, cid jiah ngiuqangw, qaur Guaw ee lovok Job hiax, uirr vunxsinx henr siyjer. Guaw ee lovok Job beh ter linw qidyw; in'ui Guaw beh jiaplap ix, benw did Guaw jiauww linw ee gugong laii kuanxtai linw; in'ui linw girlun Guaw, byy qongw habliw ee ue, cincniu Guaw ee lovok Job soxx qongw :ee."

9 Dui' anxnix Temanlangg Elifaz, Suahlangg Bildad, Naamahlangg Zofar, jiauww Jehovah soxx bingrling inx :ee kir qniaa; Jehovah iarr jiaplap Job.

10 Job ter ix ee ving'iuw qidyw ee sii, Jehovah dyrr hro ix ee qingxhongw hogguann; qycc Jehovah sniuxsur Job viw ixjingg soxu :ee qavue.

11 Hitt sii ix ee jiongww hniadi, jixbe, qapp ixjingg sna' bad ee langg longxx laii qnir ix, dirr ix ee cur snaqab jiac, uirdiyhh Jehovah soxx qangr lyc dirr ix itcer ee jaieh, longxx visiongx laii an'uir ix. Dagg langg sangr ix jit der ginn, dagg langg sangr ix jit xee qimkuann.

12 Anxnix Jehovah suwhog Job ee buexqingw ngiaa quer ix ee kixtauu; ix u ngiuu jit-bxan sir-cingx, logdyy lak-cingx, guu jit-cingx duir, lubuw jit-cingx.

13 Ix iarr u cid xee qniaw, snax xee jaboxqniaw.

14 Ix qra dua jaboxqniaw miaa qiyr Jemimah, derr zi xee miaa qiyr Kelen Happuc.

15 Tong' hitt soxjai ee hurluw, cue byy cincniu Job ee jaboxqniaw hiacnirr suiw; inx ee laurve hro inx dirr hniadi diongx did diyc sanxgiap. Jitt diap ixau Job qycc jiac jit-vah sir-jap huer, did diyc knuar qnir ix ee qniaw, ix ee sunx, qaur sir dai. Anxnix, Job nihuer lau, zidjiw muaw, dyrr siw.

huedngw tauu iac