1. Lanw si simxmih kuanw langg?

Qoxjaw jairr sengiuu u jit xee dua gauu langg qawsi langg qongxx, "Langg diyh'air jai'ngiaw ix qadi." Jitt qxur ue si qongxx, langg jairr sewqanx beh hyw hyw quer jit siwlangg jiurr diyh'air lingjingx, u diwhui, jingtongx surliw, acc derr id dairsingx diyhh jai'ngiaw qadi. Sidjai jai'ngiaw qadi si jai'ngiaw bxan hxang ee kixtauu. Mrquxx jikdaii ee erkax huanxdngw si kacc amr; langg ee bagjiux be tangx didjiab knuar diyc ix ee bin. Cincniu anxnix, langg beh jai'ngiaw qadi si sniaw kuanw, m si iong'ngi ee dairjir. Suizenn si qanqer, jongw .si m jaix si dikkag be iong .did? Kongxjuw ee dua hagsingx Jingjuw u qongw, "Guaw jit zit ee diongqanx snax vaiw huanxsingw qadi ee soxx jyr." Lanw narr air jaix lanw qadi, jongw diyhh vutsii cincniu Jingjuw huanxsingw qadi ee soxx jyr soxx sniu. M na anxnix, iauxquxx diyhh vutsii sew cringx lanw ee hirkangx, hisimx tniax langg puepingg lanw. Qongw lanw hyw, iacc si qongw lanw pnaiw, lanw ingqaix hyw hyw qra ix kiyh laii jyr camkyw.

Narr si qokk langg u sidsimx kir anxnix jyr, qadi ee jywlangg si simxmih kuanw, qadi ee pinxqeh si quann iacc si qe, dyrr jiamrjiam e bingvik, sewqanx ee lo iarr dyrr jiamrjiam qniaa liauw kacc e jniar.

Guaw dirr jiax soxx air qapp dairqex genxqiur :ee m si beh qongw guaw si simxmih kuanw langg, iacc si liw si simxmih kuanw langg. Jex si qywzinn si dnuasinlangg ee dairjir. Qywzinn ee dairjir dyrr diyhh qywzinn qadi kir genxqiur, jiauww dingxbin soxx qongw ee huatdo kir huanxsingw jiacc driyc, jiacc e kakced.

Dirr jiax soxx rair girlun :ee si "Lanw si simxmih kuanw langg?" Si jiong' lanw Vunxdyxlangg snax-vah-lak-jap-bxan hniadi qiongrtongx soxu ee singwjid, rair laii snaqab genxqiur hro bingvik.

Lanw snax-vah-lak-jap-bxan hniadi jixmue si snaqab jojid jit xee siarhue, snaqab siuw jit kuanw ee hongsiok sibquanr, snaqab qongw siang kuanw ee ue, snaqab sewhe ligsuw, snaqab hettongw, snaqab joxsenx. Jongw qongw, lanw si siang jingxjok, si siang binjok lar! Lanw ee binjok dyrr si qiyr jyr Hanwbinjok. Soxiw tangx jaix, qongxx, "Lanw si simxmih kuanw langg?" Dyrr si rair bingvik lanw ee binjok ee singwjid. Binjok ee singwjid qiyr jyr "Binjogsingr." Beh bingvik lanw ee binjogsingr, dyrr diyhh siongser simxcad lanw hniadi-jixmue henrjai qapp quewkir ee siarhue singhuat. Lanw henrjai ee siarhue singhuat si jriw simxmic neh? Dyrr si jriw lanw dirr qadingg soxx jyr si simxmih kuanw, dirr hniuliw jingwlangg ee diongqanx soxx jyr si simxmih kuanw, qycjaiww duiww sewqair banrvangx banrqog, duiww tong' tnikae soxx jyr soxx sniu si jnaixngiu? Jiaxee si hro lanw tangx jaix lanw henrjai ee siarhue singhuat ee sidjer hongben.

Jongw .si iauxqyxx jit hongben lanw diyh'air jaix, dyrr si knuar lanw soxx siuw ee jongqaur, lanw soxx qingwvair :ee si simxmic, lanw duiww gersut u simxmih hingwbi; dyrr si knuar lanw soxx air knuar ee hxir, soxx air tniax ee imgak, sox air siongxguanw ee suue diaukig si simxmih jingxlui. Qycjaiww knuar lanw soxx air tak air jyr ee sibunn siauxsuad si simxmih ngiu. Quanhe jongqaur gersut jitt kuanw dyrr si susiongw hongben ee dairjir. Jongw qongw, air jaix lanw henrjai ee siarhue singhuat si sniaw kuanw, lanw dyrr diyhh jiauww dingxbin soxx qongw duiww lanw henrjai soxu qiongrtongx sidjer hongben qapp susiongw hongben ee singhuat juxser kekyw. Narr si iong jiacc qauwqangx genxqiur, dyrr dikkag e tangx bingvik lanw ee binjogsingr. Jongw .si jex si qanda' duiww lanw henrsii ee singhuat decc qongw nardnia, qiamxcaiw u dikkag be tauwted. Soxiw diyh'air qycc kamwjiog quewkir ee ligsuw jiacc tywdongr, lanw quewkir ee ligsuw si qapp Dngsnuax Diongqog ee langg qiongrtongx; soxiw langg narr air jaix lanw quewkir ee singhuat si jnaixngiu, jurzenn diyhh tak Diongqog ee ligsuw.

Ixsiong soxx qongw ee iauwdiamw si qongw lanw hniadi-jixmue air lanw ee singhuat kacc hiongwsiong, lanw dyrr diyhh bingbingg jai'ngiaw lanw qadi, dyrr si qongxx lanw diyhh bingvik lanw ee binjogsingr. Acc air jaix lanw ee binjogsingr, diyh'air genxqiur lanw henrjai siarhue singhuat ee sidjer qapp susiongw, iurqycjaiww diyhh kamwjiog quewkir ee surjig. Soxiw iarr diyhh tak Diongqog ee ligsuw. Guaw qongw jiaxee si qanda' tebingg rair lanw hniadi-jixmue bingvik lanw ee binjogsingr si jin' iauwqinw, iarr suar qongw beh jai'ngiaw ee huatdo. Lanw dirr jiax narr beh jiauww soxx qongw ee huatdo lyc kir genxqiur, jitt vunw ceh ee juaw iarr si siaw be liauw, lanw jiax iarr byy hiacc je ee qanghux. Soxiw siongser ee dairjir danxhau vadd xee qihue. Guaw dirr jiax qanda' jiong' guaw soxx genxqiur ee qetqyw, kacc dua iauwqinw :ee, qanxqanw qongw hro dairqex jyr camkyw.

2. Air hyvingg

Lanw ee binjogsingr ee derr id digsig, guaw qnaw qongw si air hyvingg. Simxmic si hyvingg neh? Dyrr si jiauww Kongxjuw soxx qongw, "Lanw soxx air kia ee soxjai diyhh hro vadd langg kia, lanw soxx air qaur ee soxjai iarr diyhh hro vadd langg qaur." Huanrsu qapp vadd langg qongqex, m qnaw qadi sukiax vawjiamr, knuar suwhaiw-lai ee langg jyr hniadi-jixmue kuanxtai. Lanw jitt kuanw ee simsingr si jurr jin' jaw dyrr iongxsingg laii :ee. Dairqex soxx jaix, lanw ee joxsenx si diamr Diongqog. Diongqog ee toxde si huisiongg ee kuacdua, u lanw Daiuann ee cavutdyx 282 vxue dua, iarr u Zidvunw Luerde ee 26 vxue kacc qex. Diongqog ee zinkauw dairiog u sir-ig, duxx cavutdyx si lanw Daiuann ee 110 vxue, iarr si Zidvunw dewqog ee jit vxue je.

Lanw dui' anxnix dyrr tangx jaix Diongqog ee siarhue jurr qoxjaw dyrr si jin' hogjap. Dirr jitt kuanw siarhue, qnuahuw ee ioksog si yh did jiujir. Pnaiw langg iurr jin' je soxjai tangx tiuter, sursu beh qewqaur, dikkag si byy jit zit ee vingjing. Soxiw jurzenn langlangg qadi siuw vunxhun, jundiong vadd langg ee derui, hap kuiwlat siy' jiauwqor. Kongxjuw ee qawsi u qongw, "Hyvingg si jueww derr id quiwdiong, jurr qoxjaw dyrr si knuar jitt kuanw dyrdig jyr siongrr hyw, vutlun duarser hxang su longxx jiauww anxnix kir jyr." Liw knuar, lanw ee langg huanrr dairjir vutjiw siuxqiw anhun, narr qongw pnaiw, eriongrdid qongw si kacc byy jiwkir, jongw .si narr kacc zinrjinx knuar, dyrr tangx jaix jex si cud duiww air hyvingg ee singwjid laii.

Jionglaii jaix Diongqog siongsiongg u siy' taii ziauxluan, cadbew iarr jin' je cniuxqiab langg, jex si sursit. Mrquxx diyhh knuar jinx, soxu siy' taii longxx si jywqnualangg ee iaxsimqax, jiyw jiyw byy zuarr je langg, si qanda' hiaxee langg decc luan, qapp juantew ee vecsner si longxx byy quanhe. Soxu ciwcir ee cadbew iarr si in'ui zidsit byy qauwgiac soxx vig. Jex ixgua duarvorhun ee langg longxx si kinbenw jywqangx, m qnaw sniu' quewtauu pnikamr langg. Guanlaii Hanwjok si diong bunn byy diong bxuw, qapp langg jingvniar ee dairjir, si vig .diyc ee sii jiacc kingw jyr.

Hanwbinjok duiww vadd jingxjok iarr si jin' diong hyvingg. Jex knuar Hanwjok qokk sidai ee susiongw dyrr bingvik. Inx jueww suacbuew ee lixsiongw m si sniu air quanxhad tong' tnikae. Inx si juxciongr "Dairdongg" -- hibang tong' tnikae qaur buew longxx siysiang, dairqex longxx pah jyr jidhuew. Benw qongw langg qiwzenn diyhh jojid qokqax quewzit, dikkag rair u taulangg, rair u juxquanjiaw. Hanwjok si air hyvingg air dairdongg, soxiw inx hnuahiw qapp vadd jxingw ee langg hap jyr qokqax; iarr ursii inx qnaw jyr tauu, ursii iarr qnaw huu langg jyr tauu byy qenwsiaur. Diongqog henrsii u hiacc je langg, m jaix hap quiw jap jingxjok dilehh.

Qycjaiww Diongqog jurr qoxjaw dyrr air gauu qycc u dikhing ee langg jyr qokqax ee juxquanjiaw; soxiw liw knuar, siongrr qoxjaw Giauder niurui hro Sunwder, Sunwder qycc niurui hro Uxder; dy' longxx si uirdiyhh jundiong hyw dikhing. Qaur Siongdiauu Diurongg budy, vecsner dyrr lirkuix ix, huangingg Bunongg jiangxquann. Qaur Songwdiauu buew, Guandiauu ee hongder dyrr dingw kiw laii juxquann jnia' vah nii quw. Lun Guandiauu ee hongder si Bongqoxlangg, qapp Hanwzinn qyc'ngiu jxingw; jongw .si ix u kuiwlat tangx hro vecsner ving'anx, muaw tnikae ee langg iarr dyrr longxx qamguan huu ix jyr tauu.

Iurqycc Cingdiauu ee hongder iarr m si Hanwbinjok ee langg, si Buanxjiujok; Hanwbinjok dyrr iarr qingwzenn huu ix, cxingx "Hongg," cxingx "Der" qaur cavutdyx snax-vah nii quw. Horlaii in'ui Cingdiauu soxx vran ee jingwdi m hyw, juann qokbinn dui' anxnix srid liauw ngwbang, jiong' hongder huewbyy, ngua jyr Dionghuax Binqog. Dionghuax Binqog kaiqog qaur dnaxx ixqingx u jap-sir nii. Inx ee qokqii si go sig ee vor jywjniaa :ee. Jitt qix qii dyrr si viauxbingg Dionghuax Binqog si go jingxjok ee langg, vnevnee hablat jojid :ee. Guaw qnaw qongw, jitt qix qii jin' tangx viauxbingg Hanwjok hyvingg ee simsingr. Liw knuar, jairr henrsii ee Diongqog, Hanwjok si jiamr jueww je langg, jueww u sewlik; jongw .si inx byy qaxjiar anxnix vaitig vadd jok, iauxquxx si hnuahiw qapp vadd jok siangrkuanw, jiamr jit der vnee dngg vnee dua ee vowliauu hap jyr jit qix ee qokqii. Dui' anxnix, iarr dyrr jiokgiac tangx jaix Hanwjok air hyvingg si qaur dyclyc mah?

Mrquxx diyhh qycc sniu jit diamw. Hanwjok ee air hyvingg si jinwvordig :ee iacc si tewsiuxdig :ee? Jiauww knuar si tewsiuxdig ee hyvingg kacc duarbin. Jnaixngiu qongw si tewsiuxdig :ee neh? In'ui inx soxx jyr :ee longxx u kngr jit xee "qadi" dilehh. Vutqyr si narr u hyw, hnuahiw qapp langg vunx; qadi hyw, iarr kingw hro vadd langg hyw, hitt kuanw ee hyvingg nardnia. Qiuwqingr jitt kuanw ee hyvingg si in'ui air qor qadi, hro lanw erdid tangx ving'unw kixqenr, soxiw m qnaw jyr pnaiw hro vadd langg be kamx .did, diwqaur laii puawhai lanw ee ving'anx, acc narr u hyw iarr kingw vunx vadd langg; si qniax narr byy anxnix jyr, hro langg' snex kiw uanwdor qapp lanw jokquair dyrr m hyw. Jitt kuanw ee hyvingg si qadi u hyw jiacc jyr e qaur :ee, qadi narr m hyw dyrr be qniaa .did. Narr si jinwvordig ee hyvingg dyrr m si anxnix. Diyhh m tangx tec qadi jyr piaujunw, uirdiyhh siarhue qokqax ee hyvingg; suizenn si vangwsag lanw ee hyw, iacc si vangwsag lanw ee snewmia, iarr si kingw kir jyr; jitt kuanw jiacc si jinwvordig ee hyvingg.

Hanwbinjok qiwzenn si air hyvingg, jnaixngiu qinaxzit Diongqog e jiacc luan? Jex dyrr si in'ui Hanwjok soxx air ee hyvingg si tewsiuxdig :ee; si uirdiyhh air qor qadi ving'anx kixqenr :ee, m si jinwvordig :ee, m si uirdiyhh air hro siarhue jingwlangg u ving'anx soxx snex .cud .laii .ee. Jex si in'ui Diongqoklangg kacc je longxx byy qauwiok, inx ee simsinn srid liauw qngbingg, qanda' u knuar qnir cenxqin ee dairjir, byy knuar qnir kacc cimx, kacc hng :ee; qanda' jaix u qadi, m jaix qadi qapp jingwlangg si snaqab jit diauu ee snewmia; jixu jai'ngiaw qadi ee qadingg diyhh qor, byy sniu diyc siarhue qokqax si iauxx kacc diyh'air qor. Soxiw narr qongw jit qxur kacc qanxdew, Diongqoklangg soxu hyvingg ee simx, in'ui si hro qor qadi ee simx pah uwuer .kir, soxiw Diongqog diwqaur cincniu qinaxzit hiacc luan. M na anxnix, Diongqoklangg sidjai uirdiyhh ix u hitt xee lirqixdig ee hyvingsimx, huanxdendyr sriu guarqoklangg kingbet, qongw ix si norziok byy hetsingr ee langg. Soxiw lanw air jaix Hanwbinjok u hyvingg ee simx si jin' hyw, qycjaiww jex si inx ee joxqongx qapp ligdai ee singwhenn soxx liutuann ee hyw qawsi. Kyxsiyh jitt xee singwjid uirdiyhh inx quxnii byy qauwiok, diwqaur sitjinx, henrsii suar vniwjyr inx ee norziogsingr, acc lanw hniadi-jixmue si qapp inx siang jit diauu juixmec lrauu .cud .laii .ee lar.

3. Jrunx joxsenx

Hanwjok ee binjogsingr derr zi xee digsig si gauu junqingr joxsenx. Qokk binjok dy' longxx u qingwdiong joxsenx, jongw .si byy cincniu Hanwjok hitt kuanw hiacc qauwqag, hiacnirr tetdew. In'ui Hanwjok jundiong joxsenx ee simx jin' ced, soxiw inx ee dyrdig si iong hauwhing jyr qinvunw. Soxiw u qongw, "Dionggi ee langg diyhh dui' u hauwhing ee qadingg jiacc did e diyc." Iurqycc qongw, "U haur qapp u duarser, jex si jywlangg ee qinvunw."

Hanwjok jundiong joxsenx ee hing'uii sidjai si sewqair soxx byy tangx viw :ee. Jiauww Kongxjuw soxx qongw "Uac dirr sewqanx ee sii diyhh jiauww lexsor hogsai :ee; siw .kir ee sii diyhh jiauww lexsor anjongr :ix; anjongr liauxau diyhh quw quw jewhenr :ee." Tangx qongw jit xee langg narr u tuann horsuu, ix ee horsuu ingxuanw diyhh e qir did diyhh hauwqingr :ix, soxiw tangx jaix Hanwbinjok uirdiyhh inx ee joxsenx ixqingx u huisiongg je ee dairjir tangx jyr.

Joxsenx uac ee sii Hanwjok ee langg anwjnuaxngiu qingwdiong ix; Joxsenx uac ee sii jyr qniaxsunx ee langg m qnaw hunkuix, jex kiokk iarr si uirdiyhh qapp langg jingvniar ee sii, tangx did diyc kacc je kaciuw, kacc an'unw; jongw .si kacc dua ee lixiuu si uirdiyhh air hongrsingg sirduarlangg hro ix u texben. Lanw u jit qxur siogguw qongw, "Iongxzii-tairlyw;" si qongw cri qniaw si uirdiyhh beh hongrsingg nilau. Dui' anxnix Hanwzinn ee qajok jniajyr jin' dua, sewqair cavutdyx byy vixping. Acc hitt xee qajok si siangrr lau :ee jyr diongsimx, uanxzenn cincniu jit qog ee hongder, itcer ee dairjir longxx hitt xee sirduarlangg juxir.

Sirduarlangg siw liauw qniaxsunx duiww ix si iong simxmih lexsor neh? Duiww laurve laurbuw dyrr diyhh siuw snax nii ee snghar. Jitt snax nii ee diongqanx, soxx diyhh jyr ee lexsig si jinjniar je, jinjniar ngidnii; tangx jaix uirdiyhh anxnix, diyh'air jin' je ee simsinn qapp puawhuir. Qycjaiww beh jyr sirduarlangg ee hongsuiw, iurr si dua dua huiwkir. Daiuann qinaxzit suisi u kacc qaiw, kacc je duiww hongsuiw ee quanliam iauxquxx si jin' cimx. Uirdiyhh jit xee hongsuiw kaix sir~go-bxan ginn ee langg, jairr guaw ee ving'iuw ee diongqanx dy' iauxx u. Narr lun qoxjaw uirdiyhh hongsuiw snex cud zinbing ee dairjir, hex si byy hihanw. Jairr Diongqog ee qinaxzit qiamxx m si qongxx in'ui hongsuiw ee joxdongr, duarlo iacc si huexcialo longxx be tangx jiauww iwsur kaised mah?

M na anxnix, Hanwjok qingwdiong joxsenx ee simx, dirr joxsenx siw liauw jin' quw ee ixau, iarr si byy be qir .did. Kongxjuw iarr u qongw, "Narr e hro dagg langg erhiauw qinxsin sirduarlangg ee buexzit, qycjaiww siauwliam sirduarlangg suar qaur jin' quw jin' hng, dui' anxnix vecsner ee dikhing dyrr e jniaa jin' hordiong." Soxiw qokk langg dirr cur-lai u sed qongmaxkamx, iacc si qesinvaii; kacc dua ee qajok dyrr kiw sudngg, muixx nii jiauww sijun qui' jok ee langg virvan lexmic jewhenr.

Uirdiyhh joxqongx ee qirsinn, Hanwjok ee langg qaur dnaxx soxx huir ee simsinn huiwiong m jaix u zuarr je: Rair e tangx quxdngg jewhenr joxsenx, jurzenn diyh'air u horsuu si jueww iauwqinw; soxiw lanw qongw vuthaur u snax kuanw, jiongdiongx byy qniaw si jueww dua. Dui' anxnix suar qongw, bow narr byy snex tingwhyw lirenn, iacc si qycc crua nng xee, snax xee, dy' si knuar jyr ingqaix. Hurzinlangg dui' anxnix sriu jin' dua ee pnaiw kuanxtai.

Jiauww knuar Hanwjok ee langg qapp lanw si juanjuanx uirdiyhh beh hogsai joxsenx dirdecc uac ee kuanw. Qingwdiong joxsenx ee simx sidjai si zinjingg ee ingqaix, si hyw ee dairjir. In'ui qingwdiong joxsenx ee liamrtauu huatdat qaur jitt kuanw. Hanwzinn vutjiw diwdiong zinjingg girliw, vyr inx liamrqiu ee simx si jin' uahdang. Soxiw narr qongw hyw, Hanwzinn si vutjiw dunho pycsit; narr qongw pnaiw, si vutjiw kacc siuxqiu qowjib. Sewqair puepingg Hanwbinjok si vyxsiuw ee binjok, jex narr si urngiaw, hitt xee guaninx dyrr si dirr jiax.

Zinjingg kacc dunho kacc u jongdiong ee kiwkair. Jex si Hanwjok uixdai ee singwjid, jongw .si huanrsu sniu' quewtauu dy' longxx si m hyw, langg sniu' quewtauu siuxqiu dyrr vniwjniaa guanqor be jinwvo, berhiauw qaixqig, qaur buew siarhue longxjongw siw siw byy uahkir, itkair ee sibquanr hongsiok dy' longxx cniurpuw sneqox, hro au dai ee qniaxsunx longxx vniwjniaa liauxbuexqniaw. Liauxbuexqniaw si qanda' erhiauw hiongxsiu joxqongx ee giabsanw, diamr joxqongx ee puar cur, cing joxqongx ee puar snxax, dir joxqongx ee puar by nardnia; qiuwqingr si longxx byy vadd diauu lo tangx qniaa. Liw knuar, hniadi-jixmue, lanw cniaw snaqab knuar, cniaw knuar lanw siarhue ee bxan hxang. Lanw ee iyhdiamr soxx vaii :ee longxx si "Jrunx qoxhuad jer" :ee, si Sinlongg ee sidai soxx hautqenr ee qu hngtauu. Vadd langg ixqingx qiyr luiqongx decc qar inx tuax ciax, qiyr sicnar qar inx cuarlo; mrquxx lanw ee hniadi-jixmue qiamxx m si iauxquxx ciuw nirr giac hniux, cuir decc qidyw, qriuu inx ee kuanwbenw vyxvir! Lanw soxu ee ceh dyrr si qanda' hitt quiw vunw lauw lauw lauw ee "Suwsux Gnoxqingx". Lanw hitt quiw der puar vnevangx ee dingxbin, vutsii dy' si quiw xee bongtauu-qaiwbin ee puawvowvanx, decc jyr Quanx Hujuw jenr Utdiqiongx ee cuttauu lar! Hniadi-jixmue, lanw diyhh zinrjinx. Lanw erhiauw iong lanw ee kensingg hauwqingr lanw ee joxsenx sirduarlangg, jex si jin' hyw ee singwjid. Mrquxx narr gorqaiw Kongxjuw hitt qxur ue qongxx, "Snax nii narr byy qaixvenr laurve ee soxx qniaa soxx jyr, dyrr e tangx cxingx jyr si urhaur." narr si sixvanw qowjib jitt qxur ue ee sniabuew, byy beh qycc sniu vadd kuanw ee venwkiaur, lanw qnaxx m jaix qaur qinaxzit ee logpig!

4. Gauu zimxnai

Hanwjok ee siarhue jiauww dingxbin soxx qongw ee kuanw si jin' hogjap, inx ee qadingg iarr si jin' je langg jywhuew kiarkiw; dui' anxnix langg qapp langg ee quanhe si jin' ngidnii. Dirr jitt xee diongqanx qokk langg dy' longxx u qokk langg ee singwpiah, soxiw gig'ir ee dairjir dikkag si viw sunrir :ee kacc je, narr si dagg langg beh tranr jurqiw ee iwsur, dikkag dairqex diyhh jit langg hunx jit dah. Jongw .si jex si inx soxx jyr be qaur ee dairjir. Dirr quw quw ee diongqanx sriu jin' je ee ciwlen, jurzenn-zizenn huatqenr jit diauu qaixqiur ee lo, dyrr si zimxnai tunlunw ee lo lar. U jit qxur siogguw qongw, "U jit-vah vaiw tunlunw ee qalai, dikkag u jin' dua ee hyhyw." Sidjai Hanwjok ee langg zimxnai ee singwjid si jin' qenqor.

Zimxnai ee iwsur u nng kuanw. Jit xee si jiauww dingxbin soxx qongw tunlunw ee iwsur, u jin' be kamx did sriu ee dairjir, ing qiongg qra ix siux .kiw .laii. Iauxx jit xee iwsur si gauu dongr quw, quw quw byy venwngua kixtauu soxx dniardiyc ee dairjir. Hanwjok u jitt kuanw singwjid jiacc qenqor; derr id si dui' siarhue ee quanhe laii; derr zi si dui' hongtow ee qamxhuar laii. Diongqog ee de, vnede dyrr si vnede, lensuar quixnarr cingx lxiw longxx byy venwngua; snuax dyrr si snuax, lenlenn qui' dua pxenr; kiwhau qnuaa diyhh qnuaa jin' quw, zuac iarr si zuacc jin' quw; lyhho kiw hongx longxx u itding ee siqii; jex qiyr jyr dairliogsingr ee hongtow. Diamr dirr jitt diongqanx vutdix-vutqag sriu ix ee qamxhuar, singwjid kacc be qipsyr, kacc gauu dongr quw; qongw hyw dyrr si gauu zimxnai; qongw pnaiw, dyrr si tuanua didun, byy hetkir, byy sinqingx. Duiww hyw ee hongben qongw Hanwbinjok u jitt kuanw dua zimxnai, qapp dingxbin soxx qongw u jin' hyvingg ee simx; soxiw langg vutjiw dairhongx dairpenwpig, u jit jxingw ciong'iongg vutvig ee kiwkair. Mrquxx narr dui' pnaiw ee hongben knuar, berbenw si jin' didun jin' norsingr, nua nua cincniu too; huanrsu byy-iauw.-byy-qinw ee kuanw, qowjib jitt kuanw longxx byy venwkiaur; vixping cincniu Sengiuqir ee lairbin soxu hitt xee diqyjniax, iong ix ee diqycuir, mimii decc giaa hitt xee caur kirquexsnuax jidngiu.

Jyr Hanwbinjok ee langg, cniaw ciwsniu .knuar, dauwdiw lanw jitt xee gauu zimxnai ee singwjid si ngr dycc jit bin kacc je? Si kuan'iongg gauu vauhamm tunlunw, iacc si norsingr, byy sinqingx byy qamxqag, langg qra lanw puiwnua dirr bin nirr iarr liahjyr si qra lanw hiur pangjuiw; m hanrdnia m qnaw crid .kiw .laii, dendyww damr tauu qra langg' sueh loxlat. Qycjaiww si simsinn u vaxag, u jetcyr; jit vaiw quatsimx ee dairjir qaur siw dy' byy venwngua, acc si guanbee qowjib siuxqiu byy venwkiaur kitjiahnguaw vangr longxx be li. Qiuwqingr si sriok dirr dycc jit vingg?

5. Diong sidjai

Lanw ee tniatauu siongsiongg u qruar Jaii-jxuw-sxiu ee duarcag. Hyxgiac, je qniaxsunx, dngg huewsiu, jitt snax hxang narr e longxx jevi, lanw ee langg liac anxnix jyr derr id hyw mia, u hokkir. Dairkair si knuar jitt snax hxang jyr jit siwlangg siangrr dua ee soxx did, tangx qongw lanw ee langg zidzit decc kikkinn-kikkow, dy' longxx si uirdiyhh jex kacc je! Heer! U jnii, je qniaxsunx, dngg huewsiu, u jitt snax hxang ee soxjai m jaix quiw langg byy sniu beh air kaur? Dairqex dy' si knuar jex qapp ix ee snewmia cavutdyx vnee dang, suizenn si did be diyc, iauxquxx jiong' hex ue diamr cag-aw qruar jnriu viah-dingw knuar, dy' iarr vutjiw e sriu an'uir ee kuanxsid. Or ar! Qauwgiac tangx giuw langg ee simqnuax lar, Jaii! Jxuw! Sxiu!

Dui' Hanwbinjok ee diongqanx iauxx m bad tniax qnir u congwsed simxmih jongqaur. U Zuqaur(Kongxjuxqaur), jex beriongrdid qiyr jyr si jongqaur; jex si jit jxingw qrangw dyrdig suad zingi ee qawsi, cincniu haghau ee sensnex qawsi hagsingx si qar langg s.-sidjai-j. ee dairjir, dy' si sewqanlangg qapp langg jicjiab ee su, m bad quanhe sinbingg au-laii ee dairjir.

Narr si jongqaur dikkag diyhh jixbingg jit kuanw ee sinbingg, diyhh u qingdenw qir bingg Sinn ee jixir iacc si quanhe Sinn ee surjig, diyhh u itding lexvair ee gisig. Iauxquxx soxx qawsi ee dairjir kiokk m si longxx byy quanhe henrjai, jongw .si langg siw liauxau ee dairjir si knuar iauxx kacc dang, si juandiong qongw hitt hy kacc bibiauw kacc cimx kacc ingxuanw ee su. Soxiw dui' anxnix knuar, tangx qongw Zuqaur(Kongxjuxqaur) m si jongqaur.

Lyxjuw(Liw Lyxqunx) soxx qongw ee iarr si jit jxingw ee dethak, beriongrdid qongw si jongqaur. Horlaii ee langg liac ix (Liw Lyxqunx) jyr Qauwjuw, cincniu jitt kuanw qiyr jyr Dyrqaur. Hex kixtauu si beh genxqiur jyr senx ee huatdo, qaur qinaxzit suar vniwjyr cincniu jongqaur ee kuanxsid. Ixgua cincniu vair Quanx Dewqunx, Maxjow, Toxdirqongx, iacc si simxmic Ong'iaa, Huzinmaw, jex longxx si jit jxingw junqingr inghiongg gauu langg ee simx vnewjniaa :ee, qapp lanw jingwlangg decc qingwvair qongmaw si siysiang jingxlui. Qitnax iarr u langg decc vair dua ciu, dua jiyhtauu, vair zidtauu vair guehniuu, cincniu jitt lui dy' benw qongw.

Dirr Diongqog iacc si lanw Daiuann henrsii soxu ee jongqaur dyrr si Vudqaur, Huehueqaur, Iasoqaur. Jitt quiw jxingw m si Hanwbinjok soxx congwsed :ee, longxx si dui' guarqog tuann .laii .ee. Jiaxee jurr tuann laii Diongqog ixau m na byy kacc huatdat, dendyww si u kacc hunrluan tewvo ee kuanxngiu. Hanwbinjok qadi byy congwsed jongqaur. Qycjaiww dui' vadd dah tuann :ee iarr be tangx kacc huatdat, jitt hxang iarr dyrr jiokgiac tangx jingwbingg Hanwjok si diong sidjai, diong henrsii bagjiux-jingg ee dairjir, byy sniu quansimx dirr jionglaii ingxqiuw ee quiqiok. Huanrnarr kacc hng kacc bibiauw :ee dyrr kacc byy cuwbi ee kuanxsid. Soxiw inx hibong :ee dyrr si Jaii, Jxuw, Sxiu. Soxx qawsi soxx girlun :ee dyrr si siusinx, jeqax, dirqog, vingg tenha hitt kuanw s.-sidjai-j. ee dairjir.

Hanwjok jnaixngiu jiacc hingr diwdiong sidjai neh? Jiauww guaw sniu, derr id si Diongqog ee toxde taiww dua, langg iurqycc si jin' je, drir qaur bxan su jin' hogjap, jin' kuair hunluan. In'ui anxnix, hro langg m qnaw sniu kacc hng ee dairjir, jurzenn si kacc diong bagjiux-jingg. Cincniu siogguw soxx qongw, "Kongxjuxqongx m qnaw siux langg' ee qeh mee tiab," huanrsu dy' rair hen duw hen, sit duw sit.

Derr zi hxang hro Hanwjok kacc hnauu sidjai ee guaninx, dyrr si qajok jewdo; jitt xee qajok jewdo ee iulaii si dui' qingwjow liamrqiu ee susiongw cud. Lanw ee qajok jewdo ee diongsimdiamw si dirr jewhenr joxsenx. Dui' anxnix, jurzenn hingdong dyrr kacc be juriuu, kacc siuxqiu, joxqongx iacc si jinwjingg ee langg soxx qongw soxx sed :ee dyrr kacc m qnaw giaugii m qnaw qaixngua; hro langg byy jinwcuw ee simqnuax, byy morhiamw ee singwjid, qiuwqingr iarr si qanda' qriuu vryw henrsii ee ving'anx, m qnaw qycc sniu beh tiamx jionglaii ee hoksiu.

Lanw in'ui diong sidjai quewtauu, diwqaur hagbun jitt hongbin m na byy huatdat, suar tewvo jin' je; acc zidzit ee singhuat suar jin' byy cuwbi. Piwlun duiww jiahmic qongw, lanw ee langg kacc diong hyw jiac qycc siok, longxx kacc byy diwdiong hyw knuar gnaxkir. Liw knuar, lanw ee langg decc bexbe longxx si juanx diong hitt hxang mic ee jerjiyw hyw-pnaiw, longxx kacc byy diong hitt hxang mic ee knuawtauu. Vnevnee brew jit xee ginn ee vniaw laii qongw, narr si Luerderlangg iacc si guarqoklangg, inx dyrr jiong' hitt xee ginn pnex jit qag iacc si quiw jiamx jnii jyr ap-aw vaux juaw ee huiwiong, vaux hro ix hyw knuar, be bag lasamm, inx kacc hnuahiw. Mrquxx lanw ee langg dyrr m si anxnix. Brew jit xee ginn, hitt xee ginn dy' longxx diyhh iong dirr vniaw nirr, vniaw narr e qex jit der si qex jit der hyw, vaupuee longxx byy qor, qachac iarr si hyw, sinbunjuaw iarr si hyw; u tangx vaux tec qaur cur, be pacqalauc dyrr hyw liauw liauw. Bxan su dy' u jitt kuanw ee kinghiongr.

Tangx qongw duiww cuwbi jitt hongbin ee quanliam, lanw ee langg sidjai jin' byy huatdat, sux vadd langg sidjai si jin' je. Jongw .si jex longxx si dui' lanw diwdiong sidjai quewtauu soxx drir .laii .ee. Guaw qnaw duanr, lanw ee hniadi-jixmue ee dua vnerqinx si dirr jitt diamw. Hanwjok dirr qinaxzit ee sewqair jiongww binjok ee diongqanx be tangx kia dirr kacc quann ee derui, duiww langg' taukag giac longxx be kiw, jex qui'ee si dui' jitt xee puawvne soxx dair .laii kacc je.

Hniadi-jixmue! Lanw tniatauu hitt vxag Jaii, Jxuw, Sxiu sidjai m si qaur hiacc suiw ee mic lar. Guan dairqex qinw qinw vrag .lyc .laii, acc cniaw dairqex jingsinn dua qakgno, tauu giac kacc quann, bagjiux knuar kacc hng. Bagjiux-jingg sidjai ee dairjir benw qongw lanw diyhh knuawdang, jongw .si cniaw m tangx uirdiyhh bak-jingg qinaxzit ee dairjir suar be qir did binaxjair ee qewboo.

Lanw u jit qxur ciywkuex ee ue qongw, "Lu Dongrvinx, qor cuir byy qor srinx." Guaw vutjiw huanlyw lanw dongvaux ee diongqanx u jin' je Lu Dongrvinx ee dode, pacsngr lanw narr m qinw qinw huetauu qexvnir, qnaxx e hro ix dro kir haixgua jyr sanxsenx, berdangr diamr dirr jitt xee sewqair bunbingg ee siarhue qapp langg' vnee jre vnee kia lar! Hniadi-jixmue! Diong sidjai si hyw, jongw .si m tangx diong quewtauu, na diong quewtauu, qaur buew sidjai si e vniwjniaa jyr kangx kangx.

Guaw jitt diap decc siaw jitt pnix bunn, u duw diyc jit jann cuwbi ee dairjir. Guaw ee laurbuw qinnii 69 huer, jitt diap ix dirr txangx-aw-gua decc ag qiokhuex. Guaw vangr lyc vid uaw kir knuar, qiokhuex ixqingx pah jin' je mm dilehh. Guaw crunx ciuw jiong' hiaxee mrjniamic ee huemm beh qra ix liamr danwsag, tangx hro huex kuix liauw hyw sewbin, iarr e kacc dua luiw. Laurduarlangg jiong' guaw ee ciuw qra guaw liac lehh qongw, "Aixior! Bycaiw langg ee mic, m tangx lar." Led'ui, ix si guaw ee sirduarlangg, jongw .si guaw sinr ix jitt xee simsux qnaxx e iong did dairviauw lanw ee hniadi jixmue ee. Lanw dirr jingr huex ee diongqanx iauxquxx qaur dirr jitt xee kuanw, qanda' knuar qnir huemm je luiw dyrr hnuahiw, qra ix liamr .kiw .laii dyrr m qramx, anxnix qetqiok si byy hyw huex tangx knuar lar!

huedngw tauu iac